Octobre

Ðoŋ ɖoŋ lɛ, ɛgbɛyɛ taa ɛzʋtʋyaa, egeetiye yɔɔ cɔnɩyʋ, ɛgbɛyɛ piliŋa yaa Nɔɔɖɛyaa ɛgbɛyɛ tasɩɣ-ɖʋ lɔŋ se pɩsɩnɩ-ɖʋ nɛ ɖɩsɛɛ Yehowa camɩyɛ. Ɛlɛ ye patɩsɩ-ɖʋ lɔŋ nɩɩyɩ nɛ ɖɩɩnɩɣ ɩ-taa yɔ, ɛzɩma ɖɩkaɣ labʋ? Pɩtɩla, kaɖɛ nɖɩ lɔŋ tasʋʋ mbʋ pɩkaɣ yebu nɛ ɖɩkatɩ yɔ ɖi-ɖeke ɖɩ-yɔɔ ɖɩmaɣzɩɣ. Halɩ pɩtɩla, ɖɩkaɣ kam ɖa-lɩmaɣza koobiya mba patasɩ-ɖʋ lɔŋ ɛnɩ yɔ pɛ-ɛjandʋ yɔɔ. Ye ɖɩɖɔŋnɩ tisuu yɔ, ɖa-taa tɛŋ se Yehowa cɔŋnɩ pɩtɩŋa pi-ɖeɖe nɛ ɛsɩm wɛtʋ ndʋ tɩ-taa ɖɩwɛɛ yɔ. Piyeki nɛ ɖɩña lɔŋ weyi patasɩɣ-ɖʋ yɔ lɛɛ lɛɛ, nɛ ɖɩlakɩ mbʋ nɛ lɩmaɣza kɩbana. (Ebr. 13:17) Ðɩnawa se alɩwaatʋ ndʋ ɖɩɖɔŋ lɔŋ weyi patasɩɣ-ɖʋ yɔ ɩ-yɔɔ yɔ, piyeki nɛ ɛgbɛyɛ wɛɛ nɔɔ kʋɖʋmaɣ taa. (Efɛz. 4:​2, 3) Koobiya mba pɛɖɛɣ-ɖʋ nɔɔ yɔ patɩtalɩ pilim, paa mbʋ yɔ ɖa-taa tɛma se ye ɖɩñaŋ-wɛ yɔ, Yehowa kaɣ-ɖʋ wazʋʋ. (1 Sam. 15:22) Ye nabʋyʋ ɛɛɖɔŋ camɩyɛ yɔ, Yehowa kaɣ-pʋ ñɔɔzʋʋ alɩwaatʋ kɩbandʋ yɔɔ. w25.03 23-24 § 13-14

ÐƖwƐ alɩwaatʋ kɩbandʋ taa kpem. Paa evemiye nɖɩ, ɖɩnaɣ ɛzɩma Bibl taa natʋ tɔm wɛɛ nɛ tɩlakɩ yɔ. Ðɩna kɩɖaŋ nɩɩyɩ: Ðɩnaɣ se «hayo kiŋ wiyaʋ» nɛ «hadɛ kiŋ wiyaʋ» pɛwɛɛ nɛ palʋkɩnɩ ɖama mbʋ pʋyɔɔ yɔ, pa-taa paa weyi wɛɛ nɛ ɛñakɩ pana se e-kewiyaɣ ɛkɩlɩnɩ ɖoŋ ɛjaɖɛ yɔɔ. (Dan. 11:​40, pɩ-tɛɛ tɔm) Ðɩnaɣ ɖɔɖɔ ɛzɩma pɛwɛɛ nɛ posusuu Kewiyaɣ tɔm kɩbandʋ tɛtʋ kpeekpe yɔɔ nɛ ɛyaa miiliyɔɔwaa sakɩyɛ lɩzɩɣ se pɛsɛɣ Yehowa yɔ. (Iza. 60:22; Mat. 24:14) Pɩtasɩ lɛ, ɖɩwɛɛ nɛ ɖihikiɣ fezuu taa tɔɔnaɣ sakɩyɛ «alɩwaatʋ ndʋ tɩmʋnaa yɔ tɩ-yɔɔ.» (Mat. 24:​45-47) Yehowa wɛɛ nɛ ɛsɩɣnɩ-ɖʋ se ɖɩnɩɩ lakasɩ sɔsɔsɩ nzɩ sɩkaɣ labʋ nɛ ɛsɩndaa yɔ sɩ-taa nɛ pɩkɩlɩ. (Adu. 4:18) Ða-taa pɩzɩɣ nɛ pɩtɛ se kʋñɔŋ sɔsɔʋ kaapaɣzɩɣ lɛ, ɖɩtɩlɩ tɔm ndʋ payɩ pɩpɔzʋʋ se ɖɩtɩlɩ yɔ se pɩsa nɛ ɖɩɖɔkɩ ɖa-laŋɩyɛ kpam nɛ ɖɩwɛɛ nɔɔ kʋɖʋmaɣ taa kaɖɛ alɩwaatʋ ndʋ tɩ-taa. Ɛlɛ, pɩwɛɛ se ɖiɖiɣzina se ɖɩɩsɩŋ tɔm tɩŋa mbʋ pɩkaɣ labʋ nɛ ɛsɩndaa yɔ pɩ-yɔɔ. w24.05 8 § 1-2

Keɣa maɖʋ yɔɔdɩ ɛyʋ lɛlʋ hɩɖɛ wɛɛkʋʋ tɔm. Ɛyʋ lɛlʋ hɩɖɛ wɛɛkʋʋ tɔbʋʋ lɛ suwe? Ðoŋ ɖoŋ lɛ, pɩkɛ cɛtɩm tɔm ndʋ pɔyɔɔdʋʋ nɔɔyʋ yɔɔ se pɛwɛɛkɩnɩ ɛ-hɩɖɛ yɔ. Keɣa 15:3 tɔzʋʋ-ɖʋ ɖɔɖɔ se mba Yehowa mʋ-wɛ ɛgɔndʋ yɔ, paalakɩ lalaa mbʋ pɩfɛyɩ ɖeu yɔ, nɛ paayɔɔdʋʋ tɔm kɩdɛkɛdɩtʋ pa-taabalaa yɔɔ. (Keɣ. 15:1) Tɔm ndʋ, tɩ-tɔbʋʋ lɛ suwe? Ye ɖɩyɛlɩɣnɩ nɔɔyʋ yɔɔ tɔm kɩdɛkɛdɩtʋ yɔ, ɖɩpɩzɩɣ nɛ ɖɩyɔɔdɩ tɔm ndʋ tɩtɩmʋna yɔ ɛ-yɔɔ nɛ ɖɩɩɖʋʋna. Kɩɖaŋ nɩɩyɩ yɔ: (1) koobu halɩñɩnʋ nɔɔyʋ yebi alɩwaatʋ tɩŋa Ɛsɔ sɛtʋ tʋmɩyɛ, (2) koobu abalɩñɩnʋ nɔɔyʋ nɛ ɛ-halʋ peyebi tʋmɩyɛ labʋ Betɛɛlɩ, yaa (3) koobu abalɩñɩnʋ nɔɔyʋ tɩtasɩ kɛʋ ɛgbɛyɛ taa ɛzʋtʋyʋ yaa ɛgbɛyɛ taa tʋmlaɖʋ. Pɩɩwɛɣ ɖeu se ɖiheyiɣ ɛyaa lalaa se pʋtɔma yɔ koobiya mba palabɩ kɩwɛɛkɩm nabʋyʋ, pʋyɔɔ pɛ-wɛtʋ lɛɣzaa. Pɩtɩla lɩmaɣza naayɛ yɔɔ pɛ-wɛtʋ lɛɣzaa nɛ ɖɩɩsɩŋ lɩmaɣza ana. Pɩtasɩ lɛ, weyi Yehowa mʋ-ɩ ɛgɔndʋ e-kizinziku tɛɛ yɔ, «ɛɛlakɩ ɛyʋ lɛlʋ mbʋ pɩfɛyɩ ɖeu yɔ, nɛ ɛɛyɔɔdʋʋ tɔm kɩdɛkɛdɩtʋ ɛ-taabalaa yɔɔ.» w24.06 11 § 11-13

Pɩsa nɛ sɔɔndʋ ndʋ ɖiseɣ Yehowa yɔ tɩkpa ɖoŋ lɛ, pɩwɛɛ se ɖɩmaɣzɩ mbʋ pɩkɛdɩɣnɩ Yehowa yɔ pɩ-yɔɔ alɩwaatʋ ndʋ payɩ ɖɩkpakɩɣ lɩmaɣza yɔ. Ŋŋkalɩɣ Bibl kɛdɛsɩ lɛ, pɔzɩ ña-tɩ se: «Ye maawɛnɩ wɛtʋ ndʋ tɩ-taa, lɩmaɣzɩyɛ nɖɩ maakpaɣaa?» Maɣzɩ se ŋwɛɛ nɛ ŋwelisiɣ alɩwaatʋ ndʋ Izrayɛɛlɩ mba ñʋndɩnaa 10 yɔɔdaɣ se Izrayɛɛlɩ mba ɩɩkaɣ pɩzʋʋ nɛ pawa Kanaŋ mba alɩwaatʋ ndʋ paawoba nɛ pɔcɔŋ ɛjaɖɛ nɖɩ Yehowa kaalabɩ tamaɣ se ɛcɛlɩɣ Izrayɛɛlɩ piya yɔ. Ŋkaɣ tisuu pɔ-tɔm yɔɔ nɛ ŋpaɣzɩ ɛyʋ sɔɔndʋ seu na, yaa sɔɔlɩm mbʋ ŋwɛnɩ Yehowa yɔɔ yɔ nɛ ɛzɩma ŋsɔɔlaa se ñɔ-tɔm ɛkɛdɩnɩ-ɩ yɔ pɩkaɣ paɣlʋʋ nɛ pɩkɩlɩ ñɔ-sɔɔndʋ? Izrayɛɛlɩ mba kpaɖʋʋ pilim titisi toovenim tɔm ndʋ Yozuwee nɛ Kalɛɛb paaheyi-wɛ yɔ tɩ-yɔɔ. Piyeba nɛ pelesi waɖɛ nɖɩ paawɛna se pasʋʋ Lidaʋ Tɛtʋ taa yɔ.—Kɩg. 14:​10, 22, 23. w24.07 10 § 7

