Avril

Ða yɔ, a-lɩmaɣza ɖɩwɛna? Ɛsɔ lɩmaɣza yaa ɛjaɖɛ ñɩna ɖɩwɛna? Toovenim se ɖitisaa nɛ ɖɩlɛɣzɩ ɖɛ-wɛtʋ nɛ tɩla nɔɔ kʋɖʋmaɣ nɛ Ɛsɔ paɣtʋ. Ɛlɛ ɖa-maɣzɩm yɔ? Ðɩwɛɛ nɛ ɖɩñakɩ pana se ɖa-maɣzɩm ɛla nɔɔ kʋɖʋmaɣ nɛ Yehowa ñɩmbʋ na? Pɩpɔzʋʋ-ɖʋ pana ñaɣʋ pʋcɔ nɛ ɖɩpɩzɩ nɛ ɖɩla mbʋ. Ɛlɛ pɩwɛ kɛlɛʋ se ɛyʋ ɛwɛɛnɩ ɛjaɖɛ yɔɔ lɩmaɣza mbʋ pʋyɔɔ yɔ, ɛjaɖɛ yɔɔ fezuu wɛ paa le. (Efɛz. 2:2) Pɩtasɩ lɛ, ɛzɩma kiseɣtiɣ piɖeni men-ɖeke wɛtʋ yɔ, pɩwɛ ­kɛlɛʋ se kɩwɛɛnɩ ɖoŋ ɖɔ-yɔɔ. Toovenim lɛ, pɩwɛ kaɖɛ se ɛyʋ ɛwɛɛnɩ Yehowa lɩmaɣza; ɛlɛ pɩwɛ kɛlɛʋ yem se ɛyʋ ɛwɛɛnɩ ɛjaɖɛ yɔɔ lɩmaɣza. Ɛlɛ ye ɖiyeba nɛ ɛjaɖɛ yɔɔ maɣzɩm wɛɛnɩ ɖoŋ ɖɔ-yɔɔ yɔ, ɖɩkaɣ wɛnʋʋ piɖeni men-ɖeke wɛtʋ nɛ ɖɩɩkaɣ tisuu se patasɩ-ɖʋ lɔŋ wezuu kɩbaŋʋ caɣʋ nʋmɔʋ taa. (Mark. 7:​21, 22) Pʋyɔɔ pɩcɛyɩ siŋŋ se ɖɩñaɣ pana nɛ ɖɩwɛɛnɩ ‘Ɛsɔ maɣzɩm’ nɛ ɖɩtaawɛɛnɩ “ɛyaa mbʋ!” w18.11 18 § 1; 19 § 3-4

Yesu taasɔɔlɩ se politiki laɖaa yaa Ɛsɔ sɛtʋ ñʋndɩnaa mba paawɛ ɛ-alɩwaatʋ taa yɔ, paɖʋ-ɩ hɩɖɛ. Ɛlɛ alɩwaatʋ ndʋ Yehowa wɩlɩ kpayɩ tam nabudozo weyi Yesu kɛnaa yɔ, pɩtʋʋ fɛyɩ se pɩɩkpazɩ-ɩ ɖoŋ siŋŋ. Pamɩyɩsɩ Yesu lɩm Yɔɔrdaŋ Pɔɔ taa kpaagbaa lɛ, Yehowa yɔɔdɩ tɔm ndʋ tɩwɛ sɔnɔ evemiye mayaɣ taa yɔ. Pɩtɩla, Yohanɛɛsɩ lɩm mɩyɩsɩyʋ ɖeke kaanɩnɩ tɔm ndʋ. Pʋwayɩ lɛ, pɩɩkazɩ pɩnaɣ mbʋ yɔ se pakʋ Yesu lɛ, apostoloowaa naadozo nɩɩ Yehowa yɔɔdɩ ɛ-yɔɔ tɔm se: “Ɛnʋ yɔ ɛkɛ man-Pɩyalʋ kʋsɔɔlʋ, weyi man-taa lakɩ-ɩ nɛ leleŋ yɔ, iwelisini-i.” (Mat. 17:5) Kɛdɛzaɣ ɖeɖe lɛ, pɩɩkazɩ kɩyakɩŋ cabɩ mbʋ yɔ se pakʋ Yesu lɛ, Yehowa tasɩ-ɩ yɔɔdɩnʋʋ nɛ ɛsɔdaa kiŋ. (Yoh. 12:28) Paa Yesu kaanawa se pakaɣ cɛtɩnʋʋ ɛ-taa se ɛyɔɔdɩ tɔm kɩdɛkɛdɩtʋ Ɛsɔ yɔɔ nɛ pakʋ-ɩ yɔ, ɛtɩmaa se Yehowa sɔɔlɩm ɛlabɩna nɛ pɩtaakɛ ɛ-ñɩmbʋ. (Mat. 26:39, 42) “Ɛɖɔkɩ ɛ-laŋɩyɛ nazɩm sizika yɔɔ, nɛ eni fɛyɛ,” nɛ ɛtɩñɩnɩ se ɛjaɖɛ ɛwɩlɩnɩ-ɩ ɖɩ-ɛsɩmɩyɛ ɛlɛ ɛ-Caa ɖeke ñɩnɖɛ ɛñɩnɩɣ.​—Ebr. 12:2. w18.07 10-​11 § 15-​16

Yesu tɩɩlabɩ Kɩbaɣlʋ Ðanaɣ Tɔɔnaɣ sɔnzɩ nɛ pɩtɛ lɛ, ɛwɩlaa se ɛwɛ abalɩtʋ siŋŋ. Ɛzɩma tɩyɛ? Eetisi faaa se ɛla ɛ-Caa sɔɔlɩm paa ɛɛnawa se pɩkaɣ pɔzʋʋ se pakʋ-ɩ yɔ. Pakʋ-ɩ mbʋ pʋyɔɔ yɔ pamaɣzaɣ se ɛtʋ Ɛsɔ. Pʋbʋ taa lɛ, ye pakʋ ɛyʋ kɩwɛɛkɩm mbʋ pɩ-yɔɔ yɔ, pɩkɛ fɛyɛ tɔm. (Mat. 26:65, 66) Yesu ɖɔkɩ ɛ-cɩŋgɩlɩm wɛtʋ kpam se piyele nɛ Yehowa hɩɖɛ sɛɛ, ɛtɩnɩ Ɛsɔ ­kewiyitu kɩkɩlɩtʋ tɔɔʋ yɔɔ, nɛ pɩha waɖɛ mba pekpiɖi pa-kɩwɛɛkɩm yɔɔ yɔ se pehiɣ tamtam wezuu. Alɩwaatʋ kʋɖʋmtʋ ndʋ tɩ-taa lɛ, Yesu ñɔɔzɩ ɛ-wayɩ tɩŋɩyaa se papɩzɩ nɛ palʋbɩnɩ kala wena pakaɣ katʋʋ nɛ ɛsɩndaa yɔ. Yesu wɩlaa ɖɔɖɔ se ɛwɛ abalɩtʋ mbʋ pʋyɔɔ yɔ ɛmaɣzaɣ ɛ-apostoloowaa siɣsiɣ ñɩma kɩcɛyɩm yɔɔ nɛ ɛtɩka ɛ-lɩmaɣza nɩɣzɛ wena ɛpɩzaɣ se ɛwɛɛna yɔ a-yɔɔ. Ɛɖɔɔnɩ ­Yudaasɩ nɛ ɛla ŋgee kediɣzaɣ ŋga yɔ, kakaɣ tɔzʋʋ mba payɩ pakaɣ kɛʋ ɛ-wayɩ tɩŋɩyaa patam numwaa yɔ wazaɣ ŋga Yesu calɩm wɛna yɔ, nɛ kakaɣ-wɛ tɔzʋʋ ɖɔɖɔ se pa nɛ ɩ pɛwɛ ɛgbɛyɛ kɩfaɖɛ taa.​—1 Kɔr. 10:16, 17. w19.01 22 § 7-8

Yesu Caa cosi-i nɛ ɛsɔdaa kiŋ nɛ ɛyɔɔdɩ se: “Mansam-ɖɩ nɛ mankaɣ-ɖɩ tasʋʋ sam.” Yesu kaawɛ laŋwɛɛkɩyɛ taa mbʋ pʋyɔɔ yɔ, ɛnawa se pɩcɛyaa se ɛɖɔkɩ e-siɣsiɣ wɛtʋ kpam Yehowa ­ɛsɩndaa. Yesu kaanawa se pakaɣ-ɩ nazʋʋ nɛ pakʋ-ɩ. (Mat. 26:38) Mbʋ pɩɩkɩlɩ cɛyʋʋ Yesu ɛsɩndaa yɔ mbʋ lɛ se ­ɛsɔɔlaa se eyele nɛ ɛ-Caa hɩɖɛ sɛɛ. Ɛyaa kaacɛtɩnɩ Yesu taa se ɛtʋ Ɛsɔ nɛ pʋyɔɔ lɛ, ɛtaasɔɔlɩ se ɛ-sɩm mbʋ ­pipisi Ɛsɔ hɩɖɛ. Mbʋ yebina nɛ tɔm ndʋ Yehowa yɔɔdaa yɔ, tɩhɛzɩ Yesu ­laŋɩyɛ ­pɩdɩɩfɛyɩ! Ɛzɩ Yesu yɔ, ɛzɩma pepisi Ɛsɔ hɩɖɛ yɔ pɩpɩzɩɣ nɛ pɩha-ɖʋ nɩɣzɛ. ­Pɩtɩla, ɛzɩ Yesu yɔ, pomuli-ɖʋ hɔɔlʋʋ nakʋyʋ taa. Yaa pɩtɩla yɔ, cɛtɩm tɔm ndʋ mba pakaɖɩɣnɩ-ɖʋ yɔ pɔyɔɔdʋʋ ɖɔ-yɔɔ yɔ, tɩpɩzɩɣ ɖɔɖɔ nɛ tɩha-ɖʋ ­nɩɣzɛ. Pɩpɩzɩɣ piyele nɛ ɖɩmaɣzɩɣ ­ɛzɩma pɔ-tɔm ndʋ tipisiɣ Yehowa hɩɖɛ nɛ ɛ-ɛgbɛyɛ yɔ pɩ-yɔɔ siŋŋ. Alɩwaatʋ ndʋ tɩ-taa lɛ, tɔm ndʋ Yehowa heyi ɛ-Pɩyalʋ yɔ, tɩpɩzɩɣ nɛ tɩhɛzɩ ɖa-laŋɩyɛ. ­Yehowa kaɣ sam ɛ-hɩɖɛ paa ɛzɩmtaa.​—Keɣa 93:22, 23; Iza. 65:17. w19.03 11-​12 § 14-​16

