Ðe-wezuu caɣʋ nɛ ɖɛ-Ɛsɔ sɛtʋ kpɛlɩkʋʋ takayaɣ taa tɔm kɩñɩnɩtʋ
© 2024 Watch Tower Bible and Tract Society of Pennsylvania
6-12 JANVIER
ÑƖM MBƲ PƖWƐ ƐSƆTƆM TAA YƆ KEƔSI 127-134
Lʋlɩyaa, iwolo pɩ-yɔɔ nɛ ɩcɔŋnɩ ñɩm mbʋ Yehowa ɖʋzɩ mi-nesi tɛɛ yɔ pɩ-yɔɔ
Ña-taa ɛla leleŋ nɛ lone nɖɩ ŋwɛnɩ Yehowa hɔʋ taa yɔ
9 Yehowa ha ɛyaa waɖɛ se palʋlɩ piya, ɛɖʋ-wɛ ɖɔɖɔ tʋmɩyɛ se pawɩlɩ-sɩ tɔm nɛ sɩsɔɔlɩ-ɩ nɛ sɩsɛɛ-ɩ. Ye ŋkɛ lʋlɩyʋ yɔ, ña-taa wɛ leleŋ nɛ ŋgee kʋjɔʋ ŋgʋ? Paa Yehowa ɛwazɩ Ɛsɔ tiyiyaa siŋŋ yɔ, ɛtɩha-wɛ waɖɛ se palʋlɩ piya. Ye mbʋ, ye ŋkɛ lʋlɩyʋ yɔ, ña-taa ɛla leleŋ nɛ waɖɛ nɖɩ ŋwɛna se ŋcɔnɩ piya yɔɔ yɔ. Paɖʋ lʋlɩyaa tʋmɩyɛ kɩcɛyɩyɛ naɖɩyɛ, nɖɩ lɛ se patɩŋnɩ «lɔŋ sɩɣzʋʋ nɛ paɣʋ mbʋ pɩlɩnɩ Yehowa cɔlɔ yɔ» pɩ-yɔɔ nɛ pɔcɔnɩ pe-piya yɔɔ. (Efɛz. 6:4; Wp. 6:5-7; Keɣ. 127:3) Pɩsa nɛ pɩsɩnɩ lʋlɩyaa lɛ, Yehowa ɛgbɛyɛ lɩzɩ Bibl kpɛlɩkʋʋ wondu sakɩyɛ; tɩ-taa natʋyʋ lɛ Bibl kpɛlɩkʋʋ takayɩsɩ, videowaa, minziikiwaa, nɛ tɔm lɛɛtʋ ndʋ paɖʋ intɛrnɛɛtɩ yɔɔ yɔ. Pɩnaɣ kpayɩ kpayɩ se ɖa-Caa weyi ɛwɛ ɛsɔdaa yɔ nɛ ɛ-Pɩyalʋ pɔsɔɔlɩ piya. (Luka 18:15-17) Alɩwaatʋ ndʋ lʋlɩyaa taɣ Yehowa liu nɛ palakɩ mbʋ payɩ papɩzɩɣ yɔ se pɔcɔnɩ pe-piya nzɩ sɩkɛ ñɩm pʋyʋ yɔ sɩ-yɔɔ yɔ, pɩkɛdɩɣnɩ Yehowa. Nɛ lʋlɩyaa mba palakɩ mbʋ yɔ, pahaɣ pe-piya waɖɛ se sɩpɩsɩ Yehowa hɔʋ taa mba tam!
Lʋlɩyaa—ɩfalɩsɩ mi-piya nɛ sɩsɔɔlɩ Yehowa
20 Tɩlɩ ñe-piya camɩyɛ. Keɣa 127 taa, pakpaɣ piya nɛ pamaɣzɩnɩ tɔʋ ñɩma. (Kalɩ Keɣa 127:4.) Ɛzɩma papɩzɩɣ nɛ pakpaɣ wondu ndɩ ndɩ nɛ polubini tɔʋ ñɩma, nɛ ɛzɩma tɔʋ ñɩma ana a-paɣlɩka pɩzɩɣ nɛ pɩwɛɛ ndɩ ndɩ yɔ, mbʋ ɖɔɖɔ paa pɩɣa ŋga lɛ, kɛwɛ ndɩ nɛ lɛɛka. Ye mbʋ, pɩwɛɛ se lʋlɩyaa ɩtɩlɩ ɛzɩma pɩwɛɛ se pafalɩsɩ paa pa-pɩɣa ŋga yɔ. Ða-alɩwaatʋ taa Izrayɛɛlɩ ɛjaɖɛ taa nesi ɖɔkɩyaa nabɛyɛ pɩzaa nɛ pasɩnɩ pe-piya naalɛ nɛ sɩsɛɛ Yehowa. Pɔyɔɔdɩ mbʋ pɩsɩnɩ-wɛ yɔ pɩ-tɔm se: «Ðɩkpɛlɩkɩnɩ paa pɩɣa ŋga lɛ Bibl nɛ hɔɔlʋʋ.» Toovenim taa lɛ, paa hɔʋ ñʋʋdʋ weyi pɩpɔzʋʋ se ɛkpaɣ lɩmaɣzɩyɛ nɛ ɛna se pɩcɛyaa se ɛla mbʋ, yaa ɛpɩzɩɣ nɛ ɛla mbʋ.
Fezuu taa ñɩm
it-1 543
Tɩŋ weyi ɩ-tɔm pɔyɔɔdɩ Bibl taa yɔ
Keɣa maɖʋ labɩnɩ tʋmɩyɛ oliivi tɩŋ wɛtʋ taa natʋyʋ nɛ eheyi mba peseɣ Yehowa sɔɔndʋ yɔ pa-taa paa weyi se: «Ña-pɩyalaa kaɣ cɔʋ ña-taabɩlɩ nɛ pata ɛzɩ oliivi tɩŋ cikpeŋ yɛzʋʋ oliivi tɩʋ tɛɛ yɔ.» (Ke 128:1-3) Ðoŋ ɖoŋ lɛ, pɛsɛtɩɣ oliivi tɩʋ pilinzi nɛ pɔsɔ nɛ pɩpɩsɩ tɩŋ kɩfaŋ. Pɩtasɩ lɛ, oliivi tɩŋ cikpeŋ yɛzɩɣ oliivi tɩŋ weyi ɩpɩwa yɔ i-lila yɔɔ nɛ ɩpɩsɩɣ tɩŋ kɩfaŋ tɩŋ kɩbɩŋ cɔlɔ. Mbʋ ɖɔɖɔ, ye piya ɩcɔ caja nɛ sɩta ɛzɩ oliivi tɩŋ cikpeŋ ɛnɩ yɔ, pɩsɩɣna nɛ koboyaɣ wɛɛ hɔʋ taa.
13-19 JANVIER
ÑƖM MBƲ PƖWƐ ƐSƆTƆM TAA YƆ KEƔSI 135-137
«Ða-Kɩbaɣlʋ kɩlɩ ɛsɔnaa lalaa tɩŋa»
it-1 913 § 4-5
Ðoŋ, Ðoŋ tʋma
Pɩnaɣ kaɣlaa se Ɛsɔ wɛnɩ ɖoŋ kedeŋa yɔɔ ɖoŋ yɔɔ. Pɩsa nɛ Yehowa wɩlɩ se ɛkɛ Ɛsɔ toovenim tʋ lɛ, pɩmʋnaa se ɛwɩlɩ se ɛwɛnɩ ɖoŋ wondu kɩlɩzɩtʋ ɖoŋ yɔɔ; nɛ ɛɛwɩlɩɣ e-ɖoŋ lɛ pɩwɛɛ se pɩla nɔɔ kʋɖʋmaɣ nɛ ɛ-hɩɖɛ. (Ke 135:5, 6) Ɛzɩma wɩsɩ, fenaɣ, nɛ tɩɩnzɩ pa-taa paa weyi lɛ ɛtɩŋɩɣ ɛ-nʋmɔʋ paa ɛzɩmtaa, nɛ ɛzɩma ɛjaɖɛ yɔɔ wɛtʋ ɛzɩ helim, tɛʋ, nɛ wondu lɛɛtʋ ñaŋ paɣtʋ ndʋ tiɖiyiɣ-wɛ, nɛ ɛzɩma kudoloŋ ɖɔŋ wiii nɛ sumasɩ kʋyʋʋ nɛ sɩlɛɣzɩɣ lone lɛɛɖɛ, nɛ ɛzɩma ɛjaɖɛ yɔɔ wondu lɛɛtʋ lakɩ tʋmɩyɛ yɔ, ɛzɩ pi-ɖeke pɩtɩmaɣ se pɩsɩnɩ ɛyʋ nɛ ɛñalɩ Ɛsɔ hɩɖɛ yɔɔ alɩwaatʋ ndʋ pakaɖɩɣnɩ-ɩ nɛ alɩwaatʋ ndʋ pɩtakɩɣ-ɩ se ɛsɛɛ cɛtɩm ɛsɔnaa yɔ?
Paa mbʋ yɔ, Ɛsɔ Yehowa pɩzɩɣ eyele nɛ wondu kɩlɩzɩtʋ la mbʋ pɩcɛzɩ ti-ɖoŋ yɔɔ yɔ, halɩ nabʋyʋ taa alɩwaatʋ ndʋ ɛɖʋwa yɔ tɩ-yɔɔ ɖeyi ɖeyi, se pɩsa nɛ ɛtalɩ ɛ-kaɖʋsɩ nasɩyɩ ɖeyi ɖeyi nɛ ɛwɩlɩ se ɛnʋ kɛnɩ Ɛsɔ. Paa wɛtʋ ɛzɩ wɩlɩŋ, tɛʋ nɩʋ nɛ helim sɔsɔm, yaa ɛsɔdaa wɛtʋ lɛɛtʋ ɩtɩkɛ ŋgee pʋyʋ yɔ, ɛzɩma tɩlabɩ alɩwaatʋ ndʋ tɩ-yɔɔ tɩtaatɩɩlakɩ mbʋ nɛ piyele nɛ Yehowa tɛ natʋ tɔm natʋyʋ la yɔ, piyeba nɛ tɩkɛ ŋgee pʋyʋ. (Kpaɣ-tʋ ŋmaɣzɩnɩ 1Aw 17:1; 18:1, 2, 41-45) Ɛlɛ wɛtʋ ndʋ tɩ-taa sakɩyɛ kaawɛ ŋgee kpem, mbʋ pʋyɔɔ yɔ tɩɩwɛ ɖoŋ kpem nɛ tɩkɔnɩ kaɖɛ siŋŋ (Ejl 9:24), yaa mbʋ pʋyɔɔ yɔ wiɖiyi ɛyʋ tɩnatɩ mbʋ nɛ ɛna, yaa halɩ ɛyʋ tɩnɩtɩ pɩ-tɔm wiɖiyi, yaa tɩlabɩ alɩwaatʋ ndʋ tɩ-yɔɔ pɩtaatɩɩlakɩ mbʋ yɔ.—Ejl 34:10; 1Sa 12:16-18.
