Ðe-wezuu caɣʋ nɛ ɖɛ-Ɛsɔ sɛtʋ kpɛlɩkʋʋ takayaɣ taa tɔm kɩñɩnɩtʋ
2-8 NOVEMBRE
ÑƖM MBƲ PƖWƐ ƐSƆTƆM TAA YƆ | EJIPITI LƖƲ 39-40
“Moyizi labɩ mbʋ ɖeyi ɖeyi paapɔzɩ-ɩ se ɛla yɔ”
(Ejipiti Lɩʋ 39:32) Mbʋ pɛtɛma ɖɩjaɣyɛ tʋma kpeekpe, kediɣzaɣ kizinziku tʋma. Izrayɛɛlɩ piya labʋ taa lɛ, sɩlaba ɛzɩ Kɩbaɣlʋ keheyiɣ Moyizi yɔ.
w11 15/9 27 § 13
Yehowa sɩmɩ-ŋ?
13 Ɛlɛ “Moyizi kaakɛnɩ ɛyʋ weyi ɛwakɩ ɛ-tɩ luzuu tataa ɛyaa kpeekpe taa yɔ.” (Kɩg. 12:3) Ɛwɩlaa se eluzuu ɛ-tɩ mbʋ pʋyɔɔ yɔ etisaa nɛ ɛɖɔ paɣtʋ ndʋ payɩ Yehowa ɖʋ-ɩ yɔ tɩ-yɔɔ. (Ejl. 7:6; 40:16) Nabʋyʋ ɛɛwɩlɩɣ se nabʋyʋ taa, Moyizi maɣzaɣ se Yehowa paɣtʋ natʋyʋ tɩmʋna yaa pɩcɛyaɣ-ɩ se ɛɖɔ Yehowa paɣtʋ natʋyʋ yɔɔ. Kɩɖaʋ nakʋyʋ yɔ: Yehowa kaaheyi Moyizi ɛzɩma ɖeyi ɖeyi pɩwɛɛ se ɛla Ɛsɔ sɛtʋ kɩɖanɖʋʋ nɛ kɩ-taa wondu ndɩ ndɩ yɔ. Halɩ eheyi-i pɩsatʋ ndʋ pɩwɛɛ se ɛlabɩnɩ tʋmɩyɛ yɔ tɩ-tɔlɩm nɛ pɩsaŋ ɛzɩma pɩpɔzʋʋ yɔ. (Ejl. 26:1-6) Ye Yehowa ɛgbɛyɛ taa ɛzʋtʋyʋ nɔɔyʋ ɛɖʋ-ŋ paɣtʋ ɛzɩma ŋla tʋmɩyɛ naɖɩyɛ yɔ pɩ-yɔɔ, nɛ ɛwɛɛ ña-wayɩ nɛ eheyiɣ-ŋ ɛzɩma ɖeyi ɖeyi pɩwɛɛ se ŋla tʋmɩyɛ nɖɩ ɖɩ-hɔɔlɩŋ kpeekpe yɔ, ŋpɩzɩɣ ŋmaɣzɩ se ɛɖɛlɛsɩɣ niye. Ɛlɛ Yehowa kɛ ɖiyiyu weyi ɛtalɩ pilim yɔ nɛ ɛɖʋʋ tʋmɩyɛ ɛ-sɛyaa lɛ, ɛtaɣ-wɛ liu se pakaɣ-ɖɩ labʋ camɩyɛ. Ye mbʋ lɩmaɣzɩyɛ kɩbanɖɛ naɖɩyɛ yɔɔ ɛhaɣ paɣtʋ ɛzɩma pala tʋmɩyɛ yɔ pɩ-yɔɔ. Ɛlɛ pɩtaacɛyɩ Moyizi se Yehowa heyi-i ɛzɩma ɖeyi ɖeyi ɛla tʋmɩyɛ nɖɩ yɔ nɛ ɛtaamaɣzɩ se Yehowa ɛɛhaɣ-ɩ waɖɛ se ɛkpaɣ lɩmaɣza. Ɛlɛ Moyizi ñaɣ pana nɛ tʋmlaɖaa la ɖeyi ɖeyi ‘ɛzɩ Kɩbaɣlʋ keheyuu-i yɔ.’ (Ejl. 39:32) Tɩ luzuu siŋŋ lɛ mbʋ yɔ! Moyizi kaanawa se pɩkɛ Yehowa tʋmɩyɛ nɛ ɛnʋ ñaawɛ ɛzɩ wonuu ŋgʋ kɩ-yɔɔ Yehowa tɩŋɩɣna nɛ ɛlakɩ tʋmɩyɛ nɖɩ yɔ.
(Ejipiti Lɩʋ 39:43) Moyizi na pɩtɩŋa payɩ nɛ ɛwazɩ pɩ-yɔɔ.
(Ejipiti Lɩʋ 40:1, 2) Kɩbaɣlʋ yɔɔdɩnɩ Moyizi nɛ eheyi-i se: 2 “Kɔɔnɔɔ fenaɣ kɩyakʋ wiye, ŋŋsiɣ Ðɩjaɣyɛ, Kediɣzaɣ Kizinziku.”
(Ejipiti Lɩʋ 40:16) Moyizi labɩ ndʋ ndʋ Kɩbaɣlʋ heyi-i yɔ, ti-kpeekpe: mbʋ ɖɔɖɔ ɛlaba.
w05 15/7 27 § 3
Ŋwɛ siɣsiɣ pɩtɩŋa pɩ-taa?
3 Ebree mba 3:5 yɔɔdaa se: “Moyizi kaakɛ lɩmɖʋyʋ siɣsiɣ tʋ.” Ɛbɛ kaasɩnɩ Moyizi nɛ ɛkɛ nayʋ siɣsiɣ tʋ? Alɩwaatʋ ndʋ palakaɣ Ɛsɔ sɛtʋ kɩɖanɖʋʋ nɛ kɩ-taa wondu ndɩ ndɩ yɔ, “Moyizi labɩ ndʋ ndʋ Kɩbaɣlʋ heyi-i yɔ, ti-kpeekpe: mbʋ ɖɔɖɔ ɛlaba.” (Ejipiti Lɩʋ 40:16) Ða mba ɖɩkɛ Yehowa sɛyaa yɔ, pɩwɛɛ se ɖɩwɩlɩ se ɖɩwɛ siɣsiɣ nɛ ɖɩñaŋ Yehowa pɩtɩŋa pɩ-taa. Pɩwɩlɩɣ se pɩwɛɛ se ɖɩwɛɛ siɣsiɣ Yehowa ɛsɩndaa halɩ pɩkpɛndɩnɩ alɩwaatʋ ndʋ tɩ-taa ɖɩkatɩɣ takɩm yaa nazɩm ndɩ ndɩ yɔ. Ɛlɛ pɩtɩkɛ takɩm sɔsɔm taa ɖeke pɩwɛɛ se ɖɩɖɔkɩ ɖa-tɩ nɛ ɖɩwɩlɩ se ɖɩwɛ siɣsiɣ. Yesu yɔɔdaa se: “Ɛyʋ weyi ɛwɛ siɣsiɣ pʋyʋ cikpem taa yɔ, ɛwɛɣ ɖɔɖɔ siɣsiɣ pʋyʋ sɔsɔm taa, nɛ ɛyʋ weyi ɛfɛyɩ siɣsiɣ pʋyʋ cikpem taa yɔ, ɛfɛyɩ ɖɔɖɔ siɣsiɣ pʋyʋ sɔsɔm taa.” (Luka 16:10) Ye mbʋ pɩpɔzʋʋ se ɖɩwɛɛ siɣsiɣ halɩ pɩkpɛndɩnɩ mbʋ ɖɩmaɣzɩɣ se pɩkɛ cikpem yɔ pɩ-taa.
Ðɩñɩnɩ fezuu taa ñɩm
(Ejipiti Lɩʋ 39:34) Lɔbʋtʋ kɛ ɛyaŋ tɔna wena peli tɔlɩm kɩsɛɛmɩm taa yɔ, lɔbʋtʋ kɛ tɔnɛ ɖɔfɩɩ nɛ paɖakɩ pɩ-yɔɔ kɛdɛɛka;
it-2 510 § 4
Fɔɔkɩ tɔna
Le Izrayɛɛlɩ mba lɩɣaɣ tɔna ana a-yɔɔ? Kpɩnɛ nɖɩ payaɣ se fɔɔkɩ yɔ, ɖɩ-tɔnɛ payaɣ se tɔnɛ ɖɔfɩɩ, nɛ Ebree tɔm piye taḥash nɖɩ palabɩnɩ tʋmɩyɛ yɔ, ɖɩsɩɣnɩ-ɖʋ nɛ ɖɩtɩlɩ fɔɔkɩwaa mba pɔ-tɔm pɔyɔɔdaa yɔ. Ye mbʋ, le Izrayɛɛlɩ mba lɩɣaɣ fɔɔkɩ tɔna ana a-yɔɔ? Ðoŋ ɖoŋ lɛ fɔɔkɩwaa cakɩ lona wena a-taa wɛ nikaɣ siŋŋ yɔ, ɛzɩ Arctique nɛ Antarctique taa mbʋ yɔ. Ɛlɛ fɔɔkɩwaa nabɛyɛ cakɩ lona wena a-taa wɛ soŋaɣ yɔ. Halɩ sɔnɔ fɔɔkɩwaa nabɛyɛ cabɩ wɛ Méditerrané teŋgu egeetiye nɛ ageeta lɛɛna wena a-taa teŋgunaa taa lɩm soŋaa yɔ a-taa. Bibl alɩwaatʋ taa, kpɩna ana aatɔyɩ Méditerrané teŋgu nɛ teŋgu kɩsɛɛmʋʋ ageeta taa, ɛlɛ pɩnzɩ mɩnɩŋ weyi ɩɖɛwa yɔ ɩ-taa, ɛyaa lakasɩ yeba nɛ fɔɔkɩwaa tɩtasɩ tɔyʋʋ. Pɩnaɣ 1832 taa, takayaɣ nakɛyɛ (Dictionnaire de la Bible d’Augustin Calmet, p. 139) yɔɔdaa se: “Fɔɔkɩwaa sakɩyɛ kaawɛ lɩm hɛkʋ taa tɛtʋ cikpetu sakɩyɛ ndʋ tɩɩñɔtɩnɩ teŋgu kɩsɛɛmʋʋ nɛ Sinayii yɔ tɩ-taa.”—Kalɩ ɖɔɖɔ The Tabernacle’s Typical Teaching, A. Pollock, Londres, p. 47.
(Ejipiti Lɩʋ 40:34) Mɩndʋ huuzi kediɣzaɣ kizinziku yɔɔ, nɛ Kɩbaɣlʋ yuŋ su Ðɩjaɣyɛ taa ɖo.
w15 15/7 21 § 1
Pɩcɛyaa se lalaa ɩtɩlɩ tʋmɩyɛ nɖɩ ŋlakɩ yɔ?
Pama Ɛsɔ sɛtʋ kɩɖanɖʋʋ nɛ pɩtɛ lɛ, “mɩndʋ huuzi kediɣzaɣ kizinziku yɔɔ, nɛ Kɩbaɣlʋ yuŋ su ɖɩjaɣyɛ taa ɖo.” (Ejipiti Lɩʋ 40:34) Pɩɩwɩlɩ kpayɩ kpayɩ se tʋmɩyɛ nɖɩ palaba yɔ, ɖɩkɛdɩnɩ Yehowa yɔ. Ŋmaɣzɩɣ se ɛzɩma pɩɩlabɩ Bɛtɩsaalɛɛlɩ nɛ Oholiyaabɩ? Pataama pa-hɩla Ɛsɔ sɛtʋ kɩɖanɖʋʋ yɔɔ se pɩwɩlɩ se mba labɩnɩ tʋmɩyɛ nɖɩ, ɛlɛ pɩtʋʋ fɛyɩ se pa-taa kaalabɩ leleŋ siŋŋ se Yehowa wazɩ pa-pana ñaɣʋ yɔɔ. (Adu. 10:22) Pɩnzɩ nzɩ sɩtɩŋ pʋwayɩ yɔ sɩ-taa, panaɣaɣ ɛzɩma palakaɣnɩ tʋmɩyɛ Ɛsɔ sɛtʋ kɩɖanɖʋʋ ŋgʋ pamawa yɔ se pɛsɛɛ Yehowa lɛ, pɩkɛdaɣnɩ-wɛ pɩdɩɩfɛyɩ. Pɔkɔŋ nɛ pefezi Bɛtɩsaalɛɛlɩ nɛ Oholiyaabɩ ɛjaɖɛ kɩfaɖɛ taa nɛ panɩɩ se paalabɩnɩ tʋmɩyɛ Ɛsɔ sɛtʋ kɩɖanɖʋʋ ŋgʋ, toovenim Ɛsɔ sɛtʋ taa pɩnzɩ 500 mbʋ yɔ lɛ, pɩlakɩ-wɛ leleŋ siŋŋ.
