Novembre

Ye ŋkɛ lʋlɩyʋ yɔ, sɩnɩ ñe-piya nɛ sɩñɔɔzɩ tɔm cosuu mbʋ pɩlakɩ nɔɔ kʋɖʋmaɣ nɛ sɩ-pɩnzɩ yɔ. Nabʋyʋ taa, kpɛlɩkʋʋ tukuuni tɔm kɩcɛyɩtʋ ɛzɩ nesi ɖɔkʋʋ yaa wezuu kɩbaŋʋ caɣʋ yɔɔ tɔm mbʋ yɔ; paa mbʋ yɔ, pɩtɩla tayʋʋ kʋɖʋm yaa naalɛ wɛɣ kpɛlɩkʋʋ mbʋ pɩ-taa nɛ paatazɩɣ pɩ-taa lɛ piya pɩzɩɣ nɛ sicosi tɔm. Pɩtasɩ lɛ, pɩtɩla paa sɩkpazɩɣ nesi yɔ, pɩtɩkɛ paa ɛzɩmtaa pakaɣ-sɩ yaʋ. Sɩnɩ ñe-piya nɛ sɩtɩlɩ mbʋ pʋyɔɔ pɩwɛ mbʋ yɔ. Ye ŋlɩzɩ-sɩ pɩ-taa mbʋ yɔ, pɩpɩzɩɣ piyele nɛ piitiki-sɩ yɔɔɔ alɩwaatʋ ndʋ payaɣ lalaa nɛ paayaɣ-sɩ yɔ. (1 Tim. 6:18) Ða-tɩŋa ɖɩpɩzɩɣ nɛ ɖɩñɔɔzɩ tɔm cosuu mbʋ pɩkpazɩɣ koobiya Krɩstʋ mba lalaa ɖoŋ nɛ pɩɖʋʋ hɩɖɛ Yehowa yɔ. (Adu. 25:11) Nabʋyʋ taa ɖɩpɩzɩɣ nɛ ɖɩyɔɔdɩ mbʋ pɩtalɩ-ɖʋ ɖe-wezuu caɣʋ taa yɔ pɩ-tɔm tobi; paa mbʋ yɔ, pɩwɛɛ se ɖɩkpa ɖa-tɩ nɛ ɖɩtaakɩlɩɣ yɔɔdʋʋ ɖa-maɣmaɣ ɖɔ-yɔɔ tɔm. (Adu. 27:2; 2 Kɔr. 10:18) Ɛlɛ ɖɩñakɩ pana se ɖɔ-tɔm cosuu ɛhɔ ɛyaa lɩmaɣza nɛ piwoni Yehowa, ɛ-Tɔm, nɛ ɛ-sɛyaa pɔ-yɔɔ.—Natʋ 4:11. w23.04 24-25 § 17-18

Pɩsa nɛ ɖiwolo pɩ-yɔɔ nɛ ɖɩcaɣnɩ ɖɛ-ɛsa nɛ ɖɩɖɔkɩ ɖa-maɣzɩm lɛ, pɩcɛyaa se ɖɩwɛɛnɩ sɔɔlɩm. (Mat. 22:​37-39) Ye ɖɩsɔɔlɩ Ɛsɔ yɔ, pɩsɩɣnɩ-ɖʋ nɛ ɖiwolo tɔm susuu yɔɔ paa piyeki se ɖɩkatɩ kala yɔ. (2 Tim. 1:​7, 8) Ðɩsɔɔlɩ ɛyaa mba paasɛɣ Yehowa yɔ, pʋyɔɔ lɛ ɖiwoki pɩ-yɔɔ nɛ ɖisusuu tɔm; halɩ ɖɩtɩŋɩɣnɩ takayɩsɩ maʋ nɛ kaŋgalaafu yɔɔ ɖɔɖɔ nɛ ɖɩlɩzɩɣ aseɣɖe. Ɛyaa mba ɖisusuu-wɛ tɔm yɔ, ɖɩtaɣ liu se wiɖiyi pakaɣ lɛɣzʋʋ nɛ papaɣzɩ labʋ mbʋ pɩtʋʋzaa yɔ. (Ezek. 18:​27, 28) Ðɩsɔɔlɩ ɖɔɖɔ ɖo-koobiya Krɩstʋ mba. Ðɩlɩzɩɣ sɔɔlɩm mbʋ nɛ ɖɩwɩlɩɣ alɩwaatʋ ndʋ ‘ɖiseɣtiɣ ɖama nɛ ɖɩkpazɩɣ ɖama ɖoŋ’ yɔ. (1 Tes. 5:11) Ɛzɩ sɔɔjanaa mba paɖʋʋ ɖama nesi you taa yɔ, ɖa ɖɔɖɔ ɖɩkpazɩɣ ɖama ɖoŋ. Ða-taa nɔɔyʋ ɛɛkaɣ ɖʋʋ ɛ-taa faŋŋ pʋcɔ nɛ ɛɖʋ e-koobu ɖɩwɩzɩyɛ yaa ɛhɛyɩ-ɩ kɩdɛkɛdɩm kɩdɛkɛdɩm lone taa. (1 Tes. 5:​13, 15) Ye ɖɩñaŋ koobiya mba peɖiyiɣ ɛgbɛyɛ yɔ, ɖɩwɩlɩɣ ɖɔɖɔ se ɖɩwɛnɩ sɔɔlɩm.—1 Tes. 5:12. w23.06 10 § 6; 11 § 10-11

Nʋmɔŋ weyi ɩ-yɔɔ ɖɩpɩzɩɣ ɖɩtɩŋna nɛ ɖɩcɛyɩsɩ ɖe-tisuu yɔ ɩ-taa nakʋyʋ lɛ se ɖɩmaɣzɩ kɩhɛyʋʋ pʋ-ñʋʋ taa yɔɔ. Kɩhɛyʋʋ pʋ-ñʋʋ taa sɩɣnɩ-ɖʋ se ɖa-taa ɛtɛ se Ɛsɔ tamasɩ kaɣ labʋ. Alɩwaatʋ ndʋ ɖɩmaɣzɩɣ mbʋ pʋyɔɔ Ɛsɔ hɛyɩ kɩhɛyʋʋ pʋ-ñʋʋ taa nɛ ɛzɩma ɛhɛyɩ-kʋ yɔ pɩ-yɔɔ camɩyɛ yɔ, pɩcɛyɩsɩɣ ɖe-tisuu se tamaɣ ŋga Ɛsɔ laba se ɖɩkaɣ caɣʋ wezuu maatɛŋ ɛjaɖɛ kɩfaɖɛ taa yɔ kɛkɛ toovenim nɛ kakaɣ labʋ. Ɛbɛ yɔɔ ɖɩpɩzɩɣ nɛ ɖɩyɔɔdɩ mbʋ? Ɛzɩma tɩyɛ Ɛsɔ hɛyɩ kɩhɛyʋʋ pʋ-ñʋʋ taa? Yehowa tiyi ɛ-Pɩyalʋ kʋsɔɔlʋ, ɛ-taabalʋ weyi ɛkɩlɩ sɔɔlʋʋ yɔ se ɛlɩɩnɩ ɛsɔdaa nɛ ɛkɔɔ nɛ palʋlɩ-ɩ tɛtʋ yɔɔ nɛ ɛkɛ ɛyʋ weyi ɛtalɩ pilim yɔ. Alɩwaatʋ ndʋ Yesu kaawɛ tɛtʋ yɔɔ yɔ, ɛɖɔkɩ ɛ-laŋɩyɛ kʋñɔmɩŋ ndɩ ndɩ taa. Pʋwayɩ lɛ ɛnɩɩ siziŋ siŋŋ nɛ ɛsɩ. Kɩhɛyʋʋ ŋgʋ Yehowa hɛyaa yɔ kɩmʋ ñɩm siŋŋ! Ðɛ-Ɛsɔ sɔɔlɩm tʋ ɛɛpɩzɩɣ nɛ ɛha nʋmɔʋ se ɛ-Pɩyalʋ ɛtɔɔ kʋñɔŋ nɛ ɛsɩ nɛ piyele nɛ ɖɩcaɣ wezuu kɩbaŋʋ ŋgʋ kɩwɛ tobi yɔ na. (Yoh. 3:16; 1 Pɩy. 1:​18, 19) Yehowa hɛyɩ kɩhɛyʋʋ ŋgʋ kɩmʋ ñɩm siŋŋ yɔ, pʋyɔɔ lɛ ɛkaɣ yebu nɛ ɖɩpɩzɩ nɛ ɖɩcaɣ wezuu maatɛŋ ɛjaɖɛ kɩfaɖɛ taa. w23.04 27 § 8-9

Ɛzɩ Yehowa sɔɔlaa se efezi ɛyaa mba pasɩba yɔ? Ɛɛɛ pɩtʋʋ fɛyɩ se ɛsɔɔlaa. Ɛtɩŋnɩ fezuu kiɖeɖeu yɔɔ nɛ eyele nɛ Bibl mayaa sakɩyɛ ma tamaɣ ŋga ɛlaba se ɛkaɣ fezuu sɩɖaa cee wayɩ yɔ kɔ-tɔm. (Iza. 26:19; Natʋ 20:​11-13) Nɛ ye Yehowa ɛlabɩ tamaɣ nakɛyɛ yɔ, paa ɛzɩmtaa lɛ eyeki nɛ kalakɩ. (Yoz. 23:14) Toovenim taa lɛ, Yehowa ɖaŋ kpam se efezi sɩɖaa nɛ paɖaɣnɩ wezuu caɣʋ. Iyele nɛ ɖɩna tɔm ndʋ Yɔɔb yɔɔdaa yɔ. Ɛ-taa kaatɛma se paa ɛsɩba yɔ Yehowa kaɣ ɖaɣnʋʋ sɔɔlʋʋ siŋŋ se ɛna-ɩ. (Yɔɔb 14:​14, 15) Yehowa ɖaŋ kpam ɖɔɖɔ se ɛna ɛ-sɛyaa mba payɩ pasɩba yɔ. Ɛɖaŋ kpam se efezi-wɛ nɛ paɖaɣnɩ wezuu caɣʋ nɛ pɛwɛɛ alaafɩya nɛ pɛwɛɛ taa leleŋ taa. Nɛ ɛyaa miiliyaarɩwaa mba pasɩba nɛ patihiɣ waɖɛ se pɛkpɛlɩkɩ Yehowa yɔɔ toovenim tɔm yɔ? Ðɛ-Ɛsɔ kʋsɔɔlʋ sɔɔlaa se efezi-wɛ ɖɔɖɔ. (Tʋma 24 15) Ɛsɔɔlaa se pehiɣ waɖɛ nɛ papɩsɩ ɛ-taabalaa nɛ pacaɣ wezuu tam tam tɛtʋ yɔɔ.—Yoh. 3:16. w23.04 9 § 5-6