Ɛzɩma Yehowa sɔɔlɩm siɣsiɣ ñɩmbʋ tukuuni-ŋ?
16 Alɩwaatʋ ndʋ ɖɩtaɣ Yehowa liu se ɛkaɣ ɖɔ-yɔɔ kandɩyʋʋ yɔ, pɩhɛzɩɣ ɖa-laŋɩyɛ. Ɛlɛ nabʋyʋ taa, pɩpɩzɩɣ nɛ pitibi-ɖʋ yɔɔɔ nɛ ɖɩɩnaɣ se ɖɩkpaɣnɩ le. Ɛbɛ Yehowa kaɣ-ɖʋ labʋ alɩwaatʋ ndʋ tɩ-taa? (Kalɩ Keɣa 136:23.) Ɛkaɣ e-nesi sʋzʋʋ ɖɛ-tɛɛ nɛ ɛkʋsɩ-ɖʋ nɛ sɔɔlɩm nɛ ɛsɩnɩ-ɖʋ nɛ ɖɩkʋyɩ ɖɩsɩŋ ɖa-nɩŋgbanzɩ yɔɔ. (Keɣ. 28:9; 94:18) Ɛzɩma pɩsɩɣnɩ-ɖʋ yɔ: Ðɩnawa se ɖɩpɩzɩɣ nɛ ɖɩtaa Yehowa liu paa ɛzɩmtaa. Pɩsɩɣnɩ-ɖʋ se ɖɩtɔzɩ se Yehowa wazɩ-ɖʋ hɔɔlɩŋ naalɛ taa. Kajalaɣ lɛ, paa le ɖɩtɩɩwɛɛ yɔ, ɖɩnawa se Yehowa kaɣ ɖɔ-yɔɔ kandɩyʋʋ paa ɛzɩmtaa. Nabʋlɛ lɛ, ɖa-Caa kʋsɔɔlʋ weyi ɛwɛ ɛsɔdaa yɔ, ɛmaɣzɩɣ ɖɔ-yɔɔ siŋŋ.
Fezuu taa ñɩm
it-2 1175
Yah
Ðoŋ ɖoŋ lɛ, palakɩnɩ tɔm piye Yah tʋmɩyɛ samtʋ nɛ hendu taa, adɩma nɛ tenduu taa; nɛ alɩwaatʋ ndʋ pawakɩ yaa payakɩ nɔɔyʋ yaa nabɛyɛ ñʋʋ, yaa alɩwaatʋ ndʋ peɖiɣziɣna se Ɛsɔ lɩzɩ e-ɖoŋ nɛ ɛwɩlɩ wɛtʋ natʋyʋ taa yɔ. Ðɩnaɣ pɩ-tɛ kɩɖaŋ sakɩyɛ Bibl taa. Palabɩnɩ tʋmɩyɛ tɔm loyaɣ «Ɩsa Yah!» (Aleluyah!) Keɣsi taa nɛ pasamnɩ Ɛsɔ. Keɣa 104:35 taa palabɩnɩ-kɛ tʋmɩyɛ kajalaɣ ɖeɖe. Keɣsi lɛɛsɩ taa lɛ sɩ-ɖɩbazɩyɛ taa ɖeke palabɩnɩ-kɛ tʋmɩyɛ (Ke 111, 112), nɛ nabʋyʋ taa lɛ keɣa taa (Ke 135:3), nɛ nabʋyʋ taa ɖɔɖɔ lɛ keɣa ɖɩdɛnɖɛ (Ke 104, 105, 115-117); ɛlɛ ɖoŋ ɖoŋ lɛ palabɩnɩ-kɛ tʋmɩyɛ keɣa ɖɩbazɩyɛ taa nɛ keɣa ɖɩdɛnɖɛ (Ke 106, 113, 135, 146-150). Natʋ takayaɣ wɩlɩɣ se Ɛsɔ tiyiyaa lakɩnɩ tʋmɩyɛ tɔm loyaɣ ŋga ɖoŋ ɖoŋ nɛ pasaŋ Yehowa.—Nat 19:1-6.
Bibl hɔɔlɩŋ lɛɛŋ taa lɛ palabɩnɩ tʋmɩyɛ tɔm piye «Yah» nɛ pɔpɔzɩ nabʋyʋ Yehowa yaa palabɩnɩ-ɖɩ tʋmɩyɛ nɛ pɛɖɛyɩ-ɩ hendu taa. Kɩɖaʋ nakʋyʋ lɛ hendu ndʋ Moyizi tewa alɩwaatʋ ndʋ Yehowa yabɩ pa-ñʋʋ yɔ. (Ejl 15:2) Izaayii ñɛkpɛndɩ hɩla ana a-naalɛ, «Yah Yehowa», se ɛñɩɣnɩ niye tɔm ndʋ ɛyɔɔdaa yɔ tɩ-yɔɔ. (Iza 12:2; 26:4) Alɩwaatʋ ndʋ Ezekiyaasɩ hɩnɩ kʋdɔŋ nɛ ɛcaɣaɣ sɩbʋ nɛ Yehowa yele nɛ ɛ-yɔɔ cɛ yɔ, ɛlabɩnɩ tʋmɩyɛ tɔm piye Yah nɛ ɛlɛlɩ nɛ ɛwɩlɩ ɛzɩma ɛ-taa kaawɛ leleŋ siŋŋ yɔ. (Iza 38:9, 11) Mba pasɩba yɔ paapɩzɩɣ nɛ pasa Yah; nɛ tʋkaɣ wɛ pa nɛ mba pañɩnɩɣ kpem se pacaɣ wezuu nɛ pasaŋ Yah yɔ pɛ-hɛkʋ taa. (Ke 115:17, 18; 118:17-19) Keɣsi lɛɛsɩ kɛ adɩma nɛ a-taa, nɔɔyʋ wɩlɩ ɛ-ɛsɩmɩyɛ ɛzɩma Ɛsɔ yabɩ ɛ-ñʋʋ, ɛkandɩyɩ ɛ-yɔɔ, nɛ ɛsɩɣzɩ-ɩ lɔŋ yɔ pɩ-yɔɔ.—Ke 94:12; 118:5, 14.
20-26 JANVIER
ÑƖM MBƲ PƖWƐ ƐSƆTƆM TAA YƆ KEƔSI 138-139
Sɔɔndʋ ɛtaakpa-ŋ nɛ ŋyele tɔm cosuu kediɣzisi taa
Ðɛyɩ Yehowa kediɣzisi taa
10 Ña-laŋɩyɛ maɣ alɩwaatʋ ndʋ ŋñɩnɩɣ se ŋkpazɩ nesi nɛ ŋcosi tɔm yɔ? Ye mbʋ yɔ, tɩlɩ se pɩtɩkɛ ñe-ɖeke pɩlakɩ mbʋ. Toovenim taa lɛ, sɔɔndʋ kpaɣ ɖa-taa sakɩyɛ alɩwaatʋ ndʋ ɖicosuu tɔm kediɣzisi taa yɔ. Pɩsa nɛ ŋlʋbɩnɩ sɔɔndʋ ndʋ lɛ, pɩcɛyaa se ŋtɩlɩ mbʋ piyeki nɛ sɔɔndʋ kpaɣ-ŋ yɔ. Sɔɔndʋ kpaɣ-ŋ se ŋkaɣ sɔʋ ndʋ ŋñɔɔzaa yɔ tɩ-yɔɔ? Yaa sɔɔndʋ kpaɣ-ŋ se ŋŋkaɣ cosuu tɔm yɔɔ camɩyɛ? Ŋmaɣzɩɣ se ñɔ-tɔm cosuu ɛɛkaɣ wɛʋ ɖeu ɛzɩ lalaa ñɩmbʋ yɔ? Ye sɔɔndʋ ndʋ tɩkpaɣnɩ-ŋ yɔ, pɩpɩzɩɣ nɛ pɩwɩlɩ se ŋwɛnɩ tɩ luzuu nɛ ŋkpakɩɣ lalaa se pakɩlɩ-ŋ. Yehowa sɔɔlɩ wɛtʋ kɩbandʋ ndʋ siŋŋ. (Keɣ. 138:6; Filp. 2:3) Ɛlɛ Yehowa sɔɔlaa ɖɔɖɔ se ŋɖɛyɩ-ɩ nɛ ŋkpazɩ ño-koobiya ɖoŋ kediɣzisi taa. (1 Tes. 5:11) Ɛsɔɔlɩ-ŋ nɛ ɛkaɣ-ŋ haʋ abalɩtʋ ndʋ pɩpɔzʋʋ-ŋ yɔ.