Ozee halʋ Gomɛɛrɩ kʋyɩ Ozee yɔɔ nɛ ɛ nɛ abalaa lalaa pacakɩ kʋzʋʋ kɩdɛkɛdʋʋ wezuu. Ɛ-tɔm kaatɛma? Yehowa naɣ laŋa taa, pʋyɔɔ eheyi Ozee se: «Tasɩ wobu nɛ ŋsɔɔlɩ halʋ weyi abalʋ lɛlʋ sɔɔlɩ-ɩ yɔ, halʋ weyi eɖiɣni labʋ acɛyɛ yɔ, ɛzɩ Yehowa sɔɔlʋʋ Izrayɛɛlɩ samaɣ yɔ, ŋgʋ kaka ñapɩsɩnɩ ɛsɔnaa lalaa yɔɔ.» (Ozee 3:1; Adu. 16:2) Tɔzɩ se Ozee halʋ kaawɛ kɩwɛɛkɩm sɔsɔm labʋ yɔɔ. Paa mbʋ yɔ Yehowa heyi Ozee se ɛkpaɣ nɛ ekpeɣ ɛ-halʋ nɛ ɛpɩsɩnɩ-ɩ. Mbʋ ɖɔɖɔ, Izrayɛɛlɩ ñɩma mba powobi pɩ-yɔɔ nɛ palakɩ kɩwɛɛkɩm yɔ pɔ-tɔm tɩnɩɩ Yehowa. Paa paawobi pɩ-yɔɔ nɛ palakɩ kɩwɛɛkɩm sɔsɔm yɔ, Yehowa tiyele-wɛ sɔɔlʋʋ. Etiyi nayaa tam sakɩyɛ se pasɩnɩ-wɛ nɛ pekpiɖi pa-kɩwɛɛkɩm yɔɔ nɛ pɛlɛɣzɩ pe-wezuu caɣʋ. Kɩɖaʋ kʋnɛ kɩwɩlɩɣ se Yehowa weyi ɛkɛ «ɛyaa laŋa taa tazɩyʋ» yɔ, ɛkaɣ ñaɣʋ pana nɛ ɛsɩnɩ ɛyʋ weyi ɛwɛ kɩwɛɛkɩm sɔsɔm labʋ yɔɔ yɔ nɛ ekpiɖi ɛ-kɩwɛɛkɩm yɔɔ. w24.08 10 § 7

Pɩɩwɛɛ se Yuuda ñɩma mba paapɩsɩ kajalaɣ Krɩstʋ mba yɔ pala lɛɣzɩtʋ sɔsɔtʋ, nɛ pɩtaawɛɛ-wɛ kɛlɛʋ. Alɩwaatʋ natʋyʋ, Yuuda mba Yehowa kaalɩzaa se pɛkɛ ɛ-samaɣ. Yeruzalɛm kaakɛ tɛtʋ ndʋ tɩ-tɔm cɛyɩ siŋŋ yɔ pɩnzɩ sakɩyɛ. Awiya wena atɔkaɣ kewiyitu Yehowa lone taa yɔ, peeɖe aawɛɛ. Nɛ templo taa pɩɩwɛɛ se mba pɔsɔɔlaa se pɛsɛɛ Yehowa yɔ powolo nɛ pɛsɛɛ-ɩ. Yuuda ñɩma mba payɩ paawɛ siɣsiɣ yɔ, pɔɖɔŋaɣ Moyizi Paɣtʋ yɔɔ nɛ paɣtʋ ndʋ pɛ-Ɛsɔ sɛtʋ ñʋndɩnaa wɩlaɣ-wɛ yɔ tɩ-yɔɔ. Paɣtʋ ndʋ titukaɣni tɔɔnaɣ, pɛlɩtʋ nɛ wɛtʋ ndʋ pɩwɛɛ se pɛwɛɛnɩ ɛyaa mba patɩkɛ Yuuda mba yɔ pɔ-yɔɔ yɔ. Ɛlɛ Yesu sɩm wayɩ, Yehowa taatasɩɣ mʋʋ kɩlaŋ weyi Yuuda mba laɣaɣ templo taa yɔ. Pɩtaawɛɛ kɛlɛʋ Yuuda ñɩma mba papɩsɩ Krɩstʋ ñɩma yɔ se pɛlɛɣzɩ ɛzɩma pɛsɛɣaɣ Yehowa yɔ. (Ebr. 10:​1, 4, 10) Halɩ pɩɩlabɩ kaɖɛ Krɩstʋ ñɩma mba paapɩ fezuu taa yɔ se peyele nɛ lɛɣzɩtʋ ndʋ tɩ-taa natʋyʋ malɩnɩ-wɛ. Pa-taa nɔɔyʋ lɛ apostoloo Pɩyɛɛrɩ. (Tʋma 10:​9-14; Gal. 2:​11-14) Yuuda Ɛsɔ sɛtʋ ñʋndɩnaa kaanazɩ Krɩstʋ ñɩma mba pe-tisuu kɩfam mbʋ pɩ-yɔɔ. w24.09 9 § 4

Alɩwaatʋ ndʋ Yehowa ɖʋʋ ɛ-samaɣ tʋmɩyɛ naɖɩyɛ yɔ, ɛsɔɔlaa se kala ɖʋtʋ camɩyɛ nɛ pɩtɩŋa pʋtʋʋzɩ cɔlɩɩɩ. (1 Kɔr. 14:33) Kɩɖaʋ nakʋyʋ yɔ: Ɛsɔ sɔɔlɩm lɛ se posusi tɔm kɩbandʋ tɛtʋ kpeekpe yɔɔ. (Mat. 24:14) Yehowa lɩzɩ Yesu se ɛcɔnɩ tʋmɩyɛ nɖɩ ɖɩ-yɔɔ. Nɛ Yesu wɛɛ nɛ eɖiyiɣ tʋmɩyɛ nɖɩ se pɩsa nɛ paalakɩ-ɖɩ lɛ, pala ɖʋtʋ camɩyɛ nɛ pɩtɩŋa pʋtʋʋzɩ cɔlɩɩɩ. Kajalaɣ pɩnzɩ mɩnʋʋ taa, paalɩzɩ apostoloowaa nɛ ɛzʋtʋyaa nabɛyɛ Yeruzalɛm se pɛkɛ nɔɔɖɛyaa ɛgbɛyɛ taa mba. Mba kpakaɣnɩ lɩmaɣza nɛ pɩɩwɛɛ se agbaa tɩŋa ɩɖɔ lɩmaɣza ana a-yɔɔ. Alɩwaatʋ ndʋ agbaa ñɔwaɣ hɔɔlɩŋ ndɩ ndɩ taa yɔ, a-taa ɛzʋtʋyaa heyaɣ koobiya lɩmaɣza wena nɔɔɖɛyaa ɛgbɛyɛ kpaɣaa yɔ. (Tʋma 14:23; 15:2; 16:4) Koobiya ɖɔŋaɣ lɔŋ weyi patasaɣ-wɛ yɔ ɩ-yɔɔ lɛ, «agbaa wɛɛ nɛ akpaɣ ɖoŋ tisuu taa nɛ ahukuu paa ɖooye.»—Tʋma 16:5. w24.04 8 § 1

Nisaŋ 16 ñɩŋgʋ wiye tanaŋ tɛɛ cu, halaa siɣsiɣ tɩnaa nabɛyɛ wobi ɖenɖe paapim Yesu yɔ. (Luka 24:​1, 10) Halaa mba pa-taa nɔɔyʋ lɛ Maarɩɩ Magdalaa tʋ. Maarɩɩ talɩ pɩlaʋ yɔɔ lɛ, ɛna se kɩɩwɛ kpɛɖɛ. Peeɖe esewa nɛ ewolo nɛ eheyi-tʋ Pɩyɛɛrɩ nɛ Yohanɛɛsɩ nɛ paba kpaɣ seya nɛ powolo pɩlaʋ yɔɔ nɛ Maarɩɩ tɩŋ pa-wayɩ. Pɩyɛɛrɩ nɛ Yohanɛɛsɩ patalaa nɛ pana se toovenim taa pɩlaʋ wɛ kpɛɖɛ lɛ, papɩsɩ ɖɩɣa. Ɛlɛ Maarɩɩ ñatɩpɩsɩ. Ɛcaɣ peeɖe nɛ ewiɣ. Ɛtaana se Yesu wɛɛ nɛ ɛcɔŋnɩ-ɩ. Yesu kaanawa se ɛ-yɔɔ Maarɩɩ kaawɛɛ nɛ ewiɣ nɛ ɛɛsɔɔlaa se ɛhɛzɩ ɛ-laŋɩyɛ. Pʋyɔɔ ɛlɩzɩ ɛ-tɩ nɛ ɛwɩlɩ Maarɩɩ nɛ pʋwayɩ lɛ, ɛla nabʋyʋ kɛlɛʋ nɛ pɩkpazɩ-ɩ ɖoŋ siŋŋ. Ɛyɔɔdɩnɩ-ɩ nɛ ɛɖʋ-ɩ tʋmɩyɛ kɩcɛyɩyɛ naɖɩyɛ: Eheyi-i se ewolo nɛ eheyi e-koobiya se ɛnʋ fema.—Yoh. 20:​17, 18. w24.10 13 § 7

