Décembre

Yesu tɔmkpɛlɩkɩyaa tisi Ɛsɔtɔm yɔɔ nɛ pala mbʋ payɩ papɩzɩɣ yɔ nɛ pɔɖɔ tɩ-yɔɔ pe-wezuu caɣʋ taa. (Yoh. 17:6) Paa mbʋ yɔ, pataanɩɩ mbʋ pʋyɔɔ paakʋ Yesu ɛzɩ kɩwɛɛkɩm laɖʋ nɔɔyʋ yɔ pɩ-taa. Yesu kaanawa se ɛ-tɔmkpɛlɩkɩyaa kaawɛnɩ tisuu Yehowa yɔɔ nɛ pɔsɔɔlɩ-ɩ, ɛlɛ eeɖiɣzinaa se pɩpɔzʋʋ se panɩɩ Masɩ taa nɛ pɩkɩlɩ. (Luka 9:​44, 45; Yoh. 20:9) Pʋyɔɔ ɛsɩnɩ-wɛ se panɩɩ tɔm ndʋ pakalaɣ Masɩ taa yɔ tɩ-taa. Iyele nɛ ɖɩna ɛzɩma ɛɛlabɩ mbʋ alɩwaatʋ ndʋ ɛlɩ ɛ-tɔmkpɛlɩkɩyaa 2 yɔɔ Emayuusi nʋmɔʋ taa yɔ. Yesu taaheyi abalaa mba kpaagbaa weyi ɛɛkɛnaa yɔ. Ɛlɛ ɛpɔzɩ-wɛ tɔm. Ɛbɛ yɔɔ? Pʋtɔma yɔ, ɛñɩnaɣ se pa-maɣmaɣ pɔyɔɔdɩ ndʋ pamaɣzaɣ yɔ nɛ ndʋ tɩɩwɛ pa-laŋa taa yɔ. Nɛ mbʋ palaba. Peheyi-i se mba kaaɖaŋaa se Yesu kaɣ holuu Izrayɛɛlɩ mba Roma mba nesi tɛɛ. (Luka 24:​18-27) Yesu tɩŋnɩ Masɩ yɔɔ nɛ ɛsɩnɩ-wɛ nɛ panɩɩ mbʋ pɩɩlaba yɔ pɩ-taa. Pɩlabɩ alɩwaatʋ natʋyʋ pʋwayɩ ɖanaɣ ŋga kɔ-yɔɔ lɛ, Yesu kpaɣ alɩwaatʋ nɛ ɛsɩnɩ ɛ-tɔmkpɛlɩkɩyaa lalaa nɛ panɩɩ toovenim tɔm ndʋ tɩ-taa.—Luka 24:​33-48. w24.10 14 § 9-10

Yesu kpɛlɩkɩ ɛ-Caa cɔlɔ mbʋ pɩwɛɛ se ɛla nɛ ndʋ pɩwɛɛ se ɛyɔɔdɩ yɔ. Ɛzɩ Yesu yɔ, Ɛsɔtɔm yɔɔ Yehowa ɛgbɛyɛ tɩŋɩɣna nɛ ɖɩsɩɣnɩ-ɖʋ se ɖɩtɩlɩ mbʋ pɩwɛ ɖeu nɛ mbʋ pɩfɛyɩ ɖeu yɔ nɛ tɩ-yɔɔ ɖɔɖɔ ɖɩtɩŋɩɣna nɛ ɖiɖiyiɣ-ɖʋ ɖe-wezuu caɣʋ taa. (2 Tim. 3:​16, 17) Ðoŋ ɖoŋ lɛ, pɔtɔzʋʋ-ɖʋ se ɖɩkalɩɣ Ɛsɔtɔm nɛ ɖɩɖɔŋ tɩ-yɔɔ. Alɩwaatʋ ndʋ ɖɩtɩŋɩɣnɩ ɖɛ-ɛgbɛyɛ takayɩsɩ yɔɔ nɛ ɖɩkpɛlɩkɩɣ Bibl yɔ, ɖihikiɣ wazasɩ sakɩyɛ. Pɩsɩɣnɩ-ɖʋ se ɖɩkpaɣ tɔm ndʋ Bibl yɔɔdʋʋ yɔ nɛ ɖɩmaɣzɩnɩ lɔŋ weyi ɛgbɛyɛ tasɩɣ-ɖʋ yɔ. Alɩwaatʋ ndʋ ɖɩnaɣ se Bibl yɔɔ Yehowa ɛgbɛyɛ tɩŋɩɣna nɛ ɖɩtasɩɣ-ɖʋ lɔŋ yɔ, ɖɩtaɣ-ɖɩ liu nɛ pɩkɩlɩ. (Roma 12:2) Yesu susi «Ɛsɔ Kewiyaɣ tɔm kɩbandʋ.» (Luka 4:​43, 44) Yesu ɖʋ ɖɔɖɔ ɛ-wayɩ tɩŋɩyaa paɣtʋ se posusi Kewiyaɣ tɔm. (Luka 9:​1, 2; 10:​8, 9) Sɔnɔ, mba payɩ pɛwɛ Yehowa ɛgbɛyɛ taa yɔ, posusuu Kewiyaɣ tɔm paa le patɩɩwɛɛ yɔ. w24.04 9 § 5-7

Wolo pɩ-yɔɔ nɛ ŋtaa liu lɔŋ weyi Yehowa ɛgbɛyɛ tasɩɣ yɔ. Caanaʋ taa Izrayɛɛlɩ taa, Yehowa kaatɩŋnɩ Moyizi yɔɔ nɛ ɛtasɩ ɛ-samaɣ lɔŋ nɛ pʋwayɩ lɛ ɛtɩŋnɩ Yozuwee yɔɔ nɛ ɛtasɩ-kɛ lɔŋ. (Yoz. 1:17) Pɩɩɖɔmnɩ Izrayɛɛlɩ mba camɩyɛ alɩwaatʋ ndʋ pakpaɣ abalaa mba se pɛkɛ Ɛsɔ lone taa caɣyaa yɔ. Pɩnzɩ mɩnɩŋ sakɩyɛ wayɩ, alɩwaatʋ ndʋ Krɩstʋ ɛgbɛyɛ ñɔwa yɔ, apostoloowaa 12 ɖɛɣaɣnɩ Ɛsɔ samaɣ nɔɔ. (Tʋma 8:​14, 15) Pʋwayɩ lɛ, Yeruzalɛm ɛzʋtʋyaa lalaa sɔzɩ pɔ-yɔɔ. Koobiya ɖɔm lɔŋ weyi abalaa siɣsiɣ tɩnaa mba patasaɣ-wɛ yɔ ɩ-yɔɔ lɛ, «agbaa wɛɛ nɛ akpaɣ ɖoŋ tisuu taa nɛ ahukuu paa ɖooye.» (Tʋma 16:​4, 5) Sɔnɔ ɖɔɖɔ, ye ɖɩɖɔŋ lɔŋ weyi ɛgbɛyɛ tasɩɣ-ɖʋ yɔ ɩ-yɔɔ yɔ, Yehowa wazɩɣ-ɖʋ. w24.07 10 § 10

Yehowa kaasɔɔlɩ Wiyaʋ Daviid siŋŋ. Halɩ ɛya-ɩ se «ɛyʋ weyi ɛ-tɔm kɛdɩnɩ-m yɔ.» Ɛlɛ Daviid kɔm nɛ ɛla kɩwɛɛkɩm sɔsɔm, pɩ-taa nabʋyʋ lɛ se ɛlabɩ acɛyɛ nɛ ɛtɛ ɛkʋ ɛyʋ. Moyizi Paɣtʋ taa lɛ, Daviid mʋnɩ sɩm. (Lev. 20:10; Kɩg. 35:31) Paa mbʋ yɔ, Yehowa kaasɔɔlaa se ɛsɩnɩ Daviid nɛ ekpiɖi ɛ-kɩwɛɛkɩm yɔɔ. Paa Daviid etaakpiɖiti ɛ-kɩwɛɛkɩm yɔɔ yɔ, Yehowa tiyi nayʋ Naataanɩ ɛ-cɔlɔ. Naataanɩ tɩŋnɩ kɩɖaʋ nakʋyʋ yɔɔ se pɩsa nɛ etukuni Daviid laŋɩyɛ. Piitukuni Daviid siŋŋ nɛ ekpiɖi ɛ-kɩwɛɛkɩm yɔɔ. (2 Sam. 12:​1-14) Ɛma keɣa nakɛyɛ nɛ kawɩlɩɣ ɛzɩma ekpiɖi mbʋ ɛlaba yɔ pɩ-yɔɔ siŋŋ yɔ. (Keɣ. 51, kajalaɣ tɔm.) Keɣa ŋga, kɛhɛzɩ ɛyaa mba palabɩ kɩwɛɛkɩm yɔ pa-taa sakɩyɛ laŋa nɛ keseɣti-wɛ nɛ pekpiɖi pa-kɩwɛɛkɩm yɔɔ. Ða-taa wɛ leleŋ siŋŋ se Yehowa sɔɔlɩ Daviid nɛ ɛsɩnɩ-ɩ nɛ ekpiɖi ɛ-kɩwɛɛkɩm yɔɔ. w24.08 10 § 9

