Kũnengane Ũtethyo Ĩvinda ya Mĩisyo 2021—Tũitiaa Ana-a-asa na Eĩtu-a-asa Maitũ

Mwakanĩ wa ũthũkũmi wa 2021,a andũ kĩla vandũ nĩmanaendeee kũthĩna nũndũ wa ũwau wa COVID-19. O tondũ kĩlungu, “Kũnengane Ũtethyo Nũndũ wa Ũwau Ũnyaĩĩkĩte Nthĩ Yonthe” kyonanĩtye, nĩtũtũmĩĩte ndolab milioni mbingĩ tũinengane ũtethyo nũndũ wa ũwau ũla ũnyaĩĩkĩte, na tũkambĩĩsya Kamitii sya Kũnengane Ũtethyo Ĩvinda ya Mũisyo mbee wa 950.

Kũneena wʼo, o na kau ũwau ũũ wa kũkwatanwʼa nũnaetete mathĩna maingĩ, mĩisyo ĩngĩ yumanĩte na mawĩthyũlũlũko kana yĩetetwe nĩ andũ nĩnakwatie ana-a-asa na eĩtu-a-asa ĩũlũ wa nthĩ. Nĩ kana tũtetheesye mĩisyonĩ mbee wa 200, Kamitii ya Avangĩthya ya Nzama Ĩla Ĩtongoesye nĩyeetĩkĩlilye ndola ingĩ milioni 8 itũmĩwe, eka ila syaumĩtwʼe kwondũ wa ũwau wa COVID-19. Kwasisya wone ũndũ mĩvothi yaku ĩnatũmĩiwe kũtetheesya ala manakwatiwe nĩ mĩisyo ĩlĩ ĩnaumĩlile o mĩtũkĩ.

Yĩla Kĩĩma kya Nyiragongo Kyalivũkie

Matukũ 22, Mwei wa 5, 2021, kĩĩma kya Nyiragongo kĩla kĩ Democratic Republic of the Congo nĩkyalivũkie. Mũlivũko ũsu waumisye kĩndũ kĩtawa lava kĩla kyaanangie nyũmba, masukulu, na kũndũ kwa kwia kĩwʼũ. Na ũsu tiwʼo mũisyo wʼoka wamakwatie. Mĩthenya ĩla yaatĩĩe ĩtina wa kĩĩma kĩu kũlivũka, kĩtoo kĩ na sumu nĩkyeevwʼĩkie taoni ya Goma na kwaĩ na ithingitho mbingĩ mũno. Nyusu ya andũ ala mekalaa taoninĩ ĩsu nĩmakũlilwʼe mathame. Andũ ngili maana maingĩ nĩmakĩĩie kũndũ kũngĩ. Kwa ngelekanyʼo, amwe maendie nthĩ ya Rwanda.

Amwe katĩ wa ala makĩĩe kũngĩ nĩ Ngũsĩ sya Yeova ta 5,000. Amwe nĩmaaisye nyũmba syoo nũndũ wa mũlivũko ũsu, namo angĩ mooyĩwa syĩndũ nyũmba ĩtina wa kũkĩĩa kũngĩ. Kamitii sya kũnengane ũtethyo nthĩ ya Rwanda na Congo nĩsyathũkũmie syĩ ngwatanĩo. Ovisi wa ũvonge wa Congo (Kinshasa) waisye ũũ ĩũlũ wa kamitii ĩmwe ya kũnengane ũtethyo: “O na kau maũndũ taoninĩ ĩsu maĩ mathũku na mwĩao wa kũthama ũyaumĩtwʼe, kamitii ĩsu nĩyambĩĩisye kũnyaĩĩkya lĩu, kĩwʼũ, syĩndũ sya kũkomeea, na ngũa.” Taoninĩ ĩmwe vala ana-a-asa maitũ mbee wa 2,000 makĩĩe, kamitii ya kũnengane ũtethyo nĩyambie maeema, yanengane masiki, na yaelesya nzĩa sya kũolanga mũisyo wa kũkwatwa nĩ ũwau wa COVID-19 na kĩvĩndũvĩndũ.

Kwa ĩvinda ya myei ĩtatũ, ana-a-asa maitũ nĩmanyaĩĩkĩtye tani mbee wa 6 sya mũsele, tani 6 sya mũtu wa mbemba, tani 3 sya mauta, na tani 3 sya kĩwʼũ. Nĩ kana ovisi wa ũvonge ũsũvĩe mbesa, nĩweekie mũvango nĩ kana mathooe malĩu kwa wingĩ o vau nthĩ yoo vandũ va kwĩtya lĩu wa mbesa mbingĩ kuma nza.