Bibl kalʋʋ
(Ejipiti Lɩʋ 39:1-21) Ɛkpaɣ pɩsaʋ kɩsɛɛmʋʋ welewele nɛ ɖʋʋɖʋʋ nɛ kɩsɛɛmʋʋ cɩɩɩ nɛ anasaayɩ pɩsatʋ tɩɖɩɖɩ nɛ ɛlabɩnɩ ñɩɣlɩm tokonaa mba layʋ kaasuu nɛ ɛsʋʋ kooka taa yɔ. Ɛñɛyɩ tokonaa kiɖeɖema Aarɔɔnɩ, ɛzɩ Kɩbaɣlʋ keheyuu Moyizi yɔ. 2 Palabɩ toka yulaa nɛ sika, nɛ tɔlɩm kɩsɛɛmɩm welewele nɛ kɩsɛɛmɩm ɖʋʋɖʋʋ, kɩsɛɛmɩm cɩɩɩ, nɛ anasaayɩ tɩɖɩɖɩ ŋgʋ pehilitaa yɔ.3 Palabɩ sika katɩntɛyɩŋ nɛ patayɩ hɔɔlasɩ mɩzɩzɩ se pɛpɛlɛsɩ-sɩ kpɩtaŋ kɩsɛɛmɩŋ welewele taa nɛ kɩsɛɛmɩŋ ɖʋʋɖʋʋ taa, kɩsɛɛmɩŋ cɩɩɩ taa nɛ anasaayɩ pɩsatʋ tɩɖɩɖɩ taa, ɛzɩ weyi ɛsɩm pɩsaŋ sandʋ yɔ ɛlabʋ yɔ. 4 Pasandɩ ekusuye yulaa hazasɩ nasɩlɛ nɛ kpɩtaŋ, pɔhɔkɩ kpɩtaŋ ɛnɩ ɩ-nɔsɩ nasɩlɛ nɛ ekusuye. 5 Kpɩtaʋ ŋgʋ patasɩnɩ-ɩ se pɩɖɔkɩ yɔ, kɩmʋnɩ-ɖɩ nɛ pɩɩkɛ tʋmɩyɛ kʋyʋmɖɩyɛ: Kɩɩkɛ kɩsɛɛmʋʋ welewele nɛ kɩsɛɛmʋʋ ɖʋʋɖʋʋ, kɩsɛɛmʋʋ cɩɩɩ, nɛ anasaayɩ pɩsatʋ tɩɖɩɖɩ ndʋ pehilitaa yɔ, ɛzɩ Kɩbaɣlʋ keyehuu Moyizi se pala yɔ. 6 Pakpalɩ sɔzɩŋ pɛɛ wena pasʋzɩ sika pɔŋ taa, weyi ɩ-taa wɛ Izrayɛɛlɩ piya hɩla yɔɔ pɛɛ ana yɔ. 7 Paɖʋ ekusuye yulaa hazasɩ yɔɔ pɛɛ ana yɔ, wena pɩwɛɛ se atɔzʋʋ Izrayɛɛlɩ piya yɔɔ yɔ, ɛzɩ Kɩbaɣlʋ keheyuu Moyizi yɔ. 8 Palabɩ laŋɩyɛ taa pataŋa nɛ pasandɩ-kɛ ɛzɩ ekusuye yɔ, nɛ sika nɛ tɔlɩm kɩsɛɛmɩm welewele nɛ kɩsɛɛmɩm ɖʋʋɖʋʋ nɛ kɩsɛɛmɩm cɩɩɩ, nɛ anasaayɩ pɩsatʋ tɩɖɩɖɩ ndʋ pehilitaa yɔ. 9 Kɔ-hɔɔlɩŋ kɛwɛ kɩmaŋ, nɛ pala-kɛ nabʋlɛ taa, ɖaɣlɩkɩŋ taa nandaka kʋyʋmaɣ nɛ walanzɩ taa nandaka kʋyʋmaɣ. 10 Paɖʋ ka-taa ñɩɣlɩm pɛɛ canzɩ nasɩnaza. Kajalaɣ caŋa kɛ pɛɛ kɩsɛɛmaa, pɛɛ ceuu, pɛ aɖɔnɖɔlɛɛ; 11 Caŋa naalɛ ŋga taa nɛ maɖɛ, ñɩɣlɩm pɩyɛ diamaŋ. 12 Caŋa tozo ŋga taa nɛ pɩyɛ kɩñɩɣlɩsɩyɛ, pɩyɛ kɩsɛɛmɩyɛ ceuu nɛ pɩyɛ kɩsɛɛmɩyɛ welewele, 13 Caŋa nasa ŋga taa nɛ sika pɩyɛ, ñɩɣlɩm pɩyɛ kɩsɛɛmɩyɛ cɩɩɩ nɛ pɩyɛ amɛyamɛya. Pɛpɛlɛsɩ pɛɛ ana yɔ sika pɔŋ taa. 14 A-yɔɔ nɛ Izrayɛɛlɩ piya hɩla nɛ akpɛndɩ hiu nɛ naalɛ, ɛzɩ pa-hɩla yɔ. Paalɛkɩ-yɛ ɛzɩ masɩ yɔ, paa nɖɩ lɛ cejewe hiu nɛ naalɛ naɖɩyɛ hɩɖɛ taa. 15 Palabɩ laŋɩyɛ taa pataŋa nɛ sika kele kele alɩkpɛɛnaa, ɛzɩ kpɛm yɔ. 16 Palabɩ sika hɛkʋ natʋlɛ nɛ sika kokoo naalɛ ana laŋɩyɛ taa pataŋa hayo nɛ hadɛ kpɛŋa yɔɔ. 17 Pɔhɔkɩ kpɛm nabʋlɛ mbʋ nɛ kokoo naalɛ ana, laŋɩyɛ taa pataŋa kɔna taa. 18 Pɔhɔkɩ kpɛm nɔsɩ nasɩlɛ lɛɛsɩ nɛ sika hɛkʋ natʋlɛ: pɛñɛyɩ-wɛ ekusuye yulaa hazasɩ nasɩlɛ yɔɔ, ɛsɩndaa kiŋ. 19 Palabɩ ɖɔɖɔ sika kokoo naalɛ nɛ paɖʋ-yɛ ekusuye yulaa hadɛ kpɛnzɩ yɔɔ, pɩ-tɛɛ nɔɔ yɔɔ, ekusuye yulaa hɔɔlʋʋ yɔɔ kiŋ. 20 Patasɩ labʋ sika kokoo naalɛ nɛ paɖʋ-yɛ ekusuye yulaa hazasɩ yɔɔ, nɛ ɛsɩndaa kiŋ, pɩñɔtɩnɩ ɖenɖe pɔhɔkʋʋ na yɔ, ekusuye yulaa ɖɩdanɖɛ. 21 Pasʋsɩ kpɩtaʋ kɩsɛɛmʋʋ welewele laŋɩyɛ taa pataŋa ŋga kɛ-tɛ kokoo taa nɛ ekusuye yulaa kokoo taa, nɛ paɖɩnɩ laŋɩyɛ taa pataŋa, se pɩsa nɛ laŋɩyɛ taa pataŋa wɛɛ ekusuye yulaa tambaɖɛ yɔɔ, nɛ katalɩ ekusuye yɔɔ, ɛzɩ Kɩbaɣlʋ keheyuu Moyizi yɔ.
9-15 NOVEMBRE
ÑƖM MBƲ PƖWƐ ƐSƆTƆM TAA YƆ | LEVITIKI 1–3
“Mbʋ pʋyɔɔ palakaɣ haɖɛ yɔ”
(Levitiki 1:3) Ye ɛ-kɩlaʋ ɛkɛ kpɩnɛ sɔsɔyɛ kɩlaʋ miŋ kɩñaɣzʋʋ kɔyɔ, pɩkɛ kpɩnɛ kɩbɔʋ, nɖɩ ɖi-ɖoli tɩwɛɛkɩ yɔ, ɛlaa-kʋ kediɣzaɣ cokiye nɔnɔɔ taa, nɛ ɛhɛzɩ Kɩbaɣlʋ laŋɩyɛ;
(Levitiki 2:1) “Weyi ɛhaɣ Kɩbaɣlʋ kɩlaʋ haɖɛ yɔ, ɛ-haɖɛ kaakɛnɩ mʋlʋm kɩkpɩzɩm, paɖʋʋ pɩ-yɔɔ num nɛ palaɣyɩ pɩ-yɔɔ sɔzɩŋ pɛɛ.”
(Levitiki 2:12) “Ɩɩlaa Kɩbaɣlʋ kajalaɣ wondu, ɛlɛ tɩɩkaɣ kpaʋ altaaru yɔɔ se tɩlɩɩ sɔzɩŋ.”
it-2 847 § 5
Kɩlaŋ
Kɩlaŋ kɩñaɣzɩŋ. Pañaɣzaɣ kpɩna wena palakaɣnɩ kɩlaŋ kɩñaɣzɩŋ yɔ cɩɖɩ cɩɖɩ nɛ pɩɩkazɩɣ hɔɔlʋʋ nakʋyʋ se weyi ɛla kɩlaʋ yɔ ɛtɔɔ. Pɩwɩlɩɣ se paha Yehowa kpɩnɛ tɩŋa. (Kpaɣ ŋmaɣzɩnɩ Th 11:30, 31, 39, 40.) Patɩŋaɣnɩ kɩlaŋ ɛnɩ ɩ-yɔɔ nɛ petendiɣ Yehowa, nɛ pʋyɔɔ lɛ nabʋyʋ taa palaɣ kɩlaʋ kɩñaɣzʋʋ nɛ kɩwɛɛkɩm kɩlaʋ kpaagbaa se pɔpɔzɩ Yehowa se ekpeɣ-wɛ pa-kɩwɛɛkɩm.
it-2 849 § 7
Kɩlaŋ
Tɔɔnaɣ pee kɩlaŋ. Palakɩ tɔɔnaɣ pee kɩlaʋ, laŋhɛzɩyɛ kɩlaʋ, kɩlaʋ kɩñaɣzʋʋ nɛ kɩwɛɛkɩm kɩlaʋ alɩwaatʋ kʋɖʋmtʋ yɔɔ, ɛlɛ nabʋyʋ taa lɛ, papɩzɩɣ nɛ palaa kɩlaŋ ɛnɩ alɩwaatʋ ndɩ ndɩ yɔɔ. (Ejl 29:40-42; Lev 23:10-13, 15-18; Kɩg 15:8, 9, 22-24; 28:9, 10, 20, 26-28; ñʋʋ 29) Patɩŋɩɣnɩ kɩlaŋ ɛnɩ ɩ-yɔɔ nɛ pɛsɛɣ Ɛsɔ ɛ-wazasɩ yɔɔ. Paalaɣ tɔɔnaɣ kɩlaʋ lɛ, pɛkpɛndɩɣnɩ num nɛ sɔzɩŋ pɛɛ. Kɩlaʋ ŋgʋ kɩpɩzɩɣ nɛ kɩkɛnɩ mʋlʋm mbʋ pɩkpɩzɩ camɩyɛ yɔ, pee wena pɔhɔba yɔ, kpɔnɔnaa mba palabɩ-wɛ nɛ num nɛ pɛwɛɛ kulukulu yɔ yaa kpɔnɔnaa mba pɛwɛ tatayaa nɛ palabɩ-wɛ nɛ mʋlʋm mbʋ pɩkpɩzɩ camɩyɛ yɔ. Mbʋ mbʋ palakɩnɩ tɔɔnaɣ pee kɩlaʋ yɔ, pasɩɣ pɩ-taa nabʋyʋ miŋ kɩñaɣzʋʋ altaaru yɔɔ, cɔjɔnaa tɔkɩ pɩ-taa lɛɛbʋ nɛ weyi ɛkɔnɩ wondu ndʋ se palaa kɩlaʋ yɔ, ɛkpaɣ mbʋ pɩkazaa yɔ. (Lev 6:7-16; 7:11-13; Kɩg 18:8-11) Mbʋ pasɩɣ altaaru yɔɔ yɔ, pɩfɛyɩ se paɖʋ pɩ-taa lɔlɔm yaa “tɩŋ num ” (pɩtɩla num mbʋ pɩpɩzɩɣ pɩkɛ ɖɔɖɔ sirop yaa jus ŋgʋ palabɩnɩ fiigi pee yɔ) nɛ piyele nɛ pɩñɩŋ.—Lev 2:1-16.