Yesu tɔm tʋnɛ, pɩwɛ ɛ-tɔmkpɛlɩkɩyaa kaɖɛ se petisi tɩ-yɔɔ. Pamaɣzaɣ se Yesu tɔkɩ kewiyitu Izrayɛɛlɩ yɔɔ ɛlɛ, ɛlɛ ñeheyi-wɛ se piileɖiɣ lɛ, pakaɣ-ɩ nazʋʋ nɛ pakʋ-ɩ. Peeɖe apostoloo Pɩyɛɛrɩ yɔɔdaa se: “Kɩbaɣlʋ, ñɩnɩ ña-tɩ kɩbandʋ; pɩɩkaɣ-ŋ talʋʋ mbʋ kpa.” Nɛ Yesu pɩsɩnɩ-ɩ se: “Kɛɛ ma-wayɩ, Sataŋ! Ŋkɛ mbʋ pituuluu-m yɔ, mbʋ pʋyɔɔ yɔ ŋfɛyɩnɩ Ɛsɔ lɩmaɣza, ɛlɛ ɛyaa ñɩna.” (Mat. 16:21-​23; Tʋma 1:6) Yesu tɔm tʋnɛ tɩwɩlɩɣ kpayɩ kpayɩ se tʋkaɣ nakɛyɛ wɛ Ɛsɔ lɩmaɣza nɛ Sataŋ ɛjaɖɛ lɩmaɣza pɛ-hɛkʋ taa. (1 Yoh. 5:​19) Pɩyɛɛrɩ kaawɛnɩ tɩ hɛndɩnʋʋ lɩmaɣza wena ɛjaɖɛ yɔɔ ñɩma kaawɛna yɔ. Ɛlɛ Yesu kaanawa se ɛ-Caa lɩmaɣza ñɛwɛ ndɩ. Ɛɛnawa se Ɛsɔ sɔɔlɩm lɛ se ɛnɩɩ siziŋ nɛ ɛsɩ. Pʋyɔɔ tɔm ndʋ ecosi Pɩyɛɛrɩ yɔ, tɩwɩlɩ kpayɩ kpayɩ se ekizi ɛjaɖɛ yɔɔ lɩmaɣza nɛ ɛwɛɛnɩ Yehowa ñɩna. w18.11 18 § 1-2

Maɣzɩ nɛ ŋna mbʋ Yehowa naɣ alɩwaatʋ ndʋ ɛjaɖɛ kpeekpe yɔɔ ɛyaa miiliyɔɔwaa sakɩyɛ kpeɣliɣ se pala Kɩbaɣlʋ Ðanaɣ Tɔɔnaɣ sɔnzɩ yɔ. Pɩtasɩnɩ se ɛnaɣ samaɣ sɔsɔɔ ŋga kowoki sɔnzɩ nzɩ sɩ-ɖɩlaɖɛ yɔ lɛ, ɛnaɣ ɖɔɖɔ mba powoba yɔ pa-taa paa weyi. Halɩ ɛnaɣ mba pañakɩ pana nɛ powoki sɩ-taa paa pɩnaɣ ŋga yɔ. Pɩtɩla, pa-taa nabɛyɛ wɛɛ nɛ palʋkɩnɩ nazɩm sɔsɔm nabʋyʋ. Lalaa ɩɩkɔŋ kediɣzisi lɛɛsɩ ɖoŋ ɖoŋ, ɛlɛ panawa se Krɩstʋ sɩm yɔɔ tɔzʋʋ sɔnzɩ ɖɩlaɖɛ wobu tɔm cɛyɩ siŋŋ. Yehowa naɣ ɖɔɖɔ mba powoki sɔnzɩ nzɩ kajalaɣ ɖeɖe nɛ pɩtɩla, pañɩnɩɣ se pana ɛzɩma palakɩ kediɣzaɣ ŋga yɔ. Pɩtʋʋ fɛyɩ se Yehowa taa wɛ leleŋ alɩwaatʋ ndʋ ɛnaɣ se ɛyaa sakɩyɛ woki Krɩstʋ sɩm yɔɔ tɔzʋʋ sɔnzɩ ɖɩlaɖɛ yɔ. (Luka 22:19) Ɛlɛ, pɩtɩkɛ ɛyaa ɛzɩma woki sɔnzɩ nzɩ sɩ-ɖɩlaɖɛ yɔ, mbʋ kɩlɩɣnɩ haʋ Yehowa taa leleŋ. Mbʋ pʋyɔɔ ɛyaa mba powoki sɩ-taa yɔ, mbʋ haɣnɩ Yehowa taa leleŋ nɛ pɩkpaɖɩ. Ðɩsɔɔlaa se ɖɩmʋ wɩlɩtʋ ndʋ tɩlɩɣnɩ Yehowa nɛ ɛ-ɛgbɛyɛ pɔ-cɔlɔ yɔ?​—Iza. 30:20; Yoh. 6:​45. w19.01 26 § 1-3

Yesu wɩlaa se ɛsɔɔlɩ-ɖʋ nɛ ɛlaa ɛ-tɩ ɖɔ-yɔɔ, nɛ pɩkɛnɩ-ɖʋ kɩɖaʋ kɩbaŋʋ. Pɩtasɩnɩ se etisi faaa se ɛsɩkɩ ɛ-tɔmkpɛlɩkɩyaa yɔɔ lɛ, ɛwɩlɩ e-wezuu caɣʋ taa paa ɖooye se pɩtɩkɛ ɛ-kɛzɛsɩ ɛsɩɣ kajalaɣ lone taa, ɛlɛ pɛ-kɛzɛsɩ. Kɩɖaʋ nakʋyʋ yɔ: Ɛcaɣ ɛ-wayɩ tɩŋɩyaa cɔlɔ paa pɩnɩ-ɩ yaa ɛwɛ laŋwɛɛkɩyɛ taa yɔ. (Luka 22:39-​46) Nɛ ɛkam ɛ-lɩmaɣza mbʋ ɛpɩzaɣ se ɛla lalaa yɔ pɩ-yɔɔ, pɩtɩkɛ mbʋ lalaa pɩzaɣ se palabɩ-ɩ yɔ pɩ-yɔɔ ɛkam ɛ-lɩmaɣza. (Mat. 20:28) Ðɩwɛ ɛjaɖɛ kpeekpe yɔɔ toovenim Krɩstʋ ñɩma hɔʋ taa, nɛ ɖa-taa wɛ leleŋ se ɖɩkpakɩɣ alɩwaatʋ sakɩyɛ nɛ ɖɩyaɣnɩ ɛyaa kɩfama se pɔkɔɔ nɛ pɛkpɛndɩ ɖɔ-yɔɔ. Ɛlɛ ɖɩsɔɔlaa se ɖɩsɩnɩ “mba ɖa nɛ wɛ ɖɩka tisuu” ɛlɛ pɛhɛ fezuu taa yɔ nɛ pɩkɩlɩ. (Gal. 6:​10) Ye ɖiseɣtiɣ-wɛ se powoki ɖe-kediɣzisi, kɔzɩ kɔzɩ Yesu sɩm yɔɔ tɔzʋʋ kediɣzaɣ yɔ, pʋbʋ lɛ ɖɩwɩlɩɣ se ɖɩsɔɔlɩ-wɛ. Ɛzɩ Yehowa nɛ Yesu yɔ, ɖa-taa lakɩ leleŋ siŋŋ alɩwaatʋ ndʋ mba pɛhɛ fezuu taa yɔ pa-taa nɔɔyʋ pɩsɩɣ Yehowa, ɖa-Caa kʋsɔɔlʋ nɛ ɖe-Ninɖiɣyu cɔlɔ yɔ. (Mat. 18:14) Kediɣzisi sɩɣnɩ-ɖʋ nɛ ɖɩwɛɛnɩ tɩ luzuu, abalɩtʋ nɛ sɔɔlɩm. w19.01 29 § 12, 14; 30 § 15

Yesu nɛ ɛ-apostoloowaa siɣsiɣ ñɩma 11 paawɛna pʋcɔ nɛ ɛla ɛ-sɩm yɔɔ tɔzʋʋ sɔnzɩ. Mbʋ pakpaɣaa nɛ pɔtɔɔnɩ Paska kazandʋ nɛ pɩkazɩ yɔ, pɩ-taa ɛlɩzaa nɛ ɛlabɩnɩ sɔnzɩ kɛlɛʋ ñɩnzɩ nzɩ. Kpɔnʋ ŋgʋ kɩ-taa patɩɖʋ lɔlɔm yɔ nɛ vɛɛ ŋgʋ kɩɩwɛ peeɖe yɔ, pe-ɖeke ɛlabɩnɩ tʋmɩyɛ. Yesu heyi ɛ-apostoloowaa se ­won­du ndʋ tɩ-naalɛ tɩsɩŋnɩ e-tomnaɣ nɛ ɛ-calɩm mbʋ pɩtalɩ pilim yɔ, nɛ piileɖiɣ lɛ ɛkaɣ ɛ-calɩm nɛ e-tomnaɣ ŋga laʋ pɔ-yɔɔ. Ɛzɩma ɛlabɩ kediɣzaɣ kɩfalaɣ ŋga kɔ-tɔm cɛyaa yɔ nɛ kɛwɛɛ kɛlɛʋ yɔ, pɩtɩla pɩtaaɖɩɣzɩ apostoloowaa. Ɛbɛ yɔɔ? Pɩlakɩ fenasɩ nasɩyɩ yɔ, alɩwaatʋ ndʋ Yesu wobi ɛ-taabalaa Lazaarɩ, Maarta nɛ Maarɩɩ pɛ-tɛ yɔ ɛpaɣzɩ-wɛ tɔm wɩlʋʋ. Maarta kaawɛ peeɖe ɛlɛ ɛ-ɛsɩyɛ kaasɛnɩ tɔɔnaɣ sakɩyɛ labʋ se ɛmʋnɩ ɛ-ɛgɔm sɔsɔ. Yesu na mbʋ lɛ, ɛtasɩ Maarta lɔŋ nɛ sɔɔlɩm. Ɛsɩnɩ-ɩ nɛ ɛna se pɩtɩkɛ paa ɛzɩmtaa pɩpɔzaa se pala tɔɔnaɣ ŋga ka-labʋ wɛ kaɖɛ yɔ. (Luka 10:40-​42) Pʋwayɩ pɩɩkazɩ ñɩɣtʋ pazɩ se Yesu ɛkpaɣ ɛ-tɩ nɛ ɛlaa lɛ, ɛ-maɣmaɣ ɛɖɔ lɔŋ weyi ɛɛtasɩ Maarta yɔ ɩ-yɔɔ. Ɛlabɩ ɛ-sɩm yɔɔ tɔzʋʋ sɔnzɩ tɔɔnaɣ nɛ kɛwɛɛ kɛlɛʋ. w19.01 20-​21 § 3-4

