Mũthũkũme Yeova, Ti Satani

Ithyonthe twĩ na ũnyuvi. Ũndũ ũmwe nĩ kũthũkũma Yeova kana kũthũkũma Satani na ndaimoni syake. Tũitonya kwĩka maũndũ asu melĩ. Nĩ ũndũ wa ũĩ kũmũthũkũma Yeova!

Yeova Nĩ Mũseo

Tondũ twoona, ndaimoni itanĩaa kwĩka andũ naĩ na kũmakenga. Yeova ndailyĩ ũu. We nĩwendete mũvaĩ-wa-andũ tondũ ĩthe-wa-syana wendete syana syake. We nĩwe Mũnengani wa “kĩla kũnengwa kũseo na kĩla kũnengwa kwĩthĩanu.” (Yakovo 1:17) We ndavataa mũvaĩ-wa-andũ ũseo o na wĩva, o na ethĩwa we mwene nũkũkwata wasyo mũnene.—Aeveso 2:4-7.

Ĩsilye ĩũlũ wa maũndũ ala meekiwe ĩũlũ wa nthĩ nĩ Yesũ, Mwana wa Ngai. Atumie andũ mataneenaa maneena na atuma ililinda syona. Nĩwavoisye awau-ma-mangũ na au-ma-mamutha. Nĩwaumisye ndaimoni na avosya mowau ma mĩthemba yonthe. Kwa vinya wa Ngai, Yesũ o na nĩwookĩlilye akwʼũ meethwa na thayũ.—Mathayo 9:32-35; 15:30, 31; Luka 7:11-15.

Vandũ va kũneena movũngũ nĩ kenda atwasye, ĩvinda yonthe Ngai aneenaa wʼo. Ndakengaa mũndũ o na wĩva.—Motalo 23:19.

Ĩvathe na Imanyĩo Mbuku

O tondũ ũlũalũĩ ũlũmasya ngi ĩkalũma ngʼa, nowʼo mamilioni ma andũ malũmĩtwʼe nĩ wʼĩa ũkonetye mĩĩkĩĩo ya mavuso mathũku na ũvũngũ. Nĩmakĩaa akwʼũ. Nĩmakĩaa ndaimoni. Nĩmakwatawa nĩ kĩmako kwoondũ wa iumo, nyũnyi, ithitũ na mĩio ya mowe. Methĩawa makwetwe nĩ mĩĩkĩĩo na syĩthĩo syĩ na mũsingi wa movũngũ ma Satani Ndevili. Athũkũmi ma Ngai mayĩthĩawa makwetwe nĩ kĩtei o na kĩva kya maũndũ asu.

Yeova e vinya mũno kwĩ Satani. Wamũthũkũma Yeova, akakũsũvĩa na ndaimoni. (Yakovo 4:7) Kũingĩwa ithitũ kũikakwĩka naĩ. Kwa ngelekanyʼo, nthĩ ya Naingyelia, andũ awe atatũ me vinya nĩmaingie ithitũ moae Ngũsĩ ya Yeova ĩmwe ĩla yaleile kuma mũsyĩ wa kũu. Yĩla ithitũ isu syaemiwe nĩ kũmwĩka naĩ, ũmwe wa andũ awe asu nĩwakwatiwe nĩ wʼĩa, aendea Ngũsĩ ĩsu, na eetya kwĩwʼĩwa tei.

Ndaimoni syakũnyamasya, nũtonya kwĩkaĩla Yeova kwa syĩtwa yake nake akakũsũvĩa. (Nthimo 18:10) Ĩndĩ nĩ kenda wĩthĩwe na ũsũvĩo wa Ngai, no nginya wĩthasye vyũ kumana na kĩla ũndũ ũkonetye kũneenanyʼa na maveva na ũthaithi wa ndaimoni. Athaithi ma Ngai nthĩnĩ wa Eveso wa tene meekie ũu. Moombanisye mavuku moo monthe ma wĩki wa syama na mamavĩvya. (Meko 19:19, 20) Athũkũmi ma Ngai ũmũnthĩ no nginya meke oou. Ananga mĩiito yaku, mĩtĩ ya ũoi, mĩkanda ya “ũsũvĩo,” mĩio ya mowe, mavuku ma syama, na kĩndũ kyonthe kĩkonanĩtye na imanyĩo sya kũneenanyʼa na maveva.

Manyĩa Kũatĩĩa Ũthaithi wa Wʼo

Ethĩwa nũkwenda kwendeesya Ngai, kũekana na ũthaithi wa ũvũngũ na kũekana na maũndũ mathũku kwĩ kwʼoka kũitoetye. No nginya ũmanyĩe kũatĩĩa ũthaithi mũtheu. Mbivilia nĩyonanasya kĩla kĩkwendeka:

Ĩthĩwa Wĩ na Ngwatanĩo na Ngũsĩ sya Yeova

Satani na ndaimoni syĩ andũ ĩũlũ wa nthĩ ala mamanyĩasya na kũmanyĩa mothũku. Ĩndĩ Yeova o nake e nguthu ya andũ. Asu nĩ Ngũsĩ sya Yeova. (Isaia 43:10) Ilungunĩ syonthe sya nthĩ, kwĩ Ngũsĩ mbee wa milioni thanthatũ. Onthe matataa na vinya kwĩka moseo na kũmanyĩsya andũ ũwʼo. Nthĩ mbingĩ, nũtonya kũkomana nao nthĩnĩ wa Nyũmba ya Ũsumbĩ, vala mekũthokya kwa ũsanzamũku.

Wĩa woo nĩ kũtetheesya aangĩ mathũkũme Ngai. Makeemanyĩsya Mbivilia naku nthĩnĩ wa mũsyĩ waku, makũtetheesye ũmanye nzĩa ya kũthaitha Yeova kwa waĩlu. Ndũkaĩva ndĩvi kwoondũ wa ũu. Ngũsĩ syĩthĩawa na ũtanu kũmanyĩsya wʼo nũndũ nĩsyendete andũ na nĩsyendete Yeova Ngai.