Ĩsomo ya 9

Athũkũmi ma Ngai No Nginya Methĩwe Me Atheu

Nĩkĩ twaĩlĩtwe nĩ kwĩthĩwa twĩ atheu kwa kĩla nzĩa? (1)

Kwonanasya ata kwĩthĩwa mũtheu kĩveva? (2)

mũtheu kĩmwĩkalĩle? (3) mũtheu kĩkĩlĩko? (4) mũtheu kĩmwĩĩ? (5)

Nĩ mĩthemba yĩva ya ũneeni ũte mũtheu ĩla twaĩlĩtwe nĩ kwĩvathana nayo? (6)

1. Yeova Ngai nĩ mũtheu vate ĩko kana ũvuku. Ekwatasya kana athaithi make makekala me atheu—kĩveva, kĩmwĩkalĩle, kĩkĩlĩko, na kĩmwĩĩ. (1 Vetelo 1:16) Nĩvendekaa kĩthingʼĩĩsyo kingĩ nĩ kenda mũndũ ekale e mũtheu methonĩ ma Ngai. Tũtwĩe nthĩnĩ wa nthĩ ĩte ntheu. Ĩngĩ twĩ na mũngʼangʼano na myelekelo yitũ ene ya kwĩka ũla ũtaĩle. Ĩndĩ no nginya tũendeee tũte kwĩkya ngoo.

2. Ũtheu wa Kĩveva: Ethĩwa twĩenda kũthũkũma Yeova, tũitonya kũendeea kũlũmanʼya na momanyĩsyo kana imanyĩo o na syĩva sya ndĩni ya ũvũngũ. No nginya tume nthĩnĩ wa ndĩni ya ũvũngũ na tũikakwatane nayo kwa nzĩa o na yĩva. (2 Akolintho 6:14-18; Ũvuanʼyo 18:4) Twamina kũmanya ũla wʼo ĩũlũ wa Ngai, no nginya twĩsũvĩe tũikatongoewʼe naĩ nĩ andũ ala mamanyĩasya ũvũngũ.—2 Yoana 10, 11.

3. Ũtheu wa Kĩmwĩkalĩle: Yeova endaa athaithi make mekue ta Aklĩsto ma wʼo mavinda onthe. (1 Vetelo 2:12) Nĩwonaa kĩla ũndũ tũkwĩka, o na kĩmbithĩnĩ. (Aevelania 4:13) Twaĩlĩtwe nĩ kwĩvathana na ĩko ya ũlaalai na imanyĩo ingĩ ite ntheu sya nthĩ ĩno.—1 Akolintho 6:9-11.

4. Ũtheu wa Kĩkĩlĩko: Twausũsya ilĩko sitũ mesilya matheu, mate ũvuku, mũendele witũ o nawʼo ũkeethĩwa wĩ mũtheu. (Avilivi 4:8) Ĩndĩ twatinda tũkĩsilya maũndũ mate matheu, wumĩlo ũkeethĩwa meko mathũku. (Mathayo 15:18-20) Twaĩlĩtwe nĩ kwĩvathana na mĩthemba ya wĩtanĩthyo ĩla ĩtonya kwĩkĩa ilĩko sitũ ĩko. Tũtonya kusũsya ilĩko sitũ mesilya matheu kwa kwĩmanyĩsya Ndeto ya Ngai.

5. Ũtheu wa Kĩmwĩĩ: Nũndũ Aklĩsto nĩ aũngami vandũ va Ngai, maĩlĩtwe nĩ kwĩkalya mĩĩ yoo na ngũa syoo syĩ ntheu. Twaĩlĩtwe nĩ kũthamba moko twauma kyoonĩ, na nĩtwaĩlĩtwe nĩ kũmathamba mbee wa maya maitũ ma lĩu kana tũtambĩte kũkwata lĩu. Ethĩwa inywʼĩ mũiĩ syoo sya kũkũna kĩwʼũ, mai nĩmaĩlĩtwe nĩ kũvwʼĩkĩwa nthĩ. (Kũtũngĩlĩlwa kwa Mĩao 23:12, 13) Kwĩkala na ũtheu wa kĩmwĩĩ nĩkũtetheeasya kũete ũima wa mwĩĩ. Wĩkalo wa Mũklĩsto waĩlĩtwe kwĩthĩwa wĩ mũvange nesa na mũtheu nthĩnĩ na nza. Waĩlĩtwe kwoneka ũtheinĩ kwĩthĩwa wĩ kĩvathũkanʼyo ndũanĩ kwa kwĩthĩwa wĩ ngelekanʼyo nzeo.

6. Ũneeni Mũtheu: Athũkũmi ma Ngai no nginya makaneena ũla wʼo mavinda onthe. Aneeni ma ũvũngũ maikalika Ũsumbĩ wa Ngai. (Aeveso 4:25; Ũvuanʼyo 21:8) Aklĩsto maitũmĩaa kĩthyomo kĩthũku. Mayĩthukĩĩasya kana makavũa ngũĩ syĩ ndeto nthokoanu kana ngewa ite ntheu. Kwondũ wa ũneeni woo mũtheu, monekaa ũtheinĩ kwĩthĩwa me kĩvathũkanʼyo wĩanĩ kana sukulu na ũtũinĩ.—Aeveso 4:29, 31; 5:3.

[Visa Ithanguni ya 19]

Athũkũmi ma Ngai no nginya makethĩwa me atheu maũndũnĩ onthe