Moyizi ɛɛkɛ nayʋ, tɔm hʋyʋ, sɔɔjanaa ñʋʋdʋ nɛ tɔm mayʋ. Eɖiyi Izrayɛɛlɩ samaɣ nɛ ɛlɩzɩ-kɛ yomiye taa Ejipiti, nɛ ɛɛnanɩ ɛ-ɛsa Yehowa piti lakasɩ sakɩyɛ. Yehowa tɩŋnɩ ɛ-yɔɔ nɛ ɛma Bibl taa kajalaɣ takayɩsɩ 5, Keɣa 90 nɛ pɩtɩla Keɣa 91. Pɩtɩla, ɛnʋ manɩ ɖɔɖɔ Yɔɔb takayaɣ. Pɩɩkazɩ pazɩ se Moyizi ɛsɩ lɛ, ekpeɣli Izrayɛɛlɩ mba tɩŋa se ɛtɔzɩ-wɛ mbʋ mbʋ Yehowa laba nɛ pana pe-wezuu caɣʋ taa yɔ pɩ-yɔɔ; alɩwaatʋ ndʋ lɛ, ɛɛwɛnɩ pɩnzɩ 120. Pana maamaaci lakasɩ sakɩyɛ nzɩ Yehowa kaalaba yɔ nɛ ɛzɩma ɛɛhɔm Ejipiti mba nɩŋgbaŋʋʋ yɔ. (Ejl. 7:4) Teŋgu kɩsɛɛmʋʋ kaatayɩ nabʋlɛ nɛ pɔɖɔ kɩ-taa, nɛ paana ɛzɩma Yehowa ɖɩzɩ Farawɔɔ nɛ ɛ-sɔɔjanaa yɔ. (Ejl. 14:​29-31) Paawɛ kañɩmbusuu taa lɛ, Yehowa kaakandɩyɩ pɔ-yɔɔ nɛ ɛcɔnɩ pɔ-yɔɔ. (Wp. 8:​3, 4) Lɛɛlɛɛyɔ lɛ, Izrayɛɛlɩ mba caɣ sʋʋ Lidaʋ Tɛtʋ taa. Pʋyɔɔ lɛ pʋcɔ nɛ Moyizi sɩ lɛ, ɛɛsɔɔlaa se ɛkpazɩ samaɣ ɖoŋ. w24.11 8-9 § 3-4

Ɛyaa mba Yesu yɔɔdɩnaa alɩwaatʋ ndʋ ɛɛwɛ Galilee pɩnaɣ 32 taa yɔ, tɔɔnaɣ pa-taa sakɩyɛ ñɩnaɣ se ɛha-wɛ. Ɛlɛ ɛhɔm pa-lɩmaɣza nɛ ewoni mbʋ pɩ-tɔm cɛyaa nɛ pɩkɩlɩ tɔɔnaɣ yɔ pɩ-yɔɔ, pʋ-tɔbʋʋ se mbʋ pɩpɩzɩɣ pɩsɩnɩ-wɛ nɛ pehiɣ wezuu maatɛŋ yɔ. Halɩ Yesu yɔɔdaa se pakaɣ fezuu mba pasɩba yɔ kɛdɛzaɣ kɩyakʋ wiye nɛ pacaɣ wezuu tam. Pɩtɩkɛ ɛyaa nabɛyɛ pazɩ tɔm ɛyɔɔdaɣ ɛzɩ ɛyɔɔdʋʋ Kɩbaɣlʋ ɖanaɣ tɔɔnaɣ sɔnzɩ taa pʋwayɩ yɔ. Ɛlɛ ɛyɔɔdaɣ wazasɩ nzɩ ɛyaa kpeekpe pɩzɩɣ nɛ pehiɣ yɔ sɩ-tɔm na. w24.12 11 § 10-11

Yehowa paɖɩɣ puuyaɣ tɩnaa. (Keɣ. 11:5) Kɔzɩ kɔzɩ lɛ, ɛpaɖɩɣ abalaa mba palakɩ puuyaɣ lakasɩ pa-halaa yɔ. (Mal. 2:16) Ye walʋ nɔɔyʋ ɛɛlakɩ ɛ-halʋ camɩyɛ lakasɩ yɔ, ɛ nɛ Yehowa pa-taabalɩyɛ sʋʋ kaɖɛ taa. Halɩ pɩpɩzɩɣ piyele nɛ Yehowa eewelisiɣ ɛ-adɩma. (1 Pɩy. 3:7) Walaa nabɛyɛ ñasɩɣ pa-halaa tɔm nɛ peheyiɣ-wɛ tɔm ndʋ tɩɖʋʋ-wɛ ɖɩwɩzɩyɛ yɔ. Yehowa paɖɩɣ «pana, ɖɩwɩzɩyɛ, hola, nɛ tɔm ndʋ tɩɖʋʋ ɖɩwɩzɩyɛ yɔ.» (Efɛz. 4:​31, 32) Walʋ weyi ɛñasɩɣ ɛ-halʋ tɔm yɔ, pɩtasɩna se ɛ-lakasɩ nzɩ sɩcamɩɣ ɛ nɛ ɛ-halʋ pe-nesi ɖɔkʋʋ lɛ, sɩcamɩɣ ɖɔɖɔ ɛ nɛ Yehowa pa-taabalɩyɛ. (Yak. 1:26) Mbʋ ɖɔɖɔ walʋ weyi ɛcɔŋnɩ kʋzʋʋ kɩlɛmɩŋ yɔ, ɛcamɩɣ ɛ nɛ Yehowa pa-taabalɩyɛ. Nɛ eniŋ ɖɔɖɔ ɛ-halʋ. Yehowa sɔɔlaa se walaa ɩtaacɛtɩɣ pa-halaa. Walʋ weyi ɛwɛ siɣsiɣ yɔ ɛɛlakɩ mbʋ pɩtɩtʋʋzɩ yɔ nɛ halʋ lɛlʋ, halɩ pɩtɩmʋna se ɛmaɣzɩ pɩ-yɔɔ paa ññɩɩ. Yesu yɔɔdaa se abalʋ weyi «ɛcɔŋnɩ halʋ nɔɔyʋ nɛ e-liu tɛɛ kɔtʋʋnɩ-ɩ yɔ, ɛtɛm labʋ acɛyɛ nɛ halʋ ɛnʋ, ɛ-laŋɩyɛ taa.»—Mat. 5:​28, 29. w25.01 9 § 6-8

Bibl yɔɔdʋʋ se Yehowa yaɣ ɛ-sɛyaa se siɣsiɣ tɩnaa. Pʋ-tɔbʋʋ lɛ se ɛɛpɔzʋʋ-ɖʋ se ɖɩhɛyɩ ɖa-kɩwɛɛkɩm yɔɔ. Paa Yehowa ɛlakɩ mbʋ yɔ, ɛɛmaɣnɩ e-siɣsiɣ wɛtʋ paɣtʋ kila yɔɔ. Ɛtɩyaa-ɖʋ se siɣsiɣ tɩnaa mbʋ pʋyɔɔ yɔ ɖɩmʋnaa se payaa-ɖʋ se siɣsiɣ tɩnaa. Pɩtasɩ lɛ, ɖa-kɩwɛɛkɩm ɛɛkɛdɩɣnɩ Yehowa. Ɛlɛ Yehowa sɔɔlɩ faaa se ɛkpaɣ ɖa-kɩwɛɛkɩm nɛ ekpeɣ-ɖʋ, mbʋ pʋyɔɔ yɔ mbʋ ɛ nɛ Yesu palaba nɛ pɛhɛyɩ kɩhɛyʋʋ ɖa-ñʋʋ taa yɔ, ɖɩwɛnɩ tisuu pɩ-yɔɔ. (Roma 3:24) Yehowa yaʋ-ɖʋ se siɣsiɣ tɩnaa yɔ, ɛzɩma pɩwazɩɣ-ɖʋ? Mba paya-wɛ se siɣsiɣ tɩnaa yɔ, palɩzɩ pa-taa nabɛyɛ se pa nɛ Yesu pɔtɔɔ kewiyitu ɛsɔdaa nɛ payaa-wɛ se Ɛsɔ piya. (Tiiti 3:7; 1 Yoh. 3:1) Pekpeɣ-wɛ pa-kɩwɛɛkɩm. Pɩwɛ ɛzɩ wiɖiyi patɩla kɩwɛɛkɩm mbʋ nɛ pana yɔ, nɛ piyeba nɛ pamʋna se pakpa ɛsɔdaa. (Roma 8:​1, 2, 30) Mba pɛwɛnɩ lidaʋ se pacakɩ wezuu tɛtʋ yɔɔ yɔ, pekpeɣ-wɛ pa-kɩwɛɛkɩm nɛ payaa-wɛ se siɣsiɣ tɩnaa nɛ papɩsɩ Ɛsɔ taabalaa.—Yak. 2:​21-23. w25.02 5 § 17; 7 § 18

