Mars

Alɩwaatʋ ndʋ ɖɩɩkalɩɣ Kiɖe Tɛɛ Tɔm takayaɣ kajalaɣ ñʋʋ nɛ naalɛ ñɩŋgʋ yɔ, ɖɩnaɣ se tɩ-yɔɔ wɛʋ mbʋ ɛyaa ñɩnɩɣ sɔnɔ paanaɣ yɔ, Aɖam nɛ Ɛva paawɛnɩ-pʋ: Pataatɛɖɩɣ pʋyʋ, sɔɔndʋ taakpaɣ-wɛ nɛ nabʋyʋ nɛ nɔɔyʋ taalakɩ-wɛ kañatʋ. Pataanɩɣzɩɣ tɔɔnaɣ yaa tʋmɩyɛ nɖɩ pala yɔ ɖɩ-yɔɔ, pataahɩnɩɣ kʋdɔŋ nɛ pataanɩɣzɩɣ sɩm yɔɔ ɖɔɖɔ. (Kiɖe 1:​27-​29; 2:​8, 9, 15) Tɔm kɩcɛyɩtʋ ndʋ pɩwɛɛ se ɖɩtɩlɩ tɩ-yɔɔ wɛʋ yɔɔ yɔ, ndʋ lɛ se Yehowa ɖeke wɛnɩnɩ tɩ-yɔɔ wɛʋ kiya mbʋ pɩfɛyɩnɩ kamaɣ yɔ. Ɛbɛ yɔɔ? Mbʋ pʋyɔɔ yɔ ɛnʋ kɛnɩ ­won­du kpeekpe lɩzɩyʋ nɛ kedeŋa kpeekpe yɔɔ Ðoŋ Tɩŋa Tʋ. (1 Tim. 1:​17; Natʋ 4:​11) Toovenim taa lɛ, ­won­du kɩlɩzɩtʋ ndʋ tɩwɛ ɛsɔdaa nɛ tataa yɔ, ti-kpeekpe tɩwɛ tɩ-tɩ yɔɔ, ɛlɛ pɩtɩkɛ hɔɔlɩŋ tɩŋa taa. Pɩwɛɛ se ɖɩtɩlɩ se Yehowa wɛnɩnɩ ɖoŋ se ɛɖʋ paɣtʋ ndʋ tɩtʋʋzaa, tɩ-tɔm cɛyɩ nɛ tɩmʋna yɔ. Paɣtʋ ndʋ ɖeyi ɖeyi Yehowa ɖʋwa alɩwaatʋ ndʋ ɛcalɩ ɛyʋ lɩzʋʋ yɔ. w18.04 4 § 4, 6

Ðɩnawa se wezuu caɣʋ pɩzɩɣ nɛ pɩwɛɛ kaɖɛ siŋŋ ɛjaɖɛ ɖɩnɛ ɖɩ-taa. ­Yehowa ɖeke pɩzɩɣna nɛ ɛsɩnɩ-ɖʋ nɛ ɖɩɖɔkɩ ɖa-tɩ. (2 Kɔr. 4:​7, 8) Ɛlɛ ɛyaa mba taabalɩyɛ fɛyɩ pa nɛ Yehowa pɛ-hɛkʋ taa yɔ, maɣzɩ nɛ ŋna ɛzɩma ­pɩpɩzɩɣ nɛ pɩwɛɛ-wɛ kaɖɛ se ­palʋbɩnɩ kala ɛjaɖɛ ɖɩnɛ ɖɩ-taa yɔ. Ɛzɩ Yesu yɔ, ɖɩnaɣ pa-pʋtɔdɩyɛ nɛ piseɣtiɣ-ɖʋ se ɖiheyi-wɛ “tɔm kɩbandʋ” ndʋ tɩkɛ “ñʋʋ ­yabɩtʋ tɔm yɔ.” Ye mbʋ wɛɛnɩ suuɖu alɩwaatʋ ndʋ ŋwɩlɩɣ ɛyaa tɔm yɔ. Tɔzɩ se pɩtɩla wiɖiyi patɩmaɣzɩ Bibl taa tɔm ndʋ ɖɩsɩm camɩyɛ yɔ tɩ-yɔɔ kpa. Nɛ ɛyaa sakɩyɛ ñɔɔnɩ tisuu mbʋ pɛtɛm ­wɛnʋʋ yɔ kpam. Pɩtɩla pamaɣzɩɣ se pɛ-Ɛsɔ sɛtʋ yeki se nɔɔ kʋɖʋmaɣ ɛwɛɛ pa nɛ pɔ-hɔʋ taa ñɩma, pɔ-sɔnzɩ nɛ pe-egeetiye taa ñɩma pɛ-hɛkʋ taa. Pʋcɔ nɛ ɖɩpɔzɩ nɔɔyʋ se eyele e-tisuu “kɩbɩm” mbʋ ɛɛñɔnɩ kpam yɔ lɛ, pɩwɛɛ se ɖɩsɩnɩ-ɩ nɛ ɛtɩlɩ toovenim tɔm “kɩfatʋ” nɛ ɛsɔɔlɩ-tʋ. Toovenim tɔm ndʋ lɛ Bibl taa tɔm ndʋ pataatɩlɩ alɩwaatʋ ndʋ papaɣzɩ kpɛlɩkʋʋ yɔ. Alɩwaatʋ ndʋ tɩ-taa pakaɣ yebu tisuu mbʋ paawɛna yɔ. Pɩpɩzɩɣ nɛ pɩkpaɣ alɩwaatʋ sakɩyɛ pʋcɔ nɛ ɖɩsɩnɩ nɔɔyʋ nɛ ɛla lɛɣzɩtʋ ndʋ.​—Roma 12:2. w19.03 23 § 10, 12; 24 § 13

Yehowa sɔɔlɩm nɛ ɖoŋ kpazʋʋ tɔm tʋnɛ tɩkɛnɩ kɩɖaʋ ŋgʋ kɩtɔzʋʋ-ɖʋ se pɩcɛyaa se ɖɩñɩnɩ nʋmɔŋ weyi ɩ-yɔɔ ɖɩpɩzɩɣ nɛ ɖɩtɩŋna nɛ ɖɩkpazɩ lalaa ɖoŋ yɔ. (Yoh. 5:​20) Ye ɖɩɖʋ nɔɔyʋ nesi nɛ pʋwayɩ ɛwɩlɩɣ-ɖʋ ɛ-sɔɔlɩm nɛ ɛsaŋ-ɖʋ mbʋ ɖɩlabɩ-ɩ yɔ pɩ-yɔɔ yɔ, ɖa-taa lakɩ leleŋ siŋŋ. Mbʋ ɖɔɖɔ ɖɛ-ɛgbɛyɛ taa koobiya nɛ ɖɔ-hɔʋ taa ñɩma sɔɔlaa se ɖɩwɩlɩ-wɛ sɔɔlɩm nɛ ɖɩkpazɩ-wɛ ɖoŋ. Alɩwaatʋ ndʋ ɖɩsaŋ lalaa yɔ, ɖɩkpazɩɣ pe-tisuu ɖoŋ nɛ ɖɩsɩɣnɩ-wɛ se pɛsɛɛ Yehowa nɛ laŋɩyɛ pilim. Kɔzɩ kɔzɩ lɛ, pɩcɛyaa se lʋlɩyaa ɩkpazɩ ɖoŋ pe-piya. Alɩwaatʋ ndʋ lʋlɩyaa saŋ pe-piya nɛ pawɩlɩɣ-sɩ se sɩ-tɔm kɛdɩnɩ-wɛ pɩdɩɩfɛyɩ yɔ, sɩ-taa lakɩ leleŋ siŋŋ. Tɔm pee “Ñɔ-tɔm kɛdɩnɩ-m” wɩlɩɣ se Yehowa taa kaatɛma se Yesu kaɣ labʋ ɛ-Caa sɔɔlɩm ɖeyi ɖeyi. Ɛzɩ Yehowa taʋ liu ɛ-Pɩyalʋ yɔ, mbʋ ɖɔɖɔ pɩwɛɛ se ɖɩtaa liu Yesu se ɛkaɣ yebu nɛ Yehowa lidaʋ tɔm tɩŋa la ɖeyi ɖeyi. (2 Kɔr. 1:​20) Alɩwaatʋ ndʋ ɖɩmaɣzɩɣ Yesu kɩɖaʋ yɔɔ camɩyɛ yɔ, pɩsɩɣnɩ-ɖʋ nɛ ɖɩtɛ ɖa-taa se ɖɩmaɣzɩɣnɩ-ɩ nɛ pɩkpaɖɩ nɛ ɖɩɖɔ ɛ-nɩŋgbanzɩ taa.​—1 Pɩy. 2:​21. w19.03 8 § 3; 9 § 5-6

Alɩwaatʋ ndʋ palakɩ-ɖʋ kʋjɔʋ nakʋyʋ nɛ ɖɩna se pɩkɛ ñɩm pʋyʋ siŋŋ yɔ, piseɣtiɣ-ɖʋ se ɖɩwɩlɩ ɖɛ-ɛsɩmɩyɛ weyi ɛlabɩ-ɖʋ kʋjɔʋ ŋgʋ yɔ. Alɩwaatʋ ndʋ Yehowa lɩzɩ Izrayɛɛlɩ piya yomiye taa Ejipiti yɔ, piyeba nɛ pɛwɛɛ pa-tɩ yɔɔ, ɛlɛ Izrayɛɛlɩ piya nzɩ sɩtaatɩlɩ se sɩ-tɩ yɔɔ wɛʋ mbʋ pɩkɛ ñɩm pʋyʋ siŋŋ. Patɩɩlɩ yomiye taa nɛ pɩla fenasɩ pazɩ lɛ, pe-liu tɛɛ paɣzɩ kɔtɩnʋʋ tɔɔnaɣ nɛ sʋlʋm mbʋ pɔñɔwaɣ Ejipiti yɔ nɛ paatasɩɣ nɩʋ leleŋ tɔɔnaɣ ŋga Yehowa haɣaɣ-wɛ yɔ kɔ-yɔɔ, halɩ pañɩnaɣ se papɩsɩ Ejipiti. Pɩlabɩ pʋtɔdɩyɛ se, pɛ-ɛsɩndaa lɛ kpakpasɩ, kama, anasaayɩ samloo, caasɩ nɛ kaabʋnaa mba pɔtɔkaɣ Ejipiti yɔ pɩkpaɖɩ ɖeu ɛzɩma pɛwɛ lɛɛlɛɛyɔ pa-tɩ yɔɔ nɛ pɩhaɣ-wɛ waɖɛ se pɛsɛɛ Ɛsɔ toovenim tʋ Yehowa yɔ. Ye mbʋ pɩɩɖɩɣzɩɣ-ɖʋ se Yehowa taa kaawɩnɩ ɛ-samaɣ. (Kɩg. 11:​5, 6, 10; 14:​3, 4) Tɔm tʋnɛ tɩkpɛlɩkɩɣ-ɖʋ lɔŋ sakɩyɛ! Apostoloo Pɔɔlɩ kaaseɣti Krɩstʋ ñɩma nɛ ɛyɔɔdɩ se tɩ-yɔɔ wɛʋ mbʋ Yehowa tɩŋnɩ ɛ-Pɩyalʋ Yesu Krɩstʋ yɔɔ nɛ ɛha-wɛ yɔ, patɩlɩ-pʋ labɩnʋʋ tʋmɩyɛ nɛ pataakɔɔ nɛ pelesi pɩ-wazasɩ.​—2 Kɔr. 6:1, nwt. w18.04 9-10 § 6-7