Ɛyaa sakɩyɛ tisiɣ se piya falɩsʋʋ kɛ tʋmɩyɛ nɖɩ ɖɩpɔzʋʋ pana ñaɣʋ siŋŋ yɔ. Ye ŋkɛ lʋlɩyʋ weyi ɛwɛnɩ piya cikpesi yɔ, ɖɩsaŋɩ-ŋ mbʋ pʋyɔɔ yɔ ŋwɛɛ nɛ ŋñakɩ pana se ŋsɩnɩ-sɩ nɛ sɩcɛyɩsɩ si-tisuu. (Wp. 6:​6, 7) Ñe-piya wɛɣ nɛ sɩpaɣlɩɣ lɛ, sɩpɩzɩɣ nɛ sɩpaɣzɩ sɩ-tɩ tɔm pɔzʋʋ pɩlɩɩnɩ Bibl wɩlɩtʋ nɛ wezuu kɩbaŋʋ caɣʋ paɣtʋ ndʋ tɩwɛ Bibl taa yɔ tɩ-yɔɔ. Kajalaɣ taa lɛ, pɩtɩla tɔm ndʋ ña-pɩɣa pɔzʋʋ yɔ, tiyeki nɛ ŋpaɣzɩ nɩɣzʋʋ. Halɩ kɔ-tɔm pɔzʋʋ mbʋ pɩpɩzɩɣ piyele nɛ ŋmaɣzɩ se ke-tisuu wɛɛ nɛ pɩhɛɣ. Ɛlɛ toovenim taa lɛ, piya kaapaɣlɩɣ lɛ, pɩcɛyaa se sɩpɔzʋʋ tɔm nɛ pɩsa nɛ sɩcɛyɩsɩ si-tisuu. (1 Kɔr. 13:11) Pʋyɔɔ lɛ, pɩfɛyɩ se sɔɔndʋ ɛkpa-ŋ. Tɔm ndʋ ña-pɩɣa pɔzʋʋ ɖe-tisuu yɔɔ yɔ, ŋpɩzɩɣ nɛ ŋkpaɣ-tʋ se tɩkɛnɩ-ŋ waɖɛ nɖɩ ɖɩ-yɔɔ ŋpɩzɩɣ ŋtɩŋna nɛ ŋsɩnɩ-kɛ nɛ kɛwɛɛnɩ lɛɣtʋ ndʋ tɩsɩɣnɩ-kɛ se kamaɣzɩ ka-ñʋʋ taa camɩyɛ yɔ. w24.12 14 § 1-2

Pɩɩcɛyaa se Ebree Krɩstʋ mba ɩwɛɛnɩ tisuu sɔsɔm, mbʋ pʋyɔɔ yɔ mbʋ pɩzaɣna se pɩsɩnɩ-wɛ nɛ pehiɣ ñʋʋ yabʋ alɩwaatʋ ndʋ kʋñɔŋ talɩɣ Yuudee yɔ. (Ebr. 10:​37-38) Yesu kaapaɣ ɛ-wayɩ tɩŋɩyaa se alɩwaatʋ ndʋ panaɣ sɔɔjanaa kɔm nɛ pɔcɔɔ Yeruzalɛm nɛ pata yɔ, pɩwɛɛ se pese nɛ pakpa pʋŋ taa. Ɛ-lɔŋ tasʋʋ mbʋ pitukaɣni Krɩstʋ mba tɩŋa, paa paawɛ Yeruzalɛm tɛtʋ taa maɣmaɣ yaa kɔfɩ nakʋyʋ taa yɔ. (Luka 21:​20-24) Ðoŋ ɖoŋ lɛ, alɩwaatʋ ndʋ sɔɔjanaa kɔŋ se pala you yɔ, ɛyaa mba pɛwɛ kɔfɩnaa taa yɔ peseɣ nɛ pasʋʋ tɛtʋ taa se ti-kolonzi ɩkandɩyɩ pɔ-yɔɔ. Ɛyaa ɛsɩndaa lɛ, pɩkɛnɩ kɩmɛlɛndʋ se ɛyʋ ese nɛ ɛkpa pʋŋ taa, nɛ pɩɩpɔzaa se ɛyʋ ɛwɛɛnɩ tisuu sɔsɔm pʋcɔ nɛ ɛɖɔ Yesu lɔŋ tasʋʋ mbʋ pɩ-yɔɔ. Pɩɩpɔzaa ɖɔɖɔ se Ebree Krɩstʋ mba ɩtaa liu ɛyaa mba pɔ-yɔɔ Yesu tɩŋaɣna nɛ eɖiyiɣ ɛgbɛyɛ yɔ. Pɩtɩla, ɛyaa mba pɛɖɛɣaɣ nɔɔ yɔ, paatasɩ lɔŋ nɩɩyɩ ɖeyi ɖeyi se pɩsɩnɩ ɛgbɛyɛ taa koobiya tɩŋa nɛ patɩlɩ alɩwaatʋ ndʋ pɩɩwɛɛ se pese nɛ ɛzɩma pɩɩwɛɛ se pala mbʋ yɔ.—Ebr. 13:17. w24.09 10 § 9-10

Alɩwaatʋ ndʋ Yesu kaawɛ tɛtʋ yɔɔ yɔ, ɛlabɩ tʋmɩyɛ nɖɩ ɛ-Caa kaaɖʋ-ɩ yɔ ɖeyi ɖeyi. (Yoh. 17:4) Ɛlɛ Yesu taamaɣzɩɣ se e-ɖeke ɛpɩzaɣna se ɛla Yehowa tʋma camɩyɛ. Ɛfalɩsɩ ɛyaa lalaa se pala tʋmɩyɛ nɖɩ. Yesu ɖʋ ɛ-tɔmkpɛlɩkɩyaa tʋmɩyɛ se pɔcɔnɩ Yehowa heŋ weyi ɩmʋ ñɩm yɔ ɩ-yɔɔ, nɛ pɛɖɛɛ nɔɔ tɔm susuu nɛ tɔm wɩlʋʋ tʋmɩyɛ taa. Yesu tasɩ ɛ-tɔmkpɛlɩkɩyaa lɔŋ kpayɩ nɛ sɔɔlɩm. Pa-taa nabɛyɛ taa taatɛ se ɛsɩba nɛ pʋwayɩ lɛ efe, pʋyɔɔ ɛtasɩ-wɛ lɔŋ se pɩsɩnɩ-wɛ nɛ patɩlɩ toovenim. (Luka 24:​25-27; Yoh. 20:27) Eheyi-wɛ ɖɔɖɔ se pasɩɩ Yehowa samaɣ yɔɔ cɔnʋʋ kajalaɣ ɖeɖe, nɛ pɩtaakɛ pa-tʋma. (Yoh. 21:15) Ɛtɔzɩ-wɛ se pataakpakɩɣ mbʋ palakɩ yɔ nɛ pamaɣzɩɣnɩ mbʋ lalaa lakɩ yɔ. (Yoh. 21:​20-22) Ɛñɔɔzɩ ɖɔɖɔ lɩmaɣza wena pɛwɛnɩ Kewiyaɣ yɔɔ nɛ atɩtʋʋzɩ yɔ nɛ ɛsɩnɩ-wɛ se paka ñʋʋ nɛ tɔm kɩbandʋ susuu.—Tʋma 1:​6-8. w24.10 15-16 § 13-14

Ñamtʋ yakɩ ɖa-ñʋʋ. Ɛzɩ Izrayɛɛlɩ mba kaañɔtɩnʋʋ lidaʋ tɛtʋ kpam yɔ, ɖa ɖɔɖɔ ɖɩñɔtɩnɩ ɛjaɖɛ kɩfaɖɛ nɖɩ Yehowa labɩ-ɖʋ ɖɩ-tamaɣ yɔ kpam. Pɩkazɩ pazɩ lɛ, tɛtʋ kaɣ ɖaɣnʋʋ pɩsʋʋ paradisuu. (Iza. 35:1; Luka 23:43) Sataŋ nɛ ɛ-aleewaa paakaɣ tasʋʋ wɛʋ. (Natʋ 20:​2, 3) Cɛtɩm Ɛsɔ sɛtʋ ɛɛkaɣ tasʋʋ wɛʋ se tiposi ɛyaa nɛ Yehowa. (Natʋ 17:16) Ɛyaa kominawaa ɩɩtasɩɣ wɛʋ se pawɩlɩ ñaŋ mba pɔ-yɔɔ pɔtɔkɩ kewiyitu yɔ. (Natʋ 19:​19, 20) Kañatʋ tɩnaa ɩɩkaɣ wɛʋ paradisuu taa. (Keɣ. 37:​10, 11) Paa le, ɛyaa tɩŋa kaɣ ñam Yehowa paɣtʋ, nɛ pɩkaɣ yebu nɛ ɛyaa wɛɛ nɔɔ kʋɖʋmaɣ nɛ laŋhɛzɩyɛ taa. Ɛyaa kaɣ ɖama sɔɔlʋʋ nɛ pataa ɖama liu. (Iza. 11:9) Pɩkɛnɩ lidaʋ kɩbaŋʋ kpem. Kɔzɩ kɔzɩ lɛ, ye ɖɩñaŋ Yehowa yɔ, pɩtɩkɛ pɩnzɩ mɩnɩŋ sakɩyɛ ɖɩkaɣ caɣʋ wezuu paradisuu taa tɛtʋ yɔɔ, ɛlɛ ɖɩkaɣ caɣʋ wezuu tam tam.—Yoh. 3:16. w24.11 9 § 7

Ða-alɩwaatʋ taa kpem natʋ tɔm ndʋ pɔyɔɔdɩ tɩ-tɔm sɔnɔ evemiye mayaɣ taa yɔ tɩwɛɛ nɛ tɩkɩlɩɣ labʋ. Pɛɖɛzɩ Kewiyaɣ tɔm kʋnʋmɩŋ weyi ɩ-taa yɔ, ɩcɛzɩ 1000; nɛ ɖɛ-tɛ intɛrnɛɛtɩ lone jw.org wɛɛ nɛ ɖɩsɩɣnɩ ɛjaɖɛ yɔɔ ɛyaa hɔɔlʋʋ sɔsɔʋ se panɩɩ Kewiyaɣ tɔm. Paa mbʋ yɔ, Yesu kaaheyi ɛ-tɔmkpɛlɩkɩyaa se paakaɣ ‘cɔʋ tɛtʋ tɩŋa nɛ pɛtɛ’ yaa paakaɣ pɩzʋʋ nɛ posusi ɛyaa tɩŋa tɔm pʋcɔ nɛ pɩtalɩ alɩwaatʋ ndʋ ɛkɔŋ yɔ. (Mat. 10:23; 25:​31-33) Yesu tɔm ndʋ, tɩkaɣ labʋ ɖɔɖɔ ɖa-alɩwaatʋ tʋnɛ tɩ-taa. Sɔnɔ ɛyaa miiliyɔɔwaa sakɩyɛ wɛ lona wena a-taa paɖɩɣ ɖɔ-tɔm susuu tʋmɩyɛ nʋmɔʋ yɔ. Pɩtasɩ lɛ, paa cɛcɛyaɣ kʋɖʋmaɣ ŋga ka-taa lɛ, palʋlʋʋ piya mɩnɩŋ sakɩyɛ. Ðɩlakɩ ɖo-ɖoŋ ɖeɖe se ɖɩtanɩ tɔm kɩbandʋ «ajɛɛ kpeekpe nɛ cejewe kpeekpe nɛ kʋnʋmɩŋ kpeekpe» taa ɛyaa. (Natʋ 14:6) Ɛlɛ tɔm lɛ se ɖɩɩkaɣ pɩzʋʋ nɛ ɖisusi tɔm kɩbandʋ paa ɛyʋ weyi tɛtʋ kpeekpe yɔɔ pʋcɔ nɛ ɛjaɖɛ tɛm talɩ. w24.05 10 § 6-7

