Mai

Yehowa lɩzɩ ɛ-samaɣ yomiye taa Ejipiti nɛ pɩtɛ lɛ, ɛlɩzɩ cɔjɔnaa se pala tʋmɩyɛ Ɛsɔ sɛtʋ kɩɖanɖʋʋ tɛɛ. Ɛɛlɩzɩ Leevi mba se pala tʋmɩyɛ lɛɛɖɛ Ɛsɔ sɛtʋ kɩɖanɖʋʋ tɛɛ. Ɛzɩ Yehowa cɔŋnaɣ mba palakɩ tʋmɩyɛ Ɛsɔ sɛtʋ kɩɖanɖʋʋ tɛɛ yaa mba pɛwɛ kɩ-cɔlɔ yɔ pɔ-yɔɔ camɩyɛ nɛ pɩkɩlɩɣ ɛzɩma ɛcɔŋnaɣ lalaa yɔɔ yɔ? Aayɩ. Yehowa ɛɛtʋkʋʋ ɛyaa taa. Paa Izrayɛɛlɩ tʋ weyi lɛ, ɛpɩzaɣ se ɛkɛ Yehowa taabalʋ kɩbanʋ. Kɩɖaʋ nakʋyʋ yɔ: Yehowa kaasɔɔlaa se samaɣ kpeekpe ɛpɩzɩ nɛ kana mɩndʋ tilimiye nɖɩ ɖɩlɩɣaɣ Ɛsɔ sɛtʋ kɩɖanɖʋʋ yɔɔ yɔ nɛ miŋ tilimiye nɖɩ ɖɩlɩɣaɣ kɩ-yɔɔ yɔ. (Ejl. 40:38) Alɩwaatʋ ndʋ mɩndʋ kʋyʋʋ nɛ tɩpaɣzɩ ɖɛʋ yɔ, halɩ mba paasiɣ pe-kizinzikiŋ nɛ piposini Ɛsɔ sɛtʋ kɩɖanɖʋʋ yɔ, papɩzaɣ se pana nɛ pekpeɣli po-wondu, pɛkpɛzɩ pe-kizinzikiŋ nɛ pa nɛ samaɣ taa mba lalaa pɛɖɛɛ. (Kɩg. 9:​15-23) Mbʋ ɖɔɖɔ sɔnɔ, paa le ɖɩtɩɩwɛ tɛtʋ yɔɔ yɔ, Yehowa sɔɔlɩ-ɖʋ, ɛcɔŋnɩ ɖɔ-yɔɔ nɛ ɛkandɩyɩɣ ɖɔ-yɔɔ. w24.06 4 § 10-12

Daviid wezuu kaasʋ kaɖɛ taa. Ɛ-pɩyalʋ Absalɔm kaatɛm ɛ-taa se ɛkʋʋ-ɩ nɛ ɛmʋ kewiyaɣ. (2 Sam. 15:​12, 13) Pɩɩcɛyaa se Daviid ɛlɩɩ Yeruzalɛm taa kpɛdɛyɛ nɛ ese. Ɛ-lɩmɖʋyaa ɖɛɣaɣ lɛ, Daviid ɖiɣzina se pɩpɔzʋʋ se nɔɔyʋ ɛcaɣ Yeruzalɛm nɛ ɛna mbʋ Absalɔm ɖʋwa se ɛlakɩ yɔ nɛ eheyi-i. Pʋyɔɔ eheyi Sadɔɔkɩ nɛ cɔjɔnaa lalaa se papɩsɩ tɛtʋ taa nɛ pɛkɛ cɔŋɩyaa. (2 Sam. 15:​27-29) Pɩɩwɛɛ se patɩlɩ labʋ. Daviid heyi Sadɔɔkɩ nɛ ɛ-taabalʋ siɣsiɣ tʋ lɛlʋ weyi payaɣ se Usaayii yɔ se pasɩnɩ-ɩ nɛ ɛla nabʋyʋ. (2 Sam. 15:​32-37) Usaayii ɖɔm Daviid lɔŋ tasʋʋ yɔɔ nɛ ɛla ɛzɩ ɛwɛɛ nɛ ɛtɩnɩɣ Absalɔm yɔɔ yɔ nɛ ɛtasɩ-ɩ lɔŋ se pɩsɩnɩ-ɩ nɛ eyooni Daviid; ŋgʋ toovenim taa lɛ, Daviid pɩsɩɣaɣnaɣ se ɛñɔɔzɩ ɛ-tɩ nɛ ɛla you. Absalɔm welisi Usaayii lɔŋ tasʋʋ nɛ pɩtɛ lɛ, Usaayii heyi Sadɔɔkɩ nɛ Abiyaataarɩ ɛzɩma pɩɖɔma yɔ. (2 Sam. 17:​8-16) Ðɩnɛ ɛlɛ, Sadɔɔkɩ nɛ Abiyaataarɩ petiyi nɛ peheyi Daviid tɔm ndʋ tɩsɩnɩ-ɩ nɛ ehiɣ ñʋʋ yabʋ yɔ.—2 Sam. 17:​21, 22. w24.07 4-5 § 9-10

Yehowa sɛyaa nabɛyɛ nɩɣzɩɣ siŋŋ, mbʋ pʋyɔɔ yɔ paalabɩ kɩwɛɛkɩm nabʋyʋ nɛ pɩɖɛɛ. Pɩtɩla paalabɩ kɩwɛɛkɩm mbʋ pʋcɔ nɛ pamɩyɩsɩɣ-wɛ lɩm yaa pa-lɩm mɩyɩsʋʋ wayɩ palabɩ-pʋ. Ɛlɛ pɩwɛɛ se ɖɩtɔzɩ se Yehowa hɛyɩ kɩhɛyʋʋ pʋ-ñʋʋ taa mbʋ pʋyɔɔ yɔ ɛsɔɔlɩ-ɖʋ siŋŋ. Ða-taa pɩzɩɣ nɛ pɩtɛ se ɛsɔɔlaa se ɖitisi nɛ ɖɩmʋ kʋjɔʋ ŋgʋ. Yehowa sɔɔlaa se ɖa-taa ɛtɛ se ye «ɖɩñɔɔzɩ tɔm [ɖa nɛ ɩ] ɖɛ-hɛkʋ taa» yɔ, ekpeɣu-ɖʋ ɖa-kɩwɛɛkɩm caɣ caɣ. Ða-taa wɛ leleŋ siŋŋ se ɖa-Caa sɔɔlɩm tʋ Yehowa ɛɛtɔzʋʋ kɩwɛɛkɩm mbʋ ɖɩlaba nɛ pɩɖɛɛ yɔ pɩ-yɔɔ. Alɩwaatʋ kʋɖʋmtʋ ndʋ tɩ-taa lɛ, ɛɛsɔʋ kɩbandʋ ndʋ ɖɩlaba yɔ tɩ-yɔɔ kaaʋ. (Keɣ. 103:​9, 12; Ebr. 6:10) Ye ŋwɛɛ nɛ ŋnɩɣzɩɣ kɩwɛɛkɩm mbʋ ŋlaba nɛ pɩɖɛɛ yɔ pɩ-yɔɔ yɔ, ñaɣ pana nɛ ŋka ña-lɩmaɣza mbʋ ŋɖiɣni labʋ lɛɛlɛɛyɔ nɛ mbʋ ŋkaɣ pɩzʋʋ nɛ ŋla cee wayɩ yɔ pɩ-yɔɔ. Ŋŋpɩzɩɣ nɛ ŋlɛɣzɩ mbʋ pɩtɛm labʋ yɔ. Ɛlɛ ŋpɩzɩɣ nɛ ŋɖʋ Yehowa hɩɖɛ wɛtʋ ndʋ tɩ-taa ŋwɛ lɛɛlɛɛyɔ yɔ tɩ-taa nɛ ŋka ña-lɩmaɣza cee wayɩ kɩbaŋʋ ŋgʋ kɩ-tamaɣ Yehowa labɩ-ŋ yɔ kɩ-yɔɔ. w24.10 8 § 8-9

Alɩwaatʋ ndʋ ŋkalɩɣ Bibl yɔ, nabʋyʋ taa pɩpɩzɩɣ nɛ pitibi-ŋ yɔɔɔ, mbʋ pʋyɔɔ yɔ ŋɖiɣzinaa se pɩwɛɛ se ŋla lɛɣzɩtʋ sakɩyɛ. Kɩɖaʋ nakʋyʋ yɔ: Maɣzɩ se kɩyakʋ nakʋyʋ ŋkalɩ Bibl hɔɔlʋʋ ŋgʋ kɩyɔɔdʋʋ se pɩtɩmʋna se ɖɩlakɩ ɛsɩmɩyɛ yɔɔ lakasɩ yɔ. (Yak. 2:​1-8) Peeɖe ŋɖiɣzinaa se pɩwɛɛ se ŋla lɛɣzɩtʋ pɩlɩɩnɩ mbʋ ŋlakɩ ɛyaa lalaa yɔ pɩ-hɔɔlʋʋ taa; nɛ ŋkpaɣ lɩmaɣzɩyɛ se ŋlakɩ mbʋ. Tɛʋ fema lɛ, ŋkalɩ Bibl hɔɔlʋʋ ŋgʋ kɩwɩlɩɣ se pɩcɛyaa se ŋkpa ña-tɩ nɛ tɔm ndʋ ŋyɔɔdʋʋ yɔ. (Yak. 3:​1-12) Peeɖe ŋɖiɣzinaa se nabʋyʋ taa ŋyɔɔdʋʋ tɔm ndʋ tɩtɩmʋna yɔ. Piyeba nɛ ŋkpaɣ lɩmaɣzɩyɛ se ŋpaɣzɩɣ yɔɔdʋʋ tɔm ndʋ tɩkpazɩɣ ɛyaa lalaa ɖoŋ yɔ. Tɛʋ kifemuu lɛ, ŋkalɩ Bibl hɔɔlʋʋ ŋgʋ kɩpakɩ-ɖʋ se ɖɩtaakɛ ɛjaɖɛ taabalaa yɔ. (Yak. 4:​4-12) Peeɖe ŋɖiɣzinaa se pɩcɛyaa se ŋkpa ña-tɩ nɛ tɔm ndʋ ŋkalɩɣ yɔ, mbʋ ŋcɔŋna yɔ, nɛ mbʋ ŋwelisiɣ yɔ. Kɩyakʋ 4 ñɩŋgʋ wiye, pɩpɩzɩɣ nɛ pɩlabɩ-ŋ ɛzɩ lɛɣzɩtʋ ndʋ pɩwɛɛ se ŋla yɔ, tɩkɩlɩ ɖɔʋ yɔ. Pɩfɛyɩ se pitibi-ŋ yɔɔɔ. Tɔzɩ ɖɔɖɔ se pɩwɛɛ se ɖiwolo pɩ-yɔɔ nɛ ɖisuu «ɛyʋtʋ kɩfatʋ.» w24.09 5-6 § 11-12

