Ɛsɩdrasɩ wɩlɩ samaɣ Ɛsɔ Paɣtʋ

Pɩlakɩ ɛzɩ pɩnzɩ 70 mbʋ yɔ Izrayɛɛlɩ mba sakɩyɛ pɩsʋʋ Yeruzalɛm tɛtʋ taa yɔ, ɛlɛ lalaa kaawɛ Pɛrɩsɩ egeetiye taa mbʋ. Pa-taa lɛlʋ lɛ cɔjɔ weyi payaɣ se Ɛsɩdrasɩ yɔ. Ɛnʋ kaawɩlɩnɩ samaɣ Yehowa Paɣtʋ. Ɛsɩdrasɩ nɩwa se samaɣ ŋga kɛwɛ Yeruzalɛm yɔ, kataaɖɔŋ Yehowa Paɣtʋ yɔɔ, nɛ ɛkpaɣ lɩmaɣzɩyɛ se ewoki nɛ ɛsɩnɩ-kɛ. Pɛrɩsɩ mba Wiyaʋ Artaazɛɛrɩzɛɛsɩ heyi-i se: “Ɛsɔ ha-ŋ lɔŋsɩnɖɛ se ŋpɩzɩ nɛ ŋwɩlɩ samaɣ ɛ-Paɣtʋ. Wolo, kpɛndɩnɩ mba payɩ pɔsɔɔlaa se patɩŋ ña-wayɩ yɔ.” Ɛsɩdrasɩ kpeɣli samaɣ taa mba paasɔɔlaa se papɩsɩ Yeruzalɛm yɔ. Patɩmnɩ Yehowa nɛ peheyi-i se ɛsɩnɩ-wɛ nʋmɔʋ kɩɖaɣlʋʋ ŋgʋ pacaɣ ɖɔm yɔ kɩ-taa. Peeɖe pakpaɣ nʋmɔʋ nɛ pɛɖɛɛ.

Fenasɩ 4 wayɩ lɛ, patalɩ Yeruzalɛm. Awumbiya mba paawɛ peeɖe yɔ, peheyi Ɛsɩdrasɩ se: “Izrayɛɛlɩ mba ɩɩtasɩɣ Yehowa ñam nɛ pakpakɩɣ halaa mba pɛsɛɣ cɛtɩm ɛsɔnaa yɔ.” Ɛbɛ Ɛsɩdrasɩ laba? Ɛsɩdrasɩ luŋ ɛ-nʋmbɔla yɔɔ samaɣ ɛsɩndaa nɛ ɛtɩmɩ se: “Yehowa, ŋlabɩ-ɖʋ mbʋ yɔ pɩfɛyɩ yɔɔdʋʋ, ɛlɛ ɖa lɛ ɖɩlabɩ kɩwɛɛkɩm ñɛ-ɛsɩndaa.” Samaɣ kpiɖi ka-kɩwɛɛkɩm yɔɔ, ɛlɛ pɩɩpɔzaa se pasɩnɩ-kɛ nɛ kowolo pɩ-yɔɔ nɛ kalakɩ mbʋ pɩtʋʋzaa yɔ. Ɛsɩdrasɩ lɩzɩ ɛzʋtʋyaa nɛ tɔm hʋyaa se pɔcɔnɩ tɔm ndʋ ti-ɖeɖe. Fenasɩ naadozo nzɩ sɩtɩŋ pʋwayɩ yɔ sɩ-taa, pɔɖɔɔnɩ mba pataasɛɣ Yehowa yɔ.

Pɩnzɩ 12 nzɩ sɩtɩŋ pʋwayɩ yɔ sɩ-taa lɛ, Izrayɛɛlɩ mba ɖaɣnɩ maʋ Yeruzalɛm kolonzi. Nɛ Ɛsɩdrasɩ kpeɣli samaɣ nɛ ɛkalɩ-kɛ Ɛsɔ Paɣtʋ. Ɛsɩdrasɩ kuli Paɣtʋ takayaɣ lɛ, samaɣ kʋyɩ nɛ kasɩŋ. Peeɖe ɛsam Yehowa nɛ samaɣ kpazɩ ke-nesi nɛ kawɩlɩ se ketisi tɔm ndʋ ɛyɔɔdaa yɔ tɩ-yɔɔ. Nɛ Ɛsɩdrasɩ kalɩ Paɣtʋ nɛ ɛlɩzɩ tɩ-taa, nɛ samaɣ welisi camɩyɛ. Petisi se toovenim taa lɛ poposini Yehowa, nɛ pewii. Tɛʋ fema lɛ, Ɛsɩdrasɩ tasɩ kalʋʋ Paɣtʋ samaɣ ɛsɩndaa. Pɔkɔɔ pana se piileɖiɣ lɛ, palakɩ Coka Kazandʋ. Kpaagbaa mbʋ lɛ, papaɣzɩ pa-tɩ ñɔɔzʋʋ.

Pɔtɔɔ kazandʋ avema 7; nɛ avema ana a-taa, Izrayɛɛlɩ mba kpaɣ pa-alɩwaatʋ nɛ pɛɖɛyɩɣ Yehowa nɛ pɛsɛɛ-ɩ se eyeba nɛ tɔɔnasɩ la camɩyɛ. Ðooo Yozuwee sɩbʋ yɔ, Izrayɛɛlɩ mba tɩtasɩ labʋ Coka Kazandʋ ɛzɩ tʋnɛ yɔ. Pɛtɛm kazandʋ tɔɔʋ lɛ, samaɣ kpeɣli, nɛ Ɛsɩdrasɩ la adɩma nɛ ɛtɔ se: “Yehowa, ŋlɩzɩ-ɖʋ yomiye taa, ŋha-ɖʋ tɔɔnaɣ kañɩmbusuu taa, nɛ ŋha-ɖʋ tɛtʋ kɩbandʋ tʋnɛ yɔ. Ɛlɛ paa ɛzɩmtaa lɛ, ɖɩtaañaŋɩ-ŋ. Ŋtiyini-ɖʋ nayaa se papaɣ-ɖʋ, ɛlɛ ɖitiwelisini-wɛ. Paa mbʋ yɔ, ŋwɛ suuɖu. Ðuutu ndʋ ŋŋlabɩ Abraham yɔ, ŋɖɔm tɩ-yɔɔ. Lɛɛlɛɛyɔ lɛ, ɖiɖuwaa se ɖɩñaŋɩ-ŋ.” Pama ɖuutu ndʋ takayaɣ taa nɛ awumbiya, Leevi mba nɛ cɔjɔnaa pañɩɣ niye takayaɣ ŋga ka-taa.