Mwĩĩtu-a-asa ũmwe, ũla nyũmba yake yaanangiwe nĩ mũlivũko yĩ nzaũ, aĩtye: “Twakwie ngoo na twaũmĩa mũno.” Ĩndĩ we na mũsyĩ wake nĩmakwatie ũtethyo wa kĩ-mwĩĩ na kĩ-veva. Yu easya: “Nũndũ wa ũtethyo wa Yeova, twĩ o na kĩla twĩ na vata nakyo. Nĩtwonete ũndũ Yeova ũtũtetheesye, na nũndũ wa ũu, twĩwʼaa tũte aitavĩe.”

Yĩla Ngalama ya Syĩndũ Nthĩ ya Venezuela Yambatie

Nthĩ ya Venezuela nĩyĩthĩĩtwe na mathĩna manene ma mbesa kwa myaka kauta. Ana-a-asa maitũ kũu momĩanĩsye na maũndũ momũ, mũo wa lĩu, na wongeleku wa ũtũli wa mĩao. Ĩndĩ ũseũvyo wa Yeova ndũlĩtwe nĩmo.

Mwakanĩ mũthelu wa ũthũkũmi, ndola mbee wa milioni 1.5 nĩsyatũmĩiwe kũthooa lĩu na savunĩ na kũitwaĩa mĩsyĩ ĩla yendaa ũtethyo. Ana-a-asa ma ovisi wa ũvonge wa Venezuela maĩtye: “Ti ũndũ wĩ laisi kũtwaa tani 130 sya lĩu kĩla mwei nthĩ yitũ yonthe, na kũĩkĩĩthya kana ana-a-asa onthe ala mekwenda ũtethyo nĩmaũkwata.” Nĩ kana wĩthĩe vai lĩu ũnaanangĩka, ana-a-asa makothaa kũtũma syĩndũ ila itatonya kwanangĩka na mĩtũkĩ. Ana-a-asa ma ovisi ũsu maendeee kwasya: “Tũtataa tũthooe lĩu mwingĩ savalĩ ũmwe, na tũithooa ĩvindanĩ yĩla ũũkethwa nũndũ mathooa methĩawa nthĩ. Na ĩndĩ tũtũmĩaa nzĩa ĩla ĩkũtũmĩa mbesa nini vyũ kũũkua.”

Leonel ethĩawa Kamitiinĩ ya Kũnengane Ũtethyo nthĩ ya Venezuela, na nĩwendete mũno wĩa wake. Aĩtye: “Wĩa wa kũnengane ũtethyo nĩ wa mwanya mũno. Kĩanda kĩĩ kĩmbĩkĩĩte vinya mũno kuma kĩveti kyakwa kyoawa nĩ ũwau wa COVID-19. Nĩkalaa nĩkwatene na nĩwʼaa ndianĩsya ũndũ wa vata kwa kũtetheesya ana-a-asa ala mekwenda ũtethyo. Nĩnĩyoneete mwene ũndũ Yeova wĩanĩĩtye watho wake wa kũlea kũmatia andũ make.”

Ve mwana-asa ũmwe wakwatie ũtethyo, na vau mbeenĩ nĩwathũkũmĩte kamitiinĩ ya kũnengane ũtethyo. Aĩtye: “Yu yaĩ ĩvinda yakwa ya kũnengwa ũtethyo. Tũyaakwata ũtethyo wa syĩndũ sya kĩ-mwĩĩ syĩ syoka. Ana-asa nĩmandetheeisye nĩ na mũka wakwa twĩkale tũuĩtye. Nĩmatũthĩnĩkĩie, matũkiakisya, na matwĩkĩa vinya.”

Mĩisyo ĩmwe ĩtũkwataa tũtataĩĩe. Ĩndĩ mavinda maingĩ ũseũvyo wa Yeova wĩthĩawa ũtonya kũmbanyʼa na kũnyaĩĩkya syĩndũ sya ũtethyo na mĩtũkĩ, nũndũ wa mĩvothi yaku ĩla wumasya kwondũ wa wĩa wa nthĩ yonthe. Nzĩa imwe sya kumya mĩvothi ieleetwʼe nthĩnĩ wa donate.jw.org. Nĩtũũtũnga mũvea nũndũ wa ũlau wenyu.