Ða-tɩŋa ɖɩñɩnɩɣ se pɔsɔɔlɩ-ɖʋ. Nɛ ɖa-tɩŋa ɖɩñɩnɩɣ ɖɔɖɔ se pataamuli-ɖʋ. Ye paawɩlɩɣ-ɖʋ sɔɔlɩm yaa siɣsiɣ wɛtʋ ɖoŋ ɖoŋ yɔ, pɩpɩzɩɣ nɛ pɩlabɩ-ɖʋ ɛzɩ ɖɩfɛyɩ wazaɣ nɛ ɖɩfɛyɩnɩ ɖɔɖɔ lidaʋ nakʋyʋ yɔ. Yehowa nawa se sɔɔlɩm nɛ siɣsiɣ wɛtʋ tɔm cɛyɩ siŋŋ ɖɛ-ɛsɩndaa. (Keɣa 32:5) Pɩtʋʋ fɛyɩ se Yehowa sɔɔlɩ-ɖʋ siŋŋ nɛ ɛtɩsɔɔlɩ ɖɔɖɔ se pomuli-ɖʋ. Ɛtɩŋnɩ Moyizi yɔɔ nɛ ɛɖʋ ­Izrayɛɛlɩ samaɣ Paɣtʋ natʋyʋ. Ye ɖɩtazɩɣ paɣtʋ ndʋ tɩ-taa yɔ, ɖɩnaɣ ɛ-sɔɔlɩm nɛ e-siɣsiɣ wɛtʋ kpayɩ kpayɩ. Alɩwaatʋ ndʋ ɖɩkpɛlɩkɩɣ Moyizi Paɣtʋ yɔ, ɖɩnaɣ ɛzɩma ɖɛ-Ɛsɔ kʋsɔɔlʋ Yehowa sɔɔlɩ-ɖʋ siŋŋ yɔ. (Roma 13:​8-​10) Ðɩpɩzɩɣ nɛ ɖɩyʋsɩ se Moyizi Paɣtʋ tigiɖe lɛ sɔɔlɩm mbʋ pʋyɔɔ yɔ, sɔɔlɩm ɖiyiɣni Yehowa lakasɩ kpeekpe. (1 Yoh. 4:8) Moyizi Paɣtʋ tɩŋa ñɩkaɣ niye paɣtʋ sɔsɔtʋ naalɛ tʋnɛ tɩ-yɔɔ: Sɔɔlɩ Ɛsɔ nɛ ŋsɔɔlɩ ño-koobu. (Lev. 19:18; Wp. 6:5; Mat. 22:36-​40) Paɣtʋ ndɩ ndɩ ndʋ tɩɩcɛzɩ 600 nɛ payaɣ-tʋ se Moyizi Paɣtʋ yɔ tɩ-taa paa ndʋ lɛ, tɩwɩlɩɣ Ɛsɔ sɔɔlɩm hɔɔlʋʋ nakʋyʋ. w19.02 20-​21 § 1-4

Yɔɔb ñakaɣ pana se ɛwɛɛnɩ wɛtʋ ndʋ tɩmʋnaa yɔ mba ɛ nɛ wɛ patɩkaa kʋzʋʋ piliŋa yɔ pɔ-yɔɔ. (Yɔɔb 31:1) Ɛnawa se pɩtɩmʋna se ɛwɛɛnɩ kʋzʋʋ lɩmaɣza halʋ nɔɔyʋ yɔɔ nɛ pɩtasɩnɩ ɛ-halʋ. Sɔnɔ ɖɩwɛ ɛjaɖɛ nɖɩ ɖɩ-taa pɩpɩzɩɣ nɛ pɩtakɩ-ɖʋ kɛlɛʋ kʋzʋʋ nʋmɔʋ taa yɔ. Ɛzɩ Yɔɔb yɔ, ɖɩkaɣ kizuu se ɖɩɩwɛɣnɩ kʋzʋʋ lɩmaɣza weyi ɖa nɛ ɩ ɖɩtɩɖɔkɩ nesi yɔ ɛ-yɔɔ? Pɩtasɩ lɛ, ɖɩkaɣ kizuu se ɖɩɩcɔŋnɩ kɩlɛmɩŋ weyi ɩtɩmʋna yɔ yaa kʋzʋʋ kɩlɛmɩŋ, paa le ɖɩtɩɩlɩ ɩ-yɔɔ yɔ? (Mat. 5:​28) Ye ɖɩɖɔkʋʋ ɖa-tɩ mbʋ paa evemiye nɖɩ yɔ, pɩkaɣ-ɖʋ sɩnʋʋ nɛ ɖɩɖɔkɩ ɖa-cɩŋgɩlɩm wɛtʋ. Yɔɔb ñaŋaɣ Yehowa ɖɔɖɔ tomnaɣ yɔɔ ­won­du ñɩnʋʋ hɔɔlʋʋ taa. Yɔɔb kaanawa se ye ɛtaɣ liu mbʋ ɛwɛna yɔ, ɛkaɣ labʋ kɩwɛɛkɩm sɔsɔm nɛ pɩkaɣ pɔzʋʋ se pɔhɔ ɛ-nɩŋgbaaŋ. (Yɔɔb 31:24, 25, 28) Sɔnɔ ɖɩwɛ ɛjaɖɛ nɖɩ ɖɩ-taa ɛyaa sɔɔlɩ tomnaɣ yɔɔ ñɩm kadadayaɣ yɔ. Ye ɖɩñaɣ pana nɛ ɖɩwɛɛnɩ lɩmaɣza kɩbana liidiye nɛ ñɩm pɔ-yɔɔ, ɛzɩ Bibl pɔzʋʋ-ɖʋ se ɖɩla yɔ, pɩkaɣ yebu nɛ ɖɩtɛ ɖa-taa se ɖɩɖɔkʋʋ ɖa-cɩŋgɩlɩm wɛtʋ.​—Adu. 30:​8, 9; Mat. 6:​19, 20. w19.02 6 § 13-​14

Yesu lɩzɩ sɔɔlɩm sɔsɔm mbʋ Yehowa wɛnɩ ɖɔ-yɔɔ yɔ nɛ ɛwɩlɩ ɖeyi ɖeyi ɛ-lakasɩ tɩŋa taa. (1 Yoh. 4:​8-​10) Kɔzɩ kɔzɩ lɛ, Yesu sɔɔlɩnɩ ɛ-laŋɩyɛ faaa se ɛkpakɩɣ e-wezuu nɛ ɛcɛlɩ ɖɔ-yɔɔ. Paa ɖɩtɩɩkɛ patam numwaa yaa “heŋ lɛɛŋ” taa tʋ yɔ, sɔɔlɩm mbʋ Yehowa nɛ ɛ-Pɩyalʋ pawɩlɩ-ɖʋ pɩtɩŋnɩ kɩlaʋ ŋgʋ kɩ-yɔɔ yɔ, pɩwazɩɣ-ɖʋ. (Yoh. 10:16; 1 Yoh. 2:2) Maɣzɩ ɖɔɖɔ tɔɔnaɣ ŋga Yesu labɩnɩ tʋmɩyɛ Kɩbaɣlʋ tɔɔnaɣ tɔɔʋ sɔnzɩ taa yɔ kɔ-yɔɔ nɛ ŋna; kawɩlɩɣ se Yesu sɔɔlɩ ɛ-wayɩ tɩŋɩyaa nɛ ɛmaɣzɩɣ pɔ-yɔɔ. Ɛzɩma tɩyɛ? Yesu wɩlaa se ɛsɔɔlɩ ɛ-wayɩ tɩŋɩyaa patam numwaa mbʋ pʋyɔɔ yɔ ɛtɩla sɔnzɩ nzɩ sɩwɛ kaɖɛ yɔ, ɛlɛ ɛkpaɣ tɔɔnaɣ ŋga kɛwɛ kɛlɛʋ yɔ nɛ ɛwɩlɩnɩ-wɛ ɛzɩma palakɩ sɔnzɩ nzɩ yɔ. Alɩwaatʋ wɛɛ nɛ tɩɖɛɣ lɛ, pɩɩpɔzaa se patam numwaa mba, powolo pɩ-yɔɔ nɛ palakɩ sɔnzɩ nzɩ paa pɩnaɣ ŋga. Nɛ pɩkaɣ pɔzʋʋ se palabɩ-sɩ wɛtʋ ndɩ ndɩ taa, halɩ pɩkpɛndɩnɩ salaka taa. (Natʋ 2:​10) Papɩzaa nɛ paña Yesu yaa we? Ɛɛɛ. Kpaɣnɩ kajalaɣ pɩnzɩ mɩnʋʋ taa nɛ pɩtalɩ sɔnɔ, toovenim Krɩstʋ ñɩma wɛɛ nɛ pañakɩ pana nɛ palakɩ Yesu sɩm yɔɔ tɔzʋʋ sɔnzɩ. w19.01 24 § 13-​15

