Watchtower LIBRARY INDANETINĨ
Watchtower
LIBRARY INDANETINĨ
Kikamba
Ũ
  • ũ
  • Ũ
  • ĩ
  • Ĩ
  • MBIVILIA
  • MAVUKU
  • MAŨMBANO
  • mwbr25 Mwei wa 3 ĩth. 1-11
  • Mavuku Ala Monanĩtwʼe Nthĩnĩ wa Kavuku ka Ũmbano wa Mwĩkalĩle wa Aklĩsto

Vai vitio ya kĩla wanyuva.

Vole, ve thĩna waumĩla.

  • Mavuku Ala Monanĩtwʼe Nthĩnĩ wa Kavuku ka Ũmbano wa Mwĩkalĩle wa Aklĩsto
  • Mavuku Ala Monanĩtwʼe Nthĩnĩ wa Kavuku ka Ũmbano—2025
  • Syongo Nini
  • MATUKŨ 3-9, MWEI WA 3
  • MATUKŨ 10-16, MWEI WA 3
  • MATUKŨ 17-23, MWEI WA 3
  • MATUKŨ 24-30, MWEI WA 3
  • MATUKŨ 31, MWEI WA 3–MATUKŨ 6, MWEI WA 4
  • MATUKŨ 7-13, MWEI WA 4
  • MATUKŨ 14-20, MWEI WA 4
  • MATUKŨ 21-27, MWEI WA 4
  • MATUKŨ 28, MWEI WA 4–MATUKŨ 4, MWEI WA 5
Mavuku Ala Monanĩtwʼe Nthĩnĩ wa Kavuku ka Ũmbano—2025
mwbr25 Mwei wa 3 ĩth. 1-11

Mavuku Ala Monanĩtwʼe Nthĩnĩ wa Kavuku ka Ũmbano wa Mwĩkalĩle wa Aklĩsto

© 2024 Watch Tower Bible and Tract Society of Pennsylvania

MATUKŨ 3-9, MWEI WA 3

MAŨNDŨ MA VATA KUMA NDETONĨ YA NGAI NTHIMO 3

Onanyʼa Kana Nũmũĩkĩĩe Yeova

ijwbv kĩlungu kya 14 ¶4-5

Nthimo 3:5, 6—“Ndũkekwatye Ũmanyi Waku Mwene”

“Ĩkĩĩa Yeova na ngoo yaku yonthe.” Twonanasya kana nĩtũmũĩkĩĩe Ngai tweeka maũndũ kwosana na kwenda kwake. No nginya tũmũĩkĩĩe Ngai vyũ na ngoo yitũ yonthe. Mbivilianĩ, ndeto ngoo yonanasya mũndũ wa nthĩnĩ, na ũu nĩ vamwe na ũndũ mũndũ ũkwĩwʼa, maũndũ ala ũkwenda kwĩka, ũndũ ũkũsũanĩa, na ũndũ wonaa maũndũ. Kwoou, kũĩkĩĩa Ngai na ngoo yitũ yonthe kwonanasya maũndũ maingĩ eka o ũndũ tũkwĩwʼa. Ũsu nĩ ũtwi twĩkaa nũndũ nĩtwĩsĩ nesa vyũ kana Mũmbi witũ nĩwĩsĩ kĩla kĩseo vyũ kwitũ.—Alomi 12:1.

“Ndũkekwatye ũmanyi waku mwene.” Nĩtwaĩlĩte kũmũĩkĩĩa Ngai nũndũ tũyamba kwĩkwatya ũmanyi witũ nĩkwĩthĩwa twĩ ene naĩ. Ethĩwa tũkeekwatasya ũmanyi witũ ene, kana kwĩka maũndũ kwosana na ũndũ tũkwĩwʼa, no twĩke motwi mekwoneka me maseo, ĩndĩ ĩtina mayĩsa kũtũetee mosyao mathũku. (Nthimo 14:12; Yelemia 17:9) Ũĩ wa Ngai nĩ mwingĩ mũno kwĩ witũ. (Isaia 55:8, 9) Tweetĩkĩla kũtongoewʼa nĩ mosũanĩo make, maũndũ maitũ makaaĩlaa.—Savuli 1:1-3; Nthimo 2:6-9; 16:20.

ijwbv kĩlungu kya 14 ¶6-7

Nthimo 3:5, 6—“Ndũkekwatye Ũmanyi Waku Mwene”

“Mĩendelenĩ yaku yonthe mũkũsĩĩe we.” Nĩtwaĩlĩte kwĩthĩwa na woni ta wa Ngai maũndũnĩ onthe ala tũkwĩka, na yĩla tũkwĩka motwi ma vata thayũnĩ. Twĩkaa ũu kwa kũmũvoya atũtongoesye, na kwa kũatĩĩa kĩla ũtũtavĩtye Ndetonĩ yake, Mbivilia.—Savuli 25:4; 2 Timotheo 3:16, 17.

“Akaũlũngalĩlya nzĩa syaku.” Ngai atũlũngalĩlasya nzĩa sitũ kwa kũtũtetheesya twĩkale kwosana na myolooto yake ya ũlũngalu. (Nthimo 11:5) Kwoou, nĩtwĩvathanaa na maũndũ matonya kũtũlikya mũisyonĩ na tũyĩkala twĩ atanu.—Savuli 19:7, 8; Isaia 48:17, 18.

be 76 ¶5

Ĩka Maendeeo ma Kĩ-veva

Ĩtina wa mũndũ kwĩthĩwa akwatĩtwe nĩ maũndũ me kĩvathũkanyʼo thayũnĩ, nĩ laisi akatatĩka kwasya: ‘Nĩnakwatiwe nĩ ũndũ ũũ. Nĩnĩsĩ kĩla ngwĩka.’ Yo nĩ ũndũ wa ũĩ kwasya ũu? Nthimo 3:7 ĩtũkanĩtye ũũ: “Ndũkethĩwe na ũĩ wa metho maku mwene.” Vate nzika, maũndũ ala matũkwatĩte maĩlĩte kũtuma tũsũanĩa nesanga ĩla tũkwĩka motwi thayũnĩ. Ĩndĩ yĩla tũkwĩka maendeeo ma kĩ-veva, maũndũ asu matũkwatĩte maĩle kũtuma tũĩkĩĩa ngoonĩ na ilĩkonĩ sitũ kana tũte na ũathimo wa Yeova maũndũ maitũ mayĩsa kwaĩla. Kwoou, maendeeo maitũ makoonekaa nesa yĩla twamwĩkwatya Yeova atũtongoesye thayũnĩ vandũ va kwĩkwatya ũmanyi witũ ene yĩla twakwatwa nĩ maũndũ momũ. Twonanasya nĩtwĩkĩte maendeeo asu kwa kwĩthĩwa tũte na nzika kana vai ũndũ twĩka atatũtetheesye, na kũendeea kũlũlũmĩĩlya wĩkwatyo witũ na ũnyanya wa vakuvĩ vamwe na Ĩthe witũ wa ĩtunĩ.