Yesu tɩŋaɣnɩ ɛ-yɔɔdaɣ yɔɔ nɛ ɛhɛzɩɣ ɛyaa lalaa laŋa nɛ ɛkpazɩɣ-wɛ ɖoŋ. Ɛtaañasɩɣ tɔm ɛ-wayɩ tɩŋɩyaa. (Luka 8:​47, 48) Pɩkɛnɩ kɩɖaʋ kɩbaŋʋ siŋŋ walaa Krɩstʋ ñɩma. Yesu ɖʋ paɣtʋ walaa se pataacɛtɩ pa-halaa. Ɛɖaɣnɩ yɔɔdʋʋ tɔm ndʋ ɛ-Caa kaaheyi walaa yɔ se ‘pɔñɔɔnɩ pa-halaa.’ (Mat. 19:​4-6) Grɛɛkɩ tɔm piye nɖɩ palabɩnɩ tʋmɩyɛ masɩ nzɩ sɩ-taa nɛ pɛɖɛzɩ-ɖɩ se «ɛñɔɔnɩ» yɔ, ɖɩ-tɔbʋʋ lɛ se «ɛtaaɖɩnɩ.» Ye mbʋ, sɔɔlɩm mbʋ pɩwɛ walʋ nɛ ɛ-halʋ pɛ-hɛkʋ taa yɔ, pɩwɛɛ se pɩwɛɛ ɖoŋ siŋŋ nɛ pɩwɛɛ ɛzɩ pataaɖɩnɩ ɖama yɔ. Nɛ ɛzɩma pataaɖɩnɩ ɖama yɔ, ye pɔtɔm se payasɩɣ ɖama yɔ pɩkɔŋnɩ-wɛ kaɖɛ. Nɛ ye sɔɔlɩm mbʋ, pɩwɛ walʋ nɔɔyʋ nɛ ɛ-halʋ pɛ-hɛkʋ taa yɔ, walʋ ɛɛkaɣ cɔnʋʋ kʋzʋʋ kɩlɛmɩŋ. Nɛ ye ɛlɩ kʋzʋʋ kɩlɛmʋʋ nakʋyʋ yɔɔ tuda yɔ, ɛkaɣ kɛzʋʋ ɛ-ɛsa kpaagbaa se «ataacɔnɩ mbʋ pɩɩwazɩɣ pʋyʋ yɔ.» (Keɣ. 119:37) Ɛzɩ Yɔɔb yɔ, ɛ nɛ ɛ-ɛsa paɖʋʋ ɛgbɛyɛ se ɛɛcɔŋnɩ halʋ nɔɔyʋ nɛ lɩmaɣza kɩdɛkɛda.—Yɔɔb 31:1. w25.01 10 § 12-13

Ɛzɩma Yehowa kpakɩɣ nɛ ekpeɣu ɖa ɛyaa mantɩtalɩ pilimwaa yɔ, pɩwɛ ndɩ kpem nɛ ɛzɩma ɖɩkpakɩɣ nɛ ɖikpeɣu ɖama yɔ. Nɔɔyʋ ɛɛpɩzɩɣ nɛ ɛkpaɣ nɛ ekpeɣ ɛzɩ Yehowa kpakʋʋ nɛ ekpeɣu yɔ. Keɣa maɖʋ yɔɔdɩ Yehowa tɔm se: «Ñɔ-cɔlɔ kpaɣʋ nɛ kpeɣu siŋŋ wɛɛ, se pɩsa nɛ pese-ŋ sɔɔndʋ.» (Keɣ. 130:4) Toovenim taa lɛ, Yehowa kpaɣʋ nɛ kpeɣu kɛ «kpaɣʋ nɛ kpeɣu siŋŋ.» Ɛnʋ wɩlɩɣnɩ-ɖʋ mbʋ kpaɣʋ nɛ kpeɣu kɛnaa ɖeyi ɖeyi yɔ. Ebree Masɩ hɔɔlɩŋ nɩɩyɩ taa lɛ, Bibl mayaa labɩnɩ tʋmɩyɛ tɔm piye naɖɩyɛ nɛ pɔyɔɔdɩ Yehowa kpaɣʋ nɛ kpeɣu tɔm nɛ patɩlabɩnɩ-ɖɩ tʋmɩyɛ kpa nɛ pɔyɔɔdɩ ɛzɩma ɛyaa kpakɩɣ nɛ pekpeɣu ɖama yɔ pɩ-tɔm. Alɩwaatʋ ndʋ Yehowa kpakɩɣ nɛ ekpeɣ nɔɔyʋ yɔ, ɛhɩzɩɣ ɛyʋ ɛnʋ ɛ-kɩwɛɛkɩm caɣ caɣ. Taabalɩyɛ kɩbanɖɛ pɩzɩɣ nɛ ɖɩɖaɣnɩ wɛʋ ɛ nɛ ɩ pɛ-hɛkʋ taa. Ðɩwɛnɩ ɛsɩmɩyɛ siŋŋ se Yehowa kpakɩɣ nɛ ekpeɣu-ɖʋ caɣ caɣ tam sakɩyɛ. w25.02 8 § 1-3

Paa ɛyaa iiwelisiɣni-ɖʋ tɔm susuu taa yɔ, pɩtɩwɩlɩ se ɖɩtɩtalɩ ɖa-kaɖʋwa. Ɛbɛ yɔɔ? Mbʋ pʋyɔɔ yɔ ɖɩlabɩ mbʋ Yehowa nɛ ɛ-Pɩyalʋ pɔpɔzʋʋ-ɖʋ se ɖɩla yɔ: Ðɩlɩzɩ aseɣɖe. Halɩ paa ɖɩtɩkatɩ nɔɔyʋ nɛ ɖisusi-i tɔm yaa paa ɛyaa ikizaa se paawelisiɣni-ɖʋ yɔ, ɖɩpɩzɩɣ nɛ ɖihiɣ taa leleŋ, mbʋ pʋyɔɔ yɔ ɖɩnawa se ɖa-Caa weyi ɛwɛ ɛsɔdaa yɔ, ɛ-taa wɛnɩ-ɖʋ nɛ leleŋ. (Adu. 27:11) Ða-taa pɩzɩɣ nɛ pɩla leleŋ ɖɔɖɔ alɩwaatʋ ndʋ tɔm susuyu nɔɔyʋ lɩɣ laŋɩyɛ kɩbanɖɛ tʋ nɔɔyʋ yɔɔ ɖo-kooka taa yɔ. Feŋuu Tilimiye kpaɣ ɖa-tʋmɩyɛ nɛ ɖɩmaɣzɩnɩ ɛzɩma pañɩnɩɣ pɩɣa ŋga keleba yɔ. Ɛyaa sakɩyɛ ɖʋʋ nesi nɛ pañɩnɩ pɩɣa ŋga paa le. Alɩwaatʋ ndʋ panaɣ pɩɣa ŋga yɔ, pɩtɩkɛ weyi ɛna-kɛ yɔ e-ɖeke ɛ-taa lakɩnɩ leleŋ, ɛlɛ paa weyi ɛ-taa lakɩ leleŋ. Mbʋ ɖɔɖɔ paa ɛgbɛyɛ taa tʋ weyi lɛ, ɛɖʋʋ nesi nɛ palakɩ Yesu tɔmkpɛlɩkɩyaa kɩfama. Pɩpɔzʋʋ se ɛgbɛyɛ taa mba tɩŋa ɩɖʋ nesi nɛ posusi kooka taa mba kpeekpe tɔm, nɛ alɩwaatʋ ndʋ nɔɔyʋ paɣzɩɣ kediɣzisi kɔm yɔ, ɛyaa tɩŋa taa lakɩ leleŋ. w24.04 18 § 13-14