(Levitiki 3:1) Ye ɛ-kɩlaʋ ɛkɛ kɩlaʋ ŋgʋ kɩ-taa pɔkɔdʋʋ yɔ nɛ ye kɩlaʋ kpɩnɛ ɛkɛ kpɩnɛ sɔsɔyɛ, kɩnɛʋ yaa kɩbɔʋ kɔyɔ, nɖɩ ɖi-ɖoli tɩwɛɛkɩ yɔ, ɛɛlaa Kɩbaɣlʋ.
it-2 847§ 5
Kɩlaŋ
Laŋhɛzɩyɛ kɩlaŋ. Ye Yehowa etisaa nɛ ɛmʋ laŋhɛzɩyɛ kɩlaʋ nakʋyʋ yɔ, pɩwɩlɩɣ se laŋhɛzɩyɛ wɛ ɛ nɛ weyi ɛla kɩlaʋ ŋgʋ yɔ, pɛ-hɛkʋ taa. Weyi ɛla kɩlaʋ ŋgʋ yɔ nɛ ɛ-hɔʋ pasʋʋ Ɛsɔ sɛtʋ kɩɖanɖʋʋ kadaɣ taa (Paasiɣ kizinzikiŋ kadaɣ taa kpɛɛ; nɛ tɔɔnaɣ ɖɩdɔɔyɛ naɖɩyɛ wɛ templo taa). Cɔjɔ weyi ɛlaɣ kɩlaŋ puwiye yɔ, ɛmʋʋ hɔɔlʋʋ nakʋyʋ, nɛ cɔjɔnaa mba paba ñasɩɣnɩ-ɩ yɔ, pamʋ hɔɔlʋʋ lɛɛkʋ. Nɛ pañaɣzɩɣ kɩlaʋ nɛ sɔzɩŋ kɩbaŋ weyi ɩlɩɣ yɔ, ɩkɛdɩɣnɩ Yehowa. Calɩm mbʋ pɩsɩŋnɩ wezuu yɔ, pɛcɛlɩɣ-pʋ Ɛsɔ. Pɩwɛ ɛzɩ cɔjɔnaa, mba palabɩ haɖɛ yɔ nɛ Yehowa pɛkpɛndaa nɛ pɔtɔɔ tɔɔnaɣ yɔ, nɛ pɩwɩlɩɣ se laŋhɛzɩyɛ wɛ pɛ-hɛkʋ taa. Ye nɔɔyʋ ɛfɛyɩ kele kele nɛ ɛlaa kɩlaʋ ŋgʋ yɔ (pʋ-tɔbʋʋ se ɛlabɩ azuluma lakasɩ nzɩ Paɣtʋ yɔɔdɩ sɩ-tɔm yɔ sɩ-taa nasɩyɩ), yaa ye alɩwaatʋ ndʋ pɩɩwɛ se pɔtɔɔ nandʋ yɔ, tɩɖɛwa pʋcɔ nɛ ɛtɔɔ tʋ yɔ (lona wena a-taa soŋaɣ wɛɛ yɔ nandʋ wɛɛkɩɣ lɔŋ), pɩwɛɛ se pakʋ-ɩ. Paa ɛ-maɣmaɣ ɛfɛyɩnɩ kele kele yaa nandʋ ndʋ ɛtɔwaa yɔ, ndʋ ɛfɛyɩnɩ kele kele yɔ, ɛ-lakasɩ nzɩ sɩwɩlɩɣ se ɛfɛyɩnɩ ñamtʋ wondu kiɖeɖetu yɔɔ.—Lev 7:16-21; 19:5-8.
Ðɩñɩnɩ fezuu taa ñɩm
(Levitiki 2:13) “Paa kɩlaʋ ŋgʋ ŋlaɣ kɔyɔ, taayele ɖʋʋ ña-kɩlaʋ taa ñɛ-Ɛsɔ ɛgbɛyɛ ɖɔm; paa haɖɛ nɖɩ ɖɩ-taa, ŋŋkpɛndɩnɩ ɖɔm haɖɛ nɛ ŋha Kɩbaɣlʋ ñɛ-Ɛsɔ.”
(Ezekɩyɛɛlɩ 43:24) Nɛ ŋkalaa-ɩ kɩbaɣlʋ ɛsɩndaa, nɛ cɔjɔnaa kaaɖʋ ɛ-yɔɔ ɖɔm nɛ palaa-ɩ Kɩbaɣlʋ kɩlaʋ miŋ kɩñaɣzʋʋ.
w04 15/5 22 § 1
Levitiki takayaɣ taa lɩmaɣza sɔsɔna
2:13—Ɛbɛ yɔɔ paɖʋwaɣ ɖɔm “paa kɩlaʋ ŋgʋ” lɛ kɩ-taa? Pataalakɩ mbʋ se kpɩnɛ nɖɩ palaɣ yɔ ɖɩ-nandʋ ɛwɛɛ leleŋ nɛ pɩkɩlɩ. Ðɔm yeki se nabʋyʋ ɛtaawɛɛkɩ lɔŋ. Pɩtʋʋ fɛyɩ se pʋyɔɔ paɖʋwaɣ-pʋ paa kɩlaʋ ŋgʋ lɛ kɩ-taa se pawɩlɩ se kɩwɛ kele kele nɛ kɩwɛɛ cɩɖɩ cɩɖɩ.
(Levitiki 3:17) “Pɩkɛ tamtam paɣtʋ mi-liɖe taa mba kpeekpe, paa ɩwɛ le yɔ: ɩɩkaɣ tɔɔʋ num nɛ calɩm.”
it-1 1003 § 6
Num
Mbʋ pʋyɔɔ paɖʋ paɣtʋ pɩ-yɔɔ yɔ. Paɣtʋ ɛgbɛyɛ tɛɛ lɛ, calɩm nɛ num pɩɩkɛ Yehowa ɖeke pʋyʋ. Calɩm sɩŋnɩ wezuu, nɛ Yehowa ɖeke pɩzɩɣna nɛ ɛha wezuu, pʋyɔɔ lɛ ɛnʋ tɩnɩ calɩm. (Lev 17:11, 14) Num kaakɛ kpɩnɛ hɔɔlʋʋ ŋgʋ kɩwɛ ñɩm siŋŋ yɔ. Alɩwaatʋ ndʋ Yehowa sɛyʋ nɔɔyʋ haɣ-ɩ kpɩnɛ num yɔ, pɩwɩlɩɣ se ɛnɩ pɩ-taa se Yehowa mʋnɩna se ɛmʋ hɔɔlʋʋ ŋgʋ kɩkɩlɩ ɖeu yɔ, nɛ ɛwɩlɩɣ ɖɔɖɔ se ɛsɔɔlaa se ɛcɛlɩ mbʋ pɩmʋ ñɩm siŋŋ yɔ ɛ-Ɛsɔ. Num wɩlaɣ se Izrayɛɛlɩ mba haɣ mbʋ pɩkɩlɩ ɖeu Yehowa yɔ; pʋyɔɔ lɛ, alɩwaatʋ ndʋ pañaɣzɩɣ-pʋ miŋ altaaru yɔɔ yɔ, pɔtɔŋ se pɩwɛ ɛzɩ ‘tɔɔnaɣ ŋga kɔ-sɔzɩŋ kpaɣ Yehowa cɔlɔ’ yɔ. (Lev 3:11, 16) Ye mbʋ pɩtaapɔzɩ se nɔɔyʋ ɛtɔɔ num. Ye nɔɔyʋ ɛtɔɔ num yɔ, pɩwɩlɩɣ se ɛtɔɔ mbʋ pɩkɛ Yehowa ñɩm yɔ. Nɛ papɩzɩɣ nɛ pakʋ-ɩ pɩ-yɔɔ. Pataalakɩnɩ calɩm tʋmɩyɛ paa ññɩɩ, ɛlɛ nabʋyʋ taa palakɩnɩ num tʋmɩyɛ hɔɔlɩŋ nɩɩyɩ taa. Ye kpɩnɛ naɖɩyɛ maɣmaɣ ɛsɩbɩna yaa ye kpɩnɛ lɛɛɖɛ ɛkʋnɩ-ɖɩ yɔ, papɩzɩɣ palabɩnɩ ɖi-num tʋmɩyɛ.—Lev 7:23-25.
w04 15/5 22 § 2
Levitiki takayaɣ taa lɩmaɣza sɔsɔna
3:17. Kpɩnɛ num kɛ hɔɔlʋʋ ŋgʋ kɩkɩlɩ ɖeu yɔ, nɛ paɖʋʋ paɣtʋ se pataatɔɔ-pʋ yɔ, pɩwɩlaɣ Izrayɛɛlɩ mba se Yehowa pɩmʋnaa se paha hɔɔlʋʋ ŋgʋ kɩwɛ ñɩm siŋŋ yɔ. (Kiɖe 45:18) Pɩkpɛlɩkɩɣ-ɖʋ se pɩwɛɛ se ɖɩha Yehowa mbʋ pɩkɩlɩ ɖeu yɔ.—Adu 3:9, 10; Kol 3:23, 24.
Bibl kalʋʋ
(Levitiki 1:1-17) Kɩbaɣlʋ ya Moyizi nɛ ɛyɔɔdɩnɩ-ɩ nɛ kediɣzaɣ cokiye tɛɛ kiŋ, mbʋ yɔ se: 2 “Yɔɔdɩnɩ Izrayɛɛlɩ piya nɛ ŋheyi-wɛ se: Mɩ-taa nɔɔyʋ ɛlaɣ Kɩbaɣlʋ ɖɩɣa taa kpɩnɛ yɔ, ɛlaa kpɩnɛ sɔsɔyɛ yaa cikpeɖe; 3 ye ɛ-kɩlaʋ ɛkɛ kpɩnɛ sɔsɔyɛ kɩlaʋ miŋ kɩñaɣzʋʋ kɔyɔ, pɩkɛ kpɩnɛ kɩbɔʋ, nɖɩ ɖi-ɖoli tɩwɛɛkɩ yɔ, ɛlaa-kʋ kediɣzaɣ cokiye nɔnɔɔ taa, nɛ ɛhɛzɩ Kɩbaɣlʋ laŋɩyɛ; 4 Ɛɛlaɣyɩ nesi kɩlaʋ kpɩnɛ ñʋʋ yɔɔ nɛ pɩmʋnɩ-ɖɩ se pala ɖɩ-yɔɔ kɩwɛɛkɩm kɔlʋʋ sɔnzɩ. 5 Ɛɛkʋ naaʋ Kɩbaɣlʋ ɛsɩndaa nɛ Aarɔɔnɩ pɩyalaa, layaa kaalizi kɩ-calɩm altaaru kpɛnzɩ yɔɔ pɩcɔɔ pɩta altaaru ŋgʋ kɩwɛ kediɣzaɣ cokiye nɔnɔɔ taa yɔ. 6 Eeliti kɩlaʋ kpɩnɛ, eehizi-ɖɩ nanʋʋ nanʋʋ; 7 nɛ layʋ Aarɔɔnɩ pɩyalaa kaapuzi miŋ altaaru yɔɔ nɛ pakaa ɖasɩ miŋ yɔɔ, 8 nɛ Aarɔɔnɩ pɩyalaa layaa kaapɩlɩ nandʋ, ñʋʋ nɛ num, ɖasɩ nzɩ paka miŋ yɔɔ altaaru yɔɔ yɔ sɩ-yɔɔ. 9 Ɛyʋ kaañalɩ lɩm lotu nɛ acaa nɛ layʋ kaañaɣzɩ pɩtɩŋa miŋ altaaru yɔɔ nɛ sɔzɩŋ kpa fɛmm Kɩbaɣlʋ ɛsɩndaa. 10 Ye ɛlaɣ kpɩnɛ cikpeɖe yɔ, heɣa yaa mbeɣa kɩlaʋ miŋ kɩñaɣzʋʋ kɔyɔ, pɩkɛnɩ kpɩnɛ kɩbɔʋ, nɖɩ ɖi-ɖoli tɩwɛɛkɩ yɔ, ɛɛlaa. 11 Ɛɛkʋ-ɖɩ altaaru nɛ ki-hayo, Kɩbaɣlʋ ɛsɩndaa, nɛ Aarɔɔnɩ pɩyalaa, layaa, kaalizi calɩm altaaru kpɛnzɩ yɔɔ kpɛɛɛ, pɩcɔɔ pɩta. 12 Nɛ ehizi nanʋʋ nanʋʋ, nɛ layʋ kaapɩlɩ nandʋ ndʋ, ñʋʋ nɛ num, ɖasɩ nzɩ paka miŋ yɔɔ altaaru yɔɔ yɔ, sɩ-yɔɔ. 13 Ɛyʋ kaañalɩ lɩm lotu nɛ acaa, nɛ layʋ kaañaɣzɩ pɩtɩŋa miŋ altaaru yɔɔ, nɛ sɔzɩŋ kpa fɛmm Kɩbaɣlʋ ɛsɩndaa. 14 Ye ɛ-kɩlaʋ ɛkɛ sumaɣ kɩlaʋ miŋ kɩñaɣzʋʋ kɔyɔ, ɛɛlaa ehooye yaa hoomataʋ. 15 Layʋ kaalaa-ɖɩ altaaru yɔɔ, ɛtaŋ ɖi-liu tɛɛ nɛ ɛsɛtɩ ñʋʋ nɛ ɛñaɣzɩ-kʋ miŋ altaaru yɔɔ; nɛ elizi calɩm altaaru kpɛŋa yɔɔ. 16 Ɛɛsɛtɩ njanjakɩyɛ nɛ ɛkpɛzɩ ɖɩ-yɔɔ hʋndʋ nɛ ɛlɔ altaaru wɩsɩ ɖɩlɩyɛ hɔɔlʋʋ taa kiŋ, ɖenɖe pañaɣzɩ num miŋ yɔ. 17 Ɛɛfaɣ sumaɣ hɔɔlɩŋ naalɛ kɩmaŋ, keluu lɛɛkʋ hɔɔlʋʋ nɛ lɛɛkʋ hɔɔlʋʋ, ɛlɛ ɛtaacɩyɩ-ɩ. Layʋ kaañaɣzɩ-kɛ miŋ altaaru yɔɔ, ɖasɩ nzɩ paka miŋ yɔɔ yɔ, sɩ-yɔɔ. Miŋ kɩñaɣzʋʋ kɩlaʋ ŋgʋ, kɩ-sɔzɩŋ kaɣ kpaʋ fɛmm Kɩbaɣlʋ ɛsɩndaa.
