Ŋsɔɔlaa se Ŋtɩlɩ Toovenim mbʋ?

ƐBƐ yɔɔ toovenim? Toovenim, tɔm pɔzʋʋ kɩcɛyɩtʋ siŋŋ ndʋ ɛyaa pɔzʋʋ pa-tɩ tam yɔ, tɩ-yɔɔ. Pɩtɩtɩlɩ yɔ, ŋwɛɛ ŋpɔzʋʋ ña-tɩ se:

• Ɛzɩ Ɛsɔ keŋni-ɖʋ toovenim na?

• You nɛ kʋñɔŋ pakaɣ wiɖiyi sɩʋ tɩnaɣ na?

• Ɛbɛ pɩtɛŋnɩ ɛyʋ weyi ɛsɩba yɔ?

• Lidaʋ nakʋyʋ wɛ mba pasɩba yɔ pɔ-yɔɔ?

• Ɛzɩma mantɩmnɩ Ɛsɔ nɛ ɛnɩɩ ma-atɩma?

• Ɛzɩma mala nɛ mehiɣ koboyaɣ wezuu caɣʋ taa?

Lee ŋwoki ñɩnʋʋ tɔm cosuu tɔm pɔzʋʋ mbʋ pɩ-yɔɔ? Ye ŋwobi takayɩsɩ ɖɩ-pɛdɩyɛ yaa takayɩsɩ ɖɩ-sɩyɛ yɔ, ŋpɩzɩɣ ŋna takayɩsɩ sakɩyɛ nzɩ pamaɣzɩɣ se tɔm cosuu wɛ sɩ-taa yɔ. Ɛlɛ, kʋlɔlɔ lɛ, tɔm cosuu mbʋ pɩkaɖɩɣnɩ ɖama. Tɔm cosuu lɛɛbʋ pɩzɩɣ pɩwɛɛnɩ wazaɣ alɩwaatʋ natʋyʋ taa, ɛlɛ pʋwayɩ pɩɩtasɩɣ wazʋʋ lɛ pɔñɔɔzɩ yaa palaɣzɩ-pʋ.

Ɛlɛ, takayaɣ kʋɖʋmaɣ nakɛyɛ wɛɛ, kɔ-tɔm cosuu mʋnaa se pataa-pʋ liu. Kɛkɛ toovenim takayaɣ. Yesu Krɩstʋ kaatɩmnɩ Ɛsɔ nɛ ɛtɔ se: “Ñɔ-tɔm lɛ toovenim.” (Yohanɛɛsɩ 17:17) Tɔm ndʋ ɖɩyaɣ sɔnɔ se Kele Kele Bibl. Takayaɣ hɔɔlɩŋ weyi ɩkɔŋ yɔ ɩ-taa ŋkaɣ naʋ ɛzɩma Bibl cosi tɔm pɔzʋʋ mbʋ pɩ-yɔɔ kpayɩ kpayɩ, nɛ pɩkɛ toovenim ɖeyi ɖeyi yɔ.

Ɛzɩ Ɛsɔ Keŋni-Ðʋ Toovenim na?

MBƲ PƖ-YƆƆ ƐYAA PƆZƲƲ TƆM NDƲ YƆ: Ðɩwɛ ɛjaɖɛ nɖɩ ɖɩ-taa kañatʋ kadadayaɣ nɛ mulum pɩtɔyaa yɔ. Ɛsɔ sɛtʋ agbaa sakɩyɛ wɩlɩɣ se Ɛsɔ maɣmaɣ sɔɔlɩna se ɖɩla kʋñɔmɩŋ.

