Kaũ Ũla Ũendeee Middle East—Mbivilia Ĩmanyĩasya Ata?

Andũ ĩũlũ wa nthĩ nĩmaendeee kũmakwʼa nĩ kaũ ũla ũendeee ũkonetye Amelika, Israel, na Iran. Wʼo kaũ ũsu nũtonya kũthũkĩĩa na ũinyaĩĩka nthĩ ingĩ? Syo silikalĩ syĩ na ũtonyi wa kũmina ithokoo na kũyĩthĩwa na mũuo nthĩ yonthe?

Ala mewʼĩte ĩũlũ wa wathani wa Mbivilia nĩmatonya kwĩkũlya ethĩwa kaũ ũsu wĩ Middle East, nũtonya kwĩthĩwa ne wʼo mwambĩĩo wa ũla kaũ wa Alimaketoni ũwetetwe ĩvukunĩ ya Ũvuanyʼo.

Mbivilia Ĩmanyĩasya Ata?

Silikalĩ nitonya kũmina kaũ ũla wĩ Middle East?

Mbivilia yaĩtye atĩĩ: “Ndũkaĩkĩĩe anene me mbee ũsumbĩnĩ, kana mwana wa mũndũ, ũla ũtatonya kũtethya.”—Savuli 146:3.

Tũyĩsĩ ethĩwa silikalĩ niũtovoa kũete mũuo wĩana ũna Middle East. Ĩndĩ o na ũu wĩ o vo, Mbivilia nĩyonanĩtye ũtheinĩ kana vai mũtongoi wa siasa, kana silikalĩ ya andũ, kana kĩkundi kĩngĩ o na kĩva kya andũ, kĩtonya kũmina makaũ na kũyĩthĩwa na mũuo kĩla vandũ. No Ngai ũtonya kũtuma “makaũ mathela kũvika kĩtulu kya nthĩ.”—Savuli 46:9.

• Nĩ kana wĩmanyĩsye mũnango, soma ĩkaseti ya Mũsyaĩĩsya “Kaũ Ũkathela Ata?”

Wʼo kaũ ũla wĩ Middle East ũendeee kwĩanĩsya wathani?

Mbivilia yaĩtye atĩĩ: “Na mũkeewʼa ĩũlũ wa makaũ na kũwetangwa. . . . Mbaĩ ĩkookĩlĩla mbaĩ na ũsumbĩ ũkookĩlĩla ũsumbĩ.”—Mathayo 24:6, 7.

Kaũ ũla wĩ Middle East nĩ ũndũ ũngĩ ũkwonanyʼa “mũminũkĩlyo wa ĩvinda yĩĩ” na ũĩkĩĩthyo ũngĩ wa kana twĩkalĩte “mĩthenyanĩ ya mũminũkĩlyo.” (Mathayo 24:3; 2 Timotheo 3:1) Makaũ ala mekwʼo ũmũnthĩ meonanyʼa kana Ngai nũkwosa ĩtambya o mĩtũkĩ amine makaũ vyũ na mathĩna angĩ ala makwataa andũ.

• Nĩ kana wĩmanyĩsye mũnango, soma kĩlungu kĩ na kyongo “Ni Nini Ishara ya “Siku za Mwisho”?”

Kaũ wa Alimaketoni ũkambĩĩa Middle East?

Mbivilia yaĩtye: “Mamombanyʼa vamwe vandũ vetawa kwa Kĩevelania Alimaketoni.”—Ũvuanyʼo 16:16.

Kaũ wa Alimaketoni ti kaũ katĩ wa silikalĩ syĩ kĩvathũkanyʼo ũla ũkambĩĩa Middle East. Nĩ kaũ wa nthĩ yonthe katĩ wa silikalĩ syonthe sya andũ na Ngai.

• Nĩ kana wĩmanyĩsye mũnango, soma kĩlungu kĩ na kyongo “Kaũ wa Alimaketoni Nĩ Kyaũ?”

Nĩ kyaũ kĩtonya kũtũtetheesya kũmĩanĩsya na maũndũ metu thayũnĩ?

Mbivilia yaĩtye: “Mũikemakĩe kwa ũndũ o na wĩva, ĩndĩ kĩla ũndũnĩ mavata menyu nĩmatavanwʼe kwa Ngai kwĩsĩla mboya, o vamwe na kwĩsũvana na kũtũnga mũvea.”—Avilivi 4:6.

Yeovaa Ngai nũtũthoketye tũmũvoyae. Nũndũ Ngai nũtũthĩnĩkĩaa, akeewʼaa mboya sitũ na aitũtetheesya kũmĩanĩsya na mawĩmakĩo. (1 Vetelo 5:7) Nzĩa ĩmwe wĩkaa ũu nĩ kwa kũtũtetheesya tũelewe nĩkĩ kwĩ makaũ maingĩ, makathela ata, na akeeka ata atũvetee woo na mathĩna.—Ũvuanyʼo 21:3, 4.

• Nĩ kana wĩmanyĩsye mũnango ĩũlũ wa ũndũ Ngai ũtũtetheeasya, soma kĩlungu kĩ na kyongo, “No Nĩkwate Mbivilianĩ Mĩsoa Ĩtonya Kũngiakisya?.”