Asɛyʋʋ 10 ñɩŋgʋ

Moyizi heyi Farawɔɔ se ɛɛkaɣ taasʋʋ ɛ-cɔlɔ pɩsʋʋ. Ɛlɛ pʋcɔ nɛ ɛɖɛɣ Farawɔɔ cɔlɔ lɛ, eheyi-i se: “Ðoo hɛkʋ taa, paa Ejipiti ɖɩɣa ŋga ka-taa lɛ, kajalaɣ pɩɣa sɩkɩ, kpaɣnɩ Farawɔɔ pɩyalʋ nɛ piwolo pɩtalɩ paa yom weyi lɛ ɛ-pɩyalʋ.”

Yehowa heyi Izrayɛɛlɩ mba se pɔtɔɔ ŋgee tɔɔnaɣ nakɛyɛ. Eheyi-wɛ se: “Ɩkʋ heu yaa pʋnʋ, pɩkɛ abalɩñɩnʋ weyi ɛwɛnɩ pɩnaɣ kʋɖʋmaɣ yɔ, nɛ ɩtaa ɛ-calɩm mɩ-ɖɩsɩ nɔnɔsɩ ñʋŋ yɔɔ. Ɩwɩsɩ nandʋ nɛ ɩtɔɔ-tʋ nɛ kpɔnɔ ŋgʋ kɩ-taa patɩɖʋ lɔlɔm yɔ. Isuu wondu, ɩlɛɛ naataŋgbala nɛ ɩñɔɔzɩ mɩ-tɩ nɛ ɩɖaŋ. Mankaɣ mɩ-ñʋʋ yabʋ ɖoo anɛ a-taa.” Maɣzɩ nɛ ŋna ɛzɩma piselitaɣ Izrayɛɛlɩ mba siŋŋ yɔ!

Ðoo hɛkʋ taa, Yehowa tiyi tiyiyu nɔɔyʋ nɛ ewolo Ejipiti ɖɩsɩ tɩŋa taa. Ðɩsɩ nzɩ sɩ-nɔnɔsɩ ñʋŋ yɔɔ fɛyɩ calɩm yɔ, ɛkʋ sɩ-taa kajalaɣ piya. Ɛlɛ Ɛsɔ tiyiyu fɛɛ ɖɩsɩ nzɩ sɩ-nɔnɔsɩ ñʋŋ yɔɔ nɛ calɩm yɔ. Paa Ejipiti mba hɔʋ ŋgʋ kɩ-taa lɛ, pɩɣa nakɛyɛ sɩba, kpaɣnɩ ñɩm tʋ nɛ ŋwolo kʋñɔndʋ. Ɛlɛ Izrayɛɛlɩ pɩɣa nakɛyɛ tɩsɩ.

Halɩ Farawɔɔ maɣmaɣ pɩyalʋ sɩba. Lɛɛlɛɛyɔ pɩcɛzɩ Farawɔɔ. Peeɖe ɛya Moyizi nɛ Aarɔɔnɩ kpaagbaa nɛ eheyi-wɛ se: “Ɩɖɛɛ. Iwolo nɛ ɩɖɛɛ cɩnɛ. Iwolo Nɛ ɩsɛɛ mɩ-Ɛsɔ. Ɩkpaɣ mɩ-kpɩna nɛ ɩɖɛɛ!”

Fenaɣ ñandɩ camɩyɛ lɛ, Izrayɛɛlɩ mba kpeɣli pa-tɩ, paa hɔʋ ŋgʋ nɛ paa cejewiye nɖɩ, nɛ papaɣzɩ lɩʋ Ejipiti. Paakpɛndɩ abalaa 600000 nɛ halaa nɛ piya sakɩyɛ. Ɛyaa sakɩyɛ mba patɩkɛ Izrayɛɛlɩ mba yɔ pa-taa sakɩyɛ tɩŋ pa-wayɩ se powolo nɛ pɛsɛɛ Yehowa ɖɔɖɔ. Izrayɛɛlɩ mba lɩ yomiye taa lɛɛlɛɛyɔ!

Paa pɩnaɣ ŋga lɛ, pɔtɔkɩ ŋgee tɔɔnaɣ nakɛyɛ se pɩsa nɛ pɔtɔzʋʋ ɛzɩma Yehowa yabɩ pa-ñʋʋ yɔ pɩ-yɔɔ. Tɔɔnaɣ ŋga payaɣaɣ se Paska.