16-22 NOVEMBRE
ÑƖM MBƲ PƖWƐ ƐSƆTƆM TAA YƆ | LEVITIKI 4-5:19
“Ha Yehowa mbʋ ŋwɛna nɛ pɩkpaɖɩ ɖeu yɔ”
(Levitiki 5:5, 6) “Ye ɛlabɩ kɩwɛɛkɩm mbʋ yɔ pɩ-taa nabʋyʋ yɔ, ɛkaɣ heyuu kɩwɛɛkɩm mbʋ ɛlaba yɔ. Ɛɛkɔnɩ Kɩbaɣlʋ kpɩnɛ cikpeɖe, heu yaa pʋnʋ kɩnɛʋ, nɛ ɛkpɛyɩ ɛ-kɩwɛɛkɩm yɔɔ; nɛ layʋ kaakpizi ɛ-yɔɔ kɩwɛɛkɩm nɛ pekpeɣ-i ɛ-kɩwɛɛkɩm mbʋ.”
it-2 848 § 11
Kɩlaŋ
Kɩwɛɛkɩm kɩlaŋ. Nɔɔyʋ ɛlabɩ kɩwɛɛkɩm paa pɩtɩɩwɛ ɛzɩma yɔ, ɛlakɩ kɩwɛɛkɩm kɩlaʋ. Kɩlaŋ ɛnɩ, ɩɩwɛ ndɩ nɛ kɩlaŋ lɛɛŋ. Weyi ɛlabɩ kɩwɛɛkɩm yɔ ɛwɛɛkɩ nabʋyʋ nɛ ɛlaɣ kɩlaʋ ŋgʋ se ɛñɔɔzɩnɩ mbʋ ɛwɛɛkaa yɔ, paa mbʋ ɛwɛɛkaa yɔ pitukuni Yehowa maɣmaɣ yaa ɛ-samaɣ ŋga kɛwɛ kele kele yɔ. Kɩwɛɛkɩm laɖʋ lakaɣ kɩlaʋ ŋgʋ se ɛwɩlɩ se ekpiɖi ɛ-kɩwɛɛkɩm yɔɔ, ɛñɔɔzɩ mbʋ ɛwɛɛkaa yɔ nɛ ɛ nɛ Yehowa peceɣ nɛ pekpeɣ-i ɛ-kɩwɛɛkɩm nɛ ɛtasɩ hiɣu wala wena ɛɛwɛna yɔ a-taa naayɛ.—Kpaɣ ŋmaɣzɩnɩ Iza 53:10.
(Levitiki 5:7) “Ye ɛɛpɩzɩɣ kpɛyʋʋ kpɩnɛ cikpeɖe yɔ, ɛɛkpɛyɩ Kɩbaɣlʋ kɩwɛɛkɩm mbʋ ɛlaba yɔ pɩ-yɔɔ ahoo naalɛ yaa hoomataŋ naalɛ, lɛɛkʋ kɩwɛɛkɩm yɔɔ kɩgbɛyʋʋ, nɛ lɛɛkʋ kɩlaʋ miŋ kɩñaɣzʋʋ.
w09 1/6 26 § 3
Ɛsɩm ɖo-ɖoŋ kamaɣ
Paɣtʋ yɔɔdɩ ɛzɩma Yehowa maɣzɩɣ ɛyaa yɔɔ yɔ pɩ-tɔm se: “Ye ɛɛpɩzɩɣ kpɛyʋʋ kpɩnɛ cikpeɖe yɔ, ɛɛkpɛyɩ Kɩbaɣlʋ kɩwɛɛkɩm mbʋ ɛlaba yɔ pɩ-yɔɔ ahoo naalɛ yaa hoomataŋ naalɛ.” (Kalɩtʋ 7) Papɩzɩɣ nɛ pɛɖɛzɩ tɔm loyaɣ “Ye ɛɛpɩzɩɣ . . . yɔ”, se “Ye e-nesi ɛɛtaŋ . . . yɔ.” Ye Izrayɛɛlɩ tʋ nɔɔyʋ ɛkɛ kʋñɔndʋ nɛ ɛɛpɩzɩɣ se ɛha ɛyaʋ yɔ, ɛpɩzɩɣ nɛ ɛha Ɛsɔ mbʋ ɛpɩzɩɣ yɔ—ahoo naalɛ yaa hoomataŋ naalɛ.
(Levitiki 5:11) “Ye ɛɛnaɣ ahoo naalɛ yaa hoomataŋ naalɛ yɔ, ɛɛkɔnɩ mʋlʋm kɩkpɩzɩm hɔɔlʋʋ hiu ñɩŋgʋ nɛ ɛlaa kɩwɛɛkɩm mbʋ ɛlaba yɔ pɩ-yɔɔ; ɛtaaɖʋ num nɛ ɛtaasɩɩ pɩ-yɔɔ sɔzɩŋ pɛɛ, mbʋ yɔ pɩkɛ kɩwɛɛkɩm yɔɔ kɩlaʋ kpɩnɛ.
w09 1/6 26 § 4
Ɛsɩm ɖo-ɖoŋ kamaɣ
Ɛlɛ ɛbɛ kɩwɛɛkɩm laɖʋ pɩzɩɣ ɛla ye ɛfɛyɩnɩ sumasɩ liidiye yɔ? Paɣtʋ yɔɔdaa se pɩwɛɛ se ɛkɔnɩ “mʋlʋm kɩkpɩzɩm hɔɔlʋʋ hiu ñɩŋgʋ nɛ ɛlaa kɩwɛɛkɩm mbʋ ɛlaba yɔ pɩ-yɔɔ.” (Kalɩtʋ 11) Yehowa ha waɖɛ mba pɛkɛ tanɩm tɩnaa siŋŋ yɔ se pakpaɣ wondu ndʋ tɩ-taa calɩm fɛyɩ yɔ nɛ palaa kɩwɛɛkɩm kɩlaʋ. Izrayɛɛlɩ ɛjaɖɛ taa lɛ, nɔɔyʋ ɛkɛ kʋñɔndʋ yɔ, pɩɩɖɩkɩ-ɩ nʋmɔʋ se ɛlaa kɩlaŋ weyi pɩpɔzʋʋ yɔ, nɛ laŋhɛzɩyɛ wɛɛ ɛ nɛ Yehowa pɛ-hɛkʋ taa.
Ðɩñɩnɩ fezuu taa ñɩm
(Levitiki 5:1) “Ye nɔɔyʋ ɛlabɩ kɩwɛɛkɩm pʋnɛ yɔ yɔ: nɔɔyʋ ɛnɩ ɛyʋ lɛlʋ nɔɔ, eɖukaɣ, nɛ ɛkɛ aseɣɖe tʋ, ɛlɛ esu, ɛtɩyɔɔdɩ yɔ, ɛ-kɩwɛɛkɩm cakɩ ɛ-ñʋʋ taa.
Ðɩmaɣzɩnɩ Yehowa sɛyaa siɣsiɣ tɩnaa
14 Ye ŋwɛnɩ camɩyɛ lakasɩ yɔ, ña ɖɔɖɔ ŋwɩlɩɣ se ŋñɔnɩ Yehowa kajalaɣ ɖeɖe, nɛ ŋtɛ ŋñɔɔnɩ lalaa. Pɩtɩtɩlɩ yɔ, ŋnawa se koobu nɔɔyʋ labɩ kɩwɛɛkɩm sɔsɔm nabʋyʋ. Ye pɩlaba se ɛkɛ ña-taabalʋ sɔsɔ nɔɔyʋ yaa ñɔ-hɔʋ taa tʋ nɔɔyʋ yɔ, ŋkaɣ sɔɔlʋʋ se ŋñɔɔnɩ-ɩ. Ɛlɛ ŋnawa ɖɔɖɔ se Yehowa pɩwɛɛ se ŋkɩlɩ ñɔnʋʋ. Ye mbʋ, ɛzɩ Naataŋ yɔ, pɩwɛɛ se ŋña Yehowa nɛ ŋla ño-koobu mbʋ pɩwɛ ɖeu yɔ. Heyi-i se pɩwɛɛ se ɛyɔɔdɩnɩ ɛgbɛyɛ taa ɛzʋtʋyaa kpɛdɛyɛ nɛ pasɩnɩ-ɩ. Ye ekizaa se eewoki nɛ ɛna-wɛ yɔ, pɩwɛɛ se ña-maɣmaɣ ŋwolo nɛ ŋheyi-wɛ. Ye ŋlabɩ mbʋ yɔ, ŋwɩlɩɣ se ŋñɔnɩ Yehowa. Ŋwɩlɩɣ ɖɔɖɔ se ŋlabɩ ño-koobu mbʋ pɩwɛ ɖeu yɔ, mbʋ pʋyɔɔ yɔ ɛzʋtʋyaa pɩzɩɣ pasɩnɩ-ɩ nɛ taabalɩyɛ kɩbanɖɛ tasɩ wɛʋ ɛ nɛ Yehowa pɛ-hɛkʋ taa. Pakaɣ-ɩ sɩɣzʋʋ lɔŋ hɛɛɛ nɛ sɔɔlɩm.—Kalɩ Levitiki 5:1; Galaatii mba 6:1.
