Novembre

Ɛzʋtʋyaa maɣzɩɣnɩ Yehowa pʋtɔdɩyɛ naʋ alɩwaatʋ ndʋ pasɩɣnɩ ɛyʋ weyi palɩzɩ-ɩ ɛgbɛyɛ taa yɔ. Caanaʋ taa, Yehowa taaɖaŋ se Izrayɛɛlɩ mba ikpiɖi pʋcɔ nɛ ɛsɩnɩ-wɛ. Ɛlɛ ɛkpɛzɩ nɩŋgbanzɩ nzɩ pɩpɔzʋʋ yɔ nɛ ɛsɩnɩ-wɛ paa pataawɩlɩɣ se pɔsɔɔlɩ kpiɖuu yɔ. Ðɩnawa se Yehowa heyi Ozee se ɛkpaɣ nɛ ekpeɣ ɛ-halʋ nɛ ɛpɩsɩnɩ-ɩ paa ɛlɛ kaawɛɛ nɛ ɛlakɩ kɩwɛɛkɩm mbʋ yɔ. Yehowa tɩŋnɩ kɩɖaʋ ŋgʋ kɩ-yɔɔ nɛ ɛwɩlɩ se ɛnʋ kɛ pʋtɔdɩyɛ nayʋ siŋŋ. (Ozee 3:1; Mal. 3:7) Ɛgbɛyɛ taa ɛzʋtʋyaa pɩzɩɣ nɛ pamaɣzɩnɩ Yehowa nɛ pɔsɔɔlɩ siŋŋ se kɩwɛɛkɩm laɖʋ ɛpɩsɩ, nɛ paayeki nɛ pɩwɛɛ-ɩ kaɖɛ se ɛpɩsɩ. Pɩɣa kilebaɣ eduuye nɖɩ Yesu tuwaa yɔ ɖɩ-taa caja ‘sewa nɛ ewolo ekpi ɛ-pɩyalʋ nɛ ɛkpɛlɩ ɛ-yɔɔ nɛ sɔɔlɩm.’ (Luka 15:20) Caja tɩɖaŋ se ɛ-pɩyalʋ ɛpɔzɩ se ɛkpaɣ nɛ ekpeɣ-i. Ɛlɛ ɛnʋ calɩnɩ kpɛzʋʋ nɩŋgbaŋaɣ mbʋ pʋyɔɔ yɔ ɛsɔɔlɩ-ɩ. w24.08 28 § 7-8

Ɛzɩ evemiye mayaɣ taa tɔm wɩlʋʋ yɔ, Yehowa ɛɛsɩɣnɩ ɛ-tɩ ɛ-lɔŋsɩnɖɛ. Ɛhaɣ-ɖɩ ɛyaa faaa. Yʋsɩ ɖɔɖɔ se alɩwaatʋ ndʋ Yehowa haɣ ɛyaa ɛ-lɔŋsɩnɖɛ yɔ, «ɛɛkalɩɣ» yaa «ɛɛnaɣ kɩwɛɛkɩtʋ natʋyʋ.» Ɛtɩsɔɔlɩ kaaʋ se pɩcɛyɩ-ɖʋ alɩwaatʋ ndʋ ɖɩpɔzʋʋ-ɩ se ɛwɩlɩ-ɖʋ nʋmɔʋ yɔ. Toovenim taa lɛ, eseɣtiɣ-ɖʋ se ɖɩpɔzɩ-ɩ lɔŋsɩnɖɛ. (Adu. 2:​1-6) Nɛ ɖa yɔ, ɖɩpɩzɩɣ nɛ ɖɩmaɣzɩnɩ Yehowa nɛ ɖɩlabɩnɩ tʋmɩyɛ ɖɔ-lɔŋsɩnɖɛ nɛ pɩsɩnɩ lalaa na? (Keɣ. 32:8) Yehowa sɛyaa wɛnɩ wala sakɩyɛ se pawɩlɩ lalaa mbʋ pɛkpɛlɩkaa yɔ. Kɩɖaŋ nɩɩyɩ yɔ: Ðoŋ ɖoŋ lɛ, ɖɩfalɩsɩɣ tɔm susuyaa kɩfama tɔm susuu taa. Ɛgbɛyɛ taa ɛzʋtʋyaa ɖʋʋ suuɖu nɛ pasɩɣnɩ ɛgbɛyɛ taa tʋmlaɖaa nɛ koobiya abalɩñɩma mba pamɩyɩsɩ-wɛ lɩm yɔ se patɩlɩ ɛzɩma pala pa-tʋma ɛgbɛyɛ taa yɔ. Nɛ koobiya mba pɛwɛ niye kuduyuŋ maʋ nɛ ɩ-ñɔɔzʋʋ taa yɔ, pasɩɣna nɛ pafalɩsɩɣ mba pɛfɛyɩ niye yɔ se pala tʋma teokrasɩ kuduyuŋ maʋ nɛ ɩ-ñɔɔzʋʋ tʋmɩyɛ taa. w24.09 28-29 § 11-12

Koobiya abalɩñɩma, pʋcɔ nɛ ɛyʋ pɩsɩ ɛgbɛyɛ taa ɛzʋtʋyʋ lɛ, pɩwɛɛ se ɛkɛ «weyi ɛfɛyɩnɩ kɩwɛɛkɩtʋ natʋyʋ yɔ,» pʋ-tɔbʋʋ se pɩwɛɛ se ɛwɛɛnɩ hɩɖɛ kɩbanɖɛ ɛgbɛyɛ taa, ɖɩnɛ ɛlɛ paapɩzɩɣ nɛ pɔyɔɔdɩ tɔm kɩdɛkɛdɩtʋ natʋyʋ e-wezuu caɣʋ yɔɔ. (1 Tim. 3:2) Pɩtasɩ lɛ, pɩwɛɛ se ‘awayɩ mba ɩlɩzɩ ɛ-yɔɔ aseɣɖe kɩbanɖɛ.’ Mba paasɛɣ Yehowa yɔ, papɩzɩɣ nɛ pɔyɔɔdɩ tɔm kɩdɛkɛdɩtʋ ñe-tisuu yɔɔ, ɛlɛ pɩfɛyɩ kpa se pehiɣ waɖɛ nɛ pɔyɔɔdɩ se ŋfɛyɩ toovenim yaa ŋŋcakɩ wezuu kɩbaŋʋ. (Dan. 6:​4, 5) Pɔzɩ ña-tɩ se: «Mɛwɛnɩ hɩɖɛ kɩbanɖɛ ɛgbɛyɛ taa mba nɛ awayɩ mba ɛsɩndaa?» Ye ŋkɛ «kɩbandʋ sɔɔlɩyʋ» yɔ, ŋkaɣ naʋ wɛtʋ kɩbandʋ ndʋ ɛyaa lalaa wɛna yɔ nɛ ŋsam-wɛ tɩ-yɔɔ. (Tiiti 1:8) Pɩtasɩ lɛ, ña-taa lakɩ leleŋ se ŋla ɛyaa lalaa kɩbandʋ, halɩ ŋpɩzɩɣ ŋla nɛ pɩcɛzɩ mbʋ pɩ-yɔɔ lalaa pɩzɩɣ nɛ pamaɣzɩ yɔ. Ɛbɛ yɔɔ pɩcɛyaa se ɛzʋtʋyaa ɩwɛɛnɩ wɛtʋ kɩbandʋ ndʋ? Mbʋ pʋyɔɔ yɔ pɩkaɣ pɔzʋʋ se pakpaɣ pa-alɩwaatʋ sakɩyɛ nɛ pekilimi koobiya yɔɔ nɛ palakɩ ɛgbɛyɛ taa tʋma. (1 Pɩy. 5:​1-3) Paa pɩ-labʋ ɛkpakɩɣ-wɛ alɩwaatʋ sakɩyɛ mbʋ yɔ, pehikiɣ taa leleŋ siŋŋ mbʋ pʋyɔɔ yɔ pasɩɣnɩ ɛyaa lalaa.—Tʋma 20:35. w24.11 20-21 § 3-5

Ɛgbɛyɛ taa tʋmlaɖaa lakɩ tʋma wena a-tɔm cɛyaa yɔ agbaa taa. Koobiya abalɩñɩma siɣsiɣ tɩnaa mba, pa-tʋmɩyɛ kaamʋ ñɩm apostoloo Pɔɔlɩ ɛsɩndaa. Pʋyɔɔ alɩwaatʋ ndʋ ɛɛma takayaɣ Krɩstʋ ñɩma mba pɛwɛ Filiipi yɔ, ɛɛsɛ kɔzɩ kɔzɩ ɛgbɛyɛ taa tʋmlaɖaa nɛ ɛgbɛyɛ taa ɛzʋtʋyaa. (Filp. 1:1) Koobiya abalɩñɩma sakɩyɛ mba pɛkɛ ɛgbɛyɛ taa tʋmlaɖaa yɔ, pehikiɣ taa leleŋ sɔsɔŋ tʋmɩyɛ nɖɩ ɖɩ-taa, paa pɛkɛ evebiya yaa akpadɩyaa yɔ. Kɩɖaŋ nɩɩyɩ yɔ: Payaɣ koobu nɔɔyʋ se Devan. Ɛɛpɩsɩ ɛgbɛyɛ taa tʋmlaɖʋ alɩwaatʋ ndʋ ɛɛwɛnɩ pɩnzɩ 18 yɔ. Payaɣ koobu lɛlʋ se Luis; ɛlɛ pɩsɩ ɛgbɛyɛ taa tʋmlaɖʋ alɩwaatʋ ndʋ ɛcɛzɩ pɩnzɩ 50 yɔ. Suwe ɛmaɣzɩɣ tʋmɩyɛ nɖɩ ɖɩ-yɔɔ? Ɛyɔɔdaa se: «Man-taa wɛ leleŋ pɩdɩɩfɛyɩ se mantɩŋɩɣnɩ nʋmɔʋ ŋgʋ kɩ-yɔɔ nɛ manɖʋʋ lɩm mon-koobiya ɛgbɛyɛ taa. Paawɩlɩ-m sɔɔlɩm pɩdɩɩfɛyɩ, nɛ lɛɛlɛɛyɔ lɛ manpɩzɩɣ nɛ mawɩlɩ-wɛ ɖɔɖɔ sɔɔlɩm.» Mbʋ ɖɔɖɔ ɛgbɛyɛ taa tʋmlaɖaa sakɩyɛ maɣzɩɣ. Ye ŋkɛ koobu abalɩñɩnʋ nɛ pamɩyɩsɩ-ŋ lɩm nɛ ŋtɩkɛtɩ ɛgbɛyɛ taa tʋmlaɖʋ yɔ, ŋpɩzɩɣ nɛ ŋɖʋ ña-tɩ kaɖʋwa ŋga? w24.11 14 § 1-3