Ða-taa wɛ leleŋ siŋŋ nɛ mbʋ pɩɖaŋ-ɖʋ cee wayɩ yɔ. Ðɩwɛnɩ lidaʋ se Yehowa ɖoŋ taa lɛ, ɛyaa sakɩyɛ kaɣ kpɛndʋʋ ɖɔ-yɔɔ nɛ ɖɩsɛɛ-ɩ pʋcɔ nɛ kʋñɔŋ sɔsɔʋ paɣzɩ. Pɩtasɩ lɛ, ɖa-taa wɛ leleŋ se halɩ kʋñɔŋ sɔsɔʋ alɩwaatʋ taa, pɩtɩla ɛyaa sakɩyɛ kaɣ lɩʋ Sataŋ ɛjaɖɛ taa nɛ pɛkpɛndɩ ɖɔ-yɔɔ nɛ ɖɩsa Yehowa. Ɛlɛ pʋcɔ nɛ pɩtalɩ mbʋ lɛ, ɖɩwɛnɩ tʋmɩyɛ se ɖɩlakɩ. Ðɩwɛnɩ waɖɛ se ɖisusi tɔm ndʋ paakaɣ-tʋ tasʋʋ susuu wiɖiyi kpa yɔ tɛtʋ kpeekpe yɔɔ, pʋ-tɔbʋʋ se Kewiyaɣ tɔm kɩbandʋ. Alɩwaatʋ kʋɖʋmtʋ ndʋ tɩ-taa lɛ, pɩwɛɛ se ɖiwolo pɩ-yɔɔ nɛ ɖɩpaɣ ɛyaa se pɩkazɩ pazɩ lɛ, nabʋyʋ kaɣ labʋ. Pɩcɛyaa se ɛyaa ɩtɩlɩ se ɛjaɖɛ kɩdɛkɛdɩyɛ ɖɩnɛ ɖɩ-tɛm wɛɛ nɛ pɩñɔtʋʋ lɛɛ lɛɛ. Sɔɔlɩm mbʋ ɖɩwɛnɩ tɔm kɩbandʋ yɔɔ yɔ, sɔɔlɩm mbʋ ɖɩwɛnɩ ɛyaa yɔɔ yɔ nɛ kɔzɩ kɔzɩ lɛ, sɔɔlɩm mbʋ ɖɩwɛnɩ Yehowa nɛ ɛ-hɩɖɛ yɔɔ yɔ piseɣtiɣ-ɖʋ se ɖiwolo pɩ-yɔɔ nɛ ɖisusuu tɔm kpɛdɛyɛ nɛ kpekpeka pɩkɔɔ nɛ pɩsɩɩnɩ alɩwaatʋ ndʋ Yehowa yɔɔdʋʋ se: «Pɩmaɣ mbʋ» yɔ. w24.05 19 § 14-16

Ðoo wena aɖɛwa pʋcɔ nɛ pakʋʋ Yesu yɔ a-taa, ɛkpɛlɩkɩ Pɩyɛɛrɩ nɛ apostoloowaa lalaa lɔŋ pɩlɩɩnɩ tɩ luzuu yɔɔ. Pɩɩɖɩɣzɩ apostoloowaa kpem se Yesu wɛɛ nɛ ɛlakɩ tʋmɩyɛ nɖɩ pɩɩwɛɛ se lɩmɖʋyaa ɩla yɔ. Yesu hɔzɩ e-tokonaa kɩtɩnaa nɛ ɛsɩɩ hɔɔlʋʋ, ɛkpaɣ pɔbɔʋ nɛ ɛta ɛ-tɩnaɣ taa nɛ ɛɖʋ lɩm ñanaɣ taa nɛ ɛpaɣzɩ ɛ-tɔmkpɛlɩkɩyaa nɩŋgbanzɩ kɔʋ. (Yoh. 13:​4, 5) Pɩtɩla pɩkpaɣ alɩwaatʋ pʋcɔ nɛ ɛkɔ apostoloowaa 12 mba pa-tɩŋa pa-nɩŋgbanzɩ lɩm. Paa mbʋ yɔ Yesu labɩ tʋmɩyɛ nɖɩ ɖɩ-tɩŋa. Halɩ ɛkɔ ɖɔɖɔ Yudaasɩ weyi ɛkaɣaɣ lɩʋ ɛ-wayɩ yɔ ɛ-nɩŋgbanzɩ lɩm. Pʋwayɩ lɛ, Yesu lɩzɩ-wɛ tɔm taa nɛ suuɖu; ɛyɔɔdaa se: «Ɩnɩ mbʋ malabɩ-mɩ yɔ pʋ-tɔbʋʋ na? Ɩyaɣ-m se “Wɩlɩyʋ” nɛ “Kɩbaɣlʋ,” nɛ ɩwɛnɩ toovenim, mbʋ pʋyɔɔ yɔ mbʋ mɛnkɛwa. Ye mbʋ, ye ma weyi mɛnkɛ Kɩbaɣlʋ nɛ Wɩlɩyʋ yɔ mɔnkɔ mɩ-nɩŋgbanzɩ lɩm yɔ, mɩ ɖɔɖɔ pɩwɛɛ se ɩkɔ ɖama nɩŋgbanzɩ lɩm.»—Yoh. 13:​12-14. w25.03 10 § 9-11

Ɛjaɖɛ ɖɩnɛ ɖɩ-wɛtʋ yeki nɛ pɩwɛɣ-ɖʋ kaɖɛ se ɖɩñɔɔnɩ Yehowa kpam. Ɛyaa sakɩyɛ iitisiɣ se Ɛsɔ wɛɛ. Ðoŋ ɖoŋ lɛ, mba paaɖɔŋ Ɛsɔ paɣtʋ yɔɔ yɔ, pɩwɛ ɛzɩ piɖeɣni-wɛ pe-wezuu caɣʋ taa yɔ nɛ pɩkɩlɩɣ yɔ. Alɩwaatʋ ndʋ ɖɩnaɣ mbʋ yɔ, pɩpɩzɩɣ nɛ pɩtakɩ ɖe-tisuu. Paa ɖitisiɣ se Ɛsɔ wɛɛ yɔ, ɖɩpɩzɩɣ nɛ ɖɩpaɣzɩ ɖa-tɩ pɔzʋʋ se ɛzɩ ɛkaɣ-ɖʋ sɩnʋʋ na. Keɣa 73 maɖʋ kaawɛnɩ lɩmaɣza ana ɖɔɖɔ. Ɛnaɣaɣ se pɩɩwɛɛ nɛ piɖeɣni mba pɔcɔ-ɩ nɛ pata nɛ paaɖɔŋ Ɛsɔ paɣtʋ yɔɔ yɔ. Piyeba nɛ ɛpaɣzɩ ɛ-tɩ pɔzʋʋ se ye ewobi pɩ-yɔɔ nɛ ɛsɛɣ Yehowa yɔ, ɛzɩ pɩwazɩɣ pʋyʋ. (Keɣ. 73:​11-13) Ɛbɛ kɔma nɛ pɩsɩnɩ keɣa maɖʋ nɛ ɛlɛɣzɩ ɛ-lɩmaɣza? Ɛmaɣzɩ mbʋ pɩkaɣ talʋʋ mba paataɣ Yehowa liu yɔ pɩ-yɔɔ. (Keɣ. 73:​18, 19, 27) Ɛmaɣzɩ ɖɔɖɔ wazasɩ nzɩ ɛyʋ hikiɣ alɩwaatʋ ndʋ ɛsɛɣ Yehowa yɔ sɩ-yɔɔ. Ða ɖɔɖɔ, ɖɩpɩzɩɣ nɛ ɖɩmaɣzɩ wazasɩ nzɩ payɩ Yehowa kɔnɩ ɖɔ-yɔɔ yɔ sɩ-yɔɔ. w24.06 25 § 16-17

Bibl alɩwaatʋ taa, nabɛyɛ mulaɣ po-koobiya mba pɛkɛ kʋñɔndɩnaa yɔ. Ɛzɩma tɩyɛ? Pakɩndaɣ-wɛ liidiye nɛ pɔpɔzʋʋ-wɛ se pɛhɛyɩnɩ kɛzɛɣa. Pɩtasɩ lɛ, tɔm hʋyaa tisaɣ nɛ pataɣ pɔ-nɔsɩ num nɛ pakʋʋ mba patɩɖɔɔ wɛɛ yɔ pɔ-tɔm. Yehowa paɖɩɣ lakasɩ nzɩ. (Ezek. 22:12) Pɩwɛɣ ɖeu se ɖɩmaɣzɩ nɛ ɖɩna lɩmaɣza wena ɖɩwɛnɩ liidiye yɔɔ yɔ. Pɔzɩ ña-tɩ se: «Ðoŋ ɖoŋ lɛ, mamaɣzɩɣ liidiye nɛ mbʋ manpɩzɩɣ nɛ maya yɔ pɩ-yɔɔ? Ye mankɩndɩ nɔɔyʋ cɔlɔ liidiye yɔ, maahɛyɩɣ-ɩ ɖɩ lɔŋ nɛ mamaɣzɩɣ se ɛfɛyɩ liidiye kɛdɛɖaɣ taa? Liidiye nɖɩ mɛwɛna yɔ ɖiyeki nɛ mamaɣzɩɣ se mamʋ ñɩm nɛ pɩkɩlɩ lalaa na? Pɩwɛ-m kaɖɛ se malakɩ lalaa kʋjɔŋ na? Mamaɣzɩɣ se ye koobu nɔɔyʋ ɛwɛnɩ liidiye sakɩyɛ yɔ, pɩwɩlɩɣ se ɛsɔɔlɩ liidiye nɛ pɩkɩlɩ Yehowa? Manɖʋʋ taabalɩyɛ nɛ ñɩm tɩnaa nɛ man-paa fɛyɩnɩ kʋñɔndɩnaa na?» Ðihiɣ waɖɛ sɔsɔɖɛ se ɖɩkɛ agɔma Yehowa kizinziku tɛɛ. Ye ɖɩfɛyɩ liidiye laɣzaɣ yɔ, ɖɩpɩzɩɣ nɛ ɖiwolo pɩ-yɔɔ nɛ ɖɩkɛ agɔma Yehowa kizinziku tɛɛ. Ðɩnɛ ɛlɛ Yehowa ɛɛkaɣ-ɖʋ lɔʋ kaaʋ. w24.06 12-13 § 17-18

