Kĩla Ũsumbĩ wa Ngai Ũkeanĩsya Maũndũnĩ ma Ũiiti

“Nũndũ yu ũwau wa COVID-19 ũyĩũthĩnyʼa andũ mũno ĩũlũ wa nthĩ yonthe, tũyaĩle kũsũanĩa kana ũyĩsa kũtũkwata ĩngĩ.. . . Yĩla ũwau ũngĩ wa kũkwatanwʼa wĩumĩla—nawʼo ndũlea kumĩla—nũseo twĩkalae twĩyũmbanĩtye.”—Dr. Tedros Adhanom Ghebreyesus, mũũngamĩi wa Ngwatanĩo ya Nthĩ Yonthe ya Ũiiti, Matukũ 22, Mwei wa 5, 2023.

Andũ aingĩ maendeee kũmĩanĩsya na mathĩna ma mwĩĩ na ma kĩlĩko nũndũ wa ũwau wa COVID-19. Yo silikalĩ na ngwatanĩo ila ithĩnĩkĩaa ũima wa mwĩĩ no imine mathĩna ma mwĩĩ ala yu twĩ namo, na iyĩthĩwa syĩyũmbanĩtye ũndũ vaumĩla ũwau wa kũkwatanwʼa ĩvindanĩ yũkĩte?

Mbivilia nĩwetete ĩũlũ wa silikalĩ ĩla ĩkatũetee ũiiti ũla twĩ na vata nawʼo. Yaĩtye atĩĩ: “Ngai wa ĩtunĩ akaũngamya ũsumbĩ,” kana silikalĩ. (Ndanieli 2:44) Silikalĩnĩ ĩsu, “ũla ũtwĩe kwʼo ndakasya, Nyie nĩ mũwau.” (Isaia 33:24) Kĩla mũndũ akeethĩwa na vinya na ũima wa mwĩĩ.—Yovu 33:25.