Ũthwii wa Kĩ-veva

w06 9/15 17 ¶7

Maũndũ Manene Kuma Ĩvukunĩ ya Nthimo

3:3. Nĩtwaĩle kwonaa nguma ya ũseo na wʼo syĩ sya vata mũno na tũisyonanyʼa ũtheinĩ o tondũ ĩsoa ya thooa mũnene yĩ ngingonĩ ya mũndũ yĩtonya kwoneka. O na ĩngĩ nĩtwaĩlĩte kũandĩka nguma isu ngoonĩ sitũ kwa kũsyonaa syĩ sya vata thayũnĩ witũ.

w11 3/15 14 ¶7-10

Mwĩkwatye Yeova o Ũndũ Mũthya Ũthengeee

7 Aingĩ ma ana-a-asa maitũ matavanasya isionĩ wĩthĩaa nĩ vinya mũno kũmĩĩsya. O nake mwathani Yelemia atavanasya kĩsionĩ kĩilye ũu ĩvinda yĩla ũsumbĩ wa Yuta waĩ na mathĩna na waangĩe kũthela. Mũĩkĩĩo wake nĩwatatawa kĩla mũthenya nũndũ atavanasya ũvoo wa Ngai wa ũsilĩlo. O na ve ĩvinda mũandĩki wake weetawa Mbaluku waisye kana eewʼaa anoetwʼe nĩ maũndũ ala maendeee. (Yel. 45:2, 3) We Yelemia nĩwakwie ngoo? Ĩĩ, mavinda kwa mavinda nĩwakusaa ngoo. Aisye: “Nũumanĩwe mũthenya ũla nasyaiwe: Nũndũ wa kĩ naumie ĩvunĩ none thĩna na woo, nĩ kana mĩthenya yakwa yanangĩke na nthoni?”—Yel. 20:14, 15, 18.

8 Ĩndĩ, Yelemia ndaaeka kũkwʼa ngoo kũtume aeka ũthũkũmi wake. Nĩwaendeeie kũmwĩkwatya Yeova. Nũndũ wa ũu, mwathani ũsu waĩ mũĩkĩĩku nĩweeyoneie ndeto sya Yeova ila iwetetwe ĩandĩkonĩ ya Yelemia 17:7, 8 iyĩanĩa. Syaĩtye: “Nĩ mũathime mũndũ ũla ũmũĩkĩĩaa Yeova, na Yeova nĩwe wĩkwatyo wake. Nũndũ akeethĩwa ta mũtĩ ũvandĩtwe ũtee wa manzĩ, ũla ũtambũũkasya mĩi yawʼo vakuvĩ na ũsĩ, na ndũkakĩa yĩla ũvyũvu wĩũka, ĩndĩ ĩtũ yawʼo yĩkeethĩwa yĩũ; na ndũkemakĩa mwaka wa mũnyao, kana kũeka kũsyaa ũsyao.”

9 O ta mũtĩ mũsanzamũku “ũvandĩtwe ũtee wa manzĩ,” Yelemia ʼndaaeka kũsyaa ũsyao.ʼ Nĩwaleile kwelelũkwʼa nĩ andũ athũku ala mamũthyũlũlũkĩte. Vandũ va ũu, nĩwalũmanilye na vala wakwataa “manzĩ” ma thayũ na aia ngoonĩ maũndũ onthe ala Yeova wamũtavasya. (Soma Savuli 1:1-3; Yel. 20:9) Yelemia nĩ ngelekanyʼo nzeo mũno kwitũ, na mũno mũno kwa ala mamũthũkũmaa Ngai isionĩ ila andũ matendeeawʼa nĩ ũvoo mũseo! Ethĩwa ũu nĩwʼo vailye kwaku, endeea kũmwĩkwatya Yeova mũno vyũ na akaũnenga wũmĩĩsyo yĩla ũendeee ‘kũtavanyʼa ũtheinĩ ĩsyĩtwa yake.ʼ—Aevl. 13:15.

10 Nĩ kana tũmĩĩsye maũndũ ala meũtũkwata mĩthenyanĩ ĩno ya mũminũkĩlyo, Yeova nũtũnengete ũseũvyo wake wa kwendeesya mũno. Na katĩ wa syĩndũ ingĩ mbingĩ ila ũtũnengete nĩ vamwe na Ndeto yake Mbivilia yĩ nima, ĩla ĩendeee kũalyũlwa nesa ithyomonĩ mbingĩ. Nũtũmĩaa ngombo ndĩkĩĩku na mbũĩ kũtũnenga lĩu mwingĩ wa kĩ-veva ũla tũkwataa ĩvindanĩ yĩla yaĩlĩte. Na nũtũnengete ngwatanĩo ya mwanya ya ana-a-asa na eĩtu-a-asa ala matũtwʼĩĩkaa maũmbanonĩ ma kĩkundi na maũmbanonĩ manene. We nũtethekaa vyũ nĩ syĩndũ isu Yeova ũtũnengete? Onthe ala mekaa ũu “makainaa ũndũ wa ũtanu wa ngoo.” Ĩndĩ, ala maleaa kũmwĩthukĩĩsya Ngai ‘makaĩaa ũndũ wa kĩmako kya ngoo, na makakaya ũndũ wa woo wa veva.ʼ—Isa. 65:13, 14.

MATUKŨ 10-16, MWEI WA 3

MAŨNDŨ MA VATA KUMA NDETONĨ YA NGAI NTHIMO 4

“Sũvĩa Ngoo Yaku” NWT

w12 5/1 32 ¶2

“Sũvĩa Ngoo Yaku!” NWT

Nĩkĩ twaĩlĩte kũsũvĩa ngoo yitũ ya ngelekanyʼo? Ngai amũveveeie Mũsumbĩ Solomoni kũandĩka ũũ: “Ĩkalya [kana, sũvĩa] ngoo yaku na ũthangaau wʼonthe; nũndũ maũndũ ma thayũ maumaa kwayo.” (Nthimo 4:23) Nĩ kana tũtanĩe thayũ yu na tũyĩthĩwa na wĩkwatyo mũseo wa ĩvinda yũkĩte, no nginya tũsũvĩe ngoo yitũ ya ngelekanyʼo. Nĩkĩ? Nũndũ Ngai asiasya kĩla kĩ ngoonĩ sitũ. (1 Samueli 16:7) Kĩla kyonanasya ũndũ Ngai wĩwʼaa ĩũlũ witũ nĩ ũndũ tũilyĩ nthĩnĩ, kana “mũndũ wa nthĩnĩ ũla ũtonekaa.”—1 Vetelo 3:4.

MATUKŨ 17-23, MWEI WA 3

MAŨNDŨ MA VATA KUMA NDETONĨ YA NGAI NTHIMO 5

Ĩvathane Vyũ na Mwĩkalĩle Mũthũku wa Ũlaalai

w00 7/15 29 ¶2

No Wĩkale wĩ Mũĩkĩĩku Nthĩnĩ wa Nthĩ Ĩno Yusĩe Mwĩkalĩle Mũthũku

Nthĩnĩ wa Nthimo ĩno, mũndũ wĩ mwĩkalĩle mũthũku aelekanĩtwʼe na “mũndũ mũka mũeni” ũla nĩ ĩlwaya. Ndeto ila ũtũmĩaa kũsesenga mũndũ syĩ mũyo ta ũkĩ wa nzũkĩ na nĩ ndendeu kwĩ mauta ma mũthata. Syo nzĩa ila andũ matũmĩaa kũsesenga mũndũ alike mwĩkalĩlenĩ mũthũku wa ũlaalai iyambĩĩaa oou? Kwa ngelekanyʼo, kwasũanĩa ũndũ wakwatie mũndũ mũka kalanĩ wĩ na myaka 27 wĩtawa Amy. Aeleetye: “Ve mũndũũme ũmwe twĩ wĩanĩ ũngeteeaa mũno na kũngathĩĩa kĩla ĩvinda. Wĩwʼaa mũyo yĩla mũndũ waũkathĩĩa. Ĩndĩ nĩnonaa ũtheinĩ kana kĩla we wendaa no kũkoma nakwa. Ndyĩsa kwĩtĩkĩla kũkengwa nĩ maũĩ make.” No twĩwʼe ndeto sya ũla ũkũtũsesenga syĩ sya kwendeesya mũno tũtamanyĩte kĩeleelo kyake. Kwoou, nĩtwaĩle kũtũmĩa ũtonyi witũ wa kũsũanĩa.