Pɩsa nɛ ɖɩkandɩyɩ ɖa-tɩ yɔɔ nɛ ɖɩtaatɔlɩ takɩm taa lɛ, pɩpɔzʋʋ se ɖɩñaɣ pana nɛ ɖɩwɛɛnɩ kɔɖɛyɩ kɩbaŋʋ. Ye ɖɩkpɛlɩkɩ ɛzɩma ‘ɖɩpaɖɩ mbʋ pɩkɛ kɩdɛkɛdɩm yɔ, nɛ ɖɩsɔɔlɩ mbʋ pɩkɛ kɩbam yɔ,’ ɖɩkaɣ tɛm ɖa-taa se ɖɩlakɩ mbʋ pɩtʋʋzaa yɔ nɛ pɩkɩlɩ nɛ ɖɩkaɣ tɛm ɖa-taa ɖɔɖɔ se ɖikiziɣ wɛtʋ ndʋ tɩpɩzɩɣ tituyi-ɖʋ nɛ ɖɩla kɩwɛɛkɩm yɔ. (Amo. 5:15) Ye ɖɩwɛnɩ kɔɖɛyɩ kɩbaŋʋ yɔ, ɖɩkaɣ pɩzʋʋ ɖɔɖɔ nɛ ɖɩkaɖɩnɩ takɩm alɩwaatʋ ndʋ ɖɩkatɩɣ wɛtʋ ndʋ tɩpɩzɩɣ nɛ tituyi-ɖʋ se ɖɩla kɩwɛɛkɩm nɛ ɖɩtɩɖʋna yɔ. Pɩpɔzʋʋ se ɖɛ-ɛsɩyɛ ɛsɛɛnɩ fezuu taa tʋma labʋ. Alɩwaatʋ ndʋ ɖiwoki kediɣzisi yaa ɖɩlɩɣ tɔm susuu yɔ, pɩwɛ kaɖɛ se pɩtakɩ-ɖʋ nɛ ɖɩla mbʋ pɩfɛyɩ ɖeu yɔ. Ɛlɛ pɩsɩɣnɩ-ɖʋ se ɖɩtɛ ɖa-taa se ɖɩlakɩ mbʋ pɩkɛdɩnɩ Yehowa yɔ. (Mat. 28:​19, 20; Ebr. 10:​24, 25) Ye ɖɩkalɩɣ Bibl nɛ ɖɩkpɛlɩkɩɣ-kʋ nɛ ɖɩmaɣzɩɣ tɔm ndʋ ɖɩkpɛlɩkɩɣ yɔ tɩ-yɔɔ yɔ, pɩcɛyɩsɩɣ sɔɔlɩm mbʋ ɖɩwɛna se ɖɩla mbʋ pɩtʋʋzaa yɔ, nɛ piyeki se ɖɩpaɖɩ mbʋ pɩfɛyɩ ɖeu yɔ nɛ pɩkɩlɩ. (Yoz. 1:8; Keɣ. 1:​2, 3; 119:​97, 101) Tɔzɩ se Yesu heyi ɛ-tɔmkpɛlɩkɩyaa se: «Ɩwɛɛ adɩma yɔɔ, se pɩsa nɛ ɩtaatɔlɩ takɩm taa.» (Mat. 26:41) Ðɩnɛ ɛlɛ ɖɩhaɣ Yehowa waɖɛ se ɛsɩnɩ-ɖʋ, nɛ pɩsɩɣnɩ-ɖʋ nɛ ɖɩtɛ ɖa-taa se ɖɩlakɩ mbʋ pɩkɛdɩnɩ-ɩ yɔ nɛ pɩkɩlɩ.—Yak. 4:8. w24.07 17-18 § 14-16

Mba pafalɩsɩɣ lalaa yɔ, pañakɩ pana nɛ pamaɣzɩɣnɩ Yehowa. Tɔzɩ se Yehowa haɣ lɔŋsɩnɖɛ faaa. Mbʋ ɖɔɖɔ, ɖɩwɩlɩɣ mbʋ ɖɩsɩma yɔ mba ɖɩfalɩsɩɣ-wɛ yɔ faaa. Ðɩtɩsɔɔlɩ se ɖɩsɩɩnɩ ɖa-tɩ mbʋ ɖɩsɩma yɔ pɩ-taa nabʋyʋ nɛ ɖɩmaɣzɩ se weyi ɖɩfalɩsɩɣ yɔ pɩtaala nɛ ɛmʋ ɖo-lone. Yaa ɖɩɩyɔɔdʋʋ se: «Nɔɔyʋ taafalɩsɩ-m. Ɛ-maɣmaɣ ɛñaɣ pana.» Pɩtɩmʋna se wɛtʋ ndʋ tɩwɛɛ Yehowa sɛyaa hɛkʋ taa. Ɛlɛ pɩtasɩna se ɖɩsɔɔlɩ faaa se ɖɩwɩlɩ mba ɖɩfalɩsɩɣ-wɛ yɔ mbʋ ɖɩsɩma yɔ lɛ, ɖɩcɛlɩɣ-wɛ ɖɔɖɔ «ɖa-maɣmaɣ ɖa-tɩ.» (1 Tes. 2:8) Ðɩtaɣ liu se mba ɖɔɖɔ ‘pakaɣ mʋnʋʋ camɩyɛ se pawɩlɩ lalaa’ mbʋ pɛkpɛlɩkaa yɔ. (2 Tim. 2:​1, 2) Ye ɖa-tɩŋa ɖɩsɔɔlɩ faaa nɛ ɖɩwɩlɩɣ lalaa mbʋ ɖɩsɩma yɔ, ɖa nɛ wɛ ɖɩkaɣ pɩsʋʋ lɔŋsɩnɖaa nɛ pɩkɩlɩ nɛ ɖihikiɣ taa leleŋ nɛ pɩkɩlɩ. w24.09 29 § 12-13

Ye pɩlakɩ-ŋ ɛzɩ ŋfɛyɩ niye tʋmɩyɛ naɖɩyɛ labʋ taa yɔ, pitaatibi-ŋ yɔɔɔ. Pɩtʋʋ fɛyɩ se ŋwɛnɩ wɛtʋ kɩbandʋ natʋyʋ, nɛ tɩpɩzɩɣ tɩwazɩ ɛgbɛyɛ. Maɣzɩ tɔm ndʋ Pɔɔlɩ yɔɔdɩ 1 Kɔrɛntɩ mba 12:​12-30 taa yɔ tɩ-yɔɔ nɛ ŋpɔzɩ Yehowa se ɛsɩnɩ-ŋ nɛ ŋna ɛzɩma titukuuni-ŋ yɔ. Tɔm ndʋ Pɔɔlɩ yɔɔdaa yɔ, tɩwɩlɩɣ kpayɩ kpayɩ se ɛzɩ Yehowa sɛyaa lalaa yɔ, ña ɖɔɖɔ ŋwɛnɩ wazaɣ nɛ ŋmʋ ñɩm ɛgbɛyɛ taa. Wolo pɩ-yɔɔ nɛ ŋlakɩ mbʋ ŋpɩzɩɣ yɔ Yehowa sɛtʋ taa, nɛ ŋsɩɣnɩ ɖɔɖɔ ño-koobiya. Ña-taa pɩzɩɣ nɛ pɩtɛ se ɛgbɛyɛ taa ɛzʋtʋyaa kaɣ maɣzʋʋ ñɔ-yɔɔ nɛ paɖʋ-ŋ tʋma wena ŋpɩzɩɣ nɛ ŋlabɩ-yɛ yɔ. (Roma 12:​4-8) Pɩpɔzʋʋ se Krɩstʋ mba tɩŋa ɩñɔtɩnɩ Yehowa, pɛkɛ mba palakɩ kʋjɔʋ nɛ taa leleŋ yɔ nɛ pacaɣ wezuu ŋgʋ kɩkɛdɩɣnɩ Ɛsɔ yɔ. Ye mbʋ, pɩtɩla ŋtɛm wɛnʋʋ wɛtʋ kɩbandʋ ndʋ pɩpɔzʋʋ se ɛyʋ ɛwɛɛna nɛ ɛpɩsɩ ɛgbɛyɛ taa tʋmlaɖʋ yɔ tɩ-taa sakɩyɛ. w24.11 17 § 12-13

Hana kaakatɩ tɩlasɩ sakɩyɛ, nɛ nzɩ yebina nɛ ɛwɛɛ laŋwɛɛkɩyɛ sɔsɔɖɛ taa nɛ ewiɣ. Hana walʋ kaawɛnɩ halʋ lɛlʋ nɛ pɩtasɩnɩ-ɩ. Payaɣ halʋ ɛnʋ se Peniina, nɛ ɛwɩlaɣ Hana ñaŋ pɩdɩɩfɛyɩ. Pɩtasɩ lɛ, Hana kaakɛ kaalʋlaɣ ɛlɛ Peniina ñaawɛnɩ piya sakɩyɛ. (1 Sam. 1:​1, 2) Ehoŋaɣ Hana kaahɛzaɣ mbʋ pʋyɔɔ yɔ ɛlɛ fɛyɩnɩ piya. Pɩɖʋwaɣ Hana ɖɩwɩzɩyɛ siŋŋ «nɛ piyeki nɛ ewiliɣ nɛ ɛɛtɔkɩ,» nɛ ɛɛwɛ «laŋwɛɛkɩyɛ taa siŋŋ.» (1 Sam. 1:​6, 7, 10) Ɛbɛ hɛzɩ Hana laŋɩyɛ? Mbʋ pɩsɩnɩ-ɩ yɔ pɩ-taa nabʋyʋ lɛ se ewobi Ɛsɔ sɛtʋ kɩɖanɖʋʋ tɛɛ ɖenɖe pɛsɛɣaɣ Yehowa yɔ. Ɛtalɩ peeɖe lɛ, etendi Yehowa se: ‘Na ña-lɩmɖʋyʋ kʋñɔŋ nɛ ŋtɔzɩ mɔ-yɔɔ nɛ taasɔɔ ña-lɩmɖʋyʋ yɔɔ.’ (1 Sam. 1:11) Yehowa na ɛ-pɛlɛ kʋsɔɔlʋ ɛsɩtɛɣlɩm. Ɛna ɛ-kʋñɔŋ, ewelisi ɛ-adɩma nɛ pʋwayɩ lɛ, ɛwazɩ-ɩ nɛ ɛlʋlɩ piya.—1 Sam. 1:​19, 20; 2:21. w24.12 21 § 5-7