Yesu kaanawa se lɩmaɣza wena Yehowa kaawɛna yɔ, a-tɔm kɩlɩnɩ cɛyʋʋ. Ɛ-taa kaatɛma se Yehowa kaɣ cɔnʋʋ mulum lakasɩ ɖeɖe alɩwaatʋ kɩbandʋ yɔɔ. Alɩwaatʋ ndʋ pomuluu-ɖʋ yɔ, ɖɩpɩzɩɣ nɛ ɖɩtɩŋnɩ ndʋ ɖɩyɔɔdʋʋ yɔ tɩ-yɔɔ nɛ ɖɩmaɣzɩnɩ Yesu. Nabʋyʋ taa, ye mulum lakasɩ nzɩ palabɩ-ɖʋ yɔ sɩtɩlɩɩ pʋyʋ yɔ, pɩtɩcɛyɩ se ɖɩyɔɔdɩ natʋyʋ yaa ɖɩla nabʋyʋ. Yaa ɖɩpɩzɩɣ ɖɩlɩzɩ se ɖisuŋ tamɩyɛ mbʋ pʋyɔɔ yɔ ɖɩtɩsɔɔlɩ se ɖɩyɔɔdɩ natʋyʋ nɛ ɖɩtɛzɩ tɔm wɛɛkʋʋ kɩwɛɛkʋ. (Ekl. 3:7; Yak. 1:​19, 20) Nabʋyʋ taa lɛ, pɩpɩzɩɣ nɛ pɩpɔzɩ se ɖɩlʋ nɔɔyʋ yɔɔ mbʋ pʋyɔɔ yɔ pɛwɛɛ nɛ pawɩlɩɣ-ɩ ñaŋ, yaa pɩpɩzɩɣ nɛ pɩpɔzɩ se ɖɩlʋ ɖe-tisuu yɔɔ. (Tʋma 6:​1, 2) Ye pɩwɛɛ se ɖɩyɔɔdɩ natʋyʋ yɔ, pɩpɔzʋʋ se ɖɩla mbʋ ɖɩpɩzɩɣ yɔ nɛ ɖɩyɔɔdɩnɩ hɛɛɛ wɛtʋ nɛ ñamtʋ. Ye ɖiyebi ɖa-tɩ nɛ «Weyi ɛhʋʋ tɔm siɣsiɣ yɔ,» ɖɩpɩzɩɣ ɖɔɖɔ nɛ ɖɩmaɣzɩnɩ Yesu.—1 Pɩy. 2:23. w24.11 5-6 § 10-12

Ye kɩwɛɛkɩm laɖʋ nɔɔyʋ ekpiɖaa yɔ, pɩhaɣ-ɖʋ taa leleŋ siŋŋ. (Luka 15:7) Ɛlɛ anɩ ɖɩcɛlɩɣ samtʋ? Ɛgbɛyɛ taa ɛzʋtʋyaa na? Ɩtɔzɩ tɔm ndʋ apostoloo Pɔɔlɩ yɔɔdɩ kɩwɛɛkɩm laɖaa yɔɔ yɔ. Ɛyɔɔdaa se: «Pʋtɔma yɔ Ɛsɔ yeki nɛ pekpiɖi pa-kɩwɛɛkɩm yɔɔ.» (2 Tim. 2:25) Ye mbʋ, Yehowa sɩnɩnɩ koobu ɛnʋ nɛ ɛlɛɣzɩ ɛ-maɣzɩm nɛ ɛ-lakasɩ, pɩtɩkɛ ɛyʋ nɔɔyʋ. Pɔɔlɩ yɔɔdɩ wazasɩ nzɩ ɛyʋ hikiɣ alɩwaatʋ ndʋ ekpiɖiɣ ɛ-kɩwɛɛkɩm yɔɔ yɔ sɩ-tɔm. Ɛyʋ ɛnʋ ɛpɩzɩɣ nɛ ɛwɛɛnɩ toovenim tɛ sɩmtʋ siŋŋ nɛ pɩkɩlɩ, ɛ-maɣzɩm feŋ nɛ ɛpɩzɩɣ nɛ ɛlɩɩ Eleeu kpacanaa taa. (2 Tim. 2:26) Ye kɩwɛɛkɩm laɖʋ ekpiɖi ɛ-kɩwɛɛkɩm yɔɔ yɔ, kɔɔmitee taa ɛzʋtʋyaa kaɣ wobu pɩ-yɔɔ nɛ pekilimiɣ ɛ-yɔɔ se pɩsa nɛ pasɩnɩ-ɩ nɛ ɛpɩzɩ ɛkaɖɩnɩ Sataŋ kpacanaa nɛ ɛɖʋ nʋmɔŋ weyi ɩtʋʋzaa yɔ ɛ-nɩŋgbanzɩ.—Ebr. 12:​12, 13. w24.08 23 § 14-15

Ɛyaa mba Yesu calɩ-wɛ yɔ, po-tomnaɣ yɔɔ kɩcɛyɩm nɛ mbʋ pɔsɔɔlaa yɔ pɩ-tɔm kaakɩlɩnɩ cɛyʋʋ pɛ-ɛsɩndaa. Ɛzɩma tɩyɛ? Tɛʋ fema lɛ, pana se Yesu nɛ ɛ-apostoloowaa pɛɖɛwa. Kpɩyɩŋ nɩɩyɩ kaalɩnɩ Tiberiyaadɩ nɛ ɩkɔɔ, nɛ ɛyaa mba, pakpa ɩ-taa nɛ powolo Kapɛrɩnawum se pañɩnɩ Yesu. (Yoh. 6:​22-24) Ɛzɩ palabɩ mbʋ mbʋ pʋyɔɔ yɔ pañɩnaɣ se pewelisi Kewiyaɣ tɔm nɛ pɩkɩlɩ yaa we? Aayɩ. Pañɩnaɣ se Yesu ɛtasɩ-wɛ haʋ tɔɔnaɣ. Ɛbɛ yɔɔ ɖɩyɔɔdʋʋ mbʋ? Na mbʋ pɩlaba alɩwaatʋ ndʋ samaɣ na Yesu Kapɛrɩnawum cɔlɔ yɔ. Yesu yɔɔdɩ kpayɩ se pañɩnaɣ-ɩ mbʋ pʋyɔɔ yɔ paasɔɔlaa se ɛha-wɛ tɔɔnaɣ. Paa ‘pɔtɔɔ kpɔnɔnaa nɛ pahaɣ’ yɔ, Yesu yɔɔdaa se «tɔɔnaɣ ŋga kɛwɛɛkɩɣ.» Ɛlɛ, eseɣti-wɛ se pala «tʋmɩyɛ tɔɔnaɣ ŋga kaawɛɛkɩɣ nɛ kahaɣ wezuu maatɛŋ yɔ kɔ-yɔɔ.» (Yoh. 6:​26, 27) Yesu yɔɔdaa se ɛ-Caa haɣnɩ tɔɔnaɣ ŋga. w24.12 5 § 8-9

Pɩsa nɛ ŋkɛ wɩlɩyʋ weyi ɛwɛ niye yɔ lɛ, pɩwɛɛ se ŋlabɩnɩ tʋmɩyɛ Bibl, paa ŋwɩlɩɣ tɔm samaɣ taa yaa ŋtasɩɣ nɔɔyʋ lɔŋ yɔ. Pɩwɛɛ se ŋkpɛlɩkɩɣ Bibl nɛ ɖɛ-ɛgbɛyɛ takayɩsɩ camɩyɛ. (Adu. 15:28) Ŋŋkpɛlɩkɩɣ lɛ, ñaɣ pana nɛ ŋtɩlɩ ɛzɩma ɖɛ-ɛgbɛyɛ takayɩsɩ lɩzɩ Bibl masɩ taa yɔ se pɩsa nɛ ŋpɩzɩ nɛ ŋlabɩnɩ-sɩ tʋmɩyɛ camɩyɛ. Nɛ alɩwaatʋ ndʋ ŋwɩlɩɣ tɔm yɔ, ñaɣ pana nɛ ŋtukuni mba pewelisiɣni-ŋ yɔ pa-laŋa. Ŋpɩzɩɣ nɛ ŋwɛɛ niye tɔm wɩlʋʋ taa nɛ pɩkɩlɩ ye ŋpɔzʋʋ ɛgbɛyɛ taa ɛzʋtʋyaa mba pɛwɛ niye yɔ lɔŋ tasʋʋ nɛ ŋlakɩnɩ-pʋ tʋmɩyɛ yɔ. (1 Tim. 5:17) Pɩwɛɛ se ɛgbɛyɛ taa ɛzʋtʋyaa ‘ɩpɩzɩ nɛ pakpazɩ ɖoŋ’ po-koobiya, paa mbʋ yɔ nabʋyʋ taa, pɩpɔzʋʋ se ɛgbɛyɛ taa ɛzʋtʋyaa ɩtasɩ-wɛ lɔŋ yaa ‘pekizini-wɛ tɔm.’ Ɛlɛ pɩpɔzʋʋ se paa ɛzɩmtaa lɛ, pɔyɔɔdɩnɩ nɔɔ kɩbaŋa. Ye ŋyɔɔdʋʋnɩ nɔɔ kɩbaŋa nɛ sɔɔlɩm nɛ ŋtɩŋɩɣnɩ Bibl yɔɔ nɛ ŋwɩlɩɣ tɔm yɔ, ŋkaɣ kɛʋ wɩlɩyʋ kɩbanʋ, mbʋ pʋyɔɔ yɔ ŋwɛɛ nɛ ŋmaɣzɩɣnɩ Wɩlɩyʋ Sɔsɔ Yesu.—Mat. 11:​28-30; 2 Tim. 2:24. w24.11 24 § 16

