Rusii wobi Ukrɛɛnɩ ɛjaɖɛ wayɩ

24 février 2022 wiye tanaŋ tɛ cu, Rusii sɔɔjanaa paɣzɩ labʋ you nɛ Ukrɛɛnɩ ɛjaɖɛ, paa ajɛɛ lɛɛna ñʋndɩnaa sakɩyɛ kaañaɣ pana se you ŋgʋ kɩtaala yɔ. Ðoŋ weyi you ŋgʋ kɩpɩzɩɣ nɛ kɩwɛɛnɩ ɛjaɖɛ kpeekpe yɔɔ? António Guterres kɛnɩ ɛjaɖɛ kɩgbɛndʋʋ ɛgbɛyɛ nɖɩ payaɣ se ONU yɔ ɖɩ-takayaɣ taa mayʋ. Kɩyakɩŋ pazɩ pʋcɔ nɛ you ŋgʋ kɩpaɣzɩɣ lɛ, ɛyɔɔdaa se: “Halɩ you kʋnɛ kɩkaɣ kɔnʋʋ wɩzasɩ nɛ kɩwɛɛkɩ wondu siŋŋ, nɛ kɩkaɣ wɛnʋʋ ɖoŋ Erɔɔpɩ ajɛɛ pɛɛyɛ nɛ ɛjaɖɛ kpeekpe pɛɛyɛ yɔɔ nɛ pɩcɛzɩ ɛzɩ ɖɩmaɣzɩɣ yɔ.”

Ɛzɩ Bibl yɔɔdʋʋ yɔ, wɛtʋ ɛzɩ tʋnɛ yɔ tɔbʋʋ lɛ suwe?

• Yesu Krɩstʋ kaayɔɔdaa se alɩwaatʋ natʋyʋ kaɣ kɔm nɛ tɩ-taa lɛ, “ɛjaɖɛ lɛɛɖɛ kaɣ kʋyʋʋ ɛjaɖɛ lɛɛɖɛ yɔɔ, nɛ kewiyaɣ lɛɛka kaɣ kʋyʋʋ kewiyaɣ lɛɛka yɔɔ.” (Maatiyee 24:7) Kalɩ tɔm ñʋʋ “Quel est le signe des « derniers jours» ?” nɛ ŋna ɛzɩma Bibl wɩlɩɣ se yoŋ weyi ɩwɛɛ nɛ ɩlakɩ sɔnɔ yɔ, ɩwɩlɩɣ se natʋ tɔm ndʋ Yesu yɔɔdaa yɔ ndʋ wɛna nɛ tɩlakɩ yɔ.

• Bibl taa Natʋ takayaɣ kpaɣ you nɛ kamaɣzɩnɩ kpaŋnʋ caɣyʋ weyi ɛcaɣ kpaŋnʋ weyi “ɛsɛwa ɛzɩ miŋ yɔ” ɛ-yɔɔ nɛ ɛlɩzɩɣ “laŋhɛzɩyɛ tɛtʋ yɔɔ” yɔ. (Natʋ 6:4) Kalɩ tɔm ñʋʋ “Kpaŋnaŋ caɣyaa naanza—Mba pɛkɛnaa?” nɛ ŋna ɛzɩma natʋ tɔm tʋnɛ tɩlabɩ nɔɔ kʋɖʋmaɣ nɛ yoŋ weyi ɩwɛɛ nɛ ɩlakɩ sɔnɔ yɔ.

