Kʋyʋʋ ɖʋyaa—Ɛyaa miiliyɔɔwaa sakɩyɛ se Ukrɛɛnɩ ɛjaɖɛ taa

Rusii paɣzɩ yonuu Ukrɛɛnɩ ɛjaɖɛ 24 février 2022 wiye. Piyeba nɛ ɛyaa miiliyɔɔwaa sakɩyɛ weziŋ sʋʋ kaɖɛ taa nɛ pɛwɛɛ nɛ pañakɩ pana se pese lɛɛ lɛɛ nɛ palɩɩ ɛjaɖɛ nɖɩ ɖɩ-taa.a

“Bɔmbɩwaa tɔwaɣ nɛ panɩɣ pa-taŋ paa le. Pɩɩwɛ sɔɔndʋ kpem, maasɩŋ tɔm pee wena ɖeyi ɖeyi pɩwɛɛ se malabɩnɩ tʋmɩyɛ nɛ mɛnkɛdɩ mbʋ pɩlakaɣ yɔ. Ðɩnɩwa se sulukiŋ nɩɩyɩ wɛɛ se ɛyaa pɩzɩɣ nɛ pasʋʋ-ɩ nɛ palɩɩ ɛjaɖɛ taa lɛ, ɖɩkpaɣ lɩmaɣzɩyɛ se ɖɩɖɛɣ. Pɩɩwɛɛ se ɖiyele pɩtɩŋa nɛ ɖa-wayɩ mbʋ pʋyɔɔ yɔ, huyuu cikpeluu nakʋyʋ pɩɩwɛɛ se paa weyi ɛɖɔkɩ. Takayɩsɩ, kɔ, lɩm nɛ mbʋ ɖɩɩpɛɖɩ ɖɔ-nɔɔ taa yɔ, pi-ɖeke ɖɩpɩzaa nɛ ɖɩkpaɣ. Ðiyebi pɩtɩŋa nɛ ɖa-wayɩ nɛ ɖise ɖiwolo sulukiŋ ɖɩzɩŋɩyɛ, paa paawɛɛ nɛ pɔtɔʋ bɔmbɩwaa yɔ.”—Nataliia, ɛlɩnɩ Kharkiv, Ukrɛɛnɩ ɛjaɖɛ taa.

“Ðɩtaamaɣzɩ se toovenim taa lɛ, you kaɣ labʋ. Tuda lɛ, manpaɣzɩ nɩʋ bɔmbɩwaa taŋ tɛtʋ hɔɔlɩŋ nɩɩyɩ taa. Nɛ mondoɖebɔŋ ñamsaɣ. Mankpaɣ lɩmaɣzɩyɛ se mɛnɖɛɣ, mbʋ pɩ-tɔm kaakɩlɩ cɛyʋʋ yɔ pi-ɖeke koŋ mankpaɣaa. Malɩ ɖɩɣa tanaŋ tɛɛ ñɩɣtʋ 8 yɔɔ, mansʋʋ suluku se mowolo Lviv nɛ pʋwayɩ lɛ, mansʋʋ lɔɔɖɩyɛ nɛ mɛnɖɛɛ Pɔlɔɔñɩ.”—Nadija, ɛlɩnɩ Kharkiv, Ukrɛɛnɩ ɛjaɖɛ taa.

Tɔm ñʋʋ kʋnɛ kɩ-taa

• Ɛbɛ ɖeyi ɖeyi yeba nɛ pɩpɔzɩ se ɛyaa ise nɛ paɖʋ kʋyʋʋ?

• Le kʋyʋʋ ɖʋyaa pɩzɩɣ nɛ pehiɣ lidaʋ?

• Ɛzɩ Bibl pɩzɩɣ nɛ kɩsɩnɩ kʋyʋʋ ɖʋyaa sɔnɔ?

Ɛbɛ ɖeyi ɖeyi yeba nɛ pɩpɔzɩ se ɛyaa ise nɛ paɖʋ kʋyʋʋ?

Ɛyaa paɣzɩ seu nɛ palɩɣ Ukrɛɛnɩ ɛjaɖɛ taa mbʋ pʋyɔɔ yɔ, Rusii sɔɔjanaa woba nɛ papaɣzɩ ɛjaɖɛ nɖɩ yonuu. Ɛlɛ Bibl yɔɔdʋʋ lɩmaɣza sɔsɔna lɛɛna wena ayeki nɛ ɛyaa seɣ se paɖʋ kʋyʋʋ yɔ a-tɔm:

• Ɛyaa kominawaa mba pɛwɛ ɛjaɖɛ kpeekpe yɔɔ yɔ, paapɩzɩɣ nɛ pahaɣ ɛyaa mbʋ pɩpɔzʋʋ-wɛ yɔ. Ðoŋ ɖoŋ lɛ, kominawaa ñʋndɩnaa tɩŋɩɣnɩ ɖoŋ weyi pɛwɛna yɔ ɩ-yɔɔ nɛ panazɩɣ lalaa.—Eklesɩyastɩ 4:1; 8:9.

