Juin

Ðɩtɛm paɣzʋʋ hiɣu Krɩstʋ kɩhɛyʋʋ pʋ-ñʋʋ taa kɩlaʋ wazasɩ. Kɩhɛyʋʋ ŋgʋ kɩ-yɔɔ Yehowa kpeɣu-ɖʋ ɖa-kɩwɛɛkɩm. Pɩtɩkɛnɩ-ɩ kɩjɛyʋʋ se ekpeɣ-ɖʋ ɖa-kɩwɛɛkɩm. Ɛlɛ ɛsɔɔlɩ faaa se ekpeɣ-ɖʋ. (Keɣ. 103:​3, 10-13) Nabɛyɛ pɩzɩɣ nɛ pamaɣzɩ se patɩmʋna se Yehowa ekpeɣ-wɛ pa-kɩwɛɛkɩm. Toovenim taa lɛ ɖa-taa nɔɔyʋ tɩmʋna se pekpeɣ-i ɛ-kɩwɛɛkɩm. Apostoloo Pɔɔlɩ nɩ pɩ-taa se ‘ɛtɩmʋna se payaa-ɩ se apostoloo.’ Paa mbʋ yɔ ɛsɔzaa se: «Pɩtɩŋnɩ Ɛsɔ lootiye yɔɔ lɛ, mɛnkɛ mbʋ mɛnkɛwa yɔ.» (1 Kɔr. 15:​9, 10) Alɩwaatʋ ndʋ ɖikpiɖiɣ ɖa-kɩwɛɛkɩm yɔɔ yɔ, Yehowa kpakɩɣ nɛ ekpeɣu-ɖʋ. Ɛbɛ yɔɔ? Pɩtɩkɛ se ɖɩmʋnaa yɔɔ ekpeɣu-ɖʋ, ɛlɛ ekpeɣu-ɖʋ mbʋ pʋyɔɔ yɔ ɛsɔɔlɩ-ɖʋ. Ye ŋwɛ laŋwɛɛkɩyɛ taa mbʋ pʋyɔɔ yɔ ŋmaɣzɩɣ se ŋtɩmʋna se Yehowa ekpeɣ-ŋ yɔ, tɔzɩ se pɩtɩkɛ mba patalɩ pilim yɔ pɔ-yɔɔ ɛhɛyɩ kɩhɛyʋʋ pʋ-ñʋʋ taa, ɛlɛ kɩwɛɛkɩm laɖaa yɔɔ ɛhɛyɩ-kʋ.—Luka 5:32; 1 Tim. 1:15. w25.01 26-27 § 3-4

Ðɩɩpɩzɩɣ nɛ ɖɩwɛɛnɩ ɖoŋ tɔm ndʋ lalaa yɔɔdʋʋ yaa mbʋ palakɩ-ɖʋ yɔ pɩ-yɔɔ, ɛlɛ ɖɩpɩzɩɣ ɖɩñaɣ pana nɛ ɖɩwɛɛnɩ ɖoŋ ɛzɩma ɖɩlakɩ yɔ pɩ-yɔɔ. Nɛ ɖoŋ ɖoŋ lɛ, mbʋ pɩkɩlɩɣ ɖeu se ɖɩla yɔ lɛ se ɖɩkpaɣ nɛ ɖikpeɣ. Ɛbɛ yɔɔ? Mbʋ pʋyɔɔ yɔ ɖɩsɔɔlɩ Yehowa, nɛ ɛsɔɔlaa se ɖɩkpaɣ nɛ ɖikpeɣ. Ye ɖiwobi pɩ-yɔɔ nɛ ɖɩwɛɛ pana taa nɛ ɖɩtɩkpaɣ nɛ ɖikpeɣ yɔ, ɖɩpɩzɩɣ nɛ ɖɩla mbʋ pɩfɛyɩ ɖeu yɔ nɛ halɩ pɩpɩzɩɣ nɛ pɩkɔnɩ kaɖɛ ɖo-tomnaɣ taa alaafɩya. (Adu. 14:​17, 29, 30) Ye ɖɩɩcakɩnɩ ɛyaa yɔ, piyeki nɛ pana ɛɛwɛɣnɩ ɖoŋ mbʋ ɖɩlakɩ ɛyaa lalaa yɔ pɩ-yɔɔ. Pɩtasɩ lɛ, ɖɩlakɩ ɖa-tɩ kʋjɔʋ nakʋyʋ; kʋjɔʋ ŋgʋ lɛ se ɖiyeki maɣzʋʋ mbʋ pɩlaba yɔ pɩ-yɔɔ nɛ ɖɩtasɩɣ nɩʋ wezuu leleŋ. Ɛbɛ pɩzɩɣ pɩsɩnɩ-ŋ nɛ ña-pana hɛɛ? Mbʋ ŋpɩzɩɣ nɛ ŋla yɔ pɩ-taa nabʋyʋ yɔ: Ha ña-tɩ alɩwaatʋ. Ɛyʋ weyi pɩkʋ-ɩ siŋŋ yɔ, paa palabɩ-ɩ kɔyɛ yɔ, pɩpɔzʋʋ alɩwaatʋ pʋcɔ nɛ ɛ-yɔɔ cɛ. Mbʋ ɖɔɖɔ, pɩpɩzɩɣ nɛ pɩpɔzɩ-ɖʋ alɩwaatʋ pʋcɔ nɛ ɖɩkpaɣ nɛ ɖikpeɣ nɔɔyʋ nɛ ɖa-laŋɩyɛ pilim. (Ekl. 3:3; 1 Pɩy. 1:22) Tɩmnɩ Yehowa nɛ ŋheyi-i se ɛsɩnɩ-ŋ nɛ ŋkpaɣ nɛ ŋkpeɣ lalaa. w25.02 16-17 § 8-11

Kajalaɣ wɩlɩtʋ ndʋ tɩ-taa natʋyʋ tukuuni kɩwɛɛkɩm yɔɔ kpiɖuu, tisuu, lɩm mɩyɩsʋʋ nɛ sɩɖaa femtu. (Ebr. 6:​1, 2) Pɩkɛ wɩlɩtʋ ndʋ tɩ-yɔɔ paa Krɩstʋ tʋ weyi lɛ etisiɣ yɔ. Pʋyɔɔ apostoloo Pɩyɛɛrɩ yɔɔdɩ wɩlɩtʋ ndʋ tɩ-tɔm alɩwaatʋ ndʋ ɛwɩlaɣ ɛyaa tɔm Pantekooti wiye yɔ. (Tʋma 2:​32-35, 38) Pʋcɔ nɛ ɖɩpɩsɩ Krɩstʋ tɔmkpɛlɩkɩyʋ lɛ, pɩwɛɛ se ɖitisi kajalaɣ wɩlɩtʋ ndʋ tɩ-yɔɔ. Pɔɔlɩ yɔɔdaa se ye nɔɔyʋ eetisiɣ sɩɖaa femtu wɩlɩtʋ yɔɔ yɔ, pɩwɩlɩɣ se ɛtɩkɛ Krɩstʋ tʋ toovenim tʋ. (1 Kɔr. 15:​12-14) Ɛlɛ pɩtɩpɔzɩ se ɖɩsɩɩnɩ kajalaɣ wɩlɩtʋ ndʋ ti-ɖeke. Fezuu taa tɔɔnaɣ yuŋ ñɩŋga wɛ ndɩ nɛ kajalaɣ wɩlɩtʋ. Pɩtɩkɛ Yehowa paɣtʋ ɖeke wɛnɩ fezuu taa tɔɔnaɣ yuŋ ñɩŋga taa, ɛlɛ paɣtʋ kila wɛ ɖɔɖɔ ka-taa nɛ asɩɣnɩ-ɖʋ se ɖɩnɩɩ Yehowa lɩmaɣza taa. Pɩsa nɛ tɔɔnaɣ ŋga kawazɩ-ɖʋ lɛ, pɩwɛɛ se ɖɩkpɛlɩkɩɣ Ɛsɔtɔm, ɖɩmaɣzɩɣ tɩ-yɔɔ nɛ ɖɩla mbʋ payɩ ɖɩpɩzɩɣ yɔ nɛ ɖɩɖɔ tɩ-yɔɔ. Ye ɖɩlakɩ mbʋ yɔ, ɖɩwɛɛ nɛ ɖɩfalɩsɩɣ ɖa-tɩ se ɖɩkpaɣ lɩmaɣza wena akɛdɩɣnɩ Yehowa yɔ. w24.04 5 § 12-13

Ɛsɔ tɔzɩ Yoonaa se Niniivi ñɩma mba, «paasɩŋ kɩbam nɛ kɩdɛkɛdɩm.» (Yon. 1:​1, 2; 3:10; 4:​9-11) Pʋwayɩ, Yesu tɩŋnɩ kɩɖaʋ ŋgʋ kɩ-yɔɔ nɛ ɛwɩlɩ ɛyaa se Yehowa wɛ siɣsiɣ nɛ ɛnaɣ ɛyaa pʋtɔdɩyɛ. Yesu yɔɔdʋʋ se Niniivi mba kaɣ «kʋyʋʋ tɔm hʋʋ alɩwaatʋ taa» yɔ, pʋ-tɔbʋʋ lɛ suwe? Yesu yɔɔdaa se pakaɣ fezuu ɛyaa nabɛyɛ cee wayɩ «se pahʋʋnɩ-wɛ tɔm.» (Yoh. 5:29) Pɩnzɩ kudoku kewiyitu tɔɔʋ tɔm ɛyɔɔdaɣ, alɩwaatʋ ndʋ tɩ-taa lɛ, «pakaɣ fezuu ɛyaa siɣsiɣ tɩnaa nɛ mba pɛfɛyɩ siɣsiɣ yɔ.» (Tʋma 24:15) Mba pɛfɛyɩ siɣsiɣ yɔ, pakaɣ-wɛ fezuu «se pahʋʋnɩ-wɛ tɔm.» Pʋ-tɔbʋʋ lɛ se pefeziɣ-wɛ nɛ pɩtɛ lɛ, Yehowa nɛ Yesu pakaɣ-wɛ cɔnʋʋ nɛ pana se pɔɖɔŋ tɔm ndʋ pɛkpɛlɩkɩɣ yɔ tɩ-yɔɔ yaa paaɖɔŋ. Ye Niniivi ñɩma mba pefeziɣ yɔ pa-taa nɔɔyʋ ekizaa se ɛɛsʋʋ Ɛsɔ sɛtʋ kele kele ñɩndʋ taa yɔ, Ɛsɔ ɛɛkaɣ-ɩ haʋ nʋmɔʋ se ɛcaɣ wezuu. (Iza. 65:20) Ɛlɛ mba palɩzɩɣ se pɛwɛɣ siɣsiɣ Yehowa ɛsɩndaa yɔ, pakaɣ hiɣu waɖɛ se pacaɣ wezuu tam.—Dan. 12:2. w24.05 5 § 13-14