Tɩ-yɔɔ wɛʋ mbʋ, pɩ-hɔɔlɩŋ nɩɩyɩ lɛ se pɩlɩzɩɣ-ɖʋ cɛtɩm Ɛsɔ sɛtʋ wɩlɩtʋ, kaatɩlɩtʋ, nɛ aleewaa sɔɔndʋ seu yomiye taa nɛ hɔɔlɩŋ lɛɛŋ taa ɖɔɖɔ. Pɩtasɩ ɖɔɖɔ lɛ, ɖɩkaɣ hiɣu “Ɛsɔ piya tɩ-yɔɔ wɛʋ sɔsɔm.” (Roma 8:​21) ‘Ðɔkɩ Krɩstʋ tɔm’ yaa ɛ-wɩlɩtʋ kpam nɛ ŋhiɣ tɩ-yɔɔ wɛʋ mbʋ lɛɛlɛɛyɔ. Ye ŋlabɩ mbʋ yɔ, ŋkaɣ “tɩlʋʋ toovenim tɔm” ­pɩtɩŋnɩ ­tɩ-kpɛlɩkʋʋ nɛ tɩ-yɔɔ ɖɔm yɔɔ. Ɛjaɖɛ kɩdɛkɛdɩyɛ ɖɩnɛ ɖɩ-taa, wezuu ŋgʋ ɛyaa yaɣ se wezuu kɩbaŋʋ yɔ, toovenim taa lɛ, kiileɖiɣ. Ðɩɩsɩŋ ɛzɩma pɩkaɣ wɛʋ nɛ ɛsɩndaa yɔ. (Yak. 4:​13, 14) Ye mbʋ pɩkɛɣnɩ lɔŋsɩnɖɛ se ɖɩwɛɛ nʋmɔʋ ŋgʋ kɩsɩɣnɩ-ɖʋ se ɖihiɣ “wezuu siŋŋ” pʋ-tɔbʋʋ se tamtam wezuu yɔ kɩ-taa. (1 Tim. 6:​19) Yehowa ɛɛkpaɣ-ɖʋ nɛ ɖoŋ se ɖɩɖɔ nʋmɔʋ ŋgʋ kɩ-taa. Ða pɩwɛɛ se ɖɩlɩzɩ. Ñɩnɩ ‘ña-kɩhɛyʋʋ’ Yehowa cɔlɔ. (Keɣa 15:5) “Kɩbam sakɩyɛ” mbʋ ɛha-ŋ yɔ, yele nɛ pɩmʋ ñɩm ñɛ-ɛsɩndaa. (Keɣa 103:5, nwt.) Nɛ taapɩtɩ kaaʋ se ɛkaɣ-ŋ haʋ “laŋhɛzɩyɛ” nɛ ‘taa leleŋ maatɛŋ.’​—Keɣa 15:11. w18.12 28 § 19, 21

Pɩwɛɛ se Krɩstʋ ñɩma tɩŋa ɩñaɣ pana nɛ paɖʋ hɩɖɛ nesi ɖɔkʋʋ ɛzɩ Yehowa nɛ Yesu palakʋʋ yɔ. Ɛlɛ nabʋyʋ taa pɩpɩzɩɣ nɛ pɩwɛɛ kaɖɛ se nabɛyɛ ɩla mbʋ, mbʋ pʋyɔɔ yɔ ɖɩtɩtalɩ pilim. (Roma 7:​18-​23) Pʋyɔɔ lɛ, pɩɩɖɩɣzɩɣ-ɖʋ se kajalaɣ pɩnzɩ mɩnʋʋ taa Krɩstʋ ñɩma ­kaakatɩ kala pe-nesi ɖɔkʋʋ taa. Pɔɔlɩ mawa se “halʋ ɛtaakʋyɩ ɛ-walʋ yɔɔ;” ɛlɛ hɔŋ nɩɩyɩ taa lɛ pɩɩlabɩ mbʋ. (1 Kɔr. 7:​10) Pɔɔlɩ tɩyɔɔdɩ mbʋ piyekaɣ nɛ nesi ɖɔkɩyaa nabɛyɛ yaɣ ɖama mbʋ yɔ pɩ-tɔm. Pɩtaakɛnɩ se abalʋ caɣ kʋzʋʋ kɩdɛkɛdʋʋ wezuu nɛ pɩhaɣ halʋ nʋmɔʋ se ekizi-i nɛ ɛɖaɣnɩ walʋʋ lɛlʋ. Pɔɔlɩ mawa se halʋ weyi ese ɛ-walʋ cɔlɔ yɔ, “ɛcaɣ mbʋ ɛtaawalɩ yaa ɛ nɛ ɛ-walʋ peceɣ.” Pɩwɩlɩɣ se Ɛsɔ ɛsɩndaa lɛ, pe-nesi ɖɔkʋʋ tɩsɩɩ tɩnaɣ. Pɔɔlɩ yɔɔdaa se paa kaɖɛ nɖɩ nesi ɖɔkɩyaa ɩkatɩɣ nɛ pa-taa nɔɔyʋ ɛtɩcaɣ kʋzʋʋ kɩdɛkɛdʋʋ wezuu yɔ, pɩwɛɛ se peceɣ. Pɩwɛɛ se pa-naalɛ peyele nɛ ɛgbɛyɛ taa ɛzʋtʋyaa tɩŋnɩ Bibl yɔɔ nɛ pasɩnɩ-wɛ. w18.12 13 § 14-​15

Sɔnɔ Ɛsɔ sɔɔlaa se taabalɩyɛ kɩbanɖɛ ɛwɛɛ ɛ nɛ ɛ-samaɣ pɛ-hɛkʋ taa nɛ kowolo pɩ-yɔɔ nɛ kala ko-ɖoŋ ɖeɖe tɔm susuu tʋmɩyɛ taa. (Mat. 28:19, 20; Yak. 4:8) Ɛyaa mba pɛwɛnɩ lɩmaɣza kɩbana yɔ, papɩzɩɣ nɛ pañaɣ pana se papadɩ-ɖʋ wezuu nʋmɔʋ ŋgʋ kɩ-taa ɖɩwɛɛ nɛ ɖɩɖɔŋ yɔ. Ðɩkpaɣ se ña-tʋmɩyɛ ñʋʋdʋ heyi-ŋ se ɛlɛɣzɩɣ-ŋ tʋmɩyɛ kɩfaɖɛ nɖɩ ɖɩ-taa ɛhɛyɩɣ-ŋ nɛ pɩkpaɖɩ yɔ. Ye tʋmɩyɛ nɖɩ ɖɩ-labʋ ɛmʋʋ ña-alɩwaatʋ ndʋ ŋlakɩnɩ fezuu taa tʋma yɔ, ɛzɩma ŋlakɩ? Yaa ɖɩkpaɣ se ŋkɛ sukulibɩɣa nɛ paha-ŋ waɖɛ se ŋyele ña-lʋlɩyaa nɛ ŋwolo ɖoli nɛ ŋtasɩ mʋʋ falɩsʋʋ nɛ pɩkpaɖɩ, ɛlɛ ŋhɛyɩɣ nabʋyʋ. Alɩwaatʋ ndʋ tɩ-taa pɩkaɣ pɔzʋʋ se ŋtɩmɩ, ŋñɩnɩ ɛgbɛyɛ takayɩsɩ taa, ŋyɔɔdɩnɩ lalaa nɛ pʋwayɩ ŋkpaɣ lɩmaɣza na? Pɩɩwɛɣ ɖeu se ŋkpɛlɩkɩ nɛ ŋtɩlɩ Yehowa lɩmaɣza tɔm ndʋ tɩ-yɔɔ lɛɛlɛɛyɔ nɛ ŋñaɣ pana nɛ ŋwɛɛnɩ ɛ-maɣzɩm yaa we? Ye ŋlabɩ mbʋ lɛɛlɛɛyɔ yɔ, pɩsɩɣnɩ-ŋ nɛ ye wiɖiyi paha-ŋ waɖɛ nɖɩ lɛ, ŋtɩlɩ se pɩkɛnɩ takɩm. Alɩwaatʋ ndʋ tɩ-taa lɛ, ŋtɛm sɩm kaɖʋsɩ nzɩ ŋwɛnɩ fezuu taa yɔ, ŋtɛm ña-tɩ tɔm sɛtʋʋ nɛ lɛɛlɛɛyɔ lɛ, pɩpɔzʋʋ se ŋñɔɔnɩ lɩmaɣzɩyɛ nɖɩ ŋtɛm kpaɣʋ nɛ pɩɖɛɛ yɔ. w18.11 27 § 18

Salomɔɔ kaakɛ evebu yem alɩwaatʋ ndʋ ɛpɩsɩ Izrayɛɛlɩ wiyaʋ yɔ. Ɛpaɣzɩ kewiyitu tɔɔʋ nɛ pitileɖi lɛ, Yehowa heyi-i ɖoziye naɖɩyɛ taa se: “Pɔzɩ mbʋ ŋsɔɔlaa yɔ nɛ mɛncɛlɩ-ŋ.” Salomɔɔ cosi se: “Mɛnkɛ pɩɣa taŋayʋ yem nɛ maasɩŋ ma-lɩʋ nɛ man-sʋʋ. . . . Mbʋ lɛ, ha ña-lɩmɖʋyʋ laŋɩyɛ nɖɩ ɖiwelisiɣ yɔ, nɛ ɛpɩzɩ ɛhʋʋnɩ ɛyaa samaɣ tɔm ɖeu.” (1 Aw. 3:​5-​10) Salomɔɔ kaapɔzʋʋ se paha-ɩ “laŋɩyɛ nɖɩ ɖiwelisiɣ yɔ,” pɩwɩlɩɣ se ɛɛwɛnɩ tɩ luzuu siŋŋ! Pʋyɔɔ lɛ, Yehowa kaasɔɔlɩ ɛ-tɔm pɩdɩɩfɛyɩ! (2 Sam. 12:24) Tɔm ndʋ Salomɔɔ cosaa yɔ tɩɩkɛdɩnɩ ɖɛ-Ɛsɔ Yehowa siŋŋ; pʋyɔɔ ɛlɛ ha-ɩ “laŋɩyɛ lɔŋ ñɩnɖɛ nɛ tɩlʋʋ.” (1 Aw. 3:​12) Alɩwaatʋ ndʋ tɩ-taa Salomɔɔ ɖɔkɩ e-siɣsiɣ wɛtʋ yɔ, ehiɣ wazasɩ sakɩyɛ. Paha-ɩ waɖɛ se ɛma templo ŋgʋ “[Yehowa] Izrayɛɛlɩ tɛ Ɛsɔ hɩɖɛ” wɛɣ kɩ-yɔɔ yɔ. (1 Aw. 8:​20) Ɛ-hɩɖɛ sɛ pɩdɩɩfɛyɩ, lɔŋsɩnɖɛ nɖɩ Ɛsɔ ha-ɩ yɔ ɖɩ-yɔɔ. Tɔm ndʋ Ɛsɔ fezuu kiɖeɖeu sɩnɩ-ɩ nɛ ɛyɔɔdɩ yɔ, pama-tʋ Bibl takayɩsɩ naadozo taa. Sɩ-taa nakɛyɛ lɛ Aduwa takayaɣ. w19.01 14 § 1-2

