Ana-a-asa Elĩ Eũ ma Nzama Ĩla Ĩtongoesye

TWĨ MATUKŨ 5, Mwei wa 10, 2024, ve kĩmanyĩthya kya mwanya kyaumiwʼe ũmbanonĩ wa kĩla mwaka: Mwana-a-asa Jody Jedele na Jacob Rumph maĩ mananyuvwa kwĩthĩwa Nzamanĩ Ĩla Ĩtongoesye ya Ngũsĩ sya Yeova. Ana-a-asa asu elĩ methĩĩtwe maimũthũkũma Yeova me aĩkĩĩku kwa myaka mingĩ.

Mwana-a-asa Jedele asyaĩwe Missouri, Amelika, na aeewe ũwʼonĩ. E na mũsyĩ woo mekalaa vakuvĩ na kĩsio kĩtatavanĩtwʼe mũno. Kwoou nĩwakomanaa na ana-a-asa na eĩtu-a-asa aingĩ ma isio syĩ kĩvathũkanyʼo, ala maendaa kũtetheesya wĩa wa kũtavanyʼa kĩsionĩ kĩu. Wendo na ngwatanĩo yoo nĩsyamũthangaaisye mũno. Avatisiwe Matukũ 15, Mwei wa 10, 1983 e o wa mũika. Nĩwatanĩaa kũtavanyʼa, na ĩtina wa kũmina sekondalĩ, nĩwoosie ũvainia wa kĩla ĩvinda twĩ Mwei wa 9, 1989.

Yĩla Mwana-a-asa Jedele waĩ wa mũika, asyai make nĩmamũtwaaa e na mwĩĩtu mũinae makatembee Mbetheli. Kũthi kũtembea kũu nĩkwatumie methĩwa na mũvango wa kwĩsa kũthũkũma Mbetheli, ũla ĩtina mesie kũwĩanĩsya. Na twĩ Mwei wa 9, 1990, Mwana-a-asa Jedele nĩweetiwe Mbetheli ya Wallkill. Ambie kũthũkũma Mũvĩanĩ wa Ũtheu na ĩtina esa kũthamĩĩwʼa Mũvĩanĩ wa Maũndũ ma Ũiiti.

Ĩvindanĩ o yĩu, ikundi sya kĩthyomo kya Spanish nĩsyaendeee kwĩana, na kwoou vaĩ na vata wa ana-a-asa. Nũndũ wa ũu, Mwana-a-asa Jedele nĩwathamĩĩie kĩkundinĩ kĩmwe kya kĩthyomo kya Spanish na ambĩĩa kwĩmanyĩsya kĩthyomo kĩu. Ĩtina wa kavinda kakuvĩ, nĩwakomanie na mwĩĩtu-a-asa wĩtawa Damaris, ũla waĩ vainia mũthyũlũlũkonĩ ũsu. Nĩmendanie, matwaana, na maendeea kũthũkũma Mbetheli me ĩmwe.

Twĩ 2005, nĩmaumie Mbetheli nĩ kana makasũvĩe asyai moo. Ĩvindanĩ yĩu, maĩ mavainia ma kĩla ĩvinda. Mwana-a-asa Jedele nĩwatetheeasya kũsomethya Sukulu ya Mavainia, o na aĩ Kamitiinĩ ya Maũndũ ma Sivitalĩ na Kamitiinĩ ya Mwako ya Kĩsio.

Twĩ mwaka wa 2013, Mwana-a-asa Jedele na mũka, nĩmathokiwʼe ĩngĩ Mbetheli matetheesye mwako ũla waendeee Warwick. Kuma ĩvinda yĩu, nĩmathũkũmĩte Patterson na Wallkill. Mwana-a-asa Jedele nũthũkũmĩte Mũvĩanĩ wa Kũvangĩthya na Kwaka Myako ya Ũsumbĩ na Mũvĩanĩ wa Maũvoo ma Sivitalĩ. Twĩ Mwei wa 3, 2023, nĩwanyuviwe ethĩwe Mũtetheesya wa Kamitii ya Ũthũkũmi. Avindĩĩsya ianda ila wĩthĩĩtwe nasyo, aĩtye: “Yĩla wakwata ianda nzaũ, mavinda amwe no wĩwʼe wĩ mũitavĩe. Ĩndĩ mavindanĩ ta asu nĩwʼo waĩle kũmwĩkwatya Yeova nũndũ nĩwe ũtũtetheeasya kwĩanĩsya ianda o na syĩva ila watũnenga.”

