Ɛsɔ sɛtʋ hendu kɩfatʋ!
1 Watch Tower Bible and Tract Society of Pennsylvania labɩ 2014 pɩnaɣ taa kediɣzaɣ ŋga Aloma Fenaɣ kɩyakʋ 4 ŋgʋ wiye yɔ, ka-taa paasusaa se pakaɣ hendu takayaɣ ŋga ɖɩlakɩnɩ tʋmɩyɛ lɛɛlɛɛyɔ yɔ, ɖaɣnʋʋ ñɔɔzʋʋ. Pɩɩkɛ taa leleŋ tɔm siŋŋ. Paatɔzɩ mba pɔkɔm kediɣzaɣ ŋga ka-taa yɔ ɛzɩma Kewiyaɣ hendu mʋ ñɩm siŋŋ nɛ tɩ-tɔm cɛyɩ ɖɛ-Ɛsɔ sɛtʋ taa yɔ, pɩ-tɔm.—Keɣa 95:2.
2 Pɩtɩla ŋpɔzʋʋ ña-tɩ se: ‘Ɛbɛ yɔɔ pɩcɛyaa se paɖaɣnɩ ñɔɔzʋʋ ɖe-hendu takayaɣ?’ Lɩmaɣza sakɩyɛ yɔɔ. Kajalaɣ lɛ, ɖɩtasɩ Bibl Masɩ taa nɩʋ camɩyɛ lɛɛlɛɛyɔ nɛ pɩkpaɖɩ alɩwaatʋ ndʋ ɖɩɩlabɩ ɖe-hendu takayaɣ kanɛ yɔ, nɛ pʋyɔɔ lɛ, pɩwɛɛ se pɔñɔɔzɩ tɔm ndʋ tɩwɛ ɖe-hendu taa yɔ nɛ tɩmʋnɩ camɩyɛ. (Adu. 4:18) Lɩmaɣzɩyɛ lɛɛɖɛ ɖɔɖɔ lɛ se tɔm loyisi nzɩ ɖɩlabɩnɩ tʋmɩyɛ ɖe-hendu takayaɣ taa yɔ, ɖɩlɩzɩ sɩ-taa sakɩyɛ nɛ Traduction du monde nouveau kɩbɩnʋʋ taa, pʋyɔɔ pɩcɛyaa se lɛɛlɛɛyɔ lɛ, ɖɩɖaɣnɩ ñɔɔzʋʋ tɔm loyisi nzɩ nɛ sɩla nɔɔ kʋɖʋmaɣ nɛ Traduction du monde nouveau kɩfalʋʋ. Pɩsa nɛ pataala tʋmɩyɛ sɔsɔɖɛ ɖɩnɛ nɛ pɩsɩɩnɩ hendu tʋnɛ tɩ-ñɔɔzʋʋ ɖeke lɛ, pakpaɣ lɩmaɣzɩyɛ se patasɩɣ hendu kɩfatʋ natʋyʋ pazɩ suyuu.
3 Ðɩkaɣ ɖaŋʋʋ se hendu takayaɣ kɩfalaɣ ɛlɩɩ pʋcɔ nɛ ɖɩpaɣzɩ hendu kɩfatʋ ndʋ teu yaa we? Aayɩ yo! Pɩkɛdɩnɩ-ɖʋ se ɖiheyi-mɩ se fenasɩ nzɩ sɩkaɣ kɔm yɔ, sɩ-taa pakaɣ hendu kɩfatʋ ndʋ tɩ-taa natʋyʋ ɖʋʋ jw.org yɔɔ. Palɩzɩɣ hendu kɩfatʋ natʋyʋ lɛ, palakɩ ɖʋtʋ nɛ tɩkɛ ɖɛ-Ɛsɔ sɛtʋ kediɣzaɣ hendu kɛdɛzaɣ ñɩndʋ nɛ payaa-tʋ se “Hendu kɩfatʋ.”
4 Ɛzɩma ɖɩkaɣ labʋ nɛ ɖɩtɩlɩ hendu kɩfatʋ ndʋ ti-teu? Pɩpɩzɩɣ pɩwɛɛ kaɖɛ nabʋyʋ taa se ɛyʋ ɛkpɛlɩkɩ hendu kɩfatʋ natʋyʋ. Paa mbʋ yɔ, ɛzɩ Keɣa maɖʋ yɔ, ɖɩsɔɔlaa se ɖitee Yehowa hendu ɖe-kediɣzisi taa nɛ ‘ɖihulutuu-i’ yaa ɖɩɖɛyɩɣ-ɩ kaahɛzaɣ. (Keɣa 29:13) Pʋyɔɔ lɛ, pɩsa nɛ hendu ndʋ tɩ-kpɛlɩkʋʋ labɩ-ŋ kɛlɛʋ lɛ, ɖɔ lɔŋ tasʋʋ pʋnɛ pɩ-yɔɔ:
Kpaɣ hendu ndʋ jw.org yɔɔ nɛ ŋwelisi-tʋ tam sakɩyɛ. Ye ŋwelisiɣ-tʋ ɖoŋ ɖoŋ yɔ, ti-teu kaɣ-ŋ labʋ kɛlɛʋ nɛ pɩkpaɖɩ.
Kpɛlɩkɩ hendu ndʋ tɩ-taa tɔm nɛ ŋñaɣ pana nɛ tɩcaɣ ña-ñʋʋ taa.
