Livoti sya Kũĩkĩĩka na Ilũlũmĩĩlasya Mũĩkĩĩo

Ngũsĩ sya Yeova sya Yeova nithĩnĩkĩaa mũno vyũ ana-a-asa na eĩtu-a-asa moo. (1 Vetelo 2:17) Aingĩ maitũ twĩwʼaa tondũ mwĩĩtu-a-asa wĩtawa Tannis wĩkalaa Kenya wĩwʼaa. Aĩtye: “Nĩthĩawa ndyenda kũmanya mũno kĩla kĩkwatĩte ana-a-asa na eĩtu-a-asa makwa ĩũlũ wa nthĩ.” We Tannis na Ngũsĩ ingĩ milioni mbingĩ mamanyaa ata kĩla kĩendeee? Kuma mwaka wa 2013, nĩtwĩthĩĩtwe tũtonya kũkwata maũvoo kwĩsĩla kĩlungu kĩtawa Habari, kĩla kĩthĩawa nthĩnĩ wa kĩsese kitũ kya jw.org.

Kĩlungu kĩu kĩnenganae livoti sya kwĩkwatwʼa ikonetye Ngũsĩ sya Yeova, ta Mbivilia nzaũ ila syumiwʼe, ũtethyo ũnenganiwe ĩvinda ya mũisyo, wĩa wa myako, na maũndũ angĩ ma vata. Nĩkĩtũtavasya ĩũlũ wa ana-a-asa na eĩtu-a-asa ala movetwe nũndũ wa mũĩkĩĩo woo. O na ĩngĩ, nĩkĩthĩawa na maũndũ maseo ala monekete kambeininĩ sya ũtavanyʼa na ĩvindanĩ ya kũlilikana kĩkwʼũ kya Yesũ. Naaũ mekaa ũkunĩkĩli nĩ kana tũkwate livoti isu, na iseũvawʼa ata?

Kũmantha na Kũandĩka Livoti

Kĩlungu kya Habari kĩũngamĩwe nĩ Mũvĩa wa Maũvoo Ovisinĩ Ũla Mũnene (Office of Public Information [OPI]). Mũvĩa ũsu wĩthĩawa ungu wa Kamitii ya Avangĩthya ya Nzama Ĩla Ĩtongoesye. OPI yĩthĩawa na ana-a-asa na eĩtu-a-asa mbee wa 100, na aingĩ moo mathũkũmaa me o mũsyĩ kwoo. Mekaa maũndũ ta kũandĩka, kwĩka ũkunĩkĩli, kũalyũla, na maũndũ angĩ makonetye visa na mĩsolo. Angĩ nĩmatetheeasya kũneena na anene ma silikalĩ, mavulovesa na alimũ, na ala me mĩvĩanĩ ya kũnyaĩĩkya maũvoo. OPI ĩtetheeawʼa nĩ Movisi ma Maũvoo Movisinĩ ma Ũvonge (Public Information Desks [PID]). Movisi asu ma maũvoo nĩ mbee wa 80.

Nĩ kana livoti ĩseũvwʼe, OPI ĩthũkũmaa na PID. Ana-a-asa makwata ũvoo wa vata, nĩmekaa ũkunĩkĩli na maikolanyʼa ũvoo wa kũĩkĩĩka. Maũndũ amwe mekaa nĩ kũkũlya andũ makũlyo ĩũlũ wa ũndũ ũsu na kũneena na andũ me na ũtũĩka na ũmanyi ũndũnĩ ũsu. Ũvoo wʼonthe wakwatĩkana, nũandĩkawa, ũkasomwa ũsiwʼe mavĩtyo, ũkongelwa visa, na ĩndĩ ũitũmwa kwa Kamitii ya Avangĩthya nĩ kana ũvĩtũkĩthwʼe.

Ndeto sya Kũtũnga Mũvea

Mo ana-a-asa na eĩtu-a-asa mewʼaa ata ĩũlũ wa kĩlungu kya Habari? Mwĩĩtu-a-asa wĩtawa Cheryl wĩkalaa Philippines aĩtye, “Ndanamba kwĩka maũndũ ala angĩ kwakya, nendete kwamba kũsoma livoti ĩũlũ wa ũseũvyo wa Yeova na andũ make.”

