Mũklĩsto Ethĩawa Ailye Ata?—Mbivilia Ĩmanyĩasya Ata?

Ũmũnthĩ andũ aingĩ ĩũlũ wa nthĩ meyĩtaa Aklĩsto na nĩmatanĩaa ũndũ ũsu; ĩndĩ, mekaa maũndũ me kũũmĩsya angĩ. Amwe methĩawa meyendete mũno, mate aĩkĩĩku, na matekaa ũseo. Angĩ namo no methĩwe mate aĩkĩĩku kwa ala matwaanĩte namo. Mwĩkalĩle woo ũtumaa andũ amwe mekũlya: ‘We Mũklĩsto aĩle kwĩthĩwa ailye ata?’

Ũndũ Mũklĩsto waĩle kwĩthĩwa ailye

Nĩ ũndũ wĩ laisĩ mũndũ kwasya kana we nĩ Mũklĩsto. Ĩndĩ ve maũndũ maingĩ mendekaa. Kwosana na Mbivilia, Mũklĩsto nĩ mũmanyĩwʼa wa Yesũ Klĩsto. (Meko ma Atũmwa 11:26) Yesũ mwene aisye: “Ethĩwa mũkekalaa ndetonĩ yakwa, inywʼĩ kwa wʼo mwĩ amanyĩwʼa makwa.” (Yoana 8:31) Vate nzika, vai mũndũ ũtonya kũmwĩwʼa Yesũ nesa vyũ atekũvĩtya. Ĩndĩ Mũklĩsto nũtataa kũatĩĩa momanyĩsyo ma Yesũ na ayĩkala kwosana namo kĩla mũthenya. Sũanĩa momanyĩsyo amwe make.

Aklĩsto nĩmaĩle kwĩthĩwa na wendo

Kĩla Yesũ wawetie: “Nĩngũmũnenga mwĩao mweũ kana, mwendane inywʼĩ kwa inywʼĩ; o tondũ nyie namwendie, o nenyu mwendane o ta ũu. Nũndũ mweeka ũu andũ onthe makamanya kana mwĩ amanyĩwʼa makwa—ethĩwa mũkeethĩwa na wendo katĩ wenyu.”—Yoana 13:34, 35.

Kĩla Yesũ weekie: Yesũ nĩwendete andũ onthe, ate kũsisya kĩlasi kana wumo woo. Nĩwavoisye ala awau, anenga ala me na nzaa lĩu, o na aumya thayũ wake kwondũ wa angĩ.—Mathayo 14:14-21; 20:28.

Kĩla Aklĩsto mekaa: Aklĩsto monasya angĩ wendo kwa kwĩthĩwa me alau, mate na kyende, na mayĩekea ala mamavĩtĩsya. Nĩmatetheeasya ala me na vata, na nĩmethĩawa meyũmbanĩtye kwĩyĩima maũndũ kwondũ wa andũ ala angĩ.—1 Yoana 3:16.

Aklĩsto methĩawa me aĩkĩĩku

Kĩla Yesũ wawetie: “Nyie . . . ninyie wʼo.”—Yoana 14:6.

Kĩla Yesũ weekie: Yesũ aĩ mũĩkĩĩku ndetonĩ na mekonĩ make. Ndaatũmĩa mawũĩ nĩ kana andũ meke kĩla ũkwenda, o na ndaneenaa maũndũ matonya kwasya andũ. Eesĩkĩe ta mũndũ mũĩkĩĩku, o na ethĩwa kwĩka ũu kwesaa kũmũetee mathĩna.—Mathayo 22:16; 26:63-67.

Kĩla Aklĩsto mekaa: Aklĩsto maikenganaa. Nĩmaĩvaa koti, mayũyaa kana kũngʼea, na mathũkũmaa masaa ala maĩlĩte kũla maandĩkĩtwe. (Alomi 13:5-7; Aeveso 4:28) Maivenaa andũ kwa nzĩa ya mawũĩ, kũkengana mĩtianinĩ, kana kusũsya ũvoo ũte wa wʼo yĩla meũmantha wĩa, kana kusũsya vomu ingĩ.—Aevelania 13:18.

Aklĩsto nĩmakuaa angĩ nesa

Kĩla Yesũ wawetie: “Ũkai kwakwa inywʼonthe ala mũnoete na mwĩ na mĩio mĩito nakwa ngamũthũmũsya. Ĩyaĩkyei ĩsoki yakwa na mũyĩmanyĩsya kuma vala nĩĩ nũndũ nyie nĩ mũuu na nĩ wĩnyivyo ngoonĩ, nenyu mũkakwata ũthũmũo. Nũndũ ĩsoki yakwa yĩi vinya kũkua, na mũio wakwa nĩ mũvũthũ.”—Mathayo 11:28-30.

Kĩla Yesũ weekie: Andũ meewʼaa ve laisi kũvikĩa Yesũ, na eethĩawa e mũuu. Nĩwathokasya syana kwake, akakiakisya ala me na mathĩna, na nĩwanengae andũ ndaĩa.—Maliko 10:13-15; Lũka 9:11.

Kĩla Aklĩsto mekaa: Aklĩsto nĩmaneenasya andũ nesa; maimakandĩaa kana kũmaumanga. (Aeveso 4:29, 31, 32) Nĩmendeeawʼa nĩ ala angĩ na nĩmamanthaa myanya ya kũmatetheesya.—Akalatia 6:10.

Aklĩsto mekalaa me aĩkĩĩku kwa ala matwaanĩte namo

kĩla Yesũ wawetie: “Kĩla Ngai ũlũmanĩtye vamwe, mũndũ ndakakĩtaananyʼe.”—Maliko 10:9.

Kĩla Yesũ weekie: O na kau Yesũ ndatwaanĩte, nĩweekĩaa vinya ala matwaanĩte mekale me aĩkĩĩku. (Mathayo 19:9) Nĩwakanisye andũ ĩũlũ wa maũndũ ala matonya kũtuma mũtwaano wanangĩka.—Mathayo 5:28.

Kĩla Aklĩsto mekaa: Aklĩsto nĩmevathanaa na mwĩkalĩle ũtonya kũtuma mũtwaano ũtanengwa ndaĩa. (Aevelania 13:4) Ala matwaanĩte mekalanasya na wendo na ndaĩa.—Aeveso 5:28, 33.