Ðɩpɩzɩɣ nɛ ɖɩtɩŋnɩ tɔm ndʋ ɖɩyɔɔdʋʋ Yehowa yɔɔ yɔ tɩ-yɔɔ nɛ ɖɩcɛlɩ-ɩ samtʋ. Masɩ seɣtiɣ Yehowa sɛyaa se ‘petee hendu Yehowa,’ ‘pasa ɛ-hɩɖɛ,’ ‘posusi ɛ-ñʋʋ yabʋ tɔm kɩbandʋ’ nɛ ‘posusi ɛ-samtʋ ajɛɛ taa.’ (Keɣ. 96:​1-3) Ðɩpɩzɩɣ nɛ ɖɩtɩŋnɩ nʋmɔŋ ɛnɩ ɩ-yɔɔ nɛ ɖɩcɛlɩ ɖa-Caa weyi ɛwɛ ɛsɔdaa yɔ samtʋ. (Tʋma 4:29) Ðɩpɩzɩɣ ɖɩtɩŋnɩ ɖo-wondu ndʋ tɩmʋ ñɩm yɔ tɩ-yɔɔ nɛ ɖɩcɛlɩ Yehowa samtʋ. Kpaɣnɩ ɖooo caanaʋ taa, nʋmɔʋ ŋgʋ, kɩ-yɔɔ Ɛsɔ sɛyaa toovenim ñɩma tɩŋnaa nɛ paɖʋ Yehowa hɩɖɛ. (Adu. 3:9) Kɩɖaŋ nɩɩyɩ yɔ: Izrayɛɛlɩ mba kaaha liidiye nɛ po-wondu ndʋ tɩmʋ ñɩm yɔ nɛ pamanɩ templo nɛ pɔcɔnɩ kɩ-yɔɔ. (2 Awi. 12:​4, 5; 1 Kro. 29:​3-9) Yesu wayɩ tɩŋɩyaa nabɛyɛ kaaha «mbʋ pɛwɛna yɔ» nɛ paɖʋnɩ lɩm ɛ nɛ ɛ-apostoloowaa. (Luka 8:​1-3) Kajalaɣ pɩnzɩ mɩnʋʋ taa Krɩstʋ ñɩma ɖɔɖɔ kaaha liidiye nɛ pasɩnɩ po-koobiya Krɩstʋ ñɩma lalaa. (Tʋma 11:​27-29) Sɔnɔ, ɖa ɖɔɖɔ ɖɩpɩzɩɣ nɛ ɖɩtɩŋnɩ sɔɔlɩm haɖɛ yɔɔ nɛ ɖɩcɛlɩ Yehowa samtʋ. w25.01 4 § 8; 5 § 11

Ɛbɛ sɩnɩ Kɔɔrnɛɛyɩ nɛ eyele nɛ pamɩyɩsɩ-ɩ lɩm? Bibl yɔɔdʋʋ se «ɛ nɛ ɛ-ɖɩɣa taa mba tɩŋa peseɣaɣ Ɛsɔ sɔɔndʋ.» Nɛ Kɔɔrnɛɛyɩ tendaɣ Ɛsɔ tam. (Tʋma 10:2) Alɩwaatʋ ndʋ Pɩyɛɛrɩ susi Kɔɔrnɛɛyɩ tɔm kɩbandʋ yɔ, ɛ nɛ ɛ-hɔʋ petisi Krɩstʋ yɔɔ kpaagbaa nɛ peyele nɛ pamɩyɩsɩ-wɛ lɩm. (Tʋma 10:​47, 48) Pɩtʋʋ fɛyɩ se Kɔɔrnɛɛyɩ kaasɔɔlaa se ɛla lɛɣzɩtʋ ndʋ payɩ pɩpɔzʋʋ yɔ nɛ pɩsa nɛ ɛ nɛ ɛ-hɔʋ pɛkpɛndɩ nɛ pɛsɛɛ Yehowa. (Yoz. 24:15; Tʋma 10:​24, 33) Ɛzɩ pɩɩwɛʋ Sɔɔlɩ hɔɔlʋʋ taa yɔ, Kɔɔrnɛɛyɩ pɩzaɣ se ɛha nʋmɔʋ lone nɖɩ ɛwɛna yɔ nɛ ɖɩɖɩɣ-ɩ nʋmɔʋ se ɛtaapɩsɩ Krɩstʋ tʋ. Ɛlɛ ɛtɩla mbʋ. Pɩpɔzʋʋ se ŋla lɛɣzɩtʋ sɔsɔtʋ natʋyʋ ñe-wezuu caɣʋ taa nɛ pɩsa nɛ ŋha ña-tɩ nɛ pamɩyɩsɩ-ŋ lɩm na? Ye mbʋ yɔ, Yehowa kaɣ-ŋ sɩnʋʋ. Ɛkaɣ-ŋ wazʋʋ ye ŋtɛm ña-taa se ŋsɛɣ-ɩ nɛ ŋyele nɛ ñe-wezuu caɣʋ la nɔɔ kʋɖʋmaɣ nɛ Bibl paɣtʋ kila yɔ. w25.03 5 § 12-13

Ye ŋnɩ tɔm kɩdɛkɛdɩtʋ natʋyʋ ɛgbɛyɛ yɔɔ yaa koobiya mba pɛɖɛɣ nɔɔ yɔ pɔ-yɔɔ yɔ, tɔzɩ mbʋ Ɛsɔ koyindinaa kaalabɩ Yesu nɛ kajalaɣ pɩnzɩ mɩnʋʋ taa tɔmkpɛlɩkɩyaa yɔ pɩ-yɔɔ. Sɔnɔ, pɛwɛɛ nɛ panazɩɣ Ɛsɔ sɛyaa nɛ pɔyɔɔdʋʋ cɛtɩm tɔm pɔ-yɔɔ ɛzɩ Bibl kaayɔɔdʋʋ ɖeyi ɖeyi yɔ. (Mat. 5:​11, 12) Ye ɖɩsɩm weyi ɛ-cɔlɔ cɛtɩm tɔm lɩnaa yɔ nɛ ɖɩlakɩ nabʋyʋ kpɛdɛyɛ se ɖɩkandɩyɩ ɖa-tɩ yɔɔ yɔ, tɩɩkaɣ-ɖʋ peɣzuu. Ɛbɛ pɩwɛɛ se ɖɩla nɛ ɖɩkandɩyɩnɩ ɖa-tɩ yɔɔ? Kizi cɛtɩm tɔm. Apostoloo Pɔɔlɩ heyi-ɖʋ mbʋ ɖeyi ɖeyi pɩwɛɛ se ɖɩla ye ɖɩnɩ cɛtɩm tɔm natʋyʋ yɔ. Eheyi Timootee se ‘ɛɖʋ nabɛyɛ paɣtʋ se pataakemni mʋya’ nɛ ‘pekizi mʋya wena apisiɣ wondu kiɖeɖetu yɔ.’ (1 Tim. 1:​3, 4) Ðikiziɣ cɛtɩm tɔm, mbʋ pʋyɔɔ yɔ ɖɩsɩm weyi ɛ-cɔlɔ tɩlɩnaa yɔ. Ɛlɛ ɖɩñɔʋnɩ toovenim «tɔm kɩbandʋ» kpam.—2 Tim. 1:13. w24.04 11 § 16; 13 § 17

Wolo pɩ-yɔɔ nɛ ña nɛ mba pɔñɔnɩ Yehowa yɔ ɩwɛɛ nɔɔ kʋɖʋmaɣ taa. Yehowa sɔɔlaa se ɖa nɛ ɖo-koobiya ɖɩsɛɛ-ɩ nɔɔ kʋɖʋmaɣ taa. Ye ɖɩñɔnɩ toovenim kpam yɔ, ɖɩkaɣ wobu pɩ-yɔɔ nɛ ɖɩwɛɛ nɔɔ kʋɖʋmaɣ taa. Mba pɔyɔɔdʋʋ tɔm ndʋ tɩkaɖɩɣnɩ toovenim yɔ, pɔkɔŋnɩ tayʋʋ ɛgbɛyɛ taa; pʋyɔɔ Ɛsɔ pakɩ-ɖʋ se ‘ɖise-wɛ.’ Ye ɖɩtɩla mbʋ yɔ, ɖa-maɣmaɣ ɖɩpɩzɩɣ nɛ ɖɩpaɣzɩ posinuu toovenim. (Roma 16:17) Alɩwaatʋ ndʋ ɖɩtɩlɩɣ toovenim nɛ ɖɩñɔɔnɩ-pʋ kpam yɔ, ɖɩñɔtʋʋnɩ Yehowa nɛ ɖe-tisuu cɛyɩsɩɣ nɛ pɩkɩlɩ. (Efɛz. 4:​15, 16) Ðɩnɛ ɛlɛ, Sataŋ cɛtɩm wɩlɩtʋ nɛ pɔbɔtʋ tɔm ndʋ ɛyɛlɩɣna yɔ tɩɩkaɣ-ɖʋ kɔnʋʋ kaɖɛ naɖɩyɛ, nɛ Yehowa kaɣ ɖɔ-yɔɔ kandɩyʋʋ kʋñɔŋ sɔsɔʋ alɩwaatʋ taa. Ye mbʋ, wolo pɩ-yɔɔ nɛ ŋñɔɔnɩ toovenim tɔm kpam nɛ «laŋhɛzɩyɛ tɛ Ɛsɔ kaɣ wɛʋ» ñɔ-cɔlɔ.—Filp. 4:​8, 9. w24.07 13 § 16-17