Makɩ-tʋ tataɣ yɔɔ nɛ ŋteɣ-tʋ nɛ ŋtɩŋɩɣ minziiki. Lakɩ mbʋ tam sakɩyɛ nɛ pɩkɔɔ nɛ pɩsɩɩnɩ alɩwaatʋ ndʋ ŋsɩm ti-teu camɩyɛ yɔ.
Ɩkpaɣ mɩ-hɔʋ taa Bibl kpɛlɩkʋʋ alɩwaatʋ natʋyʋ pazɩ nɛ ɩkpɛlɩkɩɣnɩ hendu kɩfatʋ ndʋ nɛ pɩkɔɔ pɩsɩɩnɩ alɩwaatʋ ndʋ hɔʋ kpeekpe sɩm ti-teu camɩyɛ yɔ.
5 Fenasɩ nzɩ sɩkɔŋ yɔ sɩ-taa, ye palabɩ ɖʋtʋ se pɛtɛzɩnɩ Ɛsɔ sɛtʋ kediɣzaɣ nɛ hendu kɩfatʋ natʋyʋ yɔ, pɩwɛɛ se peyele nɛ koobiya welisi ti-minziiki tam kʋɖʋm pʋcɔ nɛ koobiya tee hendu ndʋ nɛ patɩŋɩɣ ti-minziiki ɛzɩ ɖiteu hendu lɛɛtʋ ɖɔɖɔ yɔ.
6 Toovenim lɛ, ɛzɩma ɖɩkpɛndɩɣ ɖɔ-nɔsɩ nɛ ɖiteɣ hendu nɛ ɖɩɖɛyɩɣ Yehowa ɖe-kediɣzisi taa yɔ, pɩhaɣ-ɖʋ taa leleŋ pɩdɩɩfɛyɩ. Pʋyɔɔ lɛ, ye pɩtɩkɛnɩ kɩcɛyɩm sɔsɔm nabʋyʋ yɔɔ yɔ, pɩtɩpɔzɩ kaaʋ se ɖɩkʋyɩ ɖɩlɩɩ alɩwaatʋ ndʋ pɩtalɩɣ se ɖitee hendu ɖe-kediɣzisi taa yɔ.
7 Ðɩpɩzɩɣ nɛ ɖɩtɩŋnɩ nʋmɔʋ nakʋyʋ yɔɔ ɖɔɖɔ nɛ ɖɩwɩlɩ se ɖɩsɔɔlɩ hendu ndʋ ɖiteɣ Yehowa yɔ nɛ ɖɩɖʋʋ ñamtʋ tɩ-yɔɔ. Ðe-kigbeɣliŋ taa lɛ, pʋcɔ nɛ kigbeɣluu hɔɔlʋʋ nakʋyʋ paɣzɩ lɛ, pamakɩ minziikiwaa nabɛyɛ. Tam nabʋlɛ pɩnaɣ taa lɛ, koobiya halaa nɛ abalaa nabɛyɛ lɩɣnɩ ajɛɛ hɔɔlɩŋ ndɩ ndɩ taa nɛ pɛkɛyɩɣ pa-maɣmaɣ pe-liidiye nɛ pɔɖɔŋnɩ nʋmɔʋ nɛ powoki Patterson, Niyuu Yɔrɩkɩ tɛtʋ taa nɛ palakɩ minziikiwaa kɩbama mba se ɖɩsamnɩ Yehowa. Pʋyɔɔ lɛ, ye tɔm yɔɔdɩyaa yayʋ ɛlɩwa nɛ esusi se ɖɩcaɣ ɖo-lona taa nɛ ɖiwelisi minziikiwaa mba koobiya panɛ pɔñɔɔzaa yɔ, pɩwɛɛ se ɖɩla mbʋ. Ye ɖɩlakɩ mbʋ yɔ, pɩsɩɣnɩ-ɖʋ nɛ ɖɩñɔɔzɩ ɖa-laŋa camɩyɛ nɛ ɖiwelisi tɔm ndʋ pakaɣ yɔɔdʋʋ yɔ.—Ɛsd. 7:10.
8 Ðɩtɛzɩɣ sɔnɔ Kediɣzaɣ nɛ hendu kɩfatʋ ndʋ yɔ, tɩ-ñʋʋ yɔ, “Kewiyaɣ paɣzɩ ka-tʋmɩyɛ—Kɔkɔɔ lɔŋ!” Hendu tʋnɛ, paañɩɣ tɩ-yɔɔ niye Watch Tower Bible and Tract Society of Pennsylvania pɩnaɣ taa kediɣzaɣ taa. Pɔñɔɔzɩ hendu ndʋ tɩ-taa tɔm camɩyɛ se tɩtɔzʋʋ-ɖʋ se Ɛsɔ Kewiyaɣ paɣzʋʋ ka-tʋmɩyɛ yɔ, pɩlakɩ pɩnzɩ mɩnʋʋ yɔ.
9 Pɩtʋʋ fɛyɩ se hendu kɩfatʋ tʋnɛ, tɩkɛnɩ ‘kɩbam’ mbʋ pɩlɩnɩ Yehowa cɔlɔ yɔ. (Mat. 12:35a) Ðɩñaɣ pana nɛ ɖa-tɩŋa payɩ ɖɩkpɛlɩkɩ hendu kɩfatʋ tʋnɛ nɛ ɖitee-tʋ nɛ ɖa-laŋɩyɛ pilim nɛ ɖɩɖɛyɩnɩ ɖɛ-Ɛsɔ Yehowa nɛ ɖɩɖʋ-ɩ hɩɖɛ ɛzɩ pɩpɔzʋʋ yɔ.—Keɣa 146:1.