Ɛzɩma Bibl pɩzɩɣ nɛ kɩsɩnɩ ɛyʋ nɛ ɛlʋbɩnɩ nɩɣzɛ
Ŋpɩzɩɣ nɛ ŋmaɣzɩ se weyi ɛwɛ nɩɣzɛ taa yɔ,a ɛnʋ lɛ weyi sɔɔndʋ kpaɣ-ɩ nɛ nabʋyʋ yɔ, weyi pɩwɛ-ɩ kaɖɛ se ɛkʋyɩ tanaŋ tɛɛ yɔ yaa weyi ɛyɔɔdʋʋ kala wena a-taa ɛwɛɛ yɔ a-tɔm paa ɛzɩmtaa yɔ.
Pɩkɛ toovenim se mbʋ pɩlakɩ nabɛyɛ alɩwaatʋ ndʋ pɛwɛɣ nɩɣzɛ taa yɔ. Ɛlɛ lɔŋsɩnɖaa nabɛyɛ ñɩnaa nɛ pana se nabʋyʋ taa lɛ, ɖoŋ weyi nɩɣzɛ wɛnɩ kɔzɩ kɔzɩ abalaa yɔɔ yɔ, ɩwɛ ndɩ. Takayaɣ nakɛyɛ yɔɔdaa se abalaa “pɩzɩɣ nɛ pɔñɔɔ sʋlʋm yaa tabakʋʋyaɣ se palʋbɩnɩ nɩɣzɛ. Pʋyɔɔ lɛ, weyi ɛ-wɛtʋ wɩlɩɣ se ɛkɛ sʋlʋm kpaŋɩyʋ yɔ, toovenim taa lɛ, pɩpɩzɩɣ nɛ pɩla se nɩɣzɛ wɛna nɛ pɩcɛyɩɣ-ɩ. Nɛ abalaa mba pɛwɛɛ nɛ palʋkɩnɩ nɩɣzɛ yɔ, ɖoŋ ɖoŋ lɛ, pɔkɔʋ pana yaa pɩwɩzɩɣ-wɛ lɛɛ lɛɛ.”
Toovenim, pɩtɩkɛ mbʋ pɩlakɩ abalaa tɩŋa. Ɛlɛ paa pɩtɩɩkɛ suwe yɔ, ɛyaa mba pɛwɛɛ nɛ palʋkɩnɩ nɩɣzɛ ‘alɩwaatʋ kaɖɛ ñɩndʋ tʋnɛ, ndʋ tɩ-lʋbɩnʋʋ wɛ kaɖɛ yɔ,’ tɩ-taa yɔ pɛwɛɛ nɛ pɔɖɔʋ ɖɔʋ yɔɔ. (2 Timootee 3:1) Ye ŋwɛɛ nɛ ŋlʋkɩnɩ nɩɣzɛ yɔ, Bibl pɩzɩɣ nɛ kɩsɩnɩ-ŋ?
Bibl lɔŋ tasʋʋ kɩbam mbʋ pɩsɩɣnɩ ɛyʋ se ɛlʋbɩnɩ nɩɣzɛ yɔ
Lɔŋ kɩbaŋ sakɩyɛ wɛ Bibl taa nɛ ɩpɩzɩɣ nɛ ɩsɩnɩ-ɖʋ ye ɖɩwɛ nɩɣzɛ taa yɔ. Ɩtaa naadozo yɔ:
1. “Ɩtaanɩɣzɩ cee yɔɔ kpa, mbʋ pʋyɔɔ yɔ cee kaɣ wɛnʋʋ kɩ-maɣmaɣ kɩ-nɩɣzɛ. Paa evemiye nɖɩ lɛ, ɖɩ nɛ ɖɩ-maɣmaɣ ɖɩ-kʋñɔmɩŋ.”—Maatiyee 6:34.
Pɩ-tɔbʋʋ se: Ðɩwɩlɩɣ se ɖɩwɛ lɛɣtʋ ye ɖɩɩkɩlɩɣ maɣzʋʋ mbʋ pɩpɩzɩɣ nɛ pɩla (yaa pɩtɩla pɩɩlakɩ) cee wayɩ yɔ pɩ-yɔɔ. Ðoŋ ɖoŋ lɛ, kaɖɛ wɛtʋ ndʋ ɖɩmaɣzɩɣ se pɩtɩla tɩkaɣ-ɖʋ talʋʋ yɔ, tɩɩkɔŋ ɖɔ-yɔɔ. Halɩ nabʋyʋ taa pɩpɩzɩɣ pɩlɛɣzɩ kpɛlɩ nɛ pɩhɛzɩ ɖa-laŋɩyɛ kɩhɛzʋ.
Labɩnɩ tʋmɩyɛ lɔŋ tasʋʋ pʋnɛ nɛ ŋna: Tɔzɩ alɩwaatʋ ndʋ pɩlakaɣ-ŋ ɛzɩ paa pɩɩla ɛzɩma kaɖɛ naɖɩyɛ kaɣ-ŋ talʋʋ ɛlɛ pɩtɩla mbʋ yɔ, tɩ-yɔɔ nɛ ŋna. Pʋwayɩ lɛ, maɣzɩ nɩɣzɛ wena ŋwɛnɩ sɔnɔ yɔ a-yɔɔ nɛ ŋñaɣ pana siŋŋ nɛ ŋna se toovenim lɛ, akaɣ pɩsʋʋ kala sɔsɔna yaa we.
