Mũka wa Kaini Aĩ Ũũ?

Ũndũ Mbivilia ĩsũngĩĩte

Kaini, ũla waĩ mwana wa mbee wa Atamu na Eva, atwaie mwĩĩtu masyaanĩwʼe kana o mũndũ ũngĩ wa mũsyĩ woo. Tũtonya kwasya ũu twasũanĩa kĩla Mbivilia ĩwetete ĩũlũ wa Kaini na mũsyĩ wake.

Maũndũ ma wʼo ĩũlũ wa Kaini na mũsyĩ wake

• Andũ onthe nĩ nzyawa sya Atamu na Eva. Ngai “oombie mbaĩ syonthe sya andũ kuma mũndũnĩ ũmwe [Atamu], matũae ĩũlũ wa nthĩ yonthe.” (Meko ma Atũmwa 17:26) Mũka wa Atamu, Eva, nĩwatwʼĩkie “inyia wa onthe me thayũ.” (Mwambĩlĩlyo 3:20) Kwoou, no nginya Kaini ethĩwe atwaie mũndũ waumanĩte na Atamu na Eva.

• Kaini na mwana-a-inyia Aveli nĩmo maĩ ma mbee katĩ wa syana ila syasyaiwe nĩ Eva. (Mwambĩlĩlyo 4:1, 2) Ĩla Kaini walũngilwʼe nũndũ wa kũmũaa mwana-a-inyia, aisye atĩĩ: “o ũla ũkambĩthĩa nũkambũaa.” (Mwambĩlĩlyo 4:14) Kaini akĩaa ũũ? Mbivilia yaĩtye kana Atamu ‘nĩwasyaie ana na eĩtu.’ (Mwambĩlĩlyo 5:4) Nzyawa sya Atamu na Eva nitonya kwĩthĩwa syamũthĩnasya kana syendaa kũmũaa Kaini.

• Ĩvindanĩ ya tene, kũtwaa mũndũ wa mũsyĩ wenyu ndwaĩ ũndũ mũthũku. Kwa ngelekanyʼo, Avalaamu atwaie mwĩĩtu-a-ia wake (half sister). (Mwambĩlĩlyo 20:12) Mĩtwaano ya mũthemba ũsu yookie kũvatanwa ĩvinda ya Mĩao ya Mose. Mĩao ĩsu yaandĩkiwe myaka maana maingĩ Kaini akwie. (Alivai 18:9, 12, 13) Veonekana kana syana ila syasyaawa nĩ andũ matwaanĩte me ma mũsyĩ ũmwe iyeethĩawa na mathĩna ta ala makwataa syana nũndũ wa kũsyawa nĩ andũ matwaanĩte me ma mũsyĩ ũmwe.

• Ngewa ĩla Mbivilia ĩeleasya ĩũlũ wa Atamu, Eva na andũ ma mũsyĩ wake nĩ ya wʼo. Nzyawa ila syeethĩiwe ĩtina wa Atamu syonekaa ĩvukunĩ ya Mwambĩlĩlyo yĩla yaandĩkiwe nĩ Mose, na no ũsyone ĩngĩ mavukunĩ ala maandĩkiwe nĩ Esala na Luka. (Mwambĩlĩlyo 5:3-5; 1 Mavinda 1:1-4; Luka 3:38) Maũndũ ala Aandĩki ma Mbivilia mawetaa ĩũlũ wa Kaini monanasya kana aĩ kwʼo.​—Aevelania 11:4; 1 Yoana 3:12; Yuta 11.