Alɩwaatʋ ndʋ Yuuda Wiyaʋ Ezekiyaasɩ kaawɛnɩ pɩnzɩ 39 yɔ, ɛɛhɩnɩ kʋdɔŋ sɔsɔʋ nakʋyʋ. Yehowa kaatiyi nayʋ Izaayii se eheyi Ezekiyaasɩ se ɛsɩkɩnɩ kʋdɔŋ ŋgʋ. (2 Awi. 20:1) Pɩɩwɛ ɛzɩ Ezekiyaasɩ fɛyɩnɩ lidaʋ nakʋyʋ yɔ. Ezekiyaasɩ nɩ tɔm ndʋ lɛ, tɩha-ɩ laŋwɛɛkɩyɛ nɛ ewii siŋŋ. Piyeba nɛ ɛtɩmnɩ Yehowa siŋŋ. Adɩma wena Ezekiyaasɩ labɩnɩ ɛsɩtɛɣlɩm yɔ, aatukuni Yehowa siŋŋ nɛ eheyi-i nɛ sɔɔlɩm se: «Manɩ ña-adɩma. Mana ñɛ-ɛsɩtɛɣlɩm. Na, mawaɣ ña-kʋdɔŋ.» Yehowa tɩŋnɩ Izaayii yɔɔ nɛ ɛlabɩ-ɩ tamaɣ se ɛkaɣ-ɩ sɔzʋʋ pɩnzɩ e-wezuu yɔɔ nɛ ɛkaɣ holuu Yeruzalɛm Asiirii mba nesi tɛɛ. (2 Awi. 20:​4-6) Kʋdɔŋ nakʋyʋ cɛyɩɣ-ŋ nɛ pɩlakɩ-ŋ ɛzɩ paapɩzɩɣ nɛ pawaa-kʋ yɔ? Tɩmnɩ Yehowa nɛ ŋheyi-i ɛzɩma pɩlakɩ-ŋ yɔ, ɛkaɣ-ŋ welisinuu paa ŋwɛɛ nɛ ŋtɩmɩɣnɩ-ɩ nɛ ɛsɩtɛɣlɩm yɔ. Bibl yeki se ɖa-taa ɛtɛ se «pʋtɔdɩyɛ naʋ siŋŋ Caa nɛ laŋɩyɛ hɛzʋʋ kpeekpe tɛ Ɛsɔ» kaɣ hɛzʋʋ ɖa-laŋa ɖa-nazɩm kpeekpe taa.—2 Kɔr. 1:​3, 4. w24.12 24 § 15-17

Pɩkɛɣnɩ taa leleŋ siŋŋ se ɖɩmʋ ɛyaa mba pakaɣ-wɛ fezuu yɔ. Maɣzɩ ɖɔɖɔ nɛ ŋna ɛzɩma ña-taa kaɣ labʋ leleŋ alɩwaatʋ ndʋ ŋkpɛlɩkɩɣ Yehowa wondu kɩlɩzɩtʋ ndʋ tɩfɛyɩ kalʋʋ yɔ tɩ-yɔɔ tɔm se ŋtɩlɩ-ɩ nɛ pɩkpaɖɩ yɔ. (Keɣ. 104:24; Iza. 11:9) Kɔzɩ kɔzɩ lɛ, ŋŋkaɣ labʋ kɩwɛɛkɩm nabʋyʋ kaaʋ nɛ pɩpɔzɩ se ŋpɔzɩ Yehowa kpaɣʋ nɛ kpeɣu, nɛ ŋkaɣ pɩzʋʋ nɛ ŋsɛɛ-ɩ camɩyɛ. Ŋkaɣ sɔɔlʋʋ se ŋnɩɩ «kɩwɛɛkɩm leleŋ weyi eeleɖiɣ yɔ» nɛ ŋlesi cee wayɩ wazasɩ nzɩ? (Ebr. 11:25) Pɩtʋʋ fɛyɩ se aayɩ. Wazasɩ nzɩ ɖɩkaɣ hiɣu yɔ, sɩcɛzɩ kɩlaŋ weyi payɩ ɖɩlaɣ lɛɛlɛɛyɔ yɔ. Tɔzɩ se paradisuu ɛɛkaɣ kɛnʋʋ cee wayɩ lidaʋ mbʋ tam. Wiɖiyi kɩkaɣ kɛnʋʋ lone nɖɩ ɖɩ-taa ɖɩwɛɣ paa evemiye nɖɩ yɔ. Nɛ ɖɩkaɣ hiɣu wazasɩ nzɩ sɩ-tɩŋa payɩ mbʋ pʋyɔɔ yɔ Yehowa sɔɔlɩ-ɖʋ siŋŋ nɛ ɛcɛlɩ ɛ-Pɩyalʋ ɖɔ-yɔɔ. w25.01 29 § 12

Ebree mba takayaɣ yɔɔdʋʋ ɛyaa mba paawɛnɩ tisuu Yehowa yɔɔ yɔ pa-taa sakɩyɛ tɔm. Pa-taa lɛlʋ lɛ Moyizi, ɛɛwɛnɩ tisuu siŋŋ. (Ebr. 3:​2-5; 11:​23-25) Moyizi ñowobi pɩ-yɔɔ nɛ ɛtaɣ ɛ-Ɛsɔ liu. Ɛɛlabɩ mbʋ, mbʋ pʋyɔɔ yɔ Yehowa kaaha Izrayɛɛlɩ mba tɔɔnaɣ nɛ lɩm se papɩzɩ nɛ pacaɣ wezuu kañɩmbusuu taa. (Ejl. 15:​22-25; Keɣ. 78:​23-25) Moyizi tisuu kaapaɣlɩ siŋŋ, paa mbʋ yɔ Yehowa holi Izrayɛɛlɩ mba Ejipiti nɛ pɩla pɩnaɣ kʋɖʋmaɣ mbʋ yɔ lɛ, ɛpaɣzɩ pɩtʋʋ se ɛzɩ Yehowa kaɣ pɩzʋʋ nɛ ɛha ɛ-samaɣ nandʋ na. Paakɛ ɛyaa miiliyɔɔwaa sakɩyɛ, nɛ tɔɔnaɣ tɔm kaawɛ kaɖɛ kañɩmbusuu taa. Ye mbʋ, ɛzɩma Yehowa kaɣ labʋ nɛ ɛha nandʋ samaɣ ŋga ka-tɩŋa nɛ tɩtalɩ-kɛ? Peeɖe Yehowa pɔzɩ Moyizi se: «Yehowa nesi kɩlɩ tobiyuu yaa we?» (Kɩg. 11:​21-23) Toovenim taa lɛ, Yehowa wɛɛ nɛ ɛpɔzʋʋ Moyizi se: «Ŋmaɣzɩɣ toovenim taa se maapɩzɩɣ nɛ mɔnɖɔ mɔn-tɔm yɔɔ?» w25.03 26 § 1-2

Pɩmʋnɩ mbʋ se ɖɩyɔɔdɩ se mbʋ pɩɩlabɩ Tɛʋ Sɔsɔʋ alɩwaatʋ taa yɔ, pɩsɩŋnɩ mbʋ pɩkaɣ labʋ cee wayɩ yɔ pɩ-taa nabʋyʋ yaa we? Aayɩ. Ɛbɛ yɔɔ? Mbʋ pʋyɔɔ yɔ Bibl tɩyɔɔdɩ mbʋ. Yesu kpaɣ «Noowa alɩwaatʋ» nɛ ɛmaɣzɩnɩ ɛ-wɛʋ alɩwaatʋ, ɛlɛ ɛtɩyɔɔdɩ se mbʋ payɩ pɩɩlabɩ Tɛʋ Sɔsɔʋ alɩwaatʋ taa yɔ, pɩ-taa paa ɛyʋ weyi nɛ paa wonuu ŋgʋ lɛ kɩsɩŋnɩ mbʋ pɩkaɣ labʋ cee wayɩ yɔ pɩ-taa paa mbʋ, nɛ ɛtɩyɔɔdɩ ɖɔɖɔ se ɛzɩma Yehowa ɖɩɣ aɖakaɣ nɔnɔɔ yɔ, pɩsɩŋnɩ ɖɔɖɔ mbʋ pɩkaɣ labʋ cee wayɩ yɔ pɩ-taa nabʋyʋ. (Mat. 24:​37-39) Alɩwaatʋ ndʋ Noowa nɩ Yehowa nɩŋgbaŋʋʋ hɔm tɔm yɔ, ɛzɩma ɛlaba? ɛsaɣ aɖakaɣ nɛ pɩwɩlɩ se ɛɛwɛnɩ tisuu. (Ebr. 11:7; 1 Pɩy. 3:20) Mbʋ ɖɔɖɔ ɛyaa mba pewelisiɣ Ɛsɔ Kewiyaɣ tɔm kɩbandʋ yɔ, pɩwɛɛ se pɔɖɔ tɔm ndʋ panɩwa yɔ tɩ-yɔɔ. (Tʋma 3:​17-20) Pɩyɛɛrɩ ya Noowa se «siɣsiɣ wɛtʋ tɔm susuyu.» Sɔnɔ ɖɩwɛɛ nɛ ɖɩñakɩ pana se ɖisusi tɔm ɛjaɖɛ kpeekpe yɔɔ ɛyaa, nɛ ɖɩwɛɛ nɛ ɖɩlakɩ tʋmɩyɛ nɖɩ nɛ kpekpeka. Ɛlɛ, paa ɖɩtɩɩñaɣ pana ɛzɩma yɔ, ɖɩɩkaɣ pɩzʋʋ nɛ ɖisusi tɔm kɩbandʋ ɛyaa mba payɩ pɛwɛ tɛtʋ yɔɔ yɔ pʋcɔ nɛ ɛjaɖɛ tɛm talɩ. w24.05 8-10 § 3-5