w00 7/15 29 ¶3

No Wĩkale wĩ Mũĩkĩĩku Nthĩnĩ wa Nthĩ Ĩno Yusĩe Mwĩkalĩle Mũthũku

Mosyao ala mũndũ ũkwataa eelikya mwĩkalĩlenĩ mũthũku wa ũlaalai methĩawa me ũũ ta mũtĩ wĩ ũũ, na me moĩ ta ũvyũ mũĩ ngalĩ syelĩ, na ũu nĩ kwasya no maũmĩsye na maituma mũndũ akwʼa. Wasya wa ngoo ũũkũthĩnyʼa, kũkua ĩvu ũtavangĩĩe, kana kũkwatwa nĩ mowau mathũku nĩ amwe katĩ wa maũndũ mathũku ala matonya kũtũkwata. O na ĩngĩ, kwasũanĩa ũndũ mũndũ wĩ mũtwaanonĩ ũtonya kũũmĩa ngoonĩ mũno wĩana yĩla mũndũ ũla ũtwaanĩte nake weeka ũndũ ta ũsu. Kwĩthĩwa ũte mũĩkĩĩku o na ethĩwa no ĩvinda yĩmwe, no kũtume ũla ũtwaanĩte nake aũmĩa ngoonĩ kwa ĩvinda yĩasa. Kwa wʼo, mwĩkalĩle mũthũku wa ũlaalai nĩwũmĩasya.

w00 7/15 29 ¶6

No Wĩkale wĩ Mũĩkĩĩku Nthĩnĩ wa Nthĩ Ĩno Yusĩe Mwĩkalĩle Mũthũku

Twaĩle kwĩkala vaasa ũndũ vatonyeka na andũ me na mwĩkalĩle mũthũku wa ũlaalai. Nĩkĩ twaĩlĩte kwĩthĩwa twĩ metho nĩ kana twĩvathane na maũndũ ala mekaa ta kwĩthukĩĩsya mbathi ite nzeo, kwĩloela mathaũ mekwonanyʼa maũndũ mavuku, kana kwĩlikya mũtuonĩ wa kwĩloela mavisa ma ũlaalai? (Nthimo 6:27; 1 Akolintho 15:33; Aeveso 5:3-5) O na ĩngĩ, ti ũndũ wa ũĩ kũthaũkĩa andũ ũtatwaanĩte namo kana kwĩthĩwa ũte na wĩnyivyo kwa kwĩkĩa ngũa na kwĩyanakavya kwa nzĩa ĩtaĩle!—1 Timotheo 4:8; 1 Vetelo 3:3, 4.

Ũthwii wa Kĩ-veva

w00 7/15 29 ¶8

No Wĩkale wĩ Mũĩkĩĩku Nthĩnĩ wa Nthĩ Ĩno Yusĩe Mwĩkalĩle Mũthũku

Kwoou Solomoni nĩwaneeneie mũno mĩisyo ĩla ĩtonya kũkwata mũndũ eelikya mwĩkalĩlenĩ mũthũku wa ũlaalai. Yĩla mũndũ wĩ mũtwaanonĩ weelikya mwĩkalĩlenĩ mũthũku wa ũlaalai, ethĩawa ayĩyanangĩa ndaĩa yake mwene. Yo ti ũndũ wa kwĩkĩĩthya nthoni kwĩka ũlaalai nĩ kana wĩanĩsye wendi waku kana wa mũndũ ũngĩ? Wʼo ũndũ ũsu ndwonanasya kana tũyĩnengete ndaĩa kwa kũmanyana kĩ-mwĩĩ na mũndũ tũtatwaanĩte nake?

MATUKŨ 24-30, MWEI WA 3

MAŨNDŨ MA VATA KUMA NDETONĨ YA NGAI NTHIMO 6

Tũtonya Kwĩmanyĩsya Kyaũ Kuma Vala Ve Nditikũ?

it-1 115 ¶1-2

Nditikũ

‘Ũĩ wa Nditikũ.’ ‘Ũĩ’ ũla wĩthĩawa na nditikũ iyĩũkwataa yĩla iendeee kwĩana, ĩndĩ Mũmbi wasyo asyũmbie syĩ na wʼo. Mbivilia yĩeleetye kana nditikũ “syĩyiĩaa lĩu wasyo ĩvinda ya syũa, na kwĩyũmbanĩsya lĩu [wasyo] ĩvinda ya ngetha.” (Nth 6:8) Mũthemba ũmwe katĩ ya mĩthemba yĩ kĩvathũkanyʼo ya nditikũ ila ikwatĩkanaa mũno Valesitina nĩ nditikũ yĩtawa harvester, kana agricultural ant (Messor semirufus). Mũthemba ũsu wa nditikũ nĩwiaa lĩu mwingĩ mũno ĩvinda ya muutĩa na ũitũmĩa lĩu ũsu mavindanĩ me kĩvathũkanyʼo, ta kwa ngelekanyʼo ĩvindanĩ ya mbevo yĩla wĩthĩaa nĩ vinya kũkwata lĩu. Mavinda maingĩ mũthemba ũũ wa nditikũ ũkwatĩkanaa kũla lĩu ũvũĩawa, nũndũ kũu nĩsyĩthĩawa itonya kũkwata lĩu mwingĩ wĩtĩkangĩte. Yĩla kwaua na lĩu wayo wakwatwa nĩ ndaka, nditikũ ĩsu yĩtawa harvester nĩyeteelaa kũkanyaa na ĩyumaalya lĩu wayo suanĩ ũnyiae. O na ĩngĩ, nĩyĩthĩawa yĩsĩkĩe nũndũ wa ũĩ wayo wa kũũma na kũtila kĩlungu kya mbeũ kĩla kĩmeaa nĩ kana wĩthĩe yaia lĩu wayo ndũtonya kũmea. Kĩkundi kĩu kya nditikũ kĩtawa harvester nĩkĩthĩawa kĩsĩkĩe nesa nũndũ wa nzĩa yakyo ĩla kĩseũvasya, na masyũlyo ma mbeũ ala kĩtiaa nza kĩtanamba kũlika vala kĩkalaa.

Nguma Nzeo Tũtonya Kũatĩĩa. Kwoou, ũkunĩkĩli mũnini ĩũlũ wa nditikũ nũtumĩte ndeto ii syĩthĩwa syĩ sya wʼo vyũ. Syaĩtye: “Enda vala ve nditikũ, we ũla mũtulu; syaĩĩsya mĩkĩle yasyo, na ũkyũĩva.” (Nth 6:6) Nditikũ iyaaũmbwa syĩyũmbanĩasye ĩvinda yũkĩte tũ, ĩndĩ o na nĩsyĩthĩawa na wũmĩĩsyo na kĩthito, na mavinda maingĩ ikuaa ũito mwingĩ kwĩ wasyo kũndũ kwĩlĩ kana mbeange. O na syĩkaa kyonthe kĩla itonya nĩ kana imine wĩa wasyo na iisyokaa na ĩtina o na kau no ivalũke, ikatiũũka, kana ikavingilita kũndũ kũla kũtiũũku. Nũndũ ithũkũmaa syĩ ngwatanĩo, niĩkĩĩthasya kana kũla syĩkalaa nĩ kũtheu vyũ na nĩsyonanasya kana nithĩnĩkĩaa ila ingĩ, na mavinda amwe nitetheeasya ila syaũmĩa kana syanoa kwa kũikua na kũitũnga kũla syĩkalaa.