Yesu kpeɣaɣ ɛyaa pa-kɩwɛɛkɩm faaa ɛzɩ ɛ-Caa yɔ. (Yoh. 14:9) Ɛtɩŋnɩ ɛ-yɔɔdaɣ nɛ ɛ-lakasɩ yɔɔ nɛ ɛwɩlɩ-wɛ se ɛ-Caa weyi ɛkɛ pʋtɔdɩyɛ nayʋ nɛ ekpeɣu ɛyaa faaa yɔ, ɛsɔɔlɩ-wɛ nɛ ɛsɔɔlaa se ɛsɩnɩ pa-taa paa weyi nɛ ɛwa kɩwɛɛkɩm. Yesu sɩnɩ kɩwɛɛkɩm laɖaa nɛ pɔsɔɔlɩ se pɛlɛɣzɩ pe-wezuu caɣʋ nɛ patɩŋ ɛ-wayɩ. (Luka 5:​27, 28) Yesu kaasɩm mbʋ pɩɩɖaŋɩ-ɩ nɛ ɛsɩndaa yɔ. Eeheyi ɛ-wayɩ tɩŋɩyaa tam sakɩyɛ se pakaɣ ɛ-wayɩ lɩʋ nɛ pakamɩ-ɩ sizika yɔɔ. (Mat. 17:22; 20:​18, 19) Ɛɛnawa se ɛ-kɩlaʋ kaɣ hɩzʋʋ ɛjaɖɛ kɩwɛɛkɩm. Yesu tasɩ yɔɔdʋʋ se ɛlaɣ e-wezuu nɛ pɩtɛ lɛ, ɛkaɣ «hɔm ɛyaa ndɩ ndɩ» nɛ ɛ-yɔɔ. (Yoh. 12:32) Ye kɩwɛɛkɩm laɖaa itisaa se Yesu ɛkɛ pa-Kɩbaɣlʋ nɛ pɔɖɔŋ ɛ-nɩŋgbanzɩ taa yɔ, pɔ-tɔm kaɣ kɛdɩnʋʋ Yehowa. Ye palabɩ mbʋ yɔ, pakaɣ-wɛ ‘holuu kɩwɛɛkɩm nesi tɛɛ.’ (Roma 6:​14, 18, 22; Yoh. 8:32) Pʋyɔɔ Yesu labɩ abalɩtʋ nɛ etisi se ɛtɔɔ kʋñɔŋ nɛ ɛsɩ.—Yoh. 10:​17, 18. w24.08 5 § 11-12

Tɔzɩ ɛzɩma pɩɩlabɩ-ŋ alɩwaatʋ ndʋ ŋcalɩ nɩʋ Bibl taa toovenim tɔm yɔ. Ŋkpɛlɩkaa se ña-Caa weyi ɛwɛ ɛsɔdaa yɔ ɛsɔɔlɩ-ŋ, ɛsɔɔlaa se ŋwɛɛ ɛ-sɛyaa hɔʋ taa, nɛ ɛlabɩ tamaɣ se ɛkaɣ sɩnzʋʋ wɩzasɩ nɛ kʋñɔmɩŋ. Ŋŋkpɛlɩkaa ɖɔɖɔ se lidaʋ wɛɛ se ŋkaɣ naʋ ñɛ-ɛyaa kʋsɔɔlaa mba pasɩba yɔ ɛjaɖɛ kɩfaɖɛ taa, nɛ tɔm lɛɛtʋ sakɩyɛ. (Mark. 10:​29, 30; Yoh. 5:​28, 29; Roma 8:​38, 39; Natʋ 21:​3, 4) Toovenim tɔm ndʋ, tɩɩhɛzɩ ña-laŋɩyɛ. (Luka 24:32) Ŋŋsɔɔlɩ tɔm ndʋ ŋkpɛlɩkaɣ yɔ nɛ ŋŋsɔɔlaa se ŋheyi-tʋ paa anɩ. (Kpaɣ-tʋ nɛ ŋmaɣzɩnɩ Yereemii 20:9.) Ye ɖɩsɔɔlɩ tɔm ndʋ ɖɩkpɛlɩkɩɣ Bibl taa yɔ, piseɣtiɣ-ɖʋ se ɖiheyi-tʋ lalaa. (Luka 6:45) Pɩlakɩ-ɖʋ ɛzɩ pɩɩlabʋ Yesu tɔmkpɛlɩkɩyaa kajalaɣ pɩnzɩ mɩnʋʋ taa yɔ. Pɔyɔɔdaa se: «Ðɩɩpɩzɩɣ nɛ ɖiyele mbʋ ɖɩnawa nɛ ɖɩnɩɩ yɔ pɩ-tɔm yɔɔdʋʋ.» (Tʋma 4:20) Ðɩsɔɔlɩ toovenim tɔm siŋŋ nɛ pʋyɔɔ lɛ, ɖɩsɔɔlaa se ɖisusi-tʋ ɛyaa sakɩyɛ. w24.05 15 § 5; 16 § 7

Ða Yehowa sɛyaa lɛ, ɖisusuu ɛyaa lalaa tɔm mbʋ pʋyɔɔ yɔ ɖɩsɔɔlɩ ɖa-Caa weyi ɛwɛ ɛsɔdaa yɔ nɛ ɖɩsɔɔlaa ɖɔɖɔ se ɖɩsɩnɩ ɛyaa nɛ pɛkpɛlɩkɩ nɛ patɩlɩ-ɩ. Ɛlɛ pɩwɛ ɖa-taa nabɛyɛ kaɖɛ se pehiɣ taa leleŋ tɔm susuu taa. Ɛbɛ yɔɔ? Pɩtɩla, nabɛyɛ wɛ fɛyɛ siŋŋ nɛ pamaɣzɩɣ se patɩkɛ wɩlɩyaa kɩbama. Lalaa lɛ pɩɩkɛdɩɣnɩ-wɛ se powolo ɛyaa tɛ, ŋgʋ patɩyaa-wɛ. Lalaa ɖɔɖɔ lɛ, sɔɔndʋ kpaɣ-wɛ se pʋtɔma yɔ ɛyaa ɩɩkaɣ-wɛ welisinuu. Nabɛyɛ lɛ, pʋtɔma pawɩlɩ-wɛ se pa nɛ ɛyaa lalaa pataahɔ tɔm. Koobiya mba, pɩwɛ-wɛ kaɖɛ se posusi tɔm kɩbandʋ ɛyaa mba paasɩŋ-wɛ yɔ. Nabʋyʋ taa, lɩmaɣza ana ayeki nɛ ña ɖɔɖɔ pɩlakɩ-ŋ kaɖɛ se ŋhiɣ taa leleŋ tɔm susuu taa? Ye ɛɛɛ yɔ, pitaatibi-ŋ yɔɔɔ. Ɛzɩma ŋŋtaɣ ña-tɩ liu yɔ pɩpɩzɩɣ nɛ pɩwɩlɩ se ŋwɛnɩ tɩ luzuu nɛ ŋtɩsɔɔlɩ se ŋhɔ lalaa lɩmaɣza nɛ ŋkɔnɩ ñɔ-yɔɔ. Pɩwɩlɩɣ ɖɔɖɔ se ŋtɩsɔɔlɩ se ña nɛ ɛyaa ɩhɔ tɔm. Pɩtasɩ lɛ, nɔɔyʋ tɩsɔɔlɩ se pataawelisini-i, kɔzɩ kɔzɩ alɩwaatʋ ndʋ ɛñɩnɩɣ se ɛla lalaa kɩbandʋ yɔ. Ña-Caa weyi ɛwɛ ɛsɔdaa yɔ, ɛsɩm kala wena ŋkatɩɣ yɔ camɩyɛ nɛ ɛsɔɔlaa se ɛsɩnɩ-ŋ.—Iza. 41:13. w24.04 14 § 1-2

