Koobiya kɩfama naalɛ mba papɩsɩ Nɔɔɖɛyaa ɛgbɛyɛ taa mba yɔ
POSUSI ŋgee tɔm natʋyʋ pɩnaɣ taa kediɣzaɣ ŋga palabɩ 5 octobre 2024 wiye yɔ ka-taa. Posusaa se Koobu Jody Jedele nɛ koobu Jacob Rumph papɩsɩ Yehowa Aseɣɖe Tɩnaa tɛ Nɔɔɖɛyaa ɛgbɛyɛ taa mba. Koobiya mba pa-naalɛ pɛwɛʋ nɛ pɛsɛɣ Yehowa yɔ, pɩlakɩ pɩnzɩ sakɩyɛ yɔ nɛ pɔɖɔkɩ pe-siɣsiɣ wɛtʋ.
Jody Jedele nɛ ɛ-halʋ Damaris
Palʋlɩ Koobu Jedele Misurii tɛtʋ taa, Etaazuunii ɛjaɖɛ taa. Ɛ-lʋlɩyaa kaakɛ Yehowa Aseɣɖe Tɩnaa. Egeetiye nɖɩ ɖɩ-taa ɛ-hɔʋ kaawɛɛ yɔ, Yehowa Aseɣɖe Tɩnaa taaɖɔɔ peeɖe. Koobiya lɩɣaɣnɩ ɛjaɖɛ hɔɔlɩŋ ndɩ ndɩ taa nɛ pɔkɔŋ peeɖe se paɖʋ nesi tɔm susuu tʋmɩyɛ. Piyeba nɛ ehiɣ waɖɛ nɛ ɛkatɩ koobiya ndɩ ndɩ. Sɔɔlɩm mbʋ koobiya mba pawɩlaɣ ɖama yɔ, nɛ nɔɔ kʋɖʋmaɣ ŋga kaawɛ pɛ-hɛkʋ taa yɔ pɩɩwɛnɩ ɖoŋ sɔsɔŋ ɛ-yɔɔ. Pamɩyɩsɩ-ɩ lɩm 15 octobre 1983 wiye; alɩwaatʋ ndʋ lɛ, ɛɛkɛ pɩɣa evelaɣ. Ɛɛsɔɔlɩ tɔm susuu tʋmɩyɛ, pʋyɔɔ ɛtɛm liisee sukuli lɛ, ɛpaɣzɩ paa ɖooye nʋmɔʋ lɩzʋʋ tʋmɩyɛ septembre 1989 taa.
Alɩwaatʋ ndʋ Koobu Jedele kaakɛ pɩɣa evelaɣ yɔ, ɛ-lʋlɩyaa kpakaɣ ɛ nɛ e-neu halɩñɩnʋ nɛ powoki nɛ pekilimiɣ Betɛɛlɩ taa. Piseɣti Koobu Jedele nɛ e-neu nɛ paɖʋ pa-tɩ kaɖʋsɩ se pakaɣ labʋ tʋmɩyɛ Betɛɛlɩ taa, nɛ mbʋ pɩlabɩ pʋwayɩ. Koobu Jedele paɣzɩ tʋmɩyɛ Wallkill Betɛɛlɩ taa septembre 1990 taa. Betɛɛlɩ taa tʋmɩyɛ nɖɩ ɖɩcɔŋnɩ cɩɖɩ cɩɖɩ wɛtʋ yɔɔ yɔ, ɖɩ-taa ɛcalɩ tʋmɩyɛ labʋ; nɛ pʋwayɩ lɛ ɛla tʋmɩyɛ Betɛɛlɩ taa tʋmɩyɛ ndɩ ɖɩcɔŋnɩ tɔnʋʋ taa alaafɩya yɔɔ yɔ ɖɩ-taa.
Alɩwaatʋ ndʋ tɩ-taa, agbaa wena aañɔtɩnɩ Betɛɛlɩ nɛ pɔyɔɔdaɣ Ɛsɩpaañɔɔlɩ kʋnʋŋ a-taa yɔ, aawɛɛ nɛ ahukuu. Nɛ pɩpɔzaɣ koobiya abalɩñɩma agbaa ana a-taa. Pʋyɔɔ Koobu Jedele paɣzɩ kediɣzisi wobu agbaa ana a-taa naɖɩyɛ taa, nɛ ɛpaɣzɩ Ɛsɩpaañɔɔlɩ kʋnʋŋ kpɛlɩkʋʋ. Pitileɖi lɛ, ɛkatɩ koobu halɩñɩnʋ nɔɔyʋ, payaɣ-ɩ se Damaris, ɛɛkɛ nʋmɔʋ lɩzɩyʋ egeetiye nɖɩ ɖɩ-taa. Pɔɖɔkɩ nesi lɛ, koobu Damaris paɣzɩ ɖɔɖɔ tʋmɩyɛ labʋ Betɛɛlɩ.
