Ɛsɔ sɛtʋ nɛ Ukrɛɛnɩ you—Suwe Bibl yɔɔdʋʋ?

Na lɩmaɣza wena Ɛsɔ sɛtʋ ñʋndɩnaa wɛnɩ Ukrɛɛnɩ you yɔɔ yɔ:

• “Kirill kɛ Rusii orthodoxe cooci ñʋʋdʋ, nɛ ɛtɩyɔɔdɩ tɔm natʋyʋ nɛ tɩkaɖɩɣnɩ you ŋgʋ Rusii wɛɛ nɛ kɩlakɩnɩ Ukrɛɛnɩ ɛjaɖɛ yɔ. . . . Ɛ-cooci wɛɛ nɛ kisusuu cɛtɩm tɔm Ukrɛɛnɩ ɛjaɖɛ yɔɔ, nɛ Putin tɩŋnɩ tɔm ndʋ tɩ-yɔɔ nɛ ɛyɔɔdʋʋ se ɛnʋ wɛnɩ toovenim se ɛla you.”—EUobserver, 7 Mars 2022.

• “Kirill . . . yɔɔdɩ tɔm natʋyʋ nɛ tɩwɩlɩɣ se ɛ-ɛjaɖɛ wɛnɩ toovenim se ɖiyooni Ukrɛɛnɩ ɛjaɖɛ nɛ halɩ ɛtɔm se you ŋgʋ kiyeki se palʋbɩnɩ kɩdɛkɛdɩm labʋ.”—AP News, 8 Mars 2022.

• “Kiev tɛtʋ ñʋʋdʋ Épiphane 1^er kɛ Ukrɛɛnɩ orthodoxe cooci ñʋʋdʋ. Ɛwazɩ ɛ-samaɣ yɔɔ Hodo wiye se ‘kapɩzɩ nɛ koyooni Rusii sɔɔjanaa mba pɔkɔm pa-wayɩ yɔ’ . . . Ɛyɔɔdaa ɖɔɖɔ se pɩtɩkɛnɩ kɩwɛɛkɩm se pakʋ Rusii sɔɔjanaa.”—Jerusalem Post, 16 Mars 2022.

• “Ða [Ukrɛɛnɩ coocinaa nɛ Ɛsɔ sɛtʋ agbaa ñʋndɩnaa ɛgbɛyɛ (UCCRO)] ɖɩwɛ Ukrɛɛnɩ sɔɔjanaa nɛ mba payɩ palʋkɩ ɖɔ-yɔɔ yɔ pa-wayɩ, ɖɩwazɩ pɔ-yɔɔ se papɩzɩ nɛ pakaɖɩnɩ koyindu weyi ɛkɔm Ukrɛɛnɩ ɛjaɖɛ wayɩ yɔ, nɛ ɖɩtɩmɩɣ pɔ-yɔɔ.”—UCCROa yɔɔdɩnɩ-tʋ, 24 Février 2022.

Suwe ŋmaɣzɩɣ? Ɛzɩ pɩwɛɛ se Ɛsɔ sɛtʋ agbaa wena ayɔɔdʋʋ se atɩŋɩɣ Yesu Krɩstʋ wayɩ yɔ aseɣti a-taa ñɩma se pala you na? Suwe Bibl yɔɔdʋʋ?

Ɛsɔ sɛtʋ nɛ you caanaʋ taa

Caanaʋ taa tɔm wɩlɩɣ se Ɛsɔ sɛtʋ yɔɔdaɣ ɖoŋ ɖoŋ se ɛyaa pɩzɩɣ nɛ powolo you, pɩtɩwɛɛkɩ pʋyʋ se nɔɔyʋ ewolo you nɛ halɩ pɩcɛyaa se pala you nɛ pɩsa nɛ laŋhɛzɩyɛ kɔɔ. Pɩlakɩ pɩnzɩ hiŋ sakɩyɛ yɔ, Yehowa Aseɣɖe Tɩnaa kuli Ɛsɔ sɛtʋ tɛ pɩ-tɛɛ nɛ pɩ-yɔɔ lakasɩ nzɩ sɩ-yɔɔ. Iyele nɛ ɖɩyɔɔdɩ kɩɖaŋ nɩɩyɩ tɔm, ɩwɛ ɖa-takayɩsɩ taa.

• “Les croisades : une ‘illusion tragique’” wɩlɩɣ ɛzɩma Roma Katooliki cooci kaayeba nɛ pakʋ ɛyaa nɛ pɛwɛɛkɩ wondu sakɩyɛ Ɛsɔ nɛ Yesu pa-hɩɖɛ taa yɔ.