Ɛyaa mba kɩwɛɛkɩm kaawɛnɩ ɖoŋ pɔ-yɔɔ yɔ, pɔ-yɔɔ Yesu kaakɩlɩ kam ɛ-lɩmaɣza nɛ ɛyaa-wɛ se papɩsɩ ɛ-wayɩ tɩŋɩyaa. Ɛɛnawa se kɩwɛɛkɩm yebina nɛ ɛyaa tɔkɩ kʋñɔŋ. Pʋyɔɔ ɛɛsɩnɩ kɔzɩ kɔzɩ ɛyaa mba paakɛ kɩwɛɛkɩm laɖaa yɔ. Ɛtɩŋnɩ kɩɖaʋ nakʋyʋ yɔɔ nɛ ɛlɩzɩ tɔm ndʋ tɩ-taa. Ɛyɔɔdaa se: «Ɛyaa mba pɛwɛnɩ pa-alaafɩya yɔ, pɩtɩkɛ mba pɩpɔzʋʋ ɖɔkɔtɔ, ɛlɛ kʋdɔndɩnaa pɩpɔzʋʋ ɖɔkɔtɔ.» Ɛsɔzaa se: «Pɩtɩkɛ ɛyaa siɣsiɣ tɩnaa mɔnkɔm yaʋ, ɛlɛ kɩwɛɛkɩm laɖaa.» (Mat. 9:​12, 13) Mbʋ ɖeyi ɖeyi Yesu laba. Ɛkpaɣaa nɛ ekpeɣ halʋ kɩwɛɛkɩm laɖʋ nɔɔyʋ. Halʋ ɛnʋ ɛhɩzɩ Yesu nɩŋgbanzɩ yɔɔ nɛ ɛ-ɛsɩtɛɣlɩm. (Luka 7:​37-50) Ɛwɩlɩ Samaarii halʋ nɔɔyʋ toovenim tɔm kɩcɛyɩtʋ lɔkɔ nakʋyʋ cɔlɔ, paa ɛɛnawa se halʋ ɛnʋ ɛcakaɣ wezuu kɩdɛkɛdʋʋ yɔ. (Yoh. 4:​7, 17-19, 25, 26) Halɩ Ɛsɔ ha Yesu ɖoŋ se ɛwa sɩm. Ɛzɩma tɩyɛ? Yesu kaafezi ɛyaa nabɛyɛ nɛ sɩɖaa taa.—Mat. 11:5. w24.08 4 § 9-10

Ɛzɩma Yehowa kaɣ ɛ-hɩɖɛ sam? Ɛtɩŋɩɣnɩ ɛ-tɔm hʋʋ yɔɔ nɛ ɛla mbʋ. Pɩkazɩ pazɩ, Yehowa kaɣ ɖɩzʋʋ Babilɔɔnɩ Sɔsɔʋ, mbʋ pʋyɔɔ yɔ kipisi ɛ-hɩɖɛ kiɖeɖeye. (Natʋ 17:​5, 16; 19:​1, 2) Alɩwaatʋ ndʋ paɖɩzɩɣ Babilɔɔnɩ Sɔsɔʋ yɔ, pɩtɩla nabɛyɛ kaɣ kpɛndʋʋ ɖɔ-yɔɔ nɛ ɖa nɛ wɛ ɖɩsɛɛ Yehowa. Kɛdɛzaɣ ɖeɖe lɛ, Yehowa kaɣ ɖɩzʋʋ Sataŋ ɛjaɖɛ Armaagedɔɔ you taa. Ɛkaɣ ɖɩzʋʋ mba payɩ pakaɖɩɣnɩ-ɩ nɛ pɔyɔɔdʋʋ tɔm kɩdɛkɛdɩtʋ ɛ-hɩɖɛ yɔɔ yɔ, ɛlɛ ɛkaɣ yabʋ mba payɩ pɔsɔɔlɩ-ɩ nɛ pañaŋɩ-ɩ, nɛ pɔsɔɔlaa se pɛcɛlɩ-ɩ samtʋ yɔ pa-ñʋʋ. (Mark. 8:38; 2 Tes. 1:​6-10) Yehowa kaɣ ñalʋʋ ɛ-hɩɖɛ yɔɔ caɣ caɣ alɩwaatʋ ndʋ Krɩstʋ pɩnzɩ kudoku kewiyitu tɔɔʋ tɛŋ nɛ kɛdɛzaɣ takɩm ɖɔɖɔ tɛ yɔ. (Natʋ 20:​7-10) Alɩwaatʋ ndʋ lɛ, «Yehowa samtʋ tɩlʋʋ kaɣ suu tɛtʋ yɔɔ ɛzɩ lɩm suu teŋgu taa yɔ.» (Hab. 2:14) Pɩkaɣ wɛʋ ɖeu kpem alɩwaatʋ ndʋ ɛyaa mba payɩ pɛwɛ wezuu yɔ pakaɣ cɛlʋʋ Yehowa samtʋ ndʋ tɩmʋnɩ ɛ-hɩɖɛ yɔ. w25.01 7 § 15-16

Ɛbɛ pɩzaɣ se pɩsɩnɩ Ebree Krɩstʋ mba nɛ pɔɖɔkɩ pa-laŋa nazɩm mbʋ pakataɣ yɔ pɩ-taa? Apostoloo Pɔɔlɩ kaanawa se pɩɩwɛɛ se pɛwɛɛnɩ lɩmaɣza kɩbana pa-kʋñɔmɩŋ yɔɔ. Pʋyɔɔ ɛlɩzɩ pɩ-taa se alɩwaatʋ ndʋ Krɩstʋ mba tɔkɩ kʋñɔŋ yɔ, Ɛsɔ pɩzɩɣ nɛ ɛtɩŋnɩ kɩ-yɔɔ nɛ ɛfalɩsɩ-wɛ. Pɩsɩɣnɩ-wɛ nɛ pɛwɛɛnɩ wɛtʋ kɩbandʋ ndʋ tɩkɛdɩɣnɩ Yehowa yɔ nɛ pɩkɩlɩ. Ye Ebree Krɩstʋ ñɩma mba pakaŋ pa-lɩmaɣza pee kɩbana wena pa-kʋñɔmɩŋ lʋlʋʋ yɔ a-yɔɔ yɔ, pɩwɛɣ-wɛ kɛlɛʋ se pɔɖɔkɩ pa-laŋa. (Ebr. 12:11) Pɔɔlɩ seɣti Ebree Krɩstʋ mba se pɛwɛɛ abalɩtʋ nɛ pataayele nɛ pitibi-wɛ yɔɔɔ alɩwaatʋ ndʋ pakatɩɣ kʋñɔmɩŋ yɔ. Ɛɛmʋnaa se ɛtasɩ-wɛ lɔŋ ɛnɩ. Pʋcɔ nɛ ɛpɩsɩɣ Krɩstʋ tʋ lɛ, ɛɛnazɩ Krɩstʋ mba nɛ ɛɛna ɛzɩma paawɩlɩ-wɛ ñaŋ siŋŋ yɔ. Ɛɛsɩm ɖɔɖɔ ɛzɩma pɩwɛɛ se ɛyʋ ɛɖɔkɩ ɛ-laŋɩyɛ nazɩm taa yɔ. Mbʋ pʋyɔɔ yɔ ɛpɩsɩ Krɩstʋ tʋ nɛ pɩtɛ lɛ, ɛɛkatɩ nazɩm ndɩ ndɩ.—2 Kɔr. 11:​23-25. w24.09 12-13 § 16-17

Paa kɩyakʋ ŋgʋ kɩɖɛɣ lɛ, ɖɔ-tɔm susuu tʋmɩyɛ tɔm cɛyɩɣ ɖɛ-ɛsɩndaa nɛ pɩkɩlɩɣ. Ɛbɛ yɔɔ? Mbʋ pʋyɔɔ yɔ, alɩwaatʋ ndʋ tɩkazaa se ɛjaɖɛ ɛtɛ yɔ tɩtɩɖɔɔ. Maɣzɩ tɔm ndʋ Yesu kaayɔɔdɩ Maarɩkɩ 13:10 taa nɛ titukuuni tɔm susuu tʋmɩyɛ nɖɩ pakaɣ labʋ kɛdɛzaɣ kɩyakɩŋ taa yɔ tɩ-yɔɔ nɛ ŋna. Maatiyee takayaɣ taa, Yesu yɔɔdaa se pakaɣ susuu tɔm kɩbandʋ tɛtʋ kpeekpe yɔɔ pʋcɔ nɛ ɛjaɖɛ ‘tɛ.’ (Mat. 24:14) Tɔm piye nɖɩ ɖɩwɩlɩɣ se Sataŋ ɛjaɖɛ kɩdɛkɛdɩyɛ ɖɩnɛ ɖɩkaɣ tɛm caɣ caɣ. Yehowa ɖʋ ‘kɩyakʋ nɛ ñɩɣyʋʋ’ ŋgʋ kɩ-yɔɔ lakasɩ nzɩ sɩkaɣ labʋ yɔ. Nɛ pɩkazɩ pazɩ lɛ lakasɩ nzɩ sɩkaɣ labʋ. (Mat. 24:36; Tʋma 1:7) Nɛ paa evemiye nɖɩ ɖɩɖɛɣ lɛ, ɖɩñɔtʋʋnɩ kɩyakʋ ŋgʋ nɛ pɩkɩlɩɣ. (Roma 13:11) Ɛlɛ pʋcɔ nɛ kɩtalɩ lɛ, pɩwɛɛ se ɖiwolo pɩ-yɔɔ nɛ ɖisusuu tɔm. Pɩcɛyaa se ɖa-tɩŋa ɖɩpɔzɩ ɖa-tɩ tɔm kɩcɛyɩtʋ tʋnɛ: Ɛbɛ yɔɔ ɖisusuu tɔm kɩbandʋ? Tobi lɛ, sɔɔlɩm seɣtiɣni-ɖʋ nɛ ɖisusuu tɔm. Alɩwaatʋ ndʋ ɖisusuu tɔm yɔ, ɖɩwɩlɩɣ se ɖɩsɔɔlɩ tɔm kɩbandʋ, ɖɩsɔɔlɩ ɛyaa nɛ kɔzɩ kɔzɩ lɛ, ɖɩsɔɔlɩ Yehowa nɛ ɛ-hɩɖɛ. w24.05 14-15 § 2-3

