Yele nɛ Bibl taa masɩ nzɩ sɩwɛ hɛkʋ taa canzɩ taa yɔ sɩwazɩ-ŋ

Bibl—Ɛjaɖɛ kɩfaɖɛ tɔm ɖɛzʋʋ taa, pama masɩ nasɩyɩ hɛkʋ taa canzɩ taa, nɛ sɩwɩlɩɣ nɔɔ kʋɖʋmaɣ ŋga kɛwɛ Bibl masɩ hɛkʋ taa yɔ. Sɩsɩɣnɩ-ŋ se ŋna tɔm lɛɛtʋ ndʋ titukuuni Bibl mayaɣ nakɛyɛ yɔ. Pɩsa nɛ ŋna masɩ nzɩ lɛ, nabʋyʋ taa pamaɣ tɔm maʋ mayaɣ cikpelaɣ nakɛyɛ tɔm piye naɖɩyɛ cɔlɔ Bibl mayaɣ taa. Ye ŋwɛnɩ Bibl maɣmaɣ yɔ, ñɩnɩ tɔm maʋ mayaɣ cikpelaɣ kʋɖʋmaɣ ŋga hɛkʋ taa canzɩ taa, nɛ ŋna Bibl masɩ lɛɛsɩ nzɩ situkuuni Bibl mayaɣ ŋga yɔ. Ye ŋwɛ jw.org yɔɔ yaa application JW Library® taa yɔ, ñɩɣ tɔm maʋ mayaɣ cikpelaɣ ŋga kɔ-yɔɔ nɛ pɩsɩnɩ-ŋ nɛ ŋna Bibl masɩ lɛɛsɩ nzɩ situkuuni Bibl mayaɣ ŋga yɔ.

Masɩ nzɩ sɩwɛ hɛkʋ taa canzɩ taa yɔ, sɩpɩzɩɣ sɩsɩnɩ-ŋ nɛ ŋna:

Kɛdaɣ ŋga kɔyɔɔdʋʋ tɔm kʋɖʋmtʋ ndʋ yɔ: Mayaɣ cikpelaɣ ŋga, kawɩlɩɣ-ŋ Bibl mayaɣ lɛɛka ŋga ka-taa ŋpɩzɩɣ nɛ ŋna kɛdaɣ kʋɖʋmaɣ ŋga yɔ. Kalɩ 2 Samɩyɛɛlɩ 24:1 nɛ 1 Kroniiki 21:1 nɛ ŋna kɩɖaʋ nakʋyʋ.

Mayaɣ ŋga ka-taa pakpaɣ tɔm natʋyʋ yɔ: Mayaɣ cikpelaɣ ŋga, kawɩlɩɣ mayaɣ ŋga ka-taa pakpaɣ tɔm loyaɣ nakɛyɛ yɔ. Kalɩ Maatiyee 4:4 nɛ Wayɩ Wayɩ Paɣtʋ 8:3 nɛ ŋna kɩɖaʋ nakʋyʋ.

Mayaɣ ŋga ka-taa pɔyɔɔdɩ ɛzɩma natʋ tɔm natʋyʋ laba yɔ: Mayaɣ cikpelaɣ ŋga, kasɩɣnɩ-ŋ se ŋna mayaɣ ŋga ka-taa pɔyɔɔdɩ natʋ tɔm natʋyʋ yɔ, yaa mayaɣ ŋga ka-taa pɔyɔɔdɩ ɛzɩma natʋ tɔm ndʋ tɩlaba yɔ. Kalɩ Maatiyee 21:5 nɛ Zakarii 9:9 nɛ ŋna kɩɖaʋ nakʋyʋ.