Yehowa ɖʋ Yesu hɩɖɛ nɛ ɛha-ɩ waɖɛ nɖɩ ɛlɛ taamaɣzɩ ɖɩ-yɔɔ yɔ, efezi-ɩ nɛ ɛha-ɩ “hɩɖɛ nɖɩ ɖɩkɩlɩ hɩla kpeekpe yɔ” nɛ ɛha-ɩ ɖɔɖɔ maasɩkɩ wɛtʋ! (Fil. 2:9; 1 Tim. 6:​16) Yesu siɣsiɣ wɛtʋ yeba nɛ Ɛsɔ wɩlɩ-ɩ ɛsɩmɩyɛ nɖɩ ɖɩ-wayɩ fɛyɩ yɔ! Ɛbɛ pɩzɩɣ pɩsɩnɩ-ɖʋ nɛ ɖikizi ɛjaɖɛ yɔɔ cɩnɛ hɩɖɛ sɛʋ? Ðɩtaasɔɔ kpa se Yehowa wɩlɩɣ ɛsɩmɩyɛ ɛ-sɛyaa siɣsiɣ ñɩma paa ɛzɩmtaa, nɛ ɖoŋ ɖoŋ lɛ ɛwazɩɣ-wɛ ɖɔɖɔ nɛ pɩkɩlɩɣ mbʋ pʋyɔɔ pamaɣzaɣ yɔ. Asɩm wazasɩ nzɩ ­sɩɖaŋ-ɖʋ cee wayɩ nɛ ɖɩtaamaɣzɩ sɩ-yɔɔ yɔ? Ɛlɛ ­lɛɛlɛɛyɔ lɛ, pɩwɛɛ se ɖiwolo pɩ-yɔɔ nɛ ­ɖɩlʋbɩnɩ kala wena ɖɩkatɩɣ ɛjaɖɛ ­kɩdɛkɛdɩyɛ ɖɩnɛ ɖɩ-taa yɔ. Ðɩtaasɔɔ kpa se ɛjaɖɛ ɖɩnɛ nɛ ɖɩ-sɔɔlɩm pakaɣ ɖɛʋ. (1 Yoh. 2:​17) Ða-Caa kɩsɔɔlʋʋ Yehowa ‘tɩkɛ Ɛsɔ weyi ɛfɛyɩ siɣsiɣ yɔ se ɛsɔɔ mɩ-tʋmɩyɛ nɛ sɔɔlɩm mbʋ ɩwɩlɩ ɛ-hɩɖɛ yɔɔ’ yɔ pɩ-yɔɔ. (Ebr. 6:​10) Ɛɛɛ, ɖɔ-tɔm kaɣ-ɩ ­kɛdɩnʋʋ nɛ ɛlabɩ-ɖʋ mbʋ yɔ, sɔnɔ ɛyʋ ɛɛpɩzɩɣ nɛ ɛtɩlɩ-pʋ! w18.07 11 § 17-​18

Yesu nɛ apostoloowaa pɔtɔkaɣ tɔɔnaɣ kɛdɛzaɣ ɖeɖe lɛ, ɛmaɣzaɣ ɛzɩma pɩwɛɛ se nɔɔ kʋɖʋmaɣ ɛwɛɛ pɛ-hɛkʋ taa yɔ pɩ-yɔɔ. Alɩwaatʋ ndʋ ɛ nɛ wɛ patɩmaɣ yɔ, ɛyɔɔdɩ ɛzɩma ɛsɔɔlaa se ɛ-tɔmkpɛlɩkɩyaa tɩŋa ɩkpɛndɩ nɛ pɛkɛ kʋɖʋm, ɛzɩ ɛ nɛ ɛ-Caa pɛkpɛndʋʋ nɛ pɛkɛ kʋɖʋm yɔ pɩ-tɔm. (Yoh. 17:20, 21) Nɔɔ kʋɖʋmaɣ ŋga kɛwɛɣ pɛ-hɛkʋ taa yɔ, pɩkɛɣnɩ aseɣɖe siŋŋ nɛ pɩkaɣ yebu nɛ ɛyaa ɖiɣzina se Yehowa tiyi Yesu tɛtʋ yɔɔ se ɛla Ɛsɔ sɔɔlɩm. Sɔɔlɩm kaɣnɩ yebu nɛ patɩlɩ Yesu tɔmkpɛlɩkɩyaa toovenim ñɩma nɛ piyele ɖɔɖɔ nɛ nɔɔ kʋɖʋmaɣ wɛɛ pɛ-hɛkʋ taa. (Yoh. 13:34, 35) Pɩpɔzɩ mbʋ se Yesu ɛñɩɣ niye ɛzɩma pɩcɛyaa se ɛ-wayɩ tɩŋɩyaa ɩwɛɛ nɔɔ kʋɖʋmaɣ taa yɔ pɩ-yɔɔ. Alɩwaatʋ natʋyʋ ɛyʋsaa se nɔɔ kʋɖʋmaɣ taawɛɛ apostoloowaa hɛkʋ taa. Tɩ-taa natʋyʋ lɛ alɩwaatʋ ndʋ ɛ nɛ wɛ pɔtɔkaɣ tɔɔnaɣ kɛdɛzaɣ ɖeɖe yɔ. Alɩwaatʋ ndʋ tɩ-taa lɛ, nɔɔhɔnɖɛ sɔsɔɖɛ naɖɩyɛ ɖɔɖɔ kɔɔ apostoloowaa “hɛkʋ taa se pana se pa-taa lɛ akɩlaa” ɛzɩ paatɛm you tɔm ndʋ tɩ-yɔɔ nɛ pɩɖɛɛ yɔ. (Luka 22:24-​27; Mark. 9:​33, 34) Alɩwaatʋ lɛɛtʋ taa, Yakubu nɛ Yohanɛɛsɩ pɔpɔzɩ Yesu se ɛha-wɛ lona sɔsɔna e-Kewiyaɣ taa.​—Mark. 10:35-​40. w18.06 8 § 1-2

Yehowa sɔɔlaa se mba pɔɖɔkɩ nesi yɔ, pɛcɛyɩsɩ sɔɔlɩm mbʋ pɩwɛ pɛ-hɛkʋ taa yɔ nɛ piyele nɛ pɔsɔɔlɩ ɖama pe-wezuu kpeekpe. (Mat. 19:​3-6) Kañatʋ lakasɩ sɔsɔsɩ nzɩ ɛyʋ pɩzɩɣ nɛ ɛla yɔ, sɩ-taa nasɩyɩ lɛ acɛyɛ. Pʋyɔɔ Paɣtʋ Hiu ndʋ Ɛsɔ kaaha Izrayɛɛlɩ samaɣ yɔ, tɩ-taa lʋbɛ ñɩndʋ yɔɔdɩ kpayɩ se nesi ɖɔkɩyaa ɩkpa pa-tɩ nɛ acɛyɛ. (Wp. 5:​18) Weyi ɛlakɩ kɩdɛkɛdɩm mbʋ yɔ, ‘ɛɖʋʋ Ɛsɔ ɖɩwɩzɩyɛ’ nɛ ɛlakɩ ɛ-tɛŋga kañatʋ siŋŋ. (Kiɖe 39:​7-9) Weyi palabɩ-ɩ kañatʋ ndʋ yɔ, pɩwɩlɩɣ se ɛ-tɛŋga lɩ ɛ-wayɩ nɛ pɩwɛɣ nɛ pɩɖʋʋ-ɩ ɖɩwɩzɩyɛ pɩnzɩ sakɩyɛ. Yehowa maɣzɩɣ piya yɔɔ siŋŋ nɛ ɛsɔɔlaa se piɖeni-sɩ. Yehowa kaaɖʋ paɣtʋ lʋlɩyaa se pɔcɔnɩ pe-piya fezuu taa nɛ tomnaɣ yɔɔ kɩcɛyɩm ɖeɖe camɩyɛ. Pɩɩwɛɛ se lʋlɩyaa ɩtɩŋnɩ nʋmɔŋ kpeekpe yɔɔ nɛ pasɩnɩ pe-piya nɛ sɩtɩlɩ Yehowa Paɣtʋ nɛ sɩsɔɔlɩ-tʋ ɖɔɖɔ, nɛ sɩkpɛlɩkɩ ɖɔɖɔ ɛzɩma sɩwɩlɩ-ɩ sɩ-sɔɔlɩm yɔ. (Wp. 6:​6-9; 7:​13) Yehowa tɩsɔɔlɩ se lʋlɩyaa ɩkpaɣ pe-piya ɛzɩ mbʋ papɩzɩɣ nɛ pala pɩ-yɔɔ kaakendu yɔ nɛ pawɩlɩɣ-sɩ ñaŋ, ɛlɛ pɩwɛɛ se pana se sɩkɛ kʋjɔŋ weyi ɩlɩnɩ Yehowa cɔlɔ yɔ nɛ pɩpɔzʋʋ se pɔsɔɔlɩ-sɩ.​—Keɣa 126:3. w19.02 21 § 5, 7