Ɛzɩma ŋpɩzɩɣ ŋla nɛ ŋkpazɩ ñe-lidaʋ ɖoŋ? Ye ŋwɛnɩ lidaʋ se ŋkaɣ caɣʋ wezuu maatɛŋ tɛtʋ yɔɔ yɔ, kalɩɣ tɔm ndʋ Bibl yɔɔdʋʋ Paradisuu yɔɔ yɔ nɛ ŋmaɣzɩɣ tɩ-yɔɔ. (Iza. 25:8; 32:​16-18) Maɣzɩ ɛzɩma wezuu caɣʋ kaɣ wɛʋ ɛjaɖɛ kɩfaɖɛ taa yɔ pɩ-yɔɔ. Maɣzɩ se ŋwɛ ɛjaɖɛ kɩfaɖɛ nɖɩ ɖɩ-taa. Ye ɖɩkpakɩɣ alɩwaatʋ ɖoŋ ɖoŋ nɛ ɖɩmaɣzɩɣ ɛjaɖɛ kɩfaɖɛ yɔɔ yɔ, ɖa-kʋñɔmɩŋ kaɣ wɛʋ ɖɛ-ɛsɩndaa ɛzɩ mbʋ ‘pɩwɛ alɩwaatʋ pazɩ nɛ pɩtɩpaɣlɩ yɔ.’ (2 Kɔr. 4:17) Lidaʋ ŋgʋ Yehowa ha-ŋ yɔ, kɩkaɣ yebu nɛ ŋkpa ɖoŋ. Yehowa tɛmɩ-ŋ haʋ mbʋ pɩpɔzʋʋ-ŋ se pɩsa nɛ ŋkpa ɖoŋ yɔ. Ye mbʋ, alɩwaatʋ ndʋ pɩpɔzʋʋ-ŋ ɖoŋ se ŋla tʋmɩyɛ naɖɩyɛ, yaa ŋɖɔkɩ ña-laŋɩyɛ kaɖɛ naɖɩyɛ taa, yaa ŋwɛɛ taa leleŋ taa yɔ, tɩmnɩ Yehowa siŋŋ nɛ ŋkpɛlɩkɩɣ ña-tɩ yɔɔ. Ye ŋlakɩ mbʋ yɔ, Yehowa kaɣ-ŋ sɩnʋʋ. Tisi nɛ ño-koobiya kpazɩ-ŋ ɖoŋ. Kpakɩɣ alɩwaatʋ ɖoŋ ɖoŋ nɛ ŋmaɣzɩɣ ñe-lidaʋ yɔɔ. Ðɩnɛ ɛlɛ, ŋkaɣ ‘kpaʋ ɖoŋ pɩtɩŋnɩ ɖoŋ kpeekpe yɔɔ ɛzɩ Ɛsɔ ɖoŋ sɔsɔŋ pɔzʋʋ yɔ, se pɩsa nɛ ŋɖɔkɩ ña-laŋɩyɛ nɛ suuɖu nɛ taa leleŋ pɩtɩŋa pɩ-taa.’—Kol. 1:11. w23.10 17 § 19-20

Alɩwaatʋ ndʋ ɖɩtɩmɩɣ yɔ, ɖɩwɛnɩ lɩmaɣza sakɩyɛ wena a-yɔɔ ɖɩpɩzɩɣ nɛ ɖɩsɛɛ Yehowa se ɛlabaɣ lɛ yɔ. Ðɩpɩzɩɣ nɛ ɖɩsɛɛ-ɩ wondu kɩbandʋ ndʋ payɩ ɖɩwɛna yɔ tɩ-yɔɔ; mbʋ pʋyɔɔ yɔ paa kʋjɔʋ kɩbaŋʋ ŋgʋ lɛ, kɩlɩɣnɩ ɛ-cɔlɔ. (Yak. 1:17) Kɩɖaʋ nakʋyʋ yɔ: Ðɩpɩzɩɣ nɛ ɖɩsɛɛ-ɩ se ɛlabaɣ lɛ tɛtʋ kajʋka nɛ wondu kɩbandʋ ndʋ ɛlɩzaa yɔ tɩ-yɔɔ. Ðɩpɩzɩɣ nɛ ɖɩsɛɛ-ɩ ɖɔɖɔ se ɛlabaɣ lɛ ɖe-wezuu, ɖɔ-hɔʋ, ɖa-taabalaa nɛ lidaʋ ŋgʋ ɖɩwɛna yɔ kɩ-yɔɔ. Nɛ ɖɩsɔɔlaa se ɖɩsɛɛ Yehowa se ɛlabaɣ lɛ mbʋ pʋyɔɔ yɔ ɛha-ɖʋ waɖɛ se taabalɩyɛ kɩbanɖɛ ɛwɛɛ ɖa nɛ ɩ ɖɛ-hɛkʋ taa. Pɩtɩla pɩpɔzʋʋ se ɖa-taa paa anɩ ɛñaɣ pana nɛ ɛmaɣzɩ nɛ ɛna lɩmaɣza wena a-yɔɔ pɩwɛɛ se ɛwɩlɩ Yehowa ɛ-ɛsɩmɩyɛ yɔ. Ðɩwɛ ɛjaɖɛ nɖɩ ɖɩ-taa yɔ, ɛyaa sakɩyɛ fɛyɩnɩ ɛsɩmɩyɛ. Ðoŋ ɖoŋ lɛ, ɛyaa kaŋ pa-lɩmaɣza mbʋ pɔsɔɔlaa yɔ pɩ-yɔɔ nɛ pɩkɩlɩ mbʋ papɩzɩɣ pala nɛ pawɩlɩ pɛ-ɛsɩmɩyɛ mbʋ pɛwɛna yɔ pɩ-yɔɔ yɔ. Ye ɖiyeba nɛ wɛtʋ ndʋ tɩwɛɛnɩ ɖoŋ ɖɔ-yɔɔ yɔ, tɩkaɣ yebu nɛ ɖɩyɔɔdʋʋ ɖa-kɩcɛyɩm tɔm ɖeke ɖa-adɩma taa. Pɩsa nɛ pɩtaatalɩ-ɖʋ mbʋ lɛ, pɩpɔzʋʋ se ɖiwolo pɩ-yɔɔ nɛ ɖɩñakɩ pana se ɖɩwɛɛnɩ ɛsɩmɩyɛ nɛ ɖɩlɩzɩ-ɖɩ nɛ ɖɩwɩlɩ Yehowa mbʋ payɩ ɛlakɩ-ɖʋ yɔ pɩ-yɔɔ.—Luka 6:45. w23.05 4 § 8-9

Yehowa kɛ ɖa-Caa sɔɔlɩm tʋ, nɛ pʋyɔɔ lɛ ɛtɩsɔɔlɩ se ɛna-ɖʋ kʋñɔŋ taa. (Iza. 63:9) Ɛlɛ pɩtɩkɛ paa ɛzɩmtaa ɛɖɩkɩ nʋmɔʋ kala wena awɛ ɛzɩ pɔsɩ yaa miŋ nzʋlʋmɩyɛ yɔ se ataatalɩ-ɖʋ. (Iza. 43:2) Paa mbʋ yɔ, ɛlabɩ tamaɣ se ɛsɩɣnɩ-ɖʋ nɛ ‘ɖɩtɛzɩ’ kala ana. Nɛ paa kaɖɛ nɖɩ ɖɩkatɩɣ lɛɛlɛɛyɔ yɔ, ɛkaɣ-ɖʋ sɩnʋʋ nɛ ɖiwolo pɩ-yɔɔ nɛ ɖɩsɛɛ-ɩ paa ɛzɩmtaa. Yehowa haɣ-ɖʋ ɖɔɖɔ e-fezuu kiɖeɖeu se kɩsɩnɩ-ɖʋ nɛ ɖɩɖɔkɩ ɖa-laŋa. (Luka 11:13; Filp. 4:13) Mbʋ pɩlɩɣ pɩ-taa yɔ mbʋ yɔ: ɖa-taa pɩzɩɣ nɛ pɩtɛ se ɛkaɣ-ɖʋ haʋ mbʋ ɖeyi ɖeyi pɩpɔzʋʋ-ɖʋ yɔ paa ɛzɩmtaa se pɩsa nɛ ɖɩɖɔkɩ ɖa-laŋɩyɛ nɛ ɖiwolo pɩ-yɔɔ nɛ ɖɩwɛɛ siɣsiɣ ɛ-ɛsɩndaa. Yehowa sɔɔlaa se ɖɩtaa-ɩ liu. (Ebr. 11:6) Nabʋyʋ taa pɩpɩzɩɣ nɛ pɩlabɩ-ɖʋ ɛzɩ kala wena ɖɩkatɩɣ yɔ acɛzɩ-ɖʋ yɔ. Halɩ pɩtɩla ɖɩpaɣzɩɣ pɩtʋʋ nɛ ɖɩpɔzʋʋ ɖa-tɩ se ɛzɩ Yehowa kaɣ-ɖʋ sɩnʋʋ na. Ɛlɛ Bibl sɩɣnɩ-ɖʋ se ɖa-taa ɛtɛ se Ɛsɔ ɖoŋ taa lɛ, ɖɩpɩzɩɣ nɛ ‘ɖɩmaa koloŋa nɛ ka-wayɩ.’ (Keɣ. 18:29) Ye mbʋ, mbʋ ɛzɩ ɖiiyeba nɛ abʋta ana awɛɛ nɛ akpaɣ ɖoŋ lɛ, pɩpɔzʋʋ se ɖɩtɩmnɩ tisuu siŋŋ nɛ ɖɩtaa liu se Yehowa kaɣ cosuu ɖa-adɩma yɔɔ.—Yak. 1:​6, 7. w23.11 22 § 8-9

