No Nĩkwate Mbivilianĩ Mĩsoa Ĩtonya Kũngiakisya?
Ũndũ Mbivilia Ĩsũngĩĩte
Ĩĩ. (Alomi 15:4) Sũanĩa mĩsoa ĩmwe yĩ Mbivilianĩ yĩthĩĩtwe ĩikiakisya andũ aingĩ ala makwatĩtwe nĩ maũndũ momũ na ma kũtũla ngoo.
Kĩlungunĩ kĩĩ
Thĩna
Savuli 23:4: “Ĩĩ, o na ngavĩtĩla kyandanĩ kya kyuu kya kĩkwʼũ, ndikakĩa ũndũ ũthũku; nĩkwĩthĩwa wĩ vamwe nakwa.”
Kĩla ĩandĩko yĩu yonanasya: Yĩla wamũvoya Ngai na weekwatya Ndeto yake Mbivilia ĩũtongoesye, no ũmĩĩsye thĩna wĩ na ũkũmbaũ.
Avilivi 4:13: “Nĩndonya maũndũ onthe nũndũ wa vinya wa ũla ũndonyethasya.”
Kĩla ĩandĩko yĩu yonanasya: Ngai no aũnenge vinya wa kũmĩanĩsya na thĩna o na wĩva.
Kũkwʼĩĩwa nĩ mũndũ wendete
Mũtavanʼya 9:10: “Kũti wĩa kana ũsũanĩo, kana ũmanyi, kana ũĩ, Seoli vala ũendete.”
Kĩla ĩandĩko yĩu yonanasya: Ala akwʼũ maithĩnaa, o na maitonya kũtũũmĩsya. Vaiĩ ũndũ o na ũmwe mesĩ.
Meko ma Atũmwa 24:15: “Kũkeethĩwa na ũthayũũkyo.”
Kĩla ĩandĩko yĩu yonanasya: Ngai e na ũtonyi wa kũthayũũkya endwa maitũ ala makwie.
Kũandũĩka mũno nũndũ wa mavĩtyo weekie
Savuli 86:5: “Nũndũ wĩ mũseo, Mwĩaĩi, na nĩwĩyũmbanĩtye kũekea, na wĩ na ũseo mwingĩ wĩ wendo kwa onthe ala mekwĩkaĩlaa.”
Kĩla ĩandĩko yĩu yonanasya: Ngai nũekeaa ala melilaa kuma ngoonĩ nũndũ wa mavĩtyo meekie, na matwʼĩte vyũ kana maikamasyokea.
Savuli 103:12: “O tondũ kũasavĩte kuma wumĩlonĩ wa syũa kũvika ũthũĩlonĩ wayo, nowʼo ũvetete kũasa naitũ mothũku maitũ.”
Kĩla ĩandĩko yĩu yonanasya: Yĩla Ngai watũekea, avetaa naĩ sitũ kũasa vyũ kwĩ ũndũ tũtonya kũsũanĩa. Ndatũlilikanasya ĩũlũ wasyo ĩngĩ na ĩngĩ, nĩ kana atũsilĩle kana atũkanyʼe.
Kyeva
Savuli 31:7: “Nĩkwĩthĩwa nĩwoonie thĩna wakwa: nĩwamanyie mathĩna ma ngoo yakwa.”
Kĩla ĩandĩko yĩu yonanasya: Ngai nĩwĩsĩ vyũ maũndũ onthe ala maũthĩnasya. Nũeleawa nesa ũndũ ũkwĩwʼa ngoonĩ, o na yĩla ala angĩ malea kũelewa.
Savuli 34:18: “Yeovaa e vakuvĩ na ala matũlĩkĩte ngoo, na nũtangĩĩaa ala mekwĩlila vevanĩ.”
Kĩla ĩandĩko yĩu yonanasya: Ngai akwathĩte kana akaũtetheeasya yĩla ũkwĩwʼa wĩmakĩĩte. No aũnenge vinya wa kũmĩĩsya kyeva kĩla wĩ nakyo.
Mowau
Savuli 41:3: “Yeova nĩwe ũkamũtethya e ũkomonĩ awaa.”
Kĩla ĩandĩko yĩu yonanasya: Ngai no aũtetheesye ũkomĩanĩsya na ũwau mũthũku kwa kũũnenga mũuo wa kĩlĩko, vamwe na vinya, wũmĩĩsyo, na ũĩ ũla ũtonya kũũtetheesya wĩke motwi maseo.
Isaia 33:24: “Ũla ũtwĩe kwʼo ndakasya, Nyie nĩ mũwau.”
Kĩla ĩandĩko yĩu yonanasya: Ngai nĩwathanĩte ĩvinda yĩla andũ onthe makatanĩa ũima wa mwĩĩ.
Kwĩmakĩa
Savuli 94:19: “Mosũanĩonĩ makwa maingĩ nthĩnĩ wakwa mokiakisyo maku matanʼya ngoo yakwa.”
Kĩla ĩandĩko yĩu yonanasya: Twamũvoya Ngai yĩla tũkwĩwʼa twĩmakĩĩte, no atũtetheesye tũkekala tũuĩtye.
1 Vetelo 5:7: “Mũimwiĩa kwĩmakĩa kwenyu kwʼonthe, nũndũ nũmũthĩnĩkĩaa.”
Kĩla ĩandĩko yĩu yonanasya: Ngai nũthĩnĩkaa yĩla woona tũithĩna. Nũtũthoketye tũmũtavye mathĩna maitũ.
Kaũ
Savuli 46:9: “Nake nũtumaa makaũ mathela kũvika kĩtulu kya nthĩ.”
Kĩla ĩandĩko yĩu yonanasya: O mĩtũkĩ Ũsumbĩ wa Ngai ũkamina kaũ wʼonthe.
Savuli 37:11, 29: “Ala auu makatiĩwa nthĩ, na makeetanʼya mũuonĩ mwingĩ. . . . Ala alũngalu makatiĩwa nthĩ, na makatũa vo kũvika tene na tene.”
Kĩla ĩandĩko yĩu yonanasya: Andũ ala aseo makatanĩa mũuo ĩũlũ wa nthĩ tene na tene.
Kũthĩnĩka ĩũlũ wa ĩvinda yũkĩte
Yelemia 29:11: “Nĩnĩsĩ mosũanĩo ala nĩsũanĩaa kwondũ wenyu, easya Yeova, mosũanĩo ma mũuo, na ti ma ũthũku, kũmũnenga wĩkwatyo mũminũkĩlyo wenyu.”
Kĩla ĩandĩko yĩu yonanasya: Ngai nũĩkĩĩthĩtye andũ make kana no meteele ĩvinda ĩseo yũkĩte.
Ũvuanyʼo 21:4: “Akavangũla methoi onthe methonĩ moo, na kĩkwʼũ kĩikethĩwa vo ĩngĩ, o na kũikethĩwa ĩngĩ kĩmeto kana kĩĩo kana woo. Maũndũ ma mbee nĩ mavĩtu.”
Kĩla ĩandĩko yĩu yonanasya: Ngai athanĩte kana akavetanga maũndũ mathũku ala wonaa ũmũnthĩ.
a Yeova nĩyo ĩsyĩtwa ya Ngai. (Savuli 83:18) Sisya kĩlungu kĩ na kyongo, “We Yeova Nũũ?”