Nabɛyɛ tɩsɔɔlɩ se nɔɔyʋ eheyi-wɛ mbʋ pɩwɛɛ se pala yɔ yaa ɛwɛɛnɩ ɖoŋ pa-maɣzɩm yɔɔ. Pɔyɔɔdʋʋ se: “Ma pɩwɛɛ se mankpaɣ ma-lɩmaɣza.” Toovenim lɛ, pacaɣ pɔyɔɔdɩ se pa-maɣmaɣ pɩwɛɛ se pakpaɣ pa-lɩmaɣza nɛ wɛtʋ ndʋ tɩtɩwɛɛkɩ pʋyʋ. ­Patɩsɔɔlɩ se nɔɔyʋ eɖiyi-wɛ yaa nɔɔyʋ ­ɛwɛɛnɩ ɖoŋ ­pɛ-ɛyʋtʋ yɔɔ. Paa ɖɩñakɩ pana se ɖa-maɣzɩm ɛla nɔɔ kʋɖʋmaɣ nɛ ­Yehowa ñɩmbʋ yɔ, pɩtɩwɩlɩ se hɔɔlɩŋ nɩɩyɩ taa lɛ, ɖɩfɛyɩnɩ waɖɛ se ɖɩlɩzɩ mbʋ ɖa-maɣmaɣ ɖɩsɔɔlɩ labʋ yɔ. Ɛzɩ 2 Kɔrɛntɩ 3:​17 yɔɔdʋʋ yɔ, “ɖenɖe ­Yehowa fezuu wɛɛ yɔ, tɩ-yɔɔ wɛʋ wɛ peeɖe.” Ðɩwɛnɩ waɖɛ se ɖɩwɛɛnɩ ɛyʋtʋ ndʋ ɖa-maɣmaɣ ɖɩsɔɔlaa yɔ. Ðɩpɩzɩɣ nɛ ­ɖɩlɩzɩ mbʋ ɖɩsɔɔlɩ labʋ yaa mbʋ ­pɩkɛdɩnɩ-ɖʋ yɔ. Toovenim lɛ, Yehowa manɩ-ɖʋ mbʋ. Paa mbʋ yɔ, ɖa-tɩ yɔɔ wɛʋ mbʋ pɩwɛnɩ kamasɩ. (1 Pɩy. 2:​16) Mbʋ pɩkɛ kɩbam nɛ mbʋ pɩkɛ kɩdɛkɛdɩm yɔ pɩ-tɩlʋʋ nʋmɔʋ taa lɛ, Yehowa sɔɔlaa se ɖɩtɩŋnɩ Bibl yɔɔ nɛ ɖɩtɩlɩ ɛ-lɩmaɣza nɛ ɖiyele nɛ aɖiyi-ɖʋ. w18.11 19 § 5-6

Alɩwaatʋ ndʋ ɖɩtɩlɩ toovenim yɔ, ɖɩnɩ pɩ-taa se pɩtɩkɛ tomnaɣ yɔɔ ­won­du pɩwɛɛ se ɖɩsɩɩ kajalaɣ lone taa, ɛlɛ fezuu taa ñɩndʋ. Ða-taa kaawɛ leleŋ se ɖɩkpaɣ tomnaɣ yɔɔ ­won­du nɛ ɖɩlaa kɩlaŋ se pɩsa nɛ ɖɩɖɔ toovenim taa. Ɛlɛ alɩwaatʋ wɛɛ nɛ tɩɖɛɣ lɛ, pɩtɩla yɔ, ɖɩnaɣ lalaa wɛɛ nɛ payakɩ ­won­du kɩfatʋ nɛ pɛwɛɛnɩ ɖɔɖɔ tomnaɣ yɔɔ ñɩm lɛɛbʋ lɛ, pɩpɩzɩɣ nɛ pɩlabɩ-ɖʋ ɛzɩ pɩwɛɛ nɛ pɩɖɛɣ ɖɔ-yɔɔ yɔ. Ye ɖe-liu ɛɛtasɩɣ sɩbɩnʋʋ mbʋ ɖɩwɛɛna yɔ, piyeki nɛ ɖɩpaɣzɩ sɩʋ ñɩm ñɩnʋʋ kajalaɣ lone taa nɛ fezuu taa tʋma tɩŋɩɣ pɩ-wayɩ. Mbʋ kaatalɩnɩ Demaasɩ. Ɛɛwɛnɩ “ɛjaɖɛ yɔɔ cɩnɛ ñɩm kɔɖɛyɩ” yɔ, pʋyɔɔ eyebi apostoloo Pɔɔlɩ wayɩ tɩŋʋʋ se ɛ nɛ ɩ pala tʋmɩyɛ. Ɛbɛ yɔɔ Demaasɩ sewa nɛ eyele Pɔɔlɩ? Bibl tiheyi-ɖʋ ɖeyi ɖeyi mbʋ pʋyɔɔ yɔ, ɛlɛ pɩtɩla ɛɛsɔɔlɩ tomnaɣ yɔɔ ñɩm nɛ pɩkpaɖɩ fezuu taa tʋma yaa ɛtaasɔɔlɩ se ɛlaa kɩlaŋ weyi ɩhaɣ-ɩ nʋmɔʋ se ɛ nɛ Pɔɔlɩ pala tʋmɩyɛ yɔ. Pɩtʋʋ fɛyɩ se ɖa-taa nɔɔyʋ tɩsɔɔlɩ se eyele nɛ tomnaɣ yɔɔ ñɩm laɣzaɣ hɔmɩ-ɩ nɛ ɛlɩɩ toovenim taa. w18.11 10 § 9

Sataŋ cɛtɩm pʋnɛ pɩkɛnɩ kañatʋ lakasɩ siŋŋ mbʋ pʋyɔɔ yɔ, ɛna kpayɩ kpayɩ se ye Ɛva etisi ɛ-tɔm yɔɔ nɛ ɛtɔɔ tɩʋ piye nɖɩ yɔ, ɛkaɣ sɩbʋ. Aɖam nɛ Ɛva pamanɩ Yehowa paɣtʋ ndʋ tɩ-yɔɔ nɛ pɩkɔnɩ-wɛ sɩm. (Kiɖe 3:6; 5:5) Ɛlɛ pɩtɩsɩɩnɩ peeɖe, pɩtɩŋnɩ kɩdɛkɛdɩm mbʋ pɩ-yɔɔ lɛ, “sɩm wadɩ ɛyaa kpeekpe yɔɔ.” Toovenim lɛ, “sɩm tɔɔ kewiyitu,  . . . halɩ pɩtɔɔ kewiyitu mba patɩla kɩwɛɛkɩm ɛzɩ Aɖam manʋʋ paɣtʋ yɔɔ yɔ pɔ-yɔɔ.” (Roma 5:​12, 14) Lɛɛlɛɛyɔ, ɖenɖe ɛzɩ ɛyʋ kaatalɩ pilim nɛ ɛcaɣ wezuu tam tam ɛzɩ Ɛsɔ kaaɖʋʋ kiɖe tɛɛ yɔ lɛ, ɛyʋ wezuu caɣʋ ɖaɣlɩkɩŋ pɩsɩ pɩnzɩ 70 nɛ ye “pɩkɩlaa pɩŋŋ lɛ,” pɩnzɩ 80. Nɛ “kʋñɔŋ nɛ siziŋ” taa ɖɩwɛɛ. (Keɣa 89:10) Sataŋ cɛtɩm pʋnɛ pɩkɔnɩ asɛyʋʋ ŋgʋ yɔ, kɩ-wayɩ fɛyɩ! Yesu yɔɔdaɣ Sataŋ lakasɩ nzɩ sɩ-tɔm lɛ, ɛtɔm se: “Ɛtɩcaɣ toovenim taa, mbʋ pʋyɔɔ yɔ toovenim fɛyɩ ɛ-taa.” (Yoh. 8:​44) Halɩ nɛ sɔnɔ Sataŋ fɛyɩ tʋtʋyɛ tɔm taa mbʋ pʋyɔɔ yɔ eɖiɣni tɩŋnʋʋ cɛtɩm ndɩ ndɩ yɔɔ nɛ epeɣziɣ “tɛtʋ tɩŋa.” (Natʋ 12:9) Ðɩtɩsɔɔlɩ se Sataŋ epeɣzi-ɖʋ. w18.10 6-7 § 1-4

Mba pañakɩ pana se laŋhɛzɩyɛ ɛwɛɛ pa nɛ lalaa pɛ-hɛkʋ taa yɔ, pɛwɛnɩ toovenim se pɛwɛɛ koboyaɣ taa. Tɔm kpɛlɩkɩyʋ Yakubu mawa se: “Poɖuu siɣsiɣ wɛtʋ piye laŋhɛzɩyɛ taa, mba palakɩ laŋhɛzɩyɛ yɔ pɔ-yɔɔ.” (Yak. 3:​18) Alɩwaatʋ ndʋ tɔm kɔŋ ɖa nɛ ɛgbɛyɛ taa koobu nɔɔyʋ yaa ɖɔ-hɔʋ taa tʋ nɔɔyʋ ɖɛ-hɛkʋ taa yɔ, ɖɩpɩzɩɣ nɛ ɖɩpɔzɩ Yehowa se ɛsɩnɩ-ɖʋ nɛ ɖɩcɔnɩ ti-ɖeɖe laŋhɛzɩyɛ taa. Ye ɖɩlabɩ mbʋ yɔ, Yehowa fezuu kiɖeɖeu sɩɣnɩ-ɖʋ nɛ ɖɩla mbʋ pɩtʋʋzaa yɔ nɛ ɖihiɣ koboyaɣ. Yesu yɔɔdaa se pɩcɛyaa se ɖɩkpɛzɩ nɩŋgbaŋaɣ ŋga pɩpɔzʋʋ yɔ nɛ ɖiyele nɛ laŋhɛzɩyɛ wɛɛ. Ɛyɔɔdaa se: “Ye mbʋ, ye ŋɖiɣni wonuu ña-haɖɛ altaaru yɔɔ nɛ ŋtɔzɩ se ño-koobu taa wɛnɩ-ŋ nɛ natʋyʋ yɔ, yele ña-haɖɛ altaaru ɛsɩndaa peeɖe, nɛ ŋɖɛɛ. Kajalaɣ lɛ, ña nɛ ño-koobu iceɣ, nɛ pʋwayɩ lɛ ŋpɩsɩ ŋkɔɔ nɛ ŋha ña-haɖɛ.”​—Mat. 5:​23, 24. w18.09 21 § 17