Tɔm ndʋ pɔyɔɔdʋʋ sɔɔlɩm yɔɔ mbʋ yɔ tɩwɛ ɖeu kpem! Tɔm ndʋ, tɩkpazɩɣ ɖoŋ mɩ mba ɩɖɔkɩ nesi yɔ: Ɩpɩzɩɣ nɛ ɩsɔɔlɩ ɖama siŋŋ. Pʋcɔ nɛ nesi ɖɔkɩyaa nabɛyɛ pɩzɩ nɛ pɔsɔɔlɩ ɖama pe-wezuu caɣʋ kpeekpe lɛ, pɩpɔzʋʋ pana ñaɣʋ. Iyele nɛ ɖɩkpaɣ kɩɖaʋ kʋnɛ: Pʋcɔ nɛ miŋ nɩɩyɩ wolo pɩ-yɔɔ nɛ ɛmʋʋ lɛ, pɩpɔzʋʋ se nɔɔyʋ ɛwɛɛ nɛ ɛɖʋʋ ɖasɩ. Ye nɔɔyʋ ɛɛɖʋʋ ɖasɩ yɔ, miŋ ɛnɩ ɛkaɣ ɖɩm. Mbʋ ɖɔɖɔ sɔɔlɩm mbʋ pɩwɛ halʋ nɛ ɛ-walʋ pɛ-hɛkʋ taa yɔ pɩpɩzɩɣ piwolo pɩ-yɔɔ nɛ pɩwɛɛ ɖoŋ ye pɛcɛyɩsɩɣ taabalɩyɛ nɖɩ ɖɩwɛ pɛ-hɛkʋ taa yɔ. Nabʋyʋ taa, nesi ɖɔkɩyaa nabɛyɛ pɩzɩɣ nɛ peɖiɣzina se sɔɔlɩm mbʋ pɩwɛ pɛ-hɛkʋ taa yɔ pɩwɛɛ nɛ pɩpasɩɣ. Pɩpɩzɩɣ nɛ pɩla mbʋ kɔzɩ kɔzɩ alɩwaatʋ ndʋ pɛwɛɣ liidiye kɛdɛɖaɣ taa, yaa pakatɩɣ kala tomnaɣ taa alaafɩya yaa piya yɔɔ cɔnʋʋ hɔɔlʋʋ taa yɔ. Ye mbʋ, pɩsa nɛ halʋ nɛ ɛ-walʋ peyele nɛ «Ɛsɔ miŋ nzʋlʋma» wɛɛ mʋʋ yɔɔ lɛ, pɩpɔzʋʋ se pa-taa paa weyi lɛ ɛñaɣ pana nɛ ɛcɛyɩsɩ ɛ nɛ Yehowa pɛ-hɛkʋ taa taabalɩyɛ. w23.05 20-21 § 1-3

Pɩsa nɛ ɖɩwɛɛ abalɩtʋ lɛ, ɛbɛ pɩpɔzʋʋ se ɖɩla? Ða-lʋlɩyaa pɩzɩɣ nɛ peseɣti-ɖʋ se ɖɩwɛɛ abalɩtʋ, ɛlɛ paapɩzɩɣ nɛ pɛɖɛzɩ-ɖʋ wɛtʋ kɩbandʋ ndʋ ɛzɩ pɛɖɛzʋʋ hɔʋ ñɩm hɔʋ taa mba yɔ. Ɛyʋ ɛñakɩ pana se ɛwɛɛ abalɩtʋ yɔ, pɩwɛ ɛzɩ ɛyʋ kpɛlɩkʋʋ lɛɣtʋ kɩfatʋ natʋyʋ yɔ. Nʋmɔŋ weyi ɩ-yɔɔ ɖɩpɩzɩɣ ɖɩtɩŋna nɛ ɖɩwɛɛ niye lɛɣtʋ ndʋ tɩ-taa yɔ ɩ-taa nakʋyʋ lɛ se ɖɩcɔŋnɩ wɩlɩyʋ lakasɩ camɩyɛ nɛ ɖɩmaɣzɩɣnɩ-ɩ. Mbʋ ɖɔɖɔ ye ɖɩcɔŋnɩ ɛyaa mba pawɩlɩɣ se pɛwɛ abalɩtʋ yɔ camɩyɛ nɛ ɖɩmaɣzɩɣnɩ-wɛ yɔ, ɖɩpɩzɩɣ nɛ ɖɩwɛɛnɩ wɛtʋ kɩbandʋ ndʋ. Ɛzɩ Danɩyɛɛlɩ yɔ, pɩpɔzʋʋ se ɖɩtɩlɩ Ɛsɔtɔm camɩyɛ, pɩpɔzʋʋ se ɖɩyɔɔdʋʋnɩ Yehowa ɖoŋ ɖoŋ nɛ ɖiheyiɣ-i ɛzɩma ɖeyi ɖeyi pɩlakɩ-ɖʋ yɔ nɛ pɩsa nɛ taabalɩyɛ kɩbanɖɛ wɛɛ ɖa nɛ ɩ ɖɛ-hɛkʋ taa. Nɛ pɩpɔzʋʋ se ɖɩtaa liu Yehowa nɛ ɖa-taa tɛ se ɛkaɣ-ɖʋ sɩnʋʋ paa ɛzɩmtaa. Ðɩnɛ ɛlɛ, alɩwaatʋ ndʋ pɩtakɩɣ ɖe-tisuu yɔ, ɖɩkaɣ wɛʋ abalɩtʋ. Mba pɛwɛ abalɩtʋ yɔ, ɖoŋ ɖoŋ lɛ, lalaa ñaŋ-wɛ. Papɩzɩɣ ɖɔɖɔ nɛ pɔhɔ laŋa kɩbana tɩnaa nɛ pɔkɔnɩ Yehowa cɔlɔ. Toovenim taa lɛ, ɖɩwɛnɩ lɩmaɣza kɩbana wena a-yɔɔ pɩwɛɛ se ɖɩñaɣ pana nɛ ɖɩwɛɛ abalɩtʋ yɔ. w23.08 2 § 2; 4 § 8-9

Grɛɛkɩ tɔm piye nɖɩ pɛɖɛzaa se ‘iwili camɩyɛ’ yɔ, ɖɩwɩlɩɣ ɛzɩma ɛyaa wiliɣ ñɩɣyʋʋ nakʋyʋ se pana se kɩkɛ kɩbaŋʋ yaa kɩtɩkɛ yɔ; pɩpɩzɩɣ nɛ pɩkɛ sika yaa liidiye ñɩɣyʋʋ. Mbʋ ɖɔɖɔ, pɩpɔzʋʋ se ɖiwili tɔm ndʋ ɖɩnɩɣ yaa ɖɩkalɩɣ yɔ camɩyɛ nɛ ɖɩna se tɩkɛ toovenim yaa tɩtɩkɛ. Nɛ halɩ pɩkaɣ cɛyʋʋ se ɖɩla mbʋ nɛ pɩkɩlɩ kʋñɔŋ sɔsɔʋ wɛɣ nɛ kɩñɔtʋʋ lɛ. Mbʋ ɛzɩ ɖitisi tɔm ndʋ payɩ lalaa yɔɔdʋʋ yɔ tɩ-yɔɔ yem lɛ, ɖɩlakɩnɩ tʋmɩyɛ ɖa-maɣzɩm nɛ ɖɩkpakɩɣ tɔm ndʋ ɖɩkalɩɣ yaa ɖɩnɩɣ yɔ nɛ ɖɩmaɣzɩɣnɩ tɔm ndʋ Bibl nɛ Yehowa ɛgbɛyɛ pɔyɔɔdʋʋ yɔ. Ye ɖɩlakɩ mbʋ yɔ, tɔm ndʋ tɩlɩɣnɩ aleewaa cɔlɔ yɔ tɩɩkaɣ-ɖʋ peɣzuu. (Adu. 14:15; 1 Tim. 4:1) Ðɩnawa se Yehowa samaɣ kaɣ hiɣu ñʋʋ yabʋ kʋñɔŋ sɔsɔʋ taa. Ɛlɛ ye pakpaɣ-ɖʋ kʋɖʋm kʋɖʋm yɔ, ɖɩɩsɩŋ mbʋ cee wayɩ kaɣ-ɖʋ kɔnʋʋ yɔ. (Yak. 4:14) Paa mbʋ yɔ, paa kʋñɔŋ sɔsɔʋ ɛkɔma nɛ kɩmaɣnɩ-ɖʋ nɛ ɖihiɣ ñʋʋ yabʋ yaa ye pɩlaba se ɖɩsɩba pʋcɔ nɛ pɩtalɩ mbʋ yɔ, ye ɖiwobi pɩ-yɔɔ nɛ ɖɩɖɔkɩ ɖe-siɣsiɣ wɛtʋ yɔ, Ɛsɔ kaɣ-ɖʋ haʋ wezuu maatɛŋ. Tɛtɛ nɛ ɖa-tɩŋa ɖiwolo pɩ-yɔɔ nɛ ɖɩka ɖa-lɩmaɣza ɖe-lidaʋ kɩbaŋʋ yɔɔ nɛ ɖiwolo pɩ-yɔɔ ɖɔɖɔ nɛ ɖɩñɔɔzʋʋ ɖa-tɩ nɛ ɖɩɖaŋ Yehowa kɩyakʋ! w23.06 13 § 15-16

Bibl taa natʋ tɔm natʋyʋ wɛɛ lɛ, ɖɩɩsɩŋ ɛzɩma tɩkaɣ labʋ yɔ. (Dan. 12:​8, 9) Ɛlɛ paa ɖɩɩsɩŋ ɛzɩma ɖeyi ɖeyi natʋ tɔm natʋyʋ kaɣ labʋ yɔ, pɩɩwɩlɩɣ se tɩɩkaɣ labʋ. Pɩtʋʋ fɛyɩ se ɖɩpɩzɩɣ nɛ ɖɩtaa Yehowa liu se ɛkaɣ yebu nɛ ɖɩtɩlɩ tɔm ndʋ pɩpɔzʋʋ se ɖɩtɩlɩ yɔ alɩwaatʋ ndʋ tɩmʋnaa yɔ tɩ-yɔɔ ɖeyi ɖeyi ɛzɩ ɛɛlabʋ nɛ pɩɖɛɛ yɔ. Ajɛɛ kaɣ mabʋ «laŋhɛzɩyɛ nɛ pɛɛyɛ» kubuka. (1 Tes. 5:3) Pʋwayɩ lɛ, ɛjaɖɛ yɔɔ kominawaa kaɣ kʋyʋʋ cɛtɩm Ɛsɔ sɛtʋ agbaa yɔɔ nɛ paɖɩzɩ-yɛ. (Natʋ 17:​16, 17) Pʋwayɩ lɛ, pakaɣ kʋyʋʋ Ɛsɔ samaɣ yɔɔ. (Ezek. 38:​18, 19) Nɛ pʋwayɩ lɛ, Armaagedɔɔ you kaɣ paɣzʋʋ. (Natʋ 16:​14, 16) Ða-taa pɩzɩɣ nɛ pɩtɛ se pɩkazɩ pazɩ lɛ, lakasɩ nzɩ sɩ-tɩŋa sɩkaɣ labʋ. Pʋcɔ nɛ pɩtalɩ mbʋ lɛ, iyele nɛ ɖiwolo pɩ-yɔɔ nɛ ɖɩwɩlɩɣ ɖa-Caa weyi ɛwɛ ɛsɔdaa yɔ ɖɛ-ɛsɩmɩyɛ. Ðɩpɩzɩɣ nɛ ɖɩla mbʋ ye ɖɩtazɩɣ Bibl taa natʋ tɔm taa camɩyɛ nɛ ɖɩsɩɣnɩ ɛyaa lalaa se pala mbʋ yɔ. w23.08 13 § 19-20