• Sataŋ Eleeu, “ɛjaɖɛ ñʋʋdʋ” wɛnɩ ɖoŋ kɩdɛkɛdɩŋ siŋŋ ɛyaa yɔɔ nɛ halɩ Bibl tɔm se: “ɛjaɖɛ kpeekpe wɛ kañatʋ tʋ nesi taa.”—Yohanɛɛsɩ 14:30; 1 Yohanɛɛsɩ 5:19.

• Ɛyaa wɛɛ nɛ pakatɩɣ kala pɩlakɩ pɩnzɩ mɩnɩŋ sakɩyɛ yɔ. Pɩtasɩnɩ kala ana lɛ, ɖɩwɛ alɩwaatʋ ndʋ tɩ-taa yɔ, Bibl kaayɔɔdɩ tɩ-tɔm nɛ kɩtɔ se: “Kɛdɛzaɣ kɩyakɩŋ taa lɛ, alɩwaatʋ kaɖɛ ñɩndʋ ndʋ, tɩ-lʋbɩnʋʋ wɛɣ kaɖɛ.” (2 Timootee 3:1) Mbʋ pɩwɩlɩɣ se ɖɩwɛ kɛdɛzaɣ kɩyakɩŋ taa yɔ, mbʋ lɛ yoŋ, ñɔɔsɩ, asɛyɩŋ nɛ kʋdɔmɩŋ sɔsɔŋ. Wɛtʋ ndʋ tiyekina nɛ ɛyaa seɣ nɛ peyeki pa-ɖɩsɩ.”—Luka 21:10, 11.

Le kʋyʋʋ ɖʋyaa pɩzɩɣ nɛ pehiɣ lidaʋ?

Bibl wɩlɩɣ se ɖa-Lɩzɩyʋ Yehowab kɛ Ɛsɔ weyi ɛsɔɔlɩ kʋyʋʋ ɖʋyaa nɛ ɛyaa mba peseɣ nɛ peyeki pa-ɖɩsɩ yɔ, nɛ ɛnaɣ pa-pʋtɔdɩyɛ. (Wayɩ Wayɩ Paɣtʋ 10:18) Ɛlabɩ tamaɣ se ɛkaɣ tɩŋnʋʋ komina ŋgʋ ɛɖʋ ɛsɔdaa yɔ kɩ-yɔɔ nɛ eyele nɛ kʋyʋʋ ɖʋyaa nɛ ɛyaa mba peseɣ nɛ peyeki pa-ɖɩsɩ yɔ pa-kala sɩɩ tɩnaɣ. Komina ŋgʋ payaɣ se Ɛsɔ Kewiyaɣ, nɛ ŋgʋ kaɣnɩ lɛɣzʋʋ ɛyaa kominawaa lone taa. (Danɩyɛɛlɩ 2:44; Maatiyee 6:10) Yehowa kaɣ tɩŋnʋʋ e-Kewiyaɣ yɔɔ nɛ ɛɖɩzɩ Sataŋ Eleeu. (Roma mba 16:20) Kewiyaɣ ŋga, kakaɣ ɖiyuu tɛtʋ kpeekpe, nɛ kakaɣ yebu tayʋʋ mbʋ politiki lakasɩ kɔnaa yɔ, pɩsɩɩ tɩnaɣ. Ɛyaa kaɣ pɩsʋʋ ɛjaɖɛ kpeekpe yɔɔ hɔʋ kʋɖʋmʋʋ taa ñɩma. Pɩɩkaɣ tasʋʋ pɔzʋʋ se nɔɔyʋ ese nɛ ɛlɩɩ ɛ-ɖɩɣa, mbʋ pʋyɔɔ yɔ Bibl labɩ tamaɣ se: “Nɛ paa weyi lɛ ɛkaɣ caɣʋ e-viiñi taa nɛ e-hiyuu tɛɛ, nɛ nɔɔyʋ ɛɛkaɣ-ɩ tɔm caʋ; mbʋ yɔ yoyaa kpeekpe [Yehowa] yɔɔdaa.”—Mikee 4:4.

