Yesu pɩsɩ ɛsɔdaa

Yesu nɛ ɛ-wayɩ tɩŋɩyaa pakatɩ Galilee. Peeɖe ɛɖʋ-wɛ tʋmɩyɛ sɔsɔɖɛ naɖɩyɛ nɛ ɛtɔ se: “Iwolo ajɛɛ tɩŋa taa nɛ ɩla ɛyaa nɛ papɩsɩ tɔmkpɛlɩkɩyaa. Ɩwɩlɩ-wɛ tɔm ndʋ payɩ mawɩlɩ-mɩ yɔ nɛ ɩmɩyɩsɩ-wɛ lɩm.” Pʋwayɩ lɛ ɛlabɩ-wɛ tamaɣ kanɛ: “Mankaɣ wɛʋ mɩ-cɔlɔ paa ɛzɩmtaa. Ɩtaasɔɔ tɔm ndʋ tɩ-yɔɔ.”

Kɩyakɩŋ 40 weyi ɩtɩŋ Yesu femtu wayɩ yɔ ɩ-taa, ɛlɩzɩ ɛ-tɩ nɛ ɛwɩlɩ ɛ-tɔmkpɛlɩkɩyaa mɩnɩŋ sakɩyɛ Galilee nɛ Yeruzalɛm tɛtʋ taa. Ɛwɩlɩ-wɛ tɔm sakɩyɛ nɛ ɛtɛ ɛla piti lakasɩ sakɩyɛ. Pʋwayɩ lɛ, Yesu katɩ ɛ-apostoloowaa kɛdɛzaɣ ɖeɖe Oliivi Pʋʋ yɔɔ. Peeɖe eheyi-wɛ se: “Ɩtaalɩɩ Yeruzalɛm tɛtʋ taa. Ɩɖaŋ nɛ pɩkɔɔ pɩtalɩ alɩwaatʋ ndʋ ɩmʋ mbʋ Caa kaayɔɔdaa se ɛhaɣ-mɩ yɔ.”

Ɛlɛ Yesu apostoloowaa taanɩɩ mbʋ pɩ-tɔm ɛyɔɔdaɣ yɔ pɩ-taa, nɛ pɔpɔzɩ-ɩ se: “Ŋpɩsɩɣ Izrayɛɛlɩ Wiyaʋ lɛɛlɛɛyɔ kɛ?” Yesu cosi-wɛ se: “Alɩwaatʋ ndʋ Yehowa ɖʋwa se manpɩsɩ wiyaʋ yɔ tɩtɩtalɩta. Ɛlɛ ɛkaɣ-mɩ haʋ fezuu kiɖeɖeu se kɩkpazɩ-mɩ ɖoŋ nɛ ɩkaɣ kɛʋ ma-aseɣɖe tɩnaa. Iwolo nɛ isusi tɔm Yeruzalɛm, Yuudee, Samaarii nɛ tɛtʋ hɔɔlɩŋ lɛɛŋ weyi ɩkɩlɩ posuu yɔ ɩ-taa.”

Kpaagbaa mbʋ lɛ, pɩkpazɩ Yesu ɛsɔdaa nɛ ɛsɔmɩnʋʋ nakʋyʋ huuzi ɛ-yɔɔ nɛ patɩtasɩ-ɩ naʋ.

Pʋwayɩ lɛ, ɛ-tɔmkpɛlɩkɩyaa lɩɩnɩ Oliivi Pʋʋ yɔɔ nɛ petii nɛ papɩsɩ Yeruzalɛm. Kpaɣnɩ mbʋ lɛ, pekpeɣlaɣ ɛsɔdaa kuduyuu nakʋyʋ taa nɛ patɩmɩɣ. Paaɖaŋaa se Yesu ɛtasɩ-wɛ wɩlʋʋ tɔm lɛɛtʋ.