Lʋlɩyaa, iseɣti mɩ-pɩɣa se kamaɣzɩ wondu kɩlɩzɩtʋ yɔɔ. Ɩɩɖɔŋ hayɩm nabʋyʋ taa lɛ, seɣti ña-pɩɣa nɛ kɔcɔnɩ wondu kɩlɩzɩtʋ ndʋ tɩ-wɛtʋ wɛ piti kpem yɔ. Ɛbɛ yɔɔ? Mbʋ pʋyɔɔ yɔ wondu ndʋ tɩ-wɛtʋ wɩlɩɣ se lɔŋsɩnɖʋ nɔɔyʋ lɩzɩnɩ-tʋ. Kɩɖaʋ nakʋyʋ yɔ: Kedeŋa yɔɔ wondu natʋyʋ ɛzɩ tɩɩnzɩ tindima, pɔɔyɩsɩ nzɩ sɩwɛ ɛzɩ kɔŋgɔlɩmɩɖɛ pɔɔyʋʋ yɔ, tɩŋ hatʋ, nɛ hɛtʋ ndʋ payaɣ se tournesol yɔ, tɩwɛnɩ wɛtʋ kʋɖʋmtʋ. Nɛ ñɩnɩyaa kpaɣ pɩnzɩ sakɩyɛ nɛ pañɩnɩ wɛtʋ ndʋ tɩ-yɔɔ tɔm. Ñɩnɩyʋ weyi payaɣ se Nicola Fameli yɔ, ɛyɔɔdaa se alɩwaatʋ ndʋ ɛyʋ kpɛlɩkɩɣ wondu ndʋ tɩwɛnɩ wɛtʋ ndʋ tɩ-ɖɔndɩ yɔ, ɛnaɣ se wondu ndʋ tɩɖɔŋ akɔnta paɣtʋ natʋyʋ yɔɔ, nɛ akɔnta ŋgʋ kɩwɛ kɩmaŋ wondu ndʋ tɩ-tɩŋa tɩ-yɔɔ. Payaɣ akɔnta ŋgʋ se suite de Fibonacci. w24.12 16 § 7

Moyizi, Daviid nɛ Yohanɛɛsɩ paacaɣ wezuu alɩwaatʋ ndʋ tɩ-taa yɔ, tɩwɛ ndɩ nɛ ɖa-alɩwaatʋ, nɛ wɛtʋ ndʋ tɩ-taa paacaɣ wezuu yɔ tɩwɛ ndɩ nɛ ɖa-ñɩndʋ. Ɛlɛ ɖa nɛ wɛ ɖɩnɩɣzɩnɩ ɖama hɔɔlɩŋ sakɩyɛ taa. Paasɛ Ɛsɔ toovenim tʋ nɛ ɛnʋ ɖɩsɛɣ ɖɔɖɔ. Ɛzɩ mba yɔ, ɖɩtɩmɩɣnɩ Yehowa, ɖɩtaɣ-ɩ liu nɛ ɖiyeki se ɛwɩlɩ-ɖʋ nʋmɔʋ. Nɛ ɛzɩ abalaa mba yɔ, ɖa-taa tɛma se Yehowa wazɩɣ mba pañaŋɩ-ɩ yɔ siŋŋ. Tɛtɛ nɛ ɖɩɖɔ lɔŋ weyi abalaa mba pɛ-kɛdɛzaɣ tɔm kpɛlɩkɩɣ-ɖʋ yɔ ɩ-yɔɔ nɛ ɖɩña Yehowa paɣtʋ. Ye ɖɩlakɩ mbʋ yɔ, pɩkaɣ-ɖʋ ɖenuu mbʋ payɩ ɖɩlakɩ yɔ pɩ-taa. Ðɩkaɣ caɣʋ «wezuu nɛ pileɖi;» ɛɛɛ, ɖɩkaɣ caɣʋ wezuu tam tam. Nɛ ɖɩkaɣ hiɣu taa leleŋ mbʋ pʋyɔɔ yɔ ɖɩlakɩ mbʋ pɩkɛdɩɣnɩ ɖa-Caa sɔɔlɩm tʋ weyi ɛwɛ ɛsɔdaa yɔ, weyi ɛkaɣ-ɖʋ wazʋʋ nɛ pɩcɛzɩ mbʋ pɩ-yɔɔ ɖɩpɩzɩɣ nɛ ɖɩmaɣzɩ yɔ.—Efɛz. 3:20. w24.11 13 § 20-21

Kajalaɣ pɩnzɩ mɩnʋʋ taa, paalɩzɩ koobiya abalɩñɩma nabɛyɛ se pɛkɛ ɛgbɛyɛ taa tʋmlaɖaa. (1 Tim. 3:8) Pɩwɛ ɛzɩ mba lakaɣnɩ «sɩnʋʋ tʋma» wena a-tɔm apostoloo Pɔɔlɩ yɔɔdaa yɔ. Ye mbʋ, pɩwɛ ɛzɩ ɛgbɛyɛ taa tʋmlaɖaa lakaɣ tʋma wena a-tɔm cɛyaa yɔ a-taa sakɩyɛ se pɩsa nɛ ɛgbɛyɛ taa ɛzʋtʋyaa ka ñʋʋ nɛ tɔm wɩlʋʋ nɛ ninɖiɣyu tʋmɩyɛ yɔ. Kɩɖaʋ nakʋyʋ yɔ: Pɩtɩla, ɛgbɛyɛ taa tʋmlaɖaa ɖʋwaɣ nesi nɛ paɖaɣnɩɣ maʋ Masɩ, yaa pɩtɩla pasɩɣaɣna nɛ payakɩ wondu ndʋ pɩpɔzʋʋ se palabɩnɩ tʋmɩyɛ nɖɩ yɔ. Maɣzɩ nɛ ŋna sɩnʋʋ tʋma wena ɛgbɛyɛ taa tʋmlaɖaa lakɩ ñɛ-ɛgbɛyɛ taa yɔ. (1 Pɩy. 4:10) Pɩtɩla paɖʋ-wɛ tʋmɩyɛ se pɔcɔnɩ ɛgbɛyɛ taa liidiye akɔnta yɔɔ, yaa tɔm susuu kookasɩ yɔɔ, yaa pɔcɔlʋʋ takayɩsɩ nɛ palɩzɩɣ-sɩ nɛ pasɩɣ se koobiya ɩkpaɣ, pɔcɔŋnɩ miikroowaa nɛ tɔm yɔɔdʋʋ menziiniwaa yɔɔ, pɛkɛ ɛyaa mʋʋ tʋmɩyɛ ɖɔkɩyaa, yaa pasɩɣna se Kewiyaɣ kpaaŋ ɛwɛɛ cɩɖɩ cɩɖɩ. Tʋma ana a-tɩŋa a-tɔm cɛyaa se pɩsa nɛ pɩtɩŋa pɩɖɔ camɩyɛ ɛgbɛyɛ taa.—1 Kɔr. 14:40. w24.10 19 § 4-5

Ye ɖɩtɔzʋʋ se Yehowa wɛ wezuu nɛ ɛwɛ ɖɔ-cɔlɔ se ɛsɩnɩ-ɖʋ yɔ, pɩkaɣ-ɖʋ sɩnʋʋ nɛ ɖɩɖɔkɩ ɖa-tɩ kala tɩŋa taa, paa pɩtɩɩkɛ kala sɔsɔna yaa cikpena yɔ. Ɛkɛ Ðoŋ Tɩŋa Tʋ, nɛ ɛpɩzɩɣ nɛ ɛha-ɖʋ ɖoŋ nɛ ɖɩɖɔkɩ ɖa-laŋɩyɛ. Tɔm tʋnɛ tɩhaɣ-ɖʋ lidaʋ se ɖɩpɩzɩ nɛ ɖɩlʋbɩnɩ kala. Alɩwaatʋ ndʋ ɖɩnaɣ se Yehowa sɩɣnɩ-ɖʋ kala cikpena taa yɔ, piyeki nɛ ɖa-taa tɛ se ɛkaɣ-ɖʋ sɩnʋʋ ɖɔɖɔ kala sɔsɔna taa. Yele nɛ ɖɩna mbʋ pɩlabɩ Wiyaʋ Daviid wezuu caɣʋ taa nɛ piyele nɛ ɛtaa Yehowa liu nɛ pɩkɩlɩ yɔ pɩ-taa 2. Alɩwaatʋ ndʋ ɛɛkɛ pɩɣa evelaɣ nɛ eɖiyiɣ heŋ yɔ, kɩyakʋ nakʋyʋ mʋʋzʋʋ nakʋyʋ kɔma nɛ kɩkpa heu nɔɔyʋ ɛ-caa heŋ taa; kɩyakʋ lɛɛkʋ lɛ, kpemtɔɔyaɣ nakɛyɛ kɔɔ ɖɔɖɔ nɛ kakpa heu nɔɔyʋ. Alɩwaatʋ ndʋ pɩlabɩ mbʋ yɔ, Daviid ɖʋ kpɩna ana a-naalɛ a-wayɩ nɛ ɛya heŋ ɛnɩ ɩ-ñʋʋ. Ɛlɛ Daviid tɩmaɣzɩ se ɛ-maɣmaɣ e-ɖoŋ taa ɛpɩzaa nɛ ɛla mbʋ. Ɛɛnawa se Yehowa hanɩ-ɩ ɖoŋ nɛ ɛla mbʋ. (1 Sam. 17:​34-37) Daviid kpaɣ alɩwaatʋ nɛ ɛmaɣzɩ tɔm ndʋ tɩ-yɔɔ lɛ, pɩsɩnɩ-ɩ nɛ ɛ-taa tɛ se Ɛsɔ ɛsadʋ kaɣ-ɩ kpazʋʋ ɖoŋ nɛ ɛsɩndaa. w24.06 21 § 5-6