Pɩwɛɛ se ɖɩñɩnɩɣ nʋmɔŋ weyi ɩ-yɔɔ ɖɩpɩzɩɣ ɖɩtɩŋna nɛ ɖɩla camɩyɛ lakasɩ Yehowa taabalaa nɛ ɖɩñam-wɛ yɔ. (Roma 12:10) Ɛzɩma tɩyɛ? Keɣa 15:4 yɔɔdɩ nʋmɔŋ ɛnɩ ɩ-taa kʋɖʋmʋʋ tɔm se weyi Yehowa mʋ-ɩ ɛgɔndʋ e-kizinziku tɛɛ yɔ, «ye eɖuwaa yɔ, ɛɛpɩsɩɣnɩ wayɩ, halɩ paa pɩɖʋzʋʋ-ɩ yɔ.» Ye ɖɩtɩɖɔ ɖo-ɖuutu yɔɔ yɔ, pɩtʋʋ fɛyɩ se pɩkɔŋnɩ lalaa kaɖɛ. (Mat. 5:37) Kɩɖaʋ nakʋyʋ yɔ: Yehowa sɔɔlaa se mba ɛmʋʋ-wɛ ɛgɔndʋ yɔ, pɔɖɔ pe-nesi ɖɔkʋʋ ɖuutu yɔɔ. Ɛ-taa lakɩ leleŋ ɖɔɖɔ alɩwaatʋ ndʋ lʋlɩyaa ñakɩ pana siŋŋ se pɔɖɔ tamasɩ nzɩ palakɩ pe-piya yɔ sɩ-yɔɔ yɔ. Sɔɔlɩm mbʋ ɖɩwɛnɩ Ɛsɔ nɛ ɛyaa lalaa yɔɔ yɔ, pɩkaɣ-ɖʋ seɣtuu nɛ ɖɩla mbʋ payɩ ɖɩpɩzɩɣ yɔ nɛ ɖɩɖɔ ɖo-ɖuutu yɔɔ. Nʋmɔʋ lɛɛkʋ ŋgʋ kɩ-yɔɔ ɖɩpɩzɩɣ nɛ ɖɩtɩŋna nɛ ɖɩɖʋ Ɛsɔ taabalaa hɩɖɛ yɔ ŋgʋ yɔ: Ðɩmʋʋ-wɛ ɛgɔndʋ nɛ ɖɩlakɩ-wɛ kʋjɔŋ. (Roma 12:13) Pɩtasɩnɩ kediɣzisi lɛ, ye ɖɩkpakɩɣ alɩwaatʋ nɛ ɖa nɛ ɖo-koobiya ɖɩcakɩ yɔ, pɩsɩɣnɩ-ɖʋ se ɖɩcɛyɩsɩ taabalɩyɛ nɖɩ ɖɩwɛ ɖa nɛ wɛ ɖɛ-hɛkʋ taa yɔ nɛ ɖɩtɛ ɖɩcɛyɩsɩ taabalɩyɛ nɖɩ ɖɩwɛ ɖa nɛ Yehowa ɖɛ-hɛkʋ taa yɔ. Pɩtasɩ lɛ, ye ɖɩmʋʋ lalaa ɛgɔndʋ yɔ, ɖɩmaɣzɩɣnɩ Yehowa. w24.06 12 § 15-16

Yehowa kuluu toovenim yɔɔ nɛ ɛwɩlɩɣ ɛyaa mba poluzuu pa-tɩ yɔ. (Mat. 11:25) Ðitisini tɩ luzuu se pasɩnɩ-ɖʋ nɛ ɖɩtɩlɩ toovenim. (Tʋma 8:​30, 31) Paa mbʋ yɔ, pɩwɛɛ se ɖɩkpa ɖa-tɩ nɛ ɖɩtaapɩsɩ tɩ kpazɩyaa. Ye ɖɩkpazɩɣ ɖa-tɩ yɔ, pɩpɩzɩɣ piyele nɛ ɖɩpaɣzɩ maɣzʋʋ se ɖa-lɩmaɣza tʋʋzɩ ɛzɩ Bibl paɣtʋ kila nɛ Yehowa ɛgbɛyɛ lɔŋ tasʋʋ tʋʋzʋʋ yɔ. Pɩsa nɛ ɖitaalesi ɖa-tɩ luzuu lɛ, pɩwɛɛ se ɖɩtɔzɩ se ye pakpaɣ-ɖʋ nɛ pamaɣzɩnɩ Yehowa yɔ ɖɩtɩlɩɩ pʋyʋ. (Keɣ. 8:​3, 4) Pɩtasɩ lɛ, ɖɩpɩzɩɣ nɛ ɖɩtɩmnɩ Yehowa se ɛsɩnɩ-ɖʋ nɛ ɖɩwɛɛnɩ tɩ luzuu nɛ pɩkɩlɩ nɛ ɖɩkɛ ɖɔɖɔ ɛyaa mba petisiɣ se pawɩlɩ-wɛ tɔm yɔ. Yehowa kaɣ-ɖʋ sɩnʋʋ nɛ ɖɩsɩɩ ɛ-lɩmaɣza, pʋ-tɔbʋʋ se tɔm ndʋ ɛtɩŋɩɣnɩ Bibl nɛ ɛ-ɛgbɛyɛ yɔɔ nɛ ɛwɩlɩɣ-ɖʋ yɔ kajalaɣ lone taa nɛ pɩtaakɛ ɖa-lɩmaɣza. Ŋŋkalɩɣ Bibl lɛ, ñɩnɩ nɛ ŋna mbʋ pɩwɩlɩɣ se Yehowa sɔɔlɩ tɩ luzuu nɛ ɛpaɖɩɣ agʋnda, tɩ kpazʋʋ nɛ cajayɛ yɔ. Nɛ ye paha-ŋ waɖɛ naɖɩyɛ nɛ piyeki se pɩna-ŋ yɔ, ñaɣ pana kpem nɛ ŋwɛɛnɩ tɩ luzuu. w24.07 10 § 8-9

Kpaɣnɩ pɩnaɣ 1919 lɛ, Yesu wɛɛ nɛ eɖiyiɣ patam numwaa nabɛyɛ se pɔcɔnɩ tɔm susuu tʋmɩyɛ yɔɔ nɛ paha ɛ-wayɩ tɩŋɩyaa fezuu taa tɔɔnaɣ. (Luka 12:42) Pɩnaɣ kpayɩ kpayɩ se Yehowa wɛɛ nɛ ɛwazɩɣ pa-tʋmɩyɛ yɔɔ. (Iza. 65:​13, 14) Ye ɖɩtaala ɖʋtʋ camɩyɛ yɔ, ɖɩtaapɩzɩ nɛ ɖɩla tʋmɩyɛ nɖɩ Yesu ɖʋ-ɖʋ yɔ. (Mat. 28:​19, 20) Kɩɖaʋ nakʋyʋ yɔ: Ye pataañɔɔzɩ kookasɩ nzɩ sɩ-taa ɖisusuu tɔm yɔ camɩyɛ yɔ, paa weyi eesusi tɔm ɖenɖe ɛsɔɔlaa yɔ. Pɩtɩla tɔm susuyaa sakɩyɛ kaasusi tɔm tam sakɩyɛ kookasɩ nasɩyɩ taa nɛ peyele lɛɛsɩ. Ŋpɩzɩɣ nɛ ŋmaɣzɩ nɛ ŋna wazasɩ lɛɛsɩ nzɩ ɖihikiɣ mbʋ pʋyɔɔ yɔ ɖɩlakɩ ɖʋtʋ camɩyɛ yɔ? Yesu kaañɔɔzɩ ɛ-wayɩ tɩŋɩyaa camɩyɛ alɩwaatʋ ndʋ ɛɛwɛ tɛtʋ yɔɔ yɔ, nɛ mbʋ ɖɔɖɔ ewoki pɩ-yɔɔ nɛ ɛñɔɔzʋʋ Ɛsɔ samaɣ sɔnɔ. w24.04 8-9 § 2-4