2. “Ñɩɣyʋʋ sayɩɣ ñɩɣyʋʋ mbʋ ɖɔɖɔ ɛyʋ sayɩɣ ɛ-ɛgbaɣdʋ ɛsɩndaa”—Aduwa 27:17.
Pɩ-tɔbʋʋ se: Ɛyaa lalaa pɩzɩɣ nɛ pasɩnɩ-ɖʋ nɛ ɖɩlʋbɩnɩ nɩɣzɛ ye ɖɩha-wɛ waɖɛ yɔ. Papɩzɩɣ nɛ patɩŋnɩ mbʋ pɩtalɩ-wɛ pe-wezuu caɣʋ taa yɔ pɩ-yɔɔ nɛ patasɩ-ɖʋ lɔŋ kɩbaŋ. Paa pɩkɩlaa yɔ, pɩtʋʋ fɛyɩ se pakaɣ-ɖʋ sɩnʋʋ nɛ ɖɩwɛɛnɩ maɣzɩm mbʋ pɩmʋnaa yɔ wɛtʋ ndʋ ɖɩwɛ tɩ-taa yɔ tɩ-yɔɔ.
Labɩnɩ tʋmɩyɛ lɔŋ tasʋʋ pʋnɛ nɛ ŋna: Maɣzɩ nɛ ŋna se apɩzɩɣ nɛ ɛtasɩ-ŋ lɔŋ kɩbaŋ. Pɩtɩla pɩpɩzɩɣ nɛ pɩkɛ ña-taabalʋ weyi ɛɛkatɩ ɖɔɖɔ kaɖɛ nɖɩ ɖɩ-taa ŋwɛɛ yɔ. Pɔzɩ-ɩ nɛ eheyi-ŋ mbʋ ɛlakaɣ nɛ pɩsɩɣnɩ-ɩ yaa mbʋ ɛlakaɣ nɛ pɩtɛzɩɣ-ɩ labʋ kaɖɛ yɔ.
3. “Ɩɖʋzɩ mɩ-nɩɣzɛ kpeekpe e-nesi tɛɛ, mbʋ pʋyɔɔ yɔ ɛcɔŋnɩ mɩ-yɔɔ.”—1 Pɩyɛɛrɩ 5:7.
Pɩ-tɔbʋʋ se: Ɛsɔ maɣzɩɣ mba pɛwɛ kʋñɔŋ taa yɔ pɔ-yɔɔ siŋŋ. Eseɣtiɣ-ɖʋ se ɖɩtɩmnɩ-ɩ pɩlɩɩnɩ mbʋ payɩ pɩcɛyɩɣ ɖa-maɣzɩm yɔ pɩ-yɔɔ.
Labɩnɩ tʋmɩyɛ lɔŋ tasʋʋ pʋnɛ nɛ ŋna: Yʋsɩ mbʋ mbʋ payɩ pɩhaɣ-ŋ nɩɣzɛ yɔ. Pʋwayɩ lɛ ŋtɩmnɩ Ɛsɔ nɛ ŋheyi-i pɩ-taa paa mbʋ lɛ pɩ-tɔm nɛ ŋpɔzɩ-ɩ se ɛsɩnɩ-ŋ.
Alɩwaatʋ ndʋ nɩɣzɛ ɛɛkaɣ tasʋʋ wɛʋ yɔ
Pɩtɩkɛ ɛzɩma ɖɩlʋbɩnɩ nɩɣzɛ yɔ pɩ-tɔm ɖeke Bibl yɔɔdʋʋ. Kɩhaɣ ɖɔɖɔ lidaʋ se piileɖiɣ lɛ, nɩɣzɛ wena a-taa ɖɩwɛ sɔnɔ yɔ aatasɩɣ wɛʋ. Ɛzɩma pɩkaɣ labʋ mbʋ?
Ɛsɔ Kewiyaɣ kaɣ ɖɩzʋʋ mbʋ payɩ piyeki nɛ ɛyʋ sʋʋ nɩɣzɛ taa yɔ. (Natʋ 21:4) Toovenim taa lɛ, Ɛsɔ Kewiyaɣ ŋga, ka-alɩwaatʋ talʋʋ lɛ, halɩ nɩɣzɛ nɛ ɛsɩñɩŋɩyɛ nɖɩ ɖɩ-taa ɖɩɩwɛɛ yɔ, ɖɩɩkaɣ pɩ-yɔɔ tɔzʋʋ nɛ pɩcɛyɩ-ɖʋ.—Izaayii 65:17.
Cee wayɩ kɩbaŋʋ kʋnɛ “Ɛsɔ weyi ɛhaɣ laŋhɛzɩyɛ yɔ” ɛsɔɔlaa se ŋhiɣ. (Roma mba 16:20) Eheyiɣ-ɖʋ lidaʋ tɔm tʋnɛ se: “Men-keem mansɩm maɣzɩm mbʋ mamaɣzɩɣ mɩ-yɔɔ yɔ, . . . laŋhɛzɩyɛ maɣzɩm, pɩtɩkɛ kʋñɔŋ wɩlʋʋ maɣzɩm, nɛ maha-mɩ liɖe nɛ lidaʋ.”—Yereemii 29:11.