w00 9/15 26 ¶3-4

Sũvĩa Ĩsyĩtwa Yaku

Yo tũyaĩlĩte kwĩthĩwa na kĩthito o ta nditikũ? Kũthũkũma na kĩthito na kũtata ũndũ tũtonya twaĩlangye wĩa witũ nĩ kwa vata twĩthĩwe nĩtũsyaĩĩwʼe kana tũisyaĩĩwʼe. Nĩtwaĩle kwĩka kyonthe kĩla tũtonya twĩthĩwe twĩ sukulu, wĩanĩ, kana twĩĩka maũndũ ma kĩ-veva. O tondũ nditikũ itethekaa nũndũ wa kĩthito kyasyo, nowʼo Ngai wendaa ‘tũtanĩe ũseo wĩanĩ witũ wʼonthe.’ (Mũtavanʼya 3:13, 22; 5:18) Yĩla twathũkũma na kĩthito nĩtwĩthĩawa na wasya mũtheu wa ngoo na tũyĩthĩwa twĩ eanĩe.—Mũtavanʼya 5:12.

Solomoni nĩwatatie kũamũkya mũndũ mũtulu atũmĩĩte makũlyo elĩ matendaa kũsũngĩwa. Akũlilye atĩĩ: “Ũkakoma kũvika ĩndĩĩ, we mũtulu? Ũkookĩla kuma toonĩ waku ĩndĩĩ?” Aikindĩlĩĩla ndeto isu, mũsumbĩ ongelile kwasya atĩĩ: “No kũkomanga vanini, kwombosya vanini, o vanini kũkwatanʼya syaa na kũkoma: O ta ũu ũkya waku ũkooka ta mũvutani, na kwaĩwa kwaku ta mũndũ wĩkĩĩte mĩio ya kaũ.” (Nthimo 6:9-11) Yĩla mũndũ mũtulu wakoma na aema kũthũkũma, ũkya ũkaa na mĩtũkĩ ta kĩngʼei, na kwaĩwa ta mũndũ wĩkĩĩte mĩio ya kaũ. Mũũnda wa mũndũ mũtulu usũaa na mĩtũkĩ mĩwʼa na syĩnyeelya. (Nthimo 24:30, 31) Viasala wake ũthelaa na mĩtũkĩ mũno. We wĩona ũla ũandĩkanĩte ta ũtonya kũmĩĩsya mũndũ mũtulu kwa ĩvinda yĩana ata? Na mũmanyĩwʼa wa sukulu ũla mũtulu mũno no ekwatye kana nũkũvĩta mũtiani?

Ũthwii wa Kĩ-veva

w00 9/15 27 ¶3

Sũvĩa Ĩsyĩtwa Yaku

Maũndũ mũonza ala mawetetwe mĩsoanĩ ĩsu nĩ maito mũno na makonetye vakuvĩ mĩthemba yonthe ya ũthũku. “Metho me mĩtũlyo” na “ngoo ĩla ĩsũanĩaa maũndũ mathũku” nĩ naĩ ila mũndũ wĩkaa ngoonĩ na kĩlĩkonĩ. “Ũĩmĩ ũla ũneenaa ũvũngũ” na “ngũsĩ ya ũvũngũ ĩla ĩneenaa movũngũ” nĩ naĩ ila mũndũ wĩkaa kwĩsĩla ndeto syake. Namo “moko ala metĩkasya nthakame ĩte ĩvĩtyo” na “maũũ ala mekalaataa kwĩka ũthũku” nĩ meko mathũku ala mũndũ wĩkaa. Na mũno mũno, Yeova nũmenete mũndũ ũla ũetae kĩthokoo katĩ wa andũ mekwĩkalanyʼa vamwe me na mũuo. Kwona maũndũ asu mongeletwe kuma maũndũ thanthatũ makavika maũndũ mũonza kwĩonanyʼa kana ũsu ti wʼo ũtalo wʼoka wa maũndũ mathũku ala andũ mekaa, nũndũ mavinda onthe andũ maendeeaa kwĩka maũndũ mathũku.

MATUKŨ 31, MWEI WA 3–MATUKŨ 6, MWEI WA 4

MAŨNDŨ MA VATA KUMA NDETONĨ YA NGAI NTHIMO 7

Ĩvathane na Maũndũ Matonya Kũũlikya Matatwanĩ

w00 11/15 29 ¶5

‘Kwata Mĩao Yakwa na [Ũiendeea] Kwĩthĩwa Thayũ’

Nĩvatonyeka ndĩlĩsya ĩla Solomoni wasyaĩlasya ĩkethĩwa yaseũvĩtwʼe na kyũma kana mĩtĩ ĩkelanganĩtwʼe. Sua yathũa, kĩvindu kyeethĩawa kĩla vandũ. Nĩwoonie mwanake esĩlĩte vandũ ve mũisyo. Ndaĩ na kĩlĩko kana ũmanyi. Nĩvatonyeka akethĩwa eesĩ ũndũ ũtũi ũsu wailyĩ na kĩla kyaĩ kĩtonya kũmũkwata e vau. Mwanake ũsu nĩwavĩtĩile “kĩkotonĩ” kĩla kyaĩ vakuvĩ na nyũmba ya mũndũ mũka. Mũndũ mũka ũsu aĩ ũũ na endaa kyaũ?

w00 11/15 30 ¶3-5

‘Kwata Mĩao Yakwa na [Ũiendeea] Kwĩthĩwa Thayũ’

Ilomo sya mũndũ mũka ũsu syaĩ ndendeu. Aneenaa ndeto syake ate na wia na e na ũkũmbaũ. Ndeto syonthe ila wawetaa sya kũsesenga mwanake ũsu nĩwaisũanĩĩte nesa. Yĩla mũndũ mũka ũsu waisye kana nĩwaumĩtye nthembo sya mũuo na akeanĩsya wĩvĩto wake, oonanasya kana aĩ mũlũngalu na ndaendeee naĩ kĩ-veva. Imwe katĩ wa nthembo sya mũuo ila syaumawʼa ĩkalũnĩ yĩla yaĩ Yelusaleme syaĩ nyama, mũtu, mauta, na mbinyu. (Alivai 19:5, 6; 22:21; Motalo 15:8-10) Nũndũ ũla ũkumya nthembo sya mũuo aĩ atonya kũkua imwe kwondũ wake na mũsyĩ wake, nĩkyo kĩtumi mũndũ mũka ũsu waisye kana nyũmba kwake vaĩ na syĩndũ mbingĩ sya kũya na sya kũnywʼa. Kĩeleelo kyake kyaĩ ũtheinĩ: Endaa mwanake ũsu aĩkĩĩe kana nũkũtanĩa kwĩthĩwa vau. Na ethĩwa ũu nĩwʼo, kĩu kyaĩ kĩmũkiite ngoo na aimanya kana mũndũ mũka ũsu nũmwendete. Kau nĩ kaũndũ kaseo ta kĩ, ĩndĩ o kwa ũla ũtonya kũĩkĩĩa ndeto isu. Mũsomi ũmwe wa maũndũ ma Mbivilia aĩtye: “Nĩwʼo kana mũndũ mũka ũsu amanthaa mũndũ, ĩndĩ kwa wʼo aumaalĩte amanthe mwanake o ũsu? O ta mwanake ũsu, no ndia yaĩ ĩtonya kũmũĩkĩĩa.”