Ɛsɔ Kewiyaɣ ɖeke pɩzɩɣna nɛ keyele nɛ kala wena payɩ kʋyʋʋ ɖʋyaa katɩɣ yɔ, asɩɩ tɩnaɣ tam. Yehowa kaɣ tɩŋnʋʋ e-Kewiyaɣ yɔɔ nɛ eyele nɛ mbʋ piyeki nɛ ɛyaa seɣ se paɖʋ kʋyʋʋ yɔ pɩsɩɩ tɩnaɣ. Kɩɖaŋ nɩɩyɩ yɔ:

• Yoŋ. ‘Yehowa sɩnzɩɣ yoŋ tɩŋa.’ (Keɣa 45:10) Pɩsa nɛ ŋtɩlɩ ɛzɩma Ɛsɔ kaɣ yebu se yoŋ ɩsɩɩ tɩnaɣ lɛ, kalɩ tɔm ñʋʋ “La paix dans le monde : comment sera-t-elle établie ?”

• Nazɩm nɛ puuyaɣ lakasɩ. Yehowa lɩzɩɣ-wɛ “puuyaɣ tʋ weyi ɛnazɩɣ-wɛ yɔ e-nee tɛɛ.” (Keɣa 71:14) Pɩsa nɛ ŋtɩlɩ ɛzɩma ɛyaa pɩzɩɣ nɛ pɛlɛɣzɩ wɛtʋ ndʋ tɩmalɩnɩ-wɛ siŋŋ yɔ lɛ, kalɩ tɔm ñʋŋ cikpeŋ weyi ɩwɛ tɔm ñʋʋ “Ðɩpɩzɩɣ ɖiyele nɛ paɖɩyɛ sɩɩ tɩnaɣ” tɛɛ yɔ.

• Kʋñɔndʋtʋ. ‘Ɛjam weyi ɛyaɣ yɔ, Yehowa holuu-i’ (Keɣa 71:12) Pɩsa nɛ ŋtɩlɩ ɛzɩma Ɛsɔ kaɣ yebu nɛ mbʋ pɩkɔŋnɩ kʋñɔndʋtʋ yɔ pɩsɩɩ tɩnaɣ lɛ, kalɩ tɔm ñʋʋ “Wiɖiyi Ɛyaa tɩŋa kaɣ wɛnʋʋ liidiye kɩmaŋ na?”

• Tɔɔnaɣ kɛdɛɖaɣ. ‘Tɔɔnasɩ kaɣ tɔyʋʋ ɛjaɖɛ taa.’ (Keɣa 71:16) Pɩsa nɛ ŋtɩlɩ ɛzɩma Ɛsɔ kaɣ yebu nɛ ñɔɔsɩ sɩɩ tɩnaɣ lɛ, kalɩ tɔm ñʋʋ “Plus jamais la faim dans le monde?”

Ɛzɩ Bibl pɩzɩɣ nɛ kɩsɩnɩ kʋyʋʋ ɖʋyaa sɔnɔ?

Ɛɛɛ. Pɩtasɩna se Bibl haɣ kʋyʋʋ ɖʋyaa cee wayɩ lidaʋ kɩbaŋʋ lɛ, kɩpɩzɩɣ kɩsɩnɩ-wɛ nɛ palʋbɩnɩ kala wena pakatɩɣ lɛɛlɛɛyɔ yɔ.

Bibl paɣtʋ kiɖe: “Ɩtaanɩɣzɩ nabʋyʋ yɔɔ, ɛlɛ paa mbʋ pɩ-taa lɛ, ɩtɩŋnɩ adɩma nɛ tenduu yɔɔ, pɩkpɛndɩnɩ sɛtʋ nɛ iyele nɛ Ɛsɔ tɩlɩ mbʋ ɩpɔzʋʋ yɔ; nɛ Ɛsɔ tɛ laŋhɛzɩyɛ nɖɩ ɖɩcɛzɩ tɔm taa nɩʋ lɛɣtʋ tɩŋa yɔ, ɖɩkaɣ ɖaŋʋʋ mɩ-laŋa nɛ mɩ-maɣzɩm pɔ-yɔɔ pɩtɩŋnɩ Krɩstʋ Yesu yɔɔ.”—Filiipi mba 4:6, 7.

Pʋ-tɔbʋʋ: Pɔzɩ Ɛsɔ se ɛha-ŋ laŋɩyɛ nɛ maɣzɩm taa laŋhɛzɩyɛ paa wɛtʋ ndʋ taa ŋtɩɩwɛɛ yɔ. Kalɩ tɔm ñʋʋ “Philippiens 4:6, 7 : ‘Ne vous inquiétez de rien’”