Na apostoloo Pɩyɛɛrɩ kɩɖaʋ. Alɩwaatʋ natʋyʋ, ɛtaawɛɛnɩ Yehowa maɣzɩm tɔm natʋyʋ yɔɔ. Yesu heyi ɛ-apostoloowaa se pɩwɛɛ se ewolo Yeruzalɛm nɛ paɖʋzɩ-ɩ Ɛsɔ sɛtʋ ñʋndɩnaa nesi tɛɛ, panazɩ-ɩ nɛ pʋwayɩ lɛ pakʋ-ɩ. (Mat. 16:21) Pɩɩlabɩ Pɩyɛɛrɩ kaɖɛ se etisi se Yehowa kaɣ haʋ nʋmɔʋ se pakʋ Yesu, pʋ-tɔbʋʋ se Mesiya weyi ɛ-tɔm paayɔɔdaa yɔ nɛ weyi Izrayɛɛlɩ kpeekpe taɣaɣ liu yɔ. (Mat. 16:16) Pʋyɔɔ Pɩyɛɛrɩ kɛzɩ Yesu kɩjaʋ nɛ eheyi-i se: «Kɩbaɣlʋ, ñɩnɩ ña-tɩ kɩbandʋ; pɩɩkaɣ-ŋ talʋʋ mbʋ kpa.» (Mat. 16:22) Pɩyɛɛrɩ taawɛɛnɩ Yehowa maɣzɩm tɔm ndʋ tɩ-yɔɔ, pʋyɔɔ ɛ-lɩmaɣza taala nɔɔ kʋɖʋmaɣ nɛ Yesu ñɩna. Pɩtɩla, Pɩyɛɛrɩ kaawɛnɩ lɩmaɣza kɩbana, ɛlɛ Yesu kizi ɛ-lɔŋ tasʋʋ. Ðɩpɩzɩɣ nɛ ɖɩkpɛlɩkɩ lɔŋ ɛ-kɩɖaʋ taa. Yesu kaanawa se pɩsa nɛ ɛla Yehowa sɔɔlɩm lɛ, pɩpɔzʋʋ se ɛtɔɔ kʋñɔŋ. Alɩwaatʋ ndʋ, Pɩyɛɛrɩ kaakpɛlɩkɩ lɔŋ kɩbaŋ nɩɩyɩ; ɛnɩ lɛ se pɩcɛyaa se eyele nɛ ɛ-lɩmaɣza la nɔɔ kʋɖʋmaɣ nɛ Ɛsɔ ñɩna. w25.03 9 § 5-6

Ŋwɛɛ nɛ ŋnɩɣ siziŋ mbʋ pʋyɔɔ yɔ ɛyʋ weyi ŋtaɣ-ɩ liu yɔ ɛlabɩ nabʋyʋ nɛ pitibi-ŋ yɔɔɔ kpem yaa pɩha-ŋ laŋwɛɛkɩyɛ na? Pɩwɛɛ se ŋtɔzɩ tɔm tʋnɛ tɩ-yɔɔ: Paa ɛbɛ ɛyʋ nɔɔyʋ ɛtɩɩlabɩ-ŋ yɔ, ña-Caa weyi ɛwɛ ɛsɔdaa yɔ ɛsɔɔlɩ-ŋ. Alɩwaatʋ ndʋ ɛyʋ weyi ɖɩtaɣ-ɩ liu yɔ ɛlakɩ nabʋyʋ nɛ pɩha-ɖʋ laŋwɛɛkɩyɛ siŋŋ yɔ, tɔm ndʋ tɩwɛ sɔnɔ evemiye mayaɣ taa yɔ, tɩpɩzɩɣ ɖɔɖɔ nɛ tɩhɛzɩ ɖa-laŋɩyɛ. Tɔm taa tazʋʋ takayaɣ nakɛyɛ yɔɔdaa se tɔm loyaɣ «mba pɛwɛ laŋwɛɛkɩyɛ taa yɔ» tɔbʋʋ pɩzɩɣ nɛ pɩkɛ «mba pɛfɛyɩnɩ lidaʋ nakʋyʋ yɔ.» Ɛzɩma Yehowa sɩɣnɩ mba pɩlakɩ-wɛ mbʋ yɔ? Ɛzɩ caja sɔɔlɩm tʋ nɔɔyʋ kpakʋʋ ɛ-pɩɣa ŋga kɛwɛ laŋwɛɛkɩyɛ taa yɔ nɛ ɛhɛzɩɣ ka-laŋɩyɛ yɔ, mbʋ ɖɔɖɔ Yehowa wɛ ɖɔ-cɔlɔ kpam nɛ ɛnɩɣ ɖe-siziŋ nɛ ɛsɔɔlaa se ɛsɩnɩ-ɖʋ alɩwaatʋ ndʋ ɛyʋ weyi ɖɩtaɣ-ɩ liu yɔ ɛlakɩ nabʋyʋ nɛ pɩha-ɖʋ laŋwɛɛkɩyɛ yɔ, yaa alɩwaatʋ ndʋ ɖilesiɣ nabʋyʋ yɔ. Ɛsɔɔlɩ siŋŋ se ɛhɛzɩ ɖa-laŋɩyɛ nɛ ɛsɩnɩ-ɖʋ nɛ ɖiyele siziŋ nɩʋ. Nɛ ɛha-ɖʋ lidaʋ kɩbaŋʋ ŋgʋ kɩsɩɣnɩ-ɖʋ se ɖɩlʋbɩnɩ kala wena ɖɩkatɩɣ lɛɛlɛɛyɔ yɔ.—Iza. 65:17. w24.12 23 § 13-14

Sɔnɔ, ɛgbɛyɛ taa ɛzʋtʋyaa taa pɩzɩɣ nɛ pɩtɛ se Yehowa naɣ tʋma wena palakɩ yɔ nɛ amʋ ñɩm ɛ-ɛsɩndaa. Pɩtasɩnɩ koobiya yɔɔ kilimuu, tɔm wɩlʋʋ nɛ tɔm susuu tʋmɩyɛ lɛ, ɛzʋtʋyaa sakɩyɛ ɖʋʋ nesi ɛgbɛyɛ kuduyuŋ maʋ tʋma nɛ pasɩɣna ɖɔɖɔ alɩwaatʋ ndʋ asɛyɩŋ lakɩ yɔ. Lalaa kɛ Kʋdɔndɩnaa yɔɔ kilimiyaa yaa pɛwɛ Ðama nɩnʋʋ nɛ ɖɔkɔtɔnaa kɔɔmiteewaa taa. Ɛzʋtʋyaa mba pahaɣ pa-tɩ faaa nɛ palakɩ tʋma ana yɔ, panawa se Yehowa tɩnɩ ɛgbɛyɛ. Palakɩ pa-tʋmɩyɛ nɛ pa-laŋɩyɛ pilim nɛ pa-taa tɛma kiya se Yehowa kaɣ-wɛ hɛyʋʋ mbʋ payɩ palakɩ yɔ pɩ-yɔɔ. (Kol. 3:​23, 24) Ɛyaa tɩŋa ɩɩpɩzɩɣ nɛ pɛkɛ ɛgbɛyɛ taa ɛzʋtʋyaa. Ɛlɛ ɖa-tɩŋa payɩ ɖɩpɩzɩɣ nɛ ɖɩha Yehowa nabʋyʋ. Alɩwaatʋ ndʋ ɖɩlakɩ mbʋ payɩ ɖɩpɩzɩɣ yɔ nɛ ɖɩsɛɣ-ɩ yɔ, pɩkɛdɩɣnɩ-ɩ siŋŋ. Ɛnaɣ haɖɛ nɖɩ ɖɩlakɩ se ɖɩɖʋnɩ nesi ɛjaɖɛ kpeekpe yɔɔ tʋmɩyɛ yɔ, paa ɖɩɩpɩzɩɣ se ɖɩha nɛ pɩɖɔɔ yɔ. Nɛ ɛ-taa lakɩ leleŋ ɖɔɖɔ alɩwaatʋ ndʋ nɔɔyʋ ɖʋʋ-ɖʋ ɖɩwɩzɩyɛ ɛlɛ ɖikpeɣ-i faaa yɔ. Ña-taa ɛtɛ se mbʋ ŋpɩzɩɣ nɛ ŋla yɔ pɩmʋ ñɩm ɛ-ɛsɩndaa. Ɛsɔɔlɩ-ŋ kpem nɛ ɛkaɣ-ŋ hɛyʋʋ pɩ-yɔɔ.—Luka 21:​1-4. w24.06 23 § 12-13