Apostoloo Pɔɔlɩ yɔɔdaɣ tisuu, lidaʋ nɛ sɔɔlɩm pɔ-tɔm lɛ, ɛtɛzɩnaa se wɛtʋ kɩbandʋ ndʋ tɩ-taa lɛ, «sɔɔlɩm kpaɖɩna.» (1 Kɔr. 13:13) Ɛbɛ yɔɔ Pɔɔlɩ yɔɔdɩ mbʋ? Mbʋ pʋyɔɔ yɔ cee wayɩ, pɩɩkaɣ tasʋʋ pɔzʋʋ se ɖɩwɛɛnɩ tisuu tamasɩ nzɩ Ɛsɔ labɩ ɛjaɖɛ kɩfaɖɛ yɔɔ yɔ sɩ-yɔɔ, nɛ pɩɩkaɣ pɔzʋʋ ɖɔɖɔ se ɖɩwɛɛnɩ lidaʋ se tamasɩ nzɩ sɩkaɣ labʋ, mbʋ pʋyɔɔ yɔ sɩtɛm labʋ. Ɛlɛ pɩkaɣ pɔzʋʋ paa ɛzɩmtaa se ɖɩsɔɔlɩ Yehowa nɛ ɛyaa lalaa. Toovenim taa lɛ, sɔɔlɩm mbʋ ɖɩsɔɔlɩnɩ-wɛ yɔ pɩkaɣ kpaʋ ɖoŋ tam. Pɩtasɩ lɛ, sɔɔlɩm wɩlɩɣ se ɖɩkɛ toovenim Krɩstʋ ñɩma. Yesu heyi ɛ-apostoloowaa se: «Ye sɔɔlɩm ɛwɛ mɩ-hɛkʋ taa yɔ, piyeki nɛ ɛyaa tɩŋa tɩlɩ se ɩkɛ mɔn-tɔmkpɛlɩkɩyaa.» (Yoh. 13:35) Pɩtasɩ lɛ, ye ɖɩsɔɔlɩ ɖama yɔ, piyeki nɛ nɔɔ kʋɖʋmaɣ wɛɛ ɖɛ-hɛkʋ taa. Pɔɔlɩ yɔɔdaa se sɔɔlɩm kɛ «nɔɔ kʋɖʋmaɣ tomiye nɖɩ ɖɩtalɩ pilim yɔ.» (Kol. 3:14) Apostoloo Yohanɛɛsɩ ma e-koobiya Krɩstʋ mba se: «Weyi ɛsɔɔlɩ Ɛsɔ yɔ, pɩwɛɛ ɖɔɖɔ se ɛsɔɔlɩ e-koobu.» (1 Yoh. 4:21) Ye ɖɩwɩlɩɣ ɖama sɔɔlɩm yɔ, ɖɩwɩlɩɣ se ɖɩsɔɔlɩ Ɛsɔ. w23.11 8 § 1, 3

Bibl kpaɣ ɖa Krɩstʋ mba ɖe-wezuu caɣʋ nɛ kɩmaɣzɩnɩ seya. Seyaa mba peseɣ nɛ pɛtɛ seya yɔ pakaɣ-wɛ haʋ wezuu maatɛŋ. (2 Tim. 4:​7, 8) Pɩpɔzʋʋ se ɖɩla mbʋ payɩ ɖɩpɩzɩɣ yɔ nɛ ɖiwolo seya yɔɔ mbʋ pʋyɔɔ yɔ seya ana awɩzɩ tɛm. Apostoloo Pɔɔlɩ yɔɔdɩ mbʋ pɩkaɣ-ɖʋ sɩnʋʋ nɛ ɖɩtɛ seya ana yɔ pɩ-tɔm. Eheyi-ɖʋ se: «Ðɩlɔ sʋʋtʋ kpeekpe . . . , nɛ ɖise seya wena pasɩ ɖɛ-ɛsɩndaa yɔ nɛ laŋɩyɛ ɖɔkʋʋ.» Ɛzɩ Pɔɔlɩ caɣ yɔɔdʋʋ se sʋʋtʋ natʋyʋ fɛyɩ se Krɩstʋ tʋ ɛsɩɣlɩ? Aayɩ, pɩtɩkɛ ndʋ ɛcaɣ yɔɔdʋʋ. Ɛlɛ ɛcaɣ ɛyɔɔdɩ se ɖɩlɔ sʋʋtʋ ndʋ payɩ tɩ-tɔm tɩcɛyɩ yɔ. Sʋʋtʋ ndʋ, tɩpɩzɩɣ nɛ tɩpɩsɩnɩ-ɖʋ nɛ wayɩ nɛ tiyele nɛ pɩnɩɩ-ɖʋ. Pɩsa nɛ ɖɩɖɔkɩ ɖa-laŋɩyɛ lɛ, pɩpɔzʋʋ se ɖɩtɩlɩ sʋʋtʋ ndʋ payɩ tɩ-tɔm tɩcɛyɩ nɛ tɩpɩzɩɣ nɛ tɩpɩsɩnɩ-ɖʋ nɛ wayɩ yɔ lɛɛ lɛɛ nɛ ɖɩlɔ-tʋ. Ɛlɛ alɩwaatʋ kʋɖʋmtʋ ndʋ tɩ-taa lɛ, ɖɩtɩsɔɔlɩ se ɖɩlɔ sʋʋtʋ ndʋ pɩpɔzʋʋ se ɖɩsɩɣlɩ yɔ. Ye ɖɩlɔ-tʋ yɔ, ɖɩɩkaɣ pɩzʋʋ nɛ ɖiwolo pɩ-yɔɔ nɛ ɖiseɣ.—2 Tim. 2:5. w23.08 26 § 1-2

Ye ɖɩkɛ mba panɩɣ tɔm taa yɔ, pɩsɩɣnɩ-ɖʋ nɛ ɖɩña lalaa lɩmaɣza. Kɩɖaŋ nɩɩyɩ yɔ: Koobiya halɩñɩma nabɛyɛ sɔɔlɩ taʋ ajana wondu ndɩ ndɩ se pacanɩnɩ pa-tɩ, ŋgʋ lalaa ñatɩsɔɔlɩ mbʋ. Krɩstʋ mba nabɛyɛ sɔɔlɩ sʋlʋm ñɔʋ pazɩ, ɛlɛ lalaa ñalɩzaa se paañɔʋ. Krɩstʋ mba tɩŋa sɔɔlaa se pɛwɛɛnɩ tomnaɣ taa alaafɩya camɩyɛ, ɛlɛ nʋmɔŋ weyi palɩzɩɣ se patɩŋɩɣnɩ ɩ-yɔɔ nɛ pawaa pa-kʋdɔmɩŋ yɔ ɩwɛ ndɩ ndɩ. Ye ɖɩmaɣzɩɣ se ɖɩwɛnɩ toovenim paa ɛzɩmtaa nɛ ɖɩñakɩ pana se ɖɩñɩɣ ɖo-koobiya yɔɔ nɛ pala mbʋ ɖɩlakɩ yɔ, ɖɩpɩzɩɣ ɖiyele nɛ pituuli lalaa nɛ pɩkɔnɩ tayʋʋ. (1 Kɔr. 8:9; 10:​23, 24) Yehowa tɩɖʋ-ɖʋ paɣtʋ wondu ndʋ ɖeyi ɖeyi pɩpɔzʋʋ se ɖisuu yɔ tɩ-yɔɔ, ɛlɛ ɛha-ɖʋ paɣtʋ kila wena a-yɔɔ pɩpɔzʋʋ se ɖɩɖɔ yɔ. Pɩpɔzʋʋ se ɖo-wondu suu ɛɖʋ Ɛsɔ hɩɖɛ nɛ tɩwɩlɩ se ɖɩkɛ mba panɩɣ tɔm taa yɔ, tɩmaɣna nɛ ‘tɩwɩlɩ se ɖɩwɛnɩ maɣzɩm mbʋ pɩmʋnaa yɔ.’ (1 Tim. 2:​9, 10) Pʋyɔɔ lɛ, ɖɩtɩsɔɔlɩ se ɖisuu wondu ndʋ tɩhɔŋ ɛyaa lɩmaɣza se pɩkɔnɩ ɖɔ-yɔɔ yɔ. Bibl paɣtʋ kila kaɣ sɩnʋʋ ɖɔɖɔ ɛgbɛyɛ taa ɛzʋtʋyaa nɛ pa-maɣmaɣ pataaɖʋ pa-paɣtʋ wondu suu nɛ ñɔsɩ hʋm nɛ ñɔsɩ labʋ yɔɔ. w23.07 23-24 § 13-14