Yɔɔb kam ɛ-lɩmaɣza lidaʋ ŋgʋ ɛɛwɛna se Ɛsɔ kaɣ-ɩ wazʋʋ yɔ kɩ-yɔɔ nɛ mbʋ sɩnɩnɩ-ɩ nɛ ɛɖɔkɩ ɛ-cɩŋgɩlɩm wɛtʋ. Ɛɛnawa se ɛ-cɩŋgɩlɩm wɛtʋ tɔm cɛyɩ Ɛsɔ ɛsɩndaa. Paa Yɔɔb ɛɛkatɩ takɩm yɔ, ɛɛwɛnɩ lidaʋ se Yehowa kaɣ-ɩ wazʋʋ. Pɩtʋʋ fɛyɩ se lidaʋ ŋgʋ kɩsɩnɩ-ɩ nɛ ɛɖɔkɩ ɛ-cɩŋgɩlɩm wɛtʋ. Yehowa taa kaalabɩ leleŋ pɩdɩɩfɛyɩ nɛ Yɔɔb cɩŋgɩlɩm wɛtʋ, pʋyɔɔ ɛwazɩ-ɩ siŋŋ paa ɛlɛ kaakɛ ɛyʋ weyi ɛtɩtalɩ pilim yɔ! (Yɔɔb 42:12-​17; Yak. 5:​11) Nɛ halɩ wazasɩ sɔsɔsɩ ɖaŋ Yɔɔb nɛ ɛsɩndaa. Ðɛ-Ɛsɔ tɩlɛɣzɩ. (Mal. 3:6) Ye ɖɩtɔzʋʋ se Yehowa wazɩɣ mba pɔɖɔkʋʋ pa-cɩŋgɩlɩm wɛtʋ yɔ, ɖɩkaɣ ñaɣʋ pana nɛ ɖɩɖɔkɩ ɖa-cɩŋgɩlɩm wɛtʋ, nɛ pɩtʋʋ fɛyɩ se ɖɩkaɣ wɛnʋʋ cee wayɩ kɩbaŋʋ. (1 Tes. 5:​8, 9) Nabʋyʋ taa, pɩpɩzɩɣ nɛ pɩlabɩ-ŋ ɛzɩ ñe-ɖeke ŋwɛna nɛ ŋñakɩ pana se ŋɖɔkɩ ña-cɩŋgɩlɩm wɛtʋ yɔ, ɛlɛ toovenim taa ŋfɛyɩ ñe-ɖeke. Ŋwɛ ɛyaa siɣsiɣ tɩnaa miiliyɔɔwaa mba pɔɖɔkʋʋ pa-cɩŋgɩlɩm wɛtʋ ɛjaɖɛ kpeekpe yɔɔ yɔ pa-taa. Ŋkaɣ sɔzʋʋ ɖɔɖɔ abalaa nɛ halaa mba ­paawɛnɩ tisuu caanaʋ taa pɔ-yɔɔ. Paaɖɔkɩ pa-cɩŋgɩlɩm wɛtʋ halɩ pɩkpɛndɩnɩ kala wena apɩzaɣ se akɔnɩ-wɛ sɩm yɔ a-taa.​—Ebr. 11:36-​38; 12:1. w19.02 7 § 15-​16

Yesu sɩm yɔɔ tɔzʋʋ kɩyakʋ wɛɣ nɛ kɩñɔtʋʋ lɛ, pɩwɛɣ ɖeu se ɖa-taa paa anɩ ɛpɔzɩ ɛ-tɩ tɔm tʋnɛ: ‘Ɛzɩma manpɩzɩɣ nɛ manɩɣzɩnɩ Yesu, sɔɔlɩm wɩlʋʋ nʋmɔʋ taa nɛ pɩkpaɖɩ? Mamaɣzɩɣ mon-koobiya Krɩstʋ ñɩma kɩcɛyɩm yɔɔ nɛ pɩkpaɖɩ ma-maɣmaɣ ma-ñɩmbʋ yɔɔ yaa we? Manɖaŋɩɣ se mon-koobiya ɩla mbʋ paapɩzɩɣ yɔ, yaa mansɩm po-ɖoŋ kamaɣ?’ Tɛtɛ pɩla mbʋ nɛ paa ɛzɩmtaa lɛ, ɖɩmaɣzɩɣnɩ Yesu nɛ ɖɩwɩlɩɣ se ɖɩwɛnɩ “maɣzɩm kʋɖʋmʋm.” Piileɖiɣ lɛ, Yesu sɩm yɔɔ tɔzʋʋ sɔnzɩ ɖʋtʋ sɩɣ tɩnaɣ. Yesu ‘kɔŋ’ kʋñɔŋ sɔsɔʋ alɩwaatʋ taa lɛ, ɛkaɣ kpeɣluu “mba ɛlɩzaa” se pakpa ɛsɔdaa yɔ, nɛ pʋbʋ taa Yesu sɩm yɔɔ tɔzʋʋ sɔnzɩ kaɣ sɩʋ tɩnaɣ. (1 Kɔr. 11:26; Mat. 24:31) Paa Yesu sɩm yɔɔ tɔzʋʋ sɔnzɩ ɛsɩ tɩnaɣ yɔ, ɖa-taa pɩzɩɣ nɛ pɩtɛ se Yehowa samaɣ kaɣ wobu pɩ-yɔɔ nɛ kɔtɔzʋʋ nɛ taa leleŋ lɔŋ kɩbaŋ weyi ŋgee kediɣzaɣ ŋga kɛkpɛlɩkɩ-ɖʋ tɩ luzuu, abalɩtʋ, nɛ sɔɔlɩm nʋmɔʋ taa yɔ. w19.01 25 § 17-​19

Iyele nɛ ɖɩna ɛzɩma ɖo-tomnaɣ yɔɔ alaafɩya wɛʋ wɩlɩɣ se pɩcɛyaa se ɖɩcɔŋnɩ mbʋ ɖɩkɛnɩ ɖa-taa kiŋ yɔ pɩ-yɔɔ camɩyɛ yɔ. Kajalaɣ lɛ, pɩsa nɛ ɖo-tomnaɣ hɔɔlɩŋ weyi ɩwɛnɩ ɖa-taa kiŋ yɔ ɩwɛɛ alaafɩya camɩyɛ lɛ, pɩcɛyaa se ɖɩtɔkɩ tɔɔnaɣ kɩbaŋa, nɛ ɖɩlakɩ ɖɔɖɔ hola aleɣya naayɛ ɖoŋ ɖoŋ. Mbʋ ɖɔɖɔ, pɩsa nɛ ɖɩwɛɛ alaafɩya fezuu taa lɛ, pɩcɛyaa se ɖɩtɔkɩ fezuu taa tɔɔnaɣ ŋga kɛwɛ ɖeu camɩyɛ yɔ ɖoŋ ɖoŋ nɛ ɖɩcɛyɩsɩ ɖɔɖɔ tisuu mbʋ ɖɩwɛnɩ Yehowa yɔɔ yɔ. Pɩsa nɛ ɖɩcɛyɩsɩ tisuu mbʋ lɛ, pɩwɛɛ se ɖɩlakɩnɩ tʋmɩyɛ tɔm ndʋ ɖɩwɛɛ nɛ ɖɩkpɛlɩkɩɣ yɔ, nɛ ɖiheyiɣ ɖɔɖɔ lalaa ɖe-tisuu tɔm. (Roma 10:​8-​10; Yak. 2:​26) Nabʋlɛ lɛ, ɖɩpɩzɩɣ nɛ ɖɩcɔnɩ ɖa-tɩ nɛ ɖɩmaɣzɩ se ɖɩwɛ alaafɩya, ɛlɛ toovenim taa lɛ kʋdɔŋ nakʋyʋ wɛɛ nɛ kɩcɛyɩɣ-ɖʋ. Mbʋ ɖɔɖɔ ɖɩpɩzɩɣ nɛ ɖɩcɔnɩ fezuu taa tʋma wena ɖɩlakɩ yɔ, nɛ ɖɩmaɣzɩ se ɖe-tisuu cɛyɩsɩ camɩyɛ ɛlɛ toovenim taa lɛ, pɩtɩla yɔ lɩmaɣza kɩdɛkɛda naayɛ wɛɛ nɛ añɔʋ ɖa-laŋɩyɛ taa. (1 Kɔr. 10:12; Yak. 1:​14, 15) Pɩwɛɛ se ɖɩtɔzɩ se Sataŋ sɔɔlaa se ɛ-maɣzɩm ɛcamɩ-ɖʋ. w19.01 15 § 4-5

Pɩwɛɣ ɖeu se ŋpɔzɩ ña-tɩ se: ‘Ma ɖɔɖɔ mɛwɛɛ nɛ malakɩ mbʋ? Mɛwɛɛ nɛ manaɣ ɛyaa pʋtɔdɩyɛ ɛzɩ Samaarii tʋ yɔ?’ (Luka 10:30-​35) ‘Manpɩzɩɣ nɛ mana ɛyaa pʋtɔdɩyɛ nɛ pɩkpaɖɩ nɛ mala nabʋyʋ nɛ mansɩnɩ mba pɛwɛ kʋñɔŋ taa yɔ? Pɩtɩla manpɩzɩɣ nɛ mala nabʋyʋ nɛ mansɩnɩ Krɩstʋ ñɩma mba pasʋtʋyaa yɔ, lelaa, nɛ piya nzɩ sɩ-lʋlɩyaa fɛyɩ toovenim taa yɔ? Pɩɩwɛɣ ɖeu se mañaɣ pana nɛ malakɩ nabʋyʋ nɛ ‘mankpazɩ ɖoŋ ajamaa’ na?’ (1 Tes. 5:​14; Yak. 1:​27) Ye ɖɩnaɣ ɛyaa pʋtɔdɩyɛ yɔ, ɛzɩma piyeki se ɖɩwɛɛ koboyaɣ taa? Alɩwaatʋ ndʋ ɖɩnaɣ ɛyaa lalaa pʋtɔdɩyɛ yɔ, ɖihikiɣ taa leleŋ weyi haʋ kɔŋna yɔ. Pɩtasɩ lɛ, ɖɩnawa se ɖɔ-tɔm kɛdɩɣnɩ Yehowa. (Tʋma 20:35; Ebr. 13:16.) Wiyaʋ Daviid yɔɔdɩ weyi ɛnaɣ lalaa pʋtɔdɩyɛ yɔ ɛ-tɔm se: “[Yehowa] ɖɔkʋʋ e-wezuu nɛ ɛnɩɩ leleŋ tataa.” (Keɣa 40:2, 3) Ye ɖɩnɩɣ lalaa siziŋ nɛ ɖɩlakɩ nabʋyʋ se ɖɩsɩnɩ-wɛ yɔ, Yehowa naɣ ɖa-pʋtɔdɩyɛ nɛ piyeki nɛ ɖɩwɛɛ koboyaɣ taa tam.​—Yak. 2:​13. w18.09 19 § 11-​12