Evebu weyi pɔyɔɔdɩ ɛ-tɔm Aduwa 7 taa yɔ, ɛ-yɔɔ kɛdaɣ wɩlɩɣ mbʋ pɩpɩzɩɣ nɛ pɩtalɩ paa Yehowa sɛyʋ weyi lɛ yɔ. Paa weyi ɛpɩzɩɣ nɛ ɛla kɩwɛɛkɩm sɔsɔm nɛ pʋwayɩ lɛ ɛmaɣzɩ se pɩkɔm tuda. Yaa ɛpɩzɩɣ nɛ ɛyɔɔdɩ se: «Pɩlabɩ kɩlabʋ.» Ɛlɛ ye ɛmaɣzɩ mbʋ pɩlaba yɔ pɩ-yɔɔ yɔ, pʋtɔma ɛkaɣ naʋ se ɛɛkpɛzɩ nɩŋgbanzɩ kɩdɛkɛdɩsɩ nasɩyɩ pʋcɔ nɛ ɛla kɩwɛɛkɩm sɔsɔm mbʋ. Pʋtɔma yɔ ɛɛɖʋ taabalɩyɛ nɛ mba patɩsɔɔlɩ Yehowa yɔ, yaa aleɣya wena ɛlakaɣ yɔ ataamʋna, yaa intɛrnɛɛtɩ lona nɛ ɖenɖe ewokaɣ yɔ, pɩtaamʋnɩ Krɩstʋ tʋ. Pʋtɔma ɖɔɖɔ yɔ, eyebi tɩmʋʋ yaa eyebi Bibl kalʋʋ, kediɣzisi wobu nɛ tɔm susuu. Ɛzɩ evebu weyi pɔyɔɔdɩ ɛ-tɔm Aduwa takayaɣ taa yɔ, ɛ-kɩwɛɛkɩm mbʋ pɩtɩkɔɔ tuda, ɛlɛ nɩŋgbanzɩ nasɩyɩ ɛkpɛzaa pʋcɔ nɛ pɩtalɩ peeɖe. Lɔŋ weyi pɩkpɛlɩkɩɣ-ɖʋ? Pɩtɩkɛ kɩdɛkɛdɩm ɖeke pɩcɛyaa se ɖise, ɛlɛ pɩcɛyaa ɖɔɖɔ se ɖise nɩŋgbanzɩ nzɩ sɩpɩzɩɣ nɛ siwoni-ɖʋ kɩdɛkɛdɩm taa yɔ. Salomɔɔ kɛdɩ mbʋ pɩtalɩ evebu ɛnʋ nɛ halʋ ɛnʋ yɔ pɩ-tɔm nɛ pɩtɛ lɛ, tɔm ndʋ ɖeyi ɖeyi ɛyɔɔdaa.—Mat. 5:​29, 30. w24.07 16 § 10-11

Ɛbɛ ñɩm mbʋ pɩkɛnaa? Pɩkɛ Kewiyaɣ tɔm susuu tʋmɩyɛ nɖɩ ɖɩyakɩ ɛyaa ñʋŋ yɔ. (2 Kɔr. 4:1) Ɛbɛ cʋʋ ñanzɩ kɛnaa? Sɩsɩŋnɩ Ɛsɔ sɛyaa mba posusuu ɛyaa lalaa tɔm kɩbandʋ yɔ. Pɔɔlɩ alɩwaatʋ taa, tadɩyɛ laɖaa ɖʋwaɣ wondu ndʋ tɩmʋ ñɩm yɔ peeɣsi taa; wondu ndʋ tɩ-taa natʋyʋ lɛ tɔɔnasɩ, sʋlʋm nɛ liidiye. Mbʋ ɖɔɖɔ Yehowa ɖʋ-ɖʋ tʋmɩyɛ se ɖisusi tɔm kɩbandʋ ndʋ yɔ, tɩmʋ ñɩm. Yehowa kaɣ-ɖʋ sɩnʋʋ nɛ ɖɩpɩzɩ nɛ ɖihiɣ ɖoŋ weyi pɩpɔzʋʋ-ɖʋ yɔ nɛ ɖiwolo pɩ-yɔɔ nɛ ɖisusuu tɔm ndʋ. Nabʋyʋ taa, sɔɔndʋ pɩzɩɣ nɛ pɩkpa-ɖʋ nɛ ɛyaa, yaa ɖiseɣ sɔɔndʋ se ɛyaa ɩɩkaɣ-ɖʋ welisinuu. Ɛbɛ pɩzɩɣ pɩsɩnɩ-ɖʋ nɛ ɖɩwa kaɖɛ nɖɩ? Maɣzɩ adɩma wena apostoloowaa laba alɩwaatʋ ndʋ paɖʋ-wɛ paɣtʋ se pataasusi tɔm yɔ a-yɔɔ nɛ ŋna. Patiyele nɛ sɔɔndʋ kpa-wɛ nɛ peyele tɔm susuu, ɛlɛ pɔpɔzɩ Yehowa se ɛsɩnɩ-wɛ nɛ powolo pɩ-yɔɔ nɛ posusuu tɔm nɛ abalɩtʋ. Yehowa cosi pa-adɩma yɔɔ kpaagbaa. (Tʋma 4:​18, 29, 31) Ye nabʋyʋ taa ŋseɣ ɛyaa sɔɔndʋ yɔ, pɔzɩ Yehowa se ɛsɩnɩ-ŋ nɛ sɔɔlɩm mbʋ ŋwɛnɩ ɛyaa yɔɔ yɔ pɩkpa ɖoŋ nɛ pɩsa nɛ alɩwaatʋ ndʋ ŋsusuu-wɛ tɔm kɩbandʋ yɔ, sɔɔndʋ ɛtaakpa-ŋ. w24.04 16 § 8-9

Sɔɔlɩm mbʋ ɖɩwɛnɩ Yehowa yɔɔ yɔ piseɣtiɣ-ɖʋ se ɖiyele nɛ ɛ-hɩɖɛ yɔɔ ñalɩ. Pʋ-tɔbʋʋ lɛ se ɖɩsɔɔlaa se ɖiheyi ɛyaa se tɔm ndʋ payɩ Sataŋ yɔɔdɩ Yehowa yɔɔ yɔ tɩkɛ cɛtɩm. (Kiɖe 3:​1-5; Yɔɔb 2:4; Yoh. 8:44) Ðɔ-tɔm susuu taa, ɖɩsɔɔlaa siŋŋ se ɖiheyi ɛyaa mba payɩ pewelisiɣni-ɖʋ yɔ Yehowa yɔɔ toovenim tɩŋa. Ðɩsɔɔlaa se paa weyi ɛtɩlɩ se ɛ-wɛtʋ kɩbandʋ sɔsɔtʋ lɛ sɔɔlɩm, eɖiyiɣ ɛyaa nɛ siɣsiɣ wɛtʋ nɛ toovenim, nɛ pɩkazɩ pazɩ e-Kewiyaɣ kaɣ yebu nɛ kʋñɔmɩŋ tɩŋa sɩɩ tɩnaɣ nɛ ɛyaa wɛɛ laŋhɛzɩyɛ nɛ koboyaɣ taa. (Keɣ. 37:​10, 11, 29; 1 Yoh. 4:8) Ye ɖɩlʋkɩ Yehowa hɩɖɛ yɔɔ ɖɔ-tɔm susuu taa yɔ, ɖɩnɛ ɛlɛ ɖɩwɛɛ nɛ ɖiyeki se ɛ-hɩɖɛ yɔɔ ɛñalɩ. Pɩtasɩ lɛ, ɖa-taa wɛɣ leleŋ mbʋ pʋyɔɔ yɔ ɖɩwɛɛ nɛ ɖɩlakɩ mbʋ pɩpɔzʋʋ se Yehowa Aseɣɖe Tʋ ɛla yɔ. w24.05 18 § 12

Ŋwɩlɩɣ se ‘ŋsɔɔlɩ ɛyaa mʋʋ’ ye ŋlakɩ ɛyaa lalaa kɩbandʋ, pɩkpɛndɩnɩ mba patɩkɛ ña-taabalaa kɩbama yɔ. (1 Pɩy. 4:9) Takayaɣ nakɛyɛ yɔɔdaa se ɛyʋ weyi ɛsɔɔlɩ ɛyaa mʋʋ yɔ ɛlakɩ ɛyaa camɩyɛ lakasɩ, halɩ pɩkpɛndɩnɩ mba ɛɛsɩŋ-wɛ yɔ, nɛ ɛ-taa lakɩ leleŋ se ɛyaa-wɛ nɛ pɔkɔɔ ɛ-tɛ. Pɔzɩ ña-tɩ se: «Ɛyaa lalaa sɩmɩ-m se mɛnkɛ weyi ɛsɔɔlɩ agɔma mʋʋ yɔ?» (Ebr. 13:​2, 16) Ɛyʋ weyi ɛsɔɔlɩ ɛyaa mʋʋ yɔ, ɛlakɩ camɩyɛ lakasɩ ɛyaa tɩŋa, pɩkpɛndɩnɩ kʋñɔndɩnaa nɛ Yehowa sɛyaa mba palakɩ tʋmɩyɛ nɛ kpekpeka yɔ, ɛzɩ egeetiye yɔɔ cɔnɩyaa nɛ koobiya mba palɩɣnɩ agbaa lɛɛna taa nɛ pɔkɔŋ ɛ-ɛgbɛyɛ taa nɛ pɔyɔɔdʋʋ samaɣ taa tɔm yɔ.—Kiɖe 18:​2-8; Adu. 3:27; Tʋma 16:15; Roma 12:13. w24.11 21 § 6

Pɛlaa 10 eduuye taa, Yesu yɔɔdaa se pɛlaa nabɛyɛ 10 lɩwa se pakatɩ asɛyʋ walʋ. (Mat. 25:​1-4) Pa-tɩŋa paasɔɔlaa se pasɩɩ asɛyʋ walʋ e-nesi ɖɔkʋʋ kazandʋ taa. Yesu yɔɔdaa se pa-taa 5 kɛ «lɔŋsɩnɖaa» nɛ 5 kɛ «kɩmɛlɛmɩŋ.» Pɛlaa lɔŋsɩnɖaa kaañɔɔzɩ pa-tɩ nɛ paɖaŋ asɛyʋ walʋ paa pɩkpakaɣ alɩwaatʋ ɛzɩma yɔ, halɩ paa ɛtalɩ ɖoo cɩjɩka taa yɔ. Pʋyɔɔ pɔɖɔkɩ kanɖʋnaa se pɩñandɩ-wɛ cɩkpɛndʋʋ taa. Halɩ paɖʋ num po-kokola taa nɛ pɔɖɔkɩ se ye asɛyʋ walʋ ɛtɩkɔɔ lɔŋ yɔ pɩɩwazɩ-wɛ. Ye mbʋ, paañɔɔzɩ pa-tɩ se pɩsa nɛ pa-kanɖʋnaa wɛɛ mʋʋ yɔɔ. (Mat. 25:​6-10) Asɛyʋ walʋ talaa lɛ, ɛ nɛ pɛlaa lɔŋsɩnɖaa pasʋʋ nesi ɖɔkʋʋ kazandʋ taa. Mbʋ ɖɔɖɔ Krɩstʋ ñɩma patam numwaa mba pacakɩnɩ pɛ-ɛsa nɛ pɔɖɔkɩ pe-siɣsiɣ wɛtʋ nɛ pɩkɔɔ pɩtalɩ alɩwaatʋ ndʋ Krɩstʋ kɔŋ yɔ, pakaɣ-wɛ kpaɣʋ se pamʋnaa se powolo asɛyʋ walʋ Yesu cɔlɔ ɛsɔdaa Kewiyaɣ taa.—Natʋ 7:​1-3. w24.09 21 § 6