Ĩtina wa mũndũ mũka ũsu kwĩyanakavya nĩ kana endeesye kwĩsĩla mwĩkĩĩle wake, ndeto syake syĩ mũyo, kũmũmumunya, na kũmũkumbatĩa, nĩwamũsesengie mwanake ũsu atũmĩĩte mauta me mũuke mũseo. Aisye: “Nĩnalanĩtye ũkomo wakwa mũto mũseo mũno, na ngũa syĩ nzoa sya ndii sya Misili. Nĩnyungĩthĩtye ũkomo wakwa na manemane, na uuti, na mũtalasini.” (Nthimo 7:16, 17) Nĩwalanĩtye kĩtanda kyake nesa atũmĩĩte ngũa syĩ nzoa sya Misili na akainyungĩthya na mũuke wĩ kĩvathũkanyʼo wa manemane, uuti, na mũtalasini.

Aendeeie kwasya, “Ũka, twose wĩanĩu witũ wa wendo kũvika kĩoko; twĩtanʼye ene na mawendo.” Mũndũ mũka ũsu amũthokisye e na mũvango ũngĩ eka o kũĩsanĩa lĩu wa wĩoo vamwe nake. Amwathie kana makatanĩa kũmanyana kĩ-mwĩĩ. Mwanake ũsu nĩwendeeiwʼe mũno nĩ ũndũ ũsu, na nĩwendaa kũwĩka! Nĩ kana amũsesenge mũnango, aendeeie kwasya: “Nũndũ ũ mũndũ mũũme nde mũsyĩ; nĩ mũendu kyalo kĩasa: Nũendete na mũvuko wa mbesa; akenũka mwei walũma nthĩ.” (Nthimo 7:18-20) Amũĩkĩĩthisye kana maĩ methĩwe me asũvĩĩku nũndũ mũũme wake nĩwaendete kyalo kĩasa mũno kya viasala na ndaĩ asyoke mĩtũkĩ. Mwa mũndũ mũka ũsu aĩ na kĩnengo kya kũkenga mwanake ũsu! Nĩkyo kĩtumi Mbivilia yaĩtye: “Na nũndũ wa ndeto syake nyingĩ sya kwendeesya nũmwĩtĩkĩlĩthasya; kwondũ wa kwendeesya na ndeto sya ũkathĩĩo sya ilomo syake nũmũkusasya.” (Nthimo 7:21) Vendekaa mũndũ wĩ na mũĩkĩĩo ta wa Yosevu nĩ kana aleane na ndeto isu sya kũsesenga syĩ mũyo. (Mwambĩlĩlyo 39:9, 12) We mwanake ũsu aĩ na mũĩkĩĩo ta wa Yosevu?

w00 11/15 31 ¶1

‘Kwata Mĩao Yakwa na [Ũiendeea] Kwĩthĩwa Thayũ’

Mwanake ũsu nĩwaemiwe nĩ kwĩsiĩĩa, na kwoou eetĩkĩla kũthokwʼa. Atekwenda kũmanya kĩla kyesaa kũmũkwata, nĩwamũatĩĩie mũndũ mũka ũsu “o tondũ ngʼombe ĩendaa kĩthĩnzĩonĩ.” O tondũ mũndũ wovetwe na mbĩngũ maaũnĩ wĩthĩawa atatonya kwĩtiithũkanyʼa ndakasilĩlwe, nowʼo mwanake ũsu wasesengiwe alika naĩnĩ. Ndaaona mũisyo wa kwĩka ũu, nginya yĩla ‘mũsyĩ watonyie ĩtema yake’ na ũu nĩ kwasya kana aĩ akwatwe nĩ kĩtau kyaĩ kĩtonya kũtuma akwʼa. Aĩ atonya kũkwatwa nĩ mowau ma kũkwatanwʼa ala maumanaa na kũmanyana kĩ-mwĩĩ na matonya kũaa. O na ĩngĩ, kĩtau kĩu kyaĩ kĩtonya kũtuma aendeea naĩ kĩ-veva, na ‘nĩkyakonetye thayũ wake.’ Ũndũ ũsu nĩwatumie maũndũ make mataendeea nesa, na amũvĩtĩsya Ngai mũno. Kwoou, o tondũ nyũnyi ĩsembaa ĩendete kĩteinĩ, nowʼo o nake weekie!

Ũthwii wa Kĩ-veva

w00 11/15 29 ¶1

‘Kwata Mĩao Yakwa na [Ũiendeea] Kwĩthĩwa Thayũ’

Solomoni aendeeie kwasya “Myoveee [mĩao yakwa] syaanĩ syaku; mĩandĩke masengeanĩ ma ngoo yaku.” (Nthimo 7:3) O tondũ twonaa syaa syĩ sya vata mũno na tũitũmĩaa kwĩka maũndũ, nowʼo maũndũ ala tweemanyĩisye twĩ anini kuma Maandĩkonĩ matũlilikanasya na makatũtongoesya maũndũnĩ onthe ala tũkwĩka. Nĩtwaĩlĩte kũmaandĩka ĩsengeanĩ ya ngoo yitũ kwa kũmatũmĩaa maũndũnĩ onthe ala tũkwĩka.

MATUKŨ 7-13, MWEI WA 4

MAŨNDŨ MA VATA KUMA NDETONĨ YA NGAI NTHIMO 8

Mwĩthukĩĩsye Yesũ

cf 131 ¶7

“Nĩnĩmwendete Asa”

7 Mũsoanĩ wa 22, ũla wĩtĩtwe ũĩ aĩtye: “Yeova aĩ nakwa mwambĩlĩlyonĩ wa nzĩa yake, mbee wa mawĩa make ma tene.” Kĩla kĩũneenewa mũsoanĩ ũũ ti nguma ya ũĩ tũ, nũndũ nguma ĩsu ndĩ ‘mwambĩlĩlyo.’ Twĩasya ũu nũndũ Yeova nde mwambĩlĩlyo na mavinda onthe ethĩawa e mũĩ. (Savuli 90:2) Ĩndĩ, Mwana wa Ngai nĩwe “wa mbee katĩ wa syĩndũ syonthe ila syoombiwe.” Nĩwoombiwe, na nĩwe wa mbee vyũ mawĩanĩ ma Yeova ma wũmbi. (Akolosai 1:15) O tondũ ĩandĩko ya Nthimo yĩeleetye, aĩ kwʼo o na nthĩ na matu itanombwa. Na nũndũ nĩwe Ĩla Ndeto, Mũneeni wa Ngai, nĩwe woonanisye nesa vyũ ũĩ wa Yeova.—Yoana 1:1.

cf 131-132 ¶8-9

“Nĩnĩmwendete Asa”

8 Mwana ũsu eekaa ata ĩvinda yĩu yonthe atanamba kũka vaa ĩũlũ wa nthĩ? Mũsoa wa 30 ũtũtavĩtye kana aĩ vakuvĩ na Ngai e “mũthũkũmi mũnene.” Kĩu kĩonanyʼa ata? Ĩandĩko ya Akolosai 1:16 yĩeleetye ũũ: “Kwĩsĩla kwake syĩndũ ila ingĩ syonthe nĩsyoombiwe ĩtunĩ na kũũ nthĩ . . . Na syĩndũ ila ingĩ syonthe syoombiwe kwĩsĩla kwake na kwondũ wake.” Kwoou Yeova, ũla nĩwe Mũmbi, nĩwamũtũmĩie Mwana wake, e ta Mũthũkũmi Mũnene, kũmba syĩndũ ila ingĩ syonthe, ila nĩ vamwe na syũmbe sya veva ila syĩ ĩtunĩ, matu na nthĩ, syĩndũ sya kwendeesya na syĩ kĩvathũkanyʼo ila syĩ ĩũlũ wa nthĩ ta mĩtĩ na nyamũ, na syũmbe sya mwanya vyũ ila syoombiwe, nasyo nĩ andũ. No tũelekanyʼe ngwatanĩo ĩsu yĩthĩawa vo katĩ wa Asa na Mwana na ĩla yĩthĩawa vo katĩ wa mũndũ ũla ũsolaa mevu sya nyũmba, na ũla ũkwaka aatĩĩe mevu ĩsu. Yĩla twoona wũmbi wa kwendeesya, nĩtũmũtaĩaa Mũsoli ũla Mũnene. (Savuli 19:1) Ĩndĩ, tũyaĩle kũlwa nĩ ngwatanĩo ya ĩvinda yĩasa na ya mwanya ĩla yĩthĩawa vo katĩ wa Mũmbi na ‘Mũthũkũmi wake Mũnene.’