Ðɩkpazɩ ɖama ɖoŋ ɛgbɛyɛ taa kediɣzisi taa
7 Feŋuu Tilimiye takayɩsɩ nzɩ palɩzaa nɛ pɩɖɛɛ yɔ sɩ-taa paatasɩ-ɖʋ lɔŋ ndɩ ndɩ; ye ŋkpaɣ alɩwaatʋ nɛ ŋtazɩ ɩ-taa nɩɩyɩ taa yɔ pɩpɩzɩɣ nɛ pɩsɩnɩ-ŋ. Lɔŋ tasʋʋ mbʋ, pɩ-taa nabʋyʋ lɛ se ŋñɔɔzɩ kpɛlɩkʋʋ camɩyɛ. (Adu. 21:5) Ye ŋsɩm tɔm ndʋ ɩkaɣ kpɛlɩkʋʋ yɔ camɩyɛ yɔ, pɩkaɣ-ŋ wɛʋ kɛlɛʋ nɛ pɩkɩlɩ se ŋkpazɩ nesi nɛ ŋcosi tɔm. Pɩtasɩ lɛ, ñɔ-tɔm cosuu ɛwɛɛ tobi. (Adu. 15:23; 17:27) Tɔm cosuu mbʋ pɩwɛ tobi yɔ, piyeki se sɔɔndʋ ɛtaakɩlɩ-ŋ kpaʋ. Tɔm cosuu mbʋ pɩwɛ tobi yɔ, pɩtɩla yɔ pɩpɩzɩɣ nɛ pɩkɛ tɔm loyaɣ kʋɖʋmaɣ yaa tɔm loyisi naalɛ, nɛ halɩ koobiya nɩɣ tɩ-taa kɛlɛʋ nɛ pɩkɩlɩ tɔm cosuu mbʋ pɩɖaɣlaa nɛ lɩmaɣza sakɩyɛ wɛ pɩ-taa yɔ. Ye ŋcosuu tɔm tobi nɛ ña-maɣmaɣ ñɔ-tɔm pee yɔ, pɩwɩlɩɣ se ŋñɔɔzɩ ña-tɩ camɩyɛ nɛ ŋnɩɣ tɔm ndʋ ɩwɛɛ nɛ ɩkpɛlɩkɩɣ yɔ tɩ-taa kpayɩ kpayɩ.
Fezuu taa ñɩm
it-2 490-491
Kpaɣʋ nɛ kpeɣu
Pɩtasɩ lɛ, pɩpɔzʋʋ se Krɩstʋ tʋ ekpeɣu lalaa ye payʋsɩnɩ-ɩ yɔ, paa pɩtɩɩkɛ tam ɛzɩma payʋsɩnɩ-ɩ yɔ. (Luk 17:3, 4; Efɛ 4:32; Kol 3:13) Ɛsɔ eekpeɣu mba pekiziɣ se paakpeɣu lalaa yɔ. (Mat 6:14, 15) Ɛlɛ, halɩ paa palɩzɩ «ɛyʋ kɩdɛkɛdʋ» nɔɔyʋ ɛgbɛyɛ taa kɩwɛɛkɩm sɔsɔm nabʋyʋ yɔɔ yɔ, papɩzɩɣ nɛ pekpeɣ-i alɩwaatʋ ndʋ ɛwɩlɩɣ se ekpiɖi toovenim taa yɔ. Pekpeɣu-i nɛ pɩtɛ lɛ, ɛgbɛyɛ taa mba tɩŋa pɩzɩɣ nɛ pawɩlɩ-ɩ se pɔsɔɔlɩ-ɩ. (1Kɔ 5:13; 2Kɔ 2:6-11) Ɛlɛ, paapɔzʋʋ Krɩstʋ mba se pekpeɣu mba paɖʋʋ pa-taa faŋŋ nɛ powoki pɩ-yɔɔ nɛ palakɩ kɩwɛɛkɩm nɛ paakpiɖiɣ yɔ. Mba palakɩ mbʋ yɔ, papɩsɩɣ Ɛsɔ koyindinaa.—Ebr 10:26-31; Ke 139:21, 22.
27 JANVIER–2 FÉVIER
ÑƖM MBƲ PƖWƐ ƐSƆTƆM TAA YƆ KEƔSI 140- 143
Ŋtɩmɩɣnɩ Yehowa se ɛsɩnɩ-ŋ nɛ pɩtɛ lɛ, la mbʋ pɩlakɩ nɔɔ kʋɖʋmaɣ nɛ ña-adɩma yɔ
‘Welisi lɔŋsɩnɖaa tɔm’
13 Kpaɣ lɔŋ tasʋʋ se pɩkɛnɩ nʋmɔŋ weyi ɩ-yɔɔ Ɛsɔ tɩŋɩɣna nɛ ɛwɩlɩɣ-ŋ sɔɔlɩm yɔ ɩ-taa nakʋyʋ. Yehowa sɔɔlaa se piɖeni-ɖʋ. (Adu. 4:20-22) Alɩwaatʋ ndʋ ɛtɩŋɩɣnɩ ɛ-Tɔm, ɛgbɛyɛ takayaɣ nakɛyɛ, yaa koobu Krɩstʋ tʋ weyi ɛpɩ fezuu taa yɔ ɛ-yɔɔ nɛ ɛtasɩ-ɖʋ lɔŋ yɔ, ɛwɩlɩɣ se ɛsɔɔlɩ-ɖʋ. Ebree mba 12:9, 10 yɔɔdʋʋ se: «Ɛlakɩ mbʋ se pɩwazɩ-ɖʋ.»
14 Ka ña-lɩmaɣza lɔŋ weyi patasɩɣ-ŋ yɔ ɩ-yɔɔ, pɩtaakɛ ɛzɩma pakpaɣnaa nɛ patasɩɣ-ŋ lɔŋ yɔ pɩ-yɔɔ. Nabʋyʋ taa, pɩtɩla pɩlakɩ-ɖʋ ɛzɩ ɛzɩma pakpaɣnaa nɛ patɩsɩ-ɖʋ lɔŋ nɩɩyɩ yɔ, pɩtɩmʋna. Pɩkɛ toovenim se ye nɔɔyʋ ɛñɩnɩɣ se ɛtasɩ ɛyʋ lɛlʋ lɔŋ yɔ, pɩpɔzʋʋ se ɛñaɣ pana nɛ eyele nɛ pɩwɛɛ ɛlɛ kɛlɛʋ se ɛmʋ lɔŋ tasʋʋ mbʋ. (Gal. 6:1) Ɛlɛ, ye ɖa patasɩɣ lɔŋ yɔ, pɩwɛɣ ɖeu se ɖɩka ɖa-lɩmaɣza lɔŋ weyi ɩwɛ lɔŋ tasʋʋ mbʋ pɩ-taa yɔ ɩ-yɔɔ, paa ɖɩmaɣzɩɣ se pɩɩwɛɛ se weyi ɛtasɩ-ɖʋ lɔŋ yɔ ɛtɩŋnɩ nʋmɔʋ ŋgʋ kɩkpaɖɩ ɖeu yɔ kɩ-yɔɔ nɛ ɛla mbʋ yɔ. Ðɩpɩzɩɣ nɛ ɖɩpɔzɩ ɖa-tɩ se: «Paa ɛzɩma pakpaɣnaa nɛ patasɩ-m lɔŋ yɔ pɩtɩkɛdɩnɩ-m yɔ, ɛzɩ manpɩzɩɣ nɛ mɛnkpɛlɩkɩ lɔŋ nɩɩyɩ lɔŋ tasʋʋ mbʋ pɩ-taa? Ɛzɩ manpɩzɩɣ nɛ mohuuzi mɛ-ɛsa weyi ɛtasɩ-m lɔŋ yɔ ɛ-ɛjandʋ yɔɔ, nɛ lɔŋ tasʋʋ mbʋ pɩwazɩ-m?» Lɔŋ weyi payɩ patasɩɣ-ɖʋ yɔ, pɩkɛɣnɩ lɔŋsɩnɖɛ se ɖɩtɩŋnɩ nʋmɔʋ nakʋyʋ yɔɔ nɛ ɖiyele nɛ ɩwazɩ-ɖʋ.—Adu. 15:31.
w10 15/3 32 § 4
Wolo pɩ-yɔɔ nɛ ŋwɛɛnɩ ‘laŋɩyɛ kele kele ñɩnɖɛ’ kaɖɛ alɩwaatʋ tʋnɛ tɩ-taa
Ɛsɔ sɛyaa nabɛyɛ katɩɣ nazɩm, liidiye kʋñɔŋ, nɛ kʋdɔmɩŋ sɔsɔŋ nɛ piyeki nɛ pitiki-wɛ yɔɔɔ. Nɛ nabʋyʋ taa pɩwɛɣnɩ ɖoŋ kɩdɛkɛdɩŋ pɔ-yɔɔ. Halɩ Wiyaʋ Daviid ɖɔɖɔ kaakatɩ wɛtʋ ndʋ. Ɛyɔɔdaa se: «Mon-ɖoŋ hʋwa; ma-laŋɩyɛ sɩbɩ man-taa kpɩndɩlɩm.» (Keɣ. 143:4) Ɛbɛ kaasɩnɩ-ɩ nɛ ɛwa kaɖɛ wɛtʋ ndʋ? Daviid tɔzɩ ɛzɩma Yehowa kaasɩnɩ ɛ-sɛyaa nɛ ɛzɩma ɛɛyabɩ ɛ-maɣmaɣ ɛ-ñʋʋ yɔ pɩ-yɔɔ. Ɛmaɣzɩ mbʋ Yehowa kaalaba se pɩsa nɛ ɛ-hɩɖɛ sɛɛ yɔ pɩ-yɔɔ. Eewobi pɩ-yɔɔ nɛ ɛmaɣzɩ Yehowa tʋma yɔɔ. (Keɣ. 143:5) Mbʋ ɖɔɖɔ, ye ɖɩmaɣzɩɣ ɖa-Lɩzɩyʋ yɔɔ nɛ mbʋ payɩ ɛlaba nɛ ewoki pɩ-yɔɔ nɛ ɛlakɩ-ɖʋ yɔ pɩ-yɔɔ yɔ, pɩsɩɣnɩ-ɖʋ halɩ pɩkpɛndɩnɩ alɩwaatʋ ndʋ ɖɩwɛ kala taa yɔ.
w15 15/3 32 § 2
Nesi ɖɔkʋʋ «Kɩbaɣlʋ taa ɖeke»: Pɩtasɩ cɛyʋʋ se ɖɩla mbʋ sɔnɔ?
