Nthĩ Ĩendeee Kwanangwa—Ũndũ Mbivilia Yaasya

“Maũndũ maingĩ ala andũ maendeee kwĩka ũmũnthĩ, o mĩtũkĩ nĩmeũtuma kwĩthĩwa na mathĩna manene vyũ ma nzeve. Taoni ila nene vyũ nitonya kũvwʼĩkwa nĩ kĩwʼũ. Nĩkũkwĩthĩwa na ũvyũvu mwingĩ ũtaaĩthĩwa ĩngĩ. Iuutani sya kũtelemya. Mũo wa kĩwʼũ kũndũ kwingĩ. Mĩthemba ya mĩtĩ na nyamũ milioni kũthela vyũ. Maũndũ asu ti o ngewa tũ kana mautĩĩo. Kĩu nĩkyo andũ ma saenzi mekwasya kĩtonya kwĩthĩwa ĩũlũ nthĩ, silikalĩ syaema kũvĩndũa nzĩa syoo sya kũtũmĩa vinya ũla ũtũmĩawa kũthũkũmĩthya syĩndũ ta masinĩ na syĩndũ ingĩ ta isu.”—Ndeto sya Mũandĩki mũnene wa Ngwatanĩo ya Nthĩ (UN) wĩtawa António Guterres, aineenea ĩũlũ wa livoti yanenganiwe nĩ Intergovernmental Panel on Climate Change, Matukũ 4, Mwei wa 4, 2022.

“Andũ ma saenzi maĩtye kana o mĩtũkĩ kũndũ ta 423 kwa kũsũvĩĩa nyamũ [nthĩ ya Amelika], kũkeethĩwa kwanangĩtwe nĩ moalyũku ma nzeve, na mũno mũno nũndũ kũndũ kũu nĩkũthũawa nĩ ũvyũvu mwingĩ. Veonekana kana maũndũ mathũku ala matonya kwĩkĩka mailye ta mĩisyo ĩla tũsomaa Mbivilianĩ. Maũndũ asu nĩ ta mwaki na mbua yĩ na kĩwʼũ kingĩ, mbalavu kũtweka, kĩwʼũ kya ũkanga kwongeleka na kwongeleka kwa ũvyũvu.”—Kĩlungu kĩ na kyongo, “Flooding Chaos in Yellowstone, a Sign of Crises to Come,” kĩla kĩ ĩkasetinĩ ya The New York Times, Matukũ 15, Mwei wa 6, 2022.

Yo mathĩna ma mawĩthyũlũlũko no mathele? Ethĩwa nĩwʼo, nũũ ũtonya kũmamina? Kwoona kĩla Mbivilia ĩwetaa.

Mathĩna ma mawĩthyũlũlũko nĩmathaniwe

Mbivilia yaĩtye kana Ngai ‘akaananga ala manangaa nthĩ.’ (Ũvuanyʼo 11:18) Mũsoa ũsu wĩ Mbivilianĩ ũtũmanyĩasya maũndũ atatũ:

1. 1. Maũndũ ala andũ mekaa nĩmo manangaa nthĩ.

2. 2. Andũ ala manangaa nthĩ na maũndũ ala matumĩte nthĩ yanangĩka makavetangwa.

3. 3. Ngai nĩwe ũkavetanga mathĩna ma mawĩthyũlũlũko, ĩndĩ ti andũ.

Nthĩ yitũ ĩkasũvĩwa ĩvinda yũkĩte

Mbivilia yaĩtye kana “nthĩ nĩyĩkalaa tene na tene.” (Mũtavanʼya 1:4) Mavinda onthe ĩkatũaa andũ.

• ”Ala alũngalu makatiĩwa nthĩ, na makatũa vo kũvika tene na tene.”—Savuli 37:29.

Nthĩ yitũ ĩkatũngĩĩwa vyũ kũla ĩkethĩwa yanangĩtwe.

• ”Weũ na nthĩ nyũmũ ikatana; na yalata yĩkatana, na kũlaũka ta ĩlaa ya lose.”—Isaia 35:1.