9 Yĩla andũ elĩ me na naĩ mathũkũma vamwe, mavinda amwe nĩmatonya kũlea kwĩwʼana. Ĩndĩ ũu tiwʼo vailye katĩ wa Yeova na Mwana wake! Nĩwathũkũmie vandũ va myaka mingĩ mũno na Ĩthe wake na aĩtye: ‘Nĩnatanĩaa mavinda onthe mbee wake.’ (Nthimo 8:30) Kwa wʼo, nĩwatanĩaa kũtindanyʼa na Ĩthe wake, na eewʼaa e mwĩanĩe me vamwe. Mwana ũsu aendeeie kwĩana aĩlye ta Ĩthe wake, na eemanyĩsya kũatĩĩaa nguma sya Ngai. Na nĩkyo kĩtumi, ngwatanĩo yake na Ĩthe wake yeethĩiwe yĩ ndũmu mũno! Kwoou no twasye kana ngwatanĩo ĩsu nĩyo ya tene vyũ na ndũmu ĩla yaaĩthĩwa ĩtunĩ na kũũ nthĩ.

w09 4/15 31 ¶14

Kũmũnenga Yesũ Ndaĩa, Ũla Nĩwe Ndaviti Ũla Mũnene, na Solomoni Ũla Mũnene

14 No mũndũ ũmwe ĩũlũ wa nthĩ waĩ na ũĩ mwingĩ kwĩ wa Solomoni. Mũndũ ũsu aĩ Yesũ Klĩsto, ũla weeyĩeleisye ta “mũndũ mũnene kwĩ Solomoni.” (Mt. 12:42) Yesũ aneenaa “ndeto sya thayũ wa tene na tene.” (Yoa. 6:68) Kwa ngelekanyʼo, Ũtavanyʼanĩ wa Kĩĩmanĩ nũneeneete kwa ũliku myolooto ĩmwe yawetiwe nĩ Solomoni ĩvukunĩ ya Nthimo. Solomoni nĩwawetie maũndũ me kĩvathũkanyʼo ala matumaa mũthũkũmi wa Yeova ethĩwa na ũtanu. (Nth. 3:13; 8:32, 33; 14:21; 16:20) Yesũ nĩwakindĩlĩĩile kana ũtanu wa wʼo wumanaa na maũndũ ala makonanĩtye na kũmũthaitha Yeova na kwĩanĩwʼa kwa mawatho ma Ngai. Aisye: “Nĩ atanu ala mesĩ me na nzaa ya kĩ-veva, nũndũ Ũsumbĩ wa ĩtu nĩ woo.” (Mt. 5:3) Ala maatĩĩaa myolooto ĩla yĩ nthĩnĩ wa momanyĩsyo ma Yesũ nĩmamũthengeeaa Yeova, ũla nĩwe, “mbuluti ya thayũ.” (Sav. 36:9; Nth. 22:11; Mt. 5:8) Klĩsto onanasya “ũĩ wa Ngai.” (1 Ako. 1:24, 30) E Mũsumbĩ wa Kĩ-masia, Yesũ Klĩsto ethĩawa na “veva wa ũĩ.”—Isa. 11:2.

Ũthwii wa Kĩ-veva

g 5/14 16

We Nũkwĩwʼa ‘Ũĩ Ũikaya’?

▪ Ĩvuku yĩtawa The World Book Encyclopedia yaĩtye kana Mbivilia, “nĩyo ĩvuku yĩla yĩnyaĩĩkĩtwʼe vyũ ĩũlũ wa nthĩ. Nĩyĩalyũlĩtwe mavinda maingĩ, na kwa ithyomo mbingĩ kwĩ ĩvuku yĩngĩ o na yĩva.” Yu Mbivilia yĩ nima kana ĩte nima no ĩkwatĩkane kwa ithyomo vakuvĩ 2,600, kwoou mbee wa kĩlungu kya 90 ĩũlũ wa 100 kya andũ ĩũlũ wa nthĩ yonthe no makwate Mbivilia.

▪ O na ĩngĩ, ũĩ ‘nũkayaaʼ kwa nzĩa ĩngĩ. Nthĩnĩ wa Mathayo 24:14 tũsomaa atĩĩ: “Ũvoo ũũ mũseo wa Ũsumbĩ ũkatavanwʼa nthĩ yonthe wĩthĩwe ũkũsĩ kwa mbaĩ syonthe, na ĩndĩ mũthya [wa nthĩ ĩno] ũivika.”

MATUKŨ 14-20, MWEI WA 4

MAŨNDŨ MA VATA KUMA NDETONĨ YA NGAI NTHIMO 9

Ĩthĩwa wĩ Mũĩ, Ĩndĩ Ti Mũkaakaanyʼa

w01 5/15 30 ¶1-2

‘Ũĩ Ũkatuma Mĩthenya Yitũ Yingĩvwʼa’

Mũndũ mũĩ nĩwĩtĩkĩlaa ũkanyʼo, ĩndĩ mũkaakaanyʼa ndawĩtĩkĩlaa. Solomoni aisye: “Kanʼya mũndũ mũĩ, nake akakwenda. Manyĩsya mũndũ mũĩ, nake akeethĩwa mũĩ mbee.” (Nthimo 9:8b, 9a) Mũndũ mũĩ nĩwĩthĩawa esĩ kana “tũitanaa yĩla tũũkanwʼa, vandũ va ũu nĩtwĩwʼaa woo; ĩndĩ ĩtina ũkanyʼo ũetae mũuo na ũlũngalu kwa ala mamanyĩĩtwʼe nĩwʼo.” (Aevelania 12:11) O na kũtwʼĩka ũkanyʼo wĩ woo, kũmanya kana yĩla twawĩtĩkĩla nĩtwĩthĩawa twĩ oĩ, no kũtume tũteyĩĩvanĩsya kana tũketetea.