Ŋŋkalɩɣ Bibl lɛ, ña-kaɖʋwa ɛtaakɛna se ŋñakɩ pana nɛ ŋɖɔ ndʋ payɩ ŋkpɛlɩkɩɣ yɔ tɩ-tɩŋa tɩ-yɔɔ kpaagbaa, ɛlɛ ɖʋ ña-tɩ kaɖʋsɩ nzɩ sɩmaɣnaa yɔ. Ŋpɩzɩɣ nɛ ŋkpaɣnɩ ɛzʋnɔ: Ma lɛɣzɩtʋ ndʋ payɩ pɩpɔzʋʋ se ŋla yɔ, nɛ pʋwayɩ lɛ, ŋlɩzɩ tɩ-taa kʋɖʋmtʋ yaa naalɛ se ŋpaɣzɩɣnɩ-tʋ; nɛ ŋyele lɛɛtʋ nɛ pʋwayɩ lɛ ŋŋcɔnɩ ti-ɖeɖe. Lɛɣzɩtʋ ndʋ pɩwɛɛ se ŋpaɣzɩna? Ŋpɩzɩɣ nɛ ŋlɩzɩ se ŋpaɣzɩɣnɩ lɛɣzɩtʋ ndʋ tɩ-labʋ wɛ-ŋ kɛlɛʋ yɔ. Yaa ŋpɩzɩɣ nɛ ŋlɩzɩ se ŋlakɩ lɛɣzɩtʋ ndʋ tɩ-tɔm kɩlɩ cɛyʋʋ ñɛ-ɛsɩndaa yɔ. Ŋlɩzɩɣ lɛɣzɩtʋ ndʋ ŋsɔɔlaa se ŋlakɩ yɔ nɛ pɩtɛ lɛ, ŋpɩzɩɣ nɛ ŋlabɩnɩ tʋmɩyɛ tɔm ñɩnʋʋ wondu nɛ ŋñɩnɩ tɔm. Tɩmnɩ Yehowa nɛ ŋpɔzɩ-ɩ se ɛsɩnɩ-ŋ nɛ ‘ŋsɔɔlɩ nɛ ŋtɛ ŋwɛɛnɩ ɖoŋ nɛ ŋla mbʋ payɩ ɛsɔɔlaa yɔ.’ (Filp. 2:13) Pʋwayɩ lɛ, ñaɣ pana nɛ ŋɖɔ tɔm ndʋ ŋkpɛlɩkaa yɔ tɩ-yɔɔ. Alɩwaatʋ ndʋ ŋnaɣ se ŋtalɩ ña-kaɖʋwa ŋga yɔ, piseɣtiɣ-ŋ se ŋwolo pɩ-yɔɔ nɛ ŋɖʋ ña-tɩ kaɖʋwa lɛɛka. Toovenim taa lɛ, alɩwaatʋ ndʋ ŋnaɣ se ŋpɩzaa nɛ ŋla lɛɣzɩtʋ natʋyʋ pɩlɩɩnɩ ɛzɩma pɩwɛɛ se Krɩstʋ mba ɩcaɣ wezuu yɔ pɩ-hɔɔlʋʋ taa yɔ, yaa alɩwaatʋ ndʋ ŋnaɣ se ŋñaɣ pana nɛ ŋwɛɛnɩ wɛtʋ kɩbandʋ ndʋ pɩpɔzʋʋ se Krɩstʋ mba ɩwɛɛna yɔ tɩ-taa natʋyʋ yɔ, pɩtʋʋ fɛyɩ se pɩkaɣ-ŋ wɛʋ kɛlɛʋ se ŋwolo pɩ-yɔɔ nɛ ŋla lɛɣzɩtʋ hɔɔlɩŋ lɛɛŋ taa. w24.09 6 § 13-14

Pɩtɩla, ŋwɛɛ nɛ ŋnɩɣzɩɣ mbʋ pʋyɔɔ yɔ ŋŋlabɩ lakasɩ nasɩyɩ nɛ sɩɖʋ nabɛyɛ ɖɩwɩzɩyɛ. Ɛbɛ pɩzɩɣ nɛ pɩsɩnɩ-ŋ? La mbʋ ŋpɩzɩɣ yɔ nɛ ŋñɔɔzɩ mbʋ ŋwɛɛkaa yɔ. Pɩtasɩ lɛ, tendi ɛyaa mba se pakpaɣ nɛ pekpeɣ-ŋ. Pɔzɩ Yehowa se ɛsɩnɩ ɛyaa mba ña-lakasɩ kɔnɩ-wɛ kaɖɛ yɔ. Ɛpɩzɩɣ nɛ ɛsɩnɩ ña nɛ ɛyaa mba ŋɖʋ-wɛ ɖɩwɩzɩyɛ yɔ nɛ iwolo pɩ-yɔɔ nɛ ɩsɛɛ-ɩ nɛ ɩwɛɛ laŋhɛzɩyɛ taa. Kpɛlɩkɩ lɔŋ hɔɔlɩŋ weyi ɩ-taa picoɖi-ŋ yɔ ɩ-taa, nɛ ŋtisi faaa nɛ Yehowa labɩnɩ-ŋ tʋmɩyɛ ɛzɩ ɛsɔɔlʋʋ yɔ. Yele nɛ ɖɩna nayʋ Yoonaa kɩɖaʋ. Ɛsɔ kaaɖʋ-ɩ paɣtʋ se ewolo Niniivi, kɩɩwɛnɩ wɩsɩ ɖɩlɩyɛ hɔɔlʋʋ taa; ɛlɛ ese nɛ ɛkpaɣ wɩsɩ ɖɩɖʋyɛ taa nʋmɔʋ se ewolo Tarɩsiisi. Yehowa sɩɣzɩ Yoonaa lɔŋ, nɛ Yoonaa kpɛlɩkɩ lɔŋ hɔɔlʋʋ ŋgʋ kɩ-taa picoɖi-i yɔ kɩ-taa. (Yon. 1:​1-4, 15-17; 2:​7-10) Yehowa taakizi se Yoonaa ɛtaatasɩ kɛʋ ɛ-nayʋ. Ɛsɔ tasɩ-ɩ haʋ waɖɛ se ewolo Niniivi; nɛ lɛɛlɛɛyɔ lɛ, etisi lɛɛ lɛɛ nɛ ewolo. Paa pɩɩcɛyɩ Yoonaa se ɛlabɩ mbʋ pɩfɛyɩ ɖeu yɔ, pɩtɩɖɩɣ-ɩ nʋmɔʋ se ɛtaala tʋmɩyɛ nɖɩ Yehowa ɖʋ-ɩ pʋwayɩ yɔ.—Yon. 3:​1-3. w24.10 8-9 § 10-11

Pɩɩsɩɣnɩ yem se Yehowa kpeɣu-ɖʋ ɖa-kɩma yaa ɖa-kɩwɛɛkɩm, ɛlɛ ɛhɩzɩɣ-pʋ ɖɔɖɔ. Pɩsa nɛ ɖɩnɩɩ pɩ-taa lɛ, ɖɩkpaɣ kɩɖaʋ nakʋyʋ: Kpaɣ se ŋtɔɔ nɔɔyʋ kɩmɩyɛ naɖɩyɛ nɛ ɛma-ɖɩ takayaɣ nakɛyɛ taa, nɛ pʋwayɩ lɛ ɛhɛɛ caŋa kɩmɩyɛ nɖɩ ɖɩ-taa nɛ pɩwɩlɩ se ekpeɣ-ŋ ɖɩ. Paa mbʋ yɔ, ɛyʋ pɩzɩɣ nɛ ɛna kɩmɩyɛ nɖɩ ŋtɔwaa yɔ caŋa ŋga kɛ-tɛɛ. Ɛlɛ ye pahɩzɩ nabʋyʋ kɩhɩzʋʋ yɔ pɩwɛ ndɩ. Pɩsa nɛ ɖɩnɩɩ tɔm tʋnɛ tɩ-taa lɛ, pɩwɛɛ se ɖɩtɔzɩ se tɔlɩm mbʋ ɛyaa lakaɣnɩ tʋmɩyɛ caanaʋ taa yɔ, papɩzaɣ se pakpaɣ lɩm nɛ pahɩzɩ-pʋ kɛlɛʋ yem. Ɛyʋ pɩzaɣ se elii sabʋʋ nakʋyʋ lɩm taa nɛ ɛhɩzɩ mbʋ pamanɩ tɔlɩm mbʋ yɔ. Ye mbʋ alɩwaatʋ ndʋ ‘pahɩzɩɣ’ kɩmɩyɛ naɖɩyɛ yɔ, ɖɩmʋkɩ caɣ caɣ. Ɛyʋ ɛɛpɩzɩɣ nɛ ɛtasɩ naʋ tɔm ndʋ paamawa yɔ. Pɩwɛɣ ɛzɩ kɩmɩyɛ nɖɩ ɖɩtaawɛɛ wiɖiyi nɛ ɖɩna yɔ. Pɩhɛzɩɣ ɖa-laŋa siŋŋ se ɖɩna se alɩwaatʋ ndʋ Yehowa kpeɣu-ɖʋ ɖa-kɩwɛɛkɩm yɔ, ɛhɩzɩɣ-pʋ caɣ caɣ.—Keɣ. 51:9. w25.02 10 § 11

Alɩwaatʋ ndʋ lalaa ɩɩnɩɣ ɖɔ-tɔm taa yaa pawɩlɩɣ-ɖʋ ñaŋ yɔ, ɖɩwɛnɩ lidaʋ se Yehowa naɣ pɩtɩŋa. Lidaʋ ŋgʋ kɩpɩzɩɣ kɩsɩnɩ-ɖʋ nɛ ɖɩɖɔkɩ ɖa-laŋɩyɛ alɩwaatʋ ndʋ palakɩ-ɖʋ mbʋ pɩfɛyɩ ɖeu yɔ, mbʋ pʋyɔɔ yɔ ɖɩnawa se Yehowa kaɣ cɔnʋʋ tɔm ndʋ ti-ɖeɖe. Ye ɖɩɖʋzɩ mbʋ pɩlaba yɔ Yehowa nesi taa yɔ, pɩsɩɣnɩ-ɖʋ nɛ ɖɩɩwɛɣ pana taa yaa ɖɩɩcakɩnɩ ɛyaa lalaa. Ye ɖɩwɛ pana taa yaa ye ɖɩcaɣnɩ ɛyaa lalaa yɔ, pɩpɩzɩɣ pituyi-ɖʋ nɛ ɖɩla mbʋ pɩfɛyɩ ɖeu yɔ, ɖilesi ɖa-taa leleŋ, nɛ pɩpɩzɩɣ nɛ pɩwɛɛkɩ ɖa nɛ Yehowa ɖa-taabalɩyɛ. Toovenim taa lɛ, ɖɩɩkaɣ pɩzʋʋ kpa nɛ ɖɩmaɣzɩnɩ Yesu nɛ pɩtalɩ pilim. Nabʋyʋ taa ɖɩpɩzɩɣ ɖɩla nabʋyʋ yaa ɖɩyɔɔdɩ tɔm natʋyʋ nɛ pʋwayɩ lɛ ɖikpiɖi tɩ-yɔɔ. (Yak. 3:2) Nɛ nabʋyʋ taa ɖɔɖɔ, mulum lakasɩ nzɩ ɛyaa lalaa labɩ-ɖʋ yɔ sɩpɩzɩɣ nɛ sɩkɔnɩ-ɖʋ wɩzasɩ ɖa-maɣzɩm taa nɛ ɖo-tomnaɣ yɔɔ ɖe-wezuu kɩyakɩŋ kpeekpe. Ye pɩlakɩ mbʋ ñɔ-hɔɔlʋʋ taa yɔ, ña-taa ɛtɛ se Yehowa naɣ mbʋ pɩ-taa ŋwɛɛ yɔ. Nɛ Yesu nɩɣ ñe-siziŋ mbʋ pʋyɔɔ yɔ ɛnʋ ɖɔɖɔ ɛɛtɔɔ kʋñɔŋ ɖulum. (Ebr. 4:​15, 16) Ða-taa wɛ leleŋ siŋŋ se Yehowa tasɩɣ-ɖʋ lɔŋ kɩbaŋ weyi ɩsɩɣnɩ-ɖʋ se ɖɩlʋbɩnɩ mulum lakasɩ yɔ. w24.11 6 § 12-13