Ðoo kɛdɛzaɣ ñɩna wena a-taa Yesu nɛ ɛ-tɔmkpɛlɩkɩyaa pekpeɣlaa yɔ, ɛyɔɔdɩ tam ɛzɩ 30 mbʋ yɔ se sɔɔlɩm tɔm cɛyɩ siŋŋ. Kɔzɩ kɔzɩ lɛ, ɛñɩɣ niye se pɩcɛyaa se ɛ-tɔmkpɛlɩkɩyaa “ɩsɔɔlɩ ɖama.” (Yoh. 15:​12, 17) Sɔɔlɩm mbʋ pɩwɛɣ pɛ-hɛkʋ taa yɔ, mbʋ kaɣnɩ wɩlʋʋ kpayɩ kpayɩ se mba kɛnɩ ɛ-wayɩ tɩŋɩyaa toovenim ñɩma. (Yoh. 13:​35) Pɩtɩkɛ yɔɔdʋʋ yem nɔɔ taa se ɖɩwɛnɩ sɔɔlɩm tɔm Yesu yɔɔdaɣ, ɛlɛ sɔɔlɩm mbʋ pɩwɛ ɖeu nɛ pɩkpaɖɩ nɛ piseɣtiɣ ɛyʋ se ɛlaa ɛ-tɩ lalaa yɔɔ yɔ, pɩ-tɔm ɛyɔɔdaɣ. Ɛyɔɔdaa se: “Nɔɔyʋ fɛyɩnɩ sɔɔlɩm nɛ pɩkɩlɩ pʋnɛ, se ɛyʋ ɛcɛlɩ e-wezuu ɛ-taabalaa yɔɔ. Ɩkɛ man-taabalaa ye ɩɖɔŋ paɣtʋ ndʋ manɖʋʋ-mɩ yɔ tɩ-yɔɔ yɔ.” (Yoh. 15:​13, 14) Sɔɔlɩm siŋŋ mbʋ Yehowa sɛyaa wɛnɩ sɔnɔ nɛ piseɣtiɣ-wɛ se paa sɩm papɩzɩɣ nɛ pasɩ po-koobiya yɔɔ nɛ nɔɔ kʋɖʋmaɣ ŋga kɛwɛ ɖɔɖɔ pɛ-hɛkʋ taa yɔ, pɩwɩlɩɣ kpayɩ kpayɩ se mba kɛnɩ Ɛsɔ samaɣ. (1 Yoh. 3:​10, 11) Ða Yehowa sɛyaa ɖa-taa wɛ leleŋ pɩdɩɩfɛyɩ se paa ɖɩlɩnɩ ajɛɛ ndɩ ndɩ taa, ɖɩyɔɔdʋʋ kʋnʋmɩŋ ndɩ ndɩ nɛ ɖɩwɛɛ ɖɔɖɔ wɛtʋ ndɩ ndɩ taa yɔ, ɖɩwɛɛ nɛ ɖɩwɩlɩɣ ɖama sɔɔlɩm siŋŋ mbʋ Yesu kaawɛna yɔ! w18.09 12 § 1-2

Yehowa sɔɔlaa se ɛ-sɛyaa ɩcɔnɩ pɔ-hɔʋ taa ñɩma yɔɔ. Pɩpɩzɩɣ nɛ pɩpɔzɩ se ŋla tʋmɩyɛ nɛ ŋsɩnɩ ñɔ-hɔʋ taa ñɩma liidiye hɔɔlʋʋ taa. Halaa sakɩyɛ ñacakɩ ɖɩsɩ nɛ pɔcɔŋnɩ pe-piya yɔɔ. Nɛ pɩpɩzɩɣ nɛ pɩpɔzɩ ɖɔɖɔ se piya nzɩ sɩpaɣlaa yɔ, sɩcɔnɩ sɩ-lʋlɩyaa mba pakpadɩyaa yɔ pɔ-yɔɔ. Tʋma ana a-tɩŋa a-tɔm cɛyaa. Ye mbʋ, ye ŋwɛnɩ sʋʋtʋ ndʋ yɔ, pɩkaɣ-ŋ wɛʋ kaɖɛ se ŋkpaɣ alɩwaatʋ sakɩyɛ nɛ ŋlabɩnɩ Teokrasɩ tʋma. Ɛlɛ taayele nɛ pitibi-ŋ yɔɔɔ! Ñɔ-hɔʋ yɔɔ cɔnʋʋ tɔm cɛyɩ siŋŋ nɛ pɩkɛnɩ tisuu wɩlʋʋ hɔɔlʋʋ nakʋyʋ nɛ pɩkɛnɩ ɖɔɖɔ nʋmɔʋ ŋgʋ kɩ-yɔɔ ŋtɩŋɩɣna nɛ ña nɛ Yehowa ɩlakɩ tʋmɩyɛ se ɛ-tamaɣ ɛla. (1 Kɔr. 10:31) Ye ŋfɛyɩnɩ hɔʋ yɔɔ cɔnʋʋ sʋʋtʋ yɔ, pɩɩwɛɣ ɖeu se ŋɖʋ nesi ño-koobiya Krɩstʋ ñɩma lalaa mba pɛkɛ kʋdɔndɩnaa, yaa akpadɩyaa yaa pɛwɛ kɩcɛyɩm nabʋyʋ taa yɔ? Pɩɩwɛɣ ɖeu se ŋcɔnɩ ñɛ-ɛgbɛyɛ taa nɛ ŋna mba pɩpɔzʋʋ se ŋɖʋ nesi yɔ? Alɩwaatʋ ndʋ ŋlakɩ mbʋ yɔ, pɩwɩlɩɣ se ña nɛ Yehowa ɩwɛɛ nɛ ɩlakɩ tʋmɩyɛ nɛ ŋsɩɣnɩ-ɩ se ecosi adɩma naayɛ yɔɔ.​—1 Kɔr. 10:24. w18.08 24 § 3, 5

Yosɛɛfʋ kaawɛnɩ ɛzɩ pɩnzɩ 17 mbʋ yɔ lɛ, ɛ-ɖalaa maɣmaɣ kpa-ɩ nɛ pɛpɛdɩ-ɩ nɛ ɛpɩsɩ yom mbʋ pʋyɔɔ yɔ ­papaɖaɣ-ɩ. Ɛnʋ pa-caa kaakɩlɩ sɔɔlʋʋ. (Kiɖe 37:​2-4, 23-​28) Yosɛɛfʋ kaawɛ yomiye taa Ejipiti nɛ pɔtɔ-ɩ salaka peeɖe pɩnzɩ 13 mbʋ yɔ. Eeposini ɛ-caa kʋsɔɔlʋ Yakɔɔb ɖɔɖɔ. Ɛbɛ sɩnɩ Yosɛɛfʋ nɛ ɛtɩkɔ pana nɛ ɛtɩlɔ ɖɔɖɔ lidaʋ? Alɩwaatʋ ndʋ Yosɛɛfʋ tɔkaɣ kʋñɔŋ salaka taa yɔ, pɩtʋʋ fɛyɩ se ɛɛkam ɛ-lɩmaɣza ɛzɩma Yehowa wazɩ-ɩ yɔ, pɩ-yɔɔ. (Kiɖe 39:21; Keɣa 104:​17-​19) Natʋ tɔm ndʋ Yehowa kaawɩlɩ-ɩ alɩwaatʋ ndʋ ɛɛkɛ pɩɣa evelaɣ yɔ, tɩsɩnɩ-ɩ ɖɔɖɔ nɛ ɛ-taa tɛ se ɛ-tɔm kɛdɩnɩ Ɛsɔ. (Kiɖe 37:​5-​11) Pɩtʋʋ fɛyɩ se ɛtɩmaɣnɩ Yehowa tam sakɩyɛ nɛ eheyiɣ-i wɩzasɩ nzɩ sɩ-taa ɛɛwɛɛ yɔ. (Keɣa 144:18) Yehowa cosi adɩma wena Yosɛɛfʋ labɩnɩ ɛ-laŋɩyɛ pilim yɔ a-yɔɔ nɛ ɛsɩnɩ-ɩ nɛ ɛ-taa tɛ se ‘ɛwɛ ɛ-cɔlɔ’ ɛ-kʋñɔmɩŋ kpeekpe taa. w18.10 28 § 3-4

Tomnaɣ yɔɔ ñɩm kɛ wɛtʋ ndʋ tɩpɩzɩɣ nɛ tɩwɛɛnɩ ɖoŋ lɩmaɣza wena ɖɩwɛnɩ lalaa yɔɔ yɔ a-yɔɔ yɔ. Ɛlɛ ɛzɩma ñɩm mbʋ nɔɔyʋ wɛna yaa ɛzɩma ɛkɛ kʋñɔndʋ yɔ, pɩpɩzɩɣ nɛ pɩwɛɛnɩ ɖoŋ lɩmaɣza wena ɖɩwɛnɩ ɛ-yɔɔ yɔ a-yɔɔ? Pɩtɩŋnɩ fezuu kiɖeɖeu yɔɔ lɛ, Salomɔɔ yɔɔdɩ wɛtʋ ndʋ pɩtɩmʋna se ɖɩwɛɛna yɔ tɩ-taa natʋyʋ tɔm sɔnɔ evemiye mayaɣ taa. Pɩwɛ kɛlɛʋ se ɖa ɛyaa ­mantɩtalɩ pilimwaa ɖɩwɛɛnɩ-tʋ. ­Eduuye ɖɩnɛ, lɔŋ weyi ɖɩkpɛlɩkɩɣ-ɖʋ? Ye ɖɩtɩtɩlɩ labʋ yɔ, pɩwɛɣ kɛlɛʋ se ɖɩsɔɔlɩ koobiya mba pɛwɛnɩ ñɩm yɔ, pa-taabalɩyɛ nɛ ɖa paa ɛɛwɛɣnɩ koobiya mba pɛfɛyɩnɩ ñɩm yɔ. Ɛbɛ yɔɔ pɩfɛyɩ ɖeu se ­ɖɩmaɣzɩ se mba pɛwɛnɩ ñɩm yɔ ­pakpaɖɩ ɖeu mba pɛkɛ kʋñɔndɩnaa yɔ? Mbʋ pʋyɔɔ yɔ, ye ɖɩcɔŋnɩ ñɩm mbʋ ­lalaa wɛna yɔ nɛ ɖɩɖʋʋ-wɛ nɛ ­taabalɩyɛ yɔ, pɩkɔŋnɩ tayʋʋ ɛgbɛyɛ taa. Yesu tɔm ­kpɛlɩkɩyʋ Yakubu heyiɣ-ɖʋ se wɛtʋ ndʋ ­tɩɩkɔnɩ tayʋʋ kajalaɣ Krɩstʋ ñɩma hɛkʋ taa. (Yak. 2:​1-4) Pʋyɔɔ lɛ, ­pɩcɛyaa se ɖɩcaɣnɩ ɖɛ-ɛsa nɛ kaɖɛ nɖɩ ɖɩtaatasɩ kɔm Krɩstʋ ɛgbɛyɛ taa sɔnɔ, ɖɩtaacɔŋnɩ mbʋ pɩnaɣ ɛsa yɔɔ yem yɔ nɛ ɖɩhʋʋnɩ lalaa tɔm. w18.08 10 § 8-​10

