Ɛzɩma ɖɩpɩzɩɣ ɖɩtɩŋnɩ traktɩwaa yɔɔ nɛ ɖɩpaɣzɩ kɛdɛsɩ labʋ yɔ

Kpaɣnɩ Janvier 2018 taa lɛ, papaɣzɩ ɖʋʋ ɛzɩma ɖɩpaɣzɩ kɛdɛsɩ labʋ yɔ Ðe-wezuu caɣʋ nɛ ɖɛ-Ɛsɔ sɛtʋ tʋmɩyɛ kpɛlɩkʋʋ takayaɣ kajalaɣ hayʋʋ yɔɔ. Peseɣti-ɖʋ se ɖɩtaahaɣ ɛyaa takayɩsɩ yem, ɛlɛ ɖa nɛ wɛ ɖɩpaɣzɩ kɛdɛsɩ labʋ. Palɩzɩɣ kɛdɛsɩ labʋ videowaa se pɩsɩnɩ tɔm susuyaa nɛ pana ɛzɩma pakpaɣna nɛ patɩŋnɩ Bibl ɖeke yɔɔ nɛ papaɣzɩ kɛdɛsɩ labʋ nɛ ɛyaa yɔ. Ɛlɛ, ɛzɩ pɩwɩlɩɣ se pɩtɩtasɩ cɛyʋʋ se ɖɩhaɣ ɛyaa takayɩsɩ alɩwaatʋ ndʋ ɖisusuu tɔm kpaɣ ɖɩɣa nɛ ŋwolo ɖɩɣa yɔ? Aayɩ. Ðɩpɩzɩɣ ɖɩtɩŋnɩ traktɩwaa yɔɔ nɛ ɖɩpaɣzɩ kɛdɛsɩ. Ðɩpɩzɩɣ ɖɩtɩŋnɩ nʋmɔŋ weyi ɩkɔŋ yɔ ɩ-yɔɔ nɛ ɖɩlabɩnɩ tʋmɩyɛ paa traktɩ ŋgʋ:

1. Pɔzɩ tɔm ndʋ tɩwɛ traktɩ kajalaɣ hɔɔlʋʋ yɔɔ yɔ.

2. Wɩlɩ Bibl tɔm cosuu mbʋ pɩwɛ hɔɔlʋʋ naalɛ ñɩŋgʋ ɖɩbazɩyɛ yɔ. Ye alɩwaatʋ ɛwɛɛ yɔ, ña nɛ ɖɩɣdʋ ɩkalɩ nɛ ɩtazɩ traktɩ tɔm natʋyʋ taa.

3. Ha ɖɩɣdʋ traktɩ nɛ ŋseɣti-i se ɛkalɩ-kʋ alɩwaatʋ ndʋ ɛsɔɔlaa yɔ tɩ-yɔɔ.

4. Pʋcɔ nɛ ña nɛ ɩ ɩya ɖama lɛ, wɩlɩ-ɩ tɔm pɔzʋʋ mbʋ pɩwɛ hɔɔlʋʋ “Maɣzɩ tɔm tʋnɛ tɩ-yɔɔ” yɔ, nɛ ña nɛ ɩ ɩla ɖʋtʋ nɛ pʋwayɩ lɛ ɩtazɩ Bibl tɔm cosuu taa.

Ŋpɩsɩɣ ɛ-cɔlɔ lɛ, ɩtazɩ tɔm cosuu taa nɛ pʋwayɩ, ŋpɔzɩ tɔm lɛɛtʋ ndʋ ɩkaɣ tɩ-taa tazʋʋ yɔ. Ŋpɩzɩɣ ŋlɩzɩ tɔm pɔzʋʋ nabʋyʋ ɖɛ-tɛ intɛrnɛɛtɩ lone yɔɔ yɔ, yaa takayaɣ ŋga kɛwɛ traktɩ kɛdɛzaɣ hayʋʋ yɔɔ yɔ ka-taa. Nɛ alɩwaatʋ ndʋ tɩmʋnaa yɔ tɩ-yɔɔ lɛ, ɩpɩzɩɣ nɛ ɩpaɣzɩ kpɛlɩkʋʋ Laŋhɛzɩyɛ Tɔm Ndʋ Tɩlɩnɩ Ɛsɔ Cɔlɔ yɔ yaa Tɔm wɩlʋʋ wondu taa wonuu nakʋyʋ.