Pɩcɛyaa se ɛyʋ ɛwɛɛnɩ tisuu Yesu yɔɔ se pɩsa nɛ ehiɣ «wezuu maatɛŋ.» (Yoh. 3:​16-18, 36; 17:3) Yuuda ñɩma sakɩyɛ titisi tɔm ndʋ Yesu heyi-wɛ se pɩwɛɛ se pɛwɛɛnɩ tisuu ɛ-yɔɔ yɔ tɩ-yɔɔ. Pɔpɔzɩ-ɩ se: «Yʋsaɣ ŋga ŋlakɩ se ɖɩna-kɛ nɛ ɖɩwɛɛnɩ tisuu ñɔ-yɔɔ?» (Yoh. 6:30) Pʋwayɩ lɛ pɔyɔɔdɩ se Moyizi alɩwaatʋ taa, paaha pɔ-cɔzɔnaa maana nɛ pɔtɔɔ, nɛ kɩɩpɩsɩ pɔ-tɔɔnaɣ paa evemiye nɖɩ. (Neh. 9:15; Keɣ. 78:​24, 25) Pɩnaɣaɣ kpayɩ kpayɩ se tɔɔnaɣ ɖeke yɔɔ pamaɣzaɣ. Nɛ alɩwaatʋ ndʋ Yesu yɔɔdɩ «kpɔnɔ toovenim ñɩŋgʋ ŋgʋ kɩlɩnɩ ɛsɔdaa yɔ,» ŋgʋ kɩnɩɣzɩnɩ maana ŋgʋ kɩhaɣaɣ wezuu yɔ kɩ-tɔm yɔ, patɩpɔzɩ-ɩ se ɛlɩzɩ-wɛ pɩ-taa. (Yoh. 6:32) Pɛ-ɛsɩyɛ kaasɛnɩ po-tomnaɣ yɔɔ kɩcɛyɩm nɛ patiwelisi fezuu taa tɔm ndʋ Yesu kaawɛɛ nɛ eheyiɣ-wɛ yɔ. w24.12 5-6 § 10-11

Sukuli taa, ña-pɩɣa pɩzɩɣ nɛ kɛkpɛlɩkɩ wondu lɛɛtʋ ndʋ tɩ-wɛtʋ nɩɣzɩnɩ ɖama yɔ tɩ-yɔɔ tɔm. Kɩɖaʋ nakʋyʋ yɔ: Tɩŋ sakɩyɛ wɛnɩ wɛtʋ kʋɖʋmtʋ natʋyʋ. Pilinzi sɔsɔsɩ lɩɣ tɩʋ hɔɔyɛ yɔɔ, nɛ pilinzi cikpesi ñalɩɣ pilinzi sɔsɔsɩ yɔɔ. Payaɣ wɛtʋ ndʋ se fractale. Ðɩnaɣ wɛtʋ ndʋ ɖɔɖɔ wondu kɩlɩzɩtʋ lɛɛtʋ yɔɔ. Ɛlɛ ayeba nɛ wondu ndʋ tɩwɛɛnɩ wɛtʋ kɩbandʋ ndʋ? Ye ña-pɩɣa ɛmaɣzɩɣ tɔm pɔzʋʋ mbʋ pɩ-ɖɔndɩ yɔɔ ɖoŋ ɖoŋ yɔ, pɩtɩla pɩkaɣ-kɛ sɩnʋʋ nɛ ka-taa tɛ nɛ pɩkɩlɩ se Ɛsɔ lɩzɩnɩ wondu tɩŋa. Ña-pɩɣa wɛɣ nɛ kapaɣlɩɣ lɛ, pɩpɔzʋʋ se ña ɖɔɖɔ ŋsɩnɩ-kɛ nɛ katɩlɩ mbʋ pʋyɔɔ pɩpɔzʋʋ se kaña Ɛsɔ paɣtʋ yɔ. Pɩsa nɛ ŋla mbʋ lɛ, ŋpɩzɩɣ nɛ ŋpɔzɩ-kɛ se: «Ye Ɛsɔ ɛlɩzɩnɩ-ɖʋ yɔ, ŋŋmaɣzɩɣ se ɛsɩm wezuu ŋgʋ pɩwɛɛ se ɖɩcaɣ nɛ ɖihiɣ koboyaɣ nɛ pɩkɩlɩ yɔ?» Pʋwayɩ lɛ, ŋpɩzɩɣ nɛ ŋheyi-kɛ se Ɛsɔ ha-ɖʋ Bibl se kɩsɩnɩ-ɖʋ nɛ ɖɩtɩlɩ mbʋ pɩwɛɛ se ɖɩla nɛ ɖihiɣ koboyaɣ yɔ. w24.12 16 § 8

Fezuu ɖiyi apostoloo Pɔɔlɩ nɛ ɛma se pɩwɛɛ se palɩzɩ kɩwɛɛkɩm laɖʋ weyi etikpiɖi ɛ-kɩwɛɛkɩm yɔɔ yɔ ɛgbɛyɛ taa. (1 Kɔr. 5:13) Lɩmaɣza wena pɩɩwɛɛ se ɛgbɛyɛ taa koobiya ɩwɛɛnɩ ɛ-yɔɔ? Pɔɔlɩ heyi-wɛ se ‘peyele taabalɩyɛ ɖʋʋ’ nɛ ɛyʋ ɛnʋ. Pʋ-tɔbʋʋ lɛ suwe? Pɔɔlɩ lɩzɩ pɩ-taa se paɣtʋ ndʋ tɩwɩlɩɣ ɖɔɖɔ se ‘halɩ pa nɛ ɛyʋ ɛnʋ pataatɔɔ.’ (1 Kɔr. 5:11) Ye ña nɛ nɔɔyʋ ɩkpɛndɩɣ nɛ ɩtɔkɩ tɔɔnaɣ yɔ, ña nɛ ɩ ɩyɔɔdʋʋ nɛ piyeki nɛ ña nɛ ɩ ɩɖʋ taabalɩyɛ kɛlɛʋ yem. Ye mbʋ, pɩnaɣ kpayɩ kpayɩ se tɔm ndʋ Pɔɔlɩ yɔɔdaa yɔ, tɩwɩlɩɣ se pɩtɩpɔzɩ se ɛgbɛyɛ taa koobiya ɩkpakɩɣ alɩwaatʋ nɛ pa nɛ ɛyʋ ɛnʋ pacakɩ. Ye pɔɖɔm lɔŋ tasʋʋ mbʋ pɩ-yɔɔ yɔ, pɩkandɩyɩɣ ɛgbɛyɛ yɔɔ nɛ ɛyʋ ɛnʋ ɛ-lakasɩ kɩdɛkɛdɩsɩ ɩɩɖɛɣ koobiya. (1 Kɔr. 5:​5-7) Pɩtasɩ lɛ, ye paaɖʋʋ taabalɩyɛ nɛ ɛyʋ ɛnʋ yɔ, pɩkaɣ yebu nɛ ɛna se eposini Yehowa siŋŋ, nɛ pɩpɩzɩɣ piyele nɛ fɛyɛ kpa-ɩ nɛ piseɣti-i nɛ ekpiɖi ɛ-kɩwɛɛkɩm yɔɔ. w24.08 15 § 4-5

Izrayɛɛlɩ mba tɔkaɣ kazandʋ natʋyʋ paa pɩnaɣ ŋga. Payaɣ-tʋ se Kɩwɛɛkɩm yɔɔ Huuzuu Kɩyakʋ. Kɩyakʋ ŋgʋ ki-wiye, cɔjɔ kɩlɩm laɣaɣ kpɩna samaɣ yɔɔ. Pɩkɛ toovenim se kpɩna kɩlaŋ taapɩzɩɣ se ihuuzi ɛyaa kɩwɛɛkɩm yɔɔ caɣ caɣ, mbʋ pʋyɔɔ yɔ ɛyaa kɩlɩ kpɩna. Ɛlɛ Izrayɛɛlɩ ñɩma mba pekpiɖi pa-kɩwɛɛkɩm yɔɔ yɔ, ye pala kɩlaŋ ɛzɩ Yehowa sɔɔlʋʋ yɔ, etisiɣ faaa nɛ ekpeɣ-wɛ pa-kɩwɛɛkɩm. (Ebr. 10:​1-4) Kɩlaŋ weyi Izrayɛɛlɩ mba laɣaɣ kɩyakʋ ŋgʋ ki-wiye nɛ alɩwaatʋ lɛɛtʋ yɔɔ yɔ, ɩsɩɣaɣnɩ-wɛ se pana se pɛkɛ kɩwɛɛkɩm laɖaa. Paa mbʋ yɔ, Yehowa labɩ tamtam ɖʋtʋ natʋyʋ se pɩsa nɛ ekpeɣ ɛyaa pa-kɩwɛɛkɩm. Eyeba nɛ ɛ-Pɩyalʋ kʋsɔɔlʋ laa «ɛ-tɩ tam kʋɖʋm nɛ pɩkpaɣ pɩɖɛɛ se ɛsɩɣlɩ ɛyaa sakɩyɛ kɩwɛɛkɩm.» (Ebr. 9:28) Yesu cɛlɩ «e-wezuu se pɩkɛ kɩhɛyʋʋ ɛyaa sakɩyɛ ñʋʋ taa.»—Mat. 20:28. w25.02 4 § 9-10