• Danɩyɛɛlɩ takayaɣ kaayɔɔdaa se “hayo kiŋ wiyaʋ” nɛ “hadɛ kiŋ wiyaʋ” pakaɣ ɖama kaɖɩnʋʋ. (Danɩyɛɛlɩ 11:25-45) Cɔnɩ video Natʋ tɔm ndʋ tɩlaba yɔ—Danɩyɛɛlɩ ñʋʋ 11 nɛ ŋna mbʋ pʋyɔɔ ɖɩpɩzɩɣ nɛ ɖɩyɔɔdɩ se Rusii nɛ ajɛɛ wena aɖʋʋ-kʋ nesi yɔ pɛkɛ hayo kiŋ wiyaʋ yɔ.a

• Natʋ takayaɣ yɔɔdʋʋ ɖɔɖɔ “Ɛsɔ Ðoŋ Tɩŋa Tʋ tɛ kɩyakʋ sɔsɔʋ you” tɔm. (Natʋ 16:14, 16) Ɛlɛ you ŋgʋ, kɩtɩkɛ yoŋ weyi ɩlakɩ ajɛɛ hɛkɩŋ taa ɛzɩ ɖɩnaɣʋ sɔnɔ yɔ. Kalɩ tɔm ñʋʋ “Qu’est-ce que la bataille d’Armaguédon ?” nɛ ŋtɩlɩ cee wayɩ you ŋgʋ kɩ-yɔɔ tɔm lɛɛtʋ.

Ɛbɛ yɔɔ ŋpɩzɩɣ nɛ ŋwɛɛnɩ lidaʋ cee wayɩ yɔɔ?

• Bibl yɔɔdʋʋ se Ɛsɔ kaɣ sɩnzʋʋ “yoŋ tɩŋa piwolo pɩtalɩ tɛtʋ kamaɣ yɔɔ.” (Keɣa 45:10) Kalɩ tɔm ñʋʋ “Une espérance réelle pour des jours meilleurs” nɛ ŋtɩlɩ cee wayɩ lidaʋ kɩbaŋʋ ŋgʋ Ɛsɔ labɩ-ɖʋ yɔ kɩ-yɔɔ tɔm nɛ pɩkpaɖɩ.

• Yesu heyi ɛ-wayɩ tɩŋɩyaa se patɩmɩ se Ɛsɔ Kewiyaɣ ɛkɔɔ. (Maatiyee 6:9, 10) Kewiyaɣ ŋga, kɛkɛ ɛsɔdaa komina ŋgʋ kɩkaɣ yebu nɛ Ɛsɔ sɔɔlɩm la tɛtʋ yɔɔ yɔ; mbʋ Ɛsɔ sɔɔlaa se pɩla yɔ pɩ-taa lɛɛbʋ lɛ se laŋhɛzɩyɛ ɛwɛɛ ɛjaɖɛ kpeekpe yɔɔ. Pɩsa nɛ ŋna ɛzɩma Kewiyaɣ ŋga kapɩzɩɣ nɛ kawazɩ-ŋ lɛ, cɔnɩ video Ɛbɛ Ɛsɔ Kewiyaɣ kɛnaa?

Yehowa Aseɣɖe Tɩnaa mba pɛwɛ Ukrɛɛnɩ ɛjaɖɛ taa yɔ, pɛcɛzɩ 129 000 yɔɔ. Ɛzɩ Yehowa Aseɣɖe Tɩnaa mba pɛwɛ ajɛɛ lɛɛna kpeekpe taa yɔ, pamaɣzɩɣnɩ Yesu nɛ paaɖʋʋ pɔ-nɔɔ politiki tɔm taa nɛ pekiziɣ ɖɔɖɔ se paalakɩ you. (Yohanɛɛsɩ 18:36) Ɛjaɖɛ kpeekpe yɔɔ, Yehowa Aseɣɖe wɛɛ nɛ powoki pɩ-yɔɔ nɛ posusuu “Kewiyaɣ tɔm kɩbandʋ” nɛ pawɩlɩɣ se Kewiyaɣ ŋga kakaɣnɩ yebu nɛ ɛyaa kʋñɔmɩŋ sɩɩ tɩnaɣ, pɩkpɛndɩnɩ yoŋ. (Maatiyee 24:14) Ðiseɣtiɣ-ŋ se ŋyaa-ɖʋ ye ŋsɔɔlaa se ŋtɩlɩ Bibl taa lidaʋ tɔm nɛ pɩkpaɖɩ yɔ.