Ɛbɛ yɔɔ politiki labʋ kɔŋnɩ tayʋʋ ɛyaa hɛkʋ taa kpem mbʋ?—Suwe Bibl yɔɔdʋʋ?

Politiki labʋ kɔŋnɩ tayʋʋ ajɛɛ sakɩyɛ taa kedeŋa kpeekpe yɔɔ. Pɩnaɣ 2022 taa, ɛgbɛyɛ nɖɩ payaɣ se Pew Research Center yɔ, ɖɩlabɩ akɔnta nakʋyʋ ajɛɛ 19 taa; ɖɩyɔɔdaa se «ɛyaa 100 yɔɔ lɛ 65 yɔɔdaa se ɖama kɩɩnɩnʋ siŋŋ wɛ ɛyaa mba pɛwɛ politiki agbaa ndɩ ndɩ taa yɔ pɛ-hɛkʋ taa.»

Ðenɖe ŋwɛɛ yɔ, ŋɖiɣzinaa se politiki labʋ yeba nɛ ɛyaa hɛkʋ taa wɛɛ nɛ pɩtayɩɣ nɛ pɩkɩlɩɣ yaa we? Ɛbɛ yɔɔ pɩwɛ mbʋ? Papɩzɩɣ nɛ pɔcɔnɩ kaɖɛ nɖɩ ɖi-ɖeɖe na? Na ndʋ Bibl yɔɔdʋʋ yɔ.

Wɛtʋ ndʋ tɩkɔŋnɩ tayʋʋ yɔ

Bibl yaɣ ɖa-alɩwaatʋ tʋnɛ se «kɛdɛzaɣ kɩyakɩŋ;» nɛ kɩyɔɔdaa se tɩ-taa lɛ ɛyaa sakɩyɛ kaɣ wɛnʋʋ wɛtʋ ndʋ tiyeki nɛ pɩwɛɛ kaɖɛ se nɔɔ kʋɖʋmaɣ ɛwɛɛ ɛyaa hɛkʋ taa yɔ.

• «Kɛdɛzaɣ kɩyakɩŋ taa lɛ, alɩwaatʋ kaɖɛ ñɩndʋ kaɣ wɛʋ nɛ tɩ-lʋbɩnʋʋ kaɣ wɛʋ kaɖɛ. Mbʋ pʋyɔɔ yɔ, ɛyaa kaɣ pa-tɩ sɔɔlʋʋ, . . . paakaɣ tisuu se pa nɛ lalaa panɩɩnɩ ɖama.»—2 Timootee 3:1-3.

Paa ɛyaa sakɩyɛ ɩñakɩ pana se kominawaa ɩla tʋmɩyɛ ɛzɩ pɩpɔzʋʋ yɔ paapɩzɩɣ. Ɛyaa mba pa-lɩmaɣza kaɖɩɣnɩ ɖama yɔ, pamaɣzɩɣ se pɩwɛɣ kaɖɛ siŋŋ nɛ halɩ pɩɩkaɣ sam se pɛkpɛndɩ nɛ pala tʋmɩyɛ nɛ pɔcɔnɩ kala ɖeɖe. Pɩwɩlɩɣ se tɔm ndʋ Bibl kaayɔɔdɩ ɖooo caanaʋ taa yɔ tɩkɛ toovenim.

• «Ɛyʋ tɔkɩ kewiyitu ɛyʋ lɛlʋ yɔɔ se pɩkɔnɩ ɛlɛ kaɖɛ.»—Eklezɩyasɩtɩ 8:9.

Ɛlɛ Bibl yɔɔdʋʋ se mbʋ pɩpɩzɩɣ nɛ pɩcɔnɩ kaɖɛ nɖɩ ɖi-ɖeɖe yɔ mbʋ lɛ komina ŋgʋ kɩ-ñʋʋdʋ kaɣ yebu nɛ kʋñɔmɩŋ weyi ɩ-taa ɛyaa wɛ sɔnɔ yɔ ɩsɩɩ tɩnaɣ yɔ.

Ñʋʋdʋ weyi ɛmʋnaa nɛ ɛmaɣzɩɣ ɖɔ-yɔɔ yɔ

Bibl heyiɣ-ɖʋ ñʋʋdʋ weyi e-ɖeke ɛmʋnaa yɔ: Ɛnʋ lɛ Yesu Krɩstʋ. Ɛwɛnɩ ɖoŋ nɛ ɛsɔɔlaa se eyele nɛ ɛyaa kpeekpe wɛɛ nɔɔ kʋɖʋmaɣ taa nɛ laŋhɛzɩyɛ taa.

• «Ɛ-kɩyakɩŋ taa lɛ, ɛyaa siɣsiɣ tɩnaa kaɣ nɛɣdʋʋ, nɛ laŋhɛzɩyɛ kaɣ tɔyʋʋ.»—Keɣa 72:7.

• «Ajɛɛ kpeekpe kaɣ-ɩ ɖʋʋ lɩm.»—Keɣa 72:11.

Yesu kɛ ñʋʋdʋ weyi ɛmʋnaa yɔ mbʋ pʋyɔɔ yɔ ɛmaɣzɩɣ ɛyaa yɔɔ nɛ ɛsɔɔlaa se ɛsɩnɩ-wɛ kɔzɩ kɔzɩ ɛyaa mba pomuluu-wɛ yɔ.

• «Ɛkaɣ holuu kʋñɔndʋ weyi ekou se pasɩnɩ-ɩ yɔ, nɛ ɛkaɣ holuu ɖɔɖɔ ɛjam nɛ weyi ɛfɛyɩnɩ sɩnɩyʋ nɔɔyʋ yɔ. Ɛkaɣ naʋ ɛjam nɛ kʋñɔndʋ pa-pʋtɔdɩyɛ, nɛ ɛkaɣ yabʋ kʋñɔndɩnaa weziŋ ñʋʋ. Ɛkaɣ-wɛ holuu nazɩm nɛ puuyaɣ lakasɩ taa.»—Keɣa 72:12-14.

Kpɛlɩkɩ nɛ ŋtɩlɩ Ɛsɔ Kewiyaɣ yɔɔ tɔm nɛ pɩkɩlɩ; kɛkɛ ɛsɔdaa komina ŋgʋ Yesu ɖiyiɣ yɔ. Kpɛlɩkɩ nɛ ŋna ɛzɩma e-kewiyitu tɔɔʋ wazɩɣ-ŋ yɔ nɛ ɛzɩma ŋpɩzɩɣ nɛ ŋɖʋ-tʋ nesi yɔ.

• Cɔnɩ video Ɛbɛ Ɛsɔ Kewiyaɣ kɛnaa?

• Kalɩ tɔm ñʋʋ «Le Royaume de Dieu: un gouvernement sans corruption»