MBƲ BIBL ÑAWƖLƖƔ YƆ: Ɛsɔ ɛɛlakɩ kañatʋ kpa. Yɔɔb 34:10 tɔŋ se: “Kañatʋ fɛɩ Ɛsɔ cɔlɔ nɛ nɔɣkuye [“mulum,” NW] fɛɩ Ðoŋtɩnɛtʋ cɔlɔ.” Ɛsɔ wɛnɩ tamaɣ kɩbaŋa siŋŋ ɛyaa yɔɔ. Mbʋ yɔɔ Yesu kaawɩlɩ-ɖʋ se ɖɩtɩmɩ se: “Ða-Caa weyi ña ŋwɛ ɛsɔdaa yɔ . . . Ñe-kewiyaɣ ɛkɔɔ, yele pala ñe-liu ñɩm [“ñɔ-sɔɔlɩm,” NW] tataa cɩnɛ ɛzɩ palakʋʋ ɛsɔdaa yɔ.” (Maatiyee 6:9, 10) Ɛsɔ keŋni-ɖʋ pɩdɩɩfɛyɩ, mbʋ yɔɔ ɛlabɩ pɩtɩŋɛ payɩ se pɩtʋʋ ɛtaawɛ ɛ-tamaɣ ŋga ka-labʋ yɔɔ.— Yohanɛɛsɩ 3:16.

Cɔna ɖɔɖɔ Kiɖe Tɛɛ Tɔm 1:26-28; Yakubu 1:13; nɛ 1 Pɩyɛɛrɩ 5:6, 7.

You nɛ Kʋñɔŋ Pakaɣ Wiɖiyi Sɩʋ Tɩnaɣ na?

MBƲ PƖ-YƆƆ ƐYAA PƆZƲƲ TƆM NDƲ YƆ: You wɛɛ kɩlɩzɩɣ ɛyaa sakɩyɛ weziŋ. Ɛyaa kʋñɔŋ tukuuni ɖa-tɩŋa payɩ.

MBƲ BIBL ÑAWƖLƖƔ YƆ: Ɛsɔ kaayɔɔdɩ se alɩwaatʋ natʋyʋ kaɣ kɔm, ndʋ tɩ-taa ɛkɔŋnɩ laŋhɛzɩyɛ tɛtʋ tɩŋɛ yɔɔ. E-Kewiyaɣ, ŋga kɛkɛ ɛsɔdaa komina yɔ, alɩwaatʋ taa, ɛyaa ɩɩkaɣ tasʋʋ “kpɛlɛkɩʋ you labʋ.” Halɩ pakaɣ “kpaɣʋ pa-laɣɖa nɛ púlubina hakiŋ.” (Izaayii 2:4) Ɛsɔ kaɣ sɩʋ tɩnaɣ mulum nɛ kʋñɔŋ paa ŋgʋ. Bibl haɣ-ɖʋ tamaɣ se: “[Ɛsɔ] hɛzɩɣ pɛ-ɛzɩtɛɣlɩm tɩŋa. Sɩm yaa leɣa caɣʋ yaa atɩma yaa wɩzasɩ pa-taa nabʋyʋ ɛɛtasɩɣ wɛʋ. Mbʋ pʋyɔɔ yɔ, kajalaɣ wondu [tɩ-taa lɛɛtʋ lɛ mulum nɛ kʋñɔmɩŋ weyi ɩwɛ sɔnɔ yɔ] mʋwaa.”—Natʋ 21:3, 4.

Cɔna ɖɔɖɔ Keɣa 36 (37):10, 11; 45 (46):10; nɛ Mikee 4:1-4.

Ɛbɛ Pɩtɛŋnɩ Ɛyʋ Weyi Ɛsɩba yɔ?

MBƲ PƖ-YƆƆ ƐYAA PƆZƲƲ TƆM NDƲ YƆ: Ɛjaɖɛ yɔɔ ɛsɔ sɛtʋ agbaa hɔɔlʋʋ sɔsɔʋ wɩlɩɣ se nabʋyʋ wɛ ɛyʋ taa nɛ pɩcakɩ wezuu ɛ-sɩm wayɩ. A-taa naayɛ yɔɔdʋʋ se sɩɖaa pɩzɩɣ pala kañatʋ ɛzadɩnaa yaa Ɛsɔ ɖʋʋ kañatʋ tɩnaa miŋ sɔsɔŋ taa se pɔtɔɔ kʋñɔŋ tam.

