Yesu yakɩ ɖa-ñʋʋ—Ɛzɩma tɩyɛ?
Bibl tɔm cosuu
Yesu yabɩ ɛyaa siɣsiɣ tɩnaa ñʋʋ alɩwaatʋ ndʋ ɛkpaɣ e-wezuu nɛ ɛlaa nɛ pɩkɛ kɩhɛyʋʋ pʋ-ñʋʋ taa yɔ. (Maatiyee 20:28) Pʋyɔɔ Bibl ya Yesu se «ɛjaɖɛ Ñʋʋ Yaɖʋ.» (1 Yohanɛɛsɩ 4:14) Kɩyɔɔdʋʋ ɖɔɖɔ se: «Ñʋʋ yaɖʋ nɔɔyʋ fɛyɩ nɛ pɩtasɩnɩ-ɩ, mbʋ pʋyɔɔ yɔ hɩɖɛ naɖɩyɛ tɩtasɩ wɛʋ tataa cɩnɛ, nɖɩ paha ɛyaa, nɖɩ ɖɩ-yɔɔ pɩwɛɛ se ɖɩtɩŋna nɛ ɖihiɣ ñʋʋ yabʋ yɔ.»—Tʋma Labʋ 4:12.
Yesu ‘ɖɩŋ sɩm’ mba payɩ pɛwɛnɩ tisuu ɛ-yɔɔ pɔ-yɔɔ. (Ebree mba 2:9; Yohanɛɛsɩ 3:16) Pʋwayɩ lɛ «Ɛsɔ fezi-i nɛ sɩɖaa taa,» nɛ ɛpɩsɩ fezuu nɛ ɛkpa ɛsɔdaa. (Tʋma labʋ 3:15) Alɩwaatʋ ndʋ Yesu wɛ ɛsɔdaa yɔ ɛpɩzɩɣ nɛ «ɛya mba patɩŋɩɣnɩ ɛ-yɔɔ nɛ pɔñɔtʋʋnɩ Ɛsɔ yɔ pa-ñʋʋ kiya, mbʋ pʋyɔɔ yɔ ɛwɛ wezuu tam se etendi pɔ-yɔɔ.»—Ebree mba 7:25.
Ɛbɛ yɔɔ pɩpɔzʋʋ se Yesu etendi ɖɔ-yɔɔ?
Ða-tɩŋa ɖɩkɛ kɩwɛɛkɩm laɖaa. (Roma mba 3:23) Kɩwɛɛkɩm yasɩɣ ɖa nɛ Ɛsɔ ɖɛ-hɛkʋ taa nɛ piwokini-ɖʋ sɩm taa. (Roma mba 6:23) Ɛlɛ Yesu kɛ mba pɛwɛnɩ tisuu ɛ-kɩlaʋ yɔɔ yɔ ‘pɔ-yɔɔ lʋɖʋ.’ (1 Yohanɛɛsɩ 2:1, pɩ-tɛɛ tɔm) Etendiɣ pɔ-yɔɔ, nɛ ɛpɔzʋʋ Ɛsɔ se ewelisi pa-adɩma nɛ ɛtɩŋnɩ ɛ-sɩm kɩlaʋ yɔɔ nɛ ekpeɣ-wɛ pa-kɩwɛɛkɩm. (Maatiyee 1:21; Roma mba 8:34) Ɛsɔ tisiɣ nɛ ɛmʋʋ Yesu adɩma ana mbʋ pʋyɔɔ yɔ alakɩ nɔɔ kʋɖʋmaɣ nɛ ɛ-sɔɔlɩm. Ɛsɔ tiyi Yesu tɛtʋ yɔɔ se «pɩtɩŋnɩ ɛ-yɔɔ nɛ ɛjaɖɛ hiɣ ñʋʋ yabʋ.»—Yohanɛɛsɩ 3:17.
Ye ɛyʋ etisi Yesu yɔɔ yɔ pi-ɖeke piyekina se ehiɣ ñʋʋ yabʋ na?
Aayɩ. Paa pɩwɛɛ se ɛwɛɛnɩ tisuu Yesu yɔɔ nɛ pɩsa nɛ ehiɣ ñʋʋ yabʋ yɔ, pɩpɔzʋʋ se ɛla nɛ pɩcɛzɩ mbʋ. (Tʋma Labʋ 16:30, 31) Bibl yɔɔdʋʋ se: «Tomnaɣ ŋga kɛfɛyɩnɩ fezuu yɔ kasɩba, mbʋ ɖɔɖɔ tisuu mbʋ pɩfɛyɩnɩ tʋma yɔ pɩsɩba.» (Yakubu 2:26). Pɩsa nɛ ɖihiɣ ñʋʋ yabʋ lɛ pɩwɛɛ se:
Ðɩkpɛlɩkɩ nɛ ɖɩtɩlɩ Yesu nɛ ɛ-Caa Yehowa.—Yohanɛɛsɩ 17:3.
Ðɩñaɣ pana nɛ ɖɩwɛɛnɩ tisuu pɔ-yɔɔ.—Yohanɛɛsɩ 12:44; 14:1.
Ðɩlɩzɩ ɖe-tisuu nɛ ɖɩwɩlɩ pɩtɩŋnɩ ɛzɩma ɖɩñaŋ pa-paɣtʋ yɔ pɩ-yɔɔ. (Luka 6:46; 1 Yohanɛɛsɩ 2:17) Yesu yɔɔdaa se pɩtɩkɛ mba payaɣ-ɩ se «Kɩbaɣlʋ» yɔ pa-tɩŋa pakaɣnɩ hiɣu ñʋʋ yabʋ ɛlɛ mba ‘palakɩ ɛ-Caa weyi ɛwɛ ɛsɔdaa yɔ ɛ-sɔɔlɩm yɔ, pe-ɖeke.’—Maatiyee 7:21.
Paa ɖɩkatɩɣ kala yɔ ɖiwolo pɩ-yɔɔ nɛ ɖɩwɩlɩ se ɖɩwɛnɩ tisuu. Yesu yeba nɛ tɔm ndʋ tɩ-taa tʋ kpayɩ kpayɩ alɩwaatʋ ndʋ ɛyɔɔdaa se: «Weyi ɛɖɔkʋʋ ɛ-laŋɩyɛ nɛ pɩkɔɔ pɩtɛ yɔ, ɛnʋ kaɣnɩ hiɣu ñʋʋ yabʋ.»—Maatiyee 24:13.