«Toovenim taa lɛ, fezuu wɛ ɖoŋ ɛlɛ tomnaɣ wɛnɩ ɛjandʋ.» (Mat. 26:41b) Yesu yɔɔdɩnɩ tɔm ndʋ se ɛwɩlɩ se ɛnawa se ɖɩkɛ ɛyaa mantɩtalɩ pilimwaa nɛ piyiɣdiɣ-ɖʋ. Ɛlɛ ɛyɔɔdɩ tɔm ndʋ ɖɔɖɔ se ɛpaɣ-ɖʋ se ɖɩtaakɩlɩ ɖa-tɩ taʋ liu. Ñɩɣtʋ pazɩ pʋcɔ nɛ Yesu yɔɔdʋʋ tɔm ndʋ lɛ, ɛ-tɔmkpɛlɩkɩyaa kaayɔɔdaa se paa ɛbɛ ɛlakɩ yɔ paakaɣ-ɩ kizuu kpa. (Mat. 26:35) Paawɛnɩ lɩmaɣza kɩbana. Paa mbʋ yɔ, pataaɖiɣzina se kaɖɛ alɩwaatʋ taa papɩzɩɣ nɛ pelesi po-ɖoŋ kɛlɛʋ yem nɛ pala mbʋ pɩtɩtʋʋzɩ yɔ. Pʋyɔɔ Yesu paɣ-wɛ ɛzɩ evemiye mayaɣ wɩlʋʋ yɔ. Pɩlabɩ pʋtɔdɩyɛ se tɔmkpɛlɩkɩyaa tɩpɩzɩ nɛ pefeŋ. Alɩwaatʋ ndʋ pakpa Yesu yɔ, paacaɣ ɛ-cɔlɔ? Yaa sɔɔndʋ kpa-wɛ nɛ pese peyebi-i? Pataacaɣnɩ pɛ-ɛsa, pʋyɔɔ lɛ mbʋ paatɔm se paakaɣ labʋ kpa yɔ, mbʋ ɖeyi ɖeyi palaba: Pesewa nɛ peyele Yesu.—Mat. 26:56. w24.07 14 § 1-2

Alɩwaatʋ ndʋ Aɖam nɛ Ɛva palabɩ kɩwɛɛkɩm yɔ, pelesi taabalɩyɛ kɩbanɖɛ nɖɩ ɖɩɩwɛ pa nɛ pa-Caa Yehowa pɛ-hɛkʋ taa yɔ. Kiɖe tɛɛ lɛ, Aɖam nɛ Ɛva paakɛ Ɛsɔ hɔʋ taa mba. (Luka 3:38) Ɛlɛ pamanɩ Yehowa paɣtʋ yɔɔ lɛ, ɛɖɔɔnɩ-wɛ ɛ-hɔʋ taa pʋcɔ nɛ papaɣzɩ piya lʋlʋʋ. (Kiɖe 3:​23, 24; 4:1) Ðɩkɛ pa-lʋlʋʋ taa mba, pʋyɔɔ lɛ pɩpɔzʋʋ se ɖa nɛ Yehowa ɖiceɣ. (Roma 5:​10, 11) Pʋ-tɔbʋʋ lɛ se pɩpɔzʋʋ se ɖɩñaɣ pana nɛ taabalɩyɛ kɩbanɖɛ wɛɛ ɖa nɛ ɩ ɖɛ-hɛkʋ taa. Takayaɣ nakɛyɛ yɔɔdaa se Grɛɛkɩ tɔm piye nɖɩ pɛɖɛzaa se «ceɣu» yɔ, papɩzɩɣ nɛ palɩzɩ ɖɩ-taa se «ɛyʋ eyele nɛ weyi ɛkɛ e-koyindu yɔ ɛpɩsɩ ɛ-taabalʋ.» Mbʋ pɩwɛ piti yɔ lɛ se Yehowa calɩnɩ kpɛzʋʋ nɩŋgbaŋaɣ se eyele nɛ ɖa nɛ ɩ ɖiceɣ. Ɛzɩma tɩyɛ? Yehowa labɩ kɩwɛɛkɩm yɔɔ huuzuu ɖʋtʋ se pɩsa nɛ taabalɩyɛ kɩbanɖɛ ɖaɣnɩ wɛʋ ɛ nɛ kɩwɛɛkɩm laɖaa pɛ-hɛkʋ taa. Ðʋtʋ ndʋ tɩ-tɔbʋʋ ɖɔɖɔ lɛ se pakpaɣ nabʋyʋ nɛ pɛlɛɣzɩ lɛɛbʋ lone taa nɛ pɩmʋnɩ ɖeyi ɖeyi. Ðɩnɛ ɛlɛ, mbʋ pileba yaa mbʋ pɩwɛɛkaa yɔ, papɩzɩɣ nɛ paɖaɣnɩ-pʋ hiɣu yaa pɛlɛɣzɩ pi-lone taa. w25.02 3-4 § 7-8

Apostoloo Pɔɔlɩ yɔɔdaa se ɛzɩma pa-taa sakɩyɛ «hɔm abalʋ ɛnʋ ɛ-nɩŋgbaŋʋʋ yɔ pɩmaɣ mbʋ.» (2 Kɔr. 2:​5-8) Pʋ-tɔbʋʋ lɛ se lɔŋ sɩɣzʋʋ mbʋ patasɩ abalʋ weyi ɛɛkpaɣ ɛ-caa halʋ yɔ pɩtalɩ pɩ-kaɖʋwa. (1 Kɔr. 5:1) Kaɖʋwa ŋga? Kaɖʋwa ŋga lɛ se pɩsɩnɩ-ɩ nɛ ekpiɖi ɛ-kɩwɛɛkɩm yɔɔ. (Ebr. 12:11) Pʋwayɩ Pɔɔlɩ tasɩ ɛgbɛyɛ lɔŋ se: «Ikpeɣ-i faaa nɛ ɩhɛzɩ ɛ-laŋɩyɛ» nɛ «ɩwɩlɩ-ɩ se ɩsɔɔlɩ-ɩ.» Taasɔɔ se Pɔɔlɩ tɩyɔɔdɩ yem se paha nʋmɔʋ abalʋ ɛnʋ nɛ ɛpɩsɩ ɛgbɛyɛ taa. Ɛlɛ Pɔɔlɩ kaasɔɔlaa se koobiya ɩtɩŋnɩ pɔ-tɔm pee nɛ pa-lakasɩ yɔɔ nɛ peyele nɛ abalʋ ɛnʋ ɛ-taa tɛ se pakpaɣaa nɛ pekpeɣ-i nɛ pɔsɔɔlɩ-ɩ. Ye palabɩ mbʋ yɔ, pawɩlɩɣ kpayɩ kpayɩ se pa-taa labɩ leleŋ se abalʋ ɛnʋ ɛpɩsɩ ɛgbɛyɛ taa. w24.08 15 § 4; 16-17 § 6-8

Apostoloo Pɔɔlɩ pɩzaɣ se ɛyɔɔdɩ mbʋ pɩwɛɛ se ɛyʋ ɛla nɛ ɛɖɔkɩ ɛ-laŋɩyɛ yɔ pɩ-tɔm nɛ ɛtɛ ɛ-taa. Ɛtɔzɩ Krɩstʋ ñɩma se alɩwaatʋ ndʋ pakatɩɣ kʋñɔmɩŋ yɔ, pɩtɩpɔzɩ se pataa pa-tɩ liu, ɛlɛ Yehowa pɩwɛɛ se pataa liu. Mbʋ kaahanɩ Pɔɔlɩ abalɩtʋ nɛ ɛyɔɔdɩ se: «Yehowa kɛnɩ man-sɩnɩyʋ; sɔɔndʋ ɛɛkaɣ-m kpaʋ.» (Ebr. 13:6) Sɔnɔ, pɛwɛɛ nɛ panazɩɣ ɖo-koobiya nabɛyɛ. Ðɩpɩzɩɣ nɛ ɖɩtɩmɩ pɔ-yɔɔ nɛ pɩwɩlɩ se ɖɩsɔɔlɩ-wɛ. Nɛ nabʋyʋ taa lɛ, ɖɩpɩzɩɣ nɛ ɖɩha-wɛ mbʋ pɩpɔzʋʋ-wɛ yɔ. Ɛlɛ Bibl yɔɔdɩ kpayɩ kpayɩ se «mba payɩ pɔsɔɔlaa se pɔñɔɔnɩ Ɛsɔ pe-wezuu caɣʋ taa pa nɛ Krɩstʋ Yesu pɔ-nɔɔ kʋɖʋmaɣ labʋ taa yɔ, pakaɣ-wɛ nazʋʋ ɖɔɖɔ.» (2 Tim. 3:12) Pʋyɔɔ lɛ, pɩwɛɛ se ɖa-tɩŋa ɖɩñɔɔzɩ ɖa-tɩ nɛ ɖɩɖaŋ kaɖɛ alɩwaatʋ ndʋ tɩkaɣ kɔm nɛ ɛsɩndaa yɔ. Ðiwolo pɩ-yɔɔ nɛ ɖɩtaa Yehowa liu kiya sɔnɔ nɛ ɖa-taa tɛ se ɛkaɣ-ɖʋ sɩnʋʋ nɛ ɖɩɖɔkɩ ɖa-laŋɩyɛ kʋñɔmɩŋ weyi ɖɩkaɣ katʋʋ yɔ ɩ-taa. Alɩwaatʋ talɩɣ lɛ, ɛkaɣ yebu nɛ ɛ-sɛyaa siɣsiɣ tɩnaa tɩŋa hɛzɩ.—2 Tes. 1:​7, 8. w24.09 13 § 17-18