Kɩhɛyʋʋ pʋ-ñʋʋ taa kɩlaʋ kpɛlɩkɩɣ-ɖʋ se Yesu maɣzɩɣ ɛyaa yɔɔ siŋŋ, kɔzɩ kɔzɩ lɛ, ɛmaɣzɩɣ ɛ-tɔmkpɛlɩkɩyaa yɔɔ. (Yoh. 13:1) Kɩɖaʋ nakʋyʋ yɔ: Yesu kaanawa se ɛ-Ɛsɔ sɛtʋ tʋmɩyɛ hɔɔlɩŋ nɩɩyɩ kaɣaɣ wɛʋ kaɖɛ, kɔzɩ kɔzɩ ɛ-sɩm. Pɩɩwɛɛ se ɛnɩɩ siziŋ siŋŋ pʋcɔ nɛ ɛsɩ. Ɛlɛ paa ɛ-Ɛsɔ sɛtʋ tʋmɩyɛ kaawɛ kaɖɛ yɔ, ɛlabɩ ɖɩ-tɩŋa; ɛtɩlabɩ-ɖɩ yem se ɛ-Caa pɔzɩ-ɩ se ɛlabɩ-ɖɩ, ɛlɛ kɔzɩ kɔzɩ lɛ, ɛlabɩ-ɖɩ mbʋ pʋyɔɔ yɔ ɛɛsɔɔlɩ ɛyaa siŋŋ. Ɛwɩlaa se ɛsɔɔlɩ ɛyaa siŋŋ alɩwaatʋ ndʋ esusi-wɛ tɔm nɛ ɛsɩnɩ-wɛ yɔ. Halɩ kɩyakʋ ŋgʋ pakʋwaɣ-ɩ yɔ, ɛkpaɣ alɩwaatʋ nɛ ɛñalɩ ɛ-apostoloowaa nɩŋgbanzɩ, ɛwɩlɩ-wɛ tɔm, ɛkpazɩ-wɛ ɖoŋ nɛ ɛhɛzɩ pa-laŋa. (Yoh. 13:​12-15) Pʋwayɩ, alɩwaatʋ ndʋ Yesu kaawɛ sizika yɔɔ yɔ ɛkpaɣ alɩwaatʋ pazɩ nɛ ɛyɔɔdɩnɩ kɩwɛɛkɩm laɖʋ weyi paakam ɛ-cɔlɔ yɔ nɛ ɛha-ɩ lidaʋ, nɛ ɛla ɖʋtʋ ɖɔɖɔ se pɔcɔnɩ e-ɖoo yɔɔ. (Luka 23:​42, 43; Yoh. 19:​26, 27) Yesu tɩtɩŋnɩ ɛ-sɩm ɖeke yɔɔ nɛ ɛwɩlɩ se ɛsɔɔlɩ ɛyaa siŋŋ, ɛlɛ ɛtɩŋnɩ ɖɔɖɔ mbʋ ɛlabɩ e-wezuu caɣʋ kpeekpe taa yɔ pɩ-yɔɔ nɛ ɛwɩlɩ se ɛsɔɔlɩ ɛyaa siŋŋ. w25.01 23 § 11

Bibl labɩnɩ tʋmɩyɛ tɔm pee lɛɛna se kɩsɩnɩ-ɖʋ nɛ ɖɩnɩɩ pɩ-taa se alɩwaatʋ ndʋ Yehowa kpeɣu-ɖʋ ɖa-kɩwɛɛkɩm yɔ, ɖɩwɛɣ ɖa-tɩ yɔɔ. Ðɛ-tɛ mantɩtalɩ pilim wɛtʋ yeba nɛ ɖɩpɩsɩ «kɩwɛɛkɩm yomaa.» Ɛlɛ alɩwaatʋ ndʋ Yehowa kpeɣu-ɖʋ ɖa-kɩwɛɛkɩm yɔ, ɖɩwɛ ɛzɩ yomaa mba ‘poholi-wɛ kɩwɛɛkɩm nesi tɛɛ yɔ.’ (Roma 6:​17, 18; Natʋ 1:5) Alɩwaatʋ ndʋ ɖɩnaɣ se Yehowa kpeɣ-ɖʋ ɖa-kɩwɛɛkɩm yɔ, ɖa-taa pɩzɩɣ nɛ pɩla leleŋ ɛzɩ yom weyi poholi-i nɛ ɛwɛɛ ɛ-tɩ yɔɔ yɔ. Bibl yɔɔdʋʋ se ɖa-kɩwɛɛkɩm yɔɔ lɛ, ɖɩwɛ ɛzɩ ɛyaa mba pɛwɛnɩ kʋdɔŋ ŋgʋ kɩkɔŋnɩ sɩm yɔ. Ɛlɛ Yehowa tɩŋnɩ kɩhɛyʋʋ pʋ-ñʋʋ taa kɩlaʋ ŋgʋ ɛ-Pɩyalʋ lawa yɔ kɩ-yɔɔ nɛ ɛwaa-ɖʋ. (1 Pɩy. 2:24) Kɩhɛyʋʋ pʋ-ñʋʋ taa kɩlaʋ haɣ-ɖʋ waɖɛ se ɖɩñɔɔzɩ ɖa nɛ Yehowa ɖɛ-hɛkʋ taa taabalɩyɛ nɖɩ ɖa-kɩwɛɛkɩm kaawɛɛkaa yɔ. Alɩwaatʋ ndʋ pawaɣ nɔɔyʋ kʋdɔŋ sɔsɔʋ nakʋyʋ yɔ, ɛ-taa lakɩ leleŋ siŋŋ. Mbʋ ɖɔɖɔ ɖa-taa lakɩ leleŋ siŋŋ alɩwaatʋ ndʋ Yehowa kpeɣu-ɖʋ ɖa-kɩwɛɛkɩm nɛ taabalɩyɛ kɩbanɖɛ ɖaɣnɩ wɛʋ ɖa nɛ ɩ ɖɛ-hɛkʋ taa yɔ. w25.02 11 § 16; 13 § 17

Yesu yɔɔdɩ talaŋwaa eduuye taa se yomaa 2 labɩ mbʋ pɩwɛ siɣsiɣ yɔ pa-caa ɛsɩndaa nɛ kʋɖʋm ñatɩla mbʋ. (Mat. 25:​14-30) Yomaa 2 mba paawɛ siɣsiɣ yɔ, pasɩŋnɩ Krɩstʋ ñɩma patam numwaa mba pɛwɛ siɣsiɣ yɔ. Pa-Caa Yesu yaɣ-wɛ se pasʋʋ ‘e-leleŋ taa.’ Pamʋʋ pa-kɩhɛyʋʋ ɛsɔdaa, pʋ-tɔbʋʋ se kajalaɣ femtu. (Mat. 25:​21, 23; Natʋ 20:5b) Ɛlɛ yom feendu tʋ kɩɖaʋ kɩdɛkɛdʋʋ kɛnɩ paɣʋ patam numwaa. Ɛzɩma tɩyɛ? Pɩwɛɛ se pɛwɛɛ kpekpeka. Ɛzɩ ɖɩɩnaʋ pɛlaa 10 eduuye taa yɔ, Yesu taañɩnɩɣ yɔɔdʋʋ talaŋwaa eduuye taa se patam numwaa kaɣ pɩsʋʋ feendu tɩnaa. Ɛlɛ, ɛwɩlaɣ mbʋ pɩpɩzɩɣ nɛ pɩtalɩ-wɛ ye pelesi kpekpeka ŋga pɛwɛna yɔ. Paapɩzɩɣ nɛ ‘pɔɖɔkɩ pa-yatʋ nɛ pa-lɩzʋʋ kpam,’ nɛ paakaɣ hiɣu waɖɛ nɛ pasʋʋ ɛsɔdaa Kewiyaɣ taa. w24.09 22 § 10; 23 § 12-13

Ða-tɩŋa ɖɩsɔɔlaa se ɖɩcɔnɩ ɖa-maɣmaɣ ɖa-kɩcɛyɩm ɖeɖe nɛ ɖɔ-hɔʋ taa mba kɩcɛyɩm ɖeɖe. (Ekl. 7:12; 1 Tim. 5:8) Alɩwaatʋ ndʋ ɖɩñɩnɩɣ tʋmɩyɛ naɖɩyɛ yɔ, pɩmʋnɩ mbʋ se ɖɩmaɣzɩ liidiye nɖɩ pakaɣ-ɖʋ hɛyʋʋ yɔ ɖɩ-yɔɔ. Ɛlɛ ye nɔɔyʋ ɛmaɣzɩɣ liidiye nɖɩ pakaɣ-ɩ hɛyʋʋ yɔ ɖɩ-yɔɔ ɖeke yɔ, pɩwɩlɩɣ se ɛwɛɛ nɛ ɛɖɔŋnɩ mbʋ pɩnaɣ yɔ. Ye ɖɩɖɔŋnɩ tisuu yɔ, ɖɩkaɣ maɣzʋʋ ɖɔɖɔ ɖoŋ weyi tʋmɩyɛ nɖɩ, ɖɩkaɣ wɛnʋʋ ɖa nɛ Yehowa ɖa-taabalɩyɛ yɔɔ yɔ ɩ-yɔɔ. Ðɩpɩzɩɣ ɖɩpɔzɩ ɖa-tɩ se: «Tʋmɩyɛ nɖɩ, ɖɩkaɣ-m pɔzʋʋ se mala lakasɩ nzɩ Yehowa tɩsɔɔlɩ yɔ?» (Adu. 6:​16-19) «Ðɩkaɣ yebu nɛ maahikiɣ alɩwaatʋ nɛ mowoki kediɣzisi, monsusuu tɔm nɛ mɛnkpɛlɩkɩ Bibl? Ðɩkaɣ yebu nɛ monposini mɔ-hɔʋ alɩwaatʋ sakɩyɛ na?» Ye ɖicosi tɔm pɔzʋʋ mbʋ pɩ-yɔɔ se ɛɛɛ yɔ, pɩɩkɛɣnɩ lɔŋsɩnɖɛ se ɖitisi nɛ ɖɩla tʋmɩyɛ nɖɩ paa tʋmɩyɛ hiɣu ɛwɛ kaɖɛ yɔ. Ye ɖɩɖɔŋnɩ tisuu yɔ, ɖɩkpakɩɣ lɩmaɣza wena awɩlɩɣ se ɖa-taa tɛma se paa pɩɩlabɩ ɛzɩma yɔ Yehowa kaɣ cɔnʋʋ ɖa-kɩcɛyɩm ɖeɖe yɔ.—Mat. 6:33; Ebr. 13:5. w25.03 21 § 5-6