Pɩtalɩ pɩnaɣ 2005 taa lɛ, Koobu Jedele nɛ ɛ-halʋ pakʋyɩ Betɛɛlɩ nɛ papɩsɩ pɛ-tɛ se pɔcɔnɩ pa-lʋlɩyaa yɔɔ. Alɩwaatʋ ndʋ tɩ-taa, pa-naalɛ paakɛ paa ɖooye nʋmɔʋ lɩzɩyaa. Koobu Jedele kaakɛ ɖɔɖɔ wɩlɩyʋ nʋmɔʋ lɩzɩyaa sukuli taa. Ɛlakaɣ ɖɔɖɔ tʋmɩyɛ e-egeetiye taa Ðama nɩnʋʋ nɛ ɖɔkɔtɔnaa kɔɔmitee taa (C.L.H.) nɛ Kuduyuŋ maʋ kɔɔmitee taa.
Pɩtalɩ pɩnaɣ 2013 taa lɛ, paɖaɣnɩ yaʋ Koobu Jedele nɛ ɛ-halʋ se papɩsɩ Betɛɛlɩ taa nɛ paɖʋ nesi kuduyuŋ maʋ tʋmɩyɛ nɖɩ paawɛɛ nɛ palakɩ Warwick yɔ. Kpaɣnɩ alɩwaatʋ ndʋ lɛ, palabɩ tʋmɩyɛ Patɛrsɔɔnɩ nɛ Wallkill. Koobu Jedele labɩ tʋmɩyɛ ɛgbɛyɛ piliŋa taa kuduyuŋ maʋ tʋmɩyɛ taa, nɛ ɖa-tʋmɩyɛ ɖɩlaɖɛ sɔsɔɖɛ taa ɖama nɩnʋʋ nɛ ɖɔkɔtɔnaa tʋmɩyɛ taa. Mars 2023 taa, palɩzɩ-ɩ se ɛkɛ sɩnɩyʋ Ɛsɔ sɛtʋ tʋmɩyɛ kɔɔmitee taa. Ɛmaɣzɩ tʋma wena paɖʋ-ɩ yɔ a-yɔɔ lɛ, ɛyɔɔdɩ se: «Alɩwaatʋ ndʋ paɖʋʋ-ŋ tʋmɩyɛ kɩfaɖɛ naɖɩyɛ yɔ, nabʋyʋ taa pɩpɩzɩɣ nɛ pɩlabɩ-ŋ ɛzɩ ɖɩcɛzɩ-ŋ yɔ. Ɛlɛ, alɩwaatʋ ndʋ tɩ-taa pɩwɛɛ se ŋtaasɔɔ se ŋtaa Yehowa liu mbʋ pʋyɔɔ yɔ, ɛnʋ yekina se ɖɩpɩzɩ nɛ ɖɩla tʋma wena payɩ ɛɖʋʋ-ɖʋ yɔ.»
Jacob Rumph nɛ ɛ-halʋ Inga
Palʋlɩ Koobu Rumph Kalifɔrnii tɛtʋ taa, Etaazuunii ɛjaɖɛ. Ɛ-pɩjatʋ taa, e-ɖoo kaahɛ fezuu taa. Paa mbʋ yɔ, ɛñaɣ pana nɛ ɛwɩlɩ-ɩ Bibl taa toovenim tɔm. Pɩtasɩ lɛ, e-neze kaakɛ Yehowa Aseɣɖe Tʋ nɛ paa pɩnaɣ ŋga lɛ, Koobu Rumph wokaɣ nɛ ekilimiɣ ɛ-yɔɔ. E-neze sɩnɩ-ɩ nɛ e-liu tɛɛ kɔtɩnɩ Bibl taa toovenim tɔm nɛ pɩkɩlɩ, nɛ ɛɛwɛnɩ pɩnzɩ 13 lɛ, ɛ-maɣmaɣ ɛpɔzɩ se pɛkpɛlɩkɩnɩ-ɩ Bibl. Ɛha ɛ-tɩ nɛ pamɩyɩsɩ-ɩ lɩm 27 septembre 1992 wiye; alɩwaatʋ ndʋ lɛ, ɛɛkɛ pɩɣa evelaɣ. Taa leleŋ tɔm lɛ se e-ɖoo ɖaɣnɩ paɣzʋʋ tɔm susuu nɛ kediɣzisi wobu. Ɛ-hɔʋ taa mba lalaa ɖɔɖɔ paɣzɩ ɖɛʋ nɛ ɛsɩndaa fezuu taa nɛ paha pa-tɩ nɛ pamɩyɩsɩ-wɛ lɩm.