Payaɣ koobu halɩñɩnʋ siɣsiɣ tʋ nɔɔyʋ se Yoshiko. Ɛɛnɩ tɔm kɩdɛkɛdɩtʋ natʋyʋ. Fɛɖʋ weyi ɛcɔŋnɩ ɛ-yɔɔ yɔ, eheyi-i se fenasɩ pazɩ wayɩ lɛ, ɛkaɣ sɩbʋ. Ɛzɩma ɛlaba? Yoshiko tɔzɩ masɩ nzɩ ɛkɩlɩ sɔɔlʋʋ yɔ sɩ-taa nakɛyɛ yɔɔ. Ŋga lɛ sɔnɔ evemiye mayaɣ. Nɛ eheyi fɛɖʋ weyi ɛcɔŋnɩ ɛ-yɔɔ yɔ se sɔɔndʋ ɛɛkpaɣ ɛnʋ mbʋ pʋyɔɔ yɔ Yehowa ɖɔkɩ e-nesi taa. Tɔm ndʋ tɩwɛ mayaɣ ŋga ka-taa yɔ, tɩkpazɩ ɖo-koobu halɩñɩnʋ ɛnʋ ɖoŋ nɛ tɩsɩnɩ-ɩ se ɛtaa Yehowa liu nɛ ɛ-laŋɩyɛ pilim. Mayaɣ kʋɖʋmaɣ ŋga kapɩzɩɣ nɛ kasɩnɩ-ɖʋ ɖɔɖɔ nɛ sɔɔndʋ ɛtaakpa-ɖʋ alɩwaatʋ ndʋ ɖɩkatɩɣ kala sɔsɔna yɔ. Kajalaɣ taa lɛ, Yehowa sɩnɩ Izaayii nɛ ɛma tɔm tʋnɛ se pɩkpazɩ ɖoŋ Yuuda ñɩma mbʋ pʋyɔɔ yɔ piileɖiɣ lɛ, pakaɣ-wɛ wonuu yomiye taa Babilɔɔnɩ. Yehowa tɩkandɩyɩ tɔm tʋnɛ tɩ-yɔɔ se tɩwazɩ Yuuda ñɩma mba pakaɣ-wɛ wonuu yomiye taa yɔ pe-ɖeke na, ɛlɛ ɛlabɩ mbʋ ɖɔɖɔ se tɩwazɩ ɛ-samaɣ, kpaɣnɩ caanaʋ taa nɛ pɩkɔɔ pɩtalɩ sɔnɔ. (Iza. 40:8; Roma 15:4) Sɔnɔ, ɖɩwɛ kɛdɛzaɣ kɩyakɩŋ weyi ɩ-taa wezuu caɣʋ wɛ “kaɖɛ pɩŋŋ” yɔ, nɛ lɛɛlɛɛyɔ pɩwɛɛ se tɔm ndʋ tɩwɛ Izaayii takayaɣ taa yɔ, tɩkpazɩ-ɖʋ ɖoŋ nɛ pɩkpaɖɩ.​—2 Tim. 3:1. w19.01 2 § 1-2

Ye nɔɔyʋ nɛ ɛ-tɛŋga paya ɖama mbʋ yɔ, pɩtɩwɩlɩ se pe-nesi ɖɔkʋʋ sɩ tɩnaɣ; nɛ paa pɛfɛyɩ ɖama cɔlɔ yɔ, papɩzɩɣ nɛ pakatɩɣ kala. Apostoloo Pɔɔlɩ yɔɔdɩ lɩmaɣzɩyɛ nɖɩ ɖɩ-yɔɔ pɩwɛɛ se pɛwɛɛ ɖama cɔlɔ yɔ, ɖɩ-tɔm. Ɛmawa se: “Walʋ weyi eetisiɣ Kɩbaɣlʋ yɔɔ yɔ, ɛpɩsɩ kiɖeɖeu ɛ-halʋ yɔɔ, nɛ halʋ weyi eetisiɣ Kɩbaɣlʋ yɔɔ yɔ ɛpɩsɩ kiɖeɖeu koobu abalɩñɩnʋ yɔɔ; ye pɩtaakɛ mbʋ yɔ, mi-piya kaakɛ azuluma tɩnaa, ɛlɛ lɛɛlɛɛyɔ lɛ sɩpɩsɩ kiɖeɖesi.” (1 Kɔr. 7:​14) Krɩstʋ ñɩma siɣsiɣ ñɩma sakɩyɛ ɖɔkɩ pa-tɩ nɛ pɛwɛɛ pɛ-tɛŋga cɔlɔ kala sɔsɔna ndɩ ndɩ taa. ­Panawa se pɩɩcɛyaa se pala mbʋ, kɔzɩ kɔzɩ alɩwaatʋ ndʋ pɛ-tɛŋga kɔm nɛ kapɩsɩ Ɛsɔ sɛyʋ toovenim tʋ yɔ. (1 Kɔr. 7:​16; 1 Pɩy. 3:​1, 2) Sɔnɔ koboyaɣ wɛ nesi ɖɔkɩyaa mba pɛwɛ ɛjaɖɛ kpeekpe yɔɔ Krɩstʋ ɛgbɛyɛ taa yɔ pɛ-hɛkʋ taa. ­Pɩtɩla ­ŋyʋsaa se nesi ɖɔkɩyaa mba pɛwɛ ñɛ-ɛgbɛyɛ taa yɔ, pa-taa sakɩyɛ wɛ taa leleŋ taa. Koobiya abalaa wɛ siɣsiɣ nɛ pɔsɔɔlɩ pa-halaa mba paba wɩlɩɣ se pɛwɛnɩ sɔɔlɩm ɖɔɖɔ yɔ. Pa-tɩŋa pa-kɩɖaŋ wɩlɩɣ se ɛyʋ pɩzɩɣ nɛ ɛɖʋ hɩɖɛ e-nesi ɖɔkʋʋ.​—Ebr. 13:4. w18.12 14 § 18-​19

Edɛɛnɩ tɔbʋʋ lɛ se “leleŋ” nɛ toovenim taa lɛ, kaɖaɣ ŋga kaakɛ lone kɩbanɖɛ siŋŋ. Tɔɔnasɩ kaatɔyaa, lona wena awɛ kajʋka yɔ aawɛ peeɖe nɛ taabalɩyɛ kɩbanɖɛ kaawɛ ɛyaa nɛ kpɩna pɛ-hɛkʋ taa. (Kiɖe 1:​29-​31) Ebree tɔm piye nɖɩ pɛɖɛzaa se “kaɖaɣ” yɔ, Grɛɛkɩ kʋnʋŋ taa lɛ, pɛɖɛzɩɣ-ɖɩ se pa·raʹdei·sos. Takayaɣ nakɛyɛ yɔɔdaa pa·raʹdei·sos tɔm se: “Grɛɛkɩ tʋ lɩmaɣza taa lɛ, tɔm piye nɖɩ ɖɩwɩlɩɣ lone nɖɩ ɖɩwalaa nɛ ɖɩkɛ kaɖaɣ kɩbaŋa siŋŋ yɔ. Pakandɩyɩ lone nɖɩ ɖɩ-yɔɔ se kaɖɛ naɖɩyɛ ɛtaatalɩ nɔɔyʋ. Nɛ ɖɩwɛ kajʋka siŋŋ. Tɩŋ ndɩ ndɩ wɛ peeɖe nɛ ɩ-taa sakɩyɛ lʋlʋʋ pee. Pɔsɩ wɛ peeɖe ɖɔɖɔ nɛ sɩ-taa lɩm keliti camɩyɛ, nɛ kpɩna sakɩyɛ wɛ lone nɖɩ ɖɩ-taa.” (Cyclopædia, de M’Clintock et Strong). (Kpaɣ-tʋ nɛ ŋmaɣzɩnɩ Kiɖe Tɛɛ Tɔm 2:​15, 16) Paradisuu ŋgʋ kɩ-taa Ɛsɔ kaasɩ Aɖam nɛ Ɛva, ɛlɛ patɩcaɣ kɩ-taa nɛ pileɖi mbʋ pʋyɔɔ yɔ patɩña Ɛsɔ. Piyeba nɛ pa nɛ pe-piya pelesi paradisuu. (Kiɖe 3:​23, 24) Paa ɛyaa ɩtaawɛɛ kaɖaɣ ŋga ka-taa yɔ, pɩwɛ ɛzɩ kaawɛɛ nɛ pɩkɔɔ pɩtalɩ tɛʋ sɔsɔ alɩwaatʋ taa, Noowa wɛɛ taa. w18.12 3-4 § 3-5