MBƲ BIBL ÑAWƖLƖƔ YƆ: Ɛyʋ sɩkɩ lɛ, ɛɛtasɩɣ wɛʋ wezuu ɖoli. Ekklesiaste 9:5 yɔɔdʋʋ se: “Sɩɖaa ɩɩtasɩɣ natʋyʋ sɩm.” Ɛzɩ mbʋ sɩɖaa ɩɩsɩŋ, ɩɩnɩɣ yaa paalakɩ nabʋyʋ yɔ, paapɩzɩɣ ɖɔɖɔ se pala kañatʋ yaa pasɩnɩ ɛzadɩnaa.—Keeɣa 145 (146):3, 4.

Cɔna ɖɔɖɔ Kiɖe Tɛɛ Tɔm 3:19 nɛ Eklesɩyastɩ 9:6, 10.

Lidaʋ Nakʋyʋ Wɛ Mba Pasɩba yɔ Pɔ-yɔɔ?

MBƲ PƖ-YƆƆ ƐYAA PƆZƲƲ TƆM NDƲ YƆ: Ðɩsɔɔlaa se ɖɩcaɣ wezuu, nɛ ɖɩsɔɔlɩ se ɖa nɛ ɖa-kʋsɔɔlaa ɖɩnɩɩ leleŋ wezuu caɣʋ taa. Pʋmʋnɩ mbʋ se ɖiseliti se ɖɩɖaɣnɩ naʋ ɖɛ-ɛyaa kʋsɔɔlaa mba pasɩba yɔ.

MBƲ BIBL ÑAWƖLƖƔ YƆ: Ɛyaa mba pasɩba yɔ, pakaɣ hɔɔlʋʋ sɔsɔʋ fezuu. Yesu ta liu se “pɩlaŋ taa ñɩma tɩŋa payɩ . . . [feŋ].” (Yohanɛɛsɩ 5:28, 29) Ɛzɩ Ɛsɔ kaaɖʋʋ tamaɣ kiɖe tɛɛ yɔ, ɛyaa mba pefezaa yɔ pakaɣ-wɛ haʋ waɖɛ se pacaɣ paradisuu taa tɛtʋ yɔɔ. (Luka 23:43) Cee wayɩ lidaʋ ŋgʋ kɩhaɣ nʋmɔʋ ɛyaa mba pañaŋ yɔ se pɛwɛɛnɩ tɔnʋʋ taa alaafiya pilim nɛ wezuu maatɛŋ. Bibl tɔŋ se: “Siɣsiɣ [tʋ] tɩna tɛtʋ, ɛwɛɣ tɩ-yɔɔ tam.”—Keeɣa 36 (37):29.

Cɔna ɖɔɖɔ Yɔɔb 14:14, 15; Luka 7:11-17; nɛ Tʋma Labʋ 24:15.

Ɛzɩma Mantɩmnɩ Ɛsɔ nɛ Ɛnɩɩ Ma-Atɩma?

MBƲ PƖ-YƆƆ ƐYAA PƆZƲƲ TƆM NDƲ YƆ: Ɛsɔ sɛtʋ agbaa sakɩyɛ taa, ɛyaa tɩmʋʋ. Ɛlɛ, pɩlakɩ pa-taa sakɩyɛ ɛzɩ paanɩɣ pa-atɩma yɔ.