Kayɩnɩ kaakɛ Aɖam nɛ Ɛva pa-kajalaɣ pɩɣa. Ɛ-lʋlɩyaa ɖɛzɩ-ɩ mantɩtalɩ pilim wɛtʋ. Pɩtasɩ lɛ, Bibl yɔɔdɩ ɛ-tɔm se: «Ɛ-maɣmaɣ ɛ-lakasɩ kaakɛ kɩdɛkɛdɩsɩ.» (1 Yoh. 3:12) Pʋtɔma pʋyɔɔ alɩwaatʋ ndʋ Kayɩnɩ la Yehowa kɩlaʋ yɔ, «[ɛ] nɛ ɛ-kɩlaʋ pɔ-tɔm tɩkɛdɩnɩ» Yehowa. Mbʋ ɛzɩ Kayɩnɩ kaalɛɣzɩ ɛ-lakasɩ lɛ, ‘ɛkɔ pana siŋŋ nɛ ɛñɩŋ ɛ-ɛsɩndaa.’ Ɛbɛ Yehowa labɩ pʋwayɩ? Ɛyɔɔdɩnɩ Kayɩnɩ. (Kiɖe 4:​3-7) Tɔzɩ se Yehowa yɔɔdɩnɩ Kayɩnɩ nɛ nɔɔ kɩbaŋa se ɛcɔlɩ ɛ-lɩmaɣza nɛ eheyi-i se ye ɛlabɩ mbʋ pɩwɛ ɖeu yɔ ɛwazɩɣ-ɩ. Yehowa paɣ-ɩ ɖɔɖɔ se ye ɛtɩkpa ɛ-tɩ yɔ, ɛ-pana ana apɩzɩɣ atuyi-i nɛ ɛla kɩwɛɛkɩm. Pɩlabɩ pʋtɔdɩyɛ se Kayɩnɩ tiwelisini Yehowa. Etiyele se Yehowa ɛsɩnɩ-ɩ nɛ ekpiɖi ɛ-kɩwɛɛkɩm yɔɔ. Toovenim se Kayɩnɩ tiwelisini Yehowa, ɛlɛ ɛzɩ piyeba nɛ Yehowa ɖʋ ɛ-taa se ɛɛtasɩɣ sɩnʋʋ kɩwɛɛkɩm laɖaa lalaa nɛ pekpiɖi pa-kɩwɛɛkɩm yɔɔ? Aayɩ. w24.08 10 § 8

Lidaʋ kɩbaŋʋ nakʋyʋ kaaɖaŋnɩ Izrayɛɛlɩ mba. Yehowa wazɩɣ-wɛ nɛ pacaɣ wezuu alɩwaatʋ sakɩyɛ tɛtʋ ndʋ ɛlabɩ-wɛ tamaɣ se ɛcɛlɩɣ-wɛ yɔ tɩ-taa. Nɛ tɛtʋ ndʋ, tɩɩwɛ kajʋka nɛ tɩlʋlʋʋ tɔɔnasɩ sakɩyɛ. Moyizi kɛdɩ-wɛ tɩ-tɔm se: «Ɛjaɖɛ nɖɩ ɖɩ-taa wɛ tɛtʋ sɔsɔtʋ nɛ kɩbandʋ ndɩ ndɩ ndʋ ɩtɩma yɔ, ɖɩsɩ nzɩ wondu kɩbandʋ ndɩ ndɩ su sɩ-taa yɔ, wondu ndʋ ɩtɩla tʋmɩyɛ naɖɩyɛ pʋcɔ nɛ ihiɣ-tʋ yɔ, lɔkɔnaa mba itihuyi yɔ nɛ viiñi hayɩm nɛ oliivi tɩŋ weyi ɩtɩsɔ yɔ.» (Wp. 6:​10, 11) Moyizi paɣ ɖɔɖɔ Izrayɛɛlɩ mba. Pɩsa nɛ powolo pɩ-yɔɔ nɛ pacaɣ tɛtʋ kɩbandʋ ndʋ tɩ-taa lɛ, pɩpɔzʋʋ se paña Yehowa paɣtʋ. Moyizi seɣti-wɛ se pewelisini Yehowa nɛ ‘pɔñɔɔnɩ-ɩ cɩŋ cɩŋ,’ nɛ pɩwɩlɩ se ‘palɩzɩ wezuu.’ (Wp. 30:20) Ɛlɛ Izrayɛɛlɩ mba tɩña Yehowa. Pʋyɔɔ pʋwayɩ, Yehowa ha nʋmɔʋ Asiirii mba nɛ Babilɔɔnɩ mba se pawabɩ-wɛ nɛ pakpaɣ-wɛ nɛ powoni yomiye taa.—2 Awi. 17:​6-8, 13, 14; 2 Kro. 36:​15-17, 20. w24.11 9 § 5-6

Ɛyaa sakɩyɛ maɣzɩɣ se ye pañɩtaa nɛ petisi Yesu yɔɔ nɛ pakpakɩɣ-ɩ se ɛkɛ pa-ñʋʋ yaɖʋ yɔ, pehikiɣ ñʋʋ yabʋ. (Yoh. 6:29) Ɛlɛ samaɣ taa ɛyaa mba paawɛnɩ tisuu Yesu yɔɔ kiɖe tɛɛ yɔ, pa-taa nabɛyɛ kaayebi-i tɩŋʋʋ. Ɛbɛ yɔɔ? Samaɣ ŋga, ka-taa ɛyaa sakɩyɛ kaatɩŋ Yesu mbʋ pʋyɔɔ yɔ ɛha-wɛ mbʋ paasɔɔlaa yɔ. Paasɔɔlaa se ɛwaa-wɛ, ɛha-wɛ tɔɔnaɣ nɛ eheyi-wɛ tɔm ndʋ pɔsɔɔlɩ nɩʋ yɔ. Ɛlɛ Yesu wɩlaa se pʋcɔ nɛ ɛyʋ pɩsɩ ɛ-tɔmkpɛlɩkɩyʋ toovenim tʋ lɛ, pi-ɖeke pɩtɩmaɣ. Ɛtɩkɔɔ tɛtʋ yɔɔ se ɛcɔnɩ ɛyaa tomnaɣ yɔɔ kɩcɛyɩm yɔɔ ɖeke. Ɛlɛ pɩwɛɛ se ‘pɔkɔɔ ɛ-cɔlɔ,’ pʋ-tɔbʋʋ se petisi ɛ-wɩlɩtʋ tɩŋa yɔɔ nɛ pañam-tʋ.—Yoh. 5:40. w24.12 12 § 12-13

Ɛbɛ pɩzɩɣ pɩsɩnɩ walʋ nɛ ekizi kʋzʋʋ lakasɩ nzɩ sɩɩkɛdɩɣnɩ ɛ-halʋ yaa siyeki nɛ ɛlɛ nɩɣ siziŋ yɔ? Ɛpɩzɩɣ nɛ ɛñaɣ pana nɛ ɛmaɣzɩnɩ Yesu. Pɩkɛ toovenim se Yesu taaɖɔkɩ nesi, ɛlɛ wɛtʋ ndʋ ɛɛwɛnɩ ɛ-tɔmkpɛlɩkɩyaa yɔɔ yɔ, tɩkɛnɩ kɩɖaʋ kɩbaŋʋ walaa. Iyele nɛ ɖɩna mbʋ walaa pɩzɩɣ nɛ pɛkpɛlɩkɩ wɛtʋ ndʋ Yesu kaawɛnɩ ɛ-apostoloowaa yɔɔ nɛ ɛzɩma ɛyɔɔdaɣnɩ-wɛ yɔ pɩ-taa yɔ. Yesu lakaɣ camɩyɛ lakasɩ ɛ-apostoloowaa paa ɛzɩmtaa nɛ ɛñaŋaɣ-wɛ. Ɛtaañasɩɣ-wɛ tɔm yaa ɛtaañazɩɣ-wɛ. Paa Yesu ɛɛkɛ pa-Kɩbaɣlʋ nɛ pa-Ñʋʋdʋ yɔ, ɛtɩmaɣzɩ wiɖiyi kpa se ɛtɩŋɩɣnɩ e-ɖoŋ yɔɔ nɛ eyele nɛ pañamɩ-ɩ yaa pese-i sɔɔndʋ. Ɛlɛ, ɛɖʋ-wɛ lɩm nɛ tɩ luzuu. (Yoh. 13:​12-17) Eheyi ɛ-tɔmkpɛlɩkɩyaa se: «Ɩkpɛlɩkɩ mɔn-cɔlɔ, mbʋ pʋyɔɔ yɔ mɛnkɛ laŋɩyɛ hɛɛɛ tʋ nɛ moluzuu man-tɩ, nɛ ɩkaɣ hiɣu laŋɩyɛ hɛzʋʋ.» (Mat. 11:​28-30) Yʋsɩ se Yesu kɛ laŋɩyɛ hɛɛɛ tʋ. Pɩtɩkɛnɩ ɛjandʋ se ɛyʋ ɛwɛɛnɩ hɛɛɛ wɛtʋ. Ɛlɛ hɛɛɛ wɛtʋ sɩɣnɩ ɛyʋ se ɛɖɔkɩ ɛ-tɩ. Alɩwaatʋ ndʋ paɖʋʋ-ɩ ɖɩwɩzɩyɛ yɔ, ɛcakɩ ɖiɣ ɖiɣ nɛ ɛɖɔkʋʋ ɛ-pana. w25.01 10 § 10-11

