Mbivilia Yaĩtye Ata Ĩũlũ wa Andũ Milioni 6 Ala Mowaĩtwe Nĩ COVID-19?

Kwosana na ũkunĩkĩli wa Ngwatanĩo ya Nthĩ Yonthe ya Ũiiti (WHO), tũivika Matukũ 23, Mwei wa 5, 2022, andũ milioni 6.27 nĩmakwʼĩte nũndũ wa ũwau wa COVID-19. Ĩndĩ twĩ Matukũ 5, Mwei wa 5, 2022, WHO nĩyawetete kana ũtalo wa andũ ala makwʼĩte nũtonya kwĩthĩwa wĩ mwingĩ vyũ kwĩ ũsu. Yawetie kana mwakanĩ wa 2020 na wa 2021, “andũ ala makwie nũndũ wa ũwau wa COVID-19 kana nũndũ wa maũndũ angĩ makonanĩtye nawʼo . . . nũtonya kwĩthĩwa waĩ milioni 14.9.” Yo ve ũndũ Mbivilia ĩwetete ĩũlũ wa maũndũ ma kũmakya ta asu?

Mbivilia nĩyathanie ĩũlũ wa mowau mathũku ma kũkwatanwʼa

•  Yesũ athanie kana ĩvindanĩ yĩla yĩtĩtwe ‘mĩthenya ya mũminũkĩlyo,’ kũkeethĩwa na mowau ma kũkwatanwʼa, kana “mowau mathũku mũno” matonya kũnyaĩĩkwʼa.—Luka 21:11, The Holy Bible in Current Kikamba Language; 2 Timotheo 3:1.

Wathani ũsu wa Yesũ nũendeee kwĩanĩa. Nĩ kana ũkwate ũvoo mwingangĩ, soma kĩlungu kĩ na kyongo, “Ni Nini Ishara ya ‘Siku za Mwisho’?”

Mbivilia nĩtũkiakiasya

•  “Ngai wa ũkiakisyo wʼonthe [nũtũkiakiasya] matatwanĩ maitũ onthe.”—2 Akolintho 1:3, 4.

Aingĩ ala makwʼĩĩwe nĩ mũndũ mendete nĩmakwatĩte ũkiakisyo Mbivilianĩ. Nĩ kana ũkwate ũvoo mwingangĩ, soma kĩlungu kĩ na kyongo, “Kũmĩanĩsya na Kyeva—Kĩla Ũtonya Kwĩka Ũmũnthĩ,” na “Ũtethyo Ũla Mũseo Vyũ kwa Ala Makwʼĩĩwe.”

Mbivilia nĩwetete ũndũ thĩna ũsu ũkathela vyũ

•  “Ũsumbĩ waku wũke. Kwenda kwaku kwĩke kũũ nthĩ o ta kũya ĩtunĩ.”—Mathayo 6:10.

O mĩtũkĩ, “Ũsumbĩ wa Ngai” nũkũĩkĩĩthya kana ũla ũtwĩe ĩũlũ wa nthĩ “ndakasya, Nyie nĩ mũwau.” (Maliko 1:14, 15; Isaia 33:24) Sisya vitio Ũsumbĩ wa Ngai Nĩ Kyaũ? nĩ kana ũmanye ĩũlũ wa silikalĩ ĩsu ya ĩtunĩ na kĩla ĩkeka.

Nĩtũũkũthokya wĩmanyĩsye maũndũ maingĩ ĩũlũ wa Mbivilia nĩ kana we na mũsyĩ waku mũtetheke nĩ ũtao wayo mũseo na maũndũ maseo ala ĩtwathĩte.