Lʋlɩyaa ñakɩ pana se pasɩnɩ pe-piya nɛ sɩwɛɛnɩ maɣzɩm kɩbam nɛ wɛtʋ kɩbandʋ. Ye sɩlɩzaa se sɩɖɔŋ lɩmaɣza kɩbana wena sɩ-lʋlɩyaa kpaɣaa nɛ pafalɩsɩnɩ-sɩ yɔ a-yɔɔ yɔ, pɩwɛɣ kaɖɛ se sɩkpaɣ lɩmaɣza naayɛ nɛ pʋwayɩ sikpiɖi a-yɔɔ. Pɩsɩɣnɩ-sɩ se sɩtaatɔlɩ kʋñɔmɩŋ nɛ nɩɣzɛ ndɩ ndɩ taa. Ɛzɩ lʋlɩyʋ kɩbanʋ yɔ, Yehowa sɔɔlaa se ɖe-wezuu caɣʋ eɖeni-ɖʋ siŋŋ. (Iza. 48:18) Pʋyɔɔ ɛhaɣ-ɖʋ paɣtʋ kila wena pɩwɛɛ se aɖiyi-ɖʋ wezuu kɩbaŋʋ caɣʋ nɛ wɛtʋ ndʋ pɩwɛɛ se ɖɩwɛɛnɩ lalaa yɔɔ yɔ, pɩ-hɔɔlɩŋ taa. Hɔɔlɩŋ ɩnɛ ɩ-taa lɛ, ɛsɔɔlaa se ɖɩwɛɛnɩ ɛ-maɣzɩm nɛ ɖiyele nɛ piɖiyi-ɖʋ. Ye ɖɩlabɩ mbʋ yɔ, pɩɩɖʋzʋʋ-ɖʋ kaaʋ ɛlɛ piyeki nɛ ɖa-maɣzɩm ɖe nɛ pɩtʋʋzɩ camɩyɛ. (Keɣa 91:6; Adu. 2:​1-5; Iza. 55:9) Pɩsɩɣnɩ-ɖʋ se ɖɩkpaɣ lɩmaɣza wena ayeki se ɖihiɣ koboyaɣ ɖe-wezuu caɣʋ taa nɛ ɖɩwɛɛnɩ ɖɔɖɔ ɛyʋtʋ ndʋ tɩwɛ ɖeu yɔ. (Keɣa 1:​2, 3) Ye ɖɩmaɣzɩɣ ɛzɩ Yehowa yɔ, pɩwazɩɣ-ɖʋ pɩdɩɩfɛyɩ! w18.11 19-​20 § 7-8

Pɩsa nɛ ɖiwolo pɩ-yɔɔ nɛ ɖɩɖɔŋ ­toovenim taa lɛ, pɩwɛɛ se ɖɩkpa ɖa-tɩ nɛ lalaa ɩtaawɛɛnɩ ɖoŋ kɩdɛkɛdɩŋ ɖɔ-yɔɔ. Alɩwaatʋ ndʋ ɖɩpaɣzɩɣ toovenim taa ɖɔm yɔ, taabalɩyɛ nɖɩ ɖɩwɛ ɖa nɛ ɖɔ-hɔʋ taa ñɩma nɛ ɖa-taabalaa mba patɩkɛ Aseɣɖe Tɩnaa yɔ ɖɛ-hɛkʋ taa yɔ, ɖɩlɛɣzɩɣ. Nabɛyɛ lɛ pɩɩcɛyɩɣ-wɛ, ɛlɛ lalaa lɛ, pakʋyʋʋ ɖɔ-yɔɔ nɛ pakaɖɩɣnɩ-ɖʋ. Ðɔ-hɔʋ taa ñɩma, ɖa-tʋmɩyɛ taa taabalaa nɛ ɖa nɛ mba ɖɩlakɩ sukuli yɔ, papɩzɩɣ nɛ payaa-ɖʋ se ɖiwolo nɛ ɖa nɛ wɛ ɖɩla kazandʋ. Ɛbɛ pɩzɩɣ pɩsɩnɩ-ɖʋ nɛ ɖɩtaala kazandʋ nɛ sɔnzɩ nzɩ sɩɩɖʋʋ Yehowa hɩɖɛ yɔ? Pɩtɩpɔzɩ kpa se ɖɩsɔɔ lɩmaɣza wena Yehowa wɛnɩ ­lakasɩ nzɩ sɩ-yɔɔ yɔ. Lɔŋ tasʋʋ mbʋ pɩwɛ ɛgbɛyɛ takayɩsɩ taa pɩlɩɩnɩ ɖenɖe ɛjaɖɛ yɔɔ mba kazandʋ ndɩ ndɩ lɩnaa yɔ, pɩpɩzɩɣ nɛ pɩsɩnɩ-ɖʋ. Ye ɖɩtɔzʋʋ mbʋ pʋyɔɔ Bibl heyiɣ-ɖʋ se ɖɩtaala kazandʋ ndʋ yɔ pɩ-yɔɔ yɔ, pɩsɩɣnɩ-ɖʋ nɛ ɖa-taa tɛ se ɖɔ-ɖɔnɛ wɛɛ nɛ ­“piɖeɣni Kɩbaɣlʋ.” (Efɛz. 5:​10) Ye ɖɩtaɣ liu ­Yehowa nɛ e-toovenim tɔm yɔ, pɩsɩɣnɩ-ɖʋ nɛ ɖɩtaatɔlɩ “ɛyʋ sɔɔndʋ seu” kpaca taa.​—Adu. 29:25. w18.11 11 § 10, 12

Alɩwaatʋ ndʋ ɖɩkatɩɣ lɛɣzɩtʋ natʋyʋ tuda yɔ, sɔɔndʋ pɩzɩɣ nɛ tɩkpa-ɖʋ nɛ ɖɩmaɣzɩ se ɛzɩ ɛbɛ pɩkaɣ-ɖʋ tɛmnʋʋ; nɛ pɩlakɩ pɩpɩzɩɣ mbʋ lɛ pɩpɩzɩɣ nɛ pitibi-ɖʋ yɔɔɔ. Pɩpɩzaɣ se pɩtalɩ Yosɛɛfʋ mbʋ. Etiyele se pɩtalɩ-ɩ mbʋ, ɛlɛ ɛkpaɣ lɩmaɣzɩyɛ se ɛlakɩ nabʋyʋ wɛtʋ ndʋ tɩ-taa ɛɛwɛ yɔ, nɛ ɛha nabʋyʋ Yehowa se ɛlɛ ɛwazɩ pɩ-yɔɔ. Paa ɛɛwɛ salaka taa yɔ, ɛlabɩ tʋma wena payɩ salaka yɔɔ cɔnɩyʋ ñʋʋdʋ ɖʋwaɣ-ɩ yɔ ɛzɩ ɛɛlabʋ alɩwaatʋ ndʋ ɛɛwɛ Potifaarɩ ɖɩɣa taa yɔ. (Kiɖe 39:​21-​22) Ɛzɩ Yosɛɛfʋ yɔ, wɛtʋ natʋyʋ pɩzɩɣ nɛ tɩtalɩ-ɖʋ nɛ ɖɩɩsɩŋ se ɛbɛ ɖeyi ɖeyi pɩwɛɛ se ɖɩla. Ɛlɛ ye ɖɩɖʋ suuɖu nɛ ɖɩñaɣ pana nɛ ɖɩla ɖo-ɖoŋ ɖeɖe wɛtʋ ndʋ tɩ-taa yɔ, ɖɩhaɣ nabʋyʋ Yehowa se ɛwazɩ pɩ-yɔɔ. (Keɣa 36:⁠5) Pɩkɛ toovenim se nabʋyʋ taa cɛzɩm yaa takɩm nabʋyʋ pɩzɩɣ nɛ pɩtalɩ-ɖʋ nɛ ɖɩɩnaɣ se ɖɩla ɛzɩma. Ɛlɛ ɛzɩ apostoloo Pɔɔlɩ yɔɔdʋʋ yɔ, paa ɖa-kaɖɛ ɛɛpaɣlɩ ɛzɩma yɔ, ɖɩɩlɔʋ lidaʋ. (1 Kɔr. 10:13) Ye ɖɩkam ñʋʋ nɛ ɖɛ-Ɛsɔ sɛtʋ tʋmɩyɛ yɔ, Pɔɔlɩ tɔm tʋnɛ tɩpɩzɩɣ nɛ tɩkɛ toovenim ɖɔ-hɔɔlʋʋ taa. w18.10 29 § 11, 13

Ye ɛyʋ weyi ŋsɩmɩ-ɩ nɛ ŋñaŋɩ-ɩ camɩyɛ yɔ, ɛsɔ ña-hɩɖɛ yaa ɛɛtɩɩtasɩɣ tɔzʋʋ ñɔ-yɔɔ, ɛzɩma pɩlakɩ-ŋ? Pɩtʋʋ fɛyɩ se pɩpɩzɩɣ nɛ pitibi-ŋ yɔɔɔ. Ɛbɛ yɔɔ? Mbʋ pʋyɔɔ yɔ ɖa-taa paa anɩ sɔɔlaa se ɛ-tɔm ɛkɛdɩnɩ lalaa. Ðɩtɩsɔɔlɩ se lalaa ɛsɩm-ɖʋ yem, ɛlɛ ɖɩsɔɔlaa ɖɔɖɔ se patɩlɩ ɛyʋ weyi ­ɖɩkɛnaa yɔ nɛ pɛwɛɛnɩ ɛsɩmɩyɛ mbʋ ɖɩtɛm labʋ yɔ pɩ-yɔɔ. (Kɩg. 11:16; Yɔɔb 31:6) Paa Ɛsɔ ɛlɩzɩ-ɖʋ nɛ ɛɖʋ ɖa-taa se ɖɩsɔɔlɩ wɛtʋ ndɩ ndɩ yɔ, ɛzɩma ɖɩtɩtalɩ pilim yɔ, piyeki nɛ ɖɩɩwɛɣnɩ lɩmaɣza kɩbana ɛzɩma ɖɩsɔɔlaa se lalaa ɩsam-ɖʋ yɔ pɩ-yɔɔ. Pɩpɩzɩɣ nɛ piyele nɛ ɖɩsɔɔlɩ ɛsɩmɩyɛ nɖɩ ɖɩtɩmʋna yɔ. Sataŋ ɛjaɖɛ tuzuu-ɖʋ se ɖɩñɩnɩ hɩɖɛ sɛʋ nɛ ɛsɩmɩyɛ, piyeki nɛ ɖɩɩkaŋ ɖa-lɩmaɣza Yehowa, ɖa-Caa weyi ɛwɛ ɛsɔdaa nɛ ɛmʋnaa se ɖɩwɩlɩ-ɩ ɛsɩmɩyɛ nɛ ɖɩsɛɛ-ɩ yɔ ɛ-yɔɔ.​—Natʋ 4:​11. w18.07 7 § 1-2

