Ũndũ Ũteesĩkĩe Twĩ na Ũtanu Kũũmanya

Waatavwʼa nĩ mũndũ ũndũ ũtesĩkĩe, kana wĩthĩĩtwe wĩ mũvithe?—a Mbivilia nĩwetete ũndũ mũna kuma kwa Ngai ũla waĩ mũvithe. Tũtonya kwasya waĩ mũvithe nĩkwĩthĩwa andũ mayawĩsĩ. O na alaĩka nĩmendaa kũũmanya. No wende kũmanya ũndũ ũsu nĩ wĩva?—

Wĩona alaĩka ta mendaa kũmanya kyaũ?

Ĩvinda yĩasa ĩvĩtu, Ngai nĩwoombie andũ elĩ, mũndũũme na mũndũ mũka. Ũ mũndũũme eetawa Atamu, nake mũndũ mũka eetawa Eva. Asu nĩmo maĩ andũ ma mbee vyũ kũmbwa. Amina kũmomba, Ngai nĩwamaiie mũũndanĩ mwanake weetawa Eteni. Keka Atamu na Eva nĩmamwĩwie Ngai, mo, na syana syoo methĩwa maseũvisye nthĩ yonthe ĩkethĩwa yĩ mbanake, o ũndũ mũũnda ũsu wa Eteni wailyĩ. Maĩ matonya kwĩkala tene na tene nthĩnĩ wa nthĩ isu mbanake. Ĩndĩ nũũlilikana ũndũ ũla Atamu na Eva meekie?—

Atamu na Eva mayaamwĩwʼa Ngai, na nĩkyo kĩtumi ũmũnthĩ nthĩ ĩtailyĩ ũndũ mũũnda wa Eteni wailyĩ. Ĩndĩ, Ngai nĩwawetie kana akaseũvya nthĩ yonthe yĩthĩwe vandũ vanake, vala kĩla mũndũ ũkekala tene na tene e na ũtanu. Akeeka ũu ata? Kwa ĩvinda yĩasa andũ mayeesĩ ũndũ Ngai ũkeka ũu. Nĩkĩ? Nũndũ ũndũ ũsu waĩ mũvithe.

Ĩla Yesũ wookie kũũ nthĩ, nĩwamanyĩisye andũ ĩũlũ wa ũndũ ũsu waĩ mũvithe, kana ũteesĩkĩe. Aisye kana ũndũ ũsu andũ mateesĩ wakonetye Ũsumbĩ wa Ngai. Yesũ ameie andũ mavoyae Ũsumbĩ ũsu wũke. Ũsumbĩ ũsu nĩwʼo ũkaseũvya nthĩ yĩthĩwe vandũ vanake va kwĩkala.

Nĩwatana kũmanya ũndũ ũsu waĩ mũvithe?— Lilikana no ala mamwĩwʼaa Yeova makekala nthĩ ĩsu mbanake. Mbivilia nĩwetete ĩũlũ wa aũme na aka aingĩ ala mamwĩwʼaa Yeova. No wende kwĩmanyĩsya ĩũlũ wamo?— Eka twone amwe ma andũ asu maĩ aaũ, na ũndũ tũtonya kũatĩĩa ngelekanyʼo yoo.