Nabʋyʋ taa pɩpɩzɩɣ nɛ pɩlakɩ-ŋ ɛzɩ pɩɩlabʋ keɣa maɖʋ Daviid yɔ. Ɛyɔɔdaa se: «Hayɩ Yehowa, cosi-m lɛɛ lɛɛ; mon-ɖoŋ tɛma. Taakizi se mantaana ñɛ-ɛsɩndaa.» (Keɣ. 143:5-7, 10) Alɩwaatʋ ndʋ pɩlakɩ-ŋ mbʋ yɔ taalɔ lidaʋ; ha ña-Caa weyi ɛwɛ ɛsɔdaa yɔ alɩwaatʋ nɛ ɛwɩlɩ-ŋ mbʋ ɛsɔɔlaa se ŋla yɔ. Ye ŋkpakɩɣ alɩwaatʋ nɛ ŋkalɩɣ ɛ-Tɔm nɛ ŋmaɣzɩɣ tɔm ndʋ ŋkalɩɣ yɔɔ tɩ-yɔɔ yɔ, ŋpɩzɩɣ nɛ ŋla mbʋ. Pɩsɩɣnɩ-ŋ nɛ ŋtɩlɩ mbʋ Yehowa sɔɔlaa se ŋla yɔ nɛ ŋna ɖɔɖɔ ɛzɩma ɛsɩnɩ ɛ-sɛyaa caanaʋ taa yɔ. Ye ŋwelisiɣni-i yɔ, ŋkaɣ taʋ liu ɛ-lɔŋsɩnɖɛ nɛ pɩkɩlɩ nɛ ŋñamɩ-ɩ.
Fezuu taa ñɩm
it-2 1134
Sɔtʋ
Pɩsɩŋnɩ nabʋyʋ. Ɛyaa kɩdɛkɛdaa cɛtɩm tɔm nɛ kɔlɔmɔtʋ lakasɩ pisiɣ ɛyʋ hɩɖɛ siŋŋ, nɛ pakpaɣ pɛ-wɛtʋ ndʋ nɛ pamaɣzɩnɩ ɖʋm sɔtʋ. (Ke 58:3, 4) Pɔyɔɔdɩ kɔlɔmɔtʋ tɩnaa tɔm se: «Cakpadanaa sɔtʋ wɛnɩ pɔ-nɔsɩ taa» (yaa «po-ndomee wayɩ»), ɖɔɖɔ ɛzɩ cakpada sɔtʋ mɛlʋʋ ndomiye nɛ hayo kela wayɩ yɔ. (Ke 140:3; Rom 3:13) Ye ɛyʋ ɛɛlakɩnɩ ɛ-nzʋlʋmɩyɛ tʋmɩyɛ camɩyɛ nɛ ɛyɔɔdʋʋ kɔlɔmɔtʋ tɔm, ɛwɩlɩɣ cɛtɩm tɔm, yaa ɛyɔɔdʋʋ tɔm lɛɛtʋ ndʋ tɩɖʋʋ ɛyʋ ɖɩwɩzɩyɛ yɔ, ɛ-nzʋlʋmɩyɛ kɛ «sɔtʋ ndʋ tɩkʋʋ yɔ.»—Yak 3:8.
3-9 FÉVRIER
ÑƖM MBƲ PƖWƐ ƐSƆTƆM TAA YƆ KEƔA 144-146
«Samaɣ ŋga Yehowa kɛ kɛ-Ɛsɔ yɔ, kanɩ leleŋ!»
Tɔm ndʋ ɖa-takayɩsɩ kalɩyaa pɔzʋʋ yɔ
2. Traduction du monde nouveau ŋgʋ paɖaɣnɩ ñɔɔzʋʋ yɔ kɩ-taa lɛ, pɛɖɛzɩ hɔɔlʋʋ kʋnɛ camɩyɛ nɛ pɩla nɔɔ kʋɖʋmaɣ nɛ keɣa ŋga kɔyɔɔdɩ ndʋ payɩ pʋwayɩ yɔ. Ɛzɩma papaɣzɩnɩ kalɩtʋ 12 nɛ tɔm pee «ɖɩnɛ ɛlɛ» yɔ, wɩlɩɣ se wɛtʋ kɩbandʋ ndʋ tɩ-tɔm pɔyɔɔdʋʋ kalɩtʋ 12 nɛ piwolo 15 taa yɔ, ɛyaa siɣsiɣ tɩnaa mba pɛwɛɛ nɛ patɩmɩɣ se ‘poholi-wɛ’ kɩdɛkɛdaa (kalɩtʋ 11) nesi tɛɛ yɔ, pɔ-tɔm pɔyɔɔdʋʋ. Pɩlabɩ nɔɔ kʋɖʋmaɣ ɖɔɖɔ nɛ tɔm ndʋ tɩwɛ kalɩtʋ 15 taa ɖenɖe pɔyɔɔdɩ «kanɩ leleŋ» tɔm tam nabʋlɛ nɛ pɩwɩlɩɣ se pɩkɛ pʋyʋ kɩbam siŋŋ yɔ. Pʋyɔɔ lɛ, taa leleŋ ɛnʋ ɛkɛnɩ weyi «samaɣ ŋga Yehowa kɛ kɛ-Ɛsɔ yɔ,» kanɩɣ yɔ! Tɔzɩ ɖɔɖɔ se kiɖe tɛɛ lɛ, tɔm maʋ yʋsasɩ ɛzɩ nzɩ sɩwɩlɩɣ se pɩkɛnɩ nɔɔyʋ kʋtɔmɩyɛ yɔ, sɩtaawɛɛ Ebree kʋnʋŋ taa. Pʋyɔɔ lɛ, pʋcɔ nɛ pɛɖɛzɩ Ebree tɔm piye naɖɩyɛ lɛ, patazɩɣ camɩyɛ nɛ pana ɛzɩma pama tɔm piye nɖɩ yɔ, wena pamawa pʋcɔ nɛ pɩtalɩ-ɖɩ nɛ wena pama pʋwayɩ yɔ, nɛ Bibl hɔɔlɩŋ weyi ɩlakɩ nɔɔ kʋɖʋmaɣ nɛ mayaɣ ŋga ka-taa tɔm piye nɖɩ ɖɩwɛɛ yɔ, pʋcɔ nɛ pɛɖɛzɩ-ɖɩ.
3. Ɛzɩma pɛɖɛzɩ hɔɔlʋʋ kʋnɛ lɛɛlɛɛyɔ yɔ, pɩlabɩ nɔɔ kʋɖʋmaɣ ɖɔɖɔ nɛ Bibl hɔɔlɩŋ lɛɛŋ weyi ɩyɔɔdʋʋ wazasɩ nzɩ Ɛsɔ kɔŋnɩ ɛ-samaɣ yɔɔ yɔ. Ɛzɩma pɛɖɛzɩ tɔm piye asher lɛɛlɛɛyɔ yɔ, piyeba nɛ keɣa kanɛ kala nɔɔ kʋɖʋmaɣ nɛ lidaʋ ŋgʋ Daviid kaawɛna se Ɛsɔ kaɣ yabʋ Izrayɛɛlɩ samaɣ ñʋʋ ko-koyindinaa nesi tɛɛ nɛ ɛwazɩ-kɛ nɛ kehiɣ ñɩm nɛ koboyaɣ yɔ. (Lev. 26:9, 10; Wp. 7:13; Keɣ. 128:1-6) Ðɩkpaɣ ɛzɩ Wayɩ Wayɩ Paɣtʋ 28: 4 mbʋ yɔ, pɔyɔɔdʋʋ peeɖe se: «Pakaɣ wazʋʋ ñe-piya, mbʋ ñɛ-tɛtʋ lʋlʋʋ yɔ, ña-kpɩna piya, ñe-newee nɛ ñe-heɣsi.» Toovenim lɛ, Daviid pɩyalʋ Salomɔɔ kewiyitu tɔɔʋ alɩwaatʋ taa Ɛsɔ samaɣ kaawɛ laŋhɛzɩyɛ taa siŋŋ nɛ kɛwɛɛnɩ ñɩm ɖɔɖɔ pɩdɩɩfɛyɩ. Pɩtasɩ lɛ, hɔɔlɩŋ sakɩyɛ taa Salomɔɔ kewiyitu tɔɔʋ kaasɩŋnɩ kewiyitu ndʋ Mesiya kaɣ tɔɔʋ yɔ.—1 Awi. 4:20, 21; Keɣ. 72:1-20.
Wolo pɩ-yɔɔ nɛ ŋcɛyɩsɩɣ ñe-lidaʋ tam
16 Wezuu maatɛŋ lidaʋ lɩnɩ Ɛsɔ cɔlɔ nɛ kɩkɛ kʋjɔʋ ŋgʋ kɩmʋ ñɩm siŋŋ ɖɛ-ɛsɩndaa yɔ. Ðɩɖaŋ cee wayɩ kɩbaŋʋ kpam, nɛ ɖa-taa pɩzɩɣ nɛ pɩtɛ se pɩkaɣ labʋ mbʋ. Ðe-lidaʋ wɛ ɛzɩ mɛlɛ kolaɣ yɔ; kɩsɩɣnɩ-ɖʋ se ɖɩpɩzɩ nɛ ɖɩɖɔkɩ ɖa-laŋa kala taa, ɖɩɖɔkɩ kpam nazɩm taa, halɩ pɩkpɛndɩnɩ alɩwaatʋ ndʋ pɩpɔzʋʋ se ɖɩsɩ yɔ. Kɩlakɩ tʋmɩyɛ ɛzɩ ñɩɣtʋ hulaɣ yɔ nɛ kɩkandɩyɩɣ ɖa-maɣzɩm yɔɔ se pɩsa nɛ ɖɩpɩzɩ ɖikizi mbʋ pɩfɛyɩ ɖeu yɔ nɛ ɖɩla mbʋ pɩtʋʋzaa yɔ. Lidaʋ ŋgʋ kɩ-tɔm Bibl heyiɣ-ɖʋ yɔ, kɩsɩɣnɩ-ɖʋ se ɖɩñɔtɩnɩ Ɛsɔ nɛ pɩkɩlɩ nɛ kɩwɩlɩɣ-ɖʋ se ɛsɔɔlɩ-ɖʋ siŋŋ. Ye ɖiwobi pɩ-yɔɔ nɛ ɖɩcɛyɩsɩɣ ɖe-lidaʋ yɔ, pɩwazɩɣ-ɖʋ siŋŋ.