Ɛbɛ sɩnɩ Kɔrɛntɩ mba nɛ peyele nɛ pamɩyɩsɩ-wɛ lɩm? (2 Kɔr. 10:​4, 5) Ɛsɔtɔm nɛ Ɛsɔ fezuu kiɖeɖeu ŋgʋ kɩwɛ ɖoŋ yɔ kɩsɩnɩ-wɛ nɛ pɛlɛɣzɩ pe-wezuu caɣʋ kiya. (Ebr. 4:12) Kɔrɛntɩ ñɩma mba paamʋ Krɩstʋ yɔɔ tɔm kɩbandʋ yɔ, papɩzaa nɛ peyele lakasɩ kɩdɛkɛdɩsɩ labʋ; peyebi sʋlʋm kpaŋʋʋ nɛ mɩlɩm, mba paka kʋzʋʋ pilinzi nɛ pasʋʋnɩ ɖama yɔ peyebi lakasɩ nzɩ ɖɔɖɔ. (1 Kɔr. 6:​9-11) Paa pɩɩwɛɛ se Kɔrɛntɩ mba ɩñaɣ pana nɛ pɛlɛɣzɩ pa-lakasɩ kɩdɛkɛdɩsɩ yɔ, patɩmaɣzɩ se pɩwɛɣ-wɛ kaɖɛ kpem se papɩsɩ Krɩstʋ mba. Pañaɣ pana siŋŋ nɛ patɩŋ nʋmɔʋ sɔɖɩɩɩ ñɩŋgʋ ŋgʋ kiwokini wezuu maatɛŋ taa yɔ. (Mat. 7:​13, 14) Ŋwɛɛ nɛ ŋlʋkɩ se ŋyele lakasɩ kɩdɛkɛdɩsɩ nasɩyɩ nɛ pɩsa nɛ pamɩyɩsɩ-ŋ lɩm na? Taayele lʋbʋ kpa. Tendi Yehowa se ɛha-ŋ e-fezuu kiɖeɖeu nɛ kɩsɩnɩ-ŋ nɛ ŋlʋbɩnɩ kɩdɛkɛdɩm. w25.03 6 § 15-17

Yehowa labɩ-ɖʋ tamaɣ se ɛkaɣ-ɖʋ haʋ lɔŋsɩnɖɛ nɛ ɖɩsɩnɩ-ɖʋ nɛ ɖɩna se lɩmaɣzɩyɛ naɖɩyɛ kɛdɩnɩ-ɩ yaa ɖɩtɩkɛdɩnɩ-ɩ. Ɛhaɣ lɔŋsɩnɖɛ nɖɩ «ɛyaa kpeekpe faaa nɛ ɛɛkalɩɣ.» Ŋtɩmɩɣnɩ Yehowa nɛ ŋpɔzɩ-ɩ se ɛsɩnɩ-ŋ nɛ pɩtɛ lɛ, ñaɣ pana nɛ ŋna ɛzɩma ecosuu-ŋ yɔ. Ðɩkpaɣ kɩɖaʋ kʋnɛ: Ye ŋwɛɛ nɛ ŋɖɔŋ nʋmɔʋ nɛ ŋle yɔ, ŋpɩzɩɣ nɛ ŋpɔzɩ ɛyʋ weyi ɛwɛ lone nɖɩ ɖɩ-taa ŋleba yɔ se ɛsɩnɩ-ŋ. Ɛlɛ ŋpɩzɩɣ ŋwolo ña-nʋmɔʋ ɖɔm yɔɔ ye ɛyʋ ɛnʋ ɛtɩwɩlɩtɩ-ŋ nʋmɔʋ yɔ? Aayɩ. Ŋkaɣ-ɩ welisinuu camɩyɛ alɩwaatʋ ndʋ ɛwɩlɩɣ-ŋ nʋmɔʋ yɔ. Mbʋ ɖɔɖɔ, alɩwaatʋ ndʋ ŋpɔzʋʋ Yehowa se ɛha-ŋ lɔŋsɩnɖɛ yɔ, ñɩnɩ Bibl paɣtʋ nɛ paɣtʋ kila wena atukuuni ñɛ-wɛtʋ yɔ nɛ pɩsɩnɩ-ŋ nɛ ŋna ɛzɩma Yehowa cosuu-ŋ yɔ. Ðɩkpaɣ se nabɛyɛ ya-ŋ se ŋwolo nɛ ña nɛ wɛ ɩmʋ helim. Ŋpɩzɩɣ nɛ ŋñɩnɩ nɛ ŋna tɔm ndʋ Bibl yɔɔdʋʋ kazandʋ ndʋ tɩ-taa pɛɖɛlɛsɩɣ niye yɔ, taabalɩyɛ kɩdɛkɛdɩyɛ ɖʋʋ nɛ mbʋ pʋyɔɔ pɩcɛyaa se ɖɩsɩɩ Kewiyaɣ tʋma kajalaɣ lone taa yɔ pɩ-yɔɔ yɔ. Pɩsɩɣnɩ-ŋ nɛ ŋna se pɩwɛɛ se ŋwolo helim mʋʋ mbʋ pɩ-taa yaa ŋtaawolo.—Mat. 6:33; Roma 13:13; 1 Kɔr. 15:33. w25.01 16 § 6-7

Izaayii natʋ tɔm wɩlɩɣ se wɛtʋ ndʋ tɩ-taa mba pɛwɛ fezuu taa paradisuu taa yɔ pɛwɛɛ yɔ, tɩwɛ ndɩ kpem nɛ wɛtʋ ndʋ tɩ-taa mba pɛfɛyɩ kɩ-taa yɔ pɛwɛɛ yɔ. Yehowa cɔŋnɩ ɛ-sɛyaa fezuu taa kɩcɛyɩm ɖeɖe siŋŋ. Ɛhaɣ-ɖʋ e-fezuu kiɖeɖeu, ɛ-Tɔm nɛ fezuu taa tɔɔnasɩ sakɩyɛ se ‘ɖɩtɔɔ, ɖɩñɔɔ nɛ ɖɩmɛyɩ.’ (Kpaɣ-tʋ nɛ ŋmaɣzɩnɩ Natʋ 22:17.) Ɛlɛ mba pɛfɛyɩ fezuu taa paradisuu taa yɔ, pɛwɛɛ nɛ ‘pasɩkɩ ñɔɔsɩ, lɔkɔtʋ kʋʋ-wɛ nɛ fɛyɛ kpaɣ-wɛ.’ Nɔɔyʋ ɛɛcɔŋnɩ pe-fezuu taa kɩcɛyɩm ɖeɖe. (Amo. 8:11) Yehowa haɣ ɛ-sɛyaa mbʋ payɩ pɩpɔzʋʋ-wɛ yɔ pɩkpɛndɩnɩ fezuu taa tɔɔnaɣ. (Yow. 2:​21-24) Yehowa tɩŋɩɣnɩ Bibl, ɛgbɛyɛ takayɩsɩ, ɖɛ-intɛrnɛɛtɩ lone, ɖe-kediɣzisi, egeetiye kigbeɣliŋ nɛ kigbeɣliŋ sɔsɔŋ yɔɔ nɛ ɛhaɣ-ɖʋ mbʋ payɩ pɩpɔzʋʋ-ɖʋ yɔ. Ðɩpɩzɩɣ nɛ ɖɩtɔɔ fezuu taa tɔɔnaɣ ŋga paa evemiye nɖɩ; ye ɖɩlakɩ mbʋ yɔ, ɖɩwɛɣ alaafɩya fezuu taa nɛ pɩkɩlɩ nɛ pɩhɛzɩɣ ɖɔɖɔ ɖa-laŋa siŋŋ. w24.04 21 § 5-6