Ɛzɩma ɖɩnɩɣnɩ ɖo-koobiya yɔ, mbʋ wɩlɩɣna se taabalɩyɛ kɩbanɖɛ nɖɩ ɖɩwɛ ɖa nɛ Yehowa ɖɛ-hɛkʋ taa yɔ, ɖɩcɛyɩ ɖɛ-ɛsɩndaa yaa ɖɩtɩcɛyɩ. Ðo-koobiya mba ɖɔɖɔ pɛkɛ Yehowa pʋyʋ. Ye ɖɩtɔzʋʋ tɔm ndʋ tɩ-yɔɔ paa ɛzɩmtaa yɔ, piyeki nɛ ɖɩwɩlɩ ɖo-koobiya sɔɔlɩm nɛ ɖɩlabɩ-wɛ camɩyɛ lakasɩ. (1 Tes. 5:​15) Yesu heyi ɛ-wayɩ tɩŋɩyaa se: “Pʋnɛ piyekina se ɛyaa tɩŋa ɩtɩlɩ se ɩkɛ mɔn-tɔmkpɛlɩkɩyaa—ye sɔɔlɩm ɛwɛ mɩ-hɛkʋ taa yɔ.” (Yoh. 13:35) Malakiya yɔɔdaa se Yehowa ‘kemsiɣ nɛ ɛnɩɣ’ mbʋ payɩ ɛ-samaɣ taa ñɩma lakɩ ɖama yɔ. (Mal. 3:​16) Pɩwɩlɩɣ se “Yehowa sɩm mba pɛkɛ ɛ-ñɩma yɔ.” (2 Tim. 2:​19) Ɛsɩm tɔm ndʋ payɩ ɖɩyɔɔdʋʋ nɛ mbʋ payɩ ɖɩlakɩ yɔ. (Ebr. 4:​13) Ye ɖɩɩlakɩ ɖo-koobiya camɩyɛ lakasɩ ɛzɩ pɩpɔzʋʋ yɔ, Yehowa ‘kemsiɣ nɛ ɛnɩɣ.’ Mbʋ ɖɔɖɔ alɩwaatʋ ndʋ ɖɩmʋʋ agɔma, ɖɩlakɩ kʋjɔŋ, ɖikpeɣu, nɛ ɖɩlakɩ ɖo-koobiya camɩyɛ lakasɩ yɔ, Yehowa naɣ pɩtɩŋa.​—Ebr. 13:16. w18.07 26 § 15, 17

Pɩwɛ ɖeu pɩdɩɩfɛyɩ se ɛyʋ ɛñɔɔnɩ Yehowa kpam. Nɔɔyʋ fɛyɩnɩ ɖoŋ, lɛɣtʋ nɛ sɔɔlɩm nɛ pɩtalɩ ɖɛ-Ɛsɔ! Ða-taa anɩ tɩsɔɔlɩ se ɛwɛɛ ɛ-hɔɔlʋʋ yɔɔ? (Keɣa 95:​4-6) Paa mbʋ yɔ, kala naayɛ taa lɛ, Ɛsɔ sɛyaa nabɛyɛ tɩpɩzɩ nɛ pala mbʋ. Maɣzɩ Kayɩnɩ kɩɖaʋ yɔɔ nɛ ŋna. Ɛtɩyɔɔdɩ se ɛsɛɣ Ɛsɔ nɔɔyʋ nɛ pɩtasɩnɩ Yehowa. Paa mbʋ yɔ, Yehowa tɩmʋ ɛ-sɛtʋ. Ɛsɔ kaana wɛtʋ kɩdɛkɛdɩtʋ natʋyʋ ɛ-laŋɩyɛ taa. (1 Yoh. 3:​12) Peeɖe Yehowa heyi-i se: “Ye ña-taa ɛwɛ ɖeu, ŋŋkʋsʋʋ ña-ñʋʋ? Ɛlɛ ye ña-taa ɛfɛyɩ ɖeu kɔyɔ, kɩwɛɛkɩm wɛ ñɔ-nɔnɔɔ taa, pi-liu tɛɛ kɔtʋʋnɩ-ŋ, nɛ pɩwɛnɩ-ŋ se ŋñazɩ-pʋ.” (Kiɖe 4:​6, 7) Tobi lɛ, Yehowa kaawɛɛ nɛ eheyiɣ ­Kayɩnɩ se: “Ye ŋlɛɣzɩ ñɛ-wɛtʋ nɛ ŋwɛɛ mɔ-hɔɔlʋʋ yɔɔ yɔ, ma ɖɔɖɔ mɛwɛɣ ñɔ-hɔɔlʋʋ yɔɔ.” Ɛlɛ Kayɩnɩ tɩmʋ ­Yehowa lɔŋ tasʋʋ. w18.07 17 § 1, 3; 18 § 4

Nʋmɔʋ ŋgʋ kɩ-yɔɔ ɖɩtɩŋɩɣna nɛ ɖiyele nɛ ɖa-mintʋsʋʋ ñandɩ yɔ, ŋgʋ lɛ alɩwaatʋ ndʋ ɖisusuu ɛyaa tɔm kɩbandʋ nɛ ɖɩpɩsɩɣ-wɛ tɔm mʋyaa yɔ. (Mat. 28:19, 20) Pɩtasɩ lɛ, ɖɩpɩzɩɣ nɛ ɖɩtɩŋna wezuu ŋgʋ ɖɩcakɩ nɛ kɩlakɩ nɔɔ kʋɖʋmaɣ nɛ Krɩstʋ paɣtʋ yɔ kɩ-yɔɔ nɛ ɖɩsa Yehowa. Mba ɖisusuu tɔm kpaɣ ɖɩɣa nɛ ŋwolo ɖɩɣa nɛ mba panaɣ-ɖʋ tɔm susuu taa yɔ, pɔcɔŋnɩ ɖɛ-wɛtʋ. Ɛzɩma ɖɩmʋʋyʋʋ nɛ ɖɩsɛɣ ɛyaa nɛ nɔɔ kɩbaŋa yɔ, pɩwɩlɩɣ-wɛ mba ɖɩkɛnaa nɛ Ɛsɔ weyi ɖɩsɛɣ yɔ. Yesu heyi ɛ-tɔm mʋyaa se: “Ɩsʋ ɖɩɣa ŋga ka-taa lɛ, ɩsɛɛ-kɛ.” (Mat. 10:12) Lone nɖɩ ɖɩ-taa Yesu nɛ e-apostoloowaa posusaɣ tɔm ɖoŋ ɖoŋ yɔ, peeɖe ñɩma kaasɔɔlɩ agɔma mʋʋ pa-ɖɩsɩ taa. Sɔnɔ pɩfɛyɩ mbʋ lona sakɩyɛ taa. Ɛlɛ, ŋŋheyiɣ ɖɩɣdʋ mbʋ pɩ-yɔɔ ŋwoba yɔ lɛ, ye ŋwɛnɩ wɛtʋ kɩbandʋ yɔ, pɩpɩzɩɣ nɛ pɩhɛzɩ ɛ-laŋɩyɛ yaa piyele nɛ ɛtaamʋ pana. Amʋʋya pɩzɩɣ piyele nɛ kɛdaɣ paɣzɩ camɩyɛ. Tɔm tʋnɛ tɩkɛ toovenim kɔzɩ kɔzɩ koobiya mba posusuu tɔm nɛ présentoire waa yɔ pɔ-hɔɔlʋʋ taa. Ŋkaɣ naʋ se ɛzɩma ŋmʋʋyʋʋnɩ ɛyaa nɛ ŋsɛɣ-wɛ nɛ nɔɔ kɩbaŋa yɔ, piyeki nɛ pewelisini-ŋ. w18.06 22 § 4-5

Apostoloo Pɩyɛɛrɩ kaasɔɔlɩ ñɔtɩnʋʋ Yuuda ñɩma ɖeke. Ɛlɛ Ɛsɔ lɩzaa nɛ ɛwɩlɩ kpayɩ kpayɩ se pɩtɩpɔzɩ se Krɩstʋ ñɩma ɩɖʋ tʋkaɣ ɛyaa hɛkʋ taa nɛ pɩtɛ lɛ, Pɩyɛɛrɩ susi tɔm Roma sɔɔja weyi payaɣ se Kɔɔrnɛɛyɩ yɔ. (Tʋma 10:28, 35) Kpaɣnɩ mbʋ lɛ, Pɩyɛɛrɩ paɣzɩ taabalɩyɛ ɖʋʋ nɛ sɩɩnaa layaa mba papɩsɩ koobiya yɔ nɛ ɛ nɛ wɛ pɔtɔkɩ tɔɔnaɣ. Ɛlɛ pɩnzɩ cabɩ wayɩ Pɩyɛɛrɩ wobi Antɩyɔɔsɩ tɛtʋ taa lɛ, ekizi se ɛ nɛ Krɩstʋ ñɩma mba patɩkɛ Yuuda ñɩma yɔ pataatɔɔ tɔɔnaɣ. (Gal. 2:​11-​14) Peeɖe Pɔɔlɩ kalɩ-ɩ nɛ ɛtasɩ-ɩ lɔŋ, nɛ pɩtʋʋ fɛyɩ se ɛmʋ lɔŋ tasʋʋ mbʋ. Pʋyɔɔ alɩwaatʋ ndʋ ɛmaɣaɣ ɛ-takayaɣ kajalaɣ ñɩŋga Aazii Cikpeluu taa koobiya Yuuda ñɩma nɛ sɩɩnaa layaa mba papɩsɩ Krɩstʋ ñɩma yɔ lɛ, ɛyɔɔdɩ ɛzɩma pɩwɛɛ se pɔsɔɔlɩ koobiya kpeekpe yɔ pɩ-tɔm. (1 Pɩy. 1:1; 2:​17) Toovenim taa lɛ, apostoloowaa kpɛlɩkɩ lɔŋ sakɩyɛ Yesu cɔlɔ, se pɩwɛɛ se pɔsɔɔlɩ “ɛyaa ndɩ ndɩ.” (Yoh. 12:32; 1 Tim. 4:10) Paa pɩkpaɣ alɩwaatʋ yɔ, pɛlɛɣzɩ lɩmaɣza kɩdɛkɛda wena paawɛnɩ ɛyaa yɔɔ yɔ. Kajalaɣ Krɩstʋ ñɩma su“ɛyʋtʋ kɩfatʋ,” mbʋ yebina nɛ peɖiɣzina se ɛyaa kpeekpe wɛ kɩmaŋ Ɛsɔ ɛsɩndaa.​—Kol. 3:​10, 11. w18.06 11 § 15-​16