17 Takayaɣ ŋga apostoloo Pɔɔlɩ ma Roma mba yɔ ka-taa, eseɣti-wɛ nɛ ɛtɔ se: «Ɩmɛyɩ amɛya lidaʋ taa.» (Roma 12:12) Pɔɔlɩ pɩzaɣ se ɛmɛyɩ, mbʋ pʋyɔɔ yɔ ɛ-taa kaatɛma se ye ewobi pɩ-yɔɔ nɛ ɛɖɔkɩ e-siɣsiɣ wɛtʋ yɔ, ɛkaɣ hiɣu wezuu maatɛŋ ɛsɔdaa. Ða ɖɔɖɔ ɖɩpɩzɩɣ nɛ ɖɩmɛyɩ ɖe-lidaʋ yɔɔ, mbʋ pʋyɔɔ yɔ ɖɩɩpɩtɩɣ se Yehowa kaɣ labʋ ɛ-tamasɩ yɔɔ. Ɛzɩ Keɣa maɖʋ maʋ yɔ «koboyaɣ tʋ lɛ . . ., weyi e-lidaʋ wɛ ɛ-Ɛsɔ Yehowa yɔɔ yɔ, . . . ɛnʋ weyi ɛwɛ siɣsiɣ paa ɛzɩmtaa yɔ.»—Keɣ. 146:5, 6.
Sɔɔlɩm mbʋ haɣ koboyaɣ siŋŋ?
19 Sataŋ ɛjaɖɛ sʋzʋʋ ɛyaa kʋñɔŋ taa yɔ, pɩcɛzɩ pɩnzɩ 6000 yɔ. Nɛ Sataŋ ɛjaɖɛ kɛdɛzaɣ kɩyakɩŋ ɛnɛ ɩ-taa, ɛyaa mba panɩɣnɩ pa-tɩ ɖeke, ɛyaa mba pɛwɛnɩ liidiye laɣzaɣ sɔsɔɔ nɛ mba pɔsɔɔlɩ tomnaɣ yɔɔ leleŋ nɩʋ yɔ, pe-ɖeke pɔtɔyɩnɩ tɛtʋ yɔɔ. Mbʋ piiɖeni pe-ɖeke yɔ, pɩ-yɔɔ pamaɣzɩɣ; nɛ pɔ-sɔɔlɩm ɖeke palakɩ. Ɛyaa mba pɛwɛnɩ wɛtʋ ndʋ yɔ, paapɩzɩɣ nɛ pehiɣ koboyaɣ siŋŋ wiɖiyi. Ɛlɛ keɣa maɖʋ ñamawa se: «Koboyaɣ tʋ lɛ weyi Yakɔɔb tɛ Ɛsɔ kɛ ɛ-sɩnɩyʋ yɔ, weyi e-lidaʋ wɛ ɛ-Ɛsɔ Yehowa yɔɔ yɔ.»—Keɣ. 146:5.
20 Sɔɔlɩm mbʋ Yehowa sɛyaa wɛnɩ ɛ-yɔɔ yɔ, pɩwɛɛ nɛ pɩkpaɣ ɖoŋ paa ɖooye. Nɛ paa pɩnaɣ ŋga lɛ, ɛyaa kɩfama sakɩyɛ kpɛlɩkɩɣ nɛ patɩlɩɣ-ɩ nɛ pɔsɔɔlʋʋ-ɩ. Pɩwɩlɩɣ kpayɩ se Ɛsɔ Kewiyaɣ ɖiɣni ka-tʋmɩyɛ labʋ nɛ pɩkazɩ pazɩ lɛ, kakaɣ yebu nɛ ɖihiɣ wazasɩ nzɩ ɖɩtɩɖʋna yɔ tɛtʋ yɔɔ. Toovenim taa lɛ, ye ɖɩɖɔŋ Ɛsɔ paɣtʋ yɔɔ; ye ɖɩnawa se ɖɔ-tɔm kɛdɩnɩ kedeŋa kpeekpe Kɩlɩm yɔ, mbʋ haɣnɩ koboyaɣ siŋŋ, nɛ kakaɣ wɛʋ tam. Nɛ mba pɔsɔɔlɩ Yehowa yɔ, pakaɣ wɛʋ taa leleŋ taa tam! Ñʋʋ ŋgʋ kɩkɔŋ yɔ kɩ-taa, ɖɩkaɣ tazʋʋ piɖeni men-ɖeke sɔɔlɩm wɛtʋ natʋyʋ taa nɛ ɖɩna ɛzɩma tɩwɛ ndɩ nɛ Yehowa sɛyaa wɛtʋ yɔ.
Fezuu taa ñɩm
it-1 125 § 1
Kpɩna
Bibl wɩlɩɣ se pɩwɛɛ se pana wondu kɩlɩzɩtʋ pʋtɔdɩyɛ nɛ pataalabɩ-tʋ kañatʋ. Toovenim taa lɛ, Yehowa wɩlɩɣ se ɛ-maɣmaɣ lɛ ɛkɛ weyi ɛcɔŋnɩ wondu kɩlɩzɩtʋ yɔɔ nɛ sɔɔlɩm yɔ. (Adu 12:10; Ke 145:15, 16) Moyizi Paɣtʋ pɔzaɣ se pɔcɔnɩ ɖɩɣa kpɩna yɔɔ. Ye pana ɖɩɣa kpɩnɛ naɖɩyɛ ɖɩwɛɛ nɛ ɖileki yɔ, pɩwɛɛ se patalɩ-ɖɩ nɛ powoni-ɖɩ ɖɩ-tʋ; ye pana kpɩnɛ naɖɩyɛ tɔlaa nɛ ɖɩ-sʋʋtʋ tɩnɩ ɖɩ-yɔɔ yɔ pɩwɛɛ se pasɩnɩ-ɖɩ nɛ pakʋsɩ ɖɩ-yɔɔ sʋʋtʋ. (Ejl 23:4, 5) Pɩfɛyɩ se pɛkpɛndɩ kpɩna wena a-ɖoŋ tɩta yɔ se ala tʋmɩyɛ. (Wp 22:10; 25:4) Paɣtʋ pɔzaɣ se ɛyaa nɛ kpɩna pɛhɛzɩ sabaatɩ wiye. (Ejl 20:10; 23:12; Wp 5:14) Kpɩna wena alakɩ kañatʋ lakasɩ yɔ, pɩwɛɛ se pɔcɔnɩ a-ɖeɖe camɩyɛ yaa pakʋ-yɛ. (Kiɖ 9:5; Ejl 21:28, 29) Paɣtʋ taahaɣ nʋmʋʋ se kpɩna ndɩ ndɩ 2 ɩkpa ɖama.—Lev 19:19.
10-16 FÉVRIER
ÑƖM MBƲ PƖWƐ ƐSƆTƆM TAA YƆ KEƔSI 147-150
Mbʋ pʋyɔɔ pɩwɛɛ se ɖɩsa Yah yɔ pɩɖɔwa
Ɛbɛ yɔɔ pɩwɛɛ se ɖɩsa Yehowa?
5 Pɩtɩkɛ samaɣ ɖeke Yehowa kaakpazɩ ɖoŋ, ɛlɛ ɛɛcɔnɩ paa Izrayɛɛlɩ pɩɣa ŋga lɛ ka-kɩcɛyɩm ɖeɖe. Mbʋ ɖɔɖɔ pɩwɛ sɔnɔ. Keɣa maɖʋ ɛnʋ ɛyɔɔdɩ Yehowa yɔɔ se: «Ɛwaɣ mba pa-laŋa pʋʋtaa yɔ; ɛhɔkʋʋ pe-heŋ.» (Keɣ. 147:3) Ɛɛɛ, Yehowa sɩɣnɩ mba pa-tɩŋa payɩ pakatɩɣ kala yɔ. Sɔnɔ ɖɔɖɔ, Yehowa sɔɔlaa se ɛsɩnɩ-ɖʋ nɛ ɛhɛzɩ ɖa-laŋa taa wɩzasɩ. (Keɣ. 34:18; Iza. 57:15) Alɩwaatʋ ndʋ ɖɩkatɩɣ kala yɔ, ɛhaɣ-ɖʋ lɔŋsɩnɖɛ nɛ ɖoŋ weyi pɩpɔzʋʋ-ɖʋ yɔ.—Yak. 1:5.
6 Lɛɛlɛɛyɔ keɣa maɖʋ kɛzɩ ɛ-ɛsa nɛ ɛsɔdaa kiŋ nɛ eheyiɣ-ɖʋ se Yehowa sɩm «tɩɩnzɩ ñʋʋ» nɛ «ɛyaɣ sɩ-tɩŋa nɛ sɩ-hɩla.» (Keɣ. 147:4) Ɛbɛ yɔɔ ɛkɛzɩ ɛ-ɛsa lɛɛlɛɛyɔ nɛ ɛsɔdaa wondu yɔɔ? Maɣzɩ nɛ ŋna, keɣa maɖʋ pɩzaa nɛ ɛna tɩɩnzɩ nɛ ɛ-ɛsa, ɛlɛ ɛtaapɩzɩɣ se ɛtɩlɩ sɩ-ñʋʋ. Sɔnɔ tɩɩnzɩ nzɩ ɛyʋ pɩzɩɣ nɛ ɛna yɔ, sɩɖɔ siŋŋ nɛ pɩcɛzɩ nzɩ keɣa maɖʋ kaanawa yɔ. Lalaa maɣzɩɣ se tɩɩnzɩ tindimiye nɖɩ ɖɩ-taa wɩsɩ wɛɛ nɛ payaɣ-ɖɩ se Voie lactée yɔ ɖɩ-taa, tɩɩnzɩ miiliyaarɩwaa sakɩyɛ wɛna. Nɛ tɩɩnzɩ tindima miiliyaarɩwaa kudokiŋ sakɩyɛ wɛnɩ kedeŋa kpeekpe yɔɔ. Ɛyʋ nɔɔyʋ ɛɛpɩzɩɣ nɛ ɛkalɩ tɩɩnzɩ nzɩ sɩwɛ kedeŋa kpeekpe yɔɔ yɔ, ɛlɛ Ɛsɔ ñatɩlɩ sɩ-tɩŋa nɛ ɛyaɣ paa ŋga nɛ ka-hɩɖɛ. Pʋ-tɔbʋʋ lɛ se paa tɩɩŋa ŋga lɛ Yehowa sɩm-kɛ. (1 Kɔr. 15:41) Nɛ ɛyaa mba ɛlɩzɩ tɛtʋ yɔɔ yɔ? Ɛsɔ weyi ɛsɩm paa tɩɩŋa ŋga nɛ ɛyaɣ-kɛ nɛ ka-hɩɖɛ yɔ, ɛsɩm ɖɔɖɔ ɖenɖe keekee ŋwɛɛ yɔ, mbʋ pɩ-taa ŋwɛɛ yɔ; nɛ alɩwaatʋ tɩŋa taa lɛ, ɛsɩm ɖɔɖɔ mbʋ ɖeyi ɖeyi pɩkɛ ña-kɩcɛyɩm yɔ.