• “L’Église catholique en Afrique” yɔɔdɩ kaɖaʋ ŋgʋ kɩwɩlɩɣ se Ɛsɔ sɛtʋ tɩpɩzɩ nɛ tɩsɩnzɩ cejewe hɛkʋ taa yoŋ nɛ halɩ ɛyaa kʋʋ.

• Tɔm ñʋŋ “La religion est-elle responsable?,” “Le rôle de la religion dans les guerres,” nɛ “La religion prend parti” yɔɔdɩ ɛzɩma Katooliki, orthodoxe nɛ protestant coocinaa ñʋndɩnaa kaaɖʋ pe-nesi yoŋ sakɩyɛ taa nɛ pasɩnɩ koyindinaa mba poyouni ɖama yɔ pa-naalɛ yɔ.

Ɛzɩ pɩwɛɛ se Krɩstʋ mba Ɛsɔ sɛtʋ agbaa ɩɖʋ nesi you na?

Tɔm ndʋ Yesu wɩlaa yɔ: “Sɔɔlɩ ña-taabalʋ ɛzɩ ña-maɣmaɣ yɔ.” (Maatiyee 22:39) “Iwolo pɩ-yɔɔ nɛ ɩsɔɔlɩ mi-koyindinaa.”—Maatiyee 5:44-47.

Tɔm ndʋ Yesu yɔɔdaa yɔ: “Men-Kewiyaɣ tɩlɩɩnɩ ɛjaɖɛ ɖɩnɛ ɖɩ-yɔɔ. Ye men-Kewiyaɣ kaalɩnɩ ɛjaɖɛ ɖɩnɛ ɖɩ-yɔɔ yɔ, ma-lɩmɖʋyaa kaalʋba se pataakpa-m nɛ paɖʋzɩ Yuuda mba nesi tɛɛ.” (Yohanɛɛsɩ 18:36) “Mba pa-tɩŋa payɩ pakpakɩɣ laɣɖɛ lalaa yɔɔ yɔ, pakaɣ sɩbɩnʋʋ laɣɖɛ.” —Maatiyee 26:47-52.

Maɣzɩ tɔm tʋnɛ tɩ-yɔɔ: Ye pɩtaapɔzɩ se Krɩstʋ mba ɩla you nɛ pakandɩyɩ Yesu yɔ, ɛzɩ papɩzɩɣ nɛ pala you lɩmaɣzɩyɛ naɖɩyɛ yɔɔ? Kalɩ tɔm ñʋʋ “Peut-on concilier guerre et christianisme ?” nɛ ŋna ɛzɩma kajalaɣ Krɩstʋ mba kamaɣzɩnɩ Yesu kɩɖaʋ ɖeyi ɖeyi nɛ pɔɖɔ ɛ-wɩlɩtʋ yɔɔ yɔ.

Ɛbɛ kaɣ talʋʋ Ɛsɔ sɛtʋ agbaa wena aseɣtiɣ you labʋ yɔ?

Bibl wɩlɩɣ se Ɛsɔ paɖɩɣ Ɛsɔ sɛtʋ agbaa wena ayɔɔdʋʋ se amaɣzɩɣnɩ Yesu ɛlɛ aaɖɔŋ ɛ-wɩlɩtʋ yɔɔ yɔ.—Maatiyee 7:21-23; Tiiti 1:16.

• Natʋ takayaɣ wɩlɩɣ se Ɛsɔ ɛsɩndaa lɛ, Ɛsɔ sɛtʋ agbaa ana a-cɔlɔ “ɛyaa mba payɩ pakʋ-wɛ tɛtʋ yɔɔ yɔ” pa-sɩm lɩnaa. (Natʋ 18:21, 24) Pɩsa nɛ ŋna mbʋ pʋyɔɔ pɔyɔɔdɩ mbʋ lɛ, kalɩ tɔm ñʋʋ “Qu’est-ce que Babylone la Grande?”

• Yesu wɩlaa se Ɛsɔ sɛtʋ agbaa wena payɩ a-tɔm tɩkɛdɩnɩ Ɛsɔ yɔ, pakaɣ-yɛ ɖɩzʋʋ a-tʋma kɩdɛkɛda yɔɔ, ɛzɩ ‘pekeɖuu [tɩʋ kɩdɛkɛdʋʋ ŋgʋ kɩlʋlʋʋ pee kɩdɛkɛda] nɛ pañaɣzɩɣ miŋ yɔ. (Maatiyee 7:15-20) Kalɩ tɔm ñʋʋ “La fin de la fausse religion est proche!” nɛ ŋna ɛzɩma pɩkaɣ labʋ mbʋ yɔ.

Fotonaa, nɩmɩyɛ yɔɔ nɛ piwolo nɩwaŋ yɔɔ: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images