You ­won­du ndʋ Roma sɔɔjanaa suwaɣ kajalaɣ pɩnzɩ mɩnʋʋ taa yɔ palabɩ tɩ-taa nakʋyʋ nɛ kihuuzuu sɔɔja lotu yɔɔ nɛ e-tomnaɣ hayo kiŋ hɔɔlɩŋ lɛɛŋ yɔɔ. Wonuu ŋgʋ palabɩ-kʋ nɛ ñɩɣtʋ. Ɛzɩma sɔɔja ñɔɔzʋʋ ɛ-tɩ yɔ, pɩpɔzʋʋ se ɖoŋ ɖoŋ lɛ, ɛcɔna nɛ ɛna se ­won­du ndʋ pɔhɔkaa yɔ, tɩcɛyɩ camɩyɛ se tɩpɩzɩ nɛ tɩkandɩyɩ ɛ-laŋɩyɛ nɛ kaɖɛ lona lɛɛna yɔɔ. Kɩɖaʋ kʋnɛ kɩmʋnɩ ɖeyi ɖeyi ɛzɩma Yehowa paɣtʋ kila pɩzɩɣ nɛ akandɩyɩ ɖa-laŋɩyɛ yɔɔ yɔ, pʋ-tɔbʋʋ se akandɩyɩ ɖɔ-yɔɔ fezuu taa yɔ. (Adu. 4:​23) Ɛzɩma pɩtɩpɔzɩ se sɔɔja ɛlɛɣzɩ wonuu ŋgʋ palabɩ-kʋ nɛ ñɩɣtʋ ɖoŋ ñɩndʋ yɔ ki-lone taa wonuu ŋgʋ palabɩnɩ ñɩɣtʋ ndʋ tɩfɛyɩ ɖoŋ yɔ, mbʋ ɖɔɖɔ pɩtɩpɔzɩ kpa se ɖɩlɛɣzɩ Yehowa paɣtʋ kila lone taa ɖa-maɣmaɣ ɖa-ñɩna. Ɛzɩma ɖɩtɩtalɩ pilim yɔ pʋyɔɔ lɛ, ɖa-maɣmaɣ ɖɩɩpɩzɩɣ nɛ ɖɩtɩlɩ mbʋ ɖɩla nɛ ɖihiɣ yɔɔ huuzuu yɔ. (Adu. 3:​5, 6) Ɛlɛ paa ɛzɩmtaa lɛ, pɩwɛɛ se ɖɩmaɣzɩ nɛ ɖɩna se you ­won­du ndʋ Yehowa ha-ɖʋ se pɩkandɩyɩ ɖɔ-yɔɔ yɔ, ɖisu-tʋ ɖo-tomnaɣ yɔɔ camɩyɛ na. Nɛ ye ɖɩsɔɔlɩ toovenim tɔm nɛ pɩkpaɖɩ yɔ, pɩwɛɣ-ɖʋ kɛlɛʋ se ɖɩpaa “tɔŋ” pʋ-tɔbʋʋ se ɖɩɖɔ Ɛsɔ paɣtʋ kila yɔɔ.​—Keɣa 110:​7, 8; 1 Yoh. 5:3. w18.05 28 § 3-4, 6-7

Paa Moyizi eeɖiyi Izrayɛɛlɩ piya alɩwaatʋ sakɩyɛ nɛ ɛtɩñɩnɩ ɛ-maɣmaɣ ɛ-kɛzɛɣa yɔ, sɩɩwɛɛ nɛ simidiɣ sɩ-mɔɔŋ tɛɛ. Pɩtɩkɛ lɩm kɛdɛɖaɣ yɔɔ ɖeke simidaɣ sɩ-mɔɔŋ tɛɛ, ɛlɛ Moyizi ɖɔɖɔ simidaɣnɩ sɩ-mɔɔŋ tɛɛ. Sɩ-lakasɩ taa lɛ, pɩɩwɛ ɛzɩ Moyizi kaayebina nɛ lɔkɔtʋ ɖɛɛ-sɩ yɔ. (Kɩg. 20:​1-5, 9-​11) Moyizi mʋ pana siŋŋ nɛ elesi hɛɛɛ wɛtʋ ndʋ ɛɛwɛna yɔ. Ɛtɩyɔɔdɩnɩ kaaʋ nɛ tisuu ɛzɩ Yehowa ɖʋʋ-ɩ paɣtʋ yɔ, ɛlɛ ɛyɔɔdɩnɩ samaɣ nɛ pana nɛ ɛwɩlɩ se ɛpɩzɩɣ nɛ ɛla piti lakasɩ. Pʋwayɩ lɛ, ɛma kaaʋ tam nabʋlɛ nɛ lɩm lɩɩ. Tɩ kpazʋʋ nɛ pana tuzi-i nɛ ɛla kɩwɛɛkɩm sɔsɔm. (Keɣa 105:32, 33) Ɛzɩma Moyizi tɩpɩzɩ nɛ eluzi ɛ-tɩ alɩwaatʋ ndʋ tɩ-taa yɔ pʋyɔɔ lɛ, patɩha-ɩ nʋmɔʋ se ɛsʋʋ Lidaʋ Tɛtʋ taa. (Kɩg. 20:12) Kɩɖaʋ kʋnɛ kɩkpɛlɩkɩɣ-ɖʋ lɔŋ kɩbaŋ nɩɩyɩ. Kajalaɣ lɛ, pɩwɛɛ se ɖɩñaɣ pana nɛ ɖɩwɛɛnɩ tɩ luzuu paa ɛzɩmtaa. Ye ɖɩlabɩ kaakendu alɩwaatʋ pazɩ yɔ, tɩ kpazʋʋ pɩzɩɣ nɛ pɩñɔ ɖa-taa nɛ piyele nɛ ɖɩyɔɔdɩ kɩmɛlɛndʋ tɔm yaa ɖɩla mbʋ pɩtɩmʋna yɔ. Nabʋlɛ lɛ, alɩwaatʋ ndʋ ɖɩwɛɣ nɩɣzɛ taa yɔ, pɩpɩzɩɣ nɛ pɩwɛɛ-ɖʋ kaɖɛ se ɖɩwɛɛnɩ tɩ luzuu. Pʋyɔɔ lɛ, pɩwɛɛ se ɖɩñakɩ pana tam se ɖɩwɛɛnɩ tɩ luzuu, halɩ pɩkpɛndɩnɩ alɩwaatʋ ndʋ ɖɩkatɩɣ kaɖɛ naɖɩyɛ yɔ. w19.02 12-​13 § 19-​21

Paɣtʋ ndʋ Yesu ɖʋwa se posusi tɔm yɔ, tɩkaɣ kɛnʋʋ sʋʋtʋ na? Aayɩ. Ɛyɔɔdɩ viiñi kɩɖaʋ tɔm nɛ pɩtɛ lɛ, ɛsɔzɩ se Kewiyaɣ tɔm susuyaa kaɣ hiɣu taa leleŋ. (Yoh. 15:11) Ɛlɩzɩ pɩ-taa se ɖɩkaɣ wɛnʋʋ taa leleŋ weyi ɛwɛna yɔ. Ɛzɩma tɩyɛ? Yesu kpaɣ ɛ-tɩ nɛ ɛmaɣzɩnɩ viiñi tɩʋ nɛ ɛkpaɣ ɛ-tɔm mʋyaa nɛ ɛmaɣzɩnɩ pilinzi. (Yoh. 15:5) Viiñi tɩʋ yɔɔ pilinzi lɩɣ. Alɩwaatʋ ndʋ pilinzi ñɔʋnɩ viiñi tɩʋ kpam yɔ, sihikiɣ lɩm nɛ tɔɔnaɣ ŋga kɛwɛɣ tɩʋ taa yɔ. Mbʋ ɖɔɖɔ ye ɖiwobi pɩ-yɔɔ nɛ ɖɩla nɔɔ kʋɖʋmaɣ nɛ Krɩstʋ nɛ ɖɩɖɔŋ ɛ-nɩŋgbanzɩ taa yɔ, ɖɩkaɣ hiɣu taa leleŋ weyi ehiɣ ɛ-Caa sɔɔlɩm labʋ taa yɔ. (Yoh. 4:​34; 17:13; 1 Pɩy. 2:​21) Hanne kɛʋ nʋmɔʋ lɩzɩyʋ yɔ pɩcɛzɩ pɩnzɩ 40 yɔ; ɛyɔɔdaa se: “Taa leleŋ weyi mehikiɣ alɩwaatʋ ndʋ mɛntɛŋ tɔm susuu paa ɛzɩmtaa yɔ, piseɣti-m se mowolo pɩ-yɔɔ nɛ mala Yehowa tʋmɩyɛ.” Toovenim, taa leleŋ weyi ɖihikiɣ yɔ, ɩkpazɩɣ-ɖʋ ɖoŋ se ɖiwolo pɩ-yɔɔ nɛ ɖisusi tɔm halɩ pɩkpɛndɩnɩ ageeta wena a-taa paamʋʋ ɖɔ-tɔm yɔ.​—Mat. 5:​10-​12. w18.05 17 § 2; 20 § 14

Pɩtɩla kajalaɣ pɩnzɩ mɩnʋʋ taa apostoloo weyi ɛkɩlɩ kpazʋʋ ɖoŋ e-koobiya yɔ, ɛnʋ lɛ Pɔɔlɩ. Fezuu kiɖeɖeu ɖiyi-i se esusi tɔm Grɛɛkɩ nɛ Roma ajɛɛ taa ñɩma mba paba sɛɣaɣ ɛsɔnaa sakɩyɛ yɔ. (Gal. 2:​7-9) Pɔɔlɩ ɖɔm nʋmɔʋ nɛ ewolo poliŋ ajɛɛ wena payaɣ sɔnɔ se Turkii, Grɛɛsɩ nɛ Itaalii yɔ a-taa; nɛ ɛɖʋ Krɩstʋ agbaa kɩfana, sɩɩnaa layaa ajɛɛ ana a-taa. Krɩstʋ ñɩma kɩfama mba ‘panɩ siziŋ pɛ-tɛ mba nesi tɛɛ’ nɛ pɩɩpɔzaa se pakpazɩ-wɛ ɖoŋ. (1 Tes. 2:​14) Pɩtalɩ pɩnaɣ 50 mbʋ yɔ lɛ, Pɔɔlɩ ma takayaɣ ɛgbɛyɛ kɩfaɖɛ nɖɩ ɖɩwɛ Tesalooniiki yɔ nɛ ɛyɔɔdɩ se: “Ðɩsɛɣ Ɛsɔ paa ɛzɩmtaa se ɛlabaɣ lɛ alɩwaatʋ ndʋ ɖɩtɔzʋʋ mɩ-yɔɔ ɖa-adɩma taa yɔ, mbʋ pʋyɔɔ yɔ ɖɩtɔzʋʋ kaahɛzaɣ mɩ-tʋmɩyɛ siɣsiɣ ñɩnɖɛ yɔɔ, mɩ-sɔɔlɩm tʋmɩyɛ yɔɔ, nɛ mɩ-laŋɩyɛ ɖɔkʋʋ . . . yɔɔ.” (1 Tes. 1:​2, 3) Eseɣti-wɛ se pakpazɩ ɖama ɖoŋ nɛ ɛyɔɔdɩ se: “Iwolo pɩ-yɔɔ nɛ iseɣti ɖama nɛ ɩkpazɩ ɖama ɖoŋ.”​—1 Tes. 5:​11. w18.04 18-19 § 16-17