Ɛjaɖɛ ɖɩnɛ ɖɩ-tɛm wɛɣ nɛ pɩñɔtʋʋ lɛ, liidiye kʋñɔŋ wɛɣ nɛ pɩtɛzɩɣ kpaʋ ɖoŋ. Ñam ñam lakasɩ nzɩ politiki kɔŋna yɔ, yoŋ, asɛyɩŋ yaa kʋdɔmɩŋ kɩɖɛɖɛŋ pɩzɩɣ piyele nɛ ɖɩwɛɛkɩ liidiye, ɖilesi ɖa-tʋmɩyɛ, ɖa-ñɩm yaa ɖa-ɖɩɣa. Ɛbɛ pɩzɩɣ pɩsɩnɩ-ɖʋ nɛ ɖɩkpaɣ lɩmaɣza wena awɩlɩɣ se ɖɩtaɣ Yehowa liu yɔ? Pɩcɛyaa kpem se ŋheyi Yehowa ña-nɩɣzɛ. Pɩkaɣ-ŋ sɩnʋʋ siŋŋ. Pɔzɩ-ɩ se ɛha-ŋ lɔŋsɩnɖɛ nɖɩ ɖɩpɩzɩɣ nɛ ɖɩsɩnɩ-ŋ nɛ ŋkpaɣ lɩmaɣza kɩbana yɔ. Pɔzɩ-ɩ ɖɔɖɔ se ɛsɩnɩ-ŋ nɛ ŋcaɣ ɖiɣ ɖiɣ nɛ ŋyele wɛtʋ ndʋ ŋwɛɛ nɛ ŋkatɩɣ yɔ tɩ-yɔɔ «nɩɣzʋʋ kadadayaɣ.» (Luka 12:​29-31) Wolo pɩ-yɔɔ nɛ ŋpɔzʋʋ-ɩ se ɛsɩnɩ-ŋ nɛ ñe-liu sɩbɩnɩ mbʋ pɩpɔzʋʋ-ŋ ɖeyi ɖeyi ñe-wezuu caɣʋ taa yɔ. (1 Tim. 6:​7, 8) Ñɩnɩ ɛgbɛyɛ takayɩsɩ taa nɛ ŋna ɛzɩma ŋpɩzɩɣ nɛ ŋlʋbɩnɩ liidiye kʋñɔŋ yɔ. Ɛyaa sakɩyɛ yɔɔdaa se videowaa nɛ tɔm ñʋŋ weyi ɩwɛ jw.org yɔɔ nɛ ɩyɔɔdʋʋ liidiye kʋñɔŋ tɔm yɔ ɩsɩnɩ-wɛ pɩdɩɩfɛyɩ. w25.03 28-29 § 10-11

Alɩwaatʋ talaa se ajɛɛ lɛɛna taa ñɩma mba patɩpɛlɩ-wɛ yɔ papɩsɩ Ɛsɔ samaɣ taa mba. Ɛsɔ kaaɖʋ apostoloo Pɩyɛɛrɩ tʋmɩyɛ se esusi tɔm Kɔɔrnɛɛyɩ weyi ɛkɛ ajɛɛ lɛɛna taa kajalaɣ tʋ weyi ɛpɩsɩ Krɩstʋ tʋ yɔ. Yuuda mba nɛ ajɛɛ lɛɛna taa mba pataakpɛndɩɣ nɛ palakɩ nabʋyʋ, pʋyɔɔ pɩɩpɔzaa se Pɩyɛɛrɩ ɛlɛɣzɩ ɛ-maɣzɩm nɛ pɩsa nɛ esusi-wɛ tɔm. Alɩwaatʋ ndʋ Pɩyɛɛrɩ ɖiɣzini Ɛsɔ lɩmaɣzɩyɛ tɔm ndʋ tɩ-yɔɔ yɔ, ɛlɛɣzɩ ɛ-lɩmaɣza. Piyeba nɛ alɩwaatʋ ndʋ petiyi-i yɔ, ‘ɛtɩcɔɔ ɛ-taa kiii’ pʋcɔ nɛ ewolo. (Tʋma 10:​28, 29) Esusi tɔm Kɔɔrnɛɛyɩ nɛ ɛ-ɖɩɣa taa mba nɛ peyele nɛ pamɩyɩsɩ-wɛ lɩm. (Tʋma 10:​21-23, 34, 35, 44-48) Pʋwayɩ, Pɩyɛɛrɩ seɣti e-koobiya Krɩstʋ mba se pɛwɛɛnɩ «maɣzɩm kʋɖʋmʋm.» (1 Pɩy. 3:8) Ða nɛ ɖo-koobiya ɖɩpɩzɩɣ nɛ ɖɩwɛɛnɩ maɣzɩm kʋɖʋmʋm ye ɖɩmaɣzɩɣnɩ Yehowa maɣzɩm mbʋ pɩ-tɔm ɖɩkpɛlɩkɩ Bibl taa yɔ. w25.03 9 § 7-8

Ɛyaa wɛtʋ nɛ pa-lɩmaɣza wɛɛ nɛ akaɖɩɣnɩ Yehowa lɩmaɣza kpem nɛ pɩkɩlɩɣ. (Adu. 17:15) Pʋyɔɔ lɛ, pɩcɛyɩ kpem se ɖɩtɩlɩ lɩmaɣza wena atɩtʋʋzɩ yɔ nɛ ɖɩlɔ-yɛ. Pɩtɩpɔzɩ se ɖɩha nʋmɔʋ koyindu nɔɔyʋ nɛ eyele nɛ pitibi-ɖʋ yɔɔɔ nɛ ɖiyele Yehowa sɛʋ. Apostoloo Pɔɔlɩ tasɩ Ebree Krɩstʋ mba lɔŋ se powolo pɩ-yɔɔ nɛ palʋ nɛ pɛɖɛɛnɩ ɛsɩndaa nɛ papɩɩ fezuu taa. Pɩwɛɣ ɖeu se ɖa ɖɔɖɔ ɖɩɖɔ lɔŋ ɛnɩ ɩ-yɔɔ. Pʋ-tɔbʋʋ lɛ se pɩwɛɛ se ɖɩkpɛlɩkɩ Bibl camɩyɛ nɛ ɖɩtɩlɩ Yehowa nɛ ɛ-lɩmaɣza camɩyɛ nɛ pɩkɩlɩ. Pɩcɛyaa se ɖiwolo pɩ-yɔɔ nɛ ɖɩlakɩ mbʋ, halɩ pɩkpɛndɩnɩ ɖa-lɩm mɩyɩsʋʋ wayɩ. Ðɩwɛʋ toovenim taa yɔ, paa pileɖaa yaa pitileɖi yɔ, pɩwɛɛ se ɖa-tɩŋa payɩ ɖɩkalɩɣ Bibl ɖoŋ ɖoŋ nɛ ɖɩkpɛlɩkɩɣ-kʋ. (Keɣ. 1:2) Ye ɖɩkpɛlɩkɩɣ Bibl ɖa-tɩ yɔɔ ɖoŋ ɖoŋ yɔ, pɩkaɣ-ɖʋ sɩnʋʋ nɛ ɖɩwɛɛnɩ wɛtʋ kɩbandʋ ndʋ tɩ-yɔɔ Pɔɔlɩ ñɩɣ niye Ebree mba takayaɣ taa yɔ. Wɛtʋ ndʋ lɛ tisuu.—Ebr. 11:​1, 6. w24.09 10 § 7-8

Ye taabalɩyɛ kɩbanɖɛ ɛwɛ ɖa nɛ Yehowa ɖɛ-hɛkʋ taa yɔ, pɩkaɣ-ɖʋ wɛʋ kɛlɛʋ se ɖɩwɛɛ siɣsiɣ ɛ-ɛsɩndaa. Mbʋ pɩɩlabɩ Yosɛɛfʋ hɔɔlʋʋ taa. Ɛɛtɛm ɛ-taa nɛ ekizi se ɛɛcakɩ kʋzʋʋ kɩdɛkɛdʋʋ wezuu. Ɛɛnawa se mbʋ ɛlakɩ yɔ pɩ-tɔm cɛyɩ Yehowa ɛsɩndaa nɛ ɛtaasɔɔlɩ se ɛɖʋ-ɩ ɖɩwɩzɩyɛ. (Kiɖe 39:9) Pɩsa nɛ taabalɩyɛ kɩbanɖɛ wɛɛ ɖa nɛ Yehowa ɖɛ-hɛkʋ taa lɛ, pɩcɛyaa se ɖɩkpakɩɣ alɩwaatʋ nɛ ɖɩtɩmɩɣnɩ-ɩ nɛ ɖɩkpɛlɩkɩɣ ɛ-tɔm. Ye ɖɩlakɩ mbʋ yɔ, ɖa nɛ ɩ ɖa-taabalɩyɛ kaɣ cɛyɩsʋʋ camɩyɛ. Ɛzɩ Yosɛɛfʋ yɔ, ye taabalɩyɛ kɩbanɖɛ ɛwɛ ɖa nɛ Yehowa ɖɛ-hɛkʋ taa yɔ, ɖɩɩkaɣ sɔɔlʋʋ kpa se ɖɩla nabʋyʋ nɛ pɩɖʋ-ɩ ɖɩwɩzɩyɛ. Mba pɔsɔʋ se Yehowa kɛ Ɛsɔ ɛsadʋ yɔ, papɩzɩɣ nɛ poposini-i kɛlɛʋ yem. Na mbʋ pɩɩtalɩ Izrayɛɛlɩ mba alɩwaatʋ ndʋ paawɛ kañɩmbusuu taa yɔ. Paanawa se Yehowa wɛɛ, ɛlɛ papaɣzɩ pɩtʋʋ se ɛzɩ ɛkaɣ cɔnʋʋ pa-kɩcɛyɩm ɖeɖe na. (Ejl. 17:​2, 7) Pʋwayɩ lɛ pakaɖɩnɩ-ɩ. Pɩtʋʋ fɛyɩ se ɖɩtɩsɔɔlɩ se ɖɩmaɣzɩnɩ kɩɖaʋ kɩdɛkɛdʋʋ ŋgʋ paahawa yɔ.—Ebr. 3:12. w24.06 24 § 14-15