MBƲ BIBL ÑAWƖLƖƔ YƆ: Yesu wɩlɩ-ɖʋ se ɖɩtaateu tɔm kʋyʋmtʋ hendu ɖa-atɩma taa. Ɛtɔm se: “Mɩ-atɩma taa lɛ, iyéle yɔɔdʋʋ nɛ luuzuu.” (Maatiyee 6:7, Verbum Bible) Ye ɖɩsɔɔlaa se Ɛsɔ ɛnɩɩ ɖa-atɩma yɔ, pʋpɔzʋʋ se ɖɩtɩmɩ ɛzɩ pɩkɛdɩɣnɩ-ɩ yɔ. Pʋcɔ ɖɩpɩzɩ ɖɩla mbʋ lɛ, pʋpɔɔzʋʋ-ɖʋ se ɖɩkpɛlɩkɩ mbʋ Ɛsɔ-sɔɔlɩm kɛnaa yɔ nɛ ɖɩtɩmnɩ-ɩ ɛzɩ ɛsɔɔlʋʋ yɔ. 1 Yohanɛɛsɩ 5:14 lɩzɩ pɩ-taa se: “Ye ɖɩpɔzʋʋ Ɛsɔ mbʋ e-liu wɛɛ yɔɔ yɔ, ɛnɩɣnɩ-ɖʋ.”

Cɔna ɖɔɖɔ Keeɣa 64 (65):3; Yohanɛɛsɩ 14:6, 14; nɛ 1 Yohanɛɛsɩ 3:22.

Ɛzɩma Mala nɛ Mehiɣ Koboyaɣ Wezuu Caɣʋ taa?

MBƲ PƖ-YƆƆ ƐYAA PƆZƲƲ TƆM NDƲ YƆ: Ɛyaa sakɩyɛ maɣzɩɣ se liidiye, hɩɖɛ yaʋ yaa ɖeu haɣnɩ-wɛ koboyaɣ. Pɩ-yɔɔ pañɩnɩɣ wondu ndʋ kaahɛzaɣ; kɔyɔ pʋtɔdɩyɛ, paahikiɣ koboyaɣ ŋga pañɩnɩɣ yɔ.

MBƲ BIBL ÑAWƖLƖƔ YƆ: Yesu yeba ɖɩtɩlɩ mbʋ ɖeyi ɖeyi pɩhaɣ koboyaɣ alɩwaatʋ ndʋ ɛtɔm se: “Koboyaɣ tɩnaa lɛ mba pasɩma mbʋ se fezuu taa wondu tɛɖɩɣ-wɛ yɔ.” (Maatiyee 5:3, NW) Ye ɖɩñaɣ pana se ɖihiɣ mbʋ pɩtɛɖɩɣ-ɖʋ kiya yɔ—mbʋ lɛ ɖe-liu wɛʋ se ɖɩtɩlɩ Ɛsɔ nɛ tamaɣ ŋga ɛɖʋ ɖɔ-yɔɔ yɔ—piyeke koŋ pɩhaɣnɩ-ɖʋ toovenim koboyaɣ. Toovenim mbʋ, pehikiɣ-pʋ Bibl taa. Toovenim mbʋ, pɩ-tɩlʋʋ sɩɣnɩ-ɖʋ nɛ ɖɩtɛyɩ mbʋ pɩcɛyɩ siŋŋ nɛ mbʋ pɩtɛcɛyɩ yɔ pɛ-hɛkʋ taa. Ye ɖiyebi Bibl toovenim tɔm se tiɖiyi-ɖʋ ɖa-lɩmaɣzɛɛ lɩzʋʋ nɛ ɖa-lakasɩ taa kɔyɔ, piyeki ɖe-wezuu caɣʋ wɛɛnɩ tɔbʋʋ siŋŋ.—Luka 11:28, Verbum Bible.

Cɔna ɖɔɖɔ Aduwa 3:5, 6, 13-18 nɛ 1 Timootee 6:9, 10.

