Ĩsomo ya 7

Kũthengeea Ngai Mboyanĩ

Nĩkĩ nĩ ũndũ wa vata kũvoyaa vate kũtĩĩa? (1)

Twaĩlĩtwe nĩ kũvoya ũũ, na ata? (2, 3)

Nĩ maũndũ meva ala maĩlĩte mboyanĩ? (4)

Waĩlĩtwe nĩ kũvoya ĩndĩĩ? (5, 6)

Atĩĩ, Ngai nĩwĩthukĩĩasya mboya syonthe? (7)

1. Mboya nĩ kũneena na Ngai kwa wĩnyivyo. Waĩlĩtwe nĩ kũvoyaa Ngai ũteũtĩĩa. Kwa nzĩa ĩsu nũtonya kwĩwʼa ũmũthengeee tondũ wĩwʼaa kwa mũnyanya mwendwa. Yeova nĩ mũnene mũno na e ũtonyi mwingi, ĩndĩ nĩwĩthukĩĩasya mboya sitũ! Atĩĩ, we nũvoyaa Ngai ũteũtĩa?—Savuli 65:2; 1 Athesalonika 5:17.

2. Mboya nĩ kĩlungu kya ũthaithi witũ. Kwoou, twaĩlĩtwe nĩ kũvoya Ngai, Yeova, e weka. Yĩla Yesũ waĩ ĩũlũ wa nthĩ, mavinda onthe avoyie Ĩthe, ti mũndũ ũngĩ o na wĩva. Ithyĩ twaĩlĩtwe nĩ kwĩka o ũu. (Mathayo 4:10; 6:9) Ĩndĩ, mboya sitũ syonthe syaĩlĩtwe nĩ kũwetwa syĩtwanĩ ya Yesũ. Ũu wonanasya kana nĩtũtaĩĩaa ũnene wa Yesũ na kana twĩ na mũĩkĩĩo nthĩnĩ wa nthembo yake ya wovosyo.—Yoana 14:6; 1 Yoana 2:1, 2.

3. Yĩla tũũvoya twaĩlĩtwe nĩ kũneena na Ngai kuma ngoonĩ yitũ. Tũyaĩlĩtwe nĩ kuweta mboya sitũ kuma kĩlilikanonĩ kana kũisoma kuma ĩvukunĩ ya mboya. (Mathayo 6:7, 8) Nĩtũtonya kũvoya twĩ na mwĩkalo kana mũũngamĩle o na wĩva wa ndaĩa, ĩvinda o na yĩva, na vandũ o na veva. Ngai nũtonya kwĩwʼa o na mboya ngilu ila iwetawa ngoonĩ. (1 Samueli 1:12, 13) Nũseo kũmantha vandũ vakilu vate andũ angĩ nĩ kenda tũvoye mboya sitũ ene.—Maliko 1:35.

4. Nĩ maũndũ meva ũtonya kũvoyea? Nĩ ũndũ o wʼonthe ũla ũtonya kũvũũsya ũnyanya waku nake. (Avilivi 4:6, 7) Mboya ya ngelekanʼyo yonanasya kana twaĩlĩtwe nĩ kũvoya ĩũlũ wa syĩtwa na kĩeleelo kya Yeova. O na nĩtũtonya ũkũlya nĩ kenda twĩanĩĩwʼe mavata maitũ ma kĩmwĩĩ, tũekewe naĩ sitũ, na tũnengwe ũtethyo wa kũvĩngĩsa ũtato. (Mathayo 6:9-13) Mboya sitũ iyaĩlĩtwe nĩ kwĩthĩwa sya wĩyendi mũthũku. Twaĩlĩtwe nĩ kũvoya syĩndũ ila syosanaa na kwenda kwa Ngai.—1 Yoana 5:14.

5. Nũtonya kũvoya ĩvinda o yonthe yĩla ngoo yaku yaũtindĩka kũtũngĩa Ngai mũvea kana ngatho. (1 Mavinda 29:10-13) Nĩwaĩlĩtwe nĩ kũvoya yĩla wĩ na mathĩna na mũĩkĩĩo waku ũũtatwa. (Savuli 55:22; 120:1) Nĩkwaĩlĩte ũvoye mbee wa maya ma lĩu waku. (Mathayo 14:19) Yeova atũthokasya tũvoye “mavinda onthe.”—Aeveso 6:18.

6. Mũno-mũno nĩtwaĩlĩtwe nĩ kũvoya ethĩwa nĩtwĩkĩte naĩ ngito. Mavinda asu nĩtwaĩlĩtwe nĩ kwĩtya mũno tei wa Yeova na ũekeo wake. Twaumbũla naĩ sitũ kwake na kwĩthingʼĩĩsya vyũ ũndũ tũtonya tũikaisyokeleele, Ngai “nĩwĩyũmbanĩtye kũekea.”—Savuli 86:5; Nthimo 28:13.

7. Yeova ethukĩĩasya mboya sya andũ ala alũngalu syĩ syoka. Nĩ kenda mboya syaku syĩwʼĩke nĩ Ngai, no nginya wĩthĩwe ũitata kũtũa kwĩanana na mĩao yake. (Nthimo 15:29; 28:9) No nginya wĩthĩwe na wĩnyivyo yĩla ũũvoya. (Luka 18:9-14) Wĩ na vata wa kwĩthingʼĩĩsya kwaĩlya maũndũ ala ũũvoya. Kwa nzĩa ĩsu ũkaĩkĩĩthya kana wĩ na mũĩkĩĩo na kana wĩweta kĩla kĩvo. Vau novo Yeova wĩsũngĩa mboya syaku.—Aevelania 11:6.