Ɛbɛ yɔɔ pɩwɛɛ se ɖɩsa Yehowa?
7 Pɩtasɩnɩ se Yehowa maɣzɩɣ ñɔ-yɔɔ lɛ, ɛkɛ pʋtɔdɩyɛ nayʋ nɛ ɛwɛnɩ ɖoŋ se ɛpɩzɩɣ ɛsɩnɩ-ŋ kʋñɔmɩŋ nɛ kala wena ŋkatɩɣ yɔ a-taa. (Kalɩ Keɣa 147:5.) Pɩtɩla ŋmaɣzɩɣ se ña-kʋñɔmɩŋ nɛ ña-sʋʋtʋ pakɩlɩ-ŋ yuŋ. Ɛlɛ Ɛsɔ sɩm ño-ɖoŋ kamaɣ nɛ ‘ɛtɔzʋʋ se mʋzʋʋ ŋkɛnaa.’ (Keɣ. 103:14) Paa evemiye nɖɩ lɛ, picoɖuu-ɖʋ mbʋ pʋyɔɔ yɔ, ɖɩkɛ ɛyaa mantɩtalɩ pilimwaa. Alɩwaatʋ ndʋ picoɖuu-ɖʋ ɖɔ-yɔɔdaɣ taa, ɖɩlakɩ tomnaɣ sɔɔlɩm nabʋyʋ yaa ɖɩɖʋʋ ɛsɩyɛ ɛyʋ lɛlʋ ñɩm yɔɔ lɛ, pɩwɩzɩɣ-ɖʋ nɛ ɖikpiɖiɣ pɩ-yɔɔ. Paa wiɖiyi wɛtʋ tʋnɛ tɩtɩtalɩ Yehowa yaa piticoɖi-i nɛ ɛna yɔ, ɛnɩɣ wɛtʋ ndʋ tɩ-taa ɖɩwɛɛ yɔ tɩ-taa nɛ halɩ pɩkɩlɩ ɖa-maɣmaɣ.—Iza. 40:28.
Ɛbɛ yɔɔ pɩwɛɛ se ɖɩsa Yehowa?
18 Keɣa maɖʋ kaana sɔɔlɩm mbʋ Yehowa kaawɛnɩ caanaʋ taa ɛ-samaɣ yɔɔ yɔ. Samaɣ ŋga ke-ɖeke koŋ Yehowa kaakuli «ɛ-tɔm» nɛ «ɛ-paɣtʋ nɛ ɛ-tɔm hʋʋ» yɔɔ nɛ ɛwɩlɩ. (Kalɩ Keɣa 147:19, 20.) Sɔnɔ, pɩkɛnɩ-ɖʋ wazaɣ mbʋ pʋyɔɔ yɔ, tɛtʋ kpeekpe yɔɔ lɛ, ɖe-ɖeke koŋ ɖɔ-yɔɔ Yehowa hɩɖɛ wɛɛ. Ɛzɩma ɖɩsɩm Yehowa nɛ ɖɩɖɔŋ ɛ-paɣtʋ yɔɔ ɖe-wezuu caɣʋ taa yɔ, pɩha-ɖʋ waɖɛ se taabalɩyɛ kɩbanɖɛ ɛwɛɛ ɖa nɛ ɩ ɖɛ-hɛkʋ taa. Ɛzɩ weyi ɛmabɩ Keɣa 147 yɔ ɛlabʋ yɔ, ŋwɛnɩ lɩmaɣza kɩbana wena a-yɔɔ ŋpɩzɩɣ nɛ ŋyɔɔdɩnɩ nɔɔ kɩkʋyaɣ se «ɩsa Yah!» yɔ nɛ ŋseɣtini lalaa nɛ pasa Yehowa.
Fezuu taa ñɩm
it-2 438 § 3
Sumasɩ
Keɣa maɖʋ yɔɔdaa se «sumasɩ» ɩsa Yehowa (Ke 148:1, 10), nɛ ɛzɩma palabɩ-sɩ nɛ sɩ-wɛtʋ wɛɛ piti yɔ mbʋ saŋnɩ Yehowa. Sumaɣ pɩzɩɣ nɛ kɛwɛɛnɩ hʋndʋ 1000 nɛ piwolo 20000 nɛ halɩ pɩcɛzɩ. Paa hʋnʋʋ ŋgʋ lɛ kɩ-hɛkʋ taa nɛ ɖaʋ, nɛ lila cikpena ñɔʋ ɖaʋ ŋgʋ kɩ-yɔɔ, nɛ loyisi mɩnɩŋ sakɩyɛ ñɔʋ lila cikpena ana a-yɔɔ, nɛ loyisi cikpesi lɛɛsɩ mɩnɩŋ sakɩyɛ ñɛyɛzɩɣ loyisi nzɩ sɩ-yɔɔ, nɛ pɩtɩŋa pɩkpɛndɩɣna nɛ pɩpɩsɩ hʋnʋʋ. Pɔcɔnɩ sumasɩ keŋ nɛ pala ɛsɔdaa lɔɔɖa keŋ; paa mbʋ yɔ, sumasɩ keŋ wɛ piti nɛ ɩlakɩ tʋmɩyɛ camɩyɛ nɛ pɩkɩlɩ ɛsɔdaa lɔɔɖa keŋ. Sumasɩ mɔɔ taa wɛ pɔŋ nɛ pʋyɔɔ lɛ afɛyɩ yuŋ; ye pakpaɣ sumaɣ ŋga payaɣ se frégate yɔ kɔ-mɔɔ mɛtanaa 2 yɔ pi-yuŋ pɩzɩɣ nɛ pɩmaɣnɩ kɩɖamnaa 110 mbʋ yɔ ɖeke. Halɩ nabʋyʋ wɛ sumasɩ sɔsɔsɩ nasɩyɩ keŋ mɔɔ pɔŋ taa nɛ pɩnɩɣzɩnɩ ɖa-alɩwaatʋ taa mbʋ paɖʋʋ ɛsɔdaa lɔɔɖa keŋ taa nɛ pɩnɩɣzɩnɩ giriyaazɩwaa yɔ.
17-23 FÉVRIER
ÑƖM MBƲ PƖWƐ ƐSƆTƆM TAA YƆ ADUWA 1
Piya—Mba ɩkaɣ welisinuu?
Taayele nɛ nabʋyʋ ɖɩɣ-ŋ nʋmɔʋ se ŋtaamʋ kɩhɛyʋʋ
16 Ye ŋkɛ pɩɣa evelaɣ nɛ pɩlakɩ-ŋ ɛzɩ ña lʋlɩyaa Krɩstʋ ñɩma ɩɩnɩɣ ñɔ-tɔm taa nɛ pakɩlɩɣ-ŋ paɣtʋ ɖʋʋ yɔ, ɛbɛ pɩwɛɛ se ŋla? Ŋkɔ pana yɔ, pɩpɩzɩɣ piyele nɛ ŋmaɣzɩ se pɩtɩla Yehowa sɛtʋ tɩkɛnɩ wezuu caɣʋ ŋgʋ kɩkpaɖɩ ɖeu yɔ. Ɛlɛ ye ŋkɔ pana nɛ ŋkizi Yehowa sɛʋ yɔ, piileɖiɣ lɛ ŋkaɣ naʋ se nɔɔyʋ fɛyɩ se ɛsɔɔlɩ ñɔ-tɔm nɛ ɛmaɣzɩɣ ñɔ-yɔɔ camɩyɛ nɛ pɩtalɩ ña-lʋlɩyaa mba pañaŋ Ɛsɔ yɔ nɛ ɛgbɛyɛ nɖɩ ɖɩ-taa ŋwɛɛ yɔ.