Yehowa wɩlɩ-ɖʋ mbʋ pɩwɛɛ se ɖɩla nɛ ɖihiɣ cee wayɩ wazasɩ yɔ. Mba petisiɣ «halʋ kɩmɛlɛŋ» yatʋ yɔ, pañakɩ pana se pacaɣ kʋzʋʋ kɩdɛkɛdʋ wezuu nɛ panɩɩ ‘ki-leleŋ.’ «Pɩlaʋ cukaŋ taa» pɩkaɣ-wɛ tɛmnʋʋ. (Adu. 9:​13, 17, 18) Mba petisiɣ halʋ weyi ɛsɩŋnɩ «lɔŋsɩnɖɛ siŋŋ» yɔ ɛ-yatʋ yɔ, mbʋ pɩtɛŋnɩ-wɛ yɔ pɩwɛ ndɩ kpem! (Adu. 9:1) Yehowa tɩŋnɩ nayʋ Izaayii yɔɔ nɛ ɛyɔɔdɩ se: «Iwelisini-m camɩyɛ nɛ ɩtɔɔ mbʋ pɩwɛ ɖeu yɔ, nɛ ɩkaɣ hiɣu taa leleŋ siŋŋ mbʋ pɩwɛ ñɩm pɩdɩɩfɛyɩ yɔ pɩ-yɔɔ.» (Iza. 55:​1, 2) Ðɩwɛɛ nɛ ɖɩkpɛlɩkɩɣ se ɖɩsɔɔlɩ mbʋ Yehowa sɔɔlaa yɔ nɛ ɖɩpaɖɩ mbʋ ɛpaɖɩɣ yɔ. (Keɣ. 97:10) Nɛ ɖa-taa wɛ leleŋ siŋŋ mbʋ pʋyɔɔ yɔ ɖɩwɛnɩ waɖɛ se ɖɩyaa ɛyaa lalaa nɛ pɔkɔɔ nɛ pɛkpɛlɩkɩ lɔŋ «lɔŋsɩnɖɛ siŋŋ» cɔlɔ. Ðɩwɛ ɛzɩ lɩmɖʋyaa mba «pamakɩ kubusi tɛtʋ taa lona wena akʋyaa yɔ a-taa nɛ pɔyɔɔdʋʋ se: ‘Weyi ɛfɛyɩnɩ lɛɣtʋ yɔ, ɛkɔɔ nɛ ɛsʋʋ cɩnɛ’» yɔ. Wazasɩ nzɩ ɖa nɛ mba pewelisiɣni-ɖʋ yɔ ɖihikiɣ yɔ, sɩɩsɩɣnɩ ɛjaɖɛ ɖɩnɛ ɖɩ-taa nɛ alɩwaatʋ tʋnɛ tɩ-taa ɖeke. Sɩwɛɣ tam, nɛ pɩhaɣ-ɖʋ waɖɛ se ɖɩcaɣ «wezuu» tam nɛ ‘ɖɩɖɔŋ nɛ ɖɩɖɛɣnɩ ɛsɩndaa tɔm taa nɩʋ lɛɣtʋ nʋmɔʋ taa.’—Adu. 9:​3, 4, 6. w23.06 24 § 17-18

Alɩwaatʋ ndʋ ña-tʋmɩyɛ taa taabalʋ yaa ño-sukuli taa taabalʋ nɔɔyʋ pɔzʋʋ-ŋ ñe-tisuu yɔɔ tɔm yɔ, ɛzɩma pɩlakɩ-ŋ? Sɔɔndʋ kpaɣ-ŋ? Mbʋ pɩlakɩ ɖa-taa sakɩyɛ. Ɛlɛ tɔm ndʋ ɛyʋ ɛnʋ ɛpɔzaa yɔ, tɩpɩzɩɣ nɛ tɩsɩnɩ-ŋ nɛ ŋtɩlɩ ndʋ ɛmaɣzɩɣ ɖeyi ɖeyi yɔ yaa mbʋ pɩ-yɔɔ etisiɣ yɔ, piyeki nɛ pɩwɛ-ŋ kɛlɛʋ se ŋsusi-i tɔm kɩbandʋ. Ɛlɛ nabʋyʋ taa, nɔɔyʋ pɩzɩɣ nɛ ɛpɔzɩ tɔm natʋyʋ, mbʋ pʋyɔɔ yɔ eetisiɣ ɖɔ-tɔm yɔɔ yaa ɛñɩnɩɣ se ɖa nɛ ɩ ɖɩhɔ tɔm. Pɩfɛyɩ se pɩɖɩɣzɩ-ɖʋ, mbʋ pʋyɔɔ yɔ pa-taa nabɛyɛ nɩ cɛtɩm tɔm ɖe-tisuu yɔɔ. (Tʋma 28:22) Pɩtasɩ lɛ, ɖɩwɛ «kɛdɛzaɣ kɩyakɩŋ taa,» nɛ ɛyaa iitisiɣ «se pa nɛ lalaa panɩɩnɩ ɖama» nɛ pɛwɛ «ñaŋ.» (2 Tim. 3:​1, 3) Pɩtɩla, ŋpɔzʋʋ ña-tɩ se: «Alɩwaatʋ ndʋ nɔɔyʋ ñɩnɩɣ se ma nɛ ɩ ɖɩhɔ tɔm men-tisuu yɔɔ yɔ, ɛzɩma manpɩzɩɣ nɛ mɛwɛɛnɩ wɛtʋ kɩbandʋ?» Ɛbɛ pɩzɩɣ nɛ pɩsɩnɩ-ŋ? Tobi lɛ, hɛɛɛ wɛtʋ. Ɛyʋ weyi ɛwɛnɩ hɛɛɛ wɛtʋ yɔ ɛɛkɔʋ pana lɛɛ lɛɛ, ɛlɛ alɩwaatʋ ndʋ paɖʋʋ-ɩ ɖɩwɩzɩyɛ yaa alɩwaatʋ ndʋ ɛɛsɩŋ ndʋ ecosi yɔ, ɛɖɔkʋʋ ɛ-tɩ. w23.09 14 § 1-2

Nabʋyʋ taa, ɛgbɛyɛ tasɩɣ-ɖʋ lɔŋ weyi ɩkandɩyɩɣ ɖɔ-yɔɔ yɔ. Ɛgbɛyɛ pakɩ-ɖʋ se ɖɩtaasɔɔlɩ liidiye yaa ɖɩkpa ɖa-tɩ nɛ tʋma wena apɩzɩɣ ayele nɛ ɖɩmaanɩ Yehowa paɣtʋ yɔɔ yɔ. Ye ɖɩɖɔŋ Yehowa lɔŋ tasʋʋ yɔɔ hɔɔlɩŋ ɛnɛ ɩ-taa ɖɔɖɔ yɔ, pɩwazɩɣ-ɖʋ. (Iza. 48:​17, 18; 1 Tim. 6:​9, 10) Pɩtʋʋ fɛyɩ se Yehowa kaɣ wobu pɩ-yɔɔ nɛ ɛtɩŋɩɣnɩ ɛyaa yɔɔ nɛ ɛtasɩɣ-ɖʋ lɔŋ kʋñɔŋ sɔsɔʋ alɩwaatʋ taa nɛ Pɩnzɩ kudoku kewiyitu tɔɔʋ alɩwaatʋ taa. (Keɣ. 45:16) Ðɩkaɣ wobu pɩ-yɔɔ nɛ ɖɩɖɔŋ lɔŋ ɛnɩ ɩ-yɔɔ? Ye ɖɩɖɔŋ lɔŋ weyi Yehowa tasɩɣ-ɖʋ sɔnɔ yɔ ɩ-yɔɔ yɔ, pɩkaɣ-ɖʋ wɛʋ kɛlɛʋ se ɖɩla mbʋ alɩwaatʋ ndʋ tɩ-taa. Ye mbʋ, ɖɩɖɔ Yehowa lɔŋ tasʋʋ yɔɔ paa ɛzɩmtaa, ɛtɩŋɩɣnɩ mba ɛlɩzaa se pɛɖɛɛ-ɖʋ nɔɔ yɔ pɔ-yɔɔ nɛ ɛtasɩɣ-ɖʋ lɔŋ weyi yɔ, ɖɩɖɔ ɩ-yɔɔ ɖɔɖɔ. (Iza. 32:​1, 2; Ebr. 13:17) Ðɩpɩzɩɣ nɛ ɖɩtaa ɖe-Ðiyiyu Yehowa liu kiya nɛ ɖɩtɩŋ nʋmɔʋ ŋgʋ ɛwɩlɩɣ-ɖʋ yɔ, mbʋ pʋyɔɔ yɔ eposuu-ɖʋ nɛ mbʋ pɩpɩzɩɣ nɛ pɩwɛɛkɩ ɖa nɛ ɩ ɖa-taabalɩyɛ yɔ nɛ eɖiyiɣ-ɖʋ nɛ ewokini ɛjaɖɛ kɩfaɖɛ taa se ɖihiɣ wezuu maatɛŋ. w24.02 25 § 17-18

Apostoloo Pɔɔlɩ kaahiɣ taa leleŋ Yehowa sɛtʋ taa, ɛlɛ pɩtaawɛɛ-ɩ kɛlɛʋ paa ɛzɩmtaa. Ðoŋ ɖoŋ lɛ, ɛɖɔŋaɣ nʋmɔʋ nɛ ewoki lona wena awɛ poliŋ yɔ a-taa, nɛ alɩwaatʋ ndʋ tɩ-taa lɛ nʋmɔʋ wobu taawɛɛ kɛlɛʋ. Alɩwaatʋ ndʋ Pɔɔlɩ wokaɣ nʋmɔʋ yɔ, nabʋyʋ taa ‘ɛkatɩ kala pɔsɩ taa’ nɛ ‘ɛkatɩ kala mɩlaa sɔsaa nesi tɛɛ’ ɖɔɖɔ. Pɩtasɩ lɛ, alɩwaatʋ natʋyʋ taa lɛ, e-koyindinaa mabɩ-ɩ. (2 Kɔr. 11:​23-27) Nɛ pɩtaakɛ paa ɛzɩmtaa e-koobiya Krɩstʋ mba wɩlaa se pɛwɛnɩ ɛsɩmɩyɛ pana wena ɛñakaɣ nɛ ɛ-laŋɩyɛ pilim se ɛsɩnɩ-wɛ yɔ a-yɔɔ. (2 Kɔr. 10:10; Filp. 4:15) Ɛbɛ kaasɩnɩ Pɔɔlɩ nɛ ewolo pɩ-yɔɔ nɛ ɛsɛɣ Yehowa? Masɩ nɛ mbʋ pɩtalɩ-ɩ e-wezuu caɣʋ taa yɔ, pɩsɩnɩ-ɩ nɛ ɛkpɛlɩkɩ tɔm sakɩyɛ Yehowa wɛtʋ kɩbandʋ yɔɔ. Pɩsɩnɩ-ɩ nɛ ɛ-taa tɛ se Yehowa sɔɔlɩ-ɩ. (Roma 8:​38, 39; Efɛz. 2:​4, 5) Piyeba nɛ ɛsɔɔlɩ Yehowa siŋŋ. Pɔɔlɩ ‘kaaɖʋ ɛyaa kiɖeɖema lɩm nɛ eewobi pɩ-yɔɔ nɛ ɛɖʋʋ-wɛ lɩm’ nɛ ɛwɩlɩ se ɛsɔɔlɩ Yehowa.—Ebr. 6:10. w23.07 9 § 5-6