Ye ɖɩmaɣzɩɣ ɛzɩma tɔm susuu tʋmɩyɛ sɩɣnɩ ɛyaa sakɩyɛ ɛjaɖɛ kpeekpe yɔɔ yɔ pɩ-yɔɔ yɔ, pɩsɩɣnɩ-ɖʋ nɛ ɖiwolo tɔm susuu yɔɔ nɛ kpekpeka. Paa pɩnaɣ ŋga, ɛyaa miiliyɔɔwaa mba Bibl tɔm kɛdɩnɩ-wɛ yɔ, powoki Yesu sɩm yɔɔ tɔzʋʋ sɔnzɩ taa, nɛ petisiɣ ɖɔɖɔ se ɖa nɛ wɛ ɖɩkpɛlɩkɩ Bibl. Ɛyaa kudokiŋ mɩnɩŋ sakɩyɛ haɣ pa-tɩ nɛ pamɩyɩsɩɣ-wɛ lɩm nɛ pɛkpɛndɩɣ ɖɔ-yɔɔ nɛ ɖisusuu tɔm. Ðɩɩsɩŋ ɛyaa ɛzɩma kaɣ tasʋʋ welisuu tɔm ndʋ ɖisusuu yɔ, ɛlɛ ɖɩnawa se Yehowa wɛɛ nɛ ekpeɣliɣ samaɣ sɔsɔɔ nakɛyɛ; nɛ samaɣ ŋga kakaɣ hiɣu ñʋʋ yabʋ kʋñɔŋ sɔsɔʋ ŋgʋ kɩkɔŋ yɔ kɩ-taa. (Natʋ 7:​9, 14) Hayɩm Tʋ wɛnɩ lidaʋ se pɩkazɩ ɛyaa sakɩyɛ se pakaɣ welisuu tɔm kɩbandʋ, pʋyɔɔ lɛ ɖɩkaɣ wobu pɩ-yɔɔ nɛ ɖisusuu tɔm. (Luka 10:2) Pɩtɩkɛ sɔnɔ pasɩm Yesu tɔmkpɛlɩkɩyaa se pɛwɛ kpekpeka tɔm susuu taa. Ɛyaa kaana ɛzɩma apostoloowaa susaɣ tɔm kaalɛyɩtʋ yɔ lɛ, «peɖiɣzina se pa nɛ Yesu paawɛna.» (Tʋma 4:13) Tɛtɛ nɛ alɩwaatʋ ndʋ ɛyaa naɣ ɖa ɖɔɖɔ tɔm susuu taa yɔ, peɖiɣzina se ɖɩwɛ kpekpeka ɛzɩ Yesu yɔ. w25.03 18 § 15; 19 § 17-18

Bibl wɩlɩɣ-ɖʋ se Yehowa maɣzɩɣ ɛyaa mba lalaa kpakɩɣ-wɛ se patɩlɩɩ pʋyʋ yɔ pɔ-yɔɔ. Kɩɖaʋ nakʋyʋ yɔ: Yehowa kaatiyi nayʋ Samɩyɛɛlɩ se ewolo Yesee ɖɩɣa taa nɛ ɛtaa num ɛ-pɩyalʋ nɔɔyʋ nɛ ɛlɛ tɔɔ kewiyitu Izrayɛɛlɩ yɔɔ. Yesee ya ɛ-pɩyalaa 7 nɛ ɛwɩlɩ-wɛ Samɩyɛɛlɩ, ɛlɛ ɛtɩyaa ɛ-pɩyalʋ kɛdɛzaɣ ñɩnʋ Daviid. Paa mbʋ yɔ, Daviid Yehowa kaalɩzaa. (1 Sam. 16:​6, 7, 10-12) Yehowa naɣaɣ ɛyʋ weyi Daviid kaakɛnɩ ɖooo ɛ-taa kiŋ yɔ. Ɛɛnawa se pɩɣa evelaɣ ŋga, kɔsɔɔlɩ-ɩ siŋŋ. Maɣzɩ ɛzɩma Yehowa tɛm wɩlʋʋ se ɛmaɣzɩɣ ñɔ-yɔɔ yɔ pɩ-yɔɔ. Ɛtasɩɣ-ŋ lɔŋ kɩbaŋ weyi ɩlakɩ nɔɔ kʋɖʋmaɣ ɖeyi ɖeyi nɛ wɛtʋ ndʋ tɩ-taa ŋwɛɛ yɔ. (Keɣ. 32:8) Ɛzɩma ɛpɩzɩɣ nɛ ɛla mbʋ ye ɛtɩsɩmɩ-ŋ camɩyɛ yɔ? (Keɣ. 139:1) Ye ŋɖɔŋ Yehowa lɔŋ tasʋʋ yɔɔ nɛ ŋnaɣ ɛzɩma pɩwazɩɣ-ŋ yɔ, ña-taa kaɣ tɛm se Yehowa maɣzɩɣ ñɔ-yɔɔ. (1 Kro. 28:9; Tʋma 17:​26, 27) Yehowa naɣ pana wena payɩ ŋñakɩ se ŋsɛɛ-ɩ nɛ ŋñamɩ-ɩ yɔ. Ɛnaɣ ñɛ-wɛtʋ kɩbandʋ nɛ ɛsɔɔlaa se ɛkɛ ña-taabalʋ.—Yer. 17:10. w24.10 25-26 § 7-9

Pɩtʋʋ fɛyɩ se ŋsɔɔlɩ Yehowa nɛ ŋsɔɔlaa ɖɔɖɔ se ŋɖʋ ño-koobiya lɩm. Ɛbɛ pɩzɩɣ pɩsɩnɩ-ŋ nɛ ŋsɔɔlɩ se ŋpɩsɩ ɛgbɛyɛ taa tʋmlaɖʋ? Maɣzɩ taa leleŋ weyi ŋhikiɣ alɩwaatʋ ndʋ ŋlakɩ tʋmɩyɛ nɛ pɩwazɩ ño-koobiya yɔ ɩ-yɔɔ. Yesu yɔɔdaa se: «Taa leleŋ wɛ haʋ taa nɛ pɩkɩlɩ mʋʋ taa.» (Tʋma 20:35) Nɛ ɛ-maɣmaɣ ɛɖɔm tɔm ndʋ tɩ-yɔɔ. Ehiɣ taa leleŋ siŋŋ alɩwaatʋ ndʋ ɛɖʋwaɣ lalaa lɩm yɔ. Iyele nɛ ɖɩna kɩɖaʋ nakʋyʋ Maarɩkɩ 6:​31-34 taa. Kɩyakʋ ŋgʋ, pɩɩnɩ Yesu nɛ ɛ-apostoloowaa. Paawɛɛ nɛ powoki lone naɖɩyɛ taa se pɛhɛzɩ. Ɛlɛ samaɣ nakɛyɛ ɖɛɛ-wɛ nɔɔ, kañɩnaɣ se Yesu ɛkɔɔ nɛ ɛwɩlɩ-kɛ tɔm. Ɛpɩzaɣ se ekizi, mbʋ pʋyɔɔ yɔ ɛ nɛ ɛ-apostoloowaa «pataahiɣ alɩwaatʋ se pɔtɔɔ tɔɔnaɣ maɣmaɣ.» Yaa Yesu pɩzaɣ se ɛwɩlɩ-kɛ tɔm pazɩ yem nɛ eyele-kɛ nɛ kɛɖɛɛ. Ɛlɛ sɔɔlɩm tuyi-i nɛ «ɛpaɣzɩ-kɛ tɔm wɩlʋʋ», pɩkɔɔ pɩtalɩ alɩwaatʋ ndʋ «wɩsɩ caɣaɣ ɖʋʋ» yɔ.—Mark. 6:35. w24.11 16 § 9-10