Mũsumbĩ ũla waĩ mũĩ aendeeie kwasya: “Manyĩsya mũndũ mũlũngalu, nake akongeleka kwosa momanyĩsyo.” (Nthimo 9:9b) O na twĩthĩwe tũĩvĩte ata kana tũkũĩte ata, ithyonthe nĩtũendeeaa kwĩmanyĩsya. Nĩ ũndũ wa kwendeesya ta kĩ kwona o na ala akũũ vyũ mayĩtĩkĩla kwĩmanyĩsya ũwʼo na mayĩyumya mamũthũkũme Yeova! Ekai o naitũ tũendeee kwĩthĩwa na wendi wa kwĩmanyĩsya na tũiendeea kũmanyĩsya ilĩko sitũ.

w01 5/15 30 ¶5

‘Ũĩ Ũkatuma Mĩthenya Yitũ Yingĩvwʼa’

Nĩ kĩanda kya kĩla ũmwe witũ kwĩkĩa kĩthito akwate ũĩ. Solomoni aikindĩlĩĩla ũndũ ũsu aisye: “Ethĩwa wĩ mũĩ wĩ mũĩ kwondũ waku mwene; na ethĩwa nũkaakaanasya, we wĩ weka ũkookua.” (Nthimo 9:12) Mũndũ mũĩ nũtethekaa nũndũ wa ũĩ wake, na mũkaakaanyʼa nĩwĩtũlaa mũtĩ nũndũ wa mathĩna ala wĩyĩeteae. Kwa wʼo, tũkethaa kĩla twavanda. Ekai ĩndĩ, kĩla ũmwe ‘atee kũtũ ose ũĩ.ʼ—Nthimo 2:2.

Ũthwii wa Kĩ-veva

w06 9/15 17 ¶5

Maũndũ Manene Kuma Ĩvukunĩ ya Nthimo

9:17—‘Manzĩ ala moyĩtweʼ nĩ meva, na nĩkĩ me “mũyo”? Nũndũ Mbivilia yĩelekanĩtye kũtanĩa kũmanyana kĩ-mwĩĩ kwa andũ matwaanĩte na kũnywʼa manzĩ kuma kĩthimanĩ, yĩla ĩkũweta manzĩ moyĩtwe yonanasya kwĩthĩwa na mwĩkalĩle mũthũku wa ũlaalai wĩvithĩte. (Nthimo 5:15-17) Kwĩka ũndũ ũsu wĩvithĩte na ũiema kũmanyĩka nĩkwʼo kũtumaa manzĩ asu methĩwa me mũyo.

MATUKŨ 21-27, MWEI WA 4

MAŨNDŨ MA VATA KUMA NDETONĨ YA NGAI NTHIMO 10

Tũtonya Ata Kwĩthĩwa na Ũtanu wa Wʼo Thayũnĩ?

w01 7/15 24 ¶8; 25 ¶1-2

‘Moathimo me Ĩũlũ wa Ũla Mũlũngalu’

Mũndũ ũla mũlũngalu nũathimawa kwa nzĩa ĩngĩ. Mbivilia yaĩtye atĩĩ: “Ũla ũtethasya wĩa na kwʼoko kũleelu nũtwʼĩkaa ngya; ĩndĩ kwʼoko kwa ũla mũthingu nĩkũthuasya. Ũla ũmbanasya ĩvinda ya syũa nĩ mwana mũĩ; ĩndĩ ũla ũkomaa ĩvinda ya ngetha nĩ mwana ũla ũsonokasya.”—Nthimo 10:4, 5.

Mũno mũno ndeto isu sya mũsumbĩ no itetheesye athũkũmi ĩvindanĩ ya ngetha. Ĩvinda ya ngetha ti ĩvinda ya kũkoma. Nĩ ĩvinda ya kũthũkũma na kĩthito masaa maingĩ. Kwa wʼo, yĩu nĩ ĩvinda ya kũtethya wĩa na mĩtũkĩ.

Yesũ eeie amanyĩwʼa make ũũ aineenea ngetha ya andũ ĩndĩ ti ya lĩu: “Ngetha nĩ nene, ĩndĩ atethya ma wĩa nĩ anini. Kwoou, voyai Mũnene wa ngetha [Yeova Ngai] atũme atethya ma wĩa ngethanĩ yake.” (Mathayo 9:35-38) Mwakanĩ wa 2000, andũ mbee wa milioni 14 nĩmoombanie ũmbano wa kũlilikana kĩkwʼũ kya Yesũ. Andũ asu maĩ mbee wa kũndũ kwĩlĩ kwa Ngũsĩ sya Yeova ila syaĩ kwʼo. Nũũ ĩndĩ ũtonya kũlea kana “mĩũnda nĩ myeũ yeteele kũkethwa”? (Yoana 4:35) Athaithi ma wʼo nĩmakũlasya Mũnene wa ngetha amongeleele athũkũmi angĩ, maendeee kũthũkũma na kĩthito wĩanĩ wa kũtwʼĩkĩthya andũ amanyĩwʼa kwosana na mboya syoo. (Mathayo 28:19, 20) Yeova nũathimĩte kĩthito kyoo mũno! Mwakanĩ wa ũthũkũmi wa 2000, andũ mbee wa 280,000 nĩmavatisiwe. Asu o namo nĩmekĩaa kĩthito matwʼĩke alimũ ma Ndeto ya Ngai. Ekai tũendeee kũkwata ũtanu na kwĩthĩwa twĩ eanĩe ĩvindanĩ yĩĩ ya ngetha, kwa kwĩkĩa kĩthito vyũ wĩanĩ wa kũtwʼĩkĩthya andũ amanyĩwʼa.

w01 9/15 24 ¶3-4

Endaa ‘Nzĩanĩ ya Ũlũngaluʼ

Solomoni nũwetete vata wa kwĩthĩwa twĩ alũngalu. Aisye: “Syĩndũ sya mũndũ mũthwii nĩ ndũa yake yĩ vinya: Wanangĩko wa ngya nĩ ũkya woo. Wĩa wa ũla mũlũngalu wangĩe thayũnĩ; wongeleku wa ũla mũthũku welekele naĩnĩ.”—Nthimo 10:15, 16.

Ũthwii no ũsũvĩe mũndũ ndakakwatwe nĩ maũndũ amwe mathũku, o tondũ ndũa yĩ vinya ĩtonya kũsũvĩa ala mekalaa nthĩnĩ wayo. Na ũkya no ũtume mũndũ aũmĩa mũno yĩla wakwatwa nĩ ũndũ ũtataĩĩwe. (Mũtavanʼya 7:12) Ĩndĩ, mũsumbĩ mũĩ no ethĩwe awetaa mũisyo ũla ũkanasya na ũthwii na ũkya. Mũndũ mũthwii no ekwatye ũthwii wake vyũ aisũanĩa kana syĩndũ sya thooa mũnene ila wĩ nasyo nĩ “ta wako mũtũlu.” (Nthimo 18:11) Na ũla ngya no ambĩĩe kwona ũkya wake tawʼo ũtumaa ethĩwa ate na wĩkwatyo wa ĩvinda yũkĩte. Nũndũ wa ũu, onthe nĩmaemawa nĩ kwĩseũvĩsya ĩsyĩtwa ĩseo vamwe na Ngai.

it-1 340

Ũathimo

Yeova Nũathimaa Andũ. “Ũathimo wa Yeova, nawʼo nũthuasya; na ndawongelanasya na woo.” (Nth 10:22) Yeova aathimaa ala wendete kwa kũmasũvĩa, kũmatetheesya maendeee nesa, kũmatongoesya, na kwĩanĩsya mavata moo nĩ kana matetheke.