Ðɩwɛ kɛdɛzaɣ kɩyakɩŋ taa, nɛ mbʋ piyeki nɛ ɖitisiɣ ɛsɩtɛɣlɩm yɔ pɩkaɣ wobu pɩ-yɔɔ nɛ pɩkpaɣ ɖoŋ kpaʋ yɔɔ. Yehowa naɣ ɛsɩtɛɣlɩm mbʋ ɖitisiɣ yɔ nɛ pɩhaɣ-ɩ laŋwɛɛkɩyɛ. Ðɛ-ɛsɩtɛɣlɩm mʋ ñɩm siŋŋ ɛ-ɛsɩndaa. Ye mbʋ, alɩwaatʋ ndʋ ɖɩkatɩɣ wɛtʋ natʋyʋ nɛ pɩhaɣ-ɖʋ laŋwɛɛkɩyɛ yɔ, pɩtʋʋ fɛyɩ se ɖɩkaɣ sɔɔlʋʋ se ɖɩtɩmnɩ Yehowa nɛ ɖiheyi-i ɖa-taa tɔm. Tɛtɛ nɛ ɖitaaposi ɖa-tɩ kaaʋ nɛ ɖo-koobiya. Nɛ tɛtɛ nɛ ɖiwolo pɩ-yɔɔ nɛ ɖɩkalɩɣ Bibl nɛ ɖihiɣ laŋɩyɛ hɛzʋʋ mbʋ pɩlɩnɩ Yehowa cɔlɔ yɔ. Ða-taa pɩzɩɣ nɛ pɩtɛ se ye ɖiwobi pɩ-yɔɔ nɛ ɖɩɖɔkʋʋ ɖa-laŋɩyɛ yɔ, Yehowa kaɣ-ɖʋ wazʋʋ. Wazasɩ nzɩ sɩ-taa nasɩyɩ lɛ lidaʋ kɩbaŋʋ ŋgʋ ɛlabɩ-ɖʋ se ɛkaɣ hɩzʋʋ ɛsɩtɛɣlɩm mbʋ ɖitisiɣ alɩwaatʋ ndʋ ɖɩwɛ laŋwɛɛkɩyɛ taa yɔ, alɩwaatʋ ndʋ ɛyʋ weyi ɖɩtaɣ-ɩ liu yɔ ɛlakɩ nabʋyʋ nɛ pitibi-ɖʋ yɔɔɔ yɔ nɛ alɩwaatʋ ndʋ ɖilesiɣ lidaʋ yɔ. (Natʋ 21:4) Taa leleŋ ɛsɩtɛɣlɩm ɖeke ɖɩkaɣ tisuu alɩwaatʋ ndʋ tamaɣ ŋga kalakɩ yɔ. w24.12 20 § 3; 25 § 19

Yehowa lɩzɩ-ɖʋ se ɖɩkɛ ɛ-Aseɣɖe Tɩnaa, nɛ ɛlabɩ-ɖʋ tamaɣ se ɛkaɣ-ɖʋ sɩnʋʋ nɛ ɖɩwɛɛ abalɩtʋ. (Iza. 43:​10, 11) Iyele nɛ ɖɩna nʋmɔŋ 4 weyi ɩ-yɔɔ ɛtɩŋɩɣna nɛ ɛsɩɣnɩ-ɖʋ yɔ. Kajalaɣ lɛ, alɩwaatʋ ndʋ payɩ ɖisusuu tɔm kɩbandʋ yɔ Yesu wɛ ɖɔ-cɔlɔ. (Mat. 28:​18-20) Nabʋlɛ lɛ, Yehowa ɖʋ e-tiyiyaa tʋmɩyɛ se pasɩnɩ-ɖʋ. (Natʋ 14:6) Nabudozo lɛ, Yehowa ha-ɖʋ e-fezuu kiɖeɖeu se kɩsɩnɩ-ɖʋ nɛ ɖɩtɔzʋʋ tɔm ndʋ ɖɩɩkpɛlɩkaa yɔ tɩ-yɔɔ. (Yoh. 14:​25, 26) Nabʋnaza lɛ, Yehowa ha-ɖʋ koobiya se ɖa nɛ wɛ ɖisusi tɔm. Yehowa nɛ ɖo-koobiya kʋsɔɔlaa pɛwɛɛ nɛ pasɩɣnɩ-ɖʋ; pʋyɔɔ lɛ, ɖɩwɛnɩ mbʋ payɩ pɩpɔzʋʋ-ɖʋ yɔ se ɖɩwɛɛ abalɩtʋ nɛ ɖiwolo pɩ-yɔɔ nɛ ɖisusuu tɔm. Ɛlɛ ye pitiki-ŋ yɔɔɔ alɩwaatʋ ndʋ ŋwoki tɔm susuu nɛ ŋŋnaɣ ɛyaa sakɩyɛ ɖɩsɩ yɔ, pɔzɩ ña-tɩ se: «Le mon-kooka taa mba wɛ alɩwaatʋ tʋnɛ tɩ-yɔɔ?» (Tʋma 16:13) «Ɛzɩ pɛwɛ tʋmɩyɛ taa yaa pɛɖɛ kɩyakʋ?» Ye pɩkɛ mbʋ yɔ, pɩtɩla ŋpɩzɩɣ nɛ ŋna ɛyaa sakɩyɛ ye ŋsusuu tɔm habɩyɛ yɔɔ yɔ. w24.04 17 § 10-11

Ye ŋkɛ walʋ nɛ ŋsɔɔlɩ se ŋpɩsɩ ɛgbɛyɛ taa ɛzʋtʋyʋ yɔ, pɩcɛyaa ɖɔɖɔ se ñɔ-hɔʋ taa mba ɩwɛɛnɩ hɩɖɛ kɩbanɖɛ. Pʋyɔɔ lɛ, pɩwɛɛ se ŋkɛ «ɛyʋ weyi eɖiyiɣ ɛ-maɣmaɣ ɛ-ɖɩɣa taa mba camɩyɛ yɔ.» Pʋ-tɔbʋʋ lɛ se pɩwɛɛ se ŋcɔnɩ ñɔ-hɔʋ taa mba yɔɔ nɛ sɔɔlɩm nɛ ŋkpaɣ lɩmaɣza wena awazɩɣ-wɛ yɔ. Pɩwɩlɩɣ se pɩwɛɛ se ŋɖɛɛ ñɔ-hɔʋ taa mba nɔɔ ɖɛ-Ɛsɔ sɛtʋ hɔɔlɩŋ tɩŋa taa. Ye ŋkɛ caja yɔ, pɩwɛɛ se «[ñe-piya] iluzuu sɩ-tɩ ɛzɩ pɩmʋnaʋ yɔ.» (1 Tim. 3:4) Pɩcɛyaa se ŋwɩlɩ ñe-piya tɔm nɛ ŋfalɩsɩ-sɩ nɛ sɔɔlɩm. Pɩkɛ toovenim se ɛzɩ piya tɩŋa yɔ, ñe-piya sɔɔlaa se sihoŋuu nɛ sileɣyiɣ. Ɛlɛ ye ŋfalɩsɩɣ-sɩ camɩyɛ yɔ, sɩkaɣ-ŋ ñam nɛ sɩña ɖɔɖɔ ɛyaa lalaa nɛ sɩcaɣ wezuu kɩbaŋʋ. Pɩtasɩ lɛ, pɩpɔzʋʋ se ŋla mbʋ payɩ pɩpɔzʋʋ yɔ nɛ ŋsɩnɩ ñe-piya nɛ taabalɩyɛ kɩbanɖɛ wɛɛ sɩ nɛ Yehowa pɛ-hɛkʋ taa, sɩɖɔ Bibl paɣtʋ kila yɔɔ si-wezuu caɣʋ taa nɛ sɩɖɛɛnɩ ɛsɩndaa fezuu taa nɛ pamɩyɩsɩ-sɩ lɩm. w24.11 22 § 10-11

Ye ɖɩlakɩ fezuu taa tʋma nɛ pɩkɩlɩɣ yɔ, ɖɩkaɣ naʋ ɛzɩma Yehowa sɩɣnɩ-ɖʋ yɔ nɛ pɩkɩlɩ, nɛ piyeki nɛ ɖɩtaa-ɩ liu nɛ pɩkɩlɩ. (1 Kɔr. 3:9) Paa mbʋ yɔ, tɔzɩ se Yehowa ɛɛkpakɩɣ mbʋ ŋlakɩ yɔ nɛ ɛmaɣzɩɣnɩ mbʋ lalaa lakɩ yɔ, ɛlɛ mbʋ pɩwɛ ña-laŋɩyɛ taa yɔ mbʋ ɛcɔŋna. Alɩwaatʋ ndʋ ɛnaɣ ña-laŋɩyɛ taa ɛsɩmɩyɛ nɖɩ ŋwɛnɩ kɩhɛyʋʋ pʋ-ñʋʋ taa kʋjɔʋ ŋgʋ ɛlabɩ-ɖʋ yɔ kɩ-yɔɔ yɔ, pɩkɛdɩɣnɩ-ɩ siŋŋ. (1 Sam. 16:7; Mark. 12:​41-44) Kɩhɛyʋʋ pʋ-ñʋʋ taa kɩlaʋ yɔɔ Yehowa kpeɣu-ɖʋ ɖa-kɩwɛɛkɩm nɛ kɩ-yɔɔ ɖɔɖɔ taabalɩyɛ wɛ ɖa nɛ ɩ ɖɛ-hɛkʋ taa. Pɩtasɩ lɛ, kɩhɛyʋʋ ŋgʋ kɩ-yɔɔ ɖɩwɛnɩ lidaʋ se ɖɩkaɣ hiɣu wezuu maatɛŋ. Tɛtɛ nɛ paa ɛzɩmtaa lɛ, ɖɩwɩlɩɣ ɖɛ-ɛsɩmɩyɛ Yehowa ɛ-sɔɔlɩm yɔɔ, mbʋ pʋyɔɔ yɔ sɔɔlɩm mbʋ pituyini-i nɛ eyele se ɖihiɣ wazasɩ nzɩ. (1 Yoh. 4:19) Tɛtɛ nɛ ɖɩwɩlɩ ɖɔɖɔ ɖɛ-ɛsɩmɩyɛ Yesu, mbʋ pʋyɔɔ yɔ ɛsɔɔlɩ-ɖʋ siŋŋ nɛ ɛkpaɣ e-wezuu nɛ ɛlaa ɖɔ-yɔɔ. w25.01 31 § 16-18