Mwana-a-asa Rumph asyaĩwe California, Amelika. E mũnini, inyia wake nĩwavoete kĩ-veva ĩndĩ nĩweekĩaa kĩthito amũmanyĩsye ũwʼo. O na ĩngĩ, kĩla mwaka nĩwaendaa kũkethya ũsũe, ũla weethĩĩtwe aimũthũkũma Yeova e mũĩkĩĩku. Nĩwamũtetheeisye eethĩwa na wendi wa kũmanya ũla wʼo, na e na myaka 13 nĩwakũlilye amanyĩwʼe Mbivilia. Avatisiwe Matukũ 27, Mwei wa 9, 1992 e o wa mũika. Na ũndũ wa kũtanĩthya nĩ kana inyia wake nĩwaambĩĩie kũtavanyʼa na kũthi maũmbanonĩ ĩngĩ. Nake ĩthe na ainae nĩmeekie maendeeo na mavatiswa.

E wa mũika, nĩweeyoneie ũndũ mavainia meethĩawa na ũtanu wingĩvĩte. Na ĩtina wa kũmina sekondalĩ, twĩ Mwei wa 9, 1995, nĩwoosie ũvainia. Na twĩ 2000, nĩwathamĩĩie Ecuador akatetheesye kũla kwaĩ na vata mũnene wa atavanyʼa. E kũu nĩwakomanie na mwĩĩtu-a-asa vainia wĩtawa Inga wa Canada, na ĩtina nĩmesie kũtwaana. Matwaana oou, mekalile taoninĩ ya Ecuador me kakundinĩ kaĩ na atavanyʼa avũthũ. Ũmũnthĩ nĩ kĩkundi kĩnene kĩ na atavanyʼa aingĩ.

Ĩtina wa ĩvinda, Mwana-a-asa Rumph na mũka, nĩmatwʼĩkĩthiwʼe mavainia ma mwanya na ĩtina mathũkũma wĩanĩ wa kũthyũlũlũka. Na twĩ mwaka wa 2011, nĩmathokiwʼe kĩlasinĩ kya 132 kya Sukulu ya Ngileati. Ĩtina wa kũmina sukulu ĩsu, nĩmathũkũmie nthĩ syĩ kĩvathũkanyʼo na matanĩa ianda syĩ kĩvathũkanyʼo sya ũthũkũmi, ta ũthũkũmi wa Mbetheli, ũmisonalĩ, na wĩa wa kũthyũlũlũka. O na ĩngĩ, Mwana-a-asa Rumph nĩwakwatie kĩanda kya kwĩthĩwa e mwalimũ wa Sukulu ya Atavanyʼa ma Ũsumbĩ.

Nũndũ wa ũwau wa COVID-19, nĩmasyokie Amelika. Nĩmathokiwʼe Mbetheli ya Wallkill na me kũu Mwana-a-asa Rumph amanyĩwʼa wĩa Mũvĩanĩ wa Ũthũkũmi. Ĩtina, nĩmatũmiwe ovisinĩ wa ũvonge wa Ecuador, na Mwana-a-asa Rumph aĩ ũmwe wa ana-a-asa ma kamitii ya ovisi wa ũvonge. Twĩ mwaka wa 2023, nĩmatũmiwe Warwick. Na twĩ Mwei wa 1, 2024, Mwana-a-asa Rumph nĩwatwʼĩkĩthiwʼe Mũtetheesya wa Kamitii ya Ũthũkũmi. Avindĩĩsya kwʼonthe kũla waathũkũma aĩtye: “Kĩla kĩtumaa kĩanda kĩthĩwa kĩ kya mwanya ti vala mũndũ ũkũthũkũma ĩndĩ nĩ andũ ala ũkũthũkũma.”

Nĩtwonaa kĩthito kya ana-a-asa aa kĩ kya vata na ‘nĩtũendeeaa kũnenga ndaĩa aũme ta asu.ʼ—Avi 2:29.