Ye ŋsɔɔlaa se ña nɛ nɔɔyʋ ɩpaɣzɩ ɖama ɖanʋʋ yɔ, ŋpɩzɩɣ ŋla ɖʋtʋ nɛ ña nɛ ɛyʋ ɛnʋ ɩyɔɔdɩ, pɩpɩzɩɣ nɛ pɩkɛ ɖenɖe ɛyaa wɛɛ yɔ yaa kaŋgalaafu yɔɔ. Heyi-i kpayɩ kpayɩ se ŋsɔɔlɩ ɛ-tɔm nɛ ñe-liu wɛɛ se ŋtɩlɩ-ɩ nɛ pɩkɩlɩ. (1 Kɔr. 14:9) Ye pɩpɔzʋʋ yɔ, ha-ɩ alɩwaatʋ nɛ ɛmaɣzɩ pʋcɔ nɛ ecosi-ŋ. (Adu. 15:28) Nɛ ye ɛyʋ ɛnʋ ɛtɩsɔɔlɩ se ña nɛ ɩ ɩɖanɩ ɖama yɔ, tisi nɛ ŋña ɛ-lɩmaɣza. Ye nɔɔyʋ eheyi-ŋ se ɛsɔɔlɩ ñɔ-tɔm yɔ, ɛbɛ ŋpɩzɩɣ nɛ ŋla? Pɩtʋʋ fɛyɩ se ɛyʋ ɛnʋ ɛlabɩ abalɩtʋ pʋcɔ nɛ ɛñɔtɩnɩ-ŋ, pʋyɔɔ lɛ cosi-i nɛ nɔɔ kɩbaŋa nɛ ñamtʋ. Ye pɩcɛyaa se ŋkpaɣ alɩwaatʋ nɛ ŋmaɣzɩ nɛ ŋna se ŋtisiɣ se ña nɛ ɩ ɩɖanɩ ɖama yaa ŋŋtisiɣ yɔ, heyi-i se ɛha-ŋ alɩwaatʋ. Ɛlɛ ñaɣ pana nɛ ŋcosi-i lɔŋ. (Adu. 13:12) Ye ŋtɩsɔɔlɩ se ña nɛ ɩ ɩɖanɩ ɖama yɔ, heyi-i ña-lɩmaɣza nɛ nɔɔ kɩbaŋa nɛ pɩ-taa tʋ kpayɩ kpayɩ. Ɛlɛ ye ŋsɔɔlaa se ña nɛ ɛyʋ ɛnʋ ɩɖanɩ ɖama yɔ, heyi-i ña-lɩmaɣza nɛ ña nɛ ɩ ɩyɔɔdɩ nɛ ɩna ɛzɩma ɩsɔɔlaa se mɩ-ɖanɩyɛ ɛɖɔ yɔ. Mɩ-sɔnzɩ yaa wɛtʋ lɛɛtʋ yɔɔ lɛ, mbʋ lɛlʋ sɔɔlaa yɔ, pɩpɩzɩɣ nɛ pɩwɛɛ ndɩ nɛ mbʋ lɛlʋ ñɔsɔɔlaa yɔ. w24.05 23-24 § 12-13

Daviid wobi Izrayɛɛlɩ sɔɔjanaa cɔlɔ, nɛ alɩwaatʋ ndʋ lɛ ɛɛkɛ pɩɣa evelaɣ. Ɛtalaa lɛ, ɛna se sɔɔndʋ kaawɛɛ nɛ tɩkpaɣ sɔɔjanaa, mbʋ pʋyɔɔ yɔ Filistii mba sɔdʋʋ weyi payaɣ se Gooliyaatɩ yɔ ɛlɩwa nɛ ɛyaɣ ‘Izrayɛɛlɩ sɔɔjanaa se pamaɣzɩ nɛ pana waɖʋ.’ (1 Sam. 17:​10, 11) Sɔɔndʋ kpaɣaɣ sɔɔjanaa, mbʋ pʋyɔɔ yɔ paakam pa-lɩmaɣza Gooliyaatɩ paɣlɩka yɔɔ nɛ tɔm ndʋ ɛɛwɛɛ nɛ eheyiɣ Izrayɛɛlɩ mba yɔ tɩ-yɔɔ. (1 Sam. 17:​24, 25) Ɛlɛ mbʋ pɩ-yɔɔ Daviid ñaakam ɛ-lɩmaɣza yɔ pɩwɛ ndɩ. Daviid kaanawa se alɩwaatʋ ndʋ Gooliyaatɩ kaawɛɛ nɛ ehoŋuu Izrayɛɛlɩ sɔɔjanaa yɔ, «Ɛsɔ ɛsadʋ» ɛwɛɛ nɛ ɛtʋʋ. (1 Sam. 17:26) Daviid kaawɛɛ nɛ ɛmaɣzɩɣ Yehowa yɔɔ. Daviid taa kaatɛma se Ɛsɔ weyi ɛɛsɩnɩ-ɩ alɩwaatʋ ndʋ eɖiyaɣ heŋ yɔ, ɛkaɣ-ɩ sɩnʋʋ ɖɔɖɔ wɛtʋ tʋnɛ tɩ-taa. Ɛ-taa kaatɛma se Yehowa Ɛsɔ kaɣ-ɩ sɩnʋʋ, pʋyɔɔ eyoni Gooliyaatɩ nɛ ɛwabɩ-ɩ.—1 Sam. 17:​45-51. w24.06 21 § 7

Ðɩmaɣzɩ nɛ ɖɩna, ye ɖɩtaasɛɣ Yehowa yɔ ɛzɩma ɖe-wezuu caɣʋ kaawɛɛ? Ye ɖɩlakɩ mbʋ yɔ, pɩpɩzɩɣ pɩsɩnɩ-ɖʋ nɛ ɖɩwɛɛ siɣsiɣ Yehowa ɛsɩndaa, nɛ ɛzɩ keɣa maɖʋ yɔ, ɖa ɖɔɖɔ ɖɩyɔɔdɩ se: «Ma lɛ, pɩwɛ-m ɖeu se mɔñɔtɩnɩ Ɛsɔ.» (Keɣ. 73:28) Ðɩpɩzɩɣ nɛ ɖɩlʋbɩnɩ kala wena payɩ ɖɩkatɩɣ kɛdɛzaɣ kɩyakɩŋ ɩnɛ ɩ-taa yɔ, mbʋ pʋyɔɔ yɔ «Ɛsɔ ɛsadʋ nɛ toovenim tʋ» tʋmɩyɛ ɖɩwɛɛ nɛ ɖɩlakɩ. (1 Tes. 1:9) Ðɛ-Ɛsɔ cɔŋnɩ ɖɔ-yɔɔ nɛ ɛkaɣ-ɖʋ sɩnʋʋ paa ɛzɩmtaa. Ɛɛsɩnɩ ɛ-sɛyaa caanaʋ taa nɛ ɛsɩɣnɩ ɖa ɖɔɖɔ sɔnɔ. Pɩkazɩ pazɩ lɛ, ɖɩkaɣ katʋʋ kʋñɔŋ sɔsɔʋ ŋgʋ wiɖiyi kɩtɩlɩtɩ tɛtʋ kpeekpe yɔɔ yɔ. Ɛlɛ ɖɩɩkaɣ wɛʋ ɖe-ɖeke, Yehowa kaɣ wɛʋ ɖɔ-cɔlɔ. Tɛtɛ nɛ ɖa-tɩŋa payɩ «ɖɩwɛɛ abalɩtʋ siŋŋ nɛ ɖɩyɔɔdɩ se: “Yehowa kɛnɩ man-sɩnɩyʋ; sɔɔndʋ ɛɛkaɣ-m kpaʋ.”»—Ebr. 13:​5, 6. w24.06 25 § 17-18

Bibl yɔɔdʋʋ abalaa mba paacɛzɩ 40 yɔ pɔ-tɔm se paatɔɔ kewiyitu Izrayɛɛlɩ yɔɔ. Nɛ kɩkɛdɩɣ-ɖʋ kpayɩ mbʋ awiya ana a-taa naayɛ laba yɔ. Kɩyɔɔdʋʋ se halɩ awiya kɩbana kaalabɩ lakasɩ kɩdɛkɛdɩsɩ. Iyele nɛ ɖɩna wiyaʋ kɩbanʋ Daviid kɩɖaʋ. Yehowa yɔɔdaa se: «Ma-lɩmɖʋyʋ Daviid . . . [kaaɖɔkɩ] man-paɣtʋ nɛ ɛtɩŋ ma-wayɩ nɛ ɛ-laŋɩyɛ pilim, nɛ ɛla mbʋ pɩtʋʋzaa yɔ pi-ɖeke mɛ-ɛsɩndaa.» (1 Awi. 14:8) Ŋgʋ Daviid kaalabɩ acɛyɛ nɛ abalʋ nɔɔyʋ halʋ, nɛ eyele nɛ pakʋ abalʋ ɛnʋ you taa. (2 Sam. 11:​4, 14, 15) Bibl heyiɣ-ɖʋ ɖɔɖɔ se awiya wena ataawɛɛ siɣsiɣ yɔ, a-taa sakɩyɛ labɩ lakasɩ kɩbanzɩ. Iyele nɛ ɖɩna Robowam kɩɖaʋ. Yehowa ɛsɩndaa lɛ, «Robowam labɩ mbʋ pɩfɛyɩ ɖeu yɔ.» (2 Kro. 12:14) Paa mbʋ yɔ, Robowam kaañam Yehowa paɣtʋ nɛ etiyooni Izrayɛɛlɩ cejewe 10, ɛlɛ eyebi-yɛ nɛ alɩzɩ wiyaʋ lɛlʋ. Ɛɛlaba ɖɔɖɔ nɛ tɛtʋ ndɩ ndɩ ndʋ tɩɩwɛ e-kewiyaɣ taa yɔ tɩkpa ɖoŋ se pɩsa nɛ ɛkandɩyɩ Ɛsɔ samaɣ yɔɔ. (1 Awi. 12:​21-24; 2 Kro. 11:​5-12) Ɛzɩma Yehowa lakaɣ nɛ ɛnaɣ se wiyaʋ nɔɔyʋ wɛ siɣsiɣ ɛ-ɛsɩndaa yaa ɛfɛyɩ siɣsiɣ? Pɩtʋʋ fɛyɩ se ɛcɔŋnaɣ wiyaʋ ɛnʋ ɛ-laŋɩyɛ taa wɛtʋ, ɛzɩma eekpiɖi ɛ-kɩwɛɛkɩm yɔɔ yɔ nɛ ɛzɩma ɛɛñɔnɩ toovenim Ɛsɔ sɛtʋ yɔ. w24.07 20 § 1-3

