Powoni Pɔɔlɩ Roma

Pɔɔlɩ tɔm susuu nʋmɔʋ ɖɔm 3 ñɩŋgʋ sɩ tɩnaɣ Yeruzalɛm. Peeɖe pakpa-ɩ nɛ paɖʋ-ɩ salaka. Ðoo naayɛ taa lɛ, Yesu tɩŋnɩ natʋ natʋyʋ yɔɔ nɛ eheyi-i se: “Ŋkaɣ wobu Roma nɛ ŋsusi tɔm peeɖe.” Pakpaɣ Pɔɔlɩ Yeruzalɛm nɛ powoni Sezaaree nɛ paɖɩɣ-ɩ salaka pɩnzɩ 2. Powoni Pɔɔlɩ komina ñʋʋdʋ Fɛsɩtuusi ɛsɩndaa lɛ, ɛyɔɔdɩ se: “Mañɩnɩɣ se Sezaarɩ ɛhʋʋnɩ mɔn-tɔm Roma.” Nɛ Fɛsɩtuusi cosi-i se: «Ŋpɔzaa se Sezaarɩ ɛɖaɣnɩ ñɔ-tɔm hʋʋ yɔ, ŋkaɣ wobu Sezaarɩ cɔlɔ.» Pasʋzɩ Pɔɔlɩ mɛlɛ ŋgʋ kɩɖɛɣaɣ Roma yɔ kɩ-taa, nɛ e-koobiya Krɩstʋ mba 2, Luka nɛ Aristaarkɩ patɩŋɩ-ɩ.

Pɛwɛ teŋgu yɔɔ lɛ, helim sɔsɔm nabʋyʋ paɣzɩ mabʋ, helim mbʋ pɩwɛɛ mabʋ yɔɔ kɩyakɩŋ sakɩyɛ. Pa-taa paa weyi paɣzɩ maɣzʋʋ se pɔ-tɔm tɛma. Ɛlɛ Pɔɔlɩ heyi-wɛ se: “Taabalaa, tiyiyu nɔɔyʋ heyi-m ɖoziye taa se: ‘Sɔɔndʋ ɛtaakpa-ŋ, Pɔɔlɩ. Ŋkaɣ talʋʋ Roma, nɛ mba ña nɛ wɛ ɩwɛ mɛlɛ taa yɔ, pa-taa nɔɔyʋ ɛɛsɩkɩ.’ Ɩwɛɛ abalɩtʋ! Ða-taa nɔɔyʋ ɛɛkaɣ sɩbʋ.”

Helim wɛ mabʋ yɔɔ kɩyakɩŋ 14 kiya. Pɩkɛdaa lɛ, papaɣzɩ losuu tɛtʋ. Pɩɩkɛ lɩm hɛkʋ taa tɛtʋ ndʋ payaɣ se Malɩtɩ yɔ. Mɛlɛ yɔkɩ hɔɔlasɩ hɔɔlasɩ, ɛlɛ ɛyaa 276 mba paawɛ kɩ-taa yɔ, pa-tɩŋa palɩ cɩŋgɩlɩm. Nabɛyɛ ya lɩm nɛ lalaa ñakpa mɛlɛ hɔɔlasɩ yɔɔ nɛ papɩzɩ patalɩ kidiiliŋ yɔɔ. Ɛyaa mba paawɛ Malɩtɩ yɔ, pɔcɔnɩ pɔ-yɔɔ camɩyɛ nɛ paɖʋ-wɛ miŋ nɛ pohoyi.

Pɩlabɩ fenasɩ 3 lɛ, sɔɔjanaa kpaɣ Pɔɔlɩ mɛlɛ lɛɛkʋ taa nɛ powoni-i Roma. Ɛtalaa lɛ, koobiya kɔɔ nɛ pakatɩ-ɩ. Pɔɔlɩ na-wɛ lɛ, ɛsɛɛ Yehowa se ɛlabaɣ lɛ, nɛ ɛtasɩ hiɣu abalɩtʋ. Paa Pɔɔlɩ kaakɛ salaka tʋ yɔ, paaha-ɩ waɖɛ se ɛwɛɛ ɖɩɣa nakɛyɛ taa nɛ sɔɔjanaa ɖaŋɩɣ ɛ-yɔɔ. Ɛcaɣ ɖɩɣa ŋga ka-taa pɩnzɩ 2. Mba pɔkɔŋaɣ nɛ panaɣ-ɩ yɔ, esusaɣ-wɛ Ɛsɔ Kewiyaɣ tɔm nɛ ɛwɩlɩɣ-wɛ ɖɔɖɔ tɔm Yesu yɔɔ. Pɔɔlɩ ma ɖɔɖɔ takayɩsɩ agbaa wena awɛ Aazii Cikpeluu taa nɛ Yuudee yɔ. Toovenim taa lɛ, Yehowa tɩŋnɩ Pɔɔlɩ yɔɔ nɛ tɔm kɩbandʋ talɩ ajɛɛ sakɩyɛ.