Ðɩwɛɛ niye tɔm susuu taa nɛ pɩkɩlɩ—Ma mba Ɛsɔtɔm kɛdɩnɩ-wɛ yɔ, pɔ-yɔɔ tɔm
“Cɔnɩ ña-tɩ yɔɔ nɛ ñɔ-tɔm wɩlʋʋ yɔɔ.” (1 Tim. 4:16) Apostoloo Pɔɔlɩ tasɩnɩ lɔŋ ɛnɛ Timootee nɛ lɔŋ ɛnɩ ɛwɩlɩɣ se pɩcɛyaa se tɔm susuyaa tɩŋa iwobini ɛzɩdaa, paa patɩɩkɛ kɩbɩma yaa kɩfama yɔ. Pakaɣ lɩzʋʋ tɔm ñʋŋ “Ðɩwɛɛ niye tɔm susuu taa nɛ pɩkɩlɩ” Kewiyaɣ Ɛsɔ sɛtʋ tʋmɩyɛ takayaɣ taa nɛ pɩsɩnɩ-ɖʋ hɔɔlʋʋ ŋgʋ kɩ-taa. Paa tɔm ñʋʋ ŋgʋ lɛ, kɩkaɣ yɔɔdʋʋ tɔm susuu lɛɣtʋ kɩcɛyɩtʋ natʋyʋ tɔm nɛ kɩyɔɔdɩ ɖɔɖɔ lɔŋ tasʋʋ mbʋ pɩpɩzɩɣ pɩsɩnɩ-ɖʋ nɛ ɖɩwɛɛnɩ lɛɣtʋ ndʋ yɔ. Peseɣtiɣ tɔm susuyaa tɩŋa se paka pa-lɩmaɣza tɔm susuu lɛɣtʋ ndʋ tɩ-yɔɔ fenaɣ ŋga ka-tɩŋa ka-taa. Fenaɣ ŋga kɛtɛŋ lɛ, Ɛsɔ sɛtʋ kediɣzaɣ hɔɔlʋʋ nakʋyʋ kaɣ-ɖʋ haʋ waɖɛ se ɖɩyɔɔdɩ mbʋ pɩlɩ tɩ-tʋmɩyɛ labɩnʋʋ taa nɛ wazasɩ nzɩ ɖihiɣaa yɔ, pɩ-tɔm. Fenaɣ kanɛ ka-taa lɛ, peseɣtiɣ-ɖʋ se ɖɩma mba Ɛsɔtɔm kɛdɩnɩ-wɛ yɔ, pɔ-yɔɔ tɔm.
Ɛbɛ yɔɔ pɩcɛyaa? Pʋcɔ nɛ ɖɩla ɖɔ-tɔm susuu tʋmɩyɛ camɩyɛ lɛ, pɩtɩmʋna se ɖisusuu ɛyaa tɔm yem nɛ ɖɩɖɛɣ. Pɩmʋnaa se ɖɩpɩsɩɣ nɛ ɖɩnaɣ mba Ɛsɔtɔm kɛdɩnɩ-wɛ yɔ nɛ ɖɩmɩzɩ lɩm toovenim ɖomaɣ ŋga ɖiɖuwa yɔ. (Maatiyee 28:19, 20; 1 Kɔr. 3:6-9) Pʋ-tɔbʋʋ lɛ se ɖɩpɩsɩ nɛ ɖɩna ɛyaa mba ɖɩɩkataa yɔ nɛ ɖa nɛ wɛ ɖɩyɔɔdɩ pa-kɩcɛyɩm tɔm nɛ ɖɩtɩŋnɩ faawɩyɛ ŋgʋ ɖɩɩlaba yɔ kɩ-yɔɔ nɛ ɖɩtasɩ-wɛ sɩnʋʋ nɛ pɩkɩlɩ. Pʋyɔɔ pɩcɛyaa se ɖɩkatɩ ɛyʋ weyi ɛsɔɔlɩ Ɛsɔtɔm yɔ lɛ, ɖɩma ɛ-yɔɔ tɔm.
Ɛzɩma pɩwɛɛ se ɖɩla?
• Pɩcɛyaa se ɖɩɖɔkɩ mbʋ payɩ ɖɩpɩzɩɣ nɛ ɖɩmana yaa mbʋ pɩ-taa ɖɩpɩzɩɣ nɛ ɖɩma weyi Ɛsɔtɔm kɛdɩnɩ-ɩ yɔ, ɛ-yɔɔ tɔm yɔ. Ma tɔm camɩyɛ, ɖaɣnɩ-tʋ nɛ ŋñɔɔzɩ-tʋ ɖɔɖɔ camɩyɛ. Ŋtɛŋ pɩsɩ nɛ ŋna-ɩ labʋ lɛ, ñaɣ pana nɛ ŋma tɔm kpaagbaa.
• Ma ɖɩɣdʋ yɔɔ tɔm: Payaɣ-ɩ suwe? Ɛ-kaŋgalaafu mayaɣ, ɛ-tɛ adɖɛɛsɩ yaa ɛ-tɛ e-mail lɛ ŋgʋ? Ɛbɛ ŋna ɛ-tɛ yaa ɛ-hɔʋ yɔɔ nɛ pɩpɩzɩɣ se pɩwazɩ-ŋ?
• Ma tɔm ndʋ payɩ tɩ-yɔɔ ña nɛ ɩ ɩlabɩ kɛdaɣ yɔ. Bibl taa masɩ nzɩ ɩkalaa? Ɛyɔɔdaa se ɛbɛ yɔɔ etisiɣ? Takayɩsɩ nzɩ ŋha-ɩ? Ma ɖɔɖɔ kpɩtaʋ, kɩyakʋ nɛ alɩwaatʋ ndʋ tɩ-yɔɔ ɖeyi ɖeyi ŋwobi ɛ-cɔlɔ yɔ.
• Ma tɔm ndʋ ŋɖʋwa se ŋpɩsɩɣ pʋwayɩ nɛ ña nɛ ɩ ɩla faawɩyɛ tɩ-yɔɔ yɔ. Ŋheyi-i se ŋpɩsɩɣ nɛ ŋkɔɔ pʋwayɩ lɛ, ɛbɛ tɔm ɩyɔɔdʋʋ? Ŋheyi-i se ɖooye ŋpɩsɩɣ?
• Kɩyakɩŋ weyi payɩ ŋpɩsaa nɛ ŋwolo pʋdʋ cɔlɔ yɔ, yʋsɩ-ɩ ña-takayaɣ taa. Paa ŋma tɔm sakɩyɛ pʋdʋ yɔɔ yɔ, pɩtɩwɛɛkɩ nabʋyʋ.
Labɩnɩ tʋmɩyɛ lɔŋ tasʋʋ pʋnɛ fenaɣ kanɛ:
• Ŋŋmaɣ tɔm mba Ɛsɔtɔm kɛdɩnɩ-wɛ yɔ pɔ-yɔɔ lɛ, heyi ña nɛ weyi ɩlɩ tɔm susuu yɔ, mbʋ ŋmawa yɔ.