(Levitiki 5:15, 16) “Ye nɔɔyʋ eyiɣdaa nɛ ɛlɩzɩ Kɩbaɣlʋ pʋyʋ yɔɔ, ɛtɩna, nɛ ɛla kɩwɛɛkɩm kɔyɔ, ɛɛkɔnɩ Kɩbaɣlʋ e-wondu taa ɛyaʋ, ŋgʋ ki-ɖoli tɩwɛɛkɩ yɔ, nɛ ɛkpɛyɩ ɛ-kɩwɛɛkɩm yɔɔ, paakalɩ kɩ-yɔɔ kooka taa liidiye.” 16 Ɛɛpɩsɩnɩ mbʋ ɛ-kɩwɛɛkɩm pasɩ Ɛsɔ pʋyʋ yɔɔ yɔ, nɛ ɛsɔzɩ pɩ-yɔɔ kɛzɛɣa nɛ ɛɖʋzɩ-pʋ layʋ nesi tɛɛ. Ɛlɛ kaakpizi ɛ-yɔɔ ɛyaʋ ŋgʋ pɛkpɛyɩɣ yɔ, nɛ pekpeɣ-i ɛ-kɩwɛɛkɩm.
it-2 861 § 8
Kele kele wɛtʋ
Kpɩna nɛ tɔɔnasɩ. Kajalaɣ neɣye abalɩñɩnɖɛ, kajalaɣ heɣa abalɩñɩŋga, nɛ kajalaɣ mbeɣa ŋga pɩlʋlʋʋ yɔ, pɛkɛ pʋyʋ kiɖeɖeu. Pɩwɛɛ se palaa kpɩna ana nɛ cɔjɔ weyi ɛlaɣ-yɛ yɔ ɛkpakɩɣ hɔɔlʋʋ nakʋyʋ. (Kɩg 18:17-19) Kajalaɣ tɩŋ pee nɛ hɔɔlʋʋ hiu ñɩŋgʋ pɛkɛ wondu kiɖeɖetu, ɖɔɖɔ ɛzɩ kɩlaŋ weyi palaɣ nɛ haɖɛ nɖɩ palakɩ se paɖʋnɩ nesi tʋmɩyɛ nɖɩ palakɩ kediɣzaɣ kizinziku tɛɛ yɔ. (Ejl 28:38) Wondu kiɖeɖetu tɩŋa wɛ kele kele Yehowa ɛsɩndaa nɛ pɩfɛyɩ se pepisi-tʋ yaa nɔɔyʋ ɛlabɩnɩ-tʋ mbʋ ɛsɔɔlaa yɔ. Ðɩkpaɣ paɣtʋ ndʋ paɖʋ hɔɔlʋʋ hiu ñɩŋgʋ yɔɔ yɔ. Ye abalʋ nɔɔyʋ ɛɖʋ hayɩm nɛ ɛlɩzɩ hɔɔlʋʋ hiu ñɩŋgʋ se ɛhaɣ Yehowa, ɛlɛ ɛ-maɣmaɣ yaa ɛ-hɔʋ taa tʋ nɔɔyʋ kpaɣ pɩ-taa nabʋyʋ nɛ ɛlabɩnɩ tɔɔnaɣ yaa nabʋyʋ yɔ, ɛmanɩ paɣtʋ ndʋ Ɛsɔ ɖʋwa pɩlɩɩnɩ wondu kiɖeɖetu yɔɔ yɔ tɩ-yɔɔ. Paɣtʋ tɔŋ se pɩwɛɛ se ɛyʋ ɛnʋ ɛhɛyɩ mbʋ pɩɩwɛɛ se ɛhɛyɩ yɔ nɛ ɛsɔzɩ ɖɔɖɔ mbʋ ɛhɛyɩɣ yɔ, pɩ-hɔɔlʋʋ 5 ñɩŋgʋ; nɛ ewoni heɣa ŋga kɛfɛyɩnɩ ɛjandʋ yɔ nɛ ɛlaa kɩlaʋ. Ye mbʋ, pɩwɛɛ se Izrayɛɛlɩ mba ɩwɛɛnɩ ñamtʋ Yehowa wondu kiɖeɖetu yɔɔ.—Lev 5:14-16.
Bibl kalʋʋ
(Levitiki 4:27–5:4) Ye samaɣ taa ɛyʋ nɔɔyʋ ɛlabɩ kɩɩsɩŋɩyɩtʋ lakasɩ nɛ ɛla kɩwɛɛkɩm nɛ ɛɖɔɔ wɛɛ nɛ Kɩbaɣlʋ paɣtʋ kizi ndʋ yɔ tɩ-taa natʋyʋ yɔ, 28 ye peheyi-i mbʋ ɛwɛɛkaa yɔ yɔ, ɛɛkɔnɩ kɩwɛɛkɩm mbʋ ɛlaba yɔ pɩ-yɔɔ pʋnʋ kɩnɛʋ weyi e-ɖoli tɩwɛɛkɩ yɔ. 29 Ɛɛlaɣyɩ nesi kɩlaʋ kpɩnɛ ñʋʋ yɔɔ nɛ ɛkʋ-ɖɩ ɖenɖe pakʋʋ kɩlaŋ miŋ kɩñaɣzɩŋ yɔ. 30 Layʋ kaakasɩnɩ e-niye calɩm pazɩ nɛ ɛtaa kɩlaŋ miŋ kɩñaɣzɩŋ altaaru kɛŋgɛmɩŋ yɔɔ. Pʋwayɩ lɛ ɛɛpɩyɩ calɩm kpeekpe altaaru tɛɛ; 31 ɛɛkɛlɩ num kpeekpe ɛzɩ pɛkɛlʋʋ kɩlaʋ kʋkɔdʋʋ num yɔ nɛ layʋ kaañaɣzɩ-pʋ miŋ nɛ sɔzɩŋ kpa Kɩbaɣlʋ cɔlɔ fɛmm. 32 Ye heɣa ɛsɔɔlɩ kɔnʋʋ se palaanɩ kɩlaʋ ŋgʋ yɔ, pɩkɛnɩ heɣa kɩnɛɣa ŋga ko-ɖoli tɩwɛɛkɩ yɔ, ɛɛkɔna. 33 Ɛɛlaɣyɩ nesi kɩlaʋ kpɩnɛ ñʋʋ yɔɔ nɛ ɛkʋ-ɖɩ ɖenɖe pakʋʋ kɩlaŋ miŋ kɩñaɣzɩŋ yɔ. 34 Layʋ kaakasɩnɩ e-niye kɩlaʋ ŋgʋ kɩ-calɩm pazɩ nɛ ɛtaa kɩlaʋ miŋ kɩñaɣzɩŋ altaaru kɛŋgɛmɩŋ yɔɔ. Pʋwayɩ lɛ ɛɛpɩyɩ calɩm kpeekpe altaaru tɛɛ. 35 Ɛɛkɛlɩ num kpeekpe ɛzɩ pɛkɛlʋʋ heu kɩlaʋ kʋkɔdʋʋ num yɔ, nɛ layʋ kaañaɣzɩ hɔɔlɩŋ ɛnɩ miŋ altaaru yɔɔ, pɩkpɛndɩnɩ mbʋ pɩkɛɣ Kɩbaɣlʋ tɔɔnaɣ yɔ. Layʋ kaala sɔnzɩ nzɩ ɛyʋ yɔɔ nɛ ekpizi kɩwɛɛkɩm mbʋ ɛlaba yɔ, nɛ pekpeɣ-i pʋ.
5 Ye nɔɔyʋ ɛlabɩ kɩwɛɛkɩm pʋnɛ yɔ yɔ: nɔɔyʋ ɛnɩ ɛyʋ lɛlʋ nɔɔ, eɖukaɣ, nɛ ɛkɛ aseɣɖe tʋ, ɛlɛ esu, ɛtɩyɔɔdɩ yɔ, ɛ-kɩwɛɛkɩm cakɩ ɛ-ñʋʋ taa; 2 yaa nɔɔyʋ tukuni azuluma pʋyʋ, paa pɩkɛ we, azuluma kpɩnɛ kɩsɩbɩyɛ, ɖɩɣa azuluma kpɩnɛ, azuluma tɛtɛ wonuu nɛ ɛpɩsɩ azuluma tʋ, ɛtɩna; 3 yaa etukuni ɛyʋ azuluma pʋyʋ, paa pɩkɛ we, nɛ pi-tukunuu pisi-i, ɛtɩna, nɛ pʋwayɩ lɛ ɛna yɔ, ɛ-kɩwɛɛkɩm cakɩ ɛ-ñʋʋ taa; 4 yaa nɔɔyʋ ɖuu ɖuutu tɩfɛyɩ ɖeu, yaa tɩwɛ ɖeu kɔyɔ, paa tɔm ndʋ ti-ɖeɖe, ɖenɖe ɛyʋ pɩzɩɣ ɛɖɛlɛsɩ ɖuuu yɔ; pʋwayɩ lɛ ɛkɔɔ ɛnɩɩ kɔyɔ, ɛ-kɩwɛɛkɩm cakɩ ɛ-ñʋʋ taa.
23-29 NOVEMBRE
ÑƖM MBƲ PƖWƐ ƐSƆTƆM TAA YƆ | LEVITIKI 5:20-7
“Samtʋ kɩlaʋ”
(Levitiki 7:11, 12) Laŋhɛzɩyɛ kɩlaʋ ŋgʋ paalaa Kɩbaɣlʋ yɔ kɩ-paɣtʋ yɔ: 12 Ye pɛkpɛndɩɣ-kʋ nɛ samtʋ kɩlaʋ kɔyɔ, paatɩnɩ kɩ-yɔɔ tindine nɖɩ ɖɩtɩñɩŋ nɛ ponuuti-ɖɩ num taa yɔ, ɖɩ-haɖɛ, paɖʋ mʋlʋm kuɖoŋum tindine nɖɩ paɖʋ ɖɩ-taa num yɔ.
Lɔŋ weyi ɖɩpɩzɩɣ nɛ ɖɩkpɛlɩkɩ Levitiki takayaɣ taa yɔ
9 Lɔŋ naalɛ ñɩŋ: Ðɩsɛɣ Yehowa mbʋ pʋyɔɔ yɔ ɖɩwɛnɩ ɛ-yɔɔ ɛsɩmɩyɛ. Pɩsa nɛ ɖɩñɩɣ niye pɩ-yɔɔ lɛ, iyele nɛ ɖɩyɔɔdɩ laŋhɛzɩyɛ kɩlaŋ tɔm. Ɩɩkɛ ɖɔɖɔ caanaʋ taa Izrayɛɛlɩ ñɩma toovenim Ɛsɔ sɛtʋ hɔɔlʋʋ sɔsɔʋ nakʋyʋ. Ðɩkpɛlɩkɩ Levitiki takayaɣ taa se Izrayɛɛlɩ pɩɣa nakɛyɛ pɩzɩɣ nɛ kalaa laŋhɛzɩyɛ kɩlaʋ ɛzɩ “samtʋ kɩlaʋ” yɔ; pʋ-tɔbʋʋ se kalakɩ kɩlaʋ ŋgʋ se kawɩlɩnɩ kɛ-ɛsɩmɩyɛ. (Lev. 7:11-13, 16-18) Ye kalaɣ kɩlaʋ ŋgʋ yɔ, pɩtɩkɛnɩ-kɛ kɩjɛyʋʋ, ɛlɛ kalakaɣ-kʋ nɛ sɔɔlɩm faaa. Ye mbʋ, pɩɩkɛ sɔɔlɩm kɩlaʋ ŋgʋ nɔɔyʋ lakaɣ mbʋ pʋyɔɔ yɔ ɛsɔɔlɩ ɛ-Ɛsɔ Yehowa yɔ. Weyi ɛlaɣ kɩlaʋ yɔ, ɛ nɛ ɛ-hɔʋ taa ñɩma nɛ layaa pɔtɔkɩ kpɩnɛ nɖɩ palawa yɔ ɖɩ-nandʋ. Ɛlɛ kpɩnɛ nɖɩ palawa yɔ, ɖɩ-hɔɔlɩŋ nɩɩyɩ wɛɛ lɛ, Yehowa ɖeke pɛcɛlaɣ-ɩ. Hɔɔlɩŋ ɛnɩ lɛ weyi?
(Levitiki 7:13-15) Paasɔzɩ tindimee wena añɩŋaa yɔ a-yɔɔ haɖɛ nɖɩ pɛkpɛndɩnɩ samtʋ kɩlaʋ se palaa yɔ. 14 Paacozi haɖɛ ndɩ ndɩ yɔɔ nɛ paha Kɩbaɣlʋ; layʋ weyi ɛmɩzɩ kɩlaʋ kpɩnɛ calɩm yɔ, ɛnʋ kaɣnɩ-ɖɩ tɩnaʋ. 15 Kɩyakʋ ŋgʋ ki-wiye maɣmaɣ paatɔɔ kɩlaʋ kpɩnɛ nandʋ ɖenɖe paha haɖɛ yɔ, nabʋyʋ ɛɛkaɣ kazʋʋ nɛ tɛʋ fe.
w00 15/8 15 § 15
Kɩlaŋ weyi ɩkɛdɩnɩ Ɛsɔ yɔ
15 Kɩlaŋ weyi Izrayɛɛlɩ mba laɣaɣ faaa yɔ, ɩ-taa lɛɛkʋ lɛ laŋhɛzɩyɛ kɩlaʋ nɛ pɔyɔɔdɩ kɩ-tɔm Levitiki ñʋʋ 3 taa. Papɩzɩɣ nɛ pɛɖɛzɩ tɔm loyaɣ ŋga se “kɩlaʋ ŋgʋ palaɣ se pala laŋhɛzɩyɛ yɔ.” Ebree kʋnʋŋ taa lɛ, pɩtɩkɛ alɩwaatʋ ndʋ you yaa puuyaɣ lakasɩ fɛyɩ yɔ, ti-ɖeke tɩ-taa pɔtɔŋ se ɛyʋ wɛ “laŋhɛzɩyɛ” taa. Takayaɣ nakɛyɛ (Études des institutions mosaïques (angl.)) yɔɔdaa se: “Bibl taa lɛ, ye pɔtɔm se ɛyʋ wɛ laŋhɛzɩyɛ taa yɔ, pɩwɩlɩɣ se ɛfɛyɩ you nɛ puuyaɣ lakasɩ taa, nɛ pɩwɩlɩɣ ɖɔɖɔ se laŋhɛzɩyɛ wɛ ɛ nɛ Ɛsɔ pɛ-hɛkʋ taa, ɛwɛ koboyaɣ, taa leleŋ nɛ laŋhʋlʋmɩyɛ taa.” Ye mbʋ ɛyʋ ɛɛlaɣ laŋhɛzɩyɛ kɩlaʋ se ɛpɔzɩ se ɛ nɛ Ɛsɔ peceɣ, ɛlɛ ɛlaɣ-kʋ se ɛwɩlɩ ɛ-ɛsɩmɩyɛ Ɛsɔ mbʋ pʋyɔɔ yɔ ɛlɛ ha-ɩ waɖɛ se ɛsɛɛ-ɩ nɛ ɛwazɩ-ɩ nɛ ɛwɛɛ laŋhɛzɩyɛ taa. Cɔjɔ nɛ weyi ɛkɔnɩ kpɩnɛ se palaa-ɖɩ yɔ, pahaɣ Yehowa calɩm nɛ num nɛ pɩtɛ lɛ patayɩ mbʋ pɩkazaa yɔ. (Levitiki 3:17; 7:16-21; 19:5-8) Ye mbʋ papɩzɩɣ nɛ pɔtɔ se cɔjɔ, weyi ɛkɔnɩ kpɩnɛ se palaa-ɖɩ yɔ nɛ Yehowa pɛkpɛndaa nɛ pɔtɔɔ tɔɔnaɣ nɛ pɩwɩlɩɣ se laŋhɛzɩyɛ wɛ pɛ-hɛkʋ taa.