Ye pɩɣa evelaɣ ŋga pamɩyɩsɩ-kɛ lɩm nɛ katɩtalɩtɩ pɩnzɩ 18 yɔ kalabɩ kɩwɛɛkɩm sɔsɔm nabʋyʋ yɔ, ɛbɛ pɩwɛɛ se ɛzʋtʋyaa ɩla? Ɛgbɛyɛ taa ɛzʋtʋyaa ɛgbɛyɛ kaɣ lɩzʋʋ ɛzʋtʋyaa 2 nɛ pakatɩ pɩɣa evelaɣ ŋga nɛ ka-lʋlɩyaa Krɩstʋ ñɩma. Ɛzʋtʋyaa mba, pakaɣ pɔzʋʋ lʋlɩyaa se pana se ɛbɛ pɛtɛm labʋ se pasɩnɩ pa-pɩɣa nɛ kala lɛɣzɩtʋ ndʋ pɩpɔzʋʋ yɔ nɛ kekpiɖi ka-kɩwɛɛkɩm yɔɔ. Ye pɩɣa ŋga, kɛwɛnɩ wɛtʋ kɩbandʋ nɛ ka-lʋlɩyaa ɩwɛɛ nɛ pasɩɣnɩ-kɛ ɛzɩ pɩpɔzʋʋ yɔ, ɛgbɛyɛ taa ɛzʋtʋyaa mba pa-naalɛ papɩzɩɣ nɛ pakpaɣ lɩmaɣzɩyɛ se pɩtɩtasɩ cɛyʋʋ se ka nɛ ka-lʋlɩyaa pakatɩ ɛzʋtʋyaa kɔɔmitee nakʋyʋ. Ɛzʋtʋyaa nawa se lʋlɩyaa Yehowa ɖʋ tʋmɩyɛ se pasɩɣzɩ pe-piya lɔŋ nɛ sɔɔlɩm. (Wp. 6:​6, 7; Adu. 6:20; 22:6; Efɛz. 6:​2-4) Ɛlɛ pʋwayɩ ɛzʋtʋyaa kaɣ pɔzʋʋ lʋlɩyaa nabʋyʋ taa nɛ pana se pɛwɛɛ nɛ pasɩɣnɩ pɩɣa ŋga ɛzɩ pɩpɔzʋʋ yɔ. Ɛlɛ, ye pɩɣa evelaɣ ŋga kekizaa se kaalɛɣzɩɣ kɛ-wɛtʋ kɩdɛkɛdɩtʋ yɔ, ɛbɛ pɩwɛɛ se ɛzʋtʋyaa ɩla? Ye pɩkɛ mbʋ yɔ, pɩwɛɛ se ɛzʋtʋyaa kɔɔmitee ɛkatɩ pɩɣa evelaɣ ŋga nɛ ka-lʋlɩyaa Krɩstʋ ñɩma. w24.08 24 § 18

Ða-tɩŋa ɖa-taa lakɩ leleŋ alɩwaatʋ ndʋ palakɩ-ɖʋ kʋjɔʋ nakʋyʋ yɔ. Paa mbʋ yɔ, ɖa-taa lakɩ leleŋ nɛ pɩkɩlɩ alɩwaatʋ ndʋ ɖɩlakɩ nɔɔyʋ kʋjɔʋ yɔ. Yehowa lɩzɩ-ɖʋ mbʋ se ɖa-maɣmaɣ ɖɩla nabʋyʋ nɛ ɖihiɣ taa leleŋ nɛ pɩkɩlɩ. Ðɩpɩzɩɣ nɛ ɖihiɣ taa leleŋ nɛ pɩkɩlɩ alɩwaatʋ ndʋ ɖɩñɩnɩɣ nʋmɔŋ weyi ɩ-yɔɔ ɖɩpɩzɩɣ ɖɩtɩŋna nɛ ɖɩla ɛyaa lalaa kʋjɔŋ yɔ. Pɩwɛ ɖeu kpem se Yehowa ma-ɖʋ mbʋ. ( Keɣ. 139:14) Bibl heyiɣ-ɖʋ se haʋ kɔŋnɩ koboyaɣ, pʋyɔɔ pɩɩɖɩɣzɩɣ-ɖʋ se kɩya Yehowa se «Ɛsɔ koboyaɣ tʋ.» (1 Tim. 1:11) Ɛnʋ calɩnɩ ɛyaa labʋ kʋjɔʋ nɛ nɔɔyʋ ɛɛlakɩ kʋjɔʋ nɛ pɩtalɩ-ɩ. Pɔɔlɩ yɔɔdaa se: «Ɛ-yɔɔ ɖɩwɛ wezuu nɛ ɖiciɣdiɣ nɛ ɖɩwɛɛ.» (Tʋma 17:28) Toovenim taa lɛ, Yehowa cɔlɔ «paa kʋjɔʋ kɩbaŋʋ ŋgʋ nɛ paa haɖɛ pilim ñɩnɖɛ nɖɩ lɛ» ɖɩlɩɣna. (Yak. 1:17) Pɩtʋʋ fɛyɩ se ɖa-tɩŋa payɩ ɖɩsɔɔlaa se ɖihiɣ taa leleŋ weyi haʋ kɔŋna yɔ nɛ pɩkɩlɩ. Ye ɖɩmaɣzɩɣnɩ Yehowa kʋjɔʋ labʋ lɩmaɣza yɔ, ɖɩpɩzɩɣ nɛ ɖihiɣ taa leleŋ ɛnɩ.—Efɛz. 5:1. w24.09 26 § 1-4

Ɛgbɛyɛ taa tʋmlaɖaa nabɛyɛ pɩzɩɣ nɛ pamaɣzɩ se paapɩzɩɣ nɛ papɩsɩ ɛgbɛyɛ taa ɛzʋtʋyaa kpa, mbʋ pʋyɔɔ yɔ wɛtʋ kɩbandʋ ndʋ pɩpɔzʋʋ se ɛgbɛyɛ taa ɛzʋtʋyʋ ɛwɛɛna yɔ tɩkɩlɩ ɖɔʋ. Ɛlɛ tɔzɩ se Yehowa nɛ ɛ-ɛgbɛyɛ paaɖaŋɩɣ se ŋwɛɛnɩ wɛtʋ ndʋ nɛ pɩtalɩ pilim. (1 Pɩy. 2:21) Pɩtasɩ lɛ, Yehowa fezuu kiɖeɖeu pɩzɩɣna nɛ kɩsɩnɩ-ŋ nɛ ŋwɛɛnɩ wɛtʋ kɩbandʋ ndʋ. (Filp. 2:13) Ŋmaɣzɩɣ se pɩpɔzʋʋ se ŋñaɣ pana nɛ ŋwɛɛnɩ wɛtʋ kɩbandʋ natʋyʋ nɛ pɩkɩlɩ? Tɩmnɩ Yehowa se ɛsɩnɩ-ŋ. Ñɩnɩ wɛtʋ ndʋ tɩ-tɔm nɛ ŋpɔzɩ ɛgbɛyɛ taa ɛzʋtʋyʋ nɔɔyʋ se ɛsɩnɩ-ŋ nɛ ŋna ɛzɩma ŋla nɛ ŋwɛɛnɩ-tʋ nɛ pɩkɩlɩ yɔ. Ðʋ ña-tɩ kaɖʋwa se ŋpɩsɩɣ ɛgbɛyɛ taa ɛzʋtʋyʋ. Pɔzɩ Yehowa se ɛfalɩsɩ-ŋ nɛ ŋwɛɛ wazaɣ ɛ-sɛtʋ taa nɛ pɩkɩlɩ nɛ ŋtɛ ŋsɩnɩ ɛgbɛyɛ taa koobiya. (Iza. 64:8) Tɛtɛ nɛ Yehowa wazɩ pana wena ŋñakɩ se ŋmʋna nɛ ŋpɩsɩ ɛgbɛyɛ taa ɛzʋtʋyʋ yɔ a-yɔɔ. w24.11 25 § 17-18

Pɩfɛyɩ se ɖa-taa nɔɔyʋ ɛmaɣzɩ se ɛwɛʋ nɛ ɛsɛɣ Yehowa yɔ pɩlakɩ pɩnzɩ sakɩyɛ nɛ pʋyɔɔ lɛ, ɛmʋnaa se Yehowa ekpeɣ-i ɛ-kɩwɛɛkɩm. Toovenim taa lɛ, Yehowa tɔzʋʋ mbʋ payɩ ɖɩlabɩ ɛ-sɛtʋ taa yɔ pɩ-yɔɔ. Ɛlɛ, kʋjɔʋ Yehowa labɩ-ɖʋ nɛ ɛha-ɖʋ ɛ-Pɩyalʋ, pɩtɩkɛ mbʋ ɖɩlabɩ ɛ-sɛtʋ taa yɔ pɩ-kɩhɛyʋʋ pɩkɛnaa. Ye ɖɩmaɣzɩɣ se ɖɩmʋnaa se Ɛsɔ ɛna ɖa-pʋtɔdɩyɛ yaa ɖɩmʋnaa se ɛcɔnɩ ɖɔ-yɔɔ camɩyɛ yɔ, ɖɩnɛ ɛlɛ pɩwɛ ɛzɩ ɖɩwɛɛ nɛ ɖɩyɔɔdʋʋ se Krɩstʋ sɩbɩ falaa yɔ. (Kpaɣ-tʋ nɛ ŋmaɣzɩnɩ Galaatii mba 2:21.) Apostoloo Pɔɔlɩ kaanawa se ɛtɩmʋna se Ɛsɔ ɛna ɛ-pʋtɔdɩyɛ. Ye mbʋ, ɛbɛ yɔɔ ɛɛñaɣ pana siŋŋ Yehowa sɛtʋ taa? Ɛtaala mbʋ se ɛwɩlɩ se ɛmʋnaa se Ɛsɔ ɛna ɛ-pʋtɔdɩyɛ, ɛlɛ ɛlabɩ mbʋ se ɛwɩlɩ Yehowa ɛ-ɛsɩmɩyɛ e-lootiye yɔɔ. (Efɛz. 3:7) Ɛzɩ Pɔɔlɩ yɔ, ɖɩɩsɛɣ Yehowa nɛ kpekpeka se pɩsa nɛ ɛna ɖa-pʋtɔdɩyɛ, ɛlɛ ɖɩsɛɣ-ɩ mbʋ pʋyɔɔ yɔ ɖɩsɔɔlaa se ɖɩwɩlɩ-ɩ ɖɛ-ɛsɩmɩyɛ. w25.01 27 § 5-6