Paa ɛzɩmtaa lɛ, pɩwɛɛ se ɖɩñaɣ pana nɛ ɖɩnaɣ ɖo-koobiya ɛzɩ Yehowa naɣʋ-wɛ yɔ. Ye ɖɩkaŋ ɖa-lɩmaɣza pɛ-wɛtʋ kɩbandʋ yɔɔ nɛ ɖɩɩkaŋ-yɛ pɛ-ɛjandʋ yɔɔ yɔ, pɩsɩɣnɩ-ɖʋ nɛ ɖɩla mbʋ, mbʋ pʋyɔɔ yɔ wiɖiyi pɛ-ɛjandʋ ndʋ tɩkaɣ tɛm. Ðɩpɩzɩɣ nɛ ɖɩcɔnɩ tɔm ndʋ payɩ tɩkɔŋ ɖɛ-hɛkʋ taa yɔ ti-ɖeɖe nɛ sɔɔlɩm. Ðɩnɛ ɛlɛ, pɩkaɣ seɣtuu ɛyaa mba pɔsɔɔlaa se pawɩlɩ-wɛ sɔɔlɩm yɔ nɛ pɔkɔɔ fezuu taa paradisuu taa. Tɛtɛ nɛ ɖɩwɛɛnɩ ɛsɩmɩyɛ paradisuu ŋgʋ Yehowa ha-ɖʋ yɔ kɩ-yɔɔ tam. Mba payɩ pɔsɔɔlaa se pa-laŋa ɩhɛɛ, pe-liu ɛsɩ, pacaɣ ɖiɣ ɖiɣ nɛ pɛwɛɛ pɛɛyɛ taa yɔ, pɩwɛɛ se pasʋʋ fezuu taa paradisuu taa nɛ pataalɩɩ kɩ-taa kpa. Ɛlɛ pɩwɛɛ se ɖɩkpa ɖa-tɩ camɩyɛ, mbʋ pʋyɔɔ yɔ Sataŋ wɛɛ nɛ ɛñakɩ pana se eyele nɛ ɖɩlɩɩ kɩ-taa. (1 Pɩy. 5:8; Natʋ 12:9) Ɛlɛ pɩfɛyɩ se ɖiyele nɛ ɛtalɩ ɛ-kaɖʋwa. Tɛtɛ nɛ ɖɩñaɣ pana siŋŋ nɛ ɖɩkandɩyɩ kele kele wɛtʋ nɛ laŋhɛzɩyɛ nɖɩ ɖɩwɛ fezuu taa paradisuu taa yɔ ɖɩ-yɔɔ nɛ ɖiyele ɖɔɖɔ nɛ kɩwɛɛ kajʋka tam. w24.04 24-25 § 18-19

Lʋlɩyaa, ɩpɩzɩɣ nɛ iseɣti mi-piya nɛ sɩwɛɛ kpekpeka Yehowa sɛtʋ taa. Ɩtɩŋnɩ tɔm ndʋ ɩyɔɔdʋʋ yɔ nɛ mbʋ ɩlakɩ yɔ pɩ-yɔɔ nɛ ɩsɩnɩ mi-piya nɛ sɩñɔɔnɩ Yehowa. Ɩsɩnɩ-sɩ nɛ sɩna se fezuu taa tʋma ɛzɩ Bibl kpɛlɩkʋʋ, kediɣzisi wobu nɛ tɔm susuu mbʋ yɔ tɔm kɩlɩnɩ cɛyʋʋ ɛyʋ wezuu caɣʋ taa. Pɩtɩkɛ mbʋ yɔ, ñe-piya ɩɩkaɣ nɩʋ pɩ-taa se pɩcɛyaa se sɩ-maɣmaɣ sɩcɛyɩsɩ sɩ nɛ Yehowa pa-taabalɩyɛ; ɛlɛ sɩmaɣzɩɣ se sɩsɛɣ Yehowa mbʋ pʋyɔɔ yɔ sɩ-lʋlɩyaa kɛ Yehowa Aseɣɖe Tɩnaa. Mbʋ pɩpɩzɩɣ nɛ pɩlɩɩ pɩ-taa yɔ lɛ se sɩɩsɩɣ toovenim Ɛsɔ sɛtʋ kajalaɣ lone taa yaa halɩ sɩpɩzɩɣ nɛ sikizi toovenim. Ye nɔɔyʋ eyebi Yehowa sɛʋ yɔ, ɛzɩ pɩwɩlɩɣ se ɛɛpɩzɩɣ nɛ ɛɖaɣnɩ kɛʋ Yehowa taabalʋ? Aayɩ, mbʋ pʋyɔɔ yɔ ɛpɩzɩɣ nɛ ekpiɖi nɛ ɛɖaɣnɩ paɣzʋʋ Yehowa sɛʋ. Pɩsa nɛ ɛla mbʋ lɛ, pɩpɔzʋʋ se eluzi ɛ-tɩ nɛ etisi nɛ ɛgbɛyɛ taa ɛzʋtʋyaa sɩnɩ-ɩ. (Yak. 5:14) Mbʋ pɩ-tɔm kɩlɩ cɛyʋʋ yɔ mbʋ lɛ se ɛñaɣ pana nɛ ɛɖaɣnɩ kɛʋ Yehowa taabalʋ. w24.07 24-25 § 18-19

Ɛbɛ pɩwɛɛ se ɩla nɛ ɩɖʋ hɩɖɛ mɩ-ɖanɩyɛ? Ɩwɛɣ nɛ ɩsɔɔlʋʋ ɖama nɛ pɩkɩlɩɣ lɛ, piseɣtiɣ-mɩ se ɩñɔtɩnɩ ɖama nɛ pɩkɩlɩ. Ɛbɛ pɩzɩɣ pɩsɩnɩ-mɩ nɛ ɩtaala mbʋ pɩɩkɛdɩɣnɩ Yehowa yɔ? Ɩtaayɔɔdʋʋ kʋzʋʋ kɩdɛkɛdʋʋ tɔm, ɩtaawɛɣ mi-ɖeke nɛ ɩtaakɩlɩɣ sʋlʋm ñɔʋ. (Efɛz. 5:3) Lakasɩ nzɩ sɩpɩzɩɣ nɛ siseɣti kʋzʋʋ kɔɖɛyɩ mɩ-taa nɛ pɩwɛɛ-mɩ kaɖɛ se ɩla mbʋ pɩtʋʋzaa yɔ. Pɩwɛɣ ɖeu se ɩyɔɔdʋʋ mbʋ ɩpɩzɩɣ ɩla nɛ ɩɖʋ mɩ-ɖanɩyɛ hɩɖɛ yɔ pɩ-tɔm ɖoŋ ɖoŋ. (Adu. 22:3) Ɩwɛɣ nɛ ɩsɔɔlʋʋ ɖama nɛ pɩkɩlɩɣ lɛ, ɩpɩzɩɣ nɛ ɩkpaɣ lɩmaɣzɩyɛ se ɩtɩŋɩɣnɩ nʋmɔʋ ŋgʋ kɩmʋnaa yɔ kɩ-yɔɔ nɛ ɩwɩlɩɣ ɖama sɔɔlɩm. Ɛlɛ ye ña-kʋzʋʋ kɔɖɛyɩ ɛkpa ɖoŋ yɔ, pɩkaɣ-ŋ labʋ kaɖɛ se ŋmaɣzɩ camɩyɛ nɛ ŋwɛɛnɩ lɩmaɣza wena amʋnaa yɔ lɛlʋ yɔɔ. (Hend. 1:2; 2:6) Pɩtasɩ lɛ, alɩwaatʋ ndʋ ɩwɩlɩɣ ɖama sɔɔlɩm yɔ, pɩpɩzɩɣ nɛ pɩwɛɛ kɛlɛʋ se ɩtaaɖɔkɩ mɩ-tɩ nɛ pituyi-mɩ nɛ ɩla mbʋ pɩɩkɛdɩɣnɩ Yehowa yɔ. (Adu. 6:27) Pʋyɔɔ lɛ, ɩpaɣzɩɣ ɖama ɖanʋʋ kpaagbaa lɛ, pɩwɛɛ se ɩtazɩ Bibl paɣtʋ kila taa nɛ pɩsɩnɩ-mɩ nɛ ɩna kamasɩ nzɩ pɩwɛɛ se ɩɖʋ mɩ-tɩ yɔ.—1 Tes. 4:​3-7. w24.05 29 § 10-11