Seɣti ña-pɩɣa nɛ kañɩnɩ wala wena a-yɔɔ kapɩzɩɣ katɩŋna nɛ keheyi lalaa Bibl taa toovenim tɔm yɔ. (Roma 10:10) Ŋpɩzɩɣ nɛ ŋkpaɣ pana wena kañakɩ se kɔyɔɔdɩ ke-tisuu yɔɔ tɔm yɔ nɛ ŋmaɣzɩnɩ pana wena ɛyʋ ñakɩ alɩwaatʋ ndʋ ɛkpɛlɩkɩɣ minziiki mabʋ yɔ. Kiɖe tɛɛ lɛ, ɛyʋ ɛnʋ ɛkpɛlɩkɩɣ minziiki ŋgʋ kɩwɛ kɛlɛʋ yɔ kɩ-mabʋ. Alɩwaatʋ kaaɖɛɣ lɛ, minziiki mabʋ wɛɣ-ɩ kɛlɛʋ nɛ pɩkɩlɩ. Mbʋ ɖɔɖɔ, kiɖe tɛɛ lɛ, pɩɣa nakɛyɛ pɩzɩɣ nɛ katɩŋnɩ nʋmɔʋ ŋgʋ kɩwɛ kɛlɛʋ yɔ kɩ-yɔɔ nɛ keheyi lalaa ke-tisuu yɔɔ tɔm. Kɩɖaʋ nakʋyʋ yɔ: Kapɩzɩɣ nɛ kɔpɔzɩ ko-sukuli taa taabalʋ nɔɔyʋ se: «Ŋnawa se ɖoŋ ɖoŋ lɛ, kedeŋa yɔɔ wondu lɛɣtʋ ñɩnɩyaa cɔŋna nɛ poluki wondu na? Yele nɛ mawɩlɩ-ŋ video kɩbaŋʋ nakʋyʋ.» Kawɩlɩɣ-ɩ Palɩzɩ-kʋ yaa kɩlɩ kɩ-tɩ yɔɔ? tɛ video nakʋyʋ nɛ pɩtɛ lɛ, kapɩzɩɣ nɛ kɔyɔɔdɩ se: «Ye pasaŋ lɛɣtʋ ñɩnɩyaa mba pɔcɔnɩ kedeŋa yɔɔ wonuu nakʋyʋ nɛ palɩzɩ nabʋyʋ yɔ, anɩ pɩwɛɛ se pasa wondu ndʋ tɩwɛ kedeŋa yɔɔ yɔ tɩ-yɔɔ?» Tɔm kɛlɛʋ ñɩndʋ ndʋ, tɩpɩzɩɣ nɛ tiseɣti pɩɣa evelaɣ nakɛyɛ nɛ kɔsɔɔlɩ se katɩlɩ Yehowa yɔɔ tɔm nɛ pɩkɩlɩ. w24.12 19 § 17-18

Pɩsa nɛ Yehowa lɩzɩ-ɖʋ kɩwɛɛkɩm nɛ sɩm pe-nesi tɛɛ lɛ, ɛlabɩ ɖʋtʋ se Yesu ɛkɔɔ nɛ ɛhɛyɩ kɩhɛyʋʋ pʋ-ñʋʋ taa. Ɛlɛ ɛzɩma ɛyʋ kʋɖʋm kɩlaʋ pɩzɩɣ nɛ kɩya ɛyaa miiliyɔɔwaa ñʋʋ? Apostoloo Pɔɔlɩ lɩzɩ pɩ-taa se: «Ɛzɩ ɛyʋ kʋɖʋm [Aɖam] kaañamtʋ yebu nɛ ɛyaa sakɩyɛ pɩsɩ kɩwɛɛkɩm laɖaa yɔ, mbʋ ɖɔɖɔ ɛyʋ kʋɖʋm [Yesu] ñamtʋ kaɣ yebu nɛ ɛyaa sakɩyɛ pɩsɩ siɣsiɣ tɩnaa.» (Roma 5:19; 1 Tim. 2:6) Tobi lɛ, ɛyʋ kʋɖʋm kaañamtʋ yebina nɛ ɖɩpɩsɩ kɩwɛɛkɩm nɛ sɩm yomaa, nɛ ɛyʋ ɛnʋ ɛɛtalɩ pilim. Pʋyɔɔ lɛ, ɛyʋ kʋɖʋm ñamtʋ pɩpɔzʋʋ se pɩsa nɛ ɖɩlɩɩ yomiye nɖɩ ɖɩ-taa, nɛ pɩwɛɛ se ɛyʋ ɛnʋ ɖɔɖɔ ɛtalɩ pilim. Yehowa taapɩzɩɣ se ɛkpaɣ lɩmaɣzɩyɛ kɛlɛʋ yem se Aɖam lʋlʋʋ taa ñɩma mba pañaŋɩ-ɩ yɔ pacaɣ wezuu tam? Ɛyaa mantɩtalɩ pilimwaa pɩzɩɣ nɛ pamaɣzɩ se ye Ɛsɔ ɛɛkpaɣ lɩmaɣzɩyɛ nɖɩ yɔ pɩɩwɛ ɖeu. Ɛlɛ lɩmaɣzɩyɛ nɖɩ ɖɩɩlakɩ nɔɔ kʋɖʋmaɣ nɛ Yehowa siɣsiɣ wɛtʋ. Yehowa wɛ siɣsiɣ, pʋyɔɔ ɛtaapɩzɩɣ se ehuuzi ɛsa Aɖam kaañamtʋ lakasɩ yɔɔ. w25.01 21 § 3-4

Alɩwaatʋ natʋyʋ, apostoloo Pɔɔlɩ ɖiɣzinaa se piileɖiɣ lɛ pakʋʋ-ɩ. Paa mbʋ yɔ, ɛ-taa kaawɛ leleŋ kpem nɛ wezuu ŋgʋ ɛcaɣaa yɔ. Ɛtɔzɩ mbʋ pɩlabɩ e-wezuu caɣʋ taa yɔ pɩ-yɔɔ lɛ, ɛyɔɔdɩ se: «Mense seya nɛ mɛntɛm-yɛ, mɔnɖɔkɩ tisuu.» (2 Tim. 4:​6-8) Pɔɔlɩ kpaɣʋ lɩmaɣzɩyɛ se ɛlakɩ Yehowa tʋmɩyɛ e-wezuu caɣʋ taa yɔ, pɩɩkɛnɩ lɩmaɣzɩyɛ kɩbanɖɛ nɛ ɛ-taa kaatɛma se Yehowa taa wɛnɩ-ɩ nɛ leleŋ. Ða ɖɔɖɔ ɖɩsɔɔlaa se ɖɩkpaɣ lɩmaɣza kɩbana nɛ ɖɔ-tɔm kɛdɩnɩ Yehowa. Ɛzɩma ɖɩpɩzɩɣ nɛ ɖɩtalɩ kaɖʋwa ŋga? Pɔɔlɩ yɔɔdɩ ɛ nɛ Krɩstʋ mba siɣsiɣ tɩnaa pɔ-tɔm se: «Ðɩɖɔŋnɩ tisuu, ɖɩɩɖɔŋnɩ mbʋ pɩnaɣ yɔ.» Suwe ɛñɩnaɣ yɔɔdʋʋ? Nabʋyʋ taa, Bibl lakɩnɩ tʋmɩyɛ tɔm piye «ɖɔnɛ» se kɩwɩlɩ wezuu ŋgʋ nɔɔyʋ lɩzɩɣ se ɛcakɩ yɔ. Ɛyaa mba ‘pɔɖɔŋnɩ mbʋ pɩnaɣ yɔ,’ mbʋ panaɣ, ndʋ panɩɣ nɛ ɛzɩma pɩlakɩ-wɛ yɔ pi-ɖeke piɖiyiɣni-wɛ nɛ pakpakɩɣ lɩmaɣza. Ɛlɛ mba ‘pɔɖɔŋnɩ tisuu’ yɔ, pataɣ Ɛsɔ Yehowa liu, nɛ mbʋ ɖiyiɣni-wɛ pa-lɩmaɣza kpaɣʋ taa. Pa-lakasɩ wɩlɩɣ se pa-taa tɛma se Ɛsɔ kaɣ-wɛ hɛyʋʋ, nɛ pa-taa tɛma ɖɔɖɔ se ye pɔɖɔŋ Yehowa lɔŋ tasʋʋ mbʋ pɩwɛ Bibl taa yɔ pɩ-yɔɔ yɔ, pɩkaɣ-wɛ wazʋʋ.—Keɣ. 119:66; Ebr. 11:6. w25.03 20 § 1-2

Ðooo lɛ, ɛyaa sakɩyɛ kaawɛ puuyaɣ, paawɛ ñaŋ yaa pataawɛɛ toovenim. Ɛlɛ Ɛsɔ fezuu sɩnɩ-wɛ nɛ pɛlɛɣzɩ pe-wezuu caɣʋ. (Iza. 65:25) Pañaɣ pana siŋŋ nɛ peyele wɛtʋ kɩdɛkɛdɩtʋ ndʋ paawɛna yɔ. (Efɛz. 4:​22-24) Paa mbʋ yɔ, ɖa Ɛsɔ sɛyaa ɖɩtɩtalɩ pilim, pʋyɔɔ lɛ pɩkaɣ-ɖʋ yʋsɩnʋʋ. Ɛlɛ Yehowa kpɛndɩ «ɛyaa ndɩ ndɩ» sɔɔlɩm tomiye nɖɩ ɖɩcɛyɩsɩ camɩyɛ yɔ ɖɩ-taa nɛ laŋhɛzɩyɛ taa. (Tiiti 2:11) Ɛsɔ ɖoŋ tɩŋa tʋ ɖeke pɩzɩɣna nɛ ɛla piti lakasɩ nzɩ. Tɔm ndʋ Yehowa yɔɔdʋʋ yɔ tɩlakɩ paa ɛzɩmtaa. (Iza. 55:​10, 11) Fezuu taa paradisuu tɛm wɛʋ. Yehowa ha-ɖʋ koobiya hɔʋ ŋgʋ kɩwɛ ŋgee yɔ. Ðɩwɛ laŋhɛzɩyɛ nɛ pɛɛyɛ taa ɖɔ-hɔʋ ŋgʋ kɩ-taa, paa puuyaɣ lakasɩ isu ɛjaɖɛ yɔɔ yɔ. (Keɣ. 72:7) Pʋyɔɔ lɛ, ɖɩsɔɔlaa se ɖɩsɩnɩ ɛyaa sakɩyɛ nɛ pɛkpɛndɩ ɖɔ-yɔɔ hɔʋ ŋgʋ kɩ-taa. Ðɩpɩzɩɣ nɛ ɖɩla mbʋ ye ɖɩkaŋ ñʋʋ nɛ kpɛlɩkɩyaa labʋ tʋmɩyɛ yɔ.—Mat. 28:​19, 20. w24.04 23 § 13, 15