Koobu Rumph evebitu taa, ɛɛna ɛzɩma nʋmɔʋ lɩzɩyaa kaawɛ taa leleŋ taa yɔ. Pʋyɔɔ ɛtɛm liisee sukuli lɛ, ɛpaɣzɩ paa ɖooye nʋmɔʋ lɩzʋʋ tʋmɩyɛ, pɩɩkɛ septembre 1995 taa. Pɩpɔzaɣ tɔm susuyaa Ekʋwatɛɛrɩ ɛjaɖɛ taa nɛ pɩkɩlɩ, pʋyɔɔ ɛkʋyaa nɛ ewolo peeɖe pɩnaɣ 2000 taa se ɛɖʋ nesi tɔm susuu tʋmɩyɛ. Peeɖe ɛkatɩ koobu halɩñɩnʋ nɔɔyʋ, payaɣ-ɩ se Inga, ɛlɩnɩ Kanadaa ɛjaɖɛ taa, nɛ ɛɛkɛ nʋmɔʋ lɩzɩyʋ; nɛ ɛ nɛ ɩ pɔɖɔkɩ nesi pʋwayɩ. Pe-nesi ɖɔkʋʋ wayɩ lɛ, powolo Ekʋwatɛɛrɩ ɛjaɖɛ taa tɛtʋ natʋyʋ taa nɛ paɖʋ nesi ɛgbɛyɛ cikpeɖe naɖɩyɛ. Tɔm susuyaa pazɩ yem kaawɛnɩ ɖɩ-taa, ɛlɛ sɔnɔ tɔm susuyaa sakɩyɛ wɛnɩ ɛgbɛyɛ nɖɩ ɖɩ-taa.
Alɩwaatʋ wɛɛ nɛ tɩɖɛɣ lɛ, Koobu Rumph nɛ ɛ-halʋ papɩsɩ nʋmɔʋ lɩzɩyaa kiya, nɛ pʋwayɩ pala egeetiye yɔɔ cɔnʋʋ tʋmɩyɛ. Pɩnaɣ 2011 taa, paya-wɛ se pala Galaadɩ sukuli, pɩɩkɛ ɖaŋ 132 ñɩŋgʋ. Pɛcɛlɩ-wɛ Galaadɩ sukuli takayɩsɩ lɛ, pala Ɛsɔ sɛtʋ tʋma ndɩ ndɩ ajɛɛ 5 taa. Palabɩ Betɛɛlɩ tʋmɩyɛ, Ɛsɔtɔm tiyiyu tʋmɩyɛ nɛ egeetiye yɔɔ cɔnʋʋ tʋmɩyɛ. Koobu Rumph hiɣ waɖɛ ɖɔɖɔ nɛ ɛkɛ wɩlɩyʋ Kewiyaɣ tɔm susuyaa sukuli taa.
COVID-19 yɔɔ lɛ, Koobu Rumph nɛ ɛ-halʋ papɩsɩ Etaazuunii ɛjaɖɛ taa. Papɩsɩ peeɖe lɛ, payaa-wɛ Wallkill Betɛɛlɩ taa, nɛ peeɖe pafalɩsɩ Koobu Rumph ɛgbɛyɛ piliŋa hɔɔlʋʋ ŋgʋ kɩcɔŋnɩ Ɛsɔ sɛtʋ tʋmɩyɛ yɔɔ yɔ kɩ-taa. Pɩtɛmnaa se paɖaɣnɩ-wɛ tiyinuu Ekʋwatɛɛrɩ ɛjaɖɛ taa, nɛ Koobu Rumph lakɩ tʋmɩyɛ ɛgbɛyɛ piliŋa kɔɔmitee taa. Pɩnaɣ 2023 taa lɛ, powoni-wɛ Warwick. Janvier 2024 taa, palɩzɩ Koobu Rumph se ɛkɛ sɩnɩyʋ Ɛsɔ sɛtʋ tʋmɩyɛ kɔɔmitee taa. Ɛmaɣzɩ ɖenɖe ɛlabɩ ɛ-Ɛsɔ sɛtʋ tʋma yɔ pɩ-yɔɔ lɛ, ɛyɔɔdɩ se: «Pɩtɩkɛ ɖenɖe ŋlakɩ tʋmɩyɛ naɖɩyɛ yɔ, mbʋ yekina se ɖɩwɛɛ ŋgee, ɛlɛ ɛyaa mba ña nɛ wɛ ɩlakɩ tʋmɩyɛ nɖɩ yɔ mba yekina se ɖɩwɛɛ ŋgee.»
Ða-taa wɛ leleŋ nɛ tʋmɩyɛ sɔsɔɖɛ nɖɩ koobiya panɛ palakɩ yɔ, nɛ ‘ɖiwoki pɩ-yɔɔ nɛ ɖɩsɔɔlʋʋ ɛyaa mba pɛwɛ ɛzɩ mba yɔ.’—Filp. 2:29.