Pɩɣa evelaɣ ŋga kɔsɔɔlaa se kɔ-tɔm ɛkɛdɩnɩ Yehowa yɔ kaaleɣyiɣni tɔm susuu tʋmɩyɛ. Ɛzɩma pɩcɛyaa se ɖɩla tɔm susuu tʋmɩyɛ kpɛdɛyɛ yɔ pʋyɔɔ lɛ, tʋmɩyɛ nɖɩ pɩwɛɛ se ɖɩsɩɩ kajalaɣ lone taa ɖe-wezuu caɣʋ taa. Ŋpɩzɩɣ nɛ ŋɖʋ ña-tɩ kaɖʋwa nɛ ŋsusuu tɔm ɖoŋ ɖoŋ nɛ pɩkpaɖɩ? Ŋpɩzɩɣ nɛ ŋla nʋmɔʋ lɩzʋʋ tʋmɩyɛ na? Nɛ ye tɔm susuu ɛɛhaɣ-ŋ taa leleŋ siŋŋ? Ɛbɛ ŋpɩzɩɣ ŋla nɛ ŋwɛɛ niye camɩyɛ tɔm susuu taa? Ye ŋlabɩnɩ tʋmɩyɛ lɔŋ tasʋʋ pʋnɛ pɩ-naalɛ yɔ pɩsɩɣnɩ-ŋ: Kajalaɣ lɛ, ñɔɔzɩ ña-tɩ camɩyɛ, nɛ nabʋlɛ lɛ, pɩtaalabɩ-ŋ feendu se ŋheyi lalaa tɔm ndʋ ŋsɩma yɔ. Halɩ ŋpaɣzɩɣ hiɣu taa leleŋ siŋŋ tɔm susuu tʋmɩyɛ taa nɛ pɩkaɣ-ŋ ɖɩɣzʋʋ. Ŋpɩzɩɣ nɛ ŋpaɣzɩnɩ ñɩnʋʋ nɛ ŋna se tɔm ndʋ ña-taabalaa pɔzʋʋ-ŋ sukuli taa yɔ, ɛzɩma ŋpɩzɩɣ nɛ ŋcosi tɩ-yɔɔ. Pɩtɩla pɔpɔzɩ-ŋ se: “Ɛbɛ yɔɔ ŋtisiɣ Ɛsɔ yɔɔ?” Ye ŋwobi jw.org yɔɔ yɔ, paɖʋ tɔm ñʋŋ nɩɩyɩ se pɩsɩnɩ piya evelisi nɛ sɩ-maɣmaɣ sɩñɔɔzɩ tɔm ndʋ sɩpɩzɩɣ nɛ sɩkpaɣ nɛ sicosini tɔm pɔzʋʋ pʋnɛ pɩ-yɔɔ yɔ. Ŋnaɣ peeɖe tɔm ñʋʋ “Pourquoi est-ce que je crois en Dieu?” Tɔm ñʋʋ ŋgʋ kɩkaɣ-ŋ sɩnʋʋ nɛ ña-maɣmaɣ ŋñɔɔzɩ tɔm ndʋ pɩwɛɛ se ŋcosi yɔ. w18.04 27 § 10-11

Paa Aɖam nɛ Ɛva paawɛ pa-tɩ yɔɔ hɔɔlɩŋ ndɩ ndɩ taa yɔ, pa-tɩ yɔɔ wɛʋ kaawɛnɩ kamaɣ. Pɩsa nɛ pɛwɛɛ wezuu lɛ, pɩɩwɛɛ se pefezi, pɔtɔɔ tɔɔnaɣ nɛ poɖoo. Ɛzɩ pɩ-labʋ yeba nɛ pɩwɛɛ-wɛ ɛzɩ pɛfɛyɩ pa-tɩ yɔɔ yɔ? Aayɩ, mbʋ pʋyɔɔ yɔ Yehowa nawa se alɩwaatʋ ndʋ palakɩ mbʋ yɔ, pehikiɣ taa leleŋ nɛ pɛɛyɛ. (Keɣa 103:​14, 15; Ekl. 3:​12, 13) Yehowa ɖʋ paɣtʋ Aɖam nɛ Ɛva se palʋlɩ nɛ posu tɛtʋ yɔɔ nɛ pɔcɔnɩ tɩ-yɔɔ camɩyɛ. Paɣtʋ tʋnɛ tɩ-yɔɔ lɛ, ɖɩpɩzɩɣ nɛ ɖɩyɔɔdɩ se Ɛsɔ tʋʋ waɖɛ nɖɩ ɛɛha-wɛ yɔ ɖɩ-yɔɔ yaa we? Aayɩ. Ɛsɔ ɖʋ paɣtʋ tʋnɛ se pɩha waɖɛ ɛyaa nɛ paɖʋ nesi tamaɣ ŋga ɛɛlaba yɔ. Ŋga lɛ se ɛyaa mba patalɩ pilim yɔ, posu ɛjaɖɛ kpeekpe yɔɔ nɛ tɛtʋ kpeekpe pɩsɩ paradisuu nɛ pacaɣ tɩ-yɔɔ tam. (Keɣa 126:⁠3; Iza. 45:18) Aɖam nɛ Ɛva papɩzaɣ se pehiɣ taa leleŋ nɛ koboyaɣ pɔ-hɔʋ taa tam. w18.04 4-5 § 7-8

Ye ɖɩɖʋʋ suuɖu tɔm susuu taa yɔ, ɖɩɩkaɣ ɖaŋʋʋ se mba ɖisusuu-wɛ tɔm yɔ, panɩɩ Bibl taa toovenim tɔm taa yaa petisi tɩ-yɔɔ kpaagbaa kɩyakʋ ŋgʋ pewelisiɣ-tʋ yɔ. Ɛlɛ lalaa siziŋ nɩʋ seɣtiɣ-ɖʋ se ɖɩsɩnɩ-wɛ nɛ pakpaɣ alɩwaatʋ nɛ pamaɣzɩ ndʋ Bibl wɩlɩɣ yɔ tɩ-yɔɔ camɩyɛ. Iyele nɛ ɖɩna ɛzɩma ɖɩpɩzɩɣ nɛ ɖɩsɩnɩ nɔɔyʋ nɛ etisi se Ɛsɔ labɩ tamaɣ se ɛyaa kaɣ caɣʋ wezuu tamtam paradisuu taa tɛtʋ yɔɔ yɔ. Ɛyaa mba pasɩm wɩlɩtʋ ndʋ tɩ-yɔɔ tɔm pazɩ yaa paatɩɩsɩŋ natʋyʋ tɩ-yɔɔ yɔ, pɔɖɔ sakɩyɛ. Pɩtɩla pamaɣzɩɣ se lidaʋ fɛyɩ se ɛyʋ weyi ɛsɩba yɔ, ɛpɩzɩɣ nɛ ɛtasɩ caɣʋ wezuu. Yaa pɩtɩla ɖɔɖɔ yɔ, pamaɣzɩɣ se ɛyaa kɩbama tɩŋa kpaɣ ɛsɔdaa. Koobu nɔɔyʋ tɩŋɩɣnɩ nʋmɔʋ nakʋyʋ yɔɔ nɛ ɛsɩɣnɩ ɛyaa se patɩlɩ se lidaʋ wɛɛ se ɛyaa kaɣ caɣʋ wezuu tam tam tɛtʋ yɔɔ. Kajalaɣ lɛ, ɛkalɩɣ Kiɖe Tɛɛ Tɔm 1:​28. Pʋwayɩ lɛ, ɛpɔzɩ ɖɩɣdʋ se ɛlɛ eheyi-i lone nɛ wɛtʋ ndʋ tɩ-taa Ɛsɔ kaasɔɔlaa se ɛyaa ɩcaɣ wezuu yɔ. Sakɩyɛ cosuu se: “Tɛtʋ yɔɔ, koboyaɣ taa.” Pʋwayɩ lɛ koobu ɛnʋ ɛkalɩ Izaayii 55:11 nɛ ɛpɔzɩ ɖɩɣdʋ se ɛlɛ naʋ taa lɛ, tamaɣ ŋga Ɛsɔ kaalabɩ kiɖe tɛɛ yɔ, kɛlɛɣzaa yaa katɩlɛɣzɩ. Ðoŋ ɖoŋ lɛ, ɖɩɣdʋ cosuu se katɩlɛɣzɩ. Kɛdɛzaɣ ɖeɖe lɛ, koobu ɛnʋ ɛkalɩɣ Keɣa 36: 10, 11 nɛ ɛpɔzɩ ɖɩɣdʋ se ɛlɛ eheyi-i ɛzɩma ɛyaa wezuu caɣʋ kaɣ wɛʋ cee wayɩ yɔ. Koobu ɛnʋ ɛtɩŋnɩ Bibl masɩ nzɩ sɩ-yɔɔ nɛ ɛsɩna ɛyaa sakɩyɛ nɛ pana se halɩ nɛ sɔnɔ Ɛsɔ sɔɔlaa se ɛyaa kɩbama ɩcaɣ wezuu tam tam paradisuu taa tɛtʋ yɔɔ. w19.03 24 § 14-​15; 25 § 19

Yehowa wɩlɩ kpayɩ kpayɩ se ɛsɔɔlaa se ɖiwelisi ɛ-Pɩyalʋ nɔɔ taa tɔm nɛ ɖɩɖɔ tɩ-yɔɔ. Yesu wɩlɩ ɛ-wayɩ tɩŋɩyaa nɛ sɔɔlɩm ɛzɩma posusi tɔm kɩbandʋ yɔ, nɛ ɛtɔzɩ-wɛ ɖɔɖɔ tam sakɩyɛ se pɛwɛɛ feŋuu yɔɔ. (Mat. 24:42; 28:19, 20) Eseɣti-wɛ ɖɔɖɔ se pañaɣ pana siŋŋ nɛ pataayele nɛ pitibi-wɛ yɔɔɔ. (Luka 13:24) Yesu ñɩɣ niye se pɩcɛyaa se ɛ-wayɩ tɩŋɩyaa ɩsɔɔlɩ ɖama, nɔɔ kʋɖʋmaɣ wɛɛ pɛ-hɛkʋ taa nɛ pɔɖɔ ɖɔɖɔ ɛ-paɣtʋ yɔɔ. (Yoh. 15:10, 12, 13) Lɔŋ tasʋʋ mbʋ, pɩwɛ ɖɔɖɔ wazaɣ sɔnɔ ɛzɩ pɩɩwɛʋ wazaɣ alɩwaatʋ ndʋ Yesu kaayɔɔdɩ pɩ-tɔm yɔ. Yesu yɔɔdaa se: “Weyi ɛwɛ toovenim hɔɔlʋʋ taa yɔ, ewelisiɣ mɔ-nɔɔ.” (Yoh. 18:37) Ðɩwɩlɩɣ se ɖiwelisiɣni-i alɩwaatʋ ndʋ ‘ɖiwoki pɩ-yɔɔ nɛ ɖɔ-tɔm ɛɛnɩɣ ɖama nɛ ɖikpeɣu ɖama faaa yɔ.’ (Kol. 3:​13; Luka 17:​3, 4) Ðɩwɩlɩɣ ɖɔɖɔ se ɖɩwɛɛ nɛ ɖiwelisiɣni-i ye ɖisusuu tɔm kɩbandʋ nɛ kpekpeka “alɩwaatʋ kɩbandʋ taa nɛ alɩwaatʋ kaɖɛ ñɩndʋ taa” yɔ.​—2 Tim. 4:2. w19.03 10 § 9-​10