(Levitiki 7:20) Ɛlɛ ye nɔɔyʋ ɛwɛnɩ azuluma nɛ ɛtɔɔ faɖaɖa laŋhɛzɩyɛ kɩlaʋ kpɩnɛ nandʋ ndʋ pala-tʋ Kɩbaɣlʋ yɔ yɔ, palɩzɩɣ pʋdʋ ɛnʋ ɛ-samaɣ taa.
w00 15/8 19 § 8
Samtʋ kɩlaŋ weyi ɩkɛdɩnɩ Yehowa yɔ
8 Weyi ewokini kpɩnɛ se palaa-ɖɩ yɔ, wɛtʋ ndʋ taa pɩwɛɛ se ɛwɛɛ? Paɣtʋ yɔɔdaa se pɩwɛɛ se mba payɩ powoki Yehowa ɛsɩndaa yɔ, pɛwɛɛ kele kele. Ye nɔɔyʋ ɛfɛyɩ kele kele yɔ, pɩpɔzʋʋ se ɛcalɩ laʋ kɩwɛɛkɩm kɩlaʋ nɛ pekpeɣ-i ɛ-kɩwɛɛkɩm nɛ ɛwɛɛ kele kele Yehowa ɛsɩndaa nɛ pʋwayɩ lɛ, ɛlaa laŋhɛzɩyɛ kɩlaʋ. (Levitiki 5:1-6, 15, 17) Ye mbʋ ɖɩnɩɣ pɩ-taa se pɩcɛyaa se paa ɛzɩmtaa lɛ, ɖɩwɛɛ kele kele Yehowa ɛsɩndaa. Ye ɖɩmanɩ Yehowa paɣtʋ natʋyʋ yɔɔ yɔ, pɩpɔzʋʋ se ɖɩñɔɔzɩ mbʋ ɖɩwɛɛkaa yɔ lɔŋ, pɩsa nɛ Yehowa tisi nɛ ɛmʋ ɖɛ-sɛtʋ. Pɩwɛɛ se ɖɩtɩŋnɩ nʋmɔŋ weyi pɩpɔzʋʋ yɔ ɩ-yɔɔ nɛ ɖɩpɔzɩ se pasɩnɩ-ɖʋ; nʋmɔŋ ɛnɩ lɛ “ɛgbɛyɛ taa ɛzʋtʋyaa” nɛ Yesu Krɩstʋ weyi “ɛkɛ ceɣu kɩlaʋ ɖa-kɩwɛɛkɩm yɔɔ” yɔ.—Yakubu 5:14; 1 Yohanɛɛsɩ 2:1, 2.
Ðɩñɩnɩ fezuu taa ñɩm
(Levitiki 5:25) Miŋ kaañakɩ tam altaaru yɔɔ, itaaɖe kaaʋ.
it-1 889 § 2
Miŋ
Mbʋ palakaɣnɩ miŋ Ɛsɔ sɛtʋ kɩɖanɖʋʋ nɛ templo taa yɔ. Palakaɣnɩ miŋ tʋmɩyɛ Ɛsɔ sɛtʋ taa, Ɛsɔ sɛtʋ kɩɖanɖʋʋ tɛɛ nɛ pʋwayɩ lɛ templo taa. Cɔjɔ sɔsɔ ñaɣzɩɣ miŋ ŋgee sɔzɩŋ tɩlaaɖɩ tanamɩŋ tɛɛ nɛ alɩwaatʋ ndʋ wɩsɩ paɣzɩɣ ɖʋʋ nɛ alɩwaatʋ ndʋ ɖoo yuu yɔɔ. (Ejl. 30:7, 8) Ɛsɔ paɣtʋ yɔɔdaa se pɩwɛɛ se miŋ ɛmʋʋ altaaru yɔɔ tam. (Lev 5:25, 26) Yuuda mba sɔnzɩ nasɩyɩ taa, pawɩlɩɣ se kiɖe tɛɛ lɛ, Ɛsɔ maɣmaɣ kaaɖʋnɩ miŋ ɛnɩ nɛ ɛyaa sakɩyɛ tisiɣ tɔm ndʋ tɩ-yɔɔ; ɛlɛ tɩɩlakɩ nɔɔ kʋɖʋmaɣ nɛ Bibl paɣtʋ. Toovenim taa lɛ, Yehowa kaaheyi Moyizi se Aarɔɔnɩ pɩyalaa pɩwɛɛ se popuzi “miŋ altaaru yɔɔ nɛ pakaa ɖasɩ miŋ yɔɔ”, pʋcɔ nɛ patɩnɩ kɩlaʋ kpɩnɛ altaaru yɔɔ. (Lev. 1:7, 8) Palɩzɩ Aarɔɔnɩ nɛ ɛ-pɩyalaa se pɛkɛ cɔjɔnaa nɛ papaɣzɩ laʋ kɩlaŋ pʋcɔ nɛ miŋ nɩɩyɩ lɩɩnɩ Yehowa cɔlɔ nɛ ɛñaɣ altaaru yɔɔ kɩlaʋ. Nɛ pɩtʋʋ fɛyɩ se miŋ ɛnɩ ɛɛlɩnɩ mɩnʋʋ ŋgʋ kiihuuzi Ɛsɔ sɛtʋ kɩɖanɖʋʋ yɔɔ yɔ kɩ-taa. Pɩwɩlɩɣ se miŋ weyi ɛɛlɩnɩ Ɛsɔ cɔlɔ yɔ, ɛtaañaɣ kpoŋgbolonaa mba palabɩnɩ altaaru yɔ, ɛlɛ “altaaru yɔɔ kɩlaʋ nɛ num” ɛɛñaɣaa. Miŋ weyi ɛlɩnɩ Ɛsɔ cɔlɔ yɔ nɛ miŋ weyi paatɛm puzuu altaaru yɔɔ yɔ, ɛnɩ wobini pɩ-yɔɔ nɛ ɛñakɩ altaaru yɔɔ tam. (Lev 8:14–9:24) Alɩwaatʋ ndʋ paɖʋzaɣ Salomɔɔ templo Yehowa nesi tɛɛ yɔ, Salomɔɔ labɩ adɩma nɛ pɩtɛ lɛ, miŋ nɩɩyɩ lɩɩnɩ Yehowa cɔlɔ nɛ ɩñaɣ kɩlaʋ kpɩna.—4 Aw 7:1; kalɩ ɖɔɖɔ Th 6:21; 1 Aw 18:21-39; 3 Aw 21:26 nɛ ŋna kɩɖaŋ lɛɛŋ weyi ɩ-taa miŋ lɩnɩ Yehowa cɔlɔ nɛ ɩñaɣ kɩlaŋ weyi ɛ-sɛyaa laɣaɣ yɔ.
(Levitiki. 6:18) “Yɔɔdɩnɩ Aarɔɔnɩ nɛ ɛ-pɩyalaa nɛ ŋheyi-we se: Kɩwɛɛkɩm sɔnzɩ lɛ, palaɣ kɩlaʋ ŋgʋ Kɩbaɣlʋ ɛsɩndaa, ɖenɖe pañaɣzɩɣ kɩlaʋ kpɩnɛ miŋ yɔ. Pɩkɛ pʋyʋ kiɖeɖeu pɩŋŋ.”
si 27 § 15
Bibl takayaɣ naadozo ñɩŋga—Levitiki
15 (3) Ye pɩyʋtɩnɩ nɔɔyʋ nɛ ɛla kɩwɛɛkɩm nabʋyʋ yɔ, pɩpɔzʋʋ se ɛlaa kɩwɛɛkɩm kɩlaʋ. Ye cɔjɔ nɔɔyʋ ɛlabɩnɩ kɩwɛɛkɩm mbʋ yɔ, kpɩnɛ nɖɩ ɛlaɣ yɔ ɖɩwɛɣ ndɩ nɛ nɖɩ pɩpɔzʋʋ se palaa ye samaɣ kpeekpe ɛlabɩnɩ kɩwɛɛkɩm yɔ, nɛ ɖɩɖɩ wɛɣ ndɩ ɖɔɖɔ nɛ kpɩnɛ nɖɩ pɩpɔzʋʋ se palaa ye ñʋʋdʋ nɔɔyʋ yaa ɛyʋ nɔɔyʋ yem ɛlabɩnɩ kɩwɛɛkɩm yɔ. Ɛyʋ maɣmaɣ ɖʋʋnɩ ɛ-taa faaa se ɛlakɩ sɔɔlɩm haɖɛ yaa ɛlaɣ laŋhɛzɩyɛ kɩlaʋ, ɛlɛ pɩkɛnɩ kɩjɛyʋʋ se palaa kɩwɛɛkɩm kɩlaʋ.—4:1-35; 6:10-16.
Bibl kalʋʋ
(Levitiki 5:20–6:11) Kɩbaɣlʋ yɔɔdɩnɩ Moyizi nɛ eheyi-i se: 21 “Ye nɔɔyʋ ɛlakɩ kɩwɛɛkɩm nɛ emuluu Kɩbaɣlʋ nɛ cɛtɩm tɔm ɛ-tɛ ɛjaɖɛ taa pɩɣa yɔɔ, wonuu ŋgʋ pasɩwa yɔ kɩ-yɔɔ, yaa palɩzaa yɔ kɩ-yɔɔ, yaa ɛɖʋzʋʋ ɛ-tɛtʋ taa pɩɣa yɔ 22 yaa ehiɣ wonuu ŋgʋ kileba yɔ nɛ ɛkpɛzɩɣ, yaa eɖuki cɛtɩm ɖuutu kɩwɛɛkɩm mbʋ ɛyʋ pɩzɩɣ ɛla yɔ pɩ-yɔɔ 23 ye ɛwɛɛkɩɣ nɛ tɔm cakɩ ɛ-ñʋʋ taa kɔyɔ, pɩwɛnɩ-ɩ se ɛpɩsɩnɩ mbʋ ɛkpaɣaa yɔ, yaa ɛpɔzaa nɛ pɩɖɛlɩsɩ yɔ; mbʋ paayeki-i yɔ, yaa wonuu ŋgʋ kiileba nɛ ehiɣ yɔ, 24 yaa paa wonuu ŋgʋ eɖuu kɩ-yɔɔ cɛtɩm ɖuutu yɔ. 25 Pʋwayɩ lɛ ɛɛkɔnɩ Kɩbaɣlʋ, e-wondu taa ɛyaʋ, ŋgʋ ki-ɖoli tɩwɛɛkɩ yɔ, nɛ ɛkpɛyɩ; paakɛdɩ-kʋ nɛ mbʋ pɛcɛlɩɣ layʋ se ɛkpɛyɩ yɔ. 26 Layʋ ɛnʋ eekpizi ɛ-yɔɔ Kɩbaɣlʋ ɛsɩndaa, nɛ pekpeɣ-i kɩwɛɛkɩm mbʋ ɛlaba nɛ ɛɖɔɔ wɛɛ yɔ.