Pɩɩɖɩɣzɩɣ-ɖʋ se Sataŋ nɛ e-aleewaa patɩŋɩɣnɩ ɛjaɖɛ yɔɔ ɖoŋ tɩnaa yɔɔ nɛ posusuu cɛtɩm tɔm ndʋ ‘tipeɣziɣ’ ɛyaa yɔ. (1 Tim. 4:​1, 2) Kɔzɩ kɔzɩ lɛ, cɛtɩm Ɛsɔ sɛtʋ agbaa ñʋndɩnaa lakasɩ kɛ kɩdɛkɛdɩm sɔsɔm mbʋ pʋyɔɔ yɔ, mba petisiɣ pɔ-tɔm yɔɔ yɔ pelesiɣ ­tamtam wazasɩ nzɩ papɩzaɣ se pehiɣ yɔ. Ye nɔɔyʋ etisi cɛtɩm wɩlɩtʋ natʋyʋ yɔɔ nɛ ɛlakɩ mbʋ Ɛsɔ tɩsɔɔlɩ-pʋ yɔ, ɛpɩzɩɣ nɛ elesi wezuu maatɛŋ ŋgʋ ɛpɩzaɣ se ehiɣ yɔ. (Ozee 4:9) Yesu ­kaanawa se ɛ-alɩwaatʋ taa Ɛsɔ sɛtʋ ñʋndɩnaa kaatɔlɩ kɩdɛkɛdɩm sɔsɔm mbʋ pɩ-taa. Eheyi-wɛ kpayɩ se: ­“Ileba, Takayɩsɩ mayaa nɛ Farɩsɩ mba, nɔsɩ naalɛ tɩnaa mɩ, iyendiɣ lɩm sɔsɔm yɔɔ nɛ ajɛɛ taa se ɩpɩsɩ sɩɩnaa layʋ kʋyʋm laŋɩyɛ, nɛ pʋwayɩ lɛ ɩpɩsɩ-ɩ kɩdɛkɛdʋ, kɩdɛkɛdʋ tam nabʋlɛ nɛ pɩkɩlɩ mɩ-maɣmaɣ.” (Mat. 23:15) Yesu heyi-wɛ kpayɩ se pa-lakasɩ nzɩ sɩtɩmʋna. Toovenim lɛ, Eleeu weyi ɛkɛ ɛyaa kʋyʋ yɔ, e-piya pɛkɛnaa.​—Yoh. 8:​44.w18.10 7 § 5-6

Suwe Yesu caɣaɣ yɔɔdʋʋ? Ɛtasɩ yɔɔdʋʋ se: “Ɩmɛyɩ nɛ ɩpaa, mbʋ pʋyɔɔ yɔ mɩ-kɩhɛyʋʋ paɣlɩ ɛsɔdaa, mbʋ ɖɔɖɔ paawɩlɩ ñaŋ nayaa, mɩ-nɔɔɖɛyaa.” (Mat. 5:​12) Pamabɩ apostoloowaa nɛ paɖʋ-wɛ paɣtʋ se pataatasɩ tɔm susuu lɛ, “palɩnɩ tɔm tɩŋ tɛɛ nɛ amɛya.” Toovenim taa lɛ, paawɛɛ nɛ panɩɣ siziŋ ɛzɩma paamabɩ-wɛ yɔ pɩ-yɔɔ. Ɛlɛ pa-taa kaawɛ leleŋ “se paɖʋ-wɛ hɩɖɛ nɛ pawɩlɩ-wɛ kʋñɔŋ Yesu hɩɖɛ yɔɔ.” (Tʋma 5:​41) Sɔnɔ, Yehowa samaɣ ɖɔkʋʋ ka-tɩ nɛ taa leleŋ alɩwaatʋ ndʋ panazɩɣ-kɛ Yesu hɩɖɛ yɔɔ yaa alɩwaatʋ ndʋ kakatɩɣ kala ndɩ ndɩ yɔ. (Yak. 1:​2-4) Ɛzɩ apostoloowaa yɔ, ɖɩnɩɣ siziŋ alɩwaatʋ ndʋ ɖɩkatɩɣ kala yɔ. Ɛlɛ ye ɖɩɖɔkɩ ɖe-siɣsiɣ wɛtʋ Yehowa ɛsɩndaa, kala ana a-taa yɔ, ɛsɩɣnɩ-ɖʋ nɛ ɖɩɖɔkɩ ɖa-tɩ nɛ abalɩtʋ. Ye ɖɔ-tɔm ɛkɛdɩnɩ “Ɛsɔ koboyaɣ tʋ” yɔ, ɖɩpɩzɩɣ nɛ ɖɩwɛɛ koboyaɣ taa paa panazɩɣ-ɖʋ ɖɛ-Ɛsɔ sɛtʋ yɔɔ yaa paa ɖɔ-hɔʋ taa ñɩma ɩkaɖɩɣnɩ-ɖʋ yɔ.​—1 Tim. 1:​11. w18.09 21 § 18-​20

Ɛyaa sakɩyɛ wɛ ɛsɩñɩŋɩyɛ taa siŋŋ nɛ sakɩyɛ maɣzɩɣ se wezuu caɣʋ nɩ-wɛ. (2 Tim. 3:​1-5) Akɔnta nakʋyʋ wɩlaa se paa pɩnaɣ ŋga lɛ, ɛyaa mba pɛcɛzɩ 800 000 yɔ pakʋʋ pa-tɩ, pʋ-tɔbʋʋ se kɛlɛmwaa 40 taa lɛ, ɛyʋ kʋɖʋm kʋʋ ɛ-tɩ. Pɩlabɩ pʋtɔdɩyɛ se halɩ Krɩstʋ ñɩma nabɛyɛ wɛ pa-taa. Paa pɩɩlakɩ ɖo-koobiya ɛzɩ wezuu caɣʋ lɩ-wɛ sɔŋ yɔ, pa-taa sakɩyɛ wɛ wɛtʋ kaɖɛ ñɩndʋ taa nɛ pɩpɔzʋʋ se ɖɩkpazɩ-wɛ ɖoŋ nɛ sɔɔlɩm. Pɛwɛɛ nɛ panazɩɣ nabɛyɛ nɛ pohoŋuu-wɛ pe-tisuu yɔɔ. Lalaa lɛ, pakaɖɩɣnɩ-wɛ yaa pɔyɔɔdʋʋ pɔ-yɔɔ tɔm kɩdɛkɛdɩtʋ pa-tʋmɩyɛ taa. Pɩtɩla yɔ, ɛzɩma pañɩkɩɣ pɔ-yɔɔ se pala tʋmɩyɛ halɩ pɩkpɛndɩnɩ hɛzʋʋ alɩwaatʋ taa yɔ, piyeki nɛ pɩnɩɣ-wɛ nɛ pɩhaɣ-wɛ ɛsɩñɩŋɩyɛ. Lalaa ɖɔɖɔ lɛ, ɖɩɣa taa tʋma sakɩyɛ labʋ haɣnɩ-wɛ ɛsɩñɩŋɩyɛ; yaa ɛzɩma pa nɛ mba pɔɖɔkɩ nesi yɔ patɩkɛ Krɩstʋ ñɩma nɛ paba kaɖɩɣnɩ-wɛ yɔ, piyeba nɛ wezuu caɣʋ lakɩ-wɛ kaɖɛ. Kaɖɛ wɛtʋ tʋnɛ nɛ lɛɛtʋ ɖɔɖɔ yeba nɛ pɩnɩɣ ɛgbɛyɛ taa koobiya sakɩyɛ nɛ pitiki-wɛ yɔɔɔ. w18.09 13 § 3, 5

Lʋlɩyaa Krɩstʋ ñɩma nɛ Yehowa ­palakɩ tʋmɩyɛ, alɩwaatʋ ndʋ peseɣtiɣ pe-piya se sɩɖʋ sɩ-tɩ fezuu taa kaɖʋsɩ yɔ. Lʋlɩyaa mba palabɩ mbʋ yɔ, ­pʋwayɩ pɔkɔm nɛ pana se pa-pɩyalaa nɛ pɛ-pɛlaa ha pa-tɩ faaa nɛ palakɩ alɩwaatʋ tɩŋa Ɛsɔ sɛtʋ tʋmɩyɛ poliŋ ageeta taa. Pa-taa nabɛyɛ kɛ Ɛsɔtɔm tiyiyaa, lalaa ñɛkɛ nʋmɔʋ lɩzɩyaa ageeta wena a-taa tɔm susuyaa tɩɖɔɔ yɔ nɛ lalaa ñalakɩ tʋmɩyɛ Betɛɛlɩwaa taa. Pɛwɛ poliŋ nɛ pɔ-hɔʋ taa ñɩma, pʋyɔɔ lɛ pa nɛ wɛ paapɩzɩɣ nɛ pakatɩɣ ɖoŋ ɖoŋ. Paa mbʋ yɔ, lʋlɩyaa mba papɩ fezuu taa yɔ, peseɣtiɣ pe-piya se sɩñɔɔnɩ ­alɩwaatʋ tɩŋa Ɛsɔ sɛtʋ tʋma. Ɛbɛ yɔɔ? Mbʋ pʋyɔɔ yɔ, panaɣ pe-piya sɩɣ Kewiyaɣ tʋma ­kajalaɣ lone taa lɛ, pɩlakɩ-wɛ leleŋ siŋŋ. Pɩtɩla pɩlakɩ lʋlɩyaa mba pa-taa sakɩyɛ ɛzɩ pɩɩlabʋ Hana weyi ­ɛɛyɔɔdaa se ‘ɛɖʋzɩ’ ɛ-pɩyalʋ Samɩyɛɛlɩ Yehowa nesi tɛɛ yɔ. Pɩkɛnɩ lʋlɩyaa waɖɛ sɔsɔɖɛ kpem se peseɣti pe-piya mbʋ. Mbʋ haɣnɩ-wɛ taa leleŋ nɛ ­pɩkpaɖɩ pɩtɩŋa.​—1 Sam. 1:​28. w18.08 24 § 4