Kpaɣ se nɔɔyʋ ya-ŋ se ŋwolo nɛ ña nɛ ɩ nɛ ɛyaa lalaa ɩkpɛndɩ nɛ ɩmʋ helim. Ɛzɩ pɩwɛɛ se ŋwolo? Ye ŋŋsɩŋ weyi ɛya-ŋ yɔ yaa mbʋ pakaɣ labʋ peeɖe yɔ, pɩkaɣ pɔzʋʋ se ŋpɔzɩ-ɩ tɔm ɛzɩ tʋnɛ yɔ: «Le ɖɩkaɣ katʋʋ nɛ ɛzɩmtaa? Ɛyaa ɛzɩma kaɣ kɔm? Akaɣ cɔnʋʋ mbʋ pakaɣ labʋ peeɖe yɔ pɩ-yɔɔ? Mba ŋyawa? Ɛbɛ mba pɔkɔŋ yɔ pakaɣ labʋ? Sʋlʋm ɖoŋ ñɩmbʋ kaɣ wɛʋ na?» Tɔm pɔzʋʋ mbʋ pɩ-yɔɔ cosuu pɩzɩɣ pɩsɩnɩ-ŋ nɛ ŋkpaɣ lɩmaɣzɩyɛ kɩbanɖɛ. Ye ŋnɩwa se ɛyaa mba paañaŋ Bibl paɣtʋ kila yɔ paba ɖɔɖɔ pakaɣ wobu ɖenɖe paya-ŋ yɔ yaa ye ŋnɩwa se pakaɣ wonuu sʋlʋm ɖoŋ ñɩmbʋ peeɖe ɛlɛ nɔɔyʋ ɛɛkaɣ pɩ-yɔɔ cɔnʋʋ nɛ paa weyi ɛpɩzɩɣ nɛ ɛñɔɔ ɛzɩ ɛsɔɔlʋʋ yɔ, ɛbɛ ŋkaɣ labʋ? Ŋŋmaɣzɩɣ se helim mʋʋ mbʋ, pɩpɩzɩɣ nɛ pɩpɩsɩ kazandʋ ndʋ tɩ-taa pɛɖɛlɛsɩɣ niye yɔ? (1 Pɩy. 4:3) Ye ŋmaɣzɩ tɔm ndʋ tɩ-tɩŋa tɩ-yɔɔ yɔ, pɩkaɣ-ŋ sɩnʋʋ nɛ ŋkpaɣ lɩmaɣzɩyɛ kɩbanɖɛ. w25.01 15 § 4-5

Yehowa labɩnɩ tʋmɩyɛ tɔm pee wena asɩɣnɩ-ɖʋ nɛ ɖɩna ɛzɩma ɛtɩŋɩɣnɩ kɩhɛyʋʋ pʋ-ñʋʋ taa kɩlaʋ yɔɔ nɛ ɛhɩzɩɣ mba pekpiɖiɣ yɔ pa-kɩwɛɛkɩm yɔ. Pɩwɛ kaɖɛ kpem se ɛyʋ ɛlɩzɩ tɔlɩm kɩsɛɛmɩm cɩɩɩ pɩsaʋ nakʋyʋ yɔɔ. Ɛlɛ Yehowa labɩnɩ tʋmɩyɛ tɔm pee anɛ se pɩsa nɛ ɖa-taa tɛ se ɛpɩzɩɣ nɛ ɛñalɩ ɖa-kɩwɛɛkɩm nɛ pɩlɩɩ caɣ caɣ nɛ pɩɩtasɩɣ-pʋ naʋ. Pakpaɣ kɩwɛɛkɩm nɛ pamaɣzɩnɩ «kɩma.» (Mat. 6:12; Luka 11:4) Pʋyɔɔ lɛ, alɩwaatʋ ndʋ payɩ ɖɩyʋsʋʋnɩ Yehowa yɔ, ɖa-kɩmɩyɛ wɛɛ nɛ ɖɩpaɣlɩɣ nɛ pɩkɩlɩɣ. Ðɩtɔɔ-ɩ kɩmɩyɛ sɔsɔɖɛ kpem! Ɛlɛ alɩwaatʋ ndʋ Yehowa kpeɣu-ɖʋ yɔ, pɩwɛ ɛzɩ ekpeɣ-ɖʋ kɩmɩyɛ nɖɩ ɖɩtɔɔ-ɩ yɔ. Ɛɛpɔzʋʋ-ɖʋ se ɖɩhɛyɩ kɩwɛɛkɩm mbʋ ekpeɣ-ɖʋ yɔ pɩ-yɔɔ. Ɛyʋ weyi pekpeɣ-i ɛ-kɩmɩyɛ yɔ, ɛ-taa lakɩ leleŋ siŋŋ; mbʋ ɖɔɖɔ ɖa-taa lakɩ leleŋ siŋŋ alɩwaatʋ ndʋ Yehowa kpeɣu-ɖʋ ɖa-kɩwɛɛkɩm yɔ. w25.02 9-10 § 9-10

Pɩkɛ toovenim se alɩwaatʋ ndʋ lʋlɩyaa kpadɩyɩɣ yɔ, pɩpɩzɩɣ nɛ pɩpɔzɩ se pe-piya ɩsɩnɩ-wɛ, nɛ piya sakɩyɛ lakɩ mbʋ nɛ taa leleŋ. (1 Tim. 5:4) Ɛlɛ lʋlɩyaa Krɩstʋ mba ɖiɣzinaa se alɩwaatʋ ndʋ pasɩɣnɩ pe-piya nɛ sɩpɩsɩ Yehowa sɛyaa yɔ, pehikiɣ taa leleŋ nɛ pɩkɩlɩ alɩwaatʋ ndʋ pafalɩsɩɣ-sɩ se sɩɩcɔnɩ pɔ-yɔɔ pa-akpadɩyɩtʋ taa yɔ. (3 Yoh. 4) Alɩwaatʋ ndʋ ŋfalɩsɩɣ ñe-piya se sɩtɩlɩ ɛzɩma sɩcɔnɩ sɩ-kɩcɛyɩm ɖeɖe cee wayɩ yɔ, tɩŋnɩ ña-kɩɖaʋ yɔɔ nɛ ŋkpɛlɩkɩ-sɩ ɛzɩma sɩtaa Yehowa liu yɔ. Kpaɣnɩ sɩ-pɩjatʋ taa, wɩlɩ-sɩ se tʋmɩyɛ labʋ nɛ kpekpeka wɛ wazaɣ. (Adu. 29:21; Efɛz. 4:28) Sɩwɛɣ nɛ sɩpaɣlɩɣ lɛ, sɩnɩ-sɩ nɛ sɩla tʋmɩyɛ camɩyɛ sukuli taa. Lʋlɩyaa, ɩpɩzɩɣ nɛ ɩñɩnɩ tɔm ɛgbɛyɛ takayɩsɩ taa nɛ ɩlabɩnɩ tʋmɩyɛ Bibl paɣtʋ kila nɛ ɩsɩnɩ mi-piya nɛ sɩkpaɣ lɩmaɣza kɩbana sukuli labʋ hɔɔlʋʋ taa. Pɩkaɣ sɩnʋʋ mi-piya nɛ sɩpɩzɩ nɛ sɩcɔnɩ sɩ-kɩcɛyɩm ɖeɖe nɛ sɩtɛ sihiɣ alɩwaatʋ nɛ sisusi tɔm nɛ pɩkɩlɩ yaa sɩla nʋmɔʋ lɩzʋʋ tʋmɩyɛ. w25.03 30-31 § 15-16

Yehowa tɩŋnɩ nayʋ Izaayii yɔɔ, Izaayii ñʋʋ 65 taa nɛ ɛyɔɔdɩ wɛtʋ ndʋ tɩ-taa mba pakaɣ wɛʋ fezuu taa paradisuu taa yɔ pɛwɛɣ yɔ tɩ-tɔm. Natʋ tɔm ndʋ, tɩlabɩ kajalaɣ ɖeɖe pɩnaɣ 537 taa P.P.Y. Alɩwaatʋ ndʋ tɩ-taa lɛ, Yuuda ñɩma mba paakpiɖi pa-kɩwɛɛkɩm yɔɔ yɔ, palɩnɩ yomiye taa Babilɔɔnɩ nɛ papɩsɩ pɛ-ɛjaɖɛ taa. Yehowa wazɩ ɛ-samaɣ nɛ ɛsɩnɩ-kɛ nɛ kala nɛ Yeruzalɛm tɛtʋ ndʋ paayɔkɩ-tʋ yɔ tɩɖaɣnɩ wɛʋ kajʋka, nɛ kaɖaɣnɩ maʋ templo se kɩkɛ lone nɖɩ ɖɩ-taa pɛsɛɣ Yehowa Izrayɛɛlɩ ɛjaɖɛ taa yɔ. (Iza. 51:11; Zak. 8:3) Izaayii natʋ tɔm paɣzɩ labʋ nabʋlɛ ɖeɖe pɩnaɣ 1919 taa. Pɩnaɣ ŋga ka-taa ɖa-alɩwaatʋ taa Yehowa sɛyaa lɩnɩ Babilɔɔnɩ Sɔsɔʋ yomiye taa. Pʋwayɩ lɛ, fezuu taa paradisuu paɣzɩ yɛlʋʋ pazɩ pazɩ tɛtʋ kpeekpe yɔɔ. Agbaa sakɩyɛ ñɔwa, nɛ Kewiyaɣ tɔm susuyaa kpekpeka tɩnaa mba pɛwɛ agbaa ana a-taa yɔ, pɛwɛnɩ Krɩstʋ mba wɛtʋ kɩbandʋ. Halaa nɛ abalaa mba ɖooo lɛ palakaɣ puuyaɣ lakasɩ nɛ pacakɩ wezuu kɩdɛkɛdʋʋ yɔ, lɛɛlɛɛyɔ lɛ, posu «ɛyʋtʋ kɩfatʋ ndʋ palɩzɩ-tʋ . . . ɛzɩ Ɛsɔ sɔɔlʋʋ yɔ.» w24.04 20-21 § 3-4