Maɣzɩ ɛzɩma pɩlakaɣ weyi ɛma Keɣa 73 yɔ pɩ-yɔɔ nɛ ŋna. Ɛnaɣaɣ se ɛyaa mba pataasɛɣ Yehowa yɔ, pɛwɛ alaafɩya camɩyɛ, pɛwɛnɩ ñɩm nɛ pɩwɛ ɛzɩ pɛfɛyɩnɩ nɩɣzɛ naayɛ yɔ. (Keɣ. 73:​3-5, 12) Alɩwaatʋ ndʋ ɛnaɣaɣ se pɩwɛ ɛzɩ piɖeɣni-wɛ pe-wezuu caɣʋ taa yɔ, pɩlabɩ-ɩ ɛzɩ pana wena ɛwɛɛ nɛ ɛñakɩ se ɛsɛɛ Yehowa yɔ aawazɩɣ pʋyʋ yɔ. Lɩmaɣza ana ayeba nɛ ɛnɩɣzɩɣ «evemiye kpeekpe.» (Keɣ. 73:​13, 14) Ɛzɩma ɛlʋbɩnɩ lɩmaɣza kɩdɛkɛda ana? Keɣa maɖʋ wobi Yehowa kooka kiɖeɖeɣa taa. (Keɣ. 73:​16-18) Peeɖe ewoba nɛ ɛpɩzɩ nɛ ɛmaɣzɩ camɩyɛ. Ɛnɩ pɩ-taa se paa pɩwɛ ɛzɩ piɖeɣni ɛyaa nabɛyɛ yɔ, pɛfɛyɩnɩ lidaʋ nakʋyʋ cee wayɩ. Piyeba nɛ ehiɣ maɣzɩm taa laŋhɛzɩyɛ nɛ ɛ-taa tɛ se lɩmaɣzɩyɛ nɖɩ ɛkpaɣaa se ɛsɩɣ Yehowa sɛtʋ kajalaɣ ɖeɖe yɔ, ɖɩkɛ lɩmaɣzɩyɛ kɩbanɖɛ kpem. Nɛ ɛtɛm ɛ-taa se ewoki pɩ-yɔɔ nɛ ɛsɛɛ Yehowa.—Keɣ. 73:​23-28. w24.10 27 § 11-12

Yehowa lɩzɩ-ɖʋ se ɖɩkɛ ‘ɛ-aseɣɖe tɩnaa.’ (Iza. 43:​10-12) Pɩlakɩ pɩnzɩ nasɩyɩ yɔ Nɔɔɖɛyaa ɛgbɛyɛ ma takayaɣ nakɛyɛ nɛ ɖɩyɔɔdɩ ka-taa se: «Pɩkɛnɩ ɖa-taa paa anɩ hɩɖɛ ɖʋʋ siŋŋ se payaa-ɩ se Yehowa Aseɣɖe Tʋ.» Ɛbɛ yɔɔ? Ðɩkpaɣ se pakʋyɩ ñɔ-yɔɔ se ŋlabɩ lakasɩ kɩdɛkɛdɩsɩ nasɩyɩ. Pɩpɔzʋʋ se ŋñɩnɩ nɔɔyʋ nɛ eheyi ɛyaa se tɔm ndʋ pɔyɔɔdʋʋ ñɔ-yɔɔ yɔ tɩkɛ cɛtɩm nɛ eheyi-wɛ ɖɔɖɔ se ŋkɛ ɛyʋ kɩbanʋ nɛ ŋŋpɩzɩɣ nɛ ŋla lakasɩ nzɩ kpa. Anɩ ŋkaɣ lɩzʋʋ? Pɩtʋʋ fɛyɩ se ŋkaɣ lɩzʋʋ ɛyʋ weyi ŋsɩmɩ-ɩ camɩyɛ, ŋtaɣ-ɩ liu nɛ ɛwɛnɩ hɩɖɛ kɩbanɖɛ yɔ se pɩsa nɛ ɛyaa tisi ɛ-tɔm yɔɔ. Ye Yehowa ɛlɩzɩ-ɖʋ se ɖɩkɛ ɛ-Aseɣɖe Tɩnaa yɔ, pɩwɩlɩɣ se ɛsɩm-ɖʋ camɩyɛ nɛ ɛtaɣ-ɖʋ liu se ɖɩkaɣ heyuu ɛyaa se e-ɖeke ɛkɛnɩ Ɛsɔ toovenim tʋ. Pɩkɛnɩ-ɖʋ hɩɖɛ ɖʋʋ kpem se ɖɩkɛ ɛ-Aseɣɖe Tɩnaa, pʋyɔɔ ɖɩtɩŋɩɣnɩ nʋmɔŋ ndɩ ndɩ yɔɔ se ɖiyele nɛ patɩlɩ ɛ-hɩɖɛ nɛ ɖɩwɩlɩ ɖɔɖɔ se tɔm ndʋ payɩ pɔyɔɔdɩ ɛ-yɔɔ yɔ, tɩkɛ cɛtɩm. Ye ɖɩlakɩ mbʋ yɔ, pɩwɩlɩɣ se ɖɩmʋnaa se payaa-ɖʋ se Yehowa Aseɣɖe Tɩnaa.—Roma 10:​13-15. w24.05 18 § 13

Yesu hikaɣ taa leleŋ sɔsɔŋ alɩwaatʋ ndʋ ɛɖʋwaɣ lalaa lɩm yɔ. Alɩwaatʋ natʋyʋ Yesu sɩnɩ samaɣ nakɛyɛ, pɩtɩkɛ tɔm ɖeke ɛwɩlɩ-kɛ. Ɛcɔnɩ ɖɔɖɔ ko-tomnaɣ yɔɔ kɩcɛyɩm ɖeɖe. Ɛlabɩ maamaaci lakasɩ nɛ tɔɔnaɣ ŋga paawɛnɩ pazɩ yɔ kohuu, nɛ ɛcɛlɩ-kɛ ɛ-wayɩ tɩŋɩyaa se patayɩ-kɛ samaɣ. (Mark. 6:41) Ɛlabɩ mbʋ se ɛwɩlɩ ɛ-wayɩ tɩŋɩyaa ɛzɩma pɩwɛɛ se paɖʋ lalaa lɩm yɔ. Ɛwɩlɩ-wɛ ɖɔɖɔ se tʋma wena awazɩɣ ɛyaa lalaa yɔ a-tɔm cɛyaa. Maɣzɩ nɛ ŋna taa leleŋ weyi apostoloowaa hiɣaa alɩwaatʋ ndʋ pa nɛ Yesu pɛkpɛndaa nɛ paha ɛyaa lalaa tɔɔnaɣ nɛ «pa-tɩŋa pɔtɔɔ nɛ pahaɣ» yɔ. (Mark. 6:42) Toovenim taa lɛ, pɩtɩkɛ alɩwaatʋ ndʋ ti-ɖeke tɩ-taa Yesu ɖɛzɩ lalaa kɩcɛyɩm nɔɔ. Mbʋ ɛlaba alɩwaatʋ ndʋ payɩ ɛɛwɛ tɛtʋ yɔɔ yɔ. (Mat. 4:23) Yesu hikaɣ taa leleŋ siŋŋ alɩwaatʋ ndʋ ɛwɩlaɣ lalaa tɔm nɛ ɛcɔŋnɩ pa-kɩcɛyɩm ɖeɖe yɔ. w24.11 16 § 10-11

«Kɛdɛzaɣ kɩyakɩŋ» wɛɣ nɛ ɩtɛzɩɣ wɛɛkʋʋ lɛ, pɩtʋʋ fɛyɩ se pɩkaɣ pɔzʋʋ se ɖɩsɩnɩ ɖama nɛ pɩkɩlɩ. Ðɩpɩzɩɣ ɖɔɖɔ nɛ ɖɩhɛzɩ ɖo-koobiya laŋa nɛ ɖɩwɩlɩ-wɛ sɔɔlɩm ɛzɩ pɩpɔzʋʋ yɔ. Nʋmɔʋ ŋgʋ kɩ-yɔɔ ɖɩpɩzɩɣ ɖɩtɩŋna nɛ ɖɩla mbʋ yɔ ŋgʋ yɔ: Ðɩyɔɔdɩnɩ-wɛ camɩyɛ alɩwaatʋ ndʋ pɔkɔŋ kediɣzisi yɔ nɛ ɖɩhɛzɩ pa-laŋa. Pʋyɔɔ lɛ, alɩwaatʋ ndʋ ɖo-koobiya kɔŋ kediɣzisi yɔ, ɖɩsɔɔlaa se ɖɩla mbʋ payɩ ɖɩpɩzɩɣ yɔ nɛ ɖɩkpazɩ-wɛ ɖoŋ nɛ ɖɩwɩlɩ-wɛ se ɖɩsɔɔlɩ-wɛ. Ɛzʋtʋyaa pɩzɩɣ nɛ pɛkɛ ɖɩjɔzɩyɛ ɛgbɛyɛ taa ñɩma mba pakatɩɣ kala yɔ. Alɩwaatʋ ndʋ asɛyʋʋ nakʋyʋ lakɩ yɔ nɛ alɩwaatʋ ndʋ pɩwɩɣ koobu nɔɔyʋ nɛ pɩpɔzɩ se pala nabʋyʋ kpɛdɛyɛ nɛ pasɩnɩ-ɩ yɔ, ɛzʋtʋyaa lakɩ ɖʋtʋ lɛɛ lɛɛ se pasɩnɩ po-koobiya. Pasɩɣnɩ-wɛ ɖɔɖɔ fezuu taa. Pɩwɛɣ koobiya kɛlɛʋ se pɔñɔtɩnɩ ɛzʋtʋyʋ nɔɔyʋ nɛ pɔpɔzɩ-ɩ se ɛsɩnɩ-wɛ ye panawa se ɛkaɣ-wɛ yɔɔdɩnʋʋ nɛ nɔɔ kɩbaŋa, ɛkaɣ-wɛ welisinuu nɛ ɛkaɣ ñaɣʋ pana se ɛnɩɩ pɔ-tɔm taa yɔ. Wɛtʋ kɩbandʋ ndʋ, tɩsɩɣnɩ ɛyaa lalaa se pana se pɔsɔɔlɩ-wɛ; ɖɩnɛ ɛlɛ pɩwɛɣ-wɛ kɛlɛʋ se pɔɖɔ lɔŋ weyi ɛzʋtʋyʋ nɔɔyʋ pɩzɩɣ nɛ ɛtɩŋnɩ Bibl yɔɔ nɛ ɛtasɩ-wɛ yɔ ɩ-yɔɔ.—1 Tes. 2:​7, 8, 11. w24.06 29 § 12-13

