Ũngʼendu Nthĩnĩ wa Wĩkalo wa Maveva

Andũ onthe ma kĩveva ala Yeova woombie maĩ aseo. Nĩvo ĩndĩ mũlaĩka ũmwe waalyũkile atwʼĩka mũthũku. Nĩwe Satani Ndevili. Satani eethĩiwe ayenda andũ ĩũlũ wa nthĩ mamũthaithe we vandũ va Yeova. Kweethĩiwe ũũ:

Nthĩnĩ wa mũũnda wa Eteni, kwaĩ mĩtĩ mingĩ yasyaaa matunda me mũyo. Yeova eeie Atamu na mũka, Eva, kana maĩ matonya kũya mosyao mayo me na ũthasyo. Ĩndĩ vaĩ mũtĩ ũmwe ũla Ngai waisye maikaye mosyao mawʼo. Aisye maya kumana nawʼo, makakwʼa vate nzika.—Mwambĩlĩlyo 2:9, 16, 17.

Mũthenya ũmwe Eva aĩ weka yĩla nzoka yaneenie nake. Kwa wʼo, ti nzoka mbene yaneenie; Satani Ndevili nĩwe watumie kwoneka ta nzoka yaneenaa. Satani eeie Eva kana aya ĩtunda yĩla yavatanĩtwe, akeethĩwa e mũĩ ta Ngai. O na ĩngĩ nĩwaisye kana mũndũ mũka ũsu ndakakwʼa. Moneeni asu elĩ maĩ movũngũ. Ĩndĩ, Eva nĩwaĩkĩĩie Satani na aya yĩla ĩtunda. Ĩtina wa ũu, nĩwanengie Atamu kĩlungu, o nake aya.—Mwambĩlĩlyo 3:1-6.

Kumana na ngewa ĩno ya wʼo, twĩĩmanyĩsya kana Satani nĩ mũngʼendu na nĩ mũneeni wa ũvũngũ. Eeie Eva kana alea kũmwĩwʼa Ngai, ndakakwʼa. Ũsu waĩ ũvũngũ. Mũndũ mũka ũsu vamwe na Atamu nĩmakwie. Satani ndaakwʼa ĩvinda yĩu, o na vala mũminũkĩlyonĩ akesa kũkwʼa nũndũ nĩweekie naĩ. O na kũilyĩ ũu, kwa yuyu e thayũ na aendeeaa kwasya mũvaĩ-wa-andũ. We no mũneeni wa ũvũngũ o na yuyu, na atataa kũtuma andũ matũla mĩao ya Ngai.—Yoana 8:44.

Alaĩka Angĩ Mangʼenda

Ĩtina wa ũu, alaĩka angĩ nĩmaalyũũkile matwʼĩka athũku. Alaĩka asu moonie andũ aka anake ĩũlũ wa nthĩ na menda kũkomanyʼa namo. Kwoou mooka nthĩ na meekĩa mĩĩ ya kĩmũndũ ya kĩũme. Nĩvo ĩndĩ meeyoseie andũ aka asu. Ũndũ ũsu waĩ kũleana na kwenda kwa Ngai.—Mwambĩlĩlyo 6:1, 2; Yuta 6.

O na nĩwaeteie mũvaĩ-wa-andũ thĩna mwingĩ. Aka ma alaĩka asu nĩmasyaie syana, ĩndĩ syaĩ syana syĩ kĩvathũkanyʼo mũno. Syeanie syatwʼĩka mamũndũ mangʼendilĩ, me ngũlũ. Ĩtina nthĩ nĩyausũie mũno ũngʼendilĩ kũvika Yeova atwʼa kwananga andũ athũku na kĩwʼũ kingĩ. Andũ oka ala mavonokie kĩla Kĩwʼũ Kingĩ maĩ Noa mũlũngalu na andũ ma mũsyĩ wake.—Mwambĩlĩlyo 6:4, 11; 7:23.

O na kũilyĩ ũu, ala alaĩka athũku nĩmasyokie wĩkalonĩ wa maveva; mayaakwʼa. Ĩndĩ nĩmakwatie ũĩvĩthyo wa kwĩka naĩ. Mayaaĩtĩkĩlwʼa kũsyoka nthĩnĩ wa mũsyĩ wa Ngai wa alaĩka alũngalu. Kwongeleela ũu, Yeova ndaasyoka kũmaeka mekĩe ĩngĩ mĩĩ ya kĩmũndũ. Na makooka kũkwʼa nthĩnĩ wa ũla ũsilĩlo mũnene.—2 Vetelo 2:4; Yuta 6.

Satani Ekwʼa Kuma Ĩtunĩ

Mbeange nthĩnĩ wa kalinĩ ĩno yitũ, nĩkweethĩiwe kaũ ĩtunĩ. Ĩvuku ya Mbivilia ya Ũvuanyʼo nĩyĩnenganae ũvoo ũndũ kweethĩiwe: “Na kwaĩ kaũ ĩtunĩ: Mikaeli [Yesũ Klĩsto mũthayũũkwʼa] na alaĩka make [aseo] maithi kũkita na ũla mũkũnga mũnene [Satani]; na mũkũnga ũsu na alaĩka mawʼo [athũku] mokita; nao maiaakĩlya vinya, o na vaiaaoneka vandũ voo ĩtunĩ ĩngĩ. Na mũkũnga ũsu mũnene wekwʼa nthĩ, nawʼo nĩ nzoka ĩla ngũũ, yĩtawa Ndevili, na ĩngĩ Satani, mũkengani wa nthĩ yonthe; ekwʼa nthĩ, na alaĩka make [athũku] mekwʼa nthĩ vamwe nake.”

Na ĩndĩ kweethĩwa ata? Ũvoo wĩendeea kwasya atĩĩ: “Kwondũ wa ũu tanai, inywʼĩ matu, na inywʼĩ ala mũtwĩe nthĩnĩ wamo”! Alaĩka asu aseo maĩ matonya kũtana nũndũ Satani na ala alaĩka kana maveva mathũku nĩmavetiwe ĩtunĩ. Ĩndĩ nata kwa andũ ĩũlũ wa nthĩ? Mbivilia yaasya atĩĩ: “Woo nĩ wa nthĩ na wa ũkanga: nũndũ ndevili nĩwamũtheeea inywʼĩ, e na ũthilĩku mũnene, akĩmanya kana e na kavinda o kanini.”—Ũvuanyʼo 12:7-9, 12.

Ĩĩ, Satani na atindanyʼa make athũku nĩmaasya andũ ĩũlũ wa nthĩ na kũmaetee woo mũnene. Alaĩka asu athũku metawa ndaimoni. Mo nĩ amaitha ma Ngai. Onthe nĩ athũku.