Ajɛɛ naayɛ taa lɛ, mba pɛkɛ aɖamɛɛ yɔ, pa-lʋlɩyaa yaa ɛyaa lalaa lɩzɩɣnɩ-wɛ mba pa nɛ wɛ papɩzɩɣ nɛ pɔɖɔkɩ nesi yɔ. Ajɛɛ lɛɛna taa lɛ, weyi ɛkɛ ɛɖanɛ yɔ, ɛ-hɔʋ taa ñɩma yaa ɛ-taabalaa ñɩnɩɣnɩ-ɩ weyi ɛ nɛ ɩ papɩzɩɣ nɛ pɔɖɔkɩ nesi yɔ nɛ pʋwayɩ lɛ pala nɛ pa-naalɛ pakatɩ ɖama nɛ pana se pamʋnɩ ɖama yaa patɩmʋnɩ ɖama. Ye pɔpɔzɩ-ŋ se ŋñɩnɩ weyi ɛkɛ ɛɖanɛ yɔ nɔɔyʋ nɛ ɛ nɛ ɩ paɖanɩ ɖama yaa ŋñɩnɩ-ɩ nɔɔyʋ nɛ ɛ nɛ ɩ pɔɖɔkɩ nesi yɔ, maɣzɩ mbʋ pa-naalɛ pɔsɔɔlaa yɔ nɛ mbʋ pɩkɛ pa-kɩcɛyɩm yɔ pɩ-yɔɔ camɩyɛ. Ye ŋna weyi ɛpɩzɩɣ nɛ ɛkɛ walʋ kɩbanʋ yaa halʋ kɩbanʋ ñɔ-hɔʋ taa tʋ yaa ña-taabalʋ yɔ, ñaɣ pana nɛ ŋñɩnɩ nɛ ŋtɩlɩ ɛyʋ ɛnʋ camɩyɛ, ŋtɩlɩ ɛ-wɛtʋ kɩbandʋ camɩyɛ, nɛ kɔzɩ kɔzɩ lɛ ñɩnɩ nɛ ŋna se taabalɩyɛ kɩbanɖɛ wɛ ɛ nɛ Yehowa pɛ-hɛkʋ taa. Taabalɩyɛ kɩbanɖɛ nɖɩ ɖɩwɛɣ nɔɔyʋ nɛ Yehowa pɛ-hɛkʋ taa yɔ, ɖɩ-tɔm cɛyɩ siŋŋ nɛ pɩkɩlɩ liidiye, sukuli ŋgʋ ɛlaba yɔ yaa lone nɖɩ ɛwɛna yɔ. Ɛlɛ tɔzɩ se koobu abalɩñɩnʋ weyi ɛkɛ ɛɖanɛ nɛ koobu halɩñɩnʋ weyi ɛkɛ ɛɖanɛ yɔ, pa-naalɛ pɩpɔzʋʋ se pakpaɣ lɩmaɣzɩyɛ se pɔɖɔkʋʋ nesi yaa paaɖɔkʋʋ. w24.05 23 § 11

Ŋpɩzɩɣ ɖɔɖɔ nɛ ŋtɩŋnɩ tɔm ndʋ ŋyɔɔdʋʋ yaa tɔm ndʋ ŋŋyɔɔdʋʋ yɔ tɩ-yɔɔ nɛ ŋsɩnɩ mba paɖanɩɣ ɖama yɔ. Nabʋyʋ taa, pɩpɩzɩɣ nɛ pɩpɔzɩ se ɖɩkpa ɖa-tɩ nɛ ɖɩtaayɔɔdɩ tɔm natʋyʋ. (Adu. 12:18) Kɩɖaʋ nakʋyʋ yɔ: Ðɩpɩzɩɣ nɛ ɖɩsɔɔlɩ siŋŋ se ɖiheyi ɛyaa lalaa se nabɛyɛ paɣzɩ ɖama ɖanʋʋ, ɛlɛ pɩtɩla ɛyaa mba, paasɔɔlaa se pa-maɣmaɣ peheyini ɛyaa tɔm ndʋ. Pɩtɩpɔzɩ se ɖɩla kɔlɔmɔtʋ mba paɖanɩɣ ɖama yɔ pɔ-yɔɔ yaa ɖɩkʋʋ pɔ-tɔm hɔɔlɩŋ weyi ɩ-taa pa-maɣmaɣ pɩwɛɛ se pakpaɣ lɩmaɣza yɔ ɩ-taa. (Adu. 20:19; Roma 14:10; 1 Tes. 4:11) Pɩtasɩ lɛ, pɩtɩpɔzɩ se ɖɩyɔɔdɩ natʋyʋ yaa ɖɩpɔzɩ-wɛ tɔm ndʋ tiyeki nɛ pamaɣzɩɣ se pɩwɛɛ se pɔɖɔkɩ nesi yɔ. Nɛ ye nabɛyɛ ɩkpaɣ lɩmaɣzɩyɛ se pa-ɖanɩyɛ ɛsɩɩ tɩnaɣ yɔ, ɛbɛ pɩwɛɛ se ɖɩla? Pɩtɩpɔzɩ se ɖɩkɩlɩɣ-wɛ tɔm pɔzʋʋ yaa ɖɩkʋʋ pa-taa nɔɔyʋ tɔm se ɛ-cɔlɔ pɩlɩnaa nɛ pa-ɖanɩyɛ sɩɩ tɩnaɣ. (1 Pɩy. 4:15) Ye nabɛyɛ iyebi ɖama ɖanʋʋ yɔ, pɩtɩpɔzɩ se ɖɩmaɣzɩ se pakpaɣ lɩmaɣzɩyɛ kɩdɛkɛdɩyɛ. Ðoŋ ɖoŋ lɛ, pɩwɩlɩɣ se pa-ɖanɩyɛ talɩ ɖɩ-kaɖʋwa, pʋ-tɔbʋʋ se ɖɩsɩnɩ-wɛ nɛ pakpaɣ lɩmaɣzɩyɛ kɩbanɖɛ. Paa mbʋ yɔ, lɩmaɣzɩyɛ nɖɩ, ɖɩpɩzɩɣ nɛ ɖɩkɔnɩ-wɛ laŋwɛɛkɩyɛ. Pʋyɔɔ lɛ, ɖɩpɩzɩɣ nɛ ɖɩtɩŋnɩ nʋmɔŋ nɩɩyɩ yɔɔ nɛ ɖɩsɩnɩ-wɛ. w24.05 31 § 15-16

Takɩm sɔsɔm mbʋ pɩpɩzɩɣ nɛ pɩtalɩ-ɖʋ nɛ pitibi-ɖʋ yɔɔɔ yɔ, pɩ-taa nabʋyʋ lɛ alɩwaatʋ ndʋ ɖɔ-hɔʋ taa tʋ nɔɔyʋ yaa ɖa-taabalʋ kɩbanʋ nɔɔyʋ yeki Yehowa sɛʋ yɔ. (Keɣ. 78:40) Ye taabalɩyɛ kɩbanɖɛ kaawɛ ɖa nɛ ɛyʋ ɛnʋ ɖɛ-hɛkʋ taa yɔ, pɩpɩzɩɣ nɛ pɩwɛɛ-ɖʋ kaɖɛ siŋŋ se ɖɩɖɔkɩ ɖa-laŋɩyɛ wɛtʋ ndʋ tɩ-taa. Ye ŋkatɩ kaɖɛ wɛtʋ ndʋ yɔ, Sadɔɔkɩ siɣsiɣ wɛtʋ kɩɖaʋ pɩzɩɣ nɛ kɩkpazɩ-ŋ ɖoŋ. Sadɔɔkɩ kaaɖɔkɩ e-siɣsiɣ wɛtʋ Yehowa ɛsɩndaa alɩwaatʋ ndʋ ɛ-taabalʋ kʋsɔɔlʋ Abiyaataarɩ lɩzaa se ɛɛɖɔkʋʋ e-siɣsiɣ wɛtʋ yɔ. Pɩlabɩ mbʋ alɩwaatʋ ndʋ Daviid kewiyitu tɔɔʋ caɣaɣ tɛm yɔ. Alɩwaatʋ ndʋ Daviid kaakpadɩyaa nɛ ɛcaɣaɣ sɩbʋ yɔ, ɛ-pɩyalʋ Adoniya ñɩnaɣ se ɛmʋ kewiyaɣ kpelaɣ, ŋgʋ Salomɔɔ Yehowa kaayɔɔdaa se ɛcɛlɩɣ-kɛ. (1 Kro. 22:​9, 10) Abiyaataarɩ ñalɩzɩ se ɛtɩnɩɣ Adoniya yɔɔ. (1 Awi. 1:​5-8) Mbʋ Abiyaataarɩ laba yɔ, pɩwɩlɩɣ se pɩtɩkɛ Daviid nɛ Sadɔɔkɩ ɖeke ɛtɩwɩlɩ e-siɣsiɣ wɛtʋ, ɛlɛ ɛtɩwɩlɩ ɖɔɖɔ e-siɣsiɣ wɛtʋ Yehowa. Sadɔɔkɩ nɛ Abiyaataarɩ paakpɛndaa nɛ pala cɔjɔtʋ tʋmɩyɛ ɛzɩ pɩnzɩ 40 mbʋ yɔ.—2 Sam. 8:17; 15:29; 19:​11-14. w24.07 6 § 14-15