Ðɩsɔɔlaa se ɛyaa lalaa ɩtaa-ɖʋ liu, kɔzɩ kɔzɩ kaɖɛ alɩwaatʋ taa. (Adu. 17:17) Ɛbɛ pɩzɩɣ pɩsɩnɩ-ɖʋ nɛ ɖɩkɛ ɛyʋ weyi papɩzɩɣ nɛ pataa-ɩ liu yɔ? Ðɩpɩzɩɣ nɛ ɖɩñaɣ pana nɛ ɖɩmaɣzɩnɩ Yehowa wɛtʋ kɩbandʋ camɩyɛ. Kɩɖaʋ nakʋyʋ yɔ: Ðɩpɩzɩɣ nɛ ɖɩñaɣ pana nɛ ɖɩɖɔŋ ɖɔ-tɔm yɔɔ nɛ ɖɩɖɔŋ ɖɔɖɔ alɩwaatʋ yɔɔ. Ɛgbɛyɛ taa ɛzʋtʋyaa mba papɩzɩɣ nɛ pataa-wɛ liu yɔ, pɛkɛ wazaɣ ɛgbɛyɛ taa mba lalaa. Ɛzɩma tɩyɛ? Alɩwaatʋ ndʋ koobiya naɣ se papɩzɩɣ nɛ payaa ɛgbɛyɛ taa ɛzʋtʋyaa, ɛzɩ pɔ-tɔm susuu ɛgbɛyɛ yɔɔ cɔnɩyʋ mbʋ yɔ alɩwaatʋ ndʋ pɩpɔzʋʋ se pasɩnɩ-wɛ yɔ tɩ-taa yɔ, pɩsɩɣnɩ-wɛ se pataakɩlɩ nɩɣzʋʋ. Koobiya naɣ ɖɔɖɔ se pɔsɔɔlɩ-wɛ alɩwaatʋ ndʋ peɖiɣziɣna se ɛgbɛyɛ taa ɛzʋtʋyaa sɔɔlɩ faaa se pasɩnɩ-wɛ yɔ. Nɛ alɩwaatʋ ndʋ ɛzʋtʋyaa tɩŋɩɣnɩ Bibl nɛ ɛgbɛyɛ takayɩsɩ yɔɔ nɛ patasɩɣ koobiya lɔŋ nɛ paatɩŋɩɣnɩ pa-maɣmaɣ pa-lɩmaɣza yɔɔ yɔ, piyeki nɛ koobiya taa-wɛ liu. Pɩtasɩ lɛ, koobiya taɣ ɛgbɛyɛ taa ɛzʋtʋyʋ nɔɔyʋ liu nɛ pɩkɩlɩ ye eekuluu mɛsaɣ tɛɛ tɔm yɔɔ nɛ ye ɛɖɔŋ tɔm ndʋ ɛyɔɔdʋʋ yɔ tɩ-yɔɔ yɔ. w24.06 30 § 14-15

Sɔnɔ, Yehowa ɛɛkaɣ yebu nɛ ɖa-kʋñɔmɩŋ kpeekpe sɩɩ tɩnaɣ ɛlɛ ɖɩpɩzɩɣ nɛ ɖɩtaa-ɩ liu se paa ɛzɩmtaa lɛ, ɛkaɣ-ɖʋ sɩnʋʋ. (Keɣ. 41:3) Yehowa tɩŋɩɣnɩ e-fezuu kiɖeɖeu yɔɔ nɛ ɛhaɣ-ɖʋ ɖoŋ, lɔŋsɩnɖɛ nɛ maɣzɩm taa laŋhɛzɩyɛ se ɖɩɖɔkɩ ɖa-laŋɩyɛ. (Adu. 18:14; Filp. 4:13) Ɛtɩŋɩɣnɩ ɖɔɖɔ Bibl yɔɔ nɛ ɛhaɣ-ɖʋ lidaʋ se cee wayɩ ɛkaɣ ɖɩzʋʋ kʋdɔmɩŋ. (Iza. 33:24) Yehowa yeba nɛ pama laŋɩyɛ hɛzʋʋ tɔm Bibl taa nɛ pasɩɩ se tɩhɛzɩ ɖa-laŋa alɩwaatʋ ndʋ ɖɩwɛɣ laŋwɛɛkɩyɛ taa yɔ. (Roma 15:4) Koobu halɩñɩnʋ nɔɔyʋ wɛ Afrika wɩsɩ ɖɩɖʋyɛ taa; alɩwaatʋ ndʋ ɖɔkɔtɔnaa wili-i nɛ pana se ɛwɛnɩ kansɛɛrɩ kʋdɔŋ yɔ, ɖoŋ ɖoŋ lɛ ewilaɣ. Ɛyɔɔdaa se: «Mayaɣ ŋga kɛhɛzɩɣ ma-laŋɩyɛ siŋŋ yɔ ŋga lɛ Izaayii 26:3. Paa ɖɩɩpɩzɩɣ nɛ ɖɩla nabʋyʋ se kaɖɛ nɖɩ ɖɩkatɩɣ yɔ ɖɩsɩɩ tɩnaɣ yɔ, mayaɣ ŋga kahaɣ-ɖʋ lidaʋ se Yehowa pɩzɩɣ nɛ ɛha-ɖʋ maɣzɩm taa laŋhɛzɩyɛ nɛ pɩsɩnɩ-ɖʋ nɛ ɖɩɖɔkɩ ɖa-laŋɩyɛ paa kaɖɛ nɖɩ lɛ ɖɩ-taa.» Mayaɣ nakɛyɛ hɛzɩɣ ña-laŋɩyɛ siŋŋ alɩwaatʋ ndʋ ŋkatɩɣ wɛtʋ kaɖɛ ñɩndʋ natʋyʋ nɛ pɩlakɩ-ŋ ɛzɩ lidaʋ nakʋyʋ fɛyɩ yɔ? w24.12 24 § 17-18

Ɛzʋtʋyaa ñakɩ pana se pɛwɛɛnɩ wɛtʋ ndʋ tɩwɩlɩɣ se pekpeɣ mba peleba yɔ. Pɔsɔɔlaa se heŋ weyi ileba yɔ, «ɩpɩsɩ ɖɩɣa.» (Luka 15:​22-24, 32) Taa leleŋ wɛɣ ɛsɔdaa alɩwaatʋ ndʋ kɩwɛɛkɩm laɖʋ nɔɔyʋ kpiɖiɣ ɛ-kɩwɛɛkɩm yɔɔ yɔ, nɛ mbʋ ɖɔɖɔ taa leleŋ wɛɣ tɛtʋ yɔɔ. (Luka 15:7) Pɩ-taa tʋ kpayɩ kpayɩ se Yehowa ɛɛhaɣ nʋmɔʋ mba palakɩ kɩwɛɛkɩm nɛ paakpiɖiɣ yɔ se pɛwɛɛ ɛgbɛyɛ taa. Ɛlɛ ɛɛhaɣ siɣye kɩwɛɛkɩm laɖaa. Ɛsɔɔlaa se papɩsɩ ɛ-cɔlɔ. Yehowa yɔɔdɩ lɩmaɣza wena ɛwɛnɩ kɩwɛɛkɩm laɖaa mba pekpiɖiɣ pa-kɩwɛɛkɩm yɔɔ yɔ a-tɔm Ozee 14:4 taa. Ɛyɔɔdaa se: «Mankaɣ waʋ pe-siɣsiɣ kɩɩwɛʋ. Mankaɣ-wɛ sɔɔlʋʋ nɛ ma-laŋɩyɛ faaa, mbʋ pʋyɔɔ yɔ meyebi-i nɛ pana kɔʋ.» Tɔm ndʋ tiseɣtiɣ ɛzʋtʋyaa kpem se pañaɣ pana nɛ pañɩnɩ mbʋ pɩwɩlɩɣ se kɩwɛɛkɩm laɖʋ nɔɔyʋ paɣzɩ kpiɖuu yɔ. Tiseɣtiɣ ɖɔɖɔ mba peyebi Yehowa sɛʋ yɔ siŋŋ se papɩsɩ Yehowa cɔlɔ kpɛdɛyɛ. w24.08 28 § 8-9

Nabʋyʋ taa, pɩtɩla nabɛyɛ ɩɩwɩlɩɣ-ɖʋ pɛ-ɛsɩmɩyɛ. Nabʋyʋ taa lɛ, ɖɩpɩzɩɣ nɛ ɖɩkpaɣ ɖa-alɩwaatʋ, ɖo-ɖoŋ nɛ ɖa-ñɩm nɛ ɖɩsɩnɩ nɔɔyʋ, ɛlɛ pɩlakɩ-ɖʋ ɛzɩ ɛ-paa fɛyɩnɩ mbʋ ɖɩlabɩ-ɩ yɔ. Ye pɩlabɩ mbʋ, ɛbɛ pɩzɩɣ pɩsɩnɩ-ɖʋ nɛ ɖitaalesi ɖa-taa leleŋ yaa pɩtaawɩzɩ-ɖʋ? Ðɩtɔzɩ se ɖa-taa leleŋ ɛɛlɩɣnɩ ɛzɩma ɛyaa lakɩ alɩwaatʋ ndʋ ɖɩlakɩ-wɛ kʋjɔʋ yɔ pɩ-cɔlɔ. (Tʋma 20:35) Ðɩpɩzɩɣ nɛ ɖɩlɩzɩ se ɖɩlakɩ kʋjɔŋ faaa paa pɩlakɩ-ɖʋ ɛzɩ ɛyaa lalaa ɩɩwɩlɩɣ-ɖʋ pɛ-ɛsɩmɩyɛ yɔ. Ɛbɛ pɩzɩɣ nɛ pɩsɩnɩ-ɖʋ? Tɔzɩ se ŋwɛɛ nɛ ŋmaɣzɩɣnɩ Yehowa. Ɛhaɣ ɛyaa wondu kɩbandʋ paa pawɩlɩɣ-ɩ ɛsɩmɩyɛ yaa paawɩlɩɣ-ɩ yɔ. (Mat. 5:​43-48) Yehowa labɩ-ɖʋ tamaɣ se ye ɖa ɖɔɖɔ ɖɩhaɣ ‘ɛlɛ ɖɩɩɖaŋɩɣ se papɩsɩnɩ-ɖʋ’ nabʋyʋ yɔ, ‘ɖa-kɩhɛyʋʋ kaɣ paɣlʋʋ.’ (Luka 6:35) Ye mbʋ, ye ɛyaa ɩɩwɩlɩɣ-ŋ pɛ-ɛsɩmɩyɛ paa ɛzɩmtaa yɔ pitaatibi-ŋ yɔɔɔ. Taasɔɔ se Yehowa kaɣ-ŋ hɛyʋʋ kɩbandʋ ndʋ ŋlakɩ nɛ ŋsɩɣnɩ ɛyaa lalaa yɔ pɩ-yɔɔ, mbʋ pʋyɔɔ yɔ ŋkɛ ɛyʋ «weyi ɛhaɣnɩ taa leleŋ yɔ.»—Adu. 19:17; 2 Kɔr. 9:7. w24.09 29 § 14-16