Aingĩ maasya kana livoti ila syĩ nthĩnĩ wa kĩlungu kya Habari kya jw.org syĩ kĩvathũkanyʼo vyũ na livoti ila makwataa mĩvĩanĩ ĩla ĩngĩ ya kũnyaĩĩkya maũvoo. Tatiana, ũla wĩkalaa Kazakhstan, aĩtye: “Nĩtanaa mũno vyũ kwĩthĩwa ndonya kũĩkĩĩa livoti ila syĩ nthĩnĩ wa jw.org. Nĩ sya kũĩkĩĩka na iyendeeasya ngalĩko ĩmwe.” Mwĩĩtu-a-asa wĩkalaa Mexico wĩtawa Alma aĩtye, “Livoti ila syĩthĩawa mĩvĩanĩ ĩla ĩngĩ ya maũvoo syĩkaa kũtũla mũndũ ngoo, ĩndĩ livoti ila syĩ nthĩnĩ wa Habari syĩkĩaa mũndũ vinya mũno.”

Kĩlungu kya Habari ti kya kũĩkĩĩka tu, ĩndĩ nĩkyakaa mũĩkĩĩo witũ. Bernard, ũla wĩkalaa Kenya, aĩtye-ĩ: “Kĩlungu kya Habari kĩtumĩte nona ana-a-asa na eĩtu-a-asa ta andũ ma mũsyĩ wakwa, o na methĩwe me va ĩũlũ wa nthĩ. Yĩla ngũvoya nĩthĩawa ndonya kũmaweta na masyĩtwa moo na maũndũ ala mamakwatĩte.” Mwĩĩtu-a-asa wĩtawa Bybron, ũla o nake wĩkalaa Kenya, aĩtye: “Ndanaa mũno nonaa kĩlungu kĩneeneete Mbivilia nzaũ ĩnaumiwʼe na kĩthyomo kĩngĩ! Ilungu isu indilikanasya kana Yeova nde kyende.”

O na livoti ĩũlũ wa ũndũ ana-a-asa maitũ meũthĩnwʼa no itũthangaasye. Mwĩĩtu-a-asa wĩ Kenya wĩtawa Jackline aĩtye: “Kũvindĩĩsya ĩũlũ wa ũkũmbaũ woo nĩkũtumĩte mũĩkĩĩo wakwa ũlũlũmĩĩla mũno. Ndataa mũno none kĩla kĩmatetheeasya kũmĩĩsya. Nĩnendete ũndũ maũndũ ala monekaa ta manini, ta kũvoya, kũsoma Mbivilia, na kwina, methĩĩtwe maitetheesya ana-a-asa mũno kwĩkala me alũmu.”

Mwĩĩtu-a-asa wĩtawa Beatriz wa Costa Rica endete mũno livoti ila syĩthĩawa ineenea mĩisyo ĩla yumĩlile. Easya: “Kĩlungu kya Habari kĩnengete mwanya wa kwona ũndũ ũseũvyo ũnengae ana-a-asa ũtethyo na mĩtũkĩ, na kwa nzĩa ĩla yaĩlĩte na ĩkwonanyʼa kana nĩmendetwe. Kĩu kĩndĩkĩĩthasya vyũ kana ũũ nĩwʼo ũseũvyo wa Yeova.”

Tũtanaa ta kĩ nũndũ wa kũkwataa livoti sya mĩtũkĩ ĩũlũ wa ana-a-asa maitũ kuma kĩla vandũ ĩũlũ wa nthĩ! Kĩu kĩtonyeka vate mĩvothi ĩla umasya kwondũ wa wĩa wa nthĩ yonthe. Aingĩ maumasya mĩvothi ĩsu kwĩsĩla donate.jw.org. Nĩ mũvea nũndũ wa kumya mĩvothi yaku wĩ mũlau.