Ða-taa pɩzɩɣ nɛ pɩtɛ se ye ɖɩcakɩnɩ ɖɛ-ɛsa se pɩsa nɛ ɖɩtaatɔlɩ takɩm taa yɔ, pɩwazɩɣ-ɖʋ paa ɛzɩmtaa. Alɩwaatʋ ndʋ ɖɩlakɩ kɩwɛɛkɩm yɔ, ɖɩpɩzɩɣ nɛ ɖɩnɩɩ «leleŋ weyi eeleɖiɣ yɔ;» ɛlɛ alɩwaatʋ ndʋ ɖɩcakɩ wezuu ɛzɩ Yehowa sɔɔlʋʋ yɔ, ɖɩnɩɣ leleŋ nɛ pɩkɩlɩ. (Ebr. 11:25; Keɣ. 19:8) Mbʋ pʋyɔɔ yɔ Yehowa lɩzɩ-ɖʋ se ɖɩcaɣ wezuu nɛ pɩla nɔɔ kʋɖʋmaɣ nɛ ɛ-sɔɔlɩm. (Kiɖe 1:27) Alɩwaatʋ ndʋ ɖɩcakɩ wezuu ŋgʋ kɩkɛdɩɣnɩ Yehowa yɔ, ɖɩwɛɣnɩ ɛhʋyɛ kele kele ñɩnɖɛ nɛ pɩhaɣ-ɖʋ waɖɛ se ɖihiɣ wezuu maatɛŋ. (1 Tim. 6:12; 2 Tim. 1:3; Yud. 20, 21) Pɩkɛ toovenim se «tomnaɣ wɛnɩ ɛjandʋ.» (Mat. 26:41) Ɛlɛ pɩtɩwɩlɩ se ɖɩɩpɩzɩɣ nɛ ɖɩla nabʋyʋ nɛ ɖɩlʋbɩnɩ ɖɛ-ɛjandʋ. Yehowa ɖaŋ kpam se ɛha-ɖʋ ɖoŋ weyi pɩpɔzʋʋ-ɖʋ yɔ. (2 Kɔr. 4:7) Tɩlɩ se ɖoŋ weyi ɩcɛzɩ ɛyʋ ɖoŋ yɔ, ɛnʋ Ɛsɔ haɣ-ɖʋ. Ɛlɛ kajalaɣ lɛ, pɩwɛɛ se ɖɩlabɩnɩ tʋmɩyɛ ɖa-maɣmaɣ ɖo-ɖoŋ se pɩsa nɛ ɖɩtaatɔlɩ takɩm taa. Ye ɖɩlabɩ ɖe-ɖeɖe yɔ, ɖa-taa pɩzɩɣ nɛ pɩtɛ se Yehowa kaɣ cosuu adɩma wena ɖɩlakɩ se ɛsɔzɩ-ɖʋ ɖoŋ yɔ a-yɔɔ alɩwaatʋ ndʋ pɩpɔzʋʋ yɔ. (1 Kɔr. 10:13) Yehowa kaɣ-ɖʋ sɩnʋʋ nɛ ɖɩcaɣnɩ ɖɛ-ɛsa se pɩsa nɛ ɖɩtaatɔlɩ takɩm taa. w24.07 19 § 19-21

Apostoloo Pɔɔlɩ heyi Timootee weyi ɛɛkɛ ɛzʋtʋyʋ ɖɔɖɔ yɔ evemiye mayaɣ kanɛ ka-taa se ɛkalɩ kɩwɛɛkɩm laɖaa «ɛyaa kpeekpe ɛsɩndaa.» Suwe Pɔɔlɩ ñɩnaɣ yɔɔdʋʋ? Ɛtaañɩnɩɣ yɔɔdʋʋ se pɩwɛɛ se pakalɩ kɩwɛɛkɩm laɖʋ ɛnʋ ɛgbɛyɛ «kpeekpe ɛsɩndaa.» Ɛlɛ, ɛyaa mba pɩtɩla pɛtɛm nɩʋ kɩwɛɛkɩm mbʋ pɩ-tɔm yɔ pɔ-tɔm ɛyɔɔdaɣ. Pʋtɔma yɔ, panɩ kɩwɛɛkɩm mbʋ pɩ-tɔm, yaa pɩtɩla yɔ kɩwɛɛkɩm laɖʋ heyini-wɛ mbʋ ɛlaba yɔ. Ɛzʋtʋyaa kaɣ heyuu ɛyaa mba pe-ɖeke se pɔcɔnɩ tɔm ndʋ ti-ɖeɖe nɛ pasɩɣzɩ kɩwɛɛkɩm laɖʋ ɛnʋ lɔŋ. Pɩtɩla koobiya sakɩyɛ tɛm nɩʋ kɩwɛɛkɩm mbʋ koobu ɛnʋ ɛlaba yɔ pɩ-tɔm, yaa pɩtɩla pakaɣ-tʋ nɩʋ. Ye pɩkɛ mbʋ yɔ, ye pɔtɔm se pakalɩ kɩwɛɛkɩm laɖʋ «ɛyaa kpeekpe ɛsɩndaa» yɔ, pɩpɩzɩɣ nɛ pɩkɛ ɛgbɛyɛ kpeekpe ɛsɩndaa. Ðɩnɛ ɛlɛ, ɛzʋtʋyʋ nɔɔyʋ kaɣ susuu ɛgbɛyɛ ɛsɩndaa se pɔhɔm koobu ɛnʋ ɛ-nɩŋgbaŋʋʋ. Ɛbɛ yɔɔ? Pɔɔlɩ cosaa se: «Nɛ pɩkpɛlɩkɩ lɔŋ mba pɩkazaa yɔ» nɛ pataala kɩwɛɛkɩm sɔsɔm nabʋyʋ. w24.08 23-24 § 16-17

Pɩwɛɛ se ɖɩwɛɛ kpekpeka Yehowa tʋmɩyɛ taa nɛ piwolo pɩtalɩ tɩnaɣ yɔɔ. Pɩwɛɛ se patam numwaa ɩwɛɛ feŋuu yɔɔ nɛ Yesu ‘kpaɣ-wɛ’ nɛ ewoni-wɛ ɛsɔdaa Kewiyaɣ taa nɛ pamʋ pa-kɩhɛyʋʋ. (Mat. 24:40) Armaagedɔɔ you wayɩ, pakaɣ kɛʋ Yesu asɛyʋ, Heɣa nesi ɖɔkʋʋ taa. (2 Tes. 2:1) Paa tɔm hʋʋ alɩwaatʋ ɛñɔtɩ kpam yɔ, pɩfɛyɩ se sɔɔndʋ ɛkpa-ɖʋ. Ye ɖiwobi pɩ-yɔɔ nɛ ɖɩwɛɛ siɣsiɣ yɔ, ɖa-Caa weyi ɛwɛ ɛsɔdaa yɔ, ɛkaɣ-ɖʋ haʋ «ɖoŋ weyi ɩcɛzɩ ɛyʋ ɖoŋ yɔ» nɛ ‘ɖɩpɩzɩ ɖɩsɩŋ ɛyʋ Pɩyalʋ ɛsɩndaa.’ (2 Kɔr. 4:7; Luka 21:36) Paa ɖɩwɛnɩ lidaʋ se ɖɩkpaɣ ɛsɔdaa yaa ɖɩwɛnɩ lidaʋ se ɖɩcakɩ tɛtʋ yɔɔ yɔ, ye ɖɩkpakɩɣ paɣʋ mbʋ pɩwɛ Yesu aduwa taa yɔ nɛ ɖɩlakɩnɩ tʋmɩyɛ yɔ, ɖɔ-tɔm kaɣ kɛdɩnʋʋ ɖa-Caa. Yehowa kaɣ-ɖʋ labʋ lootiye nɛ ‘ɛma ɖa-hɩla wezuu takayaɣ taa.’—Dan. 12:1; Natʋ 3:5. w24.09 24-25 § 19-20

Ɛsɔtɔm pɩzɩɣ tɩsɩnɩ-ŋ nɛ ŋlʋbɩnɩ lɩmaɣza wena ayeki nɛ pitiki-ŋ yɔɔɔ yɔ. Ɛzɩma tɩyɛ? Maɣzɩ wondu kɩbandʋ ndʋ ŋwɛna yɔ tɩ-yɔɔ, pɩkpɛndɩnɩ ñɩm mbʋ ŋwɛnɩ ɛsɔdaa yɔ pɩ-yɔɔ nɛ ŋtɔzɩ se mba paasɛɣ Yehowa yɔ, mbʋ pɛwɛnɩ tɛtʋ yɔɔ cɩnɛ yɔ, pi-ɖeke pɩkɛnɩ pa-kɩhɛyʋʋ. Mbʋ pɛwɛnɩ pe-wezuu caɣʋ taa yɔ, mbʋ papɩzɩɣ nɛ pataa liu kiya mbʋ pʋyɔɔ yɔ pɛfɛyɩnɩ cee wayɩ lidaʋ nakʋyʋ. Ɛlɛ ña lɛ, Yehowa lakɩ-ŋ tamaɣ se ɛwazɩɣ-ŋ nɛ pɩcɛzɩ mbʋ pɩ-yɔɔ ŋpɩzɩɣ nɛ ŋmaɣzɩ yɔ. (Keɣ. 145:16) Pɩtasɩ lɛ, maɣzɩ tɔm tʋnɛ tɩ-yɔɔ nɛ ŋna: Paa ŋtaakpaɣ lɩmaɣzɩyɛ se ŋsɩɣ Yehowa sɛtʋ kajalaɣ lone taa yɔ, ŋŋpɩzaa nɛ ŋtɩlɩ ɛzɩma ñe-wezuu caɣʋ kaɣaɣ wɛʋ yɔ? Ðɩɩpɩtɩɣ tɔm tʋnɛ tɩ-yɔɔ: Ye sɔɔlɩm mbʋ ŋwɛnɩ Ɛsɔ nɛ ɛyaa lalaa pɔ-yɔɔ yɔ, mbʋ eseɣtiɣni-ŋ nɛ ŋkpakɩɣ lɩmaɣza yɔ, ŋkaɣ wɛnʋʋ mbʋ pɩhaɣ-ŋ koboyaɣ ñe-wezuu caɣʋ taa yɔ paa ɛzɩmtaa. w24.10 27 § 12-13