Ɛyaa sakɩyɛ tisiɣ se pɩpɔzʋʋ-ɖʋ komina ñʋndɩnaa, nɛ pɩwɛɛ se ɖɩña paɣtʋ ndʋ «ñʋndɩnaa sɔsaa» ɖʋʋ-ɖʋ yɔ tɩ-taa natʋyʋ. Ɛlɛ ɛyaa kʋɖʋmaa mba, papɩzɩɣ nɛ pekizi se paañaŋ paɣtʋ ndʋ patɩsɔɔlɩ yɔ yaa paɣtʋ ndʋ pamaɣzɩɣ se tɩtɩmʋna yɔ. Iyele nɛ ɖɩkpaɣ lambuu hɛyʋʋ kɩɖaʋ. Bibl yɔɔdʋʋ se ɛyaa kominawaa yeki nɛ ɛyaa tɔkɩ kʋñɔŋ, Sataŋ ɖiyiɣni-wɛ, nɛ pɩkazɩ pazɩ lɛ, pakaɣ-wɛ ɖɩzʋʋ. (Keɣ. 110:​5, 6; Ekl. 8:9; Luka 4:​5, 6) Kiheyiɣ-ɖʋ ɖɔɖɔ se «weyi ɛkaɖɩɣnɩ ñʋʋdʋ yɔ, ɛkaɖɩnɩ ɖʋtʋ ndʋ Ɛsɔ laba yɔ.» Lɛɛlɛɛyɔ lɛ, Yehowa ha nʋmɔʋ kominawaa se pɔtɔɔ kewiyitu nɛ pɩsa nɛ wondu itaasidi yem yem, nɛ ɛsɔɔlaa se ɖɩñam-wɛ. Pʋyɔɔ lɛ, pɩpɔzʋʋ se «[ɖɩcɛlɩ] paa weyi mbʋ pɩpɔzʋʋ se pɛcɛlɩ-ɩ yɔ.» Pɩ-taa nabʋyʋ lɛ lambuu hɛyʋʋ, hɩɖɛ ɖʋʋ nɛ ñamtʋ. (Roma 13:​1-7) Pɩpɩzɩɣ nɛ pɩlabɩ-ɖʋ ɛzɩ paɣtʋ natʋyʋ tɩmʋna, tɩfɛyɩ siɣsiɣ, yaa tɩ-yɔɔ ɖɔm wɛ kaɖɛ yɔ. Ɛlɛ ye ñʋndɩnaa mba patɩɖʋ paɣtʋ natʋyʋ nɛ tɩkaɖɩɣnɩ Ɛsɔ paɣtʋ yɔ ɖɩñaŋ-wɛ, mbʋ pʋyɔɔ yɔ Yehowa heyi-ɖʋ se ɖɩñam-wɛ.—Tʋma 5:29. w23.10 8 § 9-10

Alɩwaatʋ ndʋ palʋlɩ Samsɔɔ yɔ, Filistii mba tɔkaɣnɩ kewiyitu Izrayɛɛlɩ ɛjaɖɛ yɔɔ, nɛ panazaɣ-ɖɩ. (Tɔh. 13:1) Izrayɛɛlɩ mba kaalabɩ kʋñɔŋ siŋŋ mbʋ pʋyɔɔ yɔ Filistii mba kaawɛ kañatʋ kpem. Yehowa lɩzɩ Samsɔɔ se ‘ɛɖɛɛ nɔɔ nɛ ɛya Izrayɛɛlɩ ñʋʋ Filistii mba nesi taa.’ (Tɔh. 13:5) Pɩsa nɛ Samsɔɔ pɩzɩ nɛ ɛla tʋmɩyɛ kaɖɛ ñɩnɖɛ nɖɩ lɛ, pɩɩwɛɛ se ɛtaa Yehowa liu. Alɩwaatʋ natʋyʋ Filistii sɔɔjanaa kɔm Lehi tɛtʋ taa se pakpa Samsɔɔ, pɩtʋʋ fɛyɩ se Lehi tɛtʋ kaawɛ Yuuda egeetiye taa. Sɔɔndʋ kaakpa Yuuda mba, piyeba nɛ pakpaɣ lɩmaɣzɩyɛ se pakpaɣ Samsɔɔ nɛ paɖʋzɩ koyindinaa nesi tɛɛ. Samsɔɔ samaɣ taa mba maɣmaɣ hɔkɩ-ɩ nimee kɩfana 2 nɛ paɖʋzɩ-ɩ Filistii mba nesi tɛɛ. (Tɔh. 15:​9-13) Ɛlɛ ‘Yehowa fezuu kpazɩ Samsɔɔ ɖoŋ nɛ ɛcɛ nimee wena pɔhɔkɩnɩ-ɩ yɔ.’ «Peeɖe ɛna kpaŋaɣ abalɩñɩŋga nakɛyɛ tamaɣ mɔɔyɛ nɖɩ ɖɩ nɛ ɖɩ-lɛŋ yɔ,» nɛ ɛkpaɣ-ɖɩ nɛ ɛkʋnɩ Filistii abalaa 1000.—Tɔh. 15:​14-16. w23.09 2 § 3-4

Yehowa kuli ‘ɛ-tamtam tamaɣ’ yɔɔ Bibl taa pazɩ pazɩ. Yehowa pɩzɩɣ nɛ ɛtɩŋnɩ nʋmɔŋ ndɩ ndɩ yɔɔ nɛ eyele nɛ ɛ-tamaɣ la, nɛ paa ɛzɩmtaa lɛ ndʋ ɛyɔɔdʋʋ yɔ tɩlakɩ, mbʋ pʋyɔɔ yɔ ɛlakɩ «se pɩtɩŋa pɩɖʋ nesi ɛ-tamaɣ.» (Adu. 16:4) Nɛ mbʋ pɩlɩɣ mbʋ Yehowa lakɩ yɔ pɩ-taa yɔ, pɩkaɣ wɛʋ tam. Yehowa tamaɣ lɛ ŋga? Nɛ nʋmɔŋ weyi yɔɔ ɛtɩŋnaa se eyele nɛ kala? Ɛsɔ kaaheyi kajalaɣ ɛyaa mba ɛlɩzaa yɔ tamaɣ ŋga ɛɛwɛnɩ pɔ-yɔɔ yɔ. Eeheyi-wɛ se: «Ɩlʋlɩ nɛ ɩɖɔɔ, isu tɛtʋ yɔɔ nɛ ɩwɛɛnɩ ɖoŋ tɩ-yɔɔ, ɩwɛɛnɩ ɖoŋ . . . mbʋ payɩ pɩwɛ wezuu» tɛtʋ yɔɔ yɔ pɩ-yɔɔ. (Kiɖe 1:28) Paa Aɖam nɛ Ɛva pakaɖɩnɩ Yehowa nɛ peyele nɛ kɩdɛkɛdɩm sʋʋ kedeŋa yɔɔ yɔ, pɩtɩɖɩɣ-ɩ nʋmɔʋ se eyele nɛ ɛ-tamaɣ la. Ɛtɩŋnɩ nʋmɔʋ lɛɛkʋ yɔɔ se eyele nɛ kala. Ɛcaŋaa nɛ ɛkpaɣ lɩmaɣzɩyɛ se ɛsɩɣ Kewiyaɣ nakɛyɛ ɛsɔdaa nɛ keyele nɛ tamaɣ ŋga ɛɛwɛnɩ ɛyaa nɛ tɛtʋ yɔɔ yɔ kala.—Mat. 25:34. w23.10 20 § 6-7

Yehowa pɩzɩɣ nɛ ɛsɩnɩ-ɖʋ se ɖɩtaalɔ lidaʋ. Pɩtɩla, pɩɩkaɣ wɛʋ kɛlɛʋ, kɔzɩ kɔzɩ ye ɖɩwɛɛ nɛ ɖɩlʋkɩnɩ ɛjandʋ kʋɖʋmtʋ ndʋ pɩlakɩ alɩwaatʋ sakɩyɛ yɔ. Nabʋyʋ taa, pɩtɩla ɛjandʋ ndʋ ɖɩlʋkɩna yɔ tɩkɩlɩ Pɩyɛɛrɩ ñɩndʋ. Ɛlɛ Yehowa kaɣ-ɖʋ haʋ ɖoŋ se ɖɩtaalɔ lidaʋ. (Keɣ. 94:​18, 19) Kɩɖaʋ nakʋyʋ yɔ: Koobu abalɩñɩnʋ nɔɔyʋ sʋwaɣnɩ abalaa lalaa pɩnzɩ sakɩyɛ pʋcɔ nɛ ɛtɩlɩɣ toovenim. Ɛtɩlɩ toovenim lɛ, ɛñaɣ pana nɛ eyele wezuu kɩdɛkɛdʋʋ ŋgʋ kɩ-caɣʋ. Paa mbʋ yɔ, nabʋyʋ taa, ɛlʋkɩnɩ kɔɖɛyɩ kɩdɛkɛdʋʋ. Ɛbɛ sɩnɩ-ɩ nɛ ɛtɩlɔ lidaʋ? Ɛyɔɔdaa se: «Yehowa haɣ-m ɖoŋ.» Ɛsɔzaa se: «Yehowa fezuu sɩnɩ-m . . . nɛ menɖiɣzina se manpɩzɩɣ nɛ mowolo pɩ-yɔɔ nɛ mɔnɖɔ toovenim nʋmɔʋ taa . . . Yehowa sɩnɩ-m nɛ mala tʋma sakɩyɛ, nɛ paa mɛwɛnɩ ɛjandʋ yɔ, ɛwɛɛ nɛ ɛkpazɩɣ-m ɖoŋ.» w23.09 23 § 12

