Mũsumbĩ wa Ũsumbĩ wa Ngai Nũũ?

• Kũnyuvwa nĩ Ngai. “Nakwa nĩniĩte mũsumbĩ wakwa . . . Ngakũnenga mbaĩ syĩthĩwe ũtiĩwa waku, na itulu sya nthĩ syĩthĩwe ngʼũndũ yaku.”—Savuli 2:6, 8.

• Kwĩthĩwa e wa nyũmba ya Mũsumbĩ Ndaviti. “Nũndũ nĩkũsyaĩtwe kana kwondũ witũ, nĩtũnengetwe mwana mũndũ mũũme . . . Wingĩvo wa ũsumbĩ wake na wa mũuo ndũkethĩwa na mũminũkĩlyo kĩvĩlanĩ kya ũsumbĩ kya Ndaviti, na ũsumbĩnĩ wake, na kũũlũlũmĩlya.”—Isaia 9:6, 7.

• Kũsyaĩwa Mbethi-leemu. “Ĩndĩ we, Mbethi-leemu . . . , kwaku kũkauma ũmwe ambũkĩe ũla wĩtwʼĩka mũsumbĩki . . . Akeethĩwa e mũnene kũvika itulu sya nthĩ.”—Mika 5:2, 4.

• Kũlewa nĩ andũ na kũawa. “Nĩwavũthiwʼe. . . . naitũ tũtyaamũtwʼa ta kĩndũ. . . . Nĩwatonyiwe kwondũ wa mavĩtyo maitũ, auauĩkwʼa kwondũ wa mothũku maitũ.”—Isaia 53:3, 5.

• Kũthayũũkwʼa na ainengwa ũkũmũ mũnene. “Ndũkatia thayũ wakwa Seoli; o na ndũketĩkĩla ũla mũtheu waku one wanangĩko. . . . Kwʼokonĩ kwaku kwa aũme kwĩ maũndũ ma kwendeesya kũvika tene na tene.”—Savuli 16:10, 11.

Yesũ Klĩsto Nĩwe Mũsumbĩ Ũla Waĩlĩte Vyũ

Kuma andũ moombwa, no Yesũ Klĩsto e weka wĩanĩĩtye maũndũ asu onthe Mũtongoi ũla wanyuvĩtwe waaĩle kwĩanĩsya. O na Yesũ atanamba kũsyawa, mũlaĩka nĩwamũtavĩtye Meli inyia wake atĩĩ: “Ngai akamũnenga kĩvĩla kya ũsumbĩ kya Ndaviti ĩthe wake, . . . na Ũsumbĩ wake ndũkethĩwa na mũminũkĩlyo.”—Luka 1:31-33.

Yesũ ndaatwʼĩka mũtongoi vaa ĩũlũ wa nthĩ. Ĩndĩ akasumbĩka andũ kuma ĩtunĩ e Mũsumbĩ wa Ũsumbĩ wa Ngai. Nĩkĩ nĩwe Mũsumbĩ ũla mũseo vyũ? Kwoona maũndũ ala weekaa e kũũ ĩũlũ wa nthĩ.

• Yesũ nĩwathĩnĩkĩaa andũ. Yesũ nĩwatethasya aũme na iveti, syana na andũ akũũ, ateũsisya vala maumĩte kana kĩlasi kyoo. (Mathayo 9:36; Maliko 10:16) O na yĩla ũla mũndũ waĩ mũwau mangũ wamwĩsũvie aimwĩa: “Ethĩwa nũkwenda, nũtonya kũnthesya,” Yesũ nĩwamwĩwʼĩie tei mwingĩ mũno na amũvosya.—Maliko 1:40-42.

• Yesũ nĩwamanyĩisye andũ ũndũ matonya kũmwendeesya Ngai. Aisye atĩĩ: “Mũitonya kũmũthũkũma Ngai na Ũthwii.” O na ĩngĩ nĩwamamanyĩisye kana nĩmaĩlĩte kũmeka andũ ala angĩ o tondũ mo mekwenda mekwe, na ũsu wambĩĩie kwĩtwa mwolooto wĩ nguma. Kwongeleela kĩu, nĩwoonanisye kana Ngai ndendeeawʼa no maũndũ ala twĩkaa me moka, ĩndĩ nĩwendeeawʼa nĩ ũndũ tũũsũanĩa na kwĩwʼa. Kwoou, nĩ kana tũmwendeesye Ngai no nginya twĩthĩwe twĩ metho ĩũlũ wa maũndũ ala tũkwĩkĩa ngoonĩ sitũ. (Mathayo 5:28; 6:24; 7:12) Yesũ nĩwakindĩlĩĩile kana ethĩwa nĩtũkwenda kwĩthĩwa twĩ atanu no nginya twĩmanyĩsye kĩla Ngai wendaa twĩke na tũikĩka.—Luka 11:28.

• Yesũ nĩwatũmanyĩisye ũndũ tũtonya kwenda ala angĩ. Ndeto ila Yesũ waneenaa na maũndũ ala weekaa maĩ ma kwendeesya na nĩmakiitaa ngoo sya ala mamwĩthukĩĩasya. Mbivilia yaĩtye atĩĩ: “Ĩkomano nĩyasengʼiwʼe nĩ nzĩa yake ya kũmanyĩsya, nũndũ amanyĩasya ta mũndũ wĩ na ũkũmũ.” (Mathayo 7:28, 29) Ĩvinda yĩngĩ ameie atĩĩ: ‘Endai amaitha menyu.’ O na yĩla Yesũ waĩ mũtĩnĩ wa mathĩna avoyie ĩũlũ wa andũ ala mamũthĩnasya asya: “Asa maekee, nũndũ mayĩsĩ ũndũ mekwĩka.”—Mathayo 5:44; Luka 23:34.

Vate nzika, Yesũ nĩwe waĩlĩte vyũ kũsumbĩka andũ, nũndũ e tei na nĩwĩthĩawa eyũmbanĩtye kũtetheesya andũ. Ĩndĩ we aĩ ambĩĩe kũsumbĩka ĩndĩĩ?