Ndeto ya Ngai Nĩyaĩle Kwondũ wa Kũmanyĩsya

1. Kyongo kya ũmbano wa mũthyũlũlũko kya mwaka wa ũthũkũmi wa 2014 nĩ kĩva, na nĩ ĩkũlyo yĩva ĩkasũngĩwa?

¹ “Mũmanyĩsya” witũ, Yeova, nĩwe mũmanyĩsya ũla mũnene vyũ ĩũlũ wa nthĩ yonthe. (Isa. 30:20, 21, The Holy Bible in Current Kikamba Language) Ĩndĩ we Yeova atũmanyĩasya ata? Nũtũnengete ĩvuku ĩtaelekanwʼa na mavuku ala angĩ, Ndeto yake mbeveee, Mbivilia. Kũmanyĩwʼa nĩ Yeova kũtonya kũtũtetheesya ata kĩ-mwĩĩ, mosũanĩonĩ maitũ, kĩ-veva, na maũndũnĩ ala matũthĩnasya ngoonĩ? Ũsũngĩo wa ĩkũlyo yĩu ũkaneenewa ũmbanonĩ wa mũthyũlũlũko wa mwaka wa ũthũkũmi wa 2014. Kyongo kya ũmbano ũsu nĩ, “Ndeto ya Ngai Nĩyaĩle Kwondũ wa Kũmanyĩsya,” kĩla kyumĩte ĩandĩkonĩ ya 2 Timotheo 3:16.

2. Maũndũ ala manene ma ũmbano ũũ makaumĩlwʼa nĩ mosũngĩo ma makũlyo meva?

² Mantha Mosũngĩo ma Maũndũ Aa Manene: Maũndũ manene ma ũmbano ũũ makaumĩlwʼa nĩ mosũngĩo ma makũlyo aa maatĩĩe:

• Kũmanyĩwʼa nĩ Ndeto ya Ngai kũtonya kũtũtethya ata? (Isa. 48:17, 18)

• Tũtonya kwĩthĩwa na mũĩkĩĩo mwaũ ĩla twatwʼa kwĩka moalyũku maũndũnĩ maitũ nĩ kana tũmũthũkũme Yeova ĩvinda yonthe? (Mal. 3:10)

• Twaĩle kwĩka ata ĩla twakomana na “momanyĩsyo meũ”? (Aevl. 13:9)

• Tũtonya kũatĩĩa “ũmanyĩsyo,” kana nzĩa ya Yesũ ya kũmanyĩsya, ata? (Mt. 7:28, 29)

• Nĩkĩ ala mamanyĩasya kĩkundinĩ maĩle kwĩmanyĩsya? (Alo. 2:21)

• Ndeto ya Ngai ĩtũtethasya maũndũnĩ meva? (2 Tim. 3:16)

• ‘Kũthingithwʼa’ kwa mbaĩ syonthe kũkatuma andũ meka ata? (Akai 2:6, 7)

• Yeova e na mũĩkĩĩo mwaũ naitũ? (Aev. 5:1)

• Nĩkĩ twaĩlĩte kwĩkĩa kĩthito kũatĩĩa kĩla Yeova ũtũmanyĩasya? (Luka 13:24)

3. Nĩkĩ nĩ ũndũ wa vata kwitũ kũmbana na kwĩthukĩĩsya ũmbano ũũ tũseũvĩwʼe ĩvinda yĩla yaĩle?

³ Mwambĩĩonĩ wa kĩlungu kya 3 kya ĩvuku ya 2 Timotheo, Vaulo atanamba kũweta ndeto ila syumĩtwʼe kyongo kya ũmbano ũũ, nĩwaeleisye ũndũ mĩthenya ya mũminũkĩlyo ĩkethĩwa ĩilyĩ. Aandĩkie: “Andũ athe na akengani makaendeea na kwongeleka kũthũka, makĩkengana na kũkengwa.” (2 Tim. 3:13) Nĩ ũndũ wa vata ta kĩ, kwĩthukĩĩsya na kũatĩĩa momanyĩsyo ma Mbivilia nĩ kana tũikakengwe! Kwoou, ekai tũtwʼe kũmbana na kwĩthukĩĩsya ũmbano ũũ tũseũvĩwʼe ĩvinda yĩla yaĩle.