Evebiya, pɩpɔzʋʋ-mɩ pana ñaɣʋ pɩdɩɩfɛyɩ pʋcɔ nɛ ɩpɩsɩ Krɩstʋ ñɩma mba papɩ fezuu taa yɔ. Pɩwɛɛ se ɩmaɣzɩnɩ mba pahaɣ kɩɖaŋ kɩbaŋ yɔ, ɩñaɣ pana nɛ ɩwɛɛnɩ lɛɣtʋ ndʋ tɩsɩɣnɩ-mɩ se ɩmaɣzɩ mɩ-ñʋʋ taa camɩyɛ yɔ, ɩkɛ ɛyaa mba papɩzɩɣ nɛ pataa-wɛ liu yɔ, ɩkpɛlɩkɩ lɛɣtʋ ndʋ tɩsɩɣnɩ-mɩ mi-wezuu caɣʋ taa yɔ nɛ ɩñɔɔzɩ mɩ-tɩ nɛ ɩla tʋma wena aɖaŋ-mɩ nɛ ɛsɩndaa yɔ. Alɩwaatʋ ndʋ ŋmaɣzɩɣ mbʋ pɩwɛɛ se ŋla nɛ ŋpɩɩ fezuu taa yɔ pɩ-yɔɔ yɔ, pɩpɩzɩɣ nɛ pɩlabɩ-ŋ ɛzɩ pɩkɩlɩ kaɖɛ yɔ. Ɛlɛ ŋpɩzɩɣ nɛ ŋlabɩ-pʋ. Tɔzɩ se Yehowa sɔɔlɩ faaa se ɛsɩnɩ-ŋ. (Iza. 41:​10, 13) Pɩtasɩ lɛ, ñɛ-ɛgbɛyɛ taa koobiya kaɣ-ŋ sɩnʋʋ ɖɔɖɔ. Alɩwaatʋ ndʋ ŋpɩsɩɣ Krɩstʋ tʋ weyi ɛpɩ fezuu taa yɔ, ŋkaɣ hiɣu taa leleŋ ñe-wezuu caɣʋ taa. Mɩ evebiya, ɖɩsɔɔlɩ-mɩ. Tɛtɛ nɛ Yehowa wazɩ-mɩ pana wena ɩwɛɛ nɛ ɩñakɩ lɛɛlɛɛyɔ se ɩpɩsɩ Krɩstʋ ñɩma mba papɩ fezuu taa yɔ a-yɔɔ. w23.12 29 § 19-20

Kpaɣ se ña nɛ koobiya nabɛyɛ ikpeɣli ɖoŋnɔɔyʋ. Ɩwɛɛ nɛ ɩnɩɣ leleŋ, nɛ ɩkpɛndɩ nɛ ɩlɩzɩ foto. Ɛlɛ ŋlɩzɩ ɖɔɖɔ fotonaa 2 nɛ ŋsɔzɩ, se ye kajalaɣ ñɩŋgʋ ɛfɛyɩ ɖeu yɔ ŋŋkpaɣ naalɛ waa mba pa-taa nakʋyʋ. Lɛɛlɛɛyɔ ŋwɛnɩ fotonaa 3. Ɛlɛ fotonaa mba pa-taa kʋɖʋmʋʋ taa lɛ, ŋɖiɣzinaa se koobu nɔɔyʋ taahoŋuu. Ŋhɩzɩɣ-kʋ mbʋ pʋyɔɔ yɔ fotonaa 2 mba pakazaa yɔ pa-taa lɛ, mɩ-tɩŋa ɩwɛɛ nɛ ihoŋuu, halɩ koobu ɛnʋ ehoŋaɣ ɖɔɖɔ. Ðoŋ ɖoŋ lɛ, ɖɩtɔzʋʋ alɩwaatʋ kɩbandʋ ndʋ ɖa nɛ ɖo-koobiya ɖɩɩkpɛndaa nɛ ɖɩwɛɛ ɖama cɔlɔ yɔ tɩ-yɔɔ. Ɛlɛ kpaɣ se kɩyakʋ nakʋyʋ ikpeɣli mbʋ lɛ, koobu nɔɔyʋ yɔɔdɩ tɔm natʋyʋ yaa ɛla nabʋyʋ nɛ pɩtɩkɛdɩnɩ-ŋ. Ɛbɛ ŋkaɣ labʋ? Pɩwɛɣ ɖeu se ŋñaɣ pana nɛ ŋsɔɔ pɩ-yɔɔ yaa ŋhɩzɩ-pʋ ña-ñʋʋ taa ɛzɩ ŋhɩzʋʋ fotonaa mba pa-taa lɛɛkʋ yɔ. (Efɛz. 4:32) Ðɩpɩzɩɣ nɛ ɖɩsɔɔ mbʋ pʋyɔɔ yɔ ɖɩtɔzʋʋ alɩwaatʋ kɩbandʋ sakɩyɛ ndʋ ɖa nɛ wɛ ɖɩkpɛndaa nɛ ɖɩwɛɛ taa leleŋ taa yɔ tɩ-yɔɔ. Alɩwaatʋ kɩbandʋ ndʋ, tɩ-yɔɔ ɖɩsɔɔlaa se ɖɩtɔzɩ nɛ ndʋ ɖɩsɔɔlaa se tɩmʋ ñɩm ɖɛ-ɛsɩndaa. w23.11 12-13 § 16-17

Grɛɛkɩ tɔm piye nɖɩ ɛlabɩnɩ tʋmɩyɛ cɩnɛ yɔ, ɖɩwɩlɩɣ se pɩcɛyaa se paa ɛzɩmtaa lɛ, wondu ndʋ halʋ suu yɔ tɩha ñamtʋ nɛ tɩwɩlɩ ɖɔɖɔ se ɛmaɣzɩɣ ɛzɩma pɩlakɩ lalaa yɔ pɩ-yɔɔ. Mɩ koobiya halɩñɩma mba ɩwɛɛ nɛ ɩɖɔŋ lɔŋ tasʋʋ pʋnɛ pɩ-yɔɔ yɔ, ɖa-taa wɛnɩ-mɩ leleŋ siŋŋ! Wɛtʋ kɩbandʋ lɛɛtʋ ndʋ pɩcɛyaa se koobiya halɩñɩma tɩŋa ɩwɛɛna nɛ pɩwɩlɩ se papɩ fezuu taa yɔ, ndʋ lɛ lɛɣtʋ. Ɛbɛ payaɣ se lɛɣtʋ? Lɛɣtʋ kɛ wɛtʋ kɩbandʋ ndʋ tɩsɩɣnɩ ɛyʋ se ɛɖʋ tʋkaɣ mbʋ pɩtʋʋzaa nɛ mbʋ pɩtɩtʋʋzɩ yɔ pɩ-hɛkʋ taa nɛ pʋwayɩ lɛ ɛlɩzɩ se ɛlakɩ mbʋ pɩtʋʋzaa yɔ. Iyele nɛ ɖɩna Abigayɛɛlɩ kɩɖaʋ. Ɛ-walʋ kaakpaɣ lɩmaɣzɩyɛ kɩdɛkɛdɩyɛ naɖɩyɛ, nɛ lɩmaɣzɩyɛ nɖɩ ɖɩcaɣaɣ se ɖɩkɔnɩ asɛyʋʋ sɔsɔʋ ɛ-ɖɩɣa taa mba kpeekpe yɔɔ. Peeɖe Abigayɛɛlɩ labɩ nabʋyʋ kpɛdɛyɛ. Ɛ-lɛɣtʋ sɩnɩ-ɩ nɛ ɛya ɛ-ɖɩɣa taa mba ñʋʋ. (1 Sam. 25:​14-23, 32-35) Ða ɖɔɖɔ, lɛɣtʋ sɩɣnɩ-ɖʋ se ɖɩtɩlɩ alɩwaatʋ ndʋ pɩwɛɛ se ɖɩyɔɔdɩ nɛ alɩwaatʋ ndʋ pɩwɛɛ se ɖisu tamɩyɛ yɔ. Nɛ tɩsɩɣnɩ-ɖʋ ɖɔɖɔ se ɖɩtɩlɩ labʋ nɛ alɩwaatʋ ndʋ ɖɩsɩɣnɩ lalaa yɔ, ɖa-lakasɩ ɛtaacɛyɩ-wɛ.—1 Tes. 4:11. w23.12 20 § 8-9

Krɩstʋ ñɩma mba pɛwɛ Roma ɛgbɛyɛ taa yɔ, mba apostoloo Pɔɔlɩ ma tɔm ndʋ. Koobiya mba paawɛ ɛgbɛyɛ nɖɩ ɖɩ-taa yɔ, pɛkpɛlɩkɩ Yehowa nɛ Yesu pɔ-tɔm nɛ pɛwɛɛnɩ tisuu pɔ-yɔɔ nɛ papɩsɩ Krɩstʋ mba. Piyeba nɛ Ɛsɔ ‘yaa-wɛ se siɣsiɣ tɩnaa tisuu yɔɔ’ nɛ ɛtɩŋnɩ fezuu kiɖeɖeu yɔɔ nɛ ɛtaa-wɛ num. (Roma 5:1) Ye mbʋ, papɩzɩɣ nɛ paɖaŋ pa-kɩhɛyʋʋ kpam nɛ pa-taa tɛ se pakaɣ-kʋ mʋʋ. Pʋwayɩ, Pɔɔlɩ ma takayaɣ Krɩstʋ ñɩma patam numwaa mba pɛwɛ Efɛɛzɩ yɔ nɛ eheyi-wɛ lidaʋ ŋgʋ Ɛsɔ ha-wɛ yɔ kɩ-tɔm. Lidaʋ ŋgʋ kɩ-hɔɔlʋʋ nakʋyʋ lɛ se pakaɣ mʋʋ «ñɩm sɔsɔm mbʋ ɛsɩwa se pɩkɛnɩ ɛyaa kiɖeɖema ñɩm yɔ.» (Efɛz. 1:18) Pɔɔlɩ heyi ɖɔɖɔ Krɩstʋ ñɩma mba pɛwɛ Koloosi yɔ ɖenɖe pakaɣ mʋʋ pa-kɩhɛyʋʋ yɔ. Ɛyɔɔdɩ kɩhɛyʋʋ ŋgʋ kɩ-tɔm se kɩkɛ «lidaʋ ŋgʋ [peɖiɣni-wɛ] ñɔɔzʋʋ ɛsɔdaa yɔ.» (Kol. 1:​4, 5) Ye mbʋ, Krɩstʋ ñɩma patam numwaa lidaʋ lɛ se pakaɣ-wɛ fezuu nɛ pakpa nɛ pacaɣ wezuu maatɛŋ ɛsɔdaa nɛ pa nɛ Krɩstʋ pɔtɔɔ kewiyitu peeɖe.—1 Tes. 4:​13-17; Natʋ 20:6. w23.12 9 § 4-5