17 Ye ña-lʋlɩyaa ɩɩtasɩɣ-ŋ lɔŋ kaaʋ, ŋŋkaɣ yɔɔdʋʋ se pa-paa fɛyɩnɩ-ŋ yaa we? (Ebr. 12:8) Ɛlɛ pɩtɩla nʋmɔʋ ŋgʋ kɩ-yɔɔ ña-lʋlɩyaa tɩŋɩɣna nɛ patasɩɣ-ŋ lɔŋ yɔ ŋgʋ ɖʋʋnɩ-ŋ ɖɩwɩzɩyɛ. Paa mbʋ yɔ taamʋ pana. Ñaɣ pana nɛ ŋna mbʋ pʋyɔɔ patɩŋɩɣnɩ nʋmɔʋ ŋgʋ kɩ-yɔɔ nɛ patasɩɣ-ŋ lɔŋ yɔ. Pʋyɔɔ lɛ ɖɔkɩ ña-tɩ, nɛ ña nɛ wɛ ɩtaahɔ tɔm. Masɩ yɔɔdʋʋ se: «Ɛyʋ weyi ɛwɛnɩ sɩmtʋ yɔ, ɛɖɔkʋʋ ɛ-nɔɔ, nɛ ɛyʋ weyi ɛwɛnɩ lɛɣtʋ yɔ, ɛcakɩ ɖiɣ ɖiɣ.» (Adu. 17:27) Ñaɣ pana nɛ ŋmʋʋ lɔŋ tasʋʋ camɩyɛ nɛ ŋyele nɛ pɩwazɩ-ŋ; paa nʋmɔʋ ŋgʋ kɩ-yɔɔ patɩŋnaa nɛ patasɩ-ŋ lɔŋ mbʋ yɔ; ɖɩnɛ ɛlɛ pɩwɩlɩɣ se ŋkɛ weyi ɛpɩ fezuu taa yɔ. (Adu. 1:8) Wazaɣ sɔsɔɔ pɩkɛnaa se ɛyʋ ɛwɛɛnɩ lʋlɩyaa mba pɔsɔɔlɩ Yehowa nɛ pa-laŋɩyɛ pilim yɔ. Pɩtʋʋ fɛyɩ se pɔsɔɔlaa se pasɩnɩ-ŋ nɛ ŋhiɣ wezuu maatɛŋ kɩhɛyʋʋ.
w05 15/2 19-20 § 11-12
Ðɩkandɩyɩ ɖe-Krɩstʋ wɛtʋ yɔɔ kpam
11 Ñaɣ pana se ñɔ-tɔm ɛkɛdɩnɩ Ɛsɔ pɩtaakɛ ɛyʋ. Sakɩyɛ taa lɛ, ɛyaa mba pɛ-hɛkʋ taa ɖɩwɛɛ yɔ pɛwɛnɩ ɖoŋ ɛyʋ weyi ɖɩkɛwa yɔ ɛ-yɔɔ. Paa weyi lɛ ɛsɔɔlaa se ɛwɛɛnɩ taabalaa, nɛ ye lalaa ɛɛkɛzɩɣ-ɖʋ kɩjaʋ yɔ pɩkɛdɩɣnɩ-ɖʋ. Alɩwaatʋ ndʋ ɛyʋ kɛɣ pɩɣa evelaɣ nɛ halɩ alɩwaatʋ ndʋ ɛpɩsɩɣ ɛyʋ sɔsɔ yɔ, ɛ-ɖaɣʋnaa pɩzɩɣ nɛ pɛwɛɛnɩ ɖoŋ siŋŋ ɛ-yɔɔ, nɛ e-liu wɛɛ siŋŋ se ɛmaɣzɩnɩ-wɛ yaa se ɛ-tɔm ɛkɛdɩnɩ-wɛ. Ɛlɛ pɩtɩkɛ paa ɛzɩmtaa ɖa-taabalaa nɛ ɖa-ɖaɣʋnaa ñɩnɩɣ mbʋ pɩwazɩɣ-ɖʋ yɔ. Nabʋyʋ taa lɛ mbʋ pañɩnɩɣ yɔ lɛ se ɖɩkpɛndɩ pɔ-yɔɔ nɛ ɖiwolo ɖɩla mbʋ pɩfɛyɩ ɖeu yɔ. (Aduwa 1:11-19) Alɩwaatʋ ndʋ Krɩstʋ tʋ nɔɔyʋ tɔlʋʋ ɛ-taabalaa kpaca taa yɔ, sakɩyɛ taa ɛñakɩ pana se ‘ɛmɛsɩ mbʋ ɛkɛnaa yɔ.’ (Keɣa 26:4) Apostoloo Pɔɔlɩ paɣ-ɖʋ se: «Ɩtaatasɩ maɣzɩnʋʋ ɛyaa mba pɛwɛ ɛjaɖɛ ɖɩnɛ ɖɩ-yɔɔ yɔ pɛ-wɛtʋ.» (Roma mba 12:2) Yehowa haɣ-ɖʋ ɖoŋ weyi pɩpɔzʋʋ-ɖʋ se ɖikizi se ɖɩɩlakɩ mbʋ lalaa ñɩkɩɣ ɖɔ-yɔɔ se ɖɩla yɔ.—Ebree mba 13:6.
12 Alɩwaatʋ ndʋ ɖɩnaɣ se ɖoŋ weyi lalaa wɛnɩ ɖɔ-yɔɔ yɔ iyeki nɛ ɖilesi ɖa-Krɩstʋ wɛtʋ yɔ, pɩwɛɣ ɖeu se ɖɩtɔzɩ se pɩcɛyaa se ɖɩwɛɛ siɣsiɣ Ɛsɔ ɛsɩndaa nɛ pɩkɩlɩ ndʋ ɛyaa maɣzɩɣ yaa mbʋ ɛyaa sakɩyɛ lakɩ yɔ. Tɔm ndʋ tɩwɛ Ejipiti Lɩʋ 23:2 taa yɔ ndʋ kɛnɩ paɣtʋ kiɖe nɖɩ ɖɩkandɩyɩɣ ɖɔ-yɔɔ yɔ. Ðɩtɔŋ se: «Pɩtɩpɔzɩ se ŋtɩŋ samaɣ wayɩ nɛ ŋla kɩdɛkɛdɩm.» Alɩwaatʋ ndʋ Izrayɛɛlɩ mba hɔɔlʋʋ sɔsɔʋ pɩtaɣ se Yehowa ɛɛpɩzɩɣ nɛ ɛla ɛ-tamasɩ yɔɔ yɔ, Kalɛɛb kizaa se ɛɛlakɩ ɛzɩ mba yɔ. Ɛ-taa kaatɛma se Ɛsɔ kaɣ labʋ ɛ-tamasɩ yɔɔ, nɛ pawazɩ-ɩ ɛzɩma ekizaa se ɛɛtɩŋɩɣ samaɣ wayɩ yɔ pɩ-yɔɔ. (Kɩgalʋʋ 13:30; Yozuwee 14:6-11) Ɛzɩ Kalɛɛb yɔ, ŋsɔɔlɩ faaa se ŋkizi samaɣ wayɩ tɩŋʋʋ se pɩsa nɛ ŋkandɩyɩ ña nɛ Ɛsɔ mɩ-taabalɩyɛ yɔɔ?
Fezuu taa ñɩm
it-2 1005
Kɩmɛlɛŋ
Palabɩnɩ tɔm piye «kɩmɛlɛŋ» tʋmɩyɛ Bibl taa tam sakɩyɛ. Tɔm piye nɖɩ ɖɩɩwɩlɩɣ ɛyʋ weyi ɛ-ñʋʋ taa ɛɛlakɩ tʋmɩyɛ camɩyɛ yɔ, ɛlɛ sakɩyɛ taa lɛ ɖɩwɩlɩɣ ɛyʋ weyi ɛtɩsɔɔlɩ se ɛnɩɩ tɔm taa nɛ ɛcakɩ wezuu ŋgʋ kɩɩlakɩ nɔɔ kʋɖʋmaɣ nɛ Ɛsɔ paɣtʋ kila yɔ. Ebree kʋnʋŋ taa lɛ palabɩnɩ tʋmɩyɛ tɔm pee ndɩ ndɩ nɛ pɔyɔɔdɩ ɛyaa mba pɛwɛnɩ wɛtʋ ndʋ yɔ pɔ-tɔm. Kɩɖaŋ nɩɩyɩ yɔ: ʼkesilʹ («kɩmɛlɛmɩŋ»; Adu 1:22), ʼewilʹ («kɩmɛlɛŋ»; Adu 12:15), na·valʹ («kɩmɛlɛŋ»; Adu 17:7), nɛ lets («ɛyaa woŋiyu»; Adu 13:1). Nɛ Grɛɛkɩ kʋnʋŋ taa lɛ palabɩnɩ ɖɔɖɔ naayɛ tʋmɩyɛ: aʹphron «kɩmɛlɛŋ» (Luk 12:20), a·noʹe·tos «kɩmɛlɛmɩŋ» (Gal 3:1), nɛ mo·rosʹ «kpanzɩyaa» yaa «kɩmɛlɛmɩŋ» (Mat 23:17; 25:2).
24 FÉVRIER–2 MARS
ÑƖM MBƲ PƖWƐ ƐSƆTƆM TAA YƆ ADUWA 2
Ɛbɛ yɔɔ pɩwɛɛ se ŋsɔɔlɩ tɩ-yɔɔ kpɛlɩkʋʋ siŋŋ?
‘Wɛɛ nɛ ŋɖɔŋ toovenim taa’
16 Pɩtɩkɛ ɖa-tɩŋa ɖɩsɔɔlɩnɩ tɔm kalʋʋ nɛ tɔm kpɛlɩkʋʋ. Ɛlɛ, Yehowa seɣtiɣ-ɖʋ se ɖiwolo pɩ-yɔɔ nɛ ‘ɖɩñɩnɩɣ’ nɛ pɩsa nɛ ɖɩnɩɩ toovenim taa camɩyɛ nɛ pɩkɩlɩ. (Kalɩ Aduwa 2:4-6.) Ye ɖɩñakɩ pana nɛ ɖɩlakɩ mbʋ yɔ, pɩwazɩɣ-ɖʋ paa ɛzɩmtaa. Corey yɔɔdaa se ɛnʋ kalɩɣ Bibl lɛ, ɛkaŋ ɛ-lɩmaɣza paa mayaɣ ŋga lɛ kɔ-yɔɔ. Ɛlɩzɩ pɩ-taa se: «Mankalɩɣ paa pɩ-tɛɛ tɔm ndʋ lɛ, nɛ mankalɩɣ ɖɔɖɔ masɩ nzɩ payɩ sɩyɔɔdʋʋ tɔm kʋɖʋmtʋ ndʋ yɔ nɛ mañɩnɩɣ masɩ nzɩ sɩ-yɔɔ tɔm lɛɛtʋ ɛgbɛyɛ takayɩsɩ taa. . . . Tɔm kpɛlɩkʋʋ nʋmɔʋ ŋgʋ kɩsɩɣnɩ-m nɛ mantɩlɩɣ tɔm sakɩyɛ!» Paa pɩtɩɩkɛ tɔm kpɛlɩkʋʋ nʋmɔʋ kʋnɛ yaa paa tɔm kpɛlɩkʋʋ nʋmɔʋ lɛɛkʋ ɖɩlakɩnɩ tʋmɩyɛ yɔ, ye ɖɩkpakɩɣ ɖa-alɩwaatʋ nɛ ɖɩñakɩ pana nɛ ɖɩkpɛlɩkɩɣ toovenim yɔ, ɖɩwɩlɩɣ se pɩmʋ ñɩm ɖɛ-ɛsɩndaa.—Keɣ. 1:1-3.