Yesu tɩyɔɔdɩ se ñɩm tʋ ɛɛpɩzɩɣ nɛ ɛsʋʋ Kewiyaɣ taa. Mbʋ ɖɔɖɔ ɛyɔɔdaa se: “Koboyaɣ tɩnaa kɛlɛ kʋñɔndɩnaa mɩ, mbʋ pʋyɔɔ yɔ mɩtɩnɩ Ɛsɔ Kewiyaɣ.” (Luka 6:​20) Ɛlɛ tɔm tʋnɛ tɩtɩwɩlɩ se kʋñɔndɩnaa tɩŋa kaamʋ Yesu tɔm nɛ papɩsɩ ɛ-tɔm kpɛlɩkɩyaa. Kʋñɔndɩnaa sakɩyɛ tɩmʋ ɛ-tɔm. Tɔm tobi lɛ se, ɖɩɩpɩzɩɣ nɛ ɖɩtɩŋnɩ ñɩm yaa kʋñɔndʋtʋ yɔɔ nɛ ɖɩtɩlɩ ɛzɩma ɛyʋ nɔɔyʋ nɛ ­Yehowa pa-taabalɩyɛ wɛɛ yɔ. Ða-taa wɛ leleŋ se koobiya sakɩyɛ mba pɛwɛ Krɩstʋ ɛgbɛyɛ taa yɔ, paa pa-taa lalaa ɛkɛ kʋñɔndɩnaa nɛ lalaa ñɛkɛ ñɩm tɩnaa yɔ pa-tɩŋa pɔsɔɔlɩ Yehowa nɛ pa-laŋɩyɛ pilim. Bibl heyiɣ ñɩm tɩnaa se “pataakpaɣ pe-lidaʋ pilim nɛ pepi mbʋ pɩkaɣ tɛm yɔ pɩ-tɛɛ, ɛlɛ pataa Ɛsɔ na liu.” (1 Tim. 6:​17-​19) Nɛ kiseɣtiɣ ñɩm tɩnaa nɛ kʋñɔndɩnaa mba pɛwɛ Ɛsɔ samaɣ taa yɔ se pakpa pa-tɩ nɛ liidiye laɣzaɣ. (1 Tim. 6:​9, 10) Ye ɖɩnaɣ ɖo-koobiya ɛzɩ Yehowa naɣʋ-wɛ yɔ, pɩwɛɣ-ɖʋ kaɖɛ se ɖɩwɛɛnɩ pɔ-yɔɔ lɩmaɣza kɩdɛkɛda pɩlɩɩnɩ ñɩm mbʋ pɛwɛna yaa pɛfɛyɩna yɔ pɩ-yɔɔ. w18.08 10-​11 § 11-​12

Yehowa ɖʋ-ɖʋ hɩɖɛ nɛ ɛyaa-ɖʋ se ɖɩkɛ ɛ-samaɣ, pʋyɔɔ lɛ pɩtʋʋ fɛyɩ se ɖɩsɔɔlɩ siŋŋ se ɖɩwɩlɩ-ɩ ɖɛ-ɛsɩmɩyɛ pɩ-yɔɔ. Ye ɖɩtɩlaa se ɛnʋ tɩnɩ-ɖʋ yɔ, piyeki nɛ ɖɩha-ɩ ɖa-tɩ faaa, nɛ pɩwɩlɩɣ se ɖɩwɛ lɛɣtʋ siŋŋ. Ðɩpaɖɩɣ kɩdɛkɛdɩm siŋŋ. Nɛ ɖɩsɔɔlɩ ɖo-koobiya nɛ ɖɩñaŋ-wɛ, mbʋ pʋyɔɔ yɔ ɖɩnawa se mba ɖɔɖɔ pɛkɛ Yehowa pʋyʋ. (Roma 12:10) Bibl yɔɔdaa se: “Yehowa ɛɛlɔʋ ɛ-samaɣ.” (Keɣa 93:14) Pɩwɩlɩɣ se paa wɛtʋ ndʋ taa ɖɩwɛɛ yɔ, Yehowa kaɣ ɖɔ-cɔlɔ wɛʋ nɛ ɛsɩnɩ-ɖʋ. Halɩ sɩm maɣmaɣ ɛɛpɩzɩɣ nɛ pɩɖɩɣ Yehowa nʋmɔʋ se ɛsɔɔlɩ-ɖʋ. (Roma 8:​38, 39) “Wezuu taa nɛ sɩm taa lɛ, ɖɩkɛ [Yehowa] pʋyʋ.” (Roma 14:8) Ðɩɖaŋ kpam se ɖɩna alɩwaatʋ ndʋ Yehowa kaɣ fezuu ɛ-taabalaa siɣsiɣ ñɩma mba pasɩba yɔ. (Mat. 22:32) Pʋcɔ nɛ alɩwaatʋ ndʋ tɩtalɩ lɛ, Yehowa wɛɛ nɛ ɛwazɩɣ-ɖʋ siŋŋ. Ɛzɩ Bibl yɔɔdʋʋ yɔ, “kanɩ leleŋ, samaɣ ŋga [kɛ-Ɛsɔ kɛ Yehowa] yɔ, nɛ ɛjaɖɛ nɖɩ Ɛsɔ yaɣ-ɖɩ se ɛ-pʋyʋ yɔ.”​—Keɣa 32:12. w18.07 26 § 18-​19

Ɛyaa nabɛyɛ pɩzɩɣ nɛ pamaɣzɩ se sukuli labʋ nɛ tʋmɩyɛ labʋ mbʋ yɔ hɔɔlɩŋ taa lɛ, pa-maɣmaɣ pɩwɛɛ se pɛsɛtɩ pa-tɩ tɔm; pʋyɔɔ lɛ, pɛwɛnɩ waɖɛ se palɩzɩ mbʋ mbʋ pɛ-ɛhʋyɛ haɣ-wɛ nʋmɔʋ se pala yɔ. Pɩtɩla yɔ, pɛwɛɛ nɛ pamaɣzɩɣ tɔm ndʋ Pɔɔlɩ heyi Kɔrɛntɩ ñɩma pɩlɩɩnɩ tɔɔnaɣ tɔɔʋ yɔɔ yɔ tɩ-yɔɔ. Ɛyɔɔdaa se: “Pɩlabɩ ɛzɩma nɛ man-tɩ yɔɔ wɛtʋ lɩɣnɩ ɛyʋ lɛlʋ laŋɩyɛ taa maɣzɩm cɔlɔ?” (1 Kɔr. 10:29) Pɩkɛ toovenim se ɖɩwɛ ɖa-tɩ yɔɔ, pʋyɔɔ lɛ ɖɩwɛnɩ waɖɛ se ɖɩkpaɣ ɖa-maɣmaɣ ɖa-lɩmaɣza; paa mbʋ yɔ sukuli nɛ tʋma labʋ hɔɔlɩŋ taa lɛ, ɖɩtaasɔɔ se ɖa-tɩ yɔɔ wɛʋ mbʋ pɩwɛnɩ kamasɩ nɛ lɩmaɣza wena ɖɩkpakɩɣ yɔ apɩzɩɣ nɛ akɔnɩ-ɖʋ wazasɩ yaa kʋñɔmɩŋ. Pʋyɔɔ Pɔɔlɩ kaacalɩnɩ yɔɔdʋʋ sɔnɔ evemiye mayaɣ taa tɔm. Tɔm tʋnɛ tɩsɩɣnɩ-ɖʋ se ɖɩtɩlɩ se paa ɖɩwɛnɩ waɖɛ se ɖɩkpaɣ lɩmaɣza wena ɖɩsɔɔlaa yɔ yɔ, hɔɔlɩŋ nɩɩyɩ wɛɛ nɛ ɩ-tɔm cɛyɩ ɖe-wezuu caɣʋ taa nɛ pɩmʋnaa se ɖɩmaɣzɩ ɩ-yɔɔ nɛ pɩkɩlɩ mbʋ ɖɩsɔɔlaa yɔ pɩ-yɔɔ. w18.04 10 § 10

Sɔnɔ Krɩstʋ tʋ nɔɔyʋ pɩzɩɣ nɛ ɛpaɣzɩ wɛnʋʋ lɩmaɣza kɩdɛkɛda naayɛ nɛ halɩ ɛmaɣzɩ se eɖiɣni Yehowa sɛʋ. (Yud. 11) Nɔɔyʋ pɩzɩɣ nɛ ɛpaɣzɩ wɛnʋʋ wezuu kɩdɛkɛdʋʋ caɣʋ lɩmaɣza, yaa ­ɛpaɣzɩ e-koobu nɔɔyʋ paɖʋʋ. (1 Yoh. 2:​15-​17; 3:​15) Nɔɔyʋ ɛwɛnɩ lɩmaɣza ana yɔ, pɩpɩzɩɣ pituzi-i nɛ ɛla kɩdɛkɛdɩm. Nɔɔyʋ pɩzɩɣ nɛ ɛwɛɛnɩ lɩmaɣza ana, ɛlɛ ɛwɛ kpekpeka tɔm susuu taa nɛ ɛɛfɛɣ ­kediɣzaɣ nakɛyɛ ɖɔɖɔ. Ɛyaa ­lalaa ɛɛnaɣ ndʋ ɖɩmaɣzɩɣ yaa mbʋ ɖɩlakɩ nabʋyʋ taa yɔ, ɛlɛ Yehowa naɣ pɩtɩŋa nɛ ɛsɩma ɖɔɖɔ se ɖɩwɛ ɛ-hɔɔlʋʋ yɔɔ yaa ɖɩfɛyɩ. (Yer. 17:​9, 10) Paa mbʋ yɔ, Yehowa ɛɛlɔʋ lidaʋ ŋgʋ ɛwɛnɩ ɖɔ-yɔɔ yɔ lɛɛ lɛɛ. Ye nɔɔyʋ ɛpaɣzɩ nɩŋgbanzɩ nasɩyɩ kpɛzʋʋ nɛ ɛñɩnɩɣ se eposini Ɛsɔ yɔ, Yehowa heyiɣ-i lɛɛ lɛɛ se: ‘Pɩsɩ mɔn-cɔlɔ.’ Kɔzɩ kɔzɩ alɩwaatʋ ndʋ ɖɩkatɩɣ kala naayɛ yɔ, Yehowa sɔɔlaa se ɖɩpaɖɩ kɩdɛkɛdɩm. (Iza. 55:7) Ye ­ɖɩlakɩ mbʋ yɔ, ɛkaɣ wɛʋ ɖɔ-hɔɔlʋʋ yɔɔ nɛ ɛkpazɩ-ɖʋ ɖoŋ fezuu taa, lɩmaɣza taa nɛ tomnaɣ yɔɔ nɛ ɖɩpɩzɩ ‘ɖɩñazɩ’ mbʋ pɩpɩzɩɣ nɛ pituzi-ɖʋ nɛ ɖɩtɔlɩ ­kɩdɛkɛdɩm taa yɔ.​—Kiɖe 4:7. w18.07 18 § 5-6