6 Kɩbaɣlʋ yɔɔdɩnɩ Moyizi nɛ eheyi-i se: 2 “Paɣ paɣtʋ tʋnɛ yɔ Aarɔɔnɩ nɛ ɛ-pɩyalaa: Kɩlaʋ miŋ kɩñaɣzʋʋ paɣtʋ yɔ: kɩkaɣ ñaɣʋ altaaru yɔɔ ɖoo pilim, tɛʋ nɛ ki-fem, nɛ altaaru yɔɔ miŋ kaɣnɩ-kʋ ñaɣʋ. 3 Layʋ kaasuu anasaayɩ pɩsatʋ toko nɛ ɛtɔɔlɩ anasaayɩ pɩsatʋ cokodo. Pʋwayɩ lɛ, ɛɛhazɩ kɩlaʋ miŋ kɩñaɣzʋʋ num tɔlɩma altaaru yɔɔ nɛ ekpeɣli altaaru cɔlɔ. 4 Ðɩnɛ ɛlɛ ɛhɔzɩ e-tokonaa; eesuu lalaa nɛ ekuu num tɔlɩma ana nɛ ewoni ehuti lone kele kele ñɩnɖɛ naɖɩyɛ taa, maalika nɛ ka-wayɩ. 5 Miŋ weyi ɩñakɩ kɩlaʋ miŋ kɩñaɣzʋʋ altaaru yɔɔ yɔ, ɩɩkaɣ ɖem kaaʋ. Tanamɩŋ tɩŋa tɛɛ layʋ tasɩɣ ɖasɩ sɔzʋʋ. Ɛɛlaɣyɩ ɖasɩ yɔɔ kɩlaʋ miŋ kɩñaɣzʋʋ nɛ ɛñaɣzɩ miŋ kɩlaŋ kɩkɔdɩŋ num. 6 Miŋ kaañakɩ tam altaaru yɔɔ, itaaɖe kaaʋ. 7 Kɩlaʋ paɣtʋ yɔ: Aarɔɔnɩ pɩyalaa taa nɔɔyʋ kɔŋnɩ-kʋ altaaru cɔlɔ Kɩbaɣlʋ ɛsɩndaa lɛ, 8 ɛtɛŋ kɔyʋʋ mʋlʋm kɩkpɩzɩm yɔɔ e-nikpiɖe tɛɛ lɛ, pɩkpɛndɩnɩ num nɛ sɔzɩŋ pɛɛ kpeekpe wena paalaɣyaa yɔ, ɛtɛŋ-pʋ ñaɣzʋʋ altaaru yɔɔ se sɔzɩŋ ɩkpa Kɩbaɣlʋ cɔlɔ lɛ, 9 Aarɔɔnɩ nɛ ɛ-pɩyalaa paatɔɔ mbʋ pɩkazaa yɔ, ɛzɩ kpɔnɔ ŋgʋ kɩtɩñɩŋ yɔ. Paatɔɔ-pʋ lone kele kele ñɩnɖɛ naɖɩyɛ taa, kediɣzaɣ cokiye kadaɣ taa. 10 Pataatɩzɩnɩ ñɩmɩŋ sʋlʋm mɔn-tɔɔnaɣ ŋga malɩzɩ kɩlaʋ miŋ kɩñaɣzʋʋ taa nɛ mɛncɛlɩ-wɛ yɔ. Pɩkɛ pʋyʋ kiɖeɖeu pɩŋŋ, ɛzɩ kɩwɛɛkɩm yɔɔ kɩlaʋ nɛ ñɔɔzʋʋ kɩgbɛyʋʋ yɔ. 11 Aarɔɔnɩ liɖe taa paa abalɩbɩɣa ŋga, kapɩzɩɣ kɔtɔɔ Kɩbaɣlʋ tɔɔnaɣ. Pɩkɛnɩ tamtam paɣtʋ mi-liɖe taa mba kpeekpe, nɛ mbʋ pitukuni-kɛ yɔ, pɩpɩsɩɣ kiɖeɖem.
30 NOVEMBRE–6 DECEMBRE
ÑƖM MBƲ PƖWƐ ƐSƆTƆM TAA YƆ | LEVITIKI 8-9
“Mbʋ pɩwɩlɩɣ kpayɩ kpayɩ se Yehowa wazɩɣ ɛ-samaɣ yɔ”
(Levitiki 8:6-9) Ɛñɔtɩ Aarɔɔnɩ nɛ ɛ-pɩyalaa nɛ ɛsɔ-wɛ lɩm. 7 Esuu-i toko yuulaa nɛ ɛtamɩ-ɩ tambaɖɛ, esuu Aarɔɔnɩ ekusuye nɛ ɛlaɣyɩ ɛ-yɔɔ ekusuye sɔsɔyɛ. Pʋwayɩ lɛ, ɛtamɩ-ɩ ekusuye sɔsɔyɛ tambaɖɛ, nɖɩ ɛɛlaɣyɩ ɛ-yɔɔ yɔ. 8 Ɛlɛɛ e-liu tɛɛ pataka ŋga ɛɖʋ ka-taa Uriim nɛ Tuumiim yɔ. 9 Ete ɛ-ñʋʋ kpɩtaʋ nɛ ɛlɛkɩ e-kiɖe taa sika hʋnʋʋ; kpeŋiye kiɖeɖee nɖɩ Kɩbaɣlʋ kaaɖʋ paɣtʋ Moyizi yɔ, nɖɩ lɛ.
(Levitiki 8:12) Ɛpɩyɩ Krɩsma num Aarɔɔnɩ ñʋʋ taa nɛ ɛtaa-ɩ nɛ ɛpɩsɩ-ɩ kiɖeɖeu.
it-1 1189 § 2
Cɔjɔnaa lɩzʋʋ
Moyizi sɔ Aarɔɔnɩ nɛ ɛ-pɩyalaa Naadaabʋ, Abihu, Eleyaazaarɩ nɛ Itamaarɩ lɩm (yaa eheyi-wɛ se powolo pɔsɔ lɩm) liidiye ñanaɣ ŋga kɛwɛ kadaɣ sɔsɔ taa yɔ ka-taa nɛ pʋwayɩ lɛ, esuu Aarɔɔnɩ cɔjɔ sɔsɔ toko. (Kɩg 3:2, 3) Lɛɛlɛɛyɔ, Aarɔɔnɩ su wondu ndʋ tɩwɩlɩɣ se ɛwɛɛnɩ sʋʋtʋ kɩfatʋ ndʋ tɩpɔzʋʋ se ɛwɛɛna wɛtʋ kɩbandʋ natʋyʋ yɔ. Pʋwayɩ lɛ, Moyizi kpaɣ ŋgee num nɛ ɛtaa Ɛsɔ sɛtʋ kɩɖanɖʋʋ nɛ mbʋ payɩ pɩɩwɛ kɩ-tɛɛ yɔ, pɩkpɛndɩnɩ altaaru nɛ ki-wondu tɩŋa nɛ ñanaɣ sɔsɔɔ nɛ mbʋ pɩ-yɔɔ pasɩɣ-kɛ yɔ, se ɛpɩsɩ pɩtɩŋa kele kele. Pɩwɩlɩɣ se palɩzɩ wondu ndʋ nɛ hɔɔlʋʋ se palabɩnɩ Ɛsɔ tʋmɩyɛ ɖeke. Kɛdɛzaɣ ɖeɖe lɛ, Moyizi pɩyɩ Aarɔɔnɩ ñʋʋ taa num.—Lev 8:6-12; Ejl 30:22-33; Keɣa 132:2.
(Levitiki 9:1-5) Kɩyakɩŋ lutozo wiye lɛ, Moyizi yaa kediɣzaɣ Aarɔɔnɩ, ɛ-pɩyalaa nɛ Izrayɛɛlɩ taa sɔsaa; 2 eheyi Aarɔɔnɩ se: “Kpa neɣye naɖɩyɛ nɛ ŋŋkpɛyɩ kɩwɛɛkɩm yɔɔ, nɛ ɛyaʋ nakʋyʋ nɛ ŋŋlaa kɩlaʋ miŋ kɩñaɣzʋʋ, pa-naalɛ po-ɖoli ɛtaawɛɛkɩ, nɛ ŋŋwoni-wɛ Kɩbaɣlʋ ɛsɩndaa.” 3 Nɛ ŋŋheyi Izrayɛɛlɩ piya se: “Ɩkpaɣ tuluu nɛ ɩkpɛyɩ kɩwɛɛkɩm yɔɔ, neɣye nɛ pɩnaɣ kʋyʋmaɣ heɣa, mba po-ɖoli tɩwɛɛkɩ yɔ nɛ ɩlaa kɩlaʋ miŋ kɩñaɣzʋʋ, 4 naaʋ nɛ ɛyaʋ nɛ ɩlaa kɩlaʋ kʋkɔdʋʋ Kɩbaɣlʋ, pɩkpɛndɩnɩ haɖɛ nɖɩ ponuuti num taa yɔ. Sɔnɔ Kɩbaɣlʋ kaɣ mɩ-yɔɔ lɩʋ.” 5 Pɔkɔnɩ mbʋ Moyizi pɔzaa yɔ Kediɣzaɣ cokiye nɔnɔɔ taa, nɛ kazɩɣa kpeekpe ñɔtɩ ka-tɩ nɛ kasɩŋ Kɩbaɣlʋ ɛsɩndaa.
it-1 1190 § 3
Cɔjɔnaa lɩzʋʋ
Kɩyakʋ lutozo ñɩŋgʋ wiye cɔjɔnaa mba palɩzaa yɔ, pala pa-kajalaɣ kɩlaʋ nɛ Moyizi tɩsɩnɩ-wɛ. Pala kɩwɛɛkɩm kɩlaʋ Izrayɛɛlɩ samaɣ kpeekpe yɔɔ se Yehowa ekpeɣ-kɛ kɩwɛɛkɩm mbʋ palʋlʋʋnɩ paa ɛyʋ weyi yɔ, pɩtasɩnɩ kɩwɛɛkɩm mbʋ paalaba alɩwaatʋ ndʋ patɩña Yehowa nɛ pɛsɛɛ sika neɣye nɛ Yehowa taa wɩɩnɩ-wɛ. (Lev 9:1-7; Ejl 32:1-10) Pɛtɛm laʋ pa-kajalaɣ kɩlaʋ lɛ, Yehowa yele nɛ miŋ nɩɩyɩ ñaɣ kɩlaʋ kpɩnɛ nɖɩ ɖɩkazɩ altaaru yɔɔ yɔ. Pɩtʋʋ fɛyɩ se miŋ ɛnɩ ɛɛlɩnɩ mɩndʋ tilimiye nɖɩ ɖɩɩwɛ Ɛsɔ sɛtʋ kɩɖanɖʋʋ yɔɔ yɔ. Ɛlabɩ mbʋ se ɛwɩlɩ se ɛ-taa labɩ leleŋ nɛ cɔjɔnaa mba palɩzaa yɔ.—Lev 9:23, 24.
(Levitiki 9:23, 24) Ɛ nɛ Moyizi pasʋʋ Kediɣzaɣ cokiye tɛɛ. Pʋwayɩ lɛ, pa-naalɛ palɩɩ se pawazɩ samaɣ yɔɔ. Kɩbaɣlʋ yele samaɣ kpeekpe na e-ɖoŋ, 24 miŋ nzʋlʋmɩyɛ lɩɩnɩ Kɩbaɣlʋ ɛsɩndaa nɛ ɖɩñaɣ altaaru yɔɔ kɩlaʋ nɛ num. Kazɩɣa pilim na mbʋ lɛ, kohuluti nɛ kɛmɛyɩ nɛ pe-kpeekpe pɔtɔlɩ nɛ papa ɛsa nɛ tɛtʋ.
Lɔŋ weyi ɖɩpɩzɩɣ nɛ ɖɩkpɛlɩkɩ Levitiki takayaɣ taa yɔ
13 Lɔŋ naanza ñɩŋ: Yehowa wɛɛ nɛ ɛwazɩɣ ɛ-ɛgbɛyɛ hɔɔlʋʋ ŋgʋ kɩwɛ tɛtʋ yɔɔ yɔ. Maɣzɩ mbʋ pɩɩlabɩ pɩnaɣ 1512 P.P.Y. alɩwaatʋ ndʋ pesiɣ Kediɣzaɣ kizinziku Sinayii Pʋʋ liu tɛɛ yɔ pɩ-yɔɔ nɛ ŋna. (Ejl. 40:17, 18) Palakaɣ sɔnzɩ se palɩzɩ Aarɔɔnɩ nɛ ɛ-pɩyalaa nɛ pɛkɛ cɔjɔnaa lɛ, Moyizi cɔnɩnɩ sɩ-yɔɔ. Izrayɛɛlɩ samaɣ kaakpeɣlaa se kana ɛzɩma cɔjɔnaa laɣ pa-kajalaɣ kpɩna kɩlaŋ yɔ. (Lev. 9:1-5) Ɛzɩma Yehowa wɩlaa se pɩkɛdɩnɩ-ɩ se palɩzɩ cɔjɔnaa kɩfama mba? Alɩwaatʋ ndʋ Aarɔɔnɩ nɛ Moyizi pɛwɛɛ nɛ pawazɩɣ samaɣ yɔɔ yɔ, Yehowa yeba nɛ miŋ lɩɩnɩ ɛsɔdaa nɛ ɩñaɣ kɩlaʋ ŋgʋ kɩɩwɛ altaaru yɔɔ yɔ kɩ-tɩŋa.—Kalɩ Levitiki 9:23, 24.