Lɔŋsɩnɖɛ siŋŋ wɛɛ nɛ ɖɩmakɩ kubusi ɖoŋ
3 Ðɩpɩzɩɣ nɛ ɖɩlɩzɩ lɔŋsɩnɖɛ tɔbʋʋ se pɩkɛ ɛzɩma ɖɩlakɩnɩ tʋmɩyɛ mbʋ ɖɩsɩma yɔ nɛ ɖɩkpakɩɣ lɩmaɣza kɩbana yɔ. Ɛlɛ, lɔŋsɩnɖɛ siŋŋ tɔbʋʋ nɩʋ ɛɛsɩɣnɩ pi-ɖeke. Bibl yɔɔdʋʋ se: «Yehowa sɔɔndʋ seu kɛnɩ lɔŋsɩnɖɛ ɖɩbazɩyɛ, ye ɛyʋ ɛsɩm Kiɖeɖema Taa Kiɖeɖeu yɔ, ɛwɛnɩ tɔm taa nɩʋ lɛɣtʋ.» (Adu. 9:10) Ye mbʋ, alɩwaatʋ ndʋ pɩpɔzʋʋ se ɖɩkpaɣ lɩmaɣzɩyɛ kɩcɛyɩyɛ naɖɩyɛ yɔ, pɩpɔzʋʋ se ɖɩñɩnɩ nɛ ɖɩtɩlɩ Yehowa lɩmaɣza. Ðɩpɩzɩɣ nɛ ɖɩla mbʋ ye ɖɩkpɛlɩkɩɣ Bibl nɛ ɖɛ-ɛgbɛyɛ takayɩsɩ yɔ. Ye ɖɩlakɩ mbʋ yɔ, ɖɩwɩlɩɣ se ɖɩwɛnɩ lɔŋsɩnɖɛ siŋŋ.—Adu. 2:5-7.
4 Yehowa ɖeke pɩzɩɣna nɛ ɛha-ɖʋ lɔŋsɩnɖɛ siŋŋ. (Roma 16:27) Ɛbɛ yɔɔ ɛkɛnɩ lɔŋsɩnɖɛ Hiɖe? Kajalaɣ lɛ, ɛnʋ kɛnɩ Lɩzɩyʋ nɛ pʋyɔɔ lɛ, ɛsɩm e-wondu kɩlɩzɩtʋ yɔɔ tɔm tɩŋa. (Keɣ. 104:24) Nabʋlɛ lɛ, mbʋ payɩ ɛlakɩ yɔ, pɩwɩlɩɣ se ɛwɛnɩ lɔŋsɩnɖɛ. (Roma 11:33) Nabudozo lɛ, lɔŋ kɩbaŋ weyi Yehowa tasɩɣ yɔ, ɩwazɩɣ mba pɔɖɔŋ ɩ-yɔɔ yɔ paa ɛzɩmtaa. (Adu. 2:10-12) Ye ɖɩsɔɔlaa se ɖɩwɛɛnɩ lɔŋsɩnɖɛ siŋŋ yɔ, pɩpɔzʋʋ se ɖitisi toovenim tɔm ndʋ tɩ-yɔɔ nɛ ɖiyele nɛ tiɖiyi lɩmaɣza wena ɖɩkpakɩɣ yɔ nɛ ɖa-lakasɩ.
Piya evelisi, ɩkpazɩ mi-tisuu ɖoŋ
2 Sɔnɔ ɛyaa sakɩyɛ iitisiɣ se Ɛsɔ lɩzɩnɩ-ɖʋ. Ye ŋkɛ pɩɣa evelaɣ ŋga kɛsɛɣ Yehowa yaa ye ña nɛ Yehowa Aseɣɖe Tɩnaa ɩkpɛlɩkɩɣ Bibl yɔ, pʋtɔma yɔ ŋpɔzʋʋ ña-tɩ se ɛzɩma ŋpɩzɩɣ nɛ ŋwɩlɩ se toovenim taa lɛ, Ɛsɔ lɩzɩnɩ kedeŋa. Bibl sɩɣnɩ-ɖʋ se ɖɩmaɣzɩɣ tɔm ndʋ ɖɩnɩɣ yaa ɖɩkalɩɣ yɔ tɩ-yɔɔ nɛ ɖɩna se tɩkɛ toovenim yaa tɩtɩkɛ. Bibl tɔŋ se lɔŋ kaɣ ‘huuzuu ñɔ-yɔɔ.’ Ɛzɩma tɩyɛ? Pɩkaɣ ñɔ-yɔɔ kandɩyʋʋ nɛ ŋkizi ɛjaɖɛ yɔɔ lɔŋsɩnɖɛ nɛ ŋkpazɩ ñe-tisuu ɖoŋ.—Kalɩ Aduwa 2:10-12.
3 Pʋcɔ nɛ ɛyʋ wɛɛnɩ tisuu siŋŋ lɛ, pɩwɛɛ se ɛtɩlɩ Ɛsɔ camɩyɛ. (1 Tim. 2:4) Pʋyɔɔ lɛ, alɩwaatʋ ndʋ ŋkalɩɣ Bibl nɛ ɛgbɛyɛ takayɩsɩ yɔ, pɩwɛɛ kpem se ŋkpaɣ alɩwaatʋ nɛ ŋmaɣzɩ mbʋ ŋkalɩɣ yɔ pɩ-yɔɔ. Ñaɣ pana nɛ ŋlabɩnɩ ña-maɣzɩm tʋmɩyɛ nɛ tɔm ndʋ ŋkalɩɣ yɔ, ‘ŋnɩɩ tɩ-tɔbʋʋ.’ (Mat. 13:23) Pɩsɩɣnɩ-ŋ nɛ ‘ña-taa tɛ’ se Ɛsɔ lɩzɩnɩ wondu tɩŋa nɛ ɛ-cɔlɔ Bibl lɩnaa. Ñʋʋ kʋnɛ kɩ-taa, ɖɩkaɣ naʋ ɛzɩma ŋpɩzɩɣ nɛ ŋla mbʋ yɔ.—Ebr. 11:1; pɩtɛɛ tɔm.
Fezuu taa ñɩm
it-1 1195 § 4
Cɩŋgɩlɩm wɛtʋ
Ɛyʋ pɩzɩɣ nɛ ɛɖɔkɩ ɛ-cɩŋgɩlɩm wɛtʋ kpam, ɛlɛ pɩtɩkɛ ɛ-maɣmaɣ e-ɖoŋ taa; ɛpɩzɩɣ nɛ ɛla mbʋ ye ɛwɛnɩ tisuu sɔsɔm nɛ ɛtaɣ liu Yehowa nɛ ɖoŋ weyi Yehowa wɛna se ɛya ɛyʋ ñʋʋ yɔ. (Ke 25:21) Yehowa labɩ tamaɣ se ɛkaɣ kɛʋ «kpayʋʋ» nɛ «tilimiye ɖoŋ ñɩnɖɛ» mba pɔɖɔŋ cɩŋgɩlɩm wɛtʋ taa yɔ, nɛ ɛkaɣ kandɩyʋʋ pa-nʋmɔʋ yɔɔ. (Adu 2:6-8; 10:29; Ke 41:12) Ɛzɩma pɛtɛm pa-taa se pɔ-tɔm ɛkɛdɩnɩ Yehowa yɔ, pʋyɔɔ lɛ piɖeɣni-wɛ pe-wezuu caɣʋ taa, nɛ pɩsɩɣnɩ-wɛ se paka pa-lɩmaɣza pa-kaɖʋwa yɔɔ. (Ke 26:1-3; Adu 11:5; 28:18) Yɔɔb yɔɔdɩ ɛyʋ weyi ɛwɛ cɩŋgɩlɩm yɔ ɛ-tɔm se nabʋyʋ taa kañatʋ tɩnaa kewiyitu tɔɔʋ yeki nɛ ɛnɩɣ siziŋ, nɛ ɛsɩkɩ ɛzɩ kañatʋ tʋ yɔ; ɛlɛ Yehowa yɔɔdaa se ɛsɩm kaɖɛ nɖɩ weyi ɛfɛyɩnɩ kɩwɛɛkɩtʋ natʋyʋ yɔ ɛkatɩɣ yɔ, nɛ ɛ-ñɩm kaɣ wɛʋ tam; ɛyʋ ɛnʋ ɛkaɣ wɛʋ laŋhɛzɩyɛ taa cee wayɩ, nɛ ɛkaɣ wɛnʋʋ kɩhɛyʋʋ kɩbaŋʋ. (Yɔb 9:20-22; Ke 37:18, 19, 37; 84:11; Adu 28:10) Ɛzɩ pɩwɛʋ Yɔɔb hɔɔlʋʋ taa yɔ, cɩŋgɩlɩm wɛtʋ yekina se ɛyʋ ɛmʋ ñɩm yaa se paña ɛyʋ ɛlɛ pɩtɩkɛ ñɩm. (Adu 19:1; 28:6) Piya nzɩ sɩ-caa ɖɔŋ cɩŋgɩlɩm wɛtʋ taa yɔ sɩkɛ koboyaɣ tɩnaa (Adu 20:7), mbʋ pʋyɔɔ yɔ ɛɖɛzɩɣ-sɩ ñɩm sɔsɔm: ɛ-kɩɖaʋ kɩbaŋʋ, hɩɖɛ kɩbanɖɛ nɛ ñamtʋ ndʋ ɛyaa wɛnɩ ɛ-yɔɔ yɔ tɩwazɩɣ-wɛ.