Nĩwaĩlwe Kwĩmanyĩsya Ĩũlũ wa Ngai

Nĩ kenda wĩthĩwe mũnyanya wa Ngai, nĩwaĩlwe kwĩmanyĩsya ĩũlũ wake. Atĩĩ, anyanyau nĩmesĩ syĩtwa yaku na nĩmayĩtũmĩaa? Ĩĩ. O nake Ngai eenda ũmanye syĩtwa yake na ũiyĩtũmĩa. Syĩtwa ya Ngai nĩ Yeova. (Savuli 83:18; Mathayo 6:9) Ĩngĩ no nginya wĩmanyĩsye ũndũ wendete na ũndũ ũtendete. Nĩwaĩlwe kũmanya anyanya make naaũ na amaitha make naaũ. Kũmanya mũndũ nĩ kũkuaa ĩvinda yingĩ. Mbivilia yaasya kana nĩ ũndũ wa ũĩ kũvatha ĩvinda ya kwĩmanyĩsya ĩũlũ wa Yeova.—Aeveso 5:15, 16.

Anyanya ma Ngai mekaa ũndũ ũla ũmwendeeasya. Sũanĩa anyanyau. Atĩĩ, ethĩwa ũkameka naĩ, na ũyĩka maũndũ ala mamenete, mo makaendeea kwĩthĩwa anyanyau? Ai, aiee! O ta ũu, ethĩwa nũkwenda kwĩthĩwa mũnyanya wa Ngai, nĩwaĩlwe kwĩka ũndũ ũla ũmwendeeasya.—Yoana 4:24.

Ti ndĩni syonthe itongoasya kwelekela ũnyanya na Ngai. Yesũ, mũnyanya ũla wĩ mũamba wa vakuvĩ vyũ na Ngai, aneenie ũvoo wa malelũ elĩ. Lelũ ũmwe nĩ mũthanthau na wusĩe andũ. Lelũ ũsu ũtongoasya kwelekela wanangĩko. Lelũ ũla ũngĩ nĩ mũtheke na ũkinyĩlwe nĩ andũ avũthũ. Lelũ ũsu ũtongoasya kwelekela thayũ ũtathela. Ũu nĩ kwonanʼya kana ethĩwa wĩenda kwĩthĩwa na ũnyanya wa Ngai, no nginya wĩmanyĩsye nzĩa ĩla mbaĩlu ya kũmũthaitha.—Mathayo 7:13, 14.