Asɛyɩŋ 6 weyi ɩtɩŋ pʋwayɩ yɔ

Ɛsɔ tiyi Moyizi nɛ Aarɔɔnɩ nɛ powolo peheyi Farawɔɔ tɔm tʋnɛ: “Ye ŋtiyele man-samaɣ nɛ kɛɖɛɛ yɔ, meyeki nɛ kɔjɔsɩ nzɩ sɩñasɩɣ ɛyaa yɔ sɩkɔɔ ña-samaɣ yɔɔ.” Nɛ Farawɔɔ tiwelisini-wɛ nɛ pʋyɔɔ lɛ, kɔjɔsɩ nzɩ sɩñasɩɣ ɛyaa yɔ sɩlɩɩ wiii tindima tindima Ejipiti ɛjaɖɛ kpeekpe taa, sɩɩwɛ Ejipiti mba tɩŋa payɩ ɖɩsɩ taa, paa paakɛ ñɩm tɩnaa yaa kʋñɔndɩnaa yɔ. Ɛlɛ sɩtaawɛɛ Gosɛɛnɩ, ɖenɖe Izrayɛɛlɩ mba kaawɛɛ yɔ. Kpaɣnɩ asɛyʋʋ 4 ñɩŋgʋ lɛ, Ejipiti mba yeke yɔɔ asɛyɩŋ kɔŋaɣ. Farawɔɔ yɔɔdɩ se: “Itendi Yehowa nɛ asɛyʋʋ kʋnɛ kɩsɩɩ tɩnaɣ. Mɩ-samaɣ pɩzɩɣ nɛ kɛɖɛɛ.” Ɛlɛ Yehowa yeba nɛ asɛyʋʋ ŋgʋ kɩsɩɩ tɩnaɣ lɛ, Farawɔɔ ɖaɣnɩ lɩmaɣza lɛɣzʋʋ. Ɛzɩ ɛkaɣ tɔm taa nɩʋ na?

Yehowa yɔɔdaa se: “Ye Farawɔɔ etiyele man-samaɣ nɛ kɛɖɛɛ yɔ, kʋdɔŋ kaɣ kɔm Ejipiti mba kpɩna yɔɔ nɛ asɩ.” Teu fema lɛ, Ejipiti mba kpɩna paɣzɩ sɩbʋ. Ɛlɛ Izrayɛɛlɩ mba kpɩna ñataasɩkɩ. Paa mbʋ yɔ, Farawɔɔ wɛ ñʋʋ taa ɖoŋ mbʋ nɛ ekizi se eeyeki Yehowa samaɣ nɛ kɛɖɛɛ kpa.

Pʋwayɩ lɛ, Yehowa heyi Moyizi se ɛpɩsɩ Farawɔɔ cɔlɔ nɛ ɛmɩzɩ tɔlɩma ɛsɔdaa. Tɔlɩma ana apɩsɩ mʋzʋʋ nɛ kitiki Ejipiti mba tɩŋa yɔɔ. Mʋzʋʋ ŋgʋ kiyele nɛ mʋya lɩɩ Ejipiti mba tɩŋa yɔɔ nɛ pa-kpɩna yɔɔ. Ɛlɛ Farawɔɔ ɖaɣnɩ kizuu se eeyeki Izrayɛɛlɩ mba nɛ pɛɖɛɛ.

Yehowa ɖaɣnɩ tiyuu Moyizi se ewolo nɛ eheyi Farawɔɔ se: “Ŋkizaa se ŋŋyeki man-samaɣ nɛ kɛɖɛɛ yaa? Cee, ɖɔmbɛɛ kaɣnɩ tɔlʋʋ tɛtʋ yɔɔ.” Teu fema lɛ, Yehowa yele nɛ tɛʋ nazɩ nɛ ɖɔmbɛɛ nɛ miŋ pɩlɩɩnɩ ɛsɔdaa nɛ pitiki tɛtʋ yɔɔ. Wiɖiyi Ejipiti mba tɩna mbʋ nɛ pana. Nɛ tɩŋ nɛ tɔɔnasɩ pɛwɛɛkɩ, ɛlɛ pititukuni tɩŋ nɛ tɔɔnasɩ nzɩ sɩwɛ Gosɛɛnɩ yɔ. Nɛ Farawɔɔ na mbʋ lɛ, ɛyɔɔdɩ se: “Itendi Yehowa nɛ eyele nɛ asɛyʋʋ kʋnɛ kɩsɩɩ tɩnaɣ. Nɛ pʋwayɩ lɛ, ɩpɩzɩɣ nɛ ɩɖɛɛ.” Ɛlɛ asɛyʋʋ ŋgʋ kɩtɩɩsɩ tɩnaɣ lɛ, Farawɔɔ ɖaɣnɩ lɩmaɣza lɛɣzʋʋ.

Nɛ Moyizi yɔɔdɩ se: “Lɛɛlɛɛyɔ, kudoloŋ kaɣ tɔɔʋ tɩŋ weyi payɩ ɖɔmbɛɛ tɩwɛɛkɩ yɔ.” Kudoloŋ lɩɩ nɛ kɩtɔɔ tɩŋ weyi ɖɔmbɛɛ taawɛɛkɩ yɔ. Peeɖe Farawɔɔ yɔɔdaa se: “Tendi Yehowa nɛ kudoloŋ ɖɛɛ.” Ɛlɛ Yehowa yeba nɛ pɩla mbʋ lɛ, Farawɔɔ ɖaɣnɩ wɩlʋʋ se ɛwɛ ñʋʋ taa ɖoŋ.

Yehowa heyi Moyizi se: “Kpazɩ ñe-nesi nɛ ɛsɔdaa.” Kpaagbaa mbʋ lɛ, ɛsɔdaa yu kpimm. Kɩyakɩŋ 3 Ejipiti ñɩma taapɩzɩɣ se pala nabʋyʋ yaa pana ɖama. Izrayɛɛlɩ ɖɩsɩ taa ɖeke mintʋsʋʋ kaawɛɛ.

Farawɔɔ heyi Moyizi se: “Ña nɛ ña-samaɣ ɩpɩzɩɣ nɛ ɩɖɛɛ, ɛlɛ iyele mɩ-kpɩna cɩnɛ.” Moyizi cosi-i se: “Pɩpɔzʋʋ se ɖɩkpaɣ ɖa-kpɩna nɛ ɖɩlaanɩ ɖɛ-Ɛsɔ kɩlaʋ.” Farawɔɔ kɔ pana siŋŋ nɛ eholini Moyizi se: “Wolo nɛ ŋɖɛɛ! Ye mantasɩ-ŋ naʋ cɩnɛ, mankʋʋ-ŋ.”