Maũndũ ma Kwĩka nĩ Kana Ũmbano wa Ũtavanyʼa Wĩthĩwe Ũtonya Kũtethya

O ta maũmbano ala angĩ onthe ma kĩkundi, ũmbano wa ũtavanyʼa nĩ Yeova ũtũseũvĩsye na nũtumaa tũthuthanyʼa na tũyĩthĩwa na wendo na meko maseo. (Avl 10:24, 25) Ũmbano wa ũtavanyʼa waĩle kũkua ndatĩka itano nginya ndatĩka mũonza. Ũu nĩ vamwe na kũaa atavanyʼa, kũmanenga kĩsio, vamwe na kũvoya. (Ethĩwa ũmbano wa ũtavanyʼa wĩĩkwa ĩtina wa maũmbano angĩ ma kĩkundi, waĩle kwĩthĩwa wĩ mũkuvangĩ.) Ũla ũkũtongoesya ũmbano ũsu aĩle kwĩthĩwa ombanĩtye ũndũ ũtonya kũtethya atavanyʼa wĩanĩ wa kũtavanyʼa mũthenya ũsu. Kwa ngelekanyʼo, atavanyʼa aingĩ ala mooka ũtavanyʼa Wathanthatũ methĩawa mela kũtavanyʼa wikendi mũvĩtu, kwoou wĩthĩwa wĩ ũseo ũla ũkũtongoesya akaneenea kĩla tũtonya kũneneea twathi kwa mwene nyũmba. Nĩ maũndũ angĩ meva matonya kũtethya ũtonya kũneenea?

• Ũvoo ũla wĩ kĩlungunĩ ũndũ ũtonya kwasya kuma nthĩnĩ wa Mwĩkalĩle wa Aklĩsto na Wĩa wa Kũtavanyʼa—Kavuku ka Kwĩmanyĩsya ka Ũmbano

• Ũndũ tũtonya kũtũmĩa ũndũ mũna ũneekĩkie mĩtũkĩ kana ũnatangaasiwe maũvoonĩ kwambĩĩsya ũneenanyʼa

• Ũndũ tũtonya kũsũngĩa mũndũ ũnũũvĩnga

• Ũndũ tũtonya kũsũngĩa mũndũ ũĩkĩĩaa kana kũi Ngai, ũĩkĩĩaa kana syĩndũ syeekie kwĩyumĩlya, mũndũ ũneenaa kĩthyomo kĩngĩ, kana mũndũ ndĩni yake ĩtesĩkĩe mũno kĩsionĩ kitũ

• Ũndũ tũtonya kũtũmĩa kĩsese kya jw org, JW Library^®, kana Mbivilia

• Ũndũ tũtonya kũtũmĩa syĩndũ ila syĩ nthĩnĩ wa Syĩndũ Ila Tũtũmĩaa Mũno Kũmanyĩsya

• Ũndũ tũtonya kũtavanyʼa kwa nzĩa syĩ kĩvathũkanyʼo ta, kũtavanyʼa na simũ, kũandĩka valũa, kũtavanyʼa kũla kwĩthĩawa andũ aingĩ, kũsyokea ala mekwendeewʼa, kana kũmanyĩsya amanyĩwʼa Mbivilia

• Maũndũ ma kũlilikana ĩũlũ wa kwĩsũvĩa, kwĩthĩwa na mwĩkalĩle mũseo, kwĩthĩwa na woni waĩle, kana o maũndũ angĩ ta asu

• Ĩsomo kana vitio kuma mbulosuanĩ Ĩkĩa Kĩthito Ũmanye Kũsoma na Kũmanyĩsya Nesa

• Ũndũ tũtonya kũthangaasya kana kũtetheesya ũla tũũtavanyʼa nake

• Ĩandĩko yĩkonetye ũtavanyʼa kana o ũndũ wonekete ũtonya kwĩkĩa vinya atavanyʼa