Pɩtɩpɔzɩ se ɖɩmaɣzɩ se Ɛsɔ kɛ ɖoŋ tɩŋa tʋ nɛ pʋyɔɔ lɛ ɛɛnɩɣ siziŋ. Ɛsɔ lɩzɩ-ɖʋ ɛ-lɛzʋʋ. Ɛlɩzɩ-ɖʋ lɛ, ɛɖʋ ɖa-taa mbʋ piyeki se ɖa-taa ɛwɛɛ leleŋ yaa ɖɩnɩɩ siziŋ yɔ. Ye mbʋ, ɛnʋ ɖɔɖɔ ɛpɩzɩɣ nɛ ɛnɩɩ siziŋ. Bibl yɔɔdʋʋ se ɛyaa kaaɖʋ-ɩ «ɖɩwɩzɩyɛ» nɛ paayeba nɛ ɛwɛɛ «laŋwɛɛkɩyɛ» taa. (Keɣ. 78:​40, 41) Alɩwaatʋ ndʋ Yehowa naɣaɣ ɛyaa pɛwɛɛ nɛ panazɩɣ ɛ-Pɩyalʋ tɛtɛ nazʋʋ nɛ ɛkɔɔ ɛsɩ yɔ, ɛɛnɩ siziŋ. Kɩhɛyʋʋ pʋ-ñʋʋ taa kɩlaʋ kpɛlɩkɩɣ-ɖʋ se nɔɔyʋ tɩsɔɔlɩ-ɖʋ nɛ pɩtalɩ Yehowa. Halɩ ɖɔ-hɔʋ taa ñɩma mba pɔsɔɔlɩ-ɖʋ siŋŋ yɔ yaa ɖa-taabalaa kɩbama sɔɔlɩm tɩtalɩ Yehowa ñɩmbʋ. (Roma 8:​32, 38, 39) Ða-taa pɩzɩɣ nɛ pɩtɛ kpem se Yehowa sɔɔlɩ-ɖʋ nɛ pɩkɩlɩ ɛzɩma ɖɩsɔɔlɩ ɖa-tɩ yɔ. Ŋsɔɔlaa se ŋcaɣ wezuu tam? Yehowa ɖɔɖɔ sɔɔlaa, halɩ ɛsɔɔlaa se ŋcaɣ wezuu tam nɛ pɩkɩlɩ ɛzɩma ña-maɣmaɣ ŋsɔɔlaa yɔ. Ŋsɔɔlaa se pakpaɣ ña-kɩwɛɛkɩm nɛ pekpeɣ-ŋ? Yehowa sɔɔlaa se ɛkpaɣ nɛ ekpeɣ-ŋ, halɩ ɛsɔɔlaa nɛ pɩkɩlɩ ɛzɩma ŋsɔɔlaa yɔ. Mbʋ pi-ɖeke ɛñɩnɩɣ se ɖɩla yɔ lɛ se ɖɩwɩlɩ ɖɛ-ɛsɩmɩyɛ kɩhɛyʋʋ pʋ-ñʋʋ taa kʋjɔʋ ŋgʋ ɛlabɩ-ɖʋ yɔ kɩ-yɔɔ, ɖɩwɛɛnɩ tisuu ɛ-yɔɔ nɛ ɖɩñamɩ-ɩ. Toovenim taa lɛ, kɩhɛyʋʋ pʋ-ñʋʋ taa kɩlaʋ kɛ kʋjɔʋ ŋgʋ kɩwɩlɩɣ se Yehowa sɔɔlɩ-ɖʋ siŋŋ yɔ.—Ekl. 3:11. w25.01 22-23 § 8-9

Toovenim taa lɛ, mbʋ ɖɩnaɣ, ndʋ ɖɩnɩɣ nɛ ɛzɩma pɩlakɩ-ɖʋ yɔ, nabʋyʋ taa pɩwɛnɩ ɖoŋ lɩmaɣza wena ɖɩkpakɩɣ yɔ a-taa naayɛ yɔɔ. Ɛlɛ ye pi-ɖeke piɖiyiɣni-ɖʋ nɛ ɖɩkpakɩɣ lɩmaɣza sɔsɔna yɔ, pɩkaɣ-ɖʋ kɔnʋʋ kaɖɛ. Paa piipeɣziɣ-ɖʋ yɔ, ye ɖɩɖɔŋnɩ mbʋ pɩnaɣ yɔ pi-ɖeke yɔ, pʋtɔma yɔ pɩtɛŋna se ɖɩlakɩ mbʋ Yehowa tɩsɔɔlɩ yɔ. (Ekl. 11:9; Mat. 24:​37-39) Ɛlɛ ye ɖɩɖɔŋnɩ tisuu yɔ, pɩtʋʋ fɛyɩ se ɖɩkaɣ kpaɣʋ lɩmaɣza wena ‘akɛdɩnɩ Kɩbaɣlʋ yɔ.’ Ye ɖɩɖɔŋ Ɛsɔ lɔŋ tasʋʋ yɔɔ yɔ, ɖɩkaɣ hiɣu maɣzɩm taa laŋhɛzɩyɛ nɛ koboyaɣ siŋŋ. (Keɣ. 16:​8, 9; Iza. 48:​17, 18) Nɛ ye ɖiwoki pɩ-yɔɔ nɛ ɖɩɖɔŋnɩ tisuu yɔ, ɖɩkaɣ hiɣu wezuu maatɛŋ. (2 Kɔr. 4:18) Ɛzɩma ɖɩpɩzɩɣ nɛ ɖɩna se ɖɩwɛɛ nɛ ɖɩɖɔŋnɩ tisuu yaa ɖɩwɛɛ nɛ ɖɩɖɔŋnɩ mbʋ pɩnaɣ yɔ? Pɩwɛɛ se ɖɩpɔzɩ ɖa-tɩ tɔm tʋnɛ: Ɛbɛ ɖiyiɣ-m alɩwaatʋ ndʋ mancaɣ kpaɣʋ lɩmaɣzɩyɛ naɖɩyɛ yɔ? Mbʋ manaɣ yɔ pi-ɖeke piɖiyiɣni-m? Yaa Yehowa lɔŋ tasʋʋ ɖiyiɣni-m? w25.03 20 § 3-4

Ða-tɩŋa ɖɩpɩzɩɣ nɛ ɖɩla nabʋyʋ nɛ ɖɩsɩnɩ ɛyaa lalaa nɛ pɔsɔɔlɩ se pasʋʋ fezuu taa paradisuu taa. Pɩsa nɛ ɖɩla mbʋ lɛ, pɩpɔzʋʋ se ɖɩmaɣzɩnɩ Yehowa. Ɛɛkpaɣ ɛyaa nɛ ɖoŋ se pasʋʋ ɛ-ɛgbɛyɛ taa. Ɛlɛ ‘ɛhɔŋ’ ɛyaa hɛɛɛ nɛ ɛkɔŋnɩ ɛ-cɔlɔ. (Yoh. 6:44; Yer. 31:3) Laŋa kɩbana tɩnaa mba pɛkpɛlɩkɩ Yehowa wɛtʋ kɩbandʋ tɔm yɔ, pɔñɔtʋʋnɩ-ɩ pa-maɣmaɣ. Ɛzɩma ɖɩpɩzɩɣ ɖɩtɩŋnɩ ɖɛ-wɛtʋ kɩbandʋ nɛ ɖe-wezuu caɣʋ kɩbaŋʋ yɔɔ nɛ ɖɩhɔ ɛyaa nɛ ɖɩkɔnɩ fezuu taa paradisuu taa? Pɩ-taa nabʋyʋ lɛ se ɖɩwɩlɩ ɖo-koobiya sɔɔlɩm nɛ ɖɩlabɩ-wɛ camɩyɛ lakasɩ. Alɩwaatʋ ndʋ ɛyaa kɩfama kɔŋ kediɣzisi taa yɔ, ɖɩsɔɔlaa se pɔyɔɔdɩ se: «Toovenim taa lɛ, Ɛsɔ wɛ mɩ-hɛkʋ taa.» Pʋtɔma yɔ, tɔm ndʋ Kɔrɛntɩ ñɩma mba pataakɛ koobiya nɛ powokaɣ kediɣzisi yɔ paayɔɔdaa. (1 Kɔr. 14:​24, 25; Zak. 8:23) Ye mbʋ, pɩwɛɛ se ɖiwolo pɩ-yɔɔ nɛ ɖɩɖɔ sɔnɔ evemiye mayaɣ lɔŋ tasʋʋ yɔɔ. w24.04 23-24 § 16-17