Suwe Bibl yɔɔdʋʋ ajana wondu tʋmɩyɛ labɩnʋʋ yɔɔ?

Bibl tɔm cosuu

Paa Bibl ɛtɩtazɩ ajana wondu tʋmɩyɛ labɩnʋʋ taa tete yɔ, kɩɩyɔɔdʋʋ se ajana wondu ɛzɩ ndʋ halaa taɣ pɛ-ɛsɩndaa, lɩyɩŋ, kokoo, kijisi nɛ ajana wondu lɛɛtʋ tʋmɩyɛ labɩnʋʋ fɛyɩ ɖeu. Paa mbʋ yɔ, Bibl seɣtiɣ-ɖʋ se ɖɩtaakɩlɩ kam ɖa-lɩmaɣza ɖo-tomnaɣ wɛtʋ yɔɔ, ɛlɛ kiseɣtiɣ-ɖʋ se ɖɩwɛɛnɩ «maɣzɩm mbʋ pɩwɛ ɖiɣ ɖiɣ nɛ pɩwɛɛ hɛɛɛ yɔ pɩ-tɩ sandʋʋ mbʋ pɩɩwɛɛkɩɣ yɔ.»—1 Pɩyɛɛrɩ 3:3, 4.

Bibl ɛɛyɔɔdʋʋ se pɩfɛyɩ ɖeu se ɛyʋ ɛcanɩ e-tomnaɣ

• Halaa siɣsiɣ tɩnaa mba pɔyɔɔdɩ pɔ-tɔm Bibl taa yɔ pacanaɣ pa-tɩ. Rebeka, weyi ɛwalɩ Abraham pɩyalʋ Izaakɩ yɔ, ɛɛlɛ sika kokooye nɖɩ pɛlɛɣ mɔɔʋ yɔɔ yɔ, sika kpasɩ nzɩ pɛlɛɣ nesi yɔɔ yɔ nɛ ajana wondu lɛɛtʋ ndʋ tɩwɛ liidiye siŋŋ yɔ, ndʋ weyi ɛkaɣ kɛʋ ɛ-panja yɔ ɛha-ɩ pʋcɔ nɛ ɛlakɩ nesi ɖɔkʋʋ yɔ. (Kiɖe Tɛɛ Tɔm 24:22, 30, 53) Mbʋ ɖɔɖɔ, Ɛsɩtɛɛrɩ kaatisaa nɛ «pataɣ-ɩ keɖeɣa num» mbʋ pataɣaɣ pɛlaa mba pɔñɔɔzaɣ-wɛ se palɩzɩ pa-taa kʋɖʋm nɛ ɛkɛ Pɛrɩsɩ Kewiyaɣ taa abiɖe yɔ. (Ɛsɩtɛɛrɩ 2:7, 9, 12) Alɩwaatʋ ndʋ pɔñɔɔzaɣ-wɛ yɔ pɩtɩla yɔ pataɣaɣ-wɛ «sɔzɩŋ num» yaa «ajana wondu ndɩ ndɩ.»—New International Version; Easy-to-Read Version.

• Bibl taa kɩɖaŋ nɩɩyɩ taa lɛ, pakpaɣ ajana wondu nɛ pamaɣzɩnɩ wɛtʋ kɩbandʋ ndɩ ndɩ. Kɩɖaʋ nakʋyʋ yɔ: pakpaɣ ɛyʋ weyi ɛtasɩɣ lɔŋ kɩbaŋ yɔ nɛ pamaɣzɩnɩ ‘sika naŋgbacaɣla . . . nɩŋgbaŋʋʋ ŋgʋ kiwelisiɣ yɔ.’ (Aduwa 25:12) Mbʋ ɖɔɖɔ, Ɛsɔ kpaɣ wɛtʋ ndʋ ɛlɩzaa nɛ ɛwɩlɩ Izrayɛɛlɩ yɔ nɛ ɛmaɣzɩnɩ wɛtʋ ndʋ walʋ weyi ɛcanɩ ɛ-asɛyʋ nɛ kpayasɩ, lɩyɩŋ nɛ naŋgbacaɣlanaa yɔ ɛwɛna yɔ. Ɛzɩma Ɛsɔ canɩ ɛjaɖɛ nɖɩ mbʋ yɔ piyeba nɛ ‘ɖiɖe pɩdɩɩfɛyɩ.’—Ezekɩyɛɛlɩ 16:11-13.

Lɩmaɣza wena ɛyaa wɛnɩ tʋmɩyɛ labɩnʋʋ ajana wondu yɔɔ nɛ atɩtʋʋzɩ yɔ

Lɩmaɣza wena atɩtʋʋzɩ yɔ: Abiɖe kɩdɛkɛdʋ Yezaabɛɛlɩ kaaɖʋ «ɛ-ɛsa ciyaʋ,» nɛ pɩwɩlɩɣ se ajana wondu taʋ fɛyɩ ɖeu.—2 Awiya 9:30.

Toovenim tɔm: Yezaabɛɛlɩ lakaɣ efeletu lakasɩ nɛ ɛkʋʋ ɛyaa, nɛ pʋyɔɔ pɔhɔm ɛ-nɩŋgbaaŋ pɩtɩkɛ ɛzɩma ɛcanɩ ɛ-tɩ yɔ pʋyɔɔ.—2 Awiya 9:7, 22, 36, 37.