Ũthwii wa Kĩ-veva

w06 5/15 30 ¶18

Ũtanu wa Kũendaa Wĩanĩunĩ

18 “Ũathimo wa Yeova” nĩwʼo ũtumĩte andũ make maendeea nesa kĩ-veva. Na tũi na nzika kana “ndawongelanasya na woo.” (Nthimo 10:22) Nĩkĩ ĩndĩ athũkũmi aingĩ aĩkĩĩku ma Ngai makwatawa nĩ motato ala matumaa methĩwa na woo mwingĩ na mathĩna? Tũkwatawa nĩ mathĩna na mawĩmakĩo nũndũ wa itumi ii itatũ nene. (1) Nũndũ ithyĩ ene twĩ na naĩ. (Mwambĩlĩlyo 6:5; 8:21; Yakovo 1:14, 15) (2) Nũndũ wa Satani na ndaimoni syake. (Aeveso 6:11, 12) (3) Nũndũ wa nthĩ ĩno nthũku. (Yoana 15:19) O na kau Yeova nĩwĩtĩkĩlasya maũndũ mathũku matũkwate, ti we ũtumaa matũkwata. Nĩkyo kĩtumi Mbivilia yaĩtye, “kĩla mũthĩnzĩo mũseo na mwĩanĩu wumaa ĩũlũ, ũtheeaa kuma kwa Ĩthe wa syeni sya matunĩ.” (Yakovo 1:17) Kwa wʼo, moathimo ma Yeova ndamongelanasya na woo.

MATUKŨ 28, MWEI WA 4–MATUKŨ 4, MWEI WA 5

MAŨNDŨ MA VATA KUMA NDETONĨ YA NGAI NTHIMO 11

Ndũkawete Ndeto Nthũku!

w02 5/15 26 ¶4

Ala Alũngalu Matongoeawʼa Nĩ Wĩanĩu Woo

O na ĩngĩ, wĩanĩu wa ala alũngalu na ũthũku wa eki ma naĩ nũkonetye andũ angĩ. Mũsumbĩ wa Isilaeli aisye atĩĩ: “Mũndũ ũtakĩaa Ngai nĩwanangaa mũtũi wake na kanywʼa wake; ĩndĩ kwondũ wa ũmanyi ũla mũlũngalu akavonokwʼa.” (Nthimo 11:9) Vai mũndũ wĩsa kũkaĩa kana, kũnyaĩĩkya ndeto sya kwanangĩa angĩ ĩsyĩtwa, nzukũ, kũneena ndeto syĩ na nthoni, kana kũvũĩanĩa ngũĩ nthũku nĩkũũmĩasya andũ angĩ. Kĩvathũkanyʼo na ũu, ndeto sya mũndũ mũlũngalu syĩthĩawa syĩ ntheu, isũanĩĩtwe nesa, na syĩ na ndaĩa. Ũmanyi nũmũvonokosya mũndũ mũlũngalu, nũndũ wĩanĩu wake nũmũtetheeasya akethĩwa na ũmanyi ũla waĩlĩte nĩ kana aĩkĩĩthye kana ala meũmũneenea maũndũ mataĩlĩte nĩ akengani.

w02 5/15 27 ¶2-3

Ala Alũngalu Matongoeawʼa Nĩ Wĩanĩu Woo

Andũ ala mekalaa ndũanĩ maatĩĩa ũlũngalu nĩmatumaa kwĩthĩwa na mũuo na mayaka angĩ ndũanĩ ĩsu. Kwoou, ndũa ĩsu nĩtaĩawa na ĩyĩendeea nesa. Ĩndĩ, ala manyaĩĩkasya ndeto sya kwanangĩa angĩ ĩsyĩtwa, makaneena ndeto itonya kũũmĩsya, na maũndũ mathũku nĩmatumaa kwĩthĩwa na ithokoo, andũ makethĩwa mate na ũtanu, kũkethĩwa mũaanĩko, na o na makalikya andũ mũisyonĩ. Nĩkwĩthĩawa kũilye ũu, na mũno mũno ethĩwa andũ ala mekwĩka maũndũ asu me na ũkũmũ mũna. Ndũa ĩsu nĩyĩthĩawa na mũaanĩko, ũlũsani, mwĩkalĩle mũthũku, na o na mavinda angĩ ũnyivu wa mbesa.

Mwolooto ũla wĩ nthĩnĩ wa Nthimo 11:11 nũkonetye ĩmwe kwa ĩmwe andũ ma Yeova mayĩka maũndũ me vamwe na andũ ala angĩ ikundinĩ syoo, ila itonya kũelekanwʼa na ndũa. Kĩkundi kĩla kĩthĩawa na andũ ma kĩ-veva ala nĩ alũngalu na matongoeawʼa nĩ wĩanĩu woo kĩthĩawa na andũ atanu, me na kĩthito, mathĩnĩkĩaa ala angĩ, na nĩkĩmũeteae Ngai ndaĩa. Yeova nũathimaa kĩkundi kĩu, na nĩkĩendeeaa nesa kĩ-veva. Mavinda kwa mavinda, andũ amwe nĩmatonya kũlea kwĩanĩwa nĩ ũndũ maũndũ mekwĩkwa na kwoou mayambĩĩa kũnyungunyĩsya. Andũ asu methĩawa mailye ta “mwĩi wĩ na sumu” ũla ũtonya kũnyaĩĩka na ũyananga andũ angĩ o na mateĩ na thĩna. (Aevelania 12:15) Mavinda maingĩ andũ ta asu methĩawa mayenda ũnene na nguma. Nĩmanyaĩĩkasya ngewa ĩũlũ wa kĩkundi kana atumĩa mayasya kana kũi na ũsili wa katĩ, kwĩ kĩmena, kana o maũndũ angĩ ta asu. Kwa wʼo, ndeto syoo no iete mũaanĩko kĩkundinĩ. Tũyaĩlĩte kwĩthukĩĩsya ngewa sya andũ ata asu. Vandũ va ũu, twaĩlĩte kũtata twĩthĩwe twĩ andũ ma kĩ-veva ala matumaa kwĩthĩwa na mũuo na ngwatanĩo kĩkundinĩ.

w02 5/15 27 ¶5

Ala Alũngalu Matongoeawʼa Nĩ Wĩanĩu Woo

Mũndũ ũla ũtasilaa nesa kana ‘ũtethĩawa na ũĩ,ʼ nũtumaa kwĩthĩwa na maũndũ mathũku mũno! Mũndũ ũsu aneenaa ate kwĩsiĩĩa na nũndũ wa ũu ayĩsa kwĩthĩa anyaĩĩkisye ndeto sya kwanangĩa angĩ ĩsyĩtwa, kana akaneena ndeto sya kũũmĩsya andũ. Ũndũnĩ ta ũsu wĩthĩaa no nginya atumĩa mose ĩtambya na mĩtũkĩ nĩ kana maũmine ũtananyaĩĩka. Kĩvathũkanyʼo na mũndũ ‘ũte na ũĩ,’ mũndũ wĩ na ũmanyi nũmanyaa ĩvinda yĩla waĩle kũvindya. Vandũ va kũvuanyʼa nzama kana ũndũ mũvithe, nũvwʼĩkaa ũndũ ũsu. Mũndũ wĩ na ũmanyi nũmanyaa kana aema kũsiĩĩa ũĩmĩ wake nũkũũmĩsya mũno andũ angĩ, na kwoou ethĩawa e “kĩthito [mũĩkĩĩku].” Ethĩawa e mũĩkĩĩku kwa athaithi ala angĩ, na kwoou ndavuanasya maũndũ ma kĩmbithĩ ala matonya kũmalikya mũisyonĩ. Kwa wʼo, andũ ta asu ala methĩawa me aĩkĩĩku nĩ ũathimo mũnene kĩkundinĩ!

    Kikamba Publications (1950-2025)
    Uma
    Lika Nthĩnĩ
    • Kikamba
    • Tũma
    • Mũvangĩle ũla ũkwenda
    • Copyright © 2025 Watch Tower Bible and Tract Society of Pennsylvania
    • Mĩao ya Kũtũmĩa
    • Ũvoo Waku wa Kĩmbithĩ
    • Mpangilio wa Faragha
    • JW.ORG
    • Lika Nthĩnĩ
    Tũma