Ðɩñɩnɩ fezuu taa ñɩm
(Levitiki 8:6) Ɛñɔtɩ Aarɔɔnɩ nɛ ɛ-pɩyalaa nɛ ɛsɔ-wɛ lɩm.
w14 15/11 9 § 6
Ɛbɛ yɔɔ pɩcɛyaa se ɖɩwɛɛ kele kele?
6 Paɣtʋ ndʋ paɖʋ Izrayɛɛlɩ cɔjɔnaa se pɛwɛɛ kele kele tomnaɣ yɔɔ yɔ, tɩkpɛlɩkɩɣ lɔŋ kɩbaŋ nɩɩyɩ Yehowa samaɣ sɔnɔ. Ðoŋ ɖoŋ lɛ, ɛyaa mba ɖa nɛ wɛ ɖɩkpɛlɩkɩɣ Bibl yɔ, peɖiɣziɣna se ɖɛ-Ɛsɔ sɛtʋ lona taa wɛ cɩɖɩ cɩɖɩ nɛ ɖisuu wondu camɩyɛ ɖɔɖɔ. Toovenim taa lɛ, ɛzɩma cɔjɔnaa kaawɛ cɩɖɩ cɩɖɩ yɔ, pɩsɩɣnɩ-ɖʋ se ɖɩna se ye nɔɔyʋ ɛsɔɔlaa se ɛkpa Yehowa pʋʋ yɔɔ nɛ ɛsɛɛ-ɩ yɔ, pɩwɛɛ se ‘ɛ-laŋɩyɛ nɛ e-nee pɛwɛ kele kele.’ (Kalɩ Keɣa 23:3, 4; Iza. 2:2, 3) Pɩwɛɛ se ɖɩwɛɛ kele kele ɖa-lɩmaɣza taa, ɖa-laŋɩyɛ taa nɛ ɖo-tomnaɣ yɔɔ pʋcɔ nɛ sɛtʋ ndʋ ɖɩhaɣ Ɛsɔ yɔ, tɩwɛɛ kele kele. Ye mbʋ pɩcɛyaa se ɖiwiliɣ ɖa-tɩ ɖoŋ ɖoŋ nɛ pɩsɩnɩ-ɖʋ nɛ ɖɩla lɛɣzɩtʋ ndʋ pɩpɔzʋʋ yɔ nɛ ɖɩwɛɛ kele kele. (2 Kɔr. 13:5) Ðɩkpaɣ se pamɩyɩsɩ nɔɔyʋ lɩm, ɛlɛ ɛɖʋʋ ɛ-taa nɛ ɛcɔŋna kʋzʋʋ kɩlɛmɩŋ. Pɩwɛɛ se ɛpɔzɩ ɛ-tɩ se: ‘Mɛwɛɛ nɛ mawɩlɩɣ se mɛwɛ kele kele?’ Pɩpɔzʋʋ se ɛpɔzɩ nɛ pasɩnɩ-ɩ nɛ eyele lakasɩ kɩdɛkɛdɩsɩ nzɩ.—Yak. 5:14.
(Levitiki 8:14-17) Nɛ ɛkɔnɩ naaʋ ŋgʋ pɛkpɛyɩɣ kɩwɛɛkɩm yɔɔ yɔ. Nɛ Aarɔɔnɩ nɛ ɛ-pɩyalaa palaɣyɩ nesi kɩ-yɔɔ lɛ, 15 Moyizi kʋ-kʋ. Ðɩnɛ ɛlɛ elii e-niye calɩm taa nɛ ɛtaa altaaru kɛŋgɛmɩŋ yɔɔ pɩcɔɔ pɩta, se ɛhɩzɩ kɩ-kɩwɛɛkɩm. Pʋwayɩ lɛ ɛpɩyɩ calɩm altaaru tɛɛ, nɛ ɛpɩsɩ-kʋ kiɖeɖeu nɛ kɩwɛɛkɩm hɩzʋʋ sɔnzɩ. 16 Nɛ ɛkɛlɩ num kpeekpe mbʋ pɩpɔ lotu yɔɔ, hosaɣ yɔɔ, kataŋgayɩsɩ nzɩ sɩ-naalɛ nɛ sɩ-yɔɔ num nɛ ɛñaɣzɩ miŋ altaaru yɔɔ. 17 Piyele naaʋ tɔnɛ yɔ, kɩ-nandʋ nɛ kɩ-ahoda yɔ, ɛñaɣzɩ miŋ maalika wayɩ, ɛzɩ Kɩbaɣlʋ kaaɖʋʋ paɣtʋ Moyizi yɔ.
it-2 310 § 5
Moyizi
Moyizi kaakɛnɩ ɛgbɛyɛ paɣtʋ loliyu, pɩkɛ waɖɛ sɔsɔɖɛ nɖɩ Ɛsɔ tɩtasɩ haʋ nɔɔyʋyɔ. Yesu Krɩstʋ weyi ɛkɛ ɛgbɛyɛ kɩfaɖɛ loliyu yɔ, e-yeke ɛha waɖɛ nɖɩ pʋwayɩ. Moyizi kaakɛ loliyu Yehowa nɛ Izrayɛɛlɩ mba pɛ-hɛkʋ taa. Pʋyɔɔ ɛmɩzɩ calɩm ɛgbɛyɛ takayaɣ ŋga kasɩŋnɩ Yehowa yɔ, kɔ-yɔɔ. Ɛmɩzɩ calɩm ɖɔɖɔ Izrayɛɛlɩ samaɣ yɔɔ (ɛzʋtʋyaa kaawɛnɩ samaɣ lone taa). Ɛkalɩ ɛgbɛyɛ takayaɣ samaɣ ɛsɩndaa nɛ kocosi se: “Kɩbaɣlʋ tɔm ndʋ yɔ, ɖɩkaɣ labʋ ti-kpeekpe tɩ-yɔɔ.” (Ejl 24:3-8; Ebr 9:19) Loliyu tʋmɩyɛ nɖɩ ɖɩ-taa, Moyizi kaawɛnɩ waɖɛ se ɛcɔnɩ Ɛsɔ sɛtʋ kɩɖanɖʋʋ maʋ nɛ kɩ-taa wondu labʋ tʋma yɔɔ, nɛ ɛɛlaba ɖeyi ɖeyi ɛzɩ Ɛsɔ heyuu-i yɔ. Ɛlɩzɩ ɖɔɖɔ cɔjɔnaa nɛ ɛtaa Ɛsɔ sɛtʋ kɩɖanɖʋʋ nɛ cɔjɔ sɔsɔ Aarɔɔnɩ num mbʋ pɩwɛ ŋgee yɔ. Pʋwayɩ lɛ, ɛɖɛɛ nɔɔ kajalaɣ cɔjɔnaa mba palɩzaa yɔ, pa-kajalaɣ tʋmɩyɛ nɖɩ paalaba yɔ ɖɩ-taa.—Ejl ñʋŋ 25-29; Lev ñʋŋ 8, 9.
Bibl kalʋʋ
(Levitiki 8:31–9:7) Ðɩnɛ ɛlɛ, Moyizi heyi Aarɔɔnɩ nɛ ɛ-pɩyalaa se: “Ɩla nɛ patɩzɩ nandʋ Kediɣzaɣ cokiye nɔnɔɔ taa. Ɩɩtɔɔ-tʋ peeɖe nɛ ɩkpɛndɩnɩ kpɔnɔ ŋgʋ paɖʋ layʋ kpaʋ kɩlaʋ ɖɔkʋʋ taa yɔ, ɛzɩ manɖʋʋ paɣtʋ yɔ: ‘Aarɔɔnɩ nɛ ɛ-pɩyalaa paatɔɔ-kʋ.’ 32 Nandʋ nɛ kpɔnɔ ŋgʋ pɩkazaa yɔ, ɩɩñaɣzɩ-wɛ miŋ. 33 Kɩyakɩŋ lʋbɛ pilim ɩɩkʋyʋʋ Kediɣzaɣ cokiye nɔnɔɔ taa, pɩkɔɔ pɩtalɩ pakpa-mɩ layaa, mbʋ yɔ mɩ-kpaʋ layaa pɔzʋʋ kɩyakɩŋ lʋbɛ. 34 Kɩbaɣlʋ ɖʋ paɣtʋ se pala ɛzɩ sɔnɔ ɖɩlabʋ yɔ, nɛ pekpezi mɩ-yɔɔ azuluma, 35 nɛ kɩyakɩŋ lʋbɛ lɛ, ɖoo nɛ wɩsɩ, ɩɩcaɣ Kediɣzaɣ cokiye nɔnɔɔ taa nɛ ɩla Kɩbaɣlʋ sɔnzɩ; ɖɩnɛ ɛlɛ ɩɩsɩkɩ. Paɣtʋ ndʋ paɖʋ-m lɛ lɛ” 36 Aarɔɔnɩ nɛ ɛ-pɩyalaa pala paɣtʋ ndʋ Kɩbaɣlʋ tɩŋnɩ Moyizi yɔɔ nɛ ɛɖʋ-wɛ yɔ, ti-kpeekpe tɩ-yɔɔ.
9 Kɩyakɩŋ lutozo wiye lɛ, Moyizi yaa kediɣzaɣ Aarɔɔnɩ, ɛ-pɩyalaa nɛ Izrayɛɛlɩ taa sɔsaa; 2 eheyi Aarɔɔnɩ se: “Kpa neɣye naɖɩyɛ nɛ ŋŋkpɛyɩ kɩwɛɛkɩm yɔɔ, nɛ ɛyaʋ nakʋyʋ nɛ ŋŋlaa kɩlaʋ miŋ kɩñaɣzʋʋ, pa-naalɛ po-ɖoli ɛtaawɛɛkɩ, nɛ ŋŋwoni-wɛ Kɩbaɣlʋ ɛsɩndaa.” 3 Nɛ ŋŋheyi Izrayɛɛlɩ piya se: “Ɩkpaɣ tuluu nɛ ɩkpɛyɩ kɩwɛɛkɩm yɔɔ, neɣye nɛ pɩnaɣ kʋyʋmaɣ heɣa, mba po-ɖoli tɩwɛɛkɩ yɔ nɛ ɩlaa kɩlaʋ miŋ kɩñaɣzʋʋ, 4 naaʋ nɛ ɛyaʋ nɛ ɩlaa kɩlaʋ kʋkɔdʋʋ Kɩbaɣlʋ, pɩkpɛndɩnɩ haɖɛ nɖɩ ponuuti num taa yɔ. Sɔnɔ Kɩbaɣlʋ kaɣ mɩ-yɔɔ lɩʋ.” 5 Pɔkɔnɩ mbʋ Moyizi pɔzaa yɔ Kediɣzaɣ cokiye nɔnɔɔ taa, nɛ kazɩɣa kpeekpe ñɔtɩ ka-tɩ nɛ kasɩŋ Kɩbaɣlʋ ɛsɩndaa. 6 Moyizi tɔ se: “Mbʋ Kɩbaɣlʋ pɔzɩ-mɩ se ɩla nɛ e-yuŋ wɛɛ mɩ-yɔɔ yɔ.” 7 Ðɩnɛ ɛlɛ Moyizi yɔɔdɩnɩ Aarɔɔnɩ se: “Ñɔtɩ ña-tɩ nɛ altaaru, kpɛyɩ kɩwɛɛkɩm yɔɔ, nɛ ŋlaa kɩlaʋ miŋ kɩñaɣzʋʋ nɛ ŋkpezi ña nɛ ña-ɖɩɣa mɩ-kɩwɛɛkɩm. Ðɩnɛ ɛlɛ ŋwɩlɩ samaɣ haɖɛ nɛ ŋkpezi ka-kɩwɛɛkɩm, ɛzɩ Kɩbaɣlʋ ɖʋʋ paɣtʋ yɔ.”