Yesu kaasɔɔlɩ Yehowa nɛ ɛ-maɣzɩm pilim. Ɛɛsɩm mbʋ Yehowa sɔɔlaa se ɛla yɔ nɛ ɛɛtɛm ɛ-taa se ɛlakɩ-pʋ paa pɩɩwɛɛ se ɛtɔɔ kʋñɔŋ yɔ. Yesu kaakam ñʋʋ nɛ ɛ-Caa sɔɔlɩm labʋ, pʋyɔɔ etiyele se nabʋyʋ ɛɖɩɣ-ɩ nʋmɔʋ se ɛtaatalɩ kaɖʋwa ŋga. Pɩyɛɛrɩ nɛ apostoloowaa lalaa paahiɣ waɖɛ nɛ pa nɛ Yesu pacaɣ nɛ patɩlɩ ɖɔɖɔ ɛ-maɣzɩm. Alɩwaatʋ ndʋ fezuu kiɖeɖeu sɩnɩ Pɩyɛɛrɩ nɛ ɛma ɛ-kajalaɣ takayaɣ yɔ, eseɣti Krɩstʋ mba se pɛwɛɛnɩ maɣzɩm mbʋ Krɩstʋ wɛna yɔ. (1 Pɩy. 4:1) Kiɖe tɛɛ kʋnʋŋ taa lɛ, tɔm loyaɣ ŋga Pɩyɛɛrɩ labɩnɩ tʋmɩyɛ nɛ pɛɖɛzɩ-kɛ se «ɩwɛɛnɩ» yɔ, kawɩlɩɣ ɛzɩma sɔɔjanaa kpakɩɣ you wondu se pala you yɔ. Ye mbʋ, ye Krɩstʋ mba ɩwɛnɩ Yesu maɣzɩm yɔ, pakaɣ wɛnʋʋ mbʋ payɩ pɩpɔzʋʋ-wɛ yɔ se pɩsa nɛ pakaɖɩnɩ mbʋ piseɣtiɣ-wɛ se pala kɩdɛkɛdɩm yɔ nɛ palʋbɩnɩ ɖɔɖɔ Sataŋ ɛjaɖɛ.—2 Kɔr. 10:​3-5; Efɛz. 6:12. w25.03 8-9 § 1-3

Tɔm ndʋ pɩpɔzʋʋ se ŋtɩlɩ ña-ɖaŋ yɔɔ alɩwaatʋ ndʋ ɩɖanɩɣ ɖama yɔ? Pʋcɔ nɛ mɩ-sɔɔlɩm kpa ɖoŋ lɛ, pɩtɩla pɩwɛɣ ɖeu se ɩtɩlɩ ɖama yɔɔ tɔm kɩcɛyɩtʋ ɛzɩ mɩ-kaɖʋsɩ mbʋ yɔ. Ɛbɛ ŋpɩzɩɣ ŋla nɛ ŋtɩlɩ weyi ña-ɖaŋ kɛnaa ɖeyi ɖeyi yɔ? Ŋpɩzɩɣ nɛ ŋpɔzɩ-ɩ tɔm, nɛ pʋwayɩ lɛ ŋwelisini-i camɩyɛ. Pɩpɔzʋʋ se mɩ-naalɛ ɩyɔɔdɩ ɛzɩma ɖeyi ɖeyi pɩlakɩ-mɩ yɔ nɛ iheyi ɖama toovenim. (Yak. 1:19) Pɩsa nɛ ɩla mbʋ lɛ, pɩtɩla pɩwɛɣ ɖeu se ɩlakɩ tʋma wena ayeki se ɩyɔɔdɩnɩ ɖama yɔ. Ɩpɩzɩɣ nɛ ɩkpɛndɩ nɛ ɩtɔɔ tɔɔnaɣ, ɩɖɔ ɖenɖe ɛyaa wɛɛ yɔ yaa isusi tɔm. Ɩpɩzɩɣ ɖɔɖɔ nɛ ɩtɩlɩ ɖama alɩwaatʋ ndʋ mɩ nɛ mɩ-taabalaa nɛ mɩ-hɔʋ taa mba ɩwɛɣ yɔ. Pɩtasɩ lɛ, ɩla tʋma wena ayeki nɛ ɩtɩlɩ ɛzɩma lɛlʋ lakɩ wɛtʋ ndɩ ndɩ taa yaa ɛyaa ndɩ ndɩ hɛkʋ taa yɔ. w24.05 27-28 § 6-7

Pɩkazɩ pazɩ lɛ, ɖɩkaɣ katʋʋ kala siŋŋ nɛ pɩkaɣ pɔzʋʋ kpem se ɖɩtaa Yehowa liu nɛ pɩkɩlɩ. Bibl taa kɛdɛsɩ nɛ ɖa-alɩwaatʋ taa Yehowa sɛyaa tɔm pɩzɩɣ nɛ pɩsɩnɩ-ŋ nɛ ŋna ɛzɩma Yehowa sɩnɩ ɛ-sɛyaa yɔ. Maɣzɩ kɛdɛsɩ nzɩ sɩ-yɔɔ siŋŋ. Ye ŋlakɩ mbʋ yɔ, pɩkaɣ-ŋ sɩnʋʋ nɛ ŋyele nɛ Yehowa pɩsɩ ña-Kaaʋ. Pɩkaɣ-ŋ sɩnʋʋ nɛ ŋkpazɩ ño-koobiya ɖoŋ. Kɩɖaʋ nakʋyʋ yɔ: Yesu ha Siimɔɔ hɩɖɛ se Sefaasɩ (pʋ-tɔbʋʋ se «Pɩyɛɛrɩ»), nɛ pʋ-tɔbʋʋ lɛ se «Kaaʋ hɔɔlaɣ.» (Yoh. 1:42) Pɩwɩlɩɣ se Pɩyɛɛrɩ kaɣ hɛzʋʋ lalaa laŋa ɛgbɛyɛ taa nɛ ɛkpazɩ pe-tisuu ɖoŋ. Paya ɛgbɛyɛ taa ɛzʋtʋyaa se «kaaʋ sɔsɔʋ kuzotuu.» Pɩwɩlɩɣ se pakandɩyɩɣ mba pɛwɛ ɛgbɛyɛ taa yɔ pɔ-yɔɔ. (Iza. 32:2) Ɛlɛ ye ɛgbɛyɛ taa koobiya tɩŋa ɩmaɣzɩɣnɩ Yehowa wɛtʋ kɩbandʋ ndʋ tɩnɩɣzɩnɩ kaaʋ yɔ, pɩwazɩɣ ɛgbɛyɛ kpeekpe. w24.06 28 § 10-11

Izrayɛɛlɩ awiya wena Yehowa kaakpaɣaa se aawɛ siɣsiɣ yɔ, aañɔnɩ toovenim Ɛsɔ sɛtʋ. Yehowa kaakpaɣ awiya naayɛ se afɛyɩ siɣsiɣ mbʋ pʋyɔɔ yɔ aakizi Yehowa paɣtʋ yɔɔ ɖɔm nɛ apaɣzɩ sɛʋ cɛtɩm ɛsɔnaa. (1 Awi. 21:​25, 26; 2 Kro. 12:1) Ɛbɛ yɔɔ Ɛsɔ sɛtʋ tɔm kaacɛyɩ Yehowa ɛsɩndaa mbʋ? Lɩmaɣzɩyɛ naɖɩyɛ lɛ se wiyaʋ sʋʋtʋ pɩɩkɛnaa se ɛsɩnɩ Ɛsɔ samaɣ nɛ kɛsɛɛ-ɩ ɛzɩ pɩpɔzʋʋ yɔ. Pɩtasɩ lɛ, alɩwaatʋ ndʋ samaɣ sɛɣ cɛtɩm ɛsɔnaa yɔ, pituyuu-kɛ se kala kɩwɛɛkɩm sɔsɔm lɛɛbʋ nɛ kala lalaa lakasɩ kɩdɛkɛdɩsɩ. (Ozee 4:​1, 2) Pɩtasɩ ɖɔɖɔ lɛ, Izrayɛɛlɩ awiya nɛ Izrayɛɛlɩ mba paaha pa-tɩ Yehowa. Pʋyɔɔ alɩwaatʋ ndʋ peyeki Yehowa sɛʋ nɛ pɛsɛɣ cɛtɩm ɛsɔnaa yɔ, Bibl yɔɔdʋʋ se palabɩ acɛyɛ. (Yer. 3:​8, 9) Ɛyʋ weyi ɛlakɩ acɛyɛ yɔ, ɛyʋsʋʋnɩ ɛ-tɛŋga nɛ ɛɖʋʋ-kɛ wɩzasɩ siŋŋ. Mbʋ ɖɔɖɔ alɩwaatʋ ndʋ ɛyʋ weyi ɛha ɛ-tɩ Yehowa yɔ ɛɖʋʋ nesi cɛtɩm Ɛsɔ sɛtʋ yɔ, ɛyʋsʋʋnɩ Yehowa nɛ ɛɖʋʋ-ɩ wɩzasɩ siŋŋ.—Wp. 4:23. w24.07 22-23 § 12-15