Ðɩmabɩ ɖaʋ yem kɛnɛ tɔm pɔzʋʋ loɖo ndʋ Bibl cosi tɩ-yɔɔ yɔ. Ŋsɔɔlaa se ŋtɩlɩ pɩkpaɖɩ mbʋ? Ye ŋwɛ mba “pasɩma mbʋ se fezuu taa wondu tɛɖɩɣ-wɛ” pa-taa kɔyɔ, pɩtʋʋ fɛyɩ se ŋsɔɔlaa. Pɩtɩtɩlɩ yɔ ŋwɛɛ ŋpɔzʋʋ ña-tɩ tɔm lɛɛtʋ se: ‘Ye Ɛsɔ ekeŋni-ɖʋ, ɛbɛ yɔɔ ɛha nʋmɔʋ kañatʋ nɛ kʋñɔmɩŋ sakɩyɛ ɖooo canaʋ taa pɩkɔɔ pɩsɩɩna sɔnɔ? Ɛzɩma malakɩ nɛ mɔ-hɔʋ wezuu caɣʋ tasɩ ñɔɔzʋʋ?’ Bibl cosi tɔm pɔzʋʋ tʋnɛ nɛ lɛɛtʋ sakɩyɛ yɔɔ kpayɩ kpayɩ nɛ ɛyʋ liu sɩkɩ.

Paa mbʋ, ɛyaa sakɩyɛ sɔnɔ pɩtɩɣ Bibl yɔɔ. Pakpaɣkʋʋ-kʋ ɛzɩ takayaɣ sɔsaɣ nɛ nabʋyʋ taa kɔ-tɔbʋʋ nɩʋ wɛ kaɖɛ. Ŋsɔɔlɩ sɩnʋʋ se ŋhiɣ tɔm cosuu Bibl taa? Yehowa Aseɣɖe Tɩnaa pɩzɩɣ pasɩna-ŋ pɩtɩŋnɩ nʋmɔŋ naalɛ yɔɔ.

Kajalaɣ ñɩŋgʋ lɛ, takayaɣ Wɛɛ Koboyaɣwezuu taa Tɛtʋ yɔɔ Tamtam! Palabɩ-kɛ se kasɩnɩ mba pɛfɛyɩnɩ alɩwaatʋ se patazɩ ndʋ Bibl cosi kpayɩ kpayɩ tɔm pɔzʋʋ kɩcɛyɩtʋ taa yɔ. Naalɛ ñɩŋgʋ lɛ se pala tamaɣ se pɔkɔɔ palabɩ-ŋ Bibl kpɛlɩkʋʋ ɖɩɣa falaa. Yehowa Aseɣɖe Tɩnaa taa weyi ɛsɩm Bibl wɩlʋʋ camɩyɛ yɔ nɛ ɛwɛ ño-kooka taa yɔ, pɩzɩɣ ɛkɔɔ ɛkpɛlɩkɩnɩ-ŋ Bibl falaa alɩwaatʋ pazɩ ña-ɖɩɣa yaa lone nɖɩ ɖɩkɛdɩnɩ-ŋ yɔ ɖɩ-taa paa kpɩtaʋ ŋgʋ. Tamaɣ kɛnɛ kasɩnɩ ɛyaa ɛgbɔŋ ɛgbɔŋ ɛjaɖɛ kpeekpe yɔɔ. Pa-taa sakɩyɛ kɔm pɔkɔ tɔm nɛ taa leleŋ se: “Mehiɣ toovenim!”

Paapɩzɩɣ pehiɣ ñɩm nabʋyʋ pɩkɩlɩ mbʋ. Bibl toovenim lɩzɩɣ-ɖʋ cɛtɩm sɔnzɩ, lɩmaɣzɛɛ siduu nɛ sɔndʋ kɩdɛkɛdɩtʋ yomiye taa. Pɩhaɣ-ɖʋ lidaʋ, tamaɣ nɛ taa leleŋ. Yeesu tɔm se: “Ɩkaɣ tɩlɩʋ toovenim nɛ toovenim kaɣ-mɩ lɩzɩʋ yomiye taa.”—Yohanɛɛsɩ 8:32, NW.