Ndeto ya Ngai Yĩ Ũtonyi
1. Kyongo kya ũmbano mũnene wa mũthenya ũmwe wa mwaka wa ũthũkũmi wa 2014 nĩ kĩva?
1 Kĩvathũkanyʼo na syĩndũ ila syumanĩte na andũ mate eanĩu, Mbivilia yĩ na ũtonyi wa kũtũvĩndũa kwa kũlũnga mosũanĩo na nzĩa sitũ kwosana na kwenda kwa Ngai. Yo Ndeto ya Ngai yĩ ũtonyi wĩana ata? Vinya wa Ndeto ya Ngai ũtonya kũtũtethya thayũnĩ ata? Tũtonya kũtũmĩa Ndeto ya Ngai ata kũtetheesya angĩ? Twĩĩkwatya mũĩkĩĩo waku nũũlũlũmĩlwʼa nĩ mosũngĩo ma makũlyo aa ũmbanonĩ witũ wa mũthenya ũmwe wa mwaka wa ũthũkũmi wa 2014. Kyongo kya ũmbano ũsu nĩ “Ndeto ya Ngai Yĩ Ũtonyi,” kĩla kyumĩtwʼe ĩandĩkonĩ ya Aevelania 4:12, kwosana na The Holy Bible in Current Kikamba Language.
2. Twaĩle kũmantha mosũngĩo ma makũlyo meva?
2 Mantha Mosũngĩo ma Makũlyo Aa: Ũendeee kwĩthukĩĩsya ũmbano, mantha mosũngĩo ma makũlyo aa maatĩĩe.
• Nĩkĩ twaĩlĩte kũĩkĩĩa Ndeto ya Ngai? (Sav. 29:4)
• Twaĩle kwĩka ata nĩ kana vinya wa Ndeto ya Ngai ũtũtethye thayũnĩ witũ? (Sav. 34:8)
• Ũtonya kũtetheesya andũ ata maelewe ũtonyi wa Ndeto ya Ngai ĩla ũũtavanyʼa? (2 Tim. 3:16, 17)
• Tũtonya kwĩvathana ata na vinya wa ũkengani wa nthĩ ya Satani? (1 Yoa. 5:19)
• Ũtonya kwĩka maendeeo ma kĩ-veva ata wĩ wa mũika? (Yel. 17:7)
• Tũtonya kwĩthĩwa na vinya ata o na ĩla twĩ onzu? (2 Ako. 12:10)
• Nĩ kyaũ kĩtonya kũtũtetheesya kũendeea kũalyũka, o na ethĩwa twĩ na imanyĩo na mĩkalĩle twĩthĩĩtwe nayo kwa ĩvinda ĩasa? (Aev. 4:23)
3. Eka kwĩthukĩĩsya, nĩ kwa nzĩa ĩngĩ myaũ tũtonya kũtetheka nĩ ũmbano ũũ mũnene wa mũthenya ũmwe?
3 Tũkatetheka mũno kũkwata mosũngĩo ma makũlyo asu. Ĩngĩ, o ta maũmbano ala angĩ manene, ũmbano ũũ ũkatũnenga mwanya wa kũmanyana na ana-a-asa na eĩtu-a-asa kuma ikundinĩ ingĩ. (Sav. 133:1-3; 2 Ako. 6:11-13) Kwoou, osa ĩvinda ya kwĩthĩwa na anyanya maku, na ũimanyana na angĩ. Ethĩwa ve mumya wa ũvoo ũla ũthokete, ethĩwe nĩ mũsyaĩĩsya wa kĩvalo kana mwana-a-asa kuma Mbetheli, nĩ ũseo ũkosa ĩvinda ũneene nake vamwe na mũka wake. Kwa wʼo, twĩ na itumi mbingĩ sya kwĩthĩwa na mea ma ũmbano ũsu mũnene wa mũthenya ũmwe!