Sũvĩa Kĩlĩko Kyaku
1 Yesũ eeĩaĩie amanyĩwʼa make mamwende Yeova na ngoo yoo yonthe, thayũ woo wʼonthe na kĩlĩko kyoo kyonthe. (Mt. 22:37, 38) Kĩeleelo kya maũmbano manene ma mwaka ũũ nĩ kũtũtetheesya kwĩlũlũmĩĩlya ũndũ tũilyĩ nthĩnĩ. Ethĩwa nũũlilikana, kyongo kya ũmbano wa kĩvalo nĩ “Sũvĩa Ngoo Yaku!” Ũmbano mũnene wa mũthenya ũmwe wa mwaka wa ũthũkũmi wa 2013 wĩ na kyongo “Sũvĩa Wasya Waku wa Ngoo.” Namo maũmbano ma mũthyũlũlũko ala mekwambĩĩa mwei ũũ ũatĩĩe makaneenea kyongo “Sũvĩa Kĩlĩko Kyaku” kĩla kyumĩte ĩandĩkonĩ ya Mathayo 22:37. Kĩeleelo kya ũmbano ũũ nĩ kũtetheesya kĩla ũmwe witũ ekuũe mosũanĩo make e na kĩeleelo kya kũmaseũvya mamwendeesye Yeova mũnango.
2 Maũndũ Ala Makaneenewa: Tũyĩthukĩĩsya ũmbano wa mũthyũlũlũko, twaĩle kũmantha mosũngĩo ma makũlyo aa, ala nĩmo maũndũ manene:
• Tũtonya kwĩvathana na ‘mosũanĩo ma mũndũ’ ata?
• Tũtonya kũvwʼĩkũa ilĩko sya ala matetĩkĩlĩte ata?
• Nĩ mosũanĩo meva tũkwenda kwĩthĩwa namo?
• Moathimo ma kũsũanĩĩa kwa nzĩa ĩla yaĩle nĩ maũ?
• Tũtonya kwĩtĩkĩlya Yeova alũnge mosũanĩo maitũ ata?
• Aũme ala matwaanĩte, iveti, asyai, na syana matonya kwongeleela ũtanu wa mũsyĩ ata?
• Tũtonya kwĩyũmbanĩsya mũthenya wa Yeova ata?
• Kwĩvotoa ilĩko sitũ kwondũ wa ũthũkũmi kwonanasya kyaũ?
• Ala matũmĩaa kĩla meemanyĩsya makwataa ũathimo mwaũ?
3 Satani ekĩĩte kĩthito athũkye mosũanĩo maitũ. (2 Ako. 11:3) Kwoou, no nginya tũsũvĩe mosũanĩo maitũ. Twaĩle kũendeea kwĩthĩwa na kĩlĩko kya Klĩsto na kũkitana na mosũanĩo ma nthĩ ĩno ĩtaatĩĩaa mĩao. (1 Ako. 2:16) Kwoou vanga wĩĩthĩwa ũmbanonĩ ũũ wa mũthyũlũlũko mĩthenya yelĩ. Ĩthukĩĩsye nesa. Kũtũmĩa ũvoo wa vata ũla ũkaumwʼa kũkatũtetheesya kwĩvotoa ilĩko sitũ kwondũ wa kwĩthĩwa na ũthangaau ũthũkũminĩ wa Ũsumbĩ.—1 Vet. 1:13.
[Makũlyo]
1. Kyongo kya ũmbano wa mũthyũlũlũko wa mwaka wa ũthũkũmi wa 2013 nĩ kĩva, na kĩeleelo kya ũmbano ũũ nĩ kyaũ?
2. Twaĩle kũmantha mosũngĩo ma makũlyo meva ũmbanonĩ wa mũthyũlũlũko?
3. Nĩkĩ nĩ ũndũ wa vata twĩthĩwe ũmbanonĩ mĩthenya yelĩ, twĩthukĩĩsya nesa, na tũitũmĩa kĩla tũkwĩmanyĩsya?