Kiɖe tɛɛ tɔm piye nɖɩ pɛɖɛzaa se «ɖaŋʋʋ» yɔ, palakaɣnɩ-ɖɩ tʋmɩyɛ sɔɔjatʋ tʋmɩyɛ taa nɛ ɖɩwɩlɩɣ sɔɔjanaa mba paɖaŋaɣ tɛtʋ yɔɔ se koyindinaa itaayooni-tʋ yɔ. Ɛyaa mba pɛwɛ tɛtʋ ndʋ sɔɔjanaa ɖaŋaɣ tɩ-yɔɔ yɔ tɩ-taa yɔ, pahɩnaɣ nɛ poɖou yem fɛɛɛ, mbʋ pʋyɔɔ yɔ panawa se sɔɔjanaa kandɩyaɣ pɔ-yɔɔ. Mbʋ ɖɔɖɔ alɩwaatʋ ndʋ Ɛsɔ tɛ laŋhɛzɩyɛ ɖaŋɩɣ ɖa-laŋa nɛ ɖa-maɣzɩm yɔɔ yɔ, ɖa-laŋa hɛɣ niɣ niɣ mbʋ pʋyɔɔ yɔ ɖɩnawa se ɖɩwɛ pɛɛyɛ taa. (Keɣ. 4:8) Ɛzɩ Hana yɔ, paa ɖɛ-wɛtʋ ɛtɩlɛɣzɩ kpaagbaa yɔ, ɖɩpɩzɩɣ nɛ ɖihiɣ laŋhɛzɩyɛ. (1 Sam. 1:​16-18) Nɛ alɩwaatʋ ndʋ ɖa-laŋɩyɛ hɛɣ yɔ, ɖoŋ ɖoŋ lɛ pɩwɛ-ɖʋ kɛlɛʋ se ɖɩmaɣzɩ camɩyɛ nɛ ɖɩkpaɣ lɩmaɣza kɩbana. Ɛbɛ pɩpɔzʋʋ se ɖɩla? Alɩwaatʋ ndʋ ŋwɛɣ nɩɣzɛ taa yɔ, pɔzɩ Yehowa se ɛsɩnɩ-ŋ. Ɛzɩma tɩyɛ? Tɩmnɩ Yehowa nɛ pɩkɔɔ pɩsɩɩnɩ alɩwaatʋ ndʋ ŋhiɣ Ɛsɔ tɛ laŋhɛzɩyɛ yɔ. (Luka 11:9; 1 Tes. 5:17) Ye ŋwɛɛ nɛ ŋkatɩɣ kala sɔsɔna yɔ, wɛɛ adɩma yɔɔ; nɛ ŋkaɣ hiɣu Yehowa tɛ laŋhɛzɩyɛ nɛ ɖɩkandɩyɩ ña-laŋɩyɛ nɛ ña-maɣzɩm yɔɔ.—Roma 12:12. w24.01 21 § 5-6

Pɩsa nɛ Yesu la nɛ ɛ-Caa hɩɖɛ yɔɔ ñalɩ lɛ, ɛɖɔkɩ ɛ-laŋɩyɛ nazɩm, tʋtʋ nɛ cɛtɩm tɔm ndʋ payɩ pɔyɔɔdɩ ɛ-yɔɔ yɔ tɩ-taa. Ɛɛnawa se ɛñam ɛ-Caa pɩtɩŋa pɩ-taa nɛ fɛyɛ taakpaɣ-ɩ nɛ nabʋyʋ. (Ebr. 12:2) Ɛɛnawa ɖɔɖɔ se Sataŋ kaawɛna nɛ ɛkʋyʋʋ ɛ-yɔɔ kaɖɛ alɩwaatʋ ndʋ tɩ-taa. (Luka 22:​2-4; 23:​33, 34) Sataŋ ñɩnaɣ kpem se ɛla nɛ Yesu lesi ɛ-cɩŋgɩlɩm wɛtʋ, ɛlɛ ɛtɩpɩzɩ. Yesu wɩlɩ kpayɩ kpayɩ se Sataŋ kɛ cɛtɩyʋ sɔsɔ nɛ ɛwɩlaa ɖɔɖɔ se ɛyaa pɩzɩɣ nɛ pɔɖɔkɩ pa-cɩŋgɩlɩm wɛtʋ nɛ pɛwɛɛ siɣsiɣ Yehowa ɛsɩndaa paa pakatɩɣ kala siŋŋ yɔ. Ŋsɔɔlaa se ñe-Wiyaʋ weyi eɖiɣni kewiyitu tɔɔʋ yɔ ɛ-taa ɛla leleŋ na? Ye ɛɛɛ yɔ, wolo pɩ-yɔɔ nɛ ŋsaŋ Yehowa hɩɖɛ, sɩnɩ ɛyaa lalaa nɛ pɛkpɛlɩkɩ nɛ patɩlɩ ɖɛ-Ɛsɔ wɛtʋ kɩbandʋ tɩŋa. Ye ŋlakɩ mbʋ yɔ, ŋwɛɛ nɛ ŋmaɣzɩɣnɩ Yesu. (1 Pɩy. 2:21) Ɛzɩ Yesu yɔ, ŋwɛɛ nɛ ŋyeki nɛ Yehowa taa lakɩ leleŋ nɛ ŋwɛɛ ŋwɩlɩɣ se E-koyindu Sataŋ kɛ cɛtɩyʋ weyi ɛfɛyɩ fɛyɛ yɔ. w24.02 11-12 § 11-13

Pɩnzɩ 5 nzɩ sɩɖɛwa yɔ sɩ-taa, ɛyaa mba pamɩyɩsɩ-wɛ lɩm nɛ papɩsɩ Yehowa Aseɣɖe Tɩnaa yɔ, pɛcɛzɩ miiliyɔɔ kʋɖʋmʋʋ. Alɩwaatʋ ndʋ ŋhaɣ ña-tɩ Yehowa yɔ, ŋwɩlɩɣ se ŋlɩzaa se ŋpɩsɩɣ Yesu Krɩstʋ tɔmkpɛlɩkɩyʋ nɛ ŋsɩɣ Yehowa sɔɔlɩm labʋ kajalaɣ lone taa ñe-wezuu caɣʋ taa. Ye pɔtɔm se ŋha ña-tɩ Yehowa yɔ, pʋ-tɔbʋʋ lɛ suwe? Yesu yɔɔdaa se: «Ye nɔɔyʋ ɛsɔɔlaa se ɛtɩŋ ma-wayɩ yɔ, ekizi ɛ-tɩ.» (Mat. 16:24) Grɛɛkɩ tɔm loyaɣ ŋga pɛɖɛzaa se «ekizi ɛ-tɩ» yɔ, papɩzɩɣ nɛ pɛɖɛzɩ-kɛ ɖɔɖɔ se «ɛtaatasɩ caɣʋ wezuu ɛ-maɣmaɣ ɛ-tɩ yɔɔ.» Ye ŋha ña-tɩ Yehowa yɔ, pɩpɔzʋʋ se ŋkizi mbʋ payɩ pɩɩlakɩ nɔɔ kʋɖʋmaɣ nɛ ɛ-sɔɔlɩm yɔ. (2 Kɔr. 5:​14, 15) Pʋ-tɔbʋʋ lɛ se pɩpɔzʋʋ se ŋkizi «tomnaɣ lakasɩ» ɛzɩ kʋzʋʋ kɩdɛkɛdʋʋ mbʋ yɔ. (Gal. 5:​19-21; 1 Kɔr. 6:18) Paɣtʋ ndʋ, tɩ-yɔɔ ɖɔm yeki se ŋtaanɩɩ leleŋ ñe-wezuu caɣʋ taa? Ye ŋsɔɔlɩ Yehowa nɛ ña-taa ɛtɛma se ɛ-paɣtʋ yɔɔ ɖɔm wazɩɣ-ŋ yɔ, pɩɩkaɣ-ŋ labʋ mbʋ.—Keɣ. 119:97; Iza. 48:​17, 18. w24.03 2 § 1; 3 § 4

Yehowa haɣ e-fezuu kiɖeɖeu mba pɔ-tɔm kɛdɩnɩ-ɩ yɔ. (Mat. 12:18) Ðɩpɩzɩɣ nɛ ɖɩpɔzɩ ɖa-tɩ se: «Mɛwɛnɩ wɛtʋ kɩbandʋ ndʋ Ɛsɔ fezuu kiɖeɖeu lʋlʋʋ yɔ tɩ-taa natʋyʋ me-wezuu caɣʋ taa?» Ŋɖiɣzinaa se lɛɛlɛɛyɔ lɛ ŋɖʋʋ suuɖu nɛ pɩkɩlɩ alɩwaatʋ ndʋ ŋtaatɩlɩtɩ Yehowa yɔ? Toovenim taa lɛ, alɩwaatʋ ndʋ ŋñakɩ pana se ŋwɛɛnɩ wɛtʋ kɩbandʋ ndʋ Ɛsɔ fezuu lʋlʋʋ yɔ nɛ pɩkɩlɩ yɔ, ña-taa kaɣ tɛm nɛ pɩkɩlɩ se ñɔ-tɔm kɛdɩnɩ Yehowa. Yehowa yeba se kɩhɛyʋʋ pʋ-ñʋʋ taa kɩlaʋ ɛwazɩ mba pɔ-tɔm kɛdɩnɩ-ɩ yɔ. (1 Tim. 2:​5, 6) Ye ɖɩwɛnɩ tisuu kɩhɛyʋʋ pʋ-ñʋʋ taa kɩlaʋ yɔɔ nɛ pamɩyɩsɩ-ɖʋ lɩm, ɛlɛ ɖa-taa tɩtɛ se ɖɔ-tɔm kɛdɩnɩ Yehowa yɔ, ɛbɛ ɖɩpɩzɩɣ nɛ ɖɩla? Tɔzɩ se ɖɩɩpɩzɩɣ nɛ ɖɩtaa ɖa-maɣmaɣ ɖa-lɩmaɣza liu paa ɛzɩmtaa, ɛlɛ ɖɩpɩzɩɣ nɛ ɖɩtaa Yehowa liu paa ɛzɩmtaa. Ɛkpakɩɣ mba pɛwɛnɩ tisuu kɩhɛyʋʋ pʋ-ñʋʋ taa kɩlaʋ yɔɔ yɔ se pɛwɛ siɣsiɣ ɛ-ɛsɩndaa nɛ ɛlabɩ tamaɣ se ɛwazɩɣ-wɛ.—